॥ River Yamuna Ashtakam 1 Telugu Lyrics ॥
॥ యమునాష్టకమ్ ౧ ॥
॥ శ్రీః ॥
మురారికాయకాలిమాలలామవారిధారిణీ
తృణీకృతత్రివిష్టపా త్రిలోకశోకహారిణీ ।
మనోఽనుకూలకూలకుఞ్జపుఞ్జధూతదుర్మదా
ధునోతు నో మనోమలం కలిన్దనన్దినీ సదా ॥ ౧ ॥
మలాపహారివారిపూరిభూరిమణ్డితామృతా
భృశం ప్రవాతకప్రపఞ్చనాతిపణ్డితానిశా ।
సునన్దనన్దినాఙ్గసఙ్గరాగరఞ్జితా హితా
ధునోతు నో మనోమలం కలిన్దనన్దినీ సదా ॥ ౨ ॥
లసత్తరఙ్గసఙ్గధూతభూతజాతపాతకా
నవీనమాధురీధురీణభక్తిజాతచాతకా ।
తటాన్తవాసదాసహంససంసృతాహ్నికామదా
var1 సంసృతా హి కామదా var2 సంవృతాహ్నికామదా
ధునోతు నో మనోమలం కలిన్దనన్దినీ సదా ॥ ౩ ॥
విహారరాసస్వేదభేదధీరతీరమారుతా
గతా గిరామగోచరే యదీయనీరచారుతా ।
ప్రవాహసాహచర్యపూతమేదినీనదీనదా
ధునోతు నో మనోమలం కలిన్దనన్దినీ సదా ॥ ౪ ॥
తరఙ్గసఙ్గసైకతాన్తరాతితం సదాసితా
శరన్నిశాకరాంశుమఞ్జుమఞ్జరీ సభాజితా ।
భవార్చనాప్రచారుణామ్బునాధునా విశారదా
ధునోతు నో మనోమలం కలిన్దనన్దినీ సదా ॥ ౫ ॥
జలాన్తకేలికారిచారురాధికాఙ్గరాగిణీ
స్వభర్తురన్యదుర్లభాఙ్గతాఙ్గతాంశభాగినీ ।
స్వదత్తసుప్తసప్తసిన్ధుభేదినాతికోవిదా
ధునోతు నో మనోమలం కలిన్దనన్దినీ సదా ॥ ౬॥
జలచ్యుతాచ్యుతాఙ్గరాగలమ్పటాలిశాలినీ
విలోలరాధికాకచాన్తచమ్పకాలిమాలినీ ।
సదావగాహనావతీర్ణభర్తృభృత్యనారదా
ధునోతు నో మనోమలం కలిన్దనన్దినీ సదా ॥ ౭ ॥
సదైవ నన్దినన్దకేలిశాలికుఞ్జమఞ్జులా
తటోత్థఫుల్లమల్లికాకదమ్బరేణుసూజ్జ్వలా ।
జలావగాహినాం నృణాం భవాబ్ధిసిన్ధుపారదా
ధునోతు నో మనోమలం కలిన్దనన్దినీ సదా ॥ ౮ ॥
ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్ఛంకరభగవతః కృతౌ
యమునాష్టకమ్ సమ్పూర్ణమ్ ॥
– Chant Stotra in Other Languages –
River Yamuna Ashtakam » Sri Yamunashtakam 1 Lyrics in Sanskrit » English » Bengali » Gujarati » Kannada » Malayalam » Odia » Tamil