॥ Lakshmi Sahasranama Stotram Bengali Lyrics ॥
॥ শ্রীলক্ষ্মীসহস্রনামস্তোত্রম্ 2 ॥
(নারদীয়োপপুরাণতঃ)
মিত্রসহ উবাচ-
ভগবন্ সর্বধর্মজ্ঞ সর্বশাস্ত্রবিশারদ ।
পাবনানাং হি মহসাং নিদানং ত্বং মহামুনে ॥ ১ ॥
অতর্কিতেনাগমেন তব তুষ্টোঽস্মি সর্বদা ।
হৃদয়ং নির্বৃতং মেঽদ্য মহাদুঃখৌঘপীডিতম্ ॥ ২ ॥
দেবা গৃহেষু সন্তুষ্টাঃ তারিতাঃ পিতরশ্চ য়ে ।
চিরায় মে মনস্যস্তি সংশয়ো বলবত্তরঃ ॥ ৩ ॥
পৃচ্ছামি ত্বামহং তং বৈ উত্তরং দাতুমর্হসি ।
ইষ্টং ময়া চ বহুভিঃ য়জ্ঞৈস্সম্পূর্ণদক্ষিণৈঃ ॥ ৪ ॥
দানানি চ মহার্হাণি পাত্রেষু স্পর্শিতানি চ ।
অনৃতং নোক্তপূর্বং মে প্রজা ধর্মেণ পালিতাঃ ॥ ৫ ॥
পতিব্রতা মহাভাগা নিত্যং সুস্নিগ্ধভাষিণী ।
পূজ্যান্ গৃহাগতান্ সর্বানারাধয়তি নিত্যদা ॥ ৬ ॥
তথা হি সেবতে দেবান্ য়থাঽহমপি নাশকম্ ।
ভার্যাঽনুকূলা মে দেবী মদয়ন্তী মনস্বিনী ॥ ৭ ॥
তথাপি দুঃখং সম্প্রাপ্তং ময়া দ্বাদশবার্ষিকম্ ।
রাক্ষসত্বং মহাঘোরং সম্পূর্ণনরকোপমম্ ॥ ৮ ॥
তত্র বৃত্তানি কার্যাণি স্মৃত্বা মে বেপতে মনঃ ।
ভক্ষিতাঃ কতি বা তত্র দ্বিপদাশ্চ চতুষ্পদাঃ ॥ ৯ ॥
তত্সর্বমস্তু তন্নৈব চিন্ত্যতে শাপহেতুকম্ ।
গুরুপুত্রে গুরুসমঃ শক্তিঃ সম্ভক্ষিতো ময়া ॥ ১০ ॥
ব্রহ্মহত্যাকৃতং পাপং কথং মে ন ভবিষ্যতি ।
শাপাদ্রাক্ষসতা কালে প্রাপ্তা য়দ্যপি তন্ময়া ॥ ১১ ॥
রাত্রিন্দিবং মে দহতি হৃদয়ং হি সবন্ধনম্ ।
ন রোচতে মে ভুক্তির্বা সুপ্তির্বাপি গতির্বহিঃ ॥ ১২ ॥
মহাবন্ধনমেতন্মে রাজ্যং হি মনুতে মনঃ ।
কিন্নু তত্কারণং য়েন প্রাপ্তোঽহং তাদৃশীং শুচম্ ॥ ১৩ ॥
বক্তুমর্হসি সর্বজ্ঞ তত্প্রায়শ্চিত্তবিস্তরম্ ।
উপাদিশ মহামন্ত্রতন্ত্রজ্ঞ প্রণতায় মে ॥ ১৪ ॥
শ্রীনারদ উবাচ-
শৃণু রাজন্প্রবক্ষ্যামি প্রাগ্জন্মচরিতং তব ।
য়েনেদৃশং ত্বয়া প্রাপ্তং দুঃখমত্যন্তদুস্সহম্ ॥ ১৫ ॥
পুরাভূদ্বাহ্মণঃ কশ্চিত্তাম্রপর্ণিনদীতটে ।
দরিদ্রোঽত্যন্তদুর্ভাগ্যঃ বহুপুত্রকুটুম্ববান্ ॥ ১৬ ॥
কৃষ্ণশর্মেতি বিখ্যাতঃ বেদবেদাঙ্গতত্ববিত্ ।
তব ভার্যাঽভবত্পুণ্যা সদা চণ্ডী কুরূপিণী ॥ ১৭ ॥
কিন্তু শক্তিব্রতাচারেঽপ্রতিমা শুদ্ধমানসা ।
কটুবাঙ্মানিনী নাম্না ক্ষুত্পিপাসার্দিতা সদা ॥ ১৮ ॥
দারিদ্র্যশমনার্থং ত্বং সর্বলক্ষণলক্ষিতম্ ।
কল্পয়িত্ব শ্রিয়ো মূর্তিং ভক্ত্যা পূজিতবান্গৃহে ॥ ১৯ ॥
মানিন্যপ্যন্বহং ভক্ত্যা গোময়ালেপনাদিভিঃ ।
রঙ্গবল্যাপ্যলঙ্কৃত্য পূজাস্থানং গৃহে তব ॥ ২০ ॥
পায়সাপূপনৈবেদ্যৈঃ সা ত্বাং পর্যচরন্মুদা ।
একদা ভৃগুবারে ত্বাং সহস্রকমলার্চনম্ ॥ ২১ ॥
বিধাতুং বিষ্ণুপত্ন্যাস্তু পদ্মান্যানয়িতুং গতঃ ।
গতেঽর্ধদিবসে গেহং প্রাপ্য খিন্নোঽনয়োদিতঃ ॥ ২২ ॥
হন্তার্ধদিবসোঽতীতঃ কদা দেবানসঙ্খ্যকান্ ।
অভ্যর্চ্যাথ শ্রিয়ো দেব্যাঃ সহস্রকমলার্চনম্ ॥ ২৩ ॥
কৃত্বা ভুক্ত্বা কদাঽন্নং নো দর্শয়িষ্যসি তাম্যতাম্ ।
বালা রুদন্তি ক্ষুধিতাঃ পক্বং ভবতি শীতলম্ ॥ ২৪ ॥
ইতি তস্যাং ভর্ত্সয়ন্ত্যাং তূষ্ণীং পূজামধাদ্ভবান্ ।
সহস্রপদ্মপূজায়াং চলন্ত্যাং মধ্যতস্তু সা ॥ ২৫ ॥
অসমর্থা ক্ষুধং সোঢুং বালৈস্সহ বুভোজ হ ।
তদা ত্বং কুপিতোঽপ্যেনাং ন চ কিঞ্চিদপি ব্রুবন্ ॥ ২৬ ॥
গৃহান্নির্গত্য শান্তাত্মা কিং কৃত্যমিতি চিন্তয়ন্ ।
নির্যান্তং ত্বাং তু সা প্রাহ ক্ব গচ্ছসি সুদুর্মতে ॥ ২৭ ॥
অনির্বর্ত্য শ্রিয়ঃ পূজাং প্রারব্ধাং সুমহাদরম্ ।
পৃথঙ্নৈবেদ্যমস্তীহ নাস্মাভির্ভক্ষিতং হি তত্ ॥ ২৮ ॥
কালাত্যয়াত্ক্ষুধার্তানাং ভুক্তিং দেবী সহিষ্যতে ।
তদ্বিধেহি শ্রিয়ঃ পূজাং মা স্ম নিষ্কারণং ক্রুধঃ ॥ ২৯ ॥
নরকে মা পতো বুদ্ধ্যা মাং চ পাতয় মা বৃথা ।
ইতি তস্যাং ব্রুবাণায়াং ত্বং গৃহান্নিরগাঃ ক্রুধা ॥ ৩০ ॥
সদ্যঃ সন্যস্য বিপিনেঽবাত্সীস্ত্বং বিধিনা কিল ।
য়তিত্বেঽপি সদা বুদ্ধ্যা পূর্বাশ্রমকথাং স্মরন্ ॥ ৩১ ॥
দারিদ্র্যং সর্বধর্মাণাং প্রত্যূহায় প্রবর্ততে ।
সত্যপ্যস্মিন্ধর্মপত্নী অনুকূলা ভবেদ্যদি ॥ ৩২ ॥
নরস্য জন্ম সুখিতং নান্যথাঽর্থশতৈরপি ।
বন্ধ্যাজানিস্স ভবতু অনুকূলকলত্রবান্ ॥ ৩৩ ॥
লভতে জন্মসাফল্যমেতদ্দেব্যাঃ প্রসাদজম্ ।
ইত্যেবং চিন্তয়ন্নেব ত্যক্ত্বা দেহং তরোস্তলে ॥ ৩৪ ॥
ইক্ষ্বাকুবংশে জাতস্ত্বং রাজা মিত্রসহাভিধঃ ।
রুষা পরবশো য়স্মাদসমাপ্য শ্রিয়োঽর্চনম্ ॥ ৩৫ ॥
নির্গতোঽসি গৃহাত্তস্মাদ্দুঃখমেতদুপস্থিতম্ ।
সাপি ত্বয়ি বিনির্যাতে পশ্চাত্তাপবতী ভৃশম্ ॥ ৩৬ ॥
প্রক্ষালিতাঙ্ঘ্রিহস্তাঽথ প্রয়তাঽঽচম্য সত্বরম্ ।
নৈবেদ্যং স্বয়মীশ্বর্যৈ প্রণম্য চ নিবেদ্য চ ॥ ৩৭ ॥
অম্ব সর্বস্য লোকস্য জনন্যসি সহস্ব তত্ ।
আগাংসি মম নাগারিকেতনোরঃস্থলালয়ে ॥ ৩৮ ॥
য়স্যাং জাতৌ তু মে ভর্তা তত্পূজাপুণ্যতো ভবেত্ ।
ভবেয়মহমপ্যত্র জাতৌ তং চাপ্নুয়াং য়থা ॥ ৩৯ ॥
কামক্রোধাদিহীনা স্যাং তথাম্বানুগ্রহং কুরু ।
ইতি দেবীং প্রার্থয়ন্তী জীবন্তী কৃচ্ছ্রতো ভুবি ॥ ৪০ ॥
ত্যক্ত্বা দেহং পুনর্জাতা রাজবংশে সুপাবনে ।
মদয়ন্তীতি নাম্না বৈ তব ভার্যাঽভবত্পুনঃ ॥ ৪১ ॥
অভুক্তে ত্বয়ি ভুত্ক্যা সা বন্ধ্যা জাতা বধূমণিঃ ।
উভয়োর্ভবতোর্লক্ষ্মীপূজায়ামপরাধতঃ ॥ ৪২ ॥
উভাবপি মহাদুঃখং প্রাপ্তৌ দ্বাদশবর্ষিকম্ ।
ত্যক্ত্বা রাজ্যং চ কোশঞ্চ দরিদ্রাবতিদুঃখিতৌ ॥ ৪৩ ॥
মা ব্রহ্মহত্যাদোষাত্ত্বং ভৈষী রাজন্ কথঞ্চন ।
য়াং জাতিমনুবিষ্টো হি তাদৃশীং ত্বং ক্রিয়ামধাঃ ॥ ৪৪ ॥
কিন্তু ভূয়শ্চ্যুতে রাজ্যাদ্ভেতব্যং শ্রীপ্রকোপতঃ ।
নাম্নাং তদদ্য শ্রীদেব্যাঃ সহস্রেণ শতেন চ ॥ ৪৫ ॥
অষ্টোত্তরেণ পদ্মানাং পুঞ্জতস্তাং প্রপূজয় ।
ভবেত্তব স্থিরং রাজ্যং দুঃখং নাণ্বপি তে ভবেত্ ॥ ৪৬ ॥
ভার্যা তে সাপি শুশ্রূষাং স্বয়মেব করোতু তে ।
বর্ষমাত্রং পূজিতা সা লক্ষ্মীর্নারায়ণপ্রিয়া ॥ ৪৭ ॥
য়ুবয়োস্সর্বকামানাং দাত্রী স্যান্নাত্র সংশয়ঃ ।
স্ত্রীসঙ্গপ্রতিহন্তাঽস্তি শাপো য়দ্যপি তে প্রভো ॥ ৪৮ ॥
প্রসোষ্যতে চ তনয়ং তব ভার্যা কথঞ্চন ।
পুত্রপৌত্রাভিবৃদ্ধ্যা ত্বং মোদিষ্যসি মহেন্দ্রবত্ ॥ ৪৯ ॥
য়থা পৃষ্টং মহাভাগ দুঃখহেতুস্তবোদিতঃ ।
উক্তস্তত্পরিহারোঽপি কিমিচ্ছসি পুনর্বদ ॥ ৫০ ॥
রাজোবাচ-
ধন্যোঽস্ম্যনুগৃহীতোঽস্মি মহর্ষে কৃপয়া তব ।
মত্তো ন বিদ্যতে কশ্চিল্লোকেঽস্মিন্ ভাগ্যবত্তরঃ ॥ ৫১ ॥
তব পাদাব্জয়ুগলে প্রণামানাং শতং শতম্ ।
করোমি পাহি মাং বিপ্র কুলোত্তংস দয়ানঘ ॥ ৫২ ॥
নাম্নাং সহস্রং শ্রীদেব্যা অষ্টোত্তরশতাধিকম্ ।
প্রব্রূহি মে মুনিশ্রেষ্ঠ পূজায়া বিধিমপ্যথ ॥ ৫৩ ॥
জপস্য চ বিধিং তেষাং নাম্নাং শুশ্রূষবে বদ ।
সূত উবাচ-
ইতি রাজ্ঞা মুনিশ্রেষ্ঠঃ পৃষ্টস্সবিনয়ং ততঃ ॥ ৫৪ ॥
নমস্কৃত্য শ্রিয়ৈ পশ্চাদ্ধ্যাত্বোবাচ মহীপতিম্ ।
শ্রীনারদ উবাচ-
সম্যক্ পৃষ্টং মহারাজ সর্বলোকহিতং ত্বয়া ॥ ৫৫ ॥
বক্ষ্যামি তানি নামানি পূজাঞ্চাপি য়থাক্রমম্ ।
পলমানসুবর্ণেন রজতেনাথ তাম্রতঃ ॥ ৫৬ ॥
চতুর্ভুজাং পদ্মধরাং বরাভয়বিশোভিনীম্ ।
নিষণ্ণাং ফুল্লকমলে চতুর্দন্তৈঃ সিতৈর্গজৈঃ ॥ ৫৭ ॥
সুবর্ণঘণ্টামুখরৈঃ কৃতক্ষীরাভিষেচনাম্ ।
কটকাঙ্গদমঞ্জীররশনাদি বিভূষণৈঃ ॥ ৫৮ ॥
বিভূষিতাং ক্ষৌমবস্ত্রাং সিন্দূরতিলকাঞ্চিতাম্ ।
প্রসন্নবদনাম্ভোজাং প্রপন্নার্তিবিনাশিনীম্ ॥ ৫৯ ॥
ছত্রচামরহস্তাঢ্যৈঃ সেবিতামপ্সরোগণৈঃ ।
কৃত্বৈবং প্রতিমাং তাং চ প্রতিষ্ঠাপ্য য়থাবিধি ॥ ৬০ ॥
শ্রীং লক্ষ্ম্যৈ নম ইত্যেব ধ্যানাবাহনপূর্বকান্ ।
উবচারাংশ্চতুষ্ষষ্টিং কল্পয়েত গৃহে সুধীঃ ॥ ৬১ ॥
প্রতিমায়া অলাভে তু লক্ষ্ম্যাস্সম্প্রাপ্য চালয়ম্ ।
কারয়েদুপচারাংস্তু য়থাবিধ্যর্চকৈর্মুদা ॥ ৬২ ॥
তস্যাপ্যভাবে ত্বালেখ্যে লিখিতাং বর্ণকৈস্তথা ।
পূজয়েত্তস্য চাভাবে কৃতাং চন্দনদারুণা ॥ ৬৩ ॥
তদভাবে চন্দনেন রচিতাং পূজয়েদ্রমাম্ ।
এষামভাবে বিকচে কমলে কর্ণিকাগতাম্ ॥ ৬৪ ॥
ধ্যাত্বা তথাবিধাং দেবীমাদরেণ প্রপূজয়েত্ ।
কমলানাং সহস্রেণাপ্যষ্টোত্তরশতেন চ ॥ ৬৫ ॥
অর্চয়েদিন্দিরাপাদৌ ধ্যাত্বাভীষ্টানি চেতসি ।
শ্রীদেব্যা নামসাহস্রং অষ্টোত্তরশতাধিকম্ ॥ ৬৬ ॥
অথাতস্সম্প্রবক্ষ্যামি শৃণু নান্যমনা নৃপ ।
পারায়ণপ্রকারঃ ॥
ওঁ অস্য শ্রীমহালক্ষ্মীসহস্রনামস্তোত্রমহামন্ত্রস্য নারদ ঋষিঃ ।
অনুষ্টুপছন্দঃ । শ্রীমহালক্ষ্মীর্দেবতা ।
হ্রাং বীজম্ । হ্রিং শক্তিঃ । হ্রূং কীলকম্ ।
শ্রীমহালক্ষ্মীপ্রসাদসিদ্ধ্যর্থে
শ্রীমহালক্ষ্মীসহস্রনামমন্ত্রজপে বিনিয়োগঃ ॥
ওঁ হ্লাং হিরণ্যবর্ণাং হরিণীং সুবর্ণরজতস্রজাম্ । অঙ্গুষ্ঠাভ্যাণ্ নমঃ ।
মং হ্লীং চন্দ্রাং হিরণ্ময়ীং লক্ষ্মীং জাতবেদো ন আবহ । তর্জনীভ্যাং নমঃ ।
হাং হ্লূং তাং ম আবহ জাতবেদো লক্ষ্মীমনপগামিনীম্ । মধ্যমাভ্যাং নমঃ ।
লং হ্লৈং য়স্যাং হিরণ্যং বিন্দেয়ং গামশ্বম্পুরুষানহম্ । অনামিকাভ্যাং নমঃ ।
ক্ষ্ম্যৈং হ্লৌং শ্রিয়ং দেবীমুপহ্বয়ে শ্রীর্মা দেবী জুষতম্ ।
করতলকরপৃষ্ঠাভ্যাং নমঃ ॥
ওঁ হ্লাং কাংসোস্মিতাং হিরণ্যপ্রাকারামার্দ্রাং জ্বলন্তীং তৃপ্তাং তর্পয়ন্তীম্ ।
হৃদয়ায় নমঃ ।
মং হ্লীং পদ্মে স্থিতাং পদ্মবর্ণাং তামিহোপহ্বয়ে শ্রিয়ম্ ।
শিরসে স্বাহা ।
হাং হ্লূং চন্দ্রাং প্রভাসাং য়শসা জ্বলন্তীং শ্রিয়ং লোকে দেবজুষ্টামুদারাম্ ।
শিখায়ৈ বষট্ ।
লং হ্লৈং তাং পদ্মিনীমীং শরণমহং প্রপদ্যেঽলক্ষ্মীর্মে
নশ্যতাং ত্বাং বৃণে ।
কবচায় হুম্ ।
ক্ষ্ম্যৈং হ্রৌং আদিত্যবর্ণে তপসোঽধিজাতো বনস্পতিস্তব
বৃক্ষোঽথ বিল্বঃ । নেত্রত্রয়ায় বৌষট্ ।
নমঃ হ্লঃ তস্য ফলানি তপসা নুদান্তু মায়ান্তরায়াশ্চ বাহ্যা অলক্ষ্মীঃ ।
অস্ত্রায় ফট্ । ভূর্ভুবস্সুবরোমিতি দিগ্বন্ধঃ ॥
ধ্যানম্-
লক্ষ্মীদেবীং দ্বিপদ্মাভয়বরদকরাং তপ্তকার্তস্বরাভাং
শুভ্রাভ্রাভেভয়ুগ্মদ্বয়করধৃতকুম্ভাদ্ভিরাসিচ্যমানাম্ ।
রত্নৌঘাবদ্ধমৌলিং বিমলতরদুকূলার্তবালেপনাঢ্যাং
পদ্মাক্ষীং পদ্মনাভোরসি কৃতবসতিং পদ্মগাং চিন্তয়ামি ॥
লং পৃথিব্যাত্মিকায়ৈ গন্ধং সমর্পয়ামি ।
হং আকাশাত্মিকায়ৈ পুষ্পাণি সমর্পয়ামি ।
য়ং বায়্বাত্মিকায়ৈ ধূপমাঘ্রাপয়ামি ।
রং বহ্ন্যাত্মিকায়ৈ । দীপং দর্শয়ামি ।
বং অমৃতাত্মিকায়ৈ । অমৃতং নিবেদয়ামি ।
সং সর্বাত্মিকায়ৈ সর্বোপচারান্ সমর্পয়ামি ।
পারায়ণান্তে ওঁ হ্লাং উপৈতু মাং দেবসখঃ কীর্তিশ্চ মণিনা সহ ।
হৃদয়ায় নমঃ ।
মং হ্লীং প্রাদুর্ভূতোঽস্মি রাষ্ট্রেঽস্মিন্কীর্তিমৃদ্ধিং দদাতু মে ।
শিরসে স্বাহা ।
হাং হ্লূং ক্ষুত্পিপাসামলাং জ্যেষ্ঠাং অলক্ষ্মীং নাশয়াম্যহম্ ।
শিখায়ৈ বষট্ ।
লং হ্লৈং অভূতিমসমৃদ্ধিঞ্চ সর্বাং নির্ণুদ মে গৃহাত্ ।
কবচায় হুম্ ।
ক্ষ্ম্যৈং হ্লৌং গন্ধদ্বারাং দুরাধর্ষাং নিত্যপুষ্টাং করীষিণীম্ ।
নৈত্রত্রয়ায় বৌষট্ ।
নমঃ হ্লঃ ঈশ্বরীং সর্বভূতানাং তামিহোপহ্নয়ে শ্রিয়ম্ ।
অস্ত্রায় হট্ ॥
ভূর্ভুবস্সুবরোমিতি দিগ্বিমোকঃ ।
ধ্যানম্ ।
লমিত্যাদি পঞ্চপূজা ।
অথ শ্রীলক্ষ্মীসহস্রনামস্তোত্রম্ ॥
শ্রীনারদ উবাচ –
মহালক্ষ্মীর্মহেশানা মহামায়া মলাপহা ।
বিষ্ণুপত্নী বিধীশার্চ্যা বিশ্বয়োনির্বরপ্রদা ॥ ১ ॥
ধাত্রী বিধাত্রী ধর্মিষ্ঠা ধম্মিল্লোদ্ভাসিমল্লিকা ।
ভার্গবী ভক্তিজননী ভবনাথা ভবার্চিতা ॥ ২ ॥
ভদ্রা ভদ্রপ্রদা ভব্যা ভক্তাভীষ্টফলপ্রদা ।
প্রল়য়স্থা প্রসিদ্ধা মা প্রকৃষ্টৈশ্বর্যদায়িনী ॥ ৩ ॥
বিষ্ণুশক্তির্বিষ্ণুমায়া বিষ্ণুবক্ষঃস্থলস্থিতা ।
বাগ্রূপা বাগ্বিভূতিজ্ঞা বাক্প্রদা বরদা বরা ॥ ৪ ॥
সম্পত্প্রদা সর্বশক্তিঃ সংবিদ্রূপা সমাঽসমা ।
হরিদ্রাভা হরিন্নাথপূজিতা হরিমোহিনী ॥ ৫ ॥
হতপাপা হতখলা হিতাহিতবিবর্জিতা ।
হিতাহিতপরাঽহেয়া হর্ষদা হর্ষরূপিণী ॥ ৬ ॥
বেদশাস্ত্রালিসংসেব্যা বেদরূপা বিধিস্তুতা ।
শ্রুতিঃ স্মৃতির্মতিঃ সাধ্বী শ্রুতাঽশ্রুতধরা ধরা ॥ ৭ ॥
শ্রীঃ শ্রিতাঘধ্বান্তভানুঃ শ্রেয়সী শ্রেষ্ঠরূপিণী ।
ইন্দিরা মন্দিরান্তস্থা মন্দুরাবাসিনী মহী ॥ ৮ ॥
ধনলক্ষ্মীর্ধনকরী ধনিপ্রীতা ধনপ্রদা ।
ধানাসমৃদ্ধিদা ধুর্যা ধুতাঘা ধৌতমানসা ॥ ৯ ॥
ধান্যলক্ষ্মীর্দারিতাঘা দারিদ্র্যবিনিবারিণী ।
বীরলক্ষ্মীর্বীরবন্দ্যা বীরখড্গাগ্রবাসিনী ॥ ১০ ॥
অক্রোধনাঽলোভপরা ললিতা লোভিনাশিনী ।
লোকবন্দ্যা লোকমাতা লোচনাধঃকৃতোত্পলা ॥ ১১ ॥
হস্তিহস্তোপমানোরুঃ হস্তদ্বয়ধৃতাম্বুজা ।
হস্তিকুম্ভোপমকুচা হস্তিকুম্ভস্থলস্থিতা ॥ ১২ ॥
রাজলক্ষ্মী রাজরাজসেবিতা রাজ্যদায়িনী ।
রাকেন্দুসুন্দরী রস্যা রসালরসভাষণা ॥ ১৩ ॥
কোশবৃদ্ধিঃ কোটিদাত্রী কোটিকোটিরবিপ্রভা ।
কর্মারাঢ্যা কর্মগম্যা কর্মণাং ফলদায়িনী ॥ ১৪ ॥
ধৈর্যপ্রদা ধৈর্যরূপা ধীরা ধীরসমর্চিতা ।
পতিব্রতা পরতরপুরুষার্থপ্রদাঽপরা ॥ ১৫ ॥
পদ্মালয়া পদ্মকরা পদ্মাক্ষী পদ্মধারিণী ।
পদ্মিনী পদ্মদা পদ্মা পদ্মশঙ্খাদিসেবিতা ॥ ১৬ ॥
দিব্যা দিব্যাঙ্গরাগাঢ্যা দিব্যাদিব্যস্বরূপধৃত্ ।
দয়ানিধির্দানপরা দানবারাতিভামিনী ॥ ১৭ ॥
দেবকার্যপরা দেবী দৈত্যেন্দ্রপরিপূজিতা ।
নারায়ণী নাদগতা নাকরাজসমর্চিতা ॥ ১৮ ॥
নক্ষত্রনাথবদনা নরসিংহপ্রিয়াঽনলা ।
জগদ্রূপা জগন্নাথা জঙ্গমাজঙ্গমাকৃতিঃ ॥ ১৯ ॥
কবিতা কঞ্জনিলয়া কম্রা কলিনিষেধিনী ।
কারুণ্যসিন্ধুঃ কমলা কমলাক্ষী কুচোন্নতা ॥ ২০ ॥
বলিপ্রিয়া বলিহরী বলিনী বলিসংস্তুতা ।
হীরভূষা হীনদোষা হানিহর্ত্রী হতাসুরা ॥ ২১ ॥
হব্যকব্যার্চিতা হত্যাদিকপাতকনাশিণী ।
বিশুদ্ধসত্ত্বা বিবশা বিশ্ববাধাহরী বধূঃ ॥ ২২ ॥
ব্রহ্মাণী ব্রহ্মজননী ব্রহ্মরূপা বৃহদ্বপুঃ ।
বন্দীকৃতামরবধূমোচিনী বন্ধুরালকা ॥ ২৩ ॥
বিলেশয়াঙ্গনাবন্দ্যা বীভত্সরহিতাঽবলা ।
ভোগিনী ভুবনাধীশা ভোগিভোগশয়াঽভয়া ॥ ২৪ ॥
দামোদরপ্রিয়া দান্তা দাশেশপরিসেবিতা ।
জামদগ্ন্যপ্রিয়া জহ্নুতনয়া পাবনাঙ্ঘিরকা ॥ ২৫ ॥
ক্ষীরোদমথনোদ্ভূতা ক্ষীরাক্তা ক্ষিতিরূপিণী ।
ক্ষেমঙ্করী ক্ষয়করী ক্ষেত্রজ্ঞা ক্ষেত্রদায়িনী ॥ ২৬ ॥
স্বয়ংবৃতাচ্যুতা স্বীয়রক্ষিণী স্বত্বদায়িনী ।
তারকেশমুখী তার্ক্ষ্যস্বামিনী তারিতাশ্রিতা ॥ ২৭ ॥
গুণাতীতা গুণবতী গুণ্যা গরুডসংস্থিতা ।
গেয়া গয়াক্ষেত্রগতা গানতুষ্টা গতিপ্রদা ॥ ২৮ ॥
শেষরূপা শেষশায়িভামিনী শিষ্টসম্মতা ।
শেবধিঃ শোষিতাশেষভুবনা শোভনাকৃতিঃ ॥ ২৯ ॥
পাঞ্চরাত্রার্চিতা পাঞ্চজন্যধার্যঙ্কবাসিনী ।
পাষণ্ডদ্বেষিণী পাশমোচনী পামরপ্রিয়া ॥ ৩০ ॥
ভয়ঙ্করী ভয়হরী ভর্তৃভক্তা ভবাপহা ।
হ্রীর্হ্রীমতী হৃততমাঃ হতমায়া হতাশুভা ॥ ৩১ ॥
রঘুবংশস্নুষা রামা রম্যা রামপ্রিয়া রমা ।
সীরধ্বজসুতা সীতা সীমাতীতগুণোজ্জ্বলা ॥ ৩২ ॥
জানকী জগদানন্দদায়িনী জগতীভবা ।
ভূগর্ভসম্ভবা ভূতিঃ ভূষিতাঙ্গী ভৃতানতা ॥ ৩৩ ॥
বেদস্তবা বেদবতী বৈদেহী বেদবিত্প্রিয়া ।
বেদান্তবেদ্যা বীর্যাঢ্যা বীরপত্নী বিশিষ্টধীঃ ॥ ৩৪ ॥
শিবচাপারোপপণা শিবা শিবপরার্চিতা ।
সাকেতবাসিনী সাধুস্বান্তগা স্বাদুভক্ষিণী ॥ ৩৫ ॥
গুহাগতা গুহনতা গুহাগতমুনিস্তুতা ।
দরস্মিতা দনুজসংহর্ত্রী দশরথস্নুষা ॥ ৩৬ ॥
দায়প্রদা দানফলা দক্ষা দাশরথিপ্রিয়া ।
কান্তা কান্তারগা কাম্যা কারণাতীতবিগ্রহা ॥ ৩৭ ॥
বীরা বিরাধসংহর্ত্রী বিশ্বমায়াবিধায়িনী ।
বেদ্যা বৈদ্যপ্রিয়া বৈদ্যা বেধোবিষ্ণুশিবাকৃতিঃ ॥ ৩৮ ॥
খরদূষণকালাগ্নিঃ খরভানুকুলস্নুষা ।
শূরা শূর্পণখাভঙ্গকারিণী শ্রুতবল্লভা ॥ ৩৯ ॥
সুবর্ণমৃগতৃষ্ণাঢ্যা সুবর্ণসদৃশাঙ্গকা ।
সুমিত্রাসুখদা সূতসংস্তুতা সুতদারদা ॥ ৪০ ॥
সুমিত্রানুগ্রহপরা সুমন্ত্রা সুপ্রতিষ্ঠিতা ।
শ্যামা শ্যামলনেত্রান্তা শ্যামন্যগ্রোধসেবিনী ॥ ৪১ ॥
তুঙ্গস্থানপ্রদা তুঙ্গা গঙ্গাপ্রার্থনতত্পরা ।
গতিপ্রিয়া গর্ভরূপা গতির্গতিমতী চ গৌঃ ॥ ৪২ ॥
গর্বদূরা গর্বহরী গতিনির্জিতহংসিকা ।
দশাননবধোদ্যুক্তা দয়াসিন্ধুর্দশাতিগা ॥ ৪৩ ॥
সেতুহেতুর্হেতুহীনা হেতুহেতুমদাত্মিকা ।
হনূমত্স্বামিনী হৃষ্টা হৃষ্টপুষ্টজনস্তুতা ॥ ৪৪ ॥
বামকেশী বামনেত্রী বাদ্যা বাদিজয়প্রদা ।
ধনধান্যকরী ধর্ম্যা ধর্মাধর্মফলপ্রদা ॥ ৪৫ ॥
সমুদ্রতনয়া স্তুত্যা সমুদ্রা সদ্রসপ্রদা ।
সামপ্রিয়া সামনুতা সান্ত্বোক্তিঃ সায়ুধা সতী ॥ ৪৬ ॥
শীতীকৃতাগ্নিঃ শীতাংশুমুখী শীলবতী শিশুঃ ।
ভস্মীকৃতাসুরপুরা ভরতাগ্রজভামিনী ॥ ৪৭ ॥
রাক্ষসীদুঃখদা রাজ্ঞী রাক্ষসীগণরক্ষিণী ।
সরস্বতী সরিদ্রূপা সন্নুতা সদ্গতিপ্রদা ॥ ৪৮ ॥
ক্ষমাবতী ক্ষমাশীলা ক্ষমাপুত্রী ক্ষমাপ্রদা ।
ভর্তৃভক্তিপরা ভর্তৃদৈবতা ভরতস্তুতা ॥ ৪৯ ॥
দূষণারাতিদয়িতা দয়িতালিঙ্গনোত্সুকা ।
অল্পমধ্যাঽল্পধীদূরা কল্পবল্লী কলাধরা ॥ ৫০ ॥
সুগ্রীববন্দ্যা সুগ্রীবা ব্যগ্রীভাবাবিতানতা ।
নীলাশ্মভূষা নীলাদিস্তুতা নীলোত্পলেক্ষণা ॥ ৫১ ॥
ন্যায়্যা ন্যায়পরাঽঽরাধ্যা ন্যায়ান্যায়ফলপ্রদা ।
পুণ্যদা পুণ্যলভ্যা চ পুরুষোত্তমভামিনী ॥ ৫২ ॥
পুরুষার্থপ্রদা পুণ্যা পণ্যা ফণিপতিস্তুতা ।
অশোকবনিকাস্থানাঽশোকা শোকবিনাশিনী ॥ ৫৩ ॥
শোভারূপা শুভা শুভ্রা শুভ্রদন্তা শুচিস্মিতা ।
পুরুহূতস্তুতা পূর্ণা পূর্ণরূপা পরেশয়া ॥ ৫৪ ॥
দর্ভাগ্রধীর্দহরগা দর্ভব্রহ্মাস্ত্রভামিনী ।
ত্রৈলোক্যমাতা ত্রৈলোক্যমোহিনী ত্রাতবায়সা ॥ ৫৫ ॥
ত্রাণৈককার্যা ত্রিদশা ত্রিদশাধীশসেবিতা ।
লক্ষ্মণা লক্ষ্মণারাধ্যা লক্ষ্মণাগ্রজনায়িকা ॥ ৫৬ ॥
লঙ্কাবিনাশিনী লক্ষ্যা ললনা ললিতাশয়া ।
তারকাখ্যপ্রিয়া তারা তারিকা তার্ক্ষ্যগা তরিঃ ॥ ৫৭ ॥
তাটকারাতিমহিষী তাপত্রয়কুঠারিকা ।
তাম্রাধরা তার্ক্ষ্যনুতা তাম্রাক্ষী তারিতানতা ॥ ৫৮ ॥
রঘুবংশপতাকা শ্রীরঘুনাথসধর্মিণী ।
বনপ্রিয়া বনপরা বনজাক্ষী বিনীতিদা ॥ ৫৯ ॥
বিদ্যাপ্রিয়া বিদ্বদীড্যা বিদ্যাঽবিদ্যাবিনাশিনী ।
সর্বাধারা শমপরা শরভঙ্গমুনিস্তুতা ॥ ৬০ ॥
বিল্বপ্রিয়া বলিমতী বলিসংস্তুতবৈভবা ।
বলিরাক্ষসসংহর্ত্রী বহুকা বহুবিগ্রহা ॥ ৬১ ॥
ক্ষত্রিয়ান্তকরারাতিভার্যা ক্ষত্রিয়বংশজা ।
শরণাগতসংরক্ষা শরচাপাসিপূজিতা ॥ ৬২ ॥
শরীরভাজিতরতিঃ শরীরজহরস্তুতা ।
কল্যাণী করুণামূর্তিঃ কলুষঘ্নী কবিপ্রিয়া ॥ ৬৩ ॥
অচক্ষুরশ্রুতিরপাদাপ্রাণা চামনা অধীঃ ।
অপাণিপাদাঽপ্যব্যক্তা ব্যক্তা ব্যঞ্জিতবিষ্টপা ॥ ৬৪ ॥
শমীপ্রিয়া সকলদা শর্মদা শর্মরূপিণী ।
সুতীক্ষ্ণবন্দনীয়াঙ্ঘ্রিঃ সুতবদ্বত্সলা সুধীঃ ॥ ৬৫ ॥
সুতীক্ষ্ণদণ্ডা সুব্যক্তা সুতীভূতজগত্ত্রয়া ।
মধুরা মধুরালাপা মধুসূদনভামিনী ॥ ৬৬ ॥
মাধ্বী চ মাধবসতী মাধবীকুসুমপ্রিয়া ।
পরা পরভৃতালাপা পরাপরগতিপ্রদা ॥ ৬৭ ॥
বাল্মীকিবদনাম্ভোধিসুধা বলিরিপুস্তুতা ।
নীলাঙ্গদাদিবিনুতা নীলাঙ্গদবিভূষিতা ॥ ৬৮ ॥
বিদ্যাপ্রদা বিয়ন্মধ্যা বিদ্যাধরকৃতস্তবা ।
কুল্যা কুশলদা কল্যা কলা কুশলবপ্রসূঃ ॥ ৬৯ ॥
বশিনী বিশদা বশ্যা বন্দ্যা বন্দারুবত্সলা ।
মাহেন্দ্রী মহদা মহ্যা মীনাক্ষী মীনকেতনা ॥ ৭০ ॥
কমনীয়া কলামূর্তিঃ কুপিতাঽকুপিতা কৃপা ।
অনসূয়াঙ্গরাগাঙ্কাঽনসূয়া সূরিবন্দিতা ॥ ৭১ ॥
অম্বা বিম্বাধরা কম্বুকন্ধরা মন্থরা উমা ।
রামানুগাঽঽরামচরী রাত্রিঞ্চরভয়ঙ্করী ॥ ৭২ ॥
একবেণীধরা ভূমিশয়না মলিনাম্বরা ।
রক্ষোহরী গিরিলসদ্বক্ষোজা জ্ঞানবিগ্রহা ॥ ৭৩ ॥
মেধা মেধাবিনী মেধ্যা মৈথিলী মাতৃবর্জিতা ।
অয়োনিজা বয়োনিত্যা পয়োনিধিসুতা পৃথুঃ ॥ ৭৪ ॥
বানরর্ক্ষপরীবারা বারিজাস্যা বরান্বিতা ।
দয়ার্দ্রাঽভয়দা ভদ্রা নিদ্রামুদ্রা মুদায়তিঃ ॥ ৭৫ ॥
গৃধ্রমোক্ষপ্রদা গৃধ্নুঃ গৃহীতবরমালিকা ।
শ্বশ্রেয়সপ্রদা শশ্বদ্ভবা শতধৃতিপ্রসূঃ ॥ ৭৬ ॥
শরত্পদ্মপদা শান্তা শ্বশুরার্পিতভূষণা ।
লোকাধারা নিরানন্দা নীরাগা নীরজপ্রিয়া ॥ ৭৭ ॥
নীরজা নিস্তমা নিঃস্বা নীরীতির্নীতিনৈপুণা ।
নারীমণির্নরাকারা নিরাকারাঽনিরাকৃতা ॥ ৭৮ ॥
কৌমারী কৌশলনিধিঃ কৌশিকী কৌস্তুভস্বসা ।
সুধাকরানুজা সুভ্রূঃ সুজাতা সোমভূষণা ॥ ৭৯ ॥
কালী কলাপিনী কান্তিঃ কৌশেয়াম্বরমণ্ডিতা ।
শশক্ষতজসংরক্তচন্দনালিপ্তগাত্রকা ॥ ৮০ ॥
মঞ্জীরমণ্ডিতপদা মঞ্জুবাক্যা মনোরমা ।
গায়ত্র্যর্থস্বরূপা চ গায়ত্রী গোগতিপ্রদা ॥ ৮১ ॥
ধন্যাঽক্ষরাত্মিকা ধেনুঃ ধার্মিকা ধর্মবর্ধিনী ।
এলালকাঽপ্যেধমানকৃপা কৃসরতর্পিতা ॥ ৮২ ॥
কৃষ্ণা কৃষ্ণালকা কৃষ্টা কষ্টঘ্নী খণ্ডিতাশরা ।
কলালাপা কলহকৃদ্দূরা কাব্যাব্ধিকৌমুদী ॥ ৮৩ ॥
অকারণা কারণাত্মা কারণাবিনিবর্তিনী ।
কবিপ্রিয়া কবনদা কৃতার্থা কৃষ্ণভামিনী ॥ ৮৪ ॥
রুক্মিণী রুক্মিভগিনী রুচিরা রুচিদা রুচিঃ ।
রুক্মপ্রিয়া রুক্মভূষা রূপিণী রূপবর্জিতা ॥ ৮৫ ॥পৃ
অভীষ্মা ভীষ্মতনয়া ভীতিহৃদ্ভূতিদায়িনী ।
সত্যা সত্যব্রতা সহ্যা সত্যভামা শুচিব্রতা ॥ ৮৬ ॥
সম্পন্না সংহিতা সম্পত্ সবিত্রী সবিতৃস্তুতা ।
দ্বারকানিলয়া দ্বারভূতা দ্বিপদগা দ্বিপাত্ ॥ ৮৭ ॥
একৈকাত্মৈকরূপৈকপত্নী চৈকেশ্বরী প্রসূঃ ।
অজ্ঞানধ্বান্তসূর্যার্চিঃ দারিদ্র্যাগ্নিঘনাবলী ॥ ৮৮ ॥
প্রদ্যুম্নজননী প্রাপ্যা প্রকৃষ্টা প্রণতিপ্রিয়া ।
বাসুদেবপ্রিয়া বাস্তুদোষঘ্নী বার্ধিসংশ্রিতা ॥ ৮৯ ॥
বত্সলা কৃত্স্নলাবণ্যা বর্ণ্যা গণ্যা স্বতন্তিরকা ।
ভক্তা ভক্তপরাধীনা ভবানী ভবসেবিতা ॥ ৯০ ॥
রাধাপরাধসহনী রাধিতাশেষসজ্জনা ।
কোমলা কোমলমতিঃ কুসুমাহিতশেখরা ॥ ৯১ ॥
কুরুবিন্দমণিশ্রেণীভূষণা কৌমুদীরুচিঃ ।
অম্লানমাল্যা সম্মানকারিণী সরয়ূরুচিঃ ॥ ৯২ ॥
কটাক্ষনৃত্যত্করুণা কনকোজ্জ্বলভূষণা ।
নিষ্টপ্তকনকাভাঙ্গী নীলকুঞ্চিতমূর্ধজা ॥ ৯৩ ॥
বিশৃঙ্খলা বিয়োনিস্থা বিদ্যমানা বিদাংবরা ।
শৃঙ্গারিণী শিরীষাঙ্গী শিশিরা শিরসি স্থিতা ॥ ৯৪ ॥
সূর্যাত্মিকা সূরিনম্যা সূর্যমণ্ডলবাসিনী ।
বহ্নিশৈত্যকরী বহ্নিপ্রবিষ্টা বহ্নিশোভিতা ॥ ৯৫ ॥
নির্হেতুরক্ষিণী নিষ্কাভরণা নিষ্কদায়িনী ।
নির্মমা নির্মিতজগন্নিস্তমস্কা নিরাশ্রয়া ॥ ৯৬ ॥
নিরয়ার্তিহরী নিঘ্না নিহিতা নিহতাসুরা ।
রাজ্যাভিষিক্তা রাজ্যেশী রাজ্যদা রাজিতাশ্রিতা ॥ ৯৭ ॥
রাকেন্দুবদনা রাত্রিচরঘ্নী রাষ্ট্রবল্লভা ।
শ্রিতাচ্যুতপ্রিয়া শ্রোত্রী শ্রীদামসখবল্লভা ॥ ৯৮ ॥
রমণী রমণীয়াঙ্গী রমণীয়গুণাশ্রয়া ।
রতিপ্রিয়া রতিকরী রক্ষোঘ্নী রক্ষিতাণ্ডকা ॥ ৯৯ ॥
রসরূপা রসাত্মৈকরসা রসপরাশ্রিতা ।
রসাতলস্থিতা রাসতত্পরা রথগামিনী ॥ ১০০ ॥
অশ্বারূঢা গজারূঢা শিবিকাতলশায়িনী ।
চলত্পাদা চলদ্বেণী চতুরঙ্গবলানুগা ॥ ১০১ ॥
চঞ্চচ্চন্দ্রকরাকারা চতুর্থী চতুরাকৃতিঃ ।
চূর্ণীকৃতাশরা চূর্ণালকা চূতফলপ্রিয়া ॥ ১০২ ॥
শিখাশীঘ্রা শিখাকারা শিখাবিধৃতমল্লিকা ।
শিক্ষাশিক্ষিতমূর্খালিঃ শীতাঽশীতা শতাকৃতিঃ ॥ ১০৩ ॥
বৈষ্ণবী বিষ্ণুসদৃশী বিষ্ণুলোকপ্রদা বৃষা ।
বীণাগানপ্রিয়া বীণা বীণাধরমুনিস্তুতা ॥ ১০৪ ॥
বৈদিকী বৈদিকাচারপ্রীতা বৈদূর্যভূষণা ।
সুন্দরাঙ্গী সুহৃত্স্ফীতা সাক্ষিণী সাক্ষমালিকা ॥ ১০৫ ॥
ক্রিয়া ক্রিয়াপরা ক্রূরা ক্রূররাক্ষসহারিণী ।
তল্পস্থা তরণিস্থানা তাপত্রয়নিবারিণী ॥ ১০৬ ॥
তীর্ণপ্রতিজ্ঞা তীর্থেশী তীর্থপাদা তিথিপ্রিয়া ।
চর্যা চরণদা চীর্ণা চীরাঙ্কা চত্বরস্থিতা ॥ ১০৭ ॥
লতা লতাঙ্গী লাবণ্যা লঘ্বী লক্ষ্যাশরালয়া ।
লীলা লীলাহতখলা লীনা লীঢা শুভাবলিঃ ॥ ১০৮ ॥
লূতোপমানা লূনাঘা লোলাঽলোলবিভূতিদা ।
অমর্ত্যা মর্ত্যসুলভা মানুষী মানবী মনুঃ ॥ ১০৯ ॥
সুগন্ধা সুহিতা সূক্ষ্মা সূক্ষ্মমধ্যা সুতোজ্জ্বলা ।
মণির্মণিমতী মঞ্জুগমনা মহিতা মুনিঃ ॥ ১১০ ॥
মিতাঽমিতসুখাকারা মীলিতা মীনলোচনা ।
গোমতী গোকুলস্থানা গোদা গোকুলবাসিনী ॥ ১১১ ॥
গজেন্দ্রগামিনী গম্যা মাদ্রী মায়াবিনী মধুঃ ।
ত্রিলোচননুতা ত্রিষ্টুবনষ্টুপ্পঙ্ক্তিরূপিণী ॥ ১১২ ॥
দ্বিপাত্ত্রিপাদষ্টপদী নবপাচ্চ চতুষ্পদী ।
পঙ্ক্ত্যাননোপদেষ্ট্রী চ শারদা পঙ্ক্তিপাবনী ॥ ১১৩ ॥
শেখরীভূতশীতাংশুঃ শেষতল্পাধিশায়িনী ।
শেমুষী মুষিতাশেষপাতকা মাতৃকাময়ী ॥ ১১৪ ॥
শিববন্দ্যা শিখরিণী হরিণী করিণী সৃণিঃ ।
জগচ্চক্ষুর্জগন্মাতা জঙ্গমাজঙ্গমপ্রসূঃ ॥ ১১৫ ॥
সর্বশব্দা সর্বমুক্তিঃ সর্বভক্তিস্সমাহিতা ।
ক্ষীরপ্রিয়া ক্ষালিতাঘা ক্ষীরাম্বুধিসুতাঽক্ষয়া ॥ ১১৬ ॥
মায়িনী মথনোদ্ভূতা মুগ্ধা দুগ্ধোপমস্থিতা ।
বশগা বামনয়না হংসিনী হংসসেবিতা ॥ ১১৭ ॥
অনঙ্গাঽনঙ্গজননী সুতুঙ্গপদদায়িনী ।
বিশ্বা বিশ্বেডিতা বিশ্বধাত্রী বিশ্বাধিকার্থদা ॥ ১১৮ ॥
গদ্যপদ্যস্তুতা গন্ত্রী গচ্ছন্তী গরুডাসনা ।
পশ্যন্তী শৃণ্বতী স্পর্শকর্ত্রী রসনিরূপিণী ॥ ১১৯ ॥
ভৃত্যপ্রিয়া ভৃতিকরী ভরণীয়া ভয়াপহা ।
প্রকর্ষদা প্রসিদ্ধেশা প্রমাণং প্রমিতিঃ প্রমা ॥ ১২০ ॥
আকাশরূপিণ্যধ্যস্তা মধ্যস্থা মধ্যমা মিতিঃ ।
তলোদরী তলকরী তটিদ্রূপা তরঙ্গিণী ॥ ১২১ ॥
অকম্পা কম্পিতরিপুঃ জম্ভারিসুখদায়িনী ।
দয়াবিষ্টা শিষ্টসুহৃত্ বিষ্টরশ্রবসঃপ্রিয়া ॥ ১২২ ॥
হৃষীকসুখদা হৃদ্যাঽভীতা ভীতার্তিহারিণী ।
মাতা মনুমুখারাধ্যা মাতঙ্গী মানিতাখিলা ॥ ১২৩ ॥
ভৃগুপ্রিয়া ভ্রুগুসুতা ভার্গবেড্যা মহাবলা ।
অনুকূলাঽমলতনুঃ লোপহীনা লিপিস্তুতা ॥ ১২৪ ॥
অন্নদাঽন্নস্বরূপঽন্নপূর্ণাঽপর্ণা ঋণাপহা ।
বৃন্দা বৃন্দাবনরতিঃ বন্দীভূতামরীস্তুতা ॥ ১২৫ ॥
তেজস্বিনী তুর্যপূজ্যা তেজস্ত্রিতয়রূপিণী ।
ষডাস্যজয়দা ষষ্ঠী ষডূর্মিপরিবর্জিতা ॥ ১২৬ ॥
ষড্জপ্রিয়া সত্ত্বরূপা সব্যমার্গপ্রপূজিতা ।
সনাতনতনুস্সন্না সম্পন্মূর্তিঃ সরীসৃপা ॥ ১২৭ ॥
জিতাশা জন্মকর্মাদিনাশিনী জ্যেষ্ঠরূপিণী ।
জনার্দনহৃদাবাসা জনানন্দা জয়াঽজনিঃ ॥ ১২৮ ॥
বাসনা বাসনাহন্ত্রী বামা বামবিলোচনা ।
পয়স্বিনী পূততনুঃ পাত্রী পরিষদর্চিতা ॥ ১২৯ ॥
মহামোহপ্রমথিনী মহাহর্ষা মহাধৃতিঃ ।
মহাবীর্যা মহাচর্যা মহাপ্রীতা মহাগুণা ॥ ১৩০ ॥
মহাশক্তির্মহাসক্তিঃ মহাজ্ঞানা মহারতিঃ ।
মহাপূজ্যা মহেজ্যা চ মহালাভপ্রদা মহী ॥ ১৩১ ॥
মহাসম্পন্মহাকম্পা মহালক্ষ্যা মহাশয়া ।
মহারূপা মহাধূপা মহামতির্মহামহা ॥ ১৩২ ॥
মহারোগহরী মুক্তা মহালোভহরী মৃডা ।
মেদস্বিনী মাতৃপূজ্যা মেয়া মা মাতৃরূপিণী ॥ ১৩৩ ॥
নিত্যমুক্তা নিত্যবুদ্ধা নিত্যতৃপ্তা নিধিপ্রদা ।
নীতিজ্ঞা নীতিমদ্বন্দ্যা নীতা প্রীতাচ্যুতপ্রিয়া ॥ ১৩৪ ॥
মিত্রপ্রিয়া মিত্রবিন্দা মিত্রমণ্ডলশোভিনী ।
নিরঙ্কুশা নিরাধারা নিরাস্থানা নিরাময়া ॥ ১৩৫ ॥
নির্লেপা নিঃস্পৃহা নীলকবরী নীরজাসনা ।
নিরাবাধা নিরাকর্ত্রী নিস্তুলা নিষ্কভূষিতা ॥ ১৩৬ ॥
নিরঞ্জনা নির্মথনা নিষ্ক্রোধা নিষ্পরিগ্রহা ।
নির্লোভা নির্মলা নিত্যতেজা নিত্যকৃপান্বিতা ॥ ১৩৭ ॥
ধনাঢ্যা ধর্মনিলয়া ধনদা ধনদার্চিতা ।
ধর্মকর্ত্রী ধর্মগোপ্ত্রী ধর্মিণী ধর্মদেবতা ॥ ১৩৮ ॥
ধারা ধরিত্রী ধরণিঃ ধুতপাপা ধুতাশরা ।
স্ত্রীদেবতাঽক্রোধনাথাঽমোহাঽলোভাঽমিতার্থদা ॥ ১৩৯ ॥
কালরূপাঽকালবশা কালজ্ঞা কালপালিনী ।
জ্ঞানিধ্যেয়া জ্ঞানিগম্যা জ্ঞানদানপরায়ণা ॥ ১৪০ ॥
ইতি শ্রীনারদীয়োপপুরাণান্তর্গতং শ্রীলক্ষ্মীসহস্রনামস্তোত্রং ২ সম্পূর্ণম্ ॥
– Chant Stotra in Other Languages –
1000 Names of of Sri Lakshmi Devi » Sahasranama Stotram 2 Lyrics in Sanskrit » English » Gujarati » Kannada » Malayalam » Odia » Telugu » Tamil