॥ Lakshmi Sahasranama Stotram Telugu Lyrics ॥
॥ శ్రీలక్ష్మీసహస్రనామస్తోత్రమ్ 2 ॥
(నారదీయోపపురాణతః)
మిత్రసహ ఉవాచ-
భగవన్ సర్వధర్మజ్ఞ సర్వశాస్త్రవిశారద ।
పావనానాం హి మహసాం నిదానం త్వం మహామునే ॥ ౧ ॥
అతర్కితేనాగమేన తవ తుష్టోఽస్మి సర్వదా ।
హృదయం నిర్వృతం మేఽద్య మహాదుఃఖౌఘపీడితమ్ ॥ ౨ ॥
దేవా గృహేషు సన్తుష్టాః తారితాః పితరశ్చ యే ।
చిరాయ మే మనస్యస్తి సంశయో బలవత్తరః ॥ ౩ ॥
పృచ్ఛామి త్వామహం తం వై ఉత్తరం దాతుమర్హసి ।
ఇష్టం మయా చ బహుభిః యజ్ఞైస్సమ్పూర్ణదక్షిణైః ॥ ౪ ॥
దానాని చ మహార్హాణి పాత్రేషు స్పర్శితాని చ ।
అనృతం నోక్తపూర్వం మే ప్రజా ధర్మేణ పాలితాః ॥ ౫ ॥
పతివ్రతా మహాభాగా నిత్యం సుస్నిగ్ధభాషిణీ ।
పూజ్యాన్ గృహాగతాన్ సర్వానారాధయతి నిత్యదా ॥ ౬ ॥
తథా హి సేవతే దేవాన్ యథాఽహమపి నాశకమ్ ।
భార్యాఽనుకూలా మే దేవీ మదయన్తీ మనస్వినీ ॥ ౭ ॥
తథాపి దుఃఖం సమ్ప్రాప్తం మయా ద్వాదశవార్షికమ్ ।
రాక్షసత్వం మహాఘోరం సమ్పూర్ణనరకోపమమ్ ॥ ౮ ॥
తత్ర వృత్తాని కార్యాణి స్మృత్వా మే వేపతే మనః ।
భక్షితాః కతి వా తత్ర ద్విపదాశ్చ చతుష్పదాః ॥ ౯ ॥
తత్సర్వమస్తు తన్నైవ చిన్త్యతే శాపహేతుకమ్ ।
గురుపుత్రే గురుసమః శక్తిః సమ్భక్షితో మయా ॥ ౧౦ ॥
బ్రహ్మహత్యాకృతం పాపం కథం మే న భవిష్యతి ।
శాపాద్రాక్షసతా కాలే ప్రాప్తా యద్యపి తన్మయా ॥ ౧౧ ॥
రాత్రిన్దివం మే దహతి హృదయం హి సబన్ధనమ్ ।
న రోచతే మే భుక్తిర్వా సుప్తిర్వాపి గతిర్బహిః ॥ ౧౨ ॥
మహాబన్ధనమేతన్మే రాజ్యం హి మనుతే మనః ।
కిన్ను తత్కారణం యేన ప్రాప్తోఽహం తాదృశీం శుచమ్ ॥ ౧౩ ॥
వక్తుమర్హసి సర్వజ్ఞ తత్ప్రాయశ్చిత్తవిస్తరమ్ ।
ఉపాదిశ మహామన్త్రతన్త్రజ్ఞ ప్రణతాయ మే ॥ ౧౪ ॥
శ్రీనారద ఉవాచ-
శృణు రాజన్ప్రవక్ష్యామి ప్రాగ్జన్మచరితం తవ ।
యేనేదృశం త్వయా ప్రాప్తం దుఃఖమత్యన్తదుస్సహమ్ ॥ ౧౫ ॥
పురాభూద్బాహ్మణః కశ్చిత్తామ్రపర్ణినదీతటే ।
దరిద్రోఽత్యన్తదుర్భాగ్యః బహుపుత్రకుటుమ్బవాన్ ॥ ౧౬ ॥
కృష్ణశర్మేతి విఖ్యాతః వేదవేదాఙ్గతత్వవిత్ ।
తవ భార్యాఽభవత్పుణ్యా సదా చణ్డీ కురూపిణీ ॥ ౧౭ ॥
కిన్తు శక్తివ్రతాచారేఽప్రతిమా శుద్ధమానసా ।
కటువాఙ్మానినీ నామ్నా క్షుత్పిపాసార్దితా సదా ॥ ౧౮ ॥
దారిద్ర్యశమనార్థం త్వం సర్వలక్షణలక్షితమ్ ।
కల్పయిత్వ శ్రియో మూర్తిం భక్త్యా పూజితవాన్గృహే ॥ ౧౯ ॥
మానిన్యప్యన్వహం భక్త్యా గోమయాలేపనాదిభిః ।
రఙ్గవల్యాప్యలఙ్కృత్య పూజాస్థానం గృహే తవ ॥ ౨౦ ॥
పాయసాపూపనైవేద్యైః సా త్వాం పర్యచరన్ముదా ।
ఏకదా భృగువారే త్వాం సహస్రకమలార్చనమ్ ॥ ౨౧ ॥
విధాతుం విష్ణుపత్న్యాస్తు పద్మాన్యానయితుం గతః ।
గతేఽర్ధదివసే గేహం ప్రాప్య ఖిన్నోఽనయోదితః ॥ ౨౨ ॥
హన్తార్ధదివసోఽతీతః కదా దేవానసఙ్ఖ్యకాన్ ।
అభ్యర్చ్యాథ శ్రియో దేవ్యాః సహస్రకమలార్చనమ్ ॥ ౨౩ ॥
కృత్వా భుక్త్వా కదాఽన్నం నో దర్శయిష్యసి తామ్యతామ్ ।
బాలా రుదన్తి క్షుధితాః పక్వం భవతి శీతలమ్ ॥ ౨౪ ॥
ఇతి తస్యాం భర్త్సయన్త్యాం తూష్ణీం పూజామధాద్భవాన్ ।
సహస్రపద్మపూజాయాం చలన్త్యాం మధ్యతస్తు సా ॥ ౨౫ ॥
అసమర్థా క్షుధం సోఢుం బాలైస్సహ బుభోజ హ ।
తదా త్వం కుపితోఽప్యేనాం న చ కిఞ్చిదపి బ్రువన్ ॥ ౨౬ ॥
గృహాన్నిర్గత్య శాన్తాత్మా కిం కృత్యమితి చిన్తయన్ ।
నిర్యాన్తం త్వాం తు సా ప్రాహ క్వ గచ్ఛసి సుదుర్మతే ॥ ౨౭ ॥
అనిర్వర్త్య శ్రియః పూజాం ప్రారబ్ధాం సుమహాదరమ్ ।
పృథఙ్నైవేద్యమస్తీహ నాస్మాభిర్భక్షితం హి తత్ ॥ ౨౮ ॥
కాలాత్యయాత్క్షుధార్తానాం భుక్తిం దేవీ సహిష్యతే ।
తద్విధేహి శ్రియః పూజాం మా స్మ నిష్కారణం క్రుధః ॥ ౨౯ ॥
నరకే మా పతో బుద్ధ్యా మాం చ పాతయ మా వృథా ।
ఇతి తస్యాం బ్రువాణాయాం త్వం గృహాన్నిరగాః క్రుధా ॥ ౩౦ ॥
సద్యః సన్యస్య విపినేఽవాత్సీస్త్వం విధినా కిల ।
యతిత్వేఽపి సదా బుద్ధ్యా పూర్వాశ్రమకథాం స్మరన్ ॥ ౩౧ ॥
దారిద్ర్యం సర్వధర్మాణాం ప్రత్యూహాయ ప్రవర్తతే ।
సత్యప్యస్మిన్ధర్మపత్నీ అనుకూలా భవేద్యది ॥ ౩౨ ॥
నరస్య జన్మ సుఖితం నాన్యథాఽర్థశతైరపి ।
వన్ధ్యాజానిస్స భవతు అనుకూలకలత్రవాన్ ॥ ౩౩ ॥
లభతే జన్మసాఫల్యమేతద్దేవ్యాః ప్రసాదజమ్ ।
ఇత్యేవం చిన్తయన్నేవ త్యక్త్వా దేహం తరోస్తలే ॥ ౩౪ ॥
ఇక్ష్వాకువంశే జాతస్త్వం రాజా మిత్రసహాభిధః ।
రుషా పరవశో యస్మాదసమాప్య శ్రియోఽర్చనమ్ ॥ ౩౫ ॥
నిర్గతోఽసి గృహాత్తస్మాద్దుఃఖమేతదుపస్థితమ్ ।
సాపి త్వయి వినిర్యాతే పశ్చాత్తాపవతీ భృశమ్ ॥ ౩౬ ॥
ప్రక్షాలితాఙ్ఘ్రిహస్తాఽథ ప్రయతాఽఽచమ్య సత్వరమ్ ।
నైవేద్యం స్వయమీశ్వర్యై ప్రణమ్య చ నివేద్య చ ॥ ౩౭ ॥
అమ్బ సర్వస్య లోకస్య జనన్యసి సహస్వ తత్ ।
ఆగాంసి మమ నాగారికేతనోరఃస్థలాలయే ॥ ౩౮ ॥
యస్యాం జాతౌ తు మే భర్తా తత్పూజాపుణ్యతో భవేత్ ।
భవేయమహమప్యత్ర జాతౌ తం చాప్నుయాం యథా ॥ ౩౯ ॥
కామక్రోధాదిహీనా స్యాం తథామ్బానుగ్రహం కురు ।
ఇతి దేవీం ప్రార్థయన్తీ జీవన్తీ కృచ్ఛ్రతో భువి ॥ ౪౦ ॥
త్యక్త్వా దేహం పునర్జాతా రాజవంశే సుపావనే ।
మదయన్తీతి నామ్నా వై తవ భార్యాఽభవత్పునః ॥ ౪౧ ॥
అభుక్తే త్వయి భుత్క్యా సా వన్ధ్యా జాతా వధూమణిః ।
ఉభయోర్భవతోర్లక్ష్మీపూజాయామపరాధతః ॥ ౪౨ ॥
ఉభావపి మహాదుఃఖం ప్రాప్తౌ ద్వాదశవర్షికమ్ ।
త్యక్త్వా రాజ్యం చ కోశఞ్చ దరిద్రావతిదుఃఖితౌ ॥ ౪౩ ॥
మా బ్రహ్మహత్యాదోషాత్త్వం భైషీ రాజన్ కథఞ్చన ।
యాం జాతిమనువిష్టో హి తాదృశీం త్వం క్రియామధాః ॥ ౪౪ ॥
కిన్తు భూయశ్చ్యుతే రాజ్యాద్భేతవ్యం శ్రీప్రకోపతః ।
నామ్నాం తదద్య శ్రీదేవ్యాః సహస్రేణ శతేన చ ॥ ౪౫ ॥
అష్టోత్తరేణ పద్మానాం పుఞ్జతస్తాం ప్రపూజయ ।
భవేత్తవ స్థిరం రాజ్యం దుఃఖం నాణ్వపి తే భవేత్ ॥ ౪౬ ॥
భార్యా తే సాపి శుశ్రూషాం స్వయమేవ కరోతు తే ।
వర్షమాత్రం పూజితా సా లక్ష్మీర్నారాయణప్రియా ॥ ౪౭ ॥
యువయోస్సర్వకామానాం దాత్రీ స్యాన్నాత్ర సంశయః ।
స్త్రీసఙ్గప్రతిహన్తాఽస్తి శాపో యద్యపి తే ప్రభో ॥ ౪౮ ॥
ప్రసోష్యతే చ తనయం తవ భార్యా కథఞ్చన ।
పుత్రపౌత్రాభివృద్ధ్యా త్వం మోదిష్యసి మహేన్ద్రవత్ ॥ ౪౯ ॥
యథా పృష్టం మహాభాగ దుఃఖహేతుస్తవోదితః ।
ఉక్తస్తత్పరిహారోఽపి కిమిచ్ఛసి పునర్వద ॥ ౫౦ ॥
రాజోవాచ-
ధన్యోఽస్మ్యనుగృహీతోఽస్మి మహర్షే కృపయా తవ ।
మత్తో న విద్యతే కశ్చిల్లోకేఽస్మిన్ భాగ్యవత్తరః ॥ ౫౧ ॥
తవ పాదాబ్జయుగలే ప్రణామానాం శతం శతమ్ ।
కరోమి పాహి మాం విప్ర కులోత్తంస దయానఘ ॥ ౫౨ ॥
నామ్నాం సహస్రం శ్రీదేవ్యా అష్టోత్తరశతాధికమ్ ।
ప్రబ్రూహి మే మునిశ్రేష్ఠ పూజాయా విధిమప్యథ ॥ ౫౩ ॥
జపస్య చ విధిం తేషాం నామ్నాం శుశ్రూషవే వద ।
సూత ఉవాచ-
ఇతి రాజ్ఞా మునిశ్రేష్ఠః పృష్టస్సవినయం తతః ॥ ౫౪ ॥
నమస్కృత్య శ్రియై పశ్చాద్ధ్యాత్వోవాచ మహీపతిమ్ ।
శ్రీనారద ఉవాచ-
సమ్యక్ పృష్టం మహారాజ సర్వలోకహితం త్వయా ॥ ౫౫ ॥
వక్ష్యామి తాని నామాని పూజాఞ్చాపి యథాక్రమమ్ ।
పలమానసువర్ణేన రజతేనాథ తామ్రతః ॥ ౫౬ ॥
చతుర్భుజాం పద్మధరాం వరాభయవిశోభినీమ్ ।
నిషణ్ణాం ఫుల్లకమలే చతుర్దన్తైః సితైర్గజైః ॥ ౫౭ ॥
సువర్ణఘణ్టాముఖరైః కృతక్షీరాభిషేచనామ్ ।
కటకాఙ్గదమఞ్జీరరశనాది విభూషణైః ॥ ౫౮ ॥
విభూషితాం క్షౌమవస్త్రాం సిన్దూరతిలకాఞ్చితామ్ ।
ప్రసన్నవదనామ్భోజాం ప్రపన్నార్తివినాశినీమ్ ॥ ౫౯ ॥
ఛత్రచామరహస్తాఢ్యైః సేవితామప్సరోగణైః ।
కృత్వైవం ప్రతిమాం తాం చ ప్రతిష్ఠాప్య యథావిధి ॥ ౬౦ ॥
శ్రీం లక్ష్మ్యై నమ ఇత్యేవ ధ్యానావాహనపూర్వకాన్ ।
ఉవచారాంశ్చతుష్షష్టిం కల్పయేత గృహే సుధీః ॥ ౬౧ ॥
ప్రతిమాయా అలాభే తు లక్ష్మ్యాస్సమ్ప్రాప్య చాలయమ్ ।
కారయేదుపచారాంస్తు యథావిధ్యర్చకైర్ముదా ॥ ౬౨ ॥
తస్యాప్యభావే త్వాలేఖ్యే లిఖితాం వర్ణకైస్తథా ।
పూజయేత్తస్య చాభావే కృతాం చన్దనదారుణా ॥ ౬౩ ॥
తదభావే చన్దనేన రచితాం పూజయేద్రమామ్ ।
ఏషామభావే వికచే కమలే కర్ణికాగతామ్ ॥ ౬౪ ॥
ధ్యాత్వా తథావిధాం దేవీమాదరేణ ప్రపూజయేత్ ।
కమలానాం సహస్రేణాప్యష్టోత్తరశతేన చ ॥ ౬౫ ॥
అర్చయేదిన్దిరాపాదౌ ధ్యాత్వాభీష్టాని చేతసి ।
శ్రీదేవ్యా నామసాహస్రం అష్టోత్తరశతాధికమ్ ॥ ౬౬ ॥
అథాతస్సమ్ప్రవక్ష్యామి శృణు నాన్యమనా నృప ।
పారాయణప్రకారః ॥
ఓం అస్య శ్రీమహాలక్ష్మీసహస్రనామస్తోత్రమహామన్త్రస్య నారద ఋషిః ।
అనుష్టుపఛన్దః । శ్రీమహాలక్ష్మీర్దేవతా ।
హ్రాం బీజమ్ । హ్రిం శక్తిః । హ్రూం కీలకమ్ ।
శ్రీమహాలక్ష్మీప్రసాదసిద్ధ్యర్థే
శ్రీమహాలక్ష్మీసహస్రనామమన్త్రజపే వినియోగః ॥
ఓం హ్లాం హిరణ్యవర్ణాం హరిణీం సువర్ణరజతస్రజామ్ । అఙ్గుష్ఠాభ్యాణ్ నమః ।
మం హ్లీం చన్ద్రాం హిరణ్మయీం లక్ష్మీం జాతవేదో న ఆవహ । తర్జనీభ్యాం నమః ।
హాం హ్లూం తాం మ ఆవహ జాతవేదో లక్ష్మీమనపగామినీమ్ । మధ్యమాభ్యాం నమః ।
లం హ్లైం యస్యాం హిరణ్యం విన్దేయం గామశ్వమ్పురుషానహమ్ । అనామికాభ్యాం నమః ।
క్ష్మ్యైం హ్లౌం శ్రియం దేవీముపహ్వయే శ్రీర్మా దేవీ జుషతమ్ ।
కరతలకరపృష్ఠాభ్యాం నమః ॥
ఓం హ్లాం కాంసోస్మితాం హిరణ్యప్రాకారామార్ద్రాం జ్వలన్తీం తృప్తాం తర్పయన్తీమ్ ।
హృదయాయ నమః ।
మం హ్లీం పద్మే స్థితాం పద్మవర్ణాం తామిహోపహ్వయే శ్రియమ్ ।
శిరసే స్వాహా ।
హాం హ్లూం చన్ద్రాం ప్రభాసాం యశసా జ్వలన్తీం శ్రియం లోకే దేవజుష్టాముదారామ్ ।
శిఖాయై వషట్ ।
లం హ్లైం తాం పద్మినీమీం శరణమహం ప్రపద్యేఽలక్ష్మీర్మే
నశ్యతాం త్వాం వృణే ।
కవచాయ హుమ్ ।
క్ష్మ్యైం హ్రౌం ఆదిత్యవర్ణే తపసోఽధిజాతో వనస్పతిస్తవ
వృక్షోఽథ బిల్వః । నేత్రత్రయాయ వౌషట్ ।
నమః హ్లః తస్య ఫలాని తపసా నుదాన్తు మాయాన్తరాయాశ్చ బాహ్యా అలక్ష్మీః ।
అస్త్రాయ ఫట్ । భూర్భువస్సువరోమితి దిగ్బన్ధః ॥
ధ్యానమ్-
లక్ష్మీదేవీం ద్విపద్మాభయవరదకరాం తప్తకార్తస్వరాభాం
శుభ్రాభ్రాభేభయుగ్మద్వయకరధృతకుమ్భాద్భిరాసిచ్యమానామ్ ।
రత్నౌఘాబద్ధమౌలిం విమలతరదుకూలార్తవాలేపనాఢ్యాం
పద్మాక్షీం పద్మనాభోరసి కృతవసతిం పద్మగాం చిన్తయామి ॥
లం పృథివ్యాత్మికాయై గన్ధం సమర్పయామి ।
హం ఆకాశాత్మికాయై పుష్పాణి సమర్పయామి ।
యం వాయ్వాత్మికాయై ధూపమాఘ్రాపయామి ।
రం వహ్న్యాత్మికాయై । దీపం దర్శయామి ।
వం అమృతాత్మికాయై । అమృతం నివేదయామి ।
సం సర్వాత్మికాయై సర్వోపచారాన్ సమర్పయామి ।
పారాయణాన్తే ఓం హ్లాం ఉపైతు మాం దేవసఖః కీర్తిశ్చ మణినా సహ ।
హృదయాయ నమః ।
మం హ్లీం ప్రాదుర్భూతోఽస్మి రాష్ట్రేఽస్మిన్కీర్తిమృద్ధిం దదాతు మే ।
శిరసే స్వాహా ।
హాం హ్లూం క్షుత్పిపాసామలాం జ్యేష్ఠాం అలక్ష్మీం నాశయామ్యహమ్ ।
శిఖాయై వషట్ ।
లం హ్లైం అభూతిమసమృద్ధిఞ్చ సర్వాం నిర్ణుద మే గృహాత్ ।
కవచాయ హుమ్ ।
క్ష్మ్యైం హ్లౌం గన్ధద్వారాం దురాధర్షాం నిత్యపుష్టాం కరీషిణీమ్ ।
నైత్రత్రయాయ వౌషట్ ।
నమః హ్లః ఈశ్వరీం సర్వభూతానాం తామిహోపహ్నయే శ్రియమ్ ।
అస్త్రాయ హట్ ॥
భూర్భువస్సువరోమితి దిగ్విమోకః ।
ధ్యానమ్ ।
లమిత్యాది పఞ్చపూజా ।
అథ శ్రీలక్ష్మీసహస్రనామస్తోత్రమ్ ॥
శ్రీనారద ఉవాచ –
మహాలక్ష్మీర్మహేశానా మహామాయా మలాపహా ।
విష్ణుపత్నీ విధీశార్చ్యా విశ్వయోనిర్వరప్రదా ॥ ౧ ॥
ధాత్రీ విధాత్రీ ధర్మిష్ఠా ధమ్మిల్లోద్భాసిమల్లికా ।
భార్గవీ భక్తిజననీ భవనాథా భవార్చితా ॥ ౨ ॥
భద్రా భద్రప్రదా భవ్యా భక్తాభీష్టఫలప్రదా ।
ప్రళయస్థా ప్రసిద్ధా మా ప్రకృష్టైశ్వర్యదాయినీ ॥ ౩ ॥
విష్ణుశక్తిర్విష్ణుమాయా విష్ణువక్షఃస్థలస్థితా ।
వాగ్రూపా వాగ్విభూతిజ్ఞా వాక్ప్రదా వరదా వరా ॥ ౪ ॥
సమ్పత్ప్రదా సర్వశక్తిః సంవిద్రూపా సమాఽసమా ।
హరిద్రాభా హరిన్నాథపూజితా హరిమోహినీ ॥ ౫ ॥
హతపాపా హతఖలా హితాహితవివర్జితా ।
హితాహితపరాఽహేయా హర్షదా హర్షరూపిణీ ॥ ౬ ॥
వేదశాస్త్రాలిసంసేవ్యా వేదరూపా విధిస్తుతా ।
శ్రుతిః స్మృతిర్మతిః సాధ్వీ శ్రుతాఽశ్రుతధరా ధరా ॥ ౭ ॥
శ్రీః శ్రితాఘధ్వాన్తభానుః శ్రేయసీ శ్రేష్ఠరూపిణీ ।
ఇన్దిరా మన్దిరాన్తస్థా మన్దురావాసినీ మహీ ॥ ౮ ॥
ధనలక్ష్మీర్ధనకరీ ధనిప్రీతా ధనప్రదా ।
ధానాసమృద్ధిదా ధుర్యా ధుతాఘా ధౌతమానసా ॥ ౯ ॥
ధాన్యలక్ష్మీర్దారితాఘా దారిద్ర్యవినివారిణీ ।
వీరలక్ష్మీర్వీరవన్ద్యా వీరఖడ్గాగ్రవాసినీ ॥ ౧౦ ॥
అక్రోధనాఽలోభపరా లలితా లోభినాశినీ ।
లోకవన్ద్యా లోకమాతా లోచనాధఃకృతోత్పలా ॥ ౧౧ ॥
హస్తిహస్తోపమానోరుః హస్తద్వయధృతామ్బుజా ।
హస్తికుమ్భోపమకుచా హస్తికుమ్భస్థలస్థితా ॥ ౧౨ ॥
రాజలక్ష్మీ రాజరాజసేవితా రాజ్యదాయినీ ।
రాకేన్దుసున్దరీ రస్యా రసాలరసభాషణా ॥ ౧౩ ॥
కోశవృద్ధిః కోటిదాత్రీ కోటికోటిరవిప్రభా ।
కర్మారాఢ్యా కర్మగమ్యా కర్మణాం ఫలదాయినీ ॥ ౧౪ ॥
ధైర్యప్రదా ధైర్యరూపా ధీరా ధీరసమర్చితా ।
పతివ్రతా పరతరపురుషార్థప్రదాఽపరా ॥ ౧౫ ॥
పద్మాలయా పద్మకరా పద్మాక్షీ పద్మధారిణీ ।
పద్మినీ పద్మదా పద్మా పద్మశఙ్ఖాదిసేవితా ॥ ౧౬ ॥
దివ్యా దివ్యాఙ్గరాగాఢ్యా దివ్యాదివ్యస్వరూపధృత్ ।
దయానిధిర్దానపరా దానవారాతిభామినీ ॥ ౧౭ ॥
దేవకార్యపరా దేవీ దైత్యేన్ద్రపరిపూజితా ।
నారాయణీ నాదగతా నాకరాజసమర్చితా ॥ ౧౮ ॥
నక్షత్రనాథవదనా నరసింహప్రియాఽనలా ।
జగద్రూపా జగన్నాథా జఙ్గమాజఙ్గమాకృతిః ॥ ౧౯ ॥
కవితా కఞ్జనిలయా కమ్రా కలినిషేధినీ ।
కారుణ్యసిన్ధుః కమలా కమలాక్షీ కుచోన్నతా ॥ ౨౦ ॥
బలిప్రియా బలిహరీ బలినీ బలిసంస్తుతా ।
హీరభూషా హీనదోషా హానిహర్త్రీ హతాసురా ॥ ౨౧ ॥
హవ్యకవ్యార్చితా హత్యాదికపాతకనాశిణీ ।
విశుద్ధసత్త్వా వివశా విశ్వబాధాహరీ వధూః ॥ ౨౨ ॥
బ్రహ్మాణీ బ్రహ్మజననీ బ్రహ్మరూపా బృహద్వపుః ।
బన్దీకృతామరవధూమోచినీ బన్ధురాలకా ॥ ౨౩ ॥
బిలేశయాఙ్గనావన్ద్యా బీభత్సరహితాఽబలా ।
భోగినీ భువనాధీశా భోగిభోగశయాఽభయా ॥ ౨౪ ॥
దామోదరప్రియా దాన్తా దాశేశపరిసేవితా ।
జామదగ్న్యప్రియా జహ్నుతనయా పావనాఙ్ఘిరకా ॥ ౨౫ ॥
క్షీరోదమథనోద్భూతా క్షీరాక్తా క్షితిరూపిణీ ।
క్షేమఙ్కరీ క్షయకరీ క్షేత్రజ్ఞా క్షేత్రదాయినీ ॥ ౨౬ ॥
స్వయంవృతాచ్యుతా స్వీయరక్షిణీ స్వత్వదాయినీ ।
తారకేశముఖీ తార్క్ష్యస్వామినీ తారితాశ్రితా ॥ ౨౭ ॥
గుణాతీతా గుణవతీ గుణ్యా గరుడసంస్థితా ।
గేయా గయాక్షేత్రగతా గానతుష్టా గతిప్రదా ॥ ౨౮ ॥
శేషరూపా శేషశాయిభామినీ శిష్టసమ్మతా ।
శేవధిః శోషితాశేషభువనా శోభనాకృతిః ॥ ౨౯ ॥
పాఞ్చరాత్రార్చితా పాఞ్చజన్యధార్యఙ్కవాసినీ ।
పాషణ్డద్వేషిణీ పాశమోచనీ పామరప్రియా ॥ ౩౦ ॥
భయఙ్కరీ భయహరీ భర్తృభక్తా భవాపహా ।
హ్రీర్హ్రీమతీ హృతతమాః హతమాయా హతాశుభా ॥ ౩౧ ॥
రఘువంశస్నుషా రామా రమ్యా రామప్రియా రమా ।
సీరధ్వజసుతా సీతా సీమాతీతగుణోజ్జ్వలా ॥ ౩౨ ॥
జానకీ జగదానన్దదాయినీ జగతీభవా ।
భూగర్భసమ్భవా భూతిః భూషితాఙ్గీ భృతానతా ॥ ౩౩ ॥
వేదస్తవా వేదవతీ వైదేహీ వేదవిత్ప్రియా ।
వేదాన్తవేద్యా వీర్యాఢ్యా వీరపత్నీ విశిష్టధీః ॥ ౩౪ ॥
శివచాపారోపపణా శివా శివపరార్చితా ।
సాకేతవాసినీ సాధుస్వాన్తగా స్వాదుభక్షిణీ ॥ ౩౫ ॥
గుహాగతా గుహనతా గుహాగతమునిస్తుతా ।
దరస్మితా దనుజసంహర్త్రీ దశరథస్నుషా ॥ ౩౬ ॥
దాయప్రదా దానఫలా దక్షా దాశరథిప్రియా ।
కాన్తా కాన్తారగా కామ్యా కారణాతీతవిగ్రహా ॥ ౩౭ ॥
వీరా విరాధసంహర్త్రీ విశ్వమాయావిధాయినీ ।
వేద్యా వైద్యప్రియా వైద్యా వేధోవిష్ణుశివాకృతిః ॥ ౩౮ ॥
ఖరదూషణకాలాగ్నిః ఖరభానుకులస్నుషా ।
శూరా శూర్పణఖాభఙ్గకారిణీ శ్రుతవల్లభా ॥ ౩౯ ॥
సువర్ణమృగతృష్ణాఢ్యా సువర్ణసదృశాఙ్గకా ।
సుమిత్రాసుఖదా సూతసంస్తుతా సుతదారదా ॥ ౪౦ ॥
సుమిత్రానుగ్రహపరా సుమన్త్రా సుప్రతిష్ఠితా ।
శ్యామా శ్యామలనేత్రాన్తా శ్యామన్యగ్రోధసేవినీ ॥ ౪౧ ॥
తుఙ్గస్థానప్రదా తుఙ్గా గఙ్గాప్రార్థనతత్పరా ।
గతిప్రియా గర్భరూపా గతిర్గతిమతీ చ గౌః ॥ ౪౨ ॥
గర్వదూరా గర్వహరీ గతినిర్జితహంసికా ।
దశాననవధోద్యుక్తా దయాసిన్ధుర్దశాతిగా ॥ ౪౩ ॥
సేతుహేతుర్హేతుహీనా హేతుహేతుమదాత్మికా ।
హనూమత్స్వామినీ హృష్టా హృష్టపుష్టజనస్తుతా ॥ ౪౪ ॥
వామకేశీ వామనేత్రీ వాద్యా వాదిజయప్రదా ।
ధనధాన్యకరీ ధర్మ్యా ధర్మాధర్మఫలప్రదా ॥ ౪౫ ॥
సముద్రతనయా స్తుత్యా సముద్రా సద్రసప్రదా ।
సామప్రియా సామనుతా సాన్త్వోక్తిః సాయుధా సతీ ॥ ౪౬ ॥
శీతీకృతాగ్నిః శీతాంశుముఖీ శీలవతీ శిశుః ।
భస్మీకృతాసురపురా భరతాగ్రజభామినీ ॥ ౪౭ ॥
రాక్షసీదుఃఖదా రాజ్ఞీ రాక్షసీగణరక్షిణీ ।
సరస్వతీ సరిద్రూపా సన్నుతా సద్గతిప్రదా ॥ ౪౮ ॥
క్షమావతీ క్షమాశీలా క్షమాపుత్రీ క్షమాప్రదా ।
భర్తృభక్తిపరా భర్తృదైవతా భరతస్తుతా ॥ ౪౯ ॥
దూషణారాతిదయితా దయితాలిఙ్గనోత్సుకా ।
అల్పమధ్యాఽల్పధీదూరా కల్పవల్లీ కలాధరా ॥ ౫౦ ॥
సుగ్రీవవన్ద్యా సుగ్రీవా వ్యగ్రీభావావితానతా ।
నీలాశ్మభూషా నీలాదిస్తుతా నీలోత్పలేక్షణా ॥ ౫౧ ॥
న్యాయ్యా న్యాయపరాఽఽరాధ్యా న్యాయాన్యాయఫలప్రదా ।
పుణ్యదా పుణ్యలభ్యా చ పురుషోత్తమభామినీ ॥ ౫౨ ॥
పురుషార్థప్రదా పుణ్యా పణ్యా ఫణిపతిస్తుతా ।
అశోకవనికాస్థానాఽశోకా శోకవినాశినీ ॥ ౫౩ ॥
శోభారూపా శుభా శుభ్రా శుభ్రదన్తా శుచిస్మితా ।
పురుహూతస్తుతా పూర్ణా పూర్ణరూపా పరేశయా ॥ ౫౪ ॥
దర్భాగ్రధీర్దహరగా దర్భబ్రహ్మాస్త్రభామినీ ।
త్రైలోక్యమాతా త్రైలోక్యమోహినీ త్రాతవాయసా ॥ ౫౫ ॥
త్రాణైకకార్యా త్రిదశా త్రిదశాధీశసేవితా ।
లక్ష్మణా లక్ష్మణారాధ్యా లక్ష్మణాగ్రజనాయికా ॥ ౫౬ ॥
లఙ్కావినాశినీ లక్ష్యా లలనా లలితాశయా ।
తారకాఖ్యప్రియా తారా తారికా తార్క్ష్యగా తరిః ॥ ౫౭ ॥
తాటకారాతిమహిషీ తాపత్రయకుఠారికా ।
తామ్రాధరా తార్క్ష్యనుతా తామ్రాక్షీ తారితానతా ॥ ౫౮ ॥
రఘువంశపతాకా శ్రీరఘునాథసధర్మిణీ ।
వనప్రియా వనపరా వనజాక్షీ వినీతిదా ॥ ౫౯ ॥
విద్యాప్రియా విద్వదీడ్యా విద్యాఽవిద్యావినాశినీ ।
సర్వాధారా శమపరా శరభఙ్గమునిస్తుతా ॥ ౬౦ ॥
బిల్వప్రియా బలిమతీ బలిసంస్తుతవైభవా ।
బలిరాక్షససంహర్త్రీ బహుకా బహువిగ్రహా ॥ ౬౧ ॥
క్షత్రియాన్తకరారాతిభార్యా క్షత్రియవంశజా ।
శరణాగతసంరక్షా శరచాపాసిపూజితా ॥ ౬౨ ॥
శరీరభాజితరతిః శరీరజహరస్తుతా ।
కల్యాణీ కరుణామూర్తిః కలుషఘ్నీ కవిప్రియా ॥ ౬౩ ॥
అచక్షురశ్రుతిరపాదాప్రాణా చామనా అధీః ।
అపాణిపాదాఽప్యవ్యక్తా వ్యక్తా వ్యఞ్జితవిష్టపా ॥ ౬౪ ॥
శమీప్రియా సకలదా శర్మదా శర్మరూపిణీ ।
సుతీక్ష్ణవన్దనీయాఙ్ఘ్రిః సుతవద్వత్సలా సుధీః ॥ ౬౫ ॥
సుతీక్ష్ణదణ్డా సువ్యక్తా సుతీభూతజగత్త్రయా ।
మధురా మధురాలాపా మధుసూదనభామినీ ॥ ౬౬ ॥
మాధ్వీ చ మాధవసతీ మాధవీకుసుమప్రియా ।
పరా పరభృతాలాపా పరాపరగతిప్రదా ॥ ౬౭ ॥
వాల్మీకివదనామ్భోధిసుధా బలిరిపుస్తుతా ।
నీలాఙ్గదాదివినుతా నీలాఙ్గదవిభూషితా ॥ ౬౮ ॥
విద్యాప్రదా వియన్మధ్యా విద్యాధరకృతస్తవా ।
కుల్యా కుశలదా కల్యా కలా కుశలవప్రసూః ॥ ౬౯ ॥
వశినీ విశదా వశ్యా వన్ద్యా వన్దారువత్సలా ।
మాహేన్ద్రీ మహదా మహ్యా మీనాక్షీ మీనకేతనా ॥ ౭౦ ॥
కమనీయా కలామూర్తిః కుపితాఽకుపితా కృపా ।
అనసూయాఙ్గరాగాఙ్కాఽనసూయా సూరివన్దితా ॥ ౭౧ ॥
అమ్బా బిమ్బాధరా కమ్బుకన్ధరా మన్థరా ఉమా ।
రామానుగాఽఽరామచరీ రాత్రిఞ్చరభయఙ్కరీ ॥ ౭౨ ॥
ఏకవేణీధరా భూమిశయనా మలినామ్బరా ।
రక్షోహరీ గిరిలసద్వక్షోజా జ్ఞానవిగ్రహా ॥ ౭౩ ॥
మేధా మేధావినీ మేధ్యా మైథిలీ మాతృవర్జితా ।
అయోనిజా వయోనిత్యా పయోనిధిసుతా పృథుః ॥ ౭౪ ॥
వానరర్క్షపరీవారా వారిజాస్యా వరాన్వితా ।
దయార్ద్రాఽభయదా భద్రా నిద్రాముద్రా ముదాయతిః ॥ ౭౫ ॥
గృధ్రమోక్షప్రదా గృధ్నుః గృహీతవరమాలికా ।
శ్వశ్రేయసప్రదా శశ్వద్భవా శతధృతిప్రసూః ॥ ౭౬ ॥
శరత్పద్మపదా శాన్తా శ్వశురార్పితభూషణా ।
లోకాధారా నిరానన్దా నీరాగా నీరజప్రియా ॥ ౭౭ ॥
నీరజా నిస్తమా నిఃస్వా నీరీతిర్నీతినైపుణా ।
నారీమణిర్నరాకారా నిరాకారాఽనిరాకృతా ॥ ౭౮ ॥
కౌమారీ కౌశలనిధిః కౌశికీ కౌస్తుభస్వసా ।
సుధాకరానుజా సుభ్రూః సుజాతా సోమభూషణా ॥ ౭౯ ॥
కాలీ కలాపినీ కాన్తిః కౌశేయామ్బరమణ్డితా ।
శశక్షతజసంరక్తచన్దనాలిప్తగాత్రకా ॥ ౮౦ ॥
మఞ్జీరమణ్డితపదా మఞ్జువాక్యా మనోరమా ।
గాయత్ర్యర్థస్వరూపా చ గాయత్రీ గోగతిప్రదా ॥ ౮౧ ॥
ధన్యాఽక్షరాత్మికా ధేనుః ధార్మికా ధర్మవర్ధినీ ।
ఏలాలకాఽప్యేధమానకృపా కృసరతర్పితా ॥ ౮౨ ॥
కృష్ణా కృష్ణాలకా కృష్టా కష్టఘ్నీ ఖణ్డితాశరా ।
కలాలాపా కలహకృద్దూరా కావ్యాబ్ధికౌముదీ ॥ ౮౩ ॥
అకారణా కారణాత్మా కారణావినివర్తినీ ।
కవిప్రియా కవనదా కృతార్థా కృష్ణభామినీ ॥ ౮౪ ॥
రుక్మిణీ రుక్మిభగినీ రుచిరా రుచిదా రుచిః ।
రుక్మప్రియా రుక్మభూషా రూపిణీ రూపవర్జితా ॥ ౮౫ ॥పృ
అభీష్మా భీష్మతనయా భీతిహృద్భూతిదాయినీ ।
సత్యా సత్యవ్రతా సహ్యా సత్యభామా శుచివ్రతా ॥ ౮౬ ॥
సమ్పన్నా సంహితా సమ్పత్ సవిత్రీ సవితృస్తుతా ।
ద్వారకానిలయా ద్వారభూతా ద్విపదగా ద్విపాత్ ॥ ౮౭ ॥
ఏకైకాత్మైకరూపైకపత్నీ చైకేశ్వరీ ప్రసూః ।
అజ్ఞానధ్వాన్తసూర్యార్చిః దారిద్ర్యాగ్నిఘనావలీ ॥ ౮౮ ॥
ప్రద్యుమ్నజననీ ప్రాప్యా ప్రకృష్టా ప్రణతిప్రియా ।
వాసుదేవప్రియా వాస్తుదోషఘ్నీ వార్ధిసంశ్రితా ॥ ౮౯ ॥
వత్సలా కృత్స్నలావణ్యా వర్ణ్యా గణ్యా స్వతన్తిరకా ।
భక్తా భక్తపరాధీనా భవానీ భవసేవితా ॥ ౯౦ ॥
రాధాపరాధసహనీ రాధితాశేషసజ్జనా ।
కోమలా కోమలమతిః కుసుమాహితశేఖరా ॥ ౯౧ ॥
కురువిన్దమణిశ్రేణీభూషణా కౌముదీరుచిః ।
అమ్లానమాల్యా సమ్మానకారిణీ సరయూరుచిః ॥ ౯౨ ॥
కటాక్షనృత్యత్కరుణా కనకోజ్జ్వలభూషణా ।
నిష్టప్తకనకాభాఙ్గీ నీలకుఞ్చితమూర్ధజా ॥ ౯౩ ॥
విశృఙ్ఖలా వియోనిస్థా విద్యమానా విదాంవరా ।
శృఙ్గారిణీ శిరీషాఙ్గీ శిశిరా శిరసి స్థితా ॥ ౯౪ ॥
సూర్యాత్మికా సూరినమ్యా సూర్యమణ్డలవాసినీ ।
వహ్నిశైత్యకరీ వహ్నిప్రవిష్టా వహ్నిశోభితా ॥ ౯౫ ॥
నిర్హేతురక్షిణీ నిష్కాభరణా నిష్కదాయినీ ।
నిర్మమా నిర్మితజగన్నిస్తమస్కా నిరాశ్రయా ॥ ౯౬ ॥
నిరయార్తిహరీ నిఘ్నా నిహితా నిహతాసురా ।
రాజ్యాభిషిక్తా రాజ్యేశీ రాజ్యదా రాజితాశ్రితా ॥ ౯౭ ॥
రాకేన్దువదనా రాత్రిచరఘ్నీ రాష్ట్రవల్లభా ।
శ్రితాచ్యుతప్రియా శ్రోత్రీ శ్రీదామసఖవల్లభా ॥ ౯౮ ॥
రమణీ రమణీయాఙ్గీ రమణీయగుణాశ్రయా ।
రతిప్రియా రతికరీ రక్షోఘ్నీ రక్షితాణ్డకా ॥ ౯౯ ॥
రసరూపా రసాత్మైకరసా రసపరాశ్రితా ।
రసాతలస్థితా రాసతత్పరా రథగామినీ ॥ ౧౦౦ ॥
అశ్వారూఢా గజారూఢా శిబికాతలశాయినీ ।
చలత్పాదా చలద్వేణీ చతురఙ్గబలానుగా ॥ ౧౦౧ ॥
చఞ్చచ్చన్ద్రకరాకారా చతుర్థీ చతురాకృతిః ।
చూర్ణీకృతాశరా చూర్ణాలకా చూతఫలప్రియా ॥ ౧౦౨ ॥
శిఖాశీఘ్రా శిఖాకారా శిఖావిధృతమల్లికా ।
శిక్షాశిక్షితమూర్ఖాలిః శీతాఽశీతా శతాకృతిః ॥ ౧౦౩ ॥
వైష్ణవీ విష్ణుసదృశీ విష్ణులోకప్రదా వృషా ।
వీణాగానప్రియా వీణా వీణాధరమునిస్తుతా ॥ ౧౦౪ ॥
వైదికీ వైదికాచారప్రీతా వైదూర్యభూషణా ।
సున్దరాఙ్గీ సుహృత్స్ఫీతా సాక్షిణీ సాక్షమాలికా ॥ ౧౦౫ ॥
క్రియా క్రియాపరా క్రూరా క్రూరరాక్షసహారిణీ ।
తల్పస్థా తరణిస్థానా తాపత్రయనివారిణీ ॥ ౧౦౬ ॥
తీర్ణప్రతిజ్ఞా తీర్థేశీ తీర్థపాదా తిథిప్రియా ।
చర్యా చరణదా చీర్ణా చీరాఙ్కా చత్వరస్థితా ॥ ౧౦౭ ॥
లతా లతాఙ్గీ లావణ్యా లఘ్వీ లక్ష్యాశరాలయా ।
లీలా లీలాహతఖలా లీనా లీఢా శుభావలిః ॥ ౧౦౮ ॥
లూతోపమానా లూనాఘా లోలాఽలోలవిభూతిదా ।
అమర్త్యా మర్త్యసులభా మానుషీ మానవీ మనుః ॥ ౧౦౯ ॥
సుగన్ధా సుహితా సూక్ష్మా సూక్ష్మమధ్యా సుతోజ్జ్వలా ।
మణిర్మణిమతీ మఞ్జుగమనా మహితా మునిః ॥ ౧౧౦ ॥
మితాఽమితసుఖాకారా మీలితా మీనలోచనా ।
గోమతీ గోకులస్థానా గోదా గోకులవాసినీ ॥ ౧౧౧ ॥
గజేన్ద్రగామినీ గమ్యా మాద్రీ మాయావినీ మధుః ।
త్రిలోచననుతా త్రిష్టుబనష్టుప్పఙ్క్తిరూపిణీ ॥ ౧౧౨ ॥
ద్విపాత్త్రిపాదష్టపదీ నవపాచ్చ చతుష్పదీ ।
పఙ్క్త్యాననోపదేష్ట్రీ చ శారదా పఙ్క్తిపావనీ ॥ ౧౧౩ ॥
శేఖరీభూతశీతాంశుః శేషతల్పాధిశాయినీ ।
శేముషీ ముషితాశేషపాతకా మాతృకామయీ ॥ ౧౧౪ ॥
శివవన్ద్యా శిఖరిణీ హరిణీ కరిణీ సృణిః ।
జగచ్చక్షుర్జగన్మాతా జఙ్గమాజఙ్గమప్రసూః ॥ ౧౧౫ ॥
సర్వశబ్దా సర్వముక్తిః సర్వభక్తిస్సమాహితా ।
క్షీరప్రియా క్షాలితాఘా క్షీరామ్బుధిసుతాఽక్షయా ॥ ౧౧౬ ॥
మాయినీ మథనోద్భూతా ముగ్ధా దుగ్ధోపమస్థితా ।
వశగా వామనయనా హంసినీ హంససేవితా ॥ ౧౧౭ ॥
అనఙ్గాఽనఙ్గజననీ సుతుఙ్గపదదాయినీ ।
విశ్వా విశ్వేడితా విశ్వధాత్రీ విశ్వాధికార్థదా ॥ ౧౧౮ ॥
గద్యపద్యస్తుతా గన్త్రీ గచ్ఛన్తీ గరుడాసనా ।
పశ్యన్తీ శృణ్వతీ స్పర్శకర్త్రీ రసనిరూపిణీ ॥ ౧౧౯ ॥
భృత్యప్రియా భృతికరీ భరణీయా భయాపహా ।
ప్రకర్షదా ప్రసిద్ధేశా ప్రమాణం ప్రమితిః ప్రమా ॥ ౧౨౦ ॥
ఆకాశరూపిణ్యధ్యస్తా మధ్యస్థా మధ్యమా మితిః ।
తలోదరీ తలకరీ తటిద్రూపా తరఙ్గిణీ ॥ ౧౨౧ ॥
అకమ్పా కమ్పితరిపుః జమ్భారిసుఖదాయినీ ।
దయావిష్టా శిష్టసుహృత్ విష్టరశ్రవసఃప్రియా ॥ ౧౨౨ ॥
హృషీకసుఖదా హృద్యాఽభీతా భీతార్తిహారిణీ ।
మాతా మనుముఖారాధ్యా మాతఙ్గీ మానితాఖిలా ॥ ౧౨౩ ॥
భృగుప్రియా భ్రుగుసుతా భార్గవేడ్యా మహాబలా ।
అనుకూలాఽమలతనుః లోపహీనా లిపిస్తుతా ॥ ౧౨౪ ॥
అన్నదాఽన్నస్వరూపఽన్నపూర్ణాఽపర్ణా ఋణాపహా ।
వృన్దా వృన్దావనరతిః బన్దీభూతామరీస్తుతా ॥ ౧౨౫ ॥
తేజస్వినీ తుర్యపూజ్యా తేజస్త్రితయరూపిణీ ।
షడాస్యజయదా షష్ఠీ షడూర్మిపరివర్జితా ॥ ౧౨౬ ॥
షడ్జప్రియా సత్త్వరూపా సవ్యమార్గప్రపూజితా ।
సనాతనతనుస్సన్నా సమ్పన్మూర్తిః సరీసృపా ॥ ౧౨౭ ॥
జితాశా జన్మకర్మాదినాశినీ జ్యేష్ఠరూపిణీ ।
జనార్దనహృదావాసా జనానన్దా జయాఽజనిః ॥ ౧౨౮ ॥
వాసనా వాసనాహన్త్రీ వామా వామవిలోచనా ।
పయస్వినీ పూతతనుః పాత్రీ పరిషదర్చితా ॥ ౧౨౯ ॥
మహామోహప్రమథినీ మహాహర్షా మహాధృతిః ।
మహావీర్యా మహాచర్యా మహాప్రీతా మహాగుణా ॥ ౧౩౦ ॥
మహాశక్తిర్మహాసక్తిః మహాజ్ఞానా మహారతిః ।
మహాపూజ్యా మహేజ్యా చ మహాలాభప్రదా మహీ ॥ ౧౩౧ ॥
మహాసమ్పన్మహాకమ్పా మహాలక్ష్యా మహాశయా ।
మహారూపా మహాధూపా మహామతిర్మహామహా ॥ ౧౩౨ ॥
మహారోగహరీ ముక్తా మహాలోభహరీ మృడా ।
మేదస్వినీ మాతృపూజ్యా మేయా మా మాతృరూపిణీ ॥ ౧౩౩ ॥
నిత్యముక్తా నిత్యబుద్ధా నిత్యతృప్తా నిధిప్రదా ।
నీతిజ్ఞా నీతిమద్వన్ద్యా నీతా ప్రీతాచ్యుతప్రియా ॥ ౧౩౪ ॥
మిత్రప్రియా మిత్రవిన్దా మిత్రమణ్డలశోభినీ ।
నిరఙ్కుశా నిరాధారా నిరాస్థానా నిరామయా ॥ ౧౩౫ ॥
నిర్లేపా నిఃస్పృహా నీలకబరీ నీరజాసనా ।
నిరాబాధా నిరాకర్త్రీ నిస్తులా నిష్కభూషితా ॥ ౧౩౬ ॥
నిరఞ్జనా నిర్మథనా నిష్క్రోధా నిష్పరిగ్రహా ।
నిర్లోభా నిర్మలా నిత్యతేజా నిత్యకృపాన్వితా ॥ ౧౩౭ ॥
ధనాఢ్యా ధర్మనిలయా ధనదా ధనదార్చితా ।
ధర్మకర్త్రీ ధర్మగోప్త్రీ ధర్మిణీ ధర్మదేవతా ॥ ౧౩౮ ॥
ధారా ధరిత్రీ ధరణిః ధుతపాపా ధుతాశరా ।
స్త్రీదేవతాఽక్రోధనాథాఽమోహాఽలోభాఽమితార్థదా ॥ ౧౩౯ ॥
కాలరూపాఽకాలవశా కాలజ్ఞా కాలపాలినీ ।
జ్ఞానిధ్యేయా జ్ఞానిగమ్యా జ్ఞానదానపరాయణా ॥ ౧౪౦ ॥
ఇతి శ్రీనారదీయోపపురాణాన్తర్గతం శ్రీలక్ష్మీసహస్రనామస్తోత్రం ౨ సమ్పూర్ణమ్ ॥
– Chant Stotra in Other Languages –
1000 Names of of Sri Lakshmi Devi » Sahasranama Stotram 2 Lyrics in Sanskrit » English » Bengali » Gujarati » Kannada » Malayalam » Odia » Tamil