Narayaniyam Trisaptatitamadasakam in Kannada:

॥ ನಾರಾಯಣೀಯಂ ತ್ರಿಸಪ್ತತಿತಮದಶಕಮ್ ॥

ನಾರಾಯಣೀಯಂ ತ್ರಿಸಪ್ತತಿತಮದಶಕಮ್ (೭೩) – ಶ್ರೀಕೃಷ್ಣಸ್ಯ ಮಥುರಾಯಾತ್ರಾ ।

ನಿಶಮಯ್ಯ ತವಾಥ ಯಾನವಾರ್ತಾಂ
ಭೃಶಮಾರ್ತಾಃ ಪಶುಪಾಲಬಾಲಿಕಾಸ್ತಾಃ ।
ಕಿಮಿದಂ ಕಿಮಿದಂ ಕಥನ್ನ್ವಿತೀಮಾಃ
ಸಮವೇತಾಃ ಪರಿದೇವಿತಾನ್ಯಕುರ್ವನ್ ॥ ೭೩-೧ ॥

ಕರುಣಾನಿಧಿರೇಷ ನನ್ದಸೂನುಃ
ಕಥಮಸ್ಮಾನ್ವಿಸೃಜೇದನನ್ಯನಾಥಾಃ ।
ಬತ ನಃ ಕಿಮು ದೈವಮೇವಮಾಸೀ-
ದಿತಿ ತಾಸ್ತ್ವದ್ಗತಮಾನಸಾ ವಿಲೇಪುಃ ॥ ೭೩-೨ ॥

ಚರಮಪ್ರಹರೇ ಪ್ರತಿಷ್ಠಮಾನಃ
ಸಹ ಪಿತ್ರಾ ನಿಜಮಿತ್ರಮಣ್ಡಲೈಶ್ಚ ।
ಪರಿತಾಪಭರಂ ನಿತಂಬಿನೀನಾಂ
ಶಮಯಿಷ್ಯನ್ ವ್ಯಮುಚಃ ಸಖಾಯಮೇಕಮ್ ॥ ೭೩-೩ ॥

ಅಚಿರಾದುಪಯಾಮಿ ಸನ್ನಿಧಿಂ ವೋ
ಭವಿತಾ ಸಾಧು ಮಯೈವ ಸಙ್ಗಮಶ್ರೀಃ ।
ಅಮೃತಾಂಬುನಿಧೌ ನಿಮಜ್ಜಯಿಷ್ಯೇ
ದ್ರುತಮಿತ್ಯಾಶ್ವಸಿತಾ ವಧೂರಕಾರ್ಷೀಃ ॥ ೭೩-೪ ॥

ಸವಿಷಾದಭರಂ ಸಯಾಞ್ಚಮುಚ್ಚೈ-
ರತಿದೂರಂ ವನಿತಾಭಿರೀಕ್ಷ್ಯಮಾಣಃ ।
ಮೃದು ತದ್ದಿಶಿ ಪಾತಯನ್ನಪಾಙ್ಗಾನ್
ಸಬಲೋಽಕ್ರೂರರಥೇನ ನಿರ್ಗತೋಽಭೂಃ ॥ ೭೩-೫ ॥

ಅನಸಾ ಬಹುಲೇನ ವಲ್ಲವಾನಾಂ
ಮನಸಾ ಚನುಗತೋಽಥ ವಲ್ಲಭಾನಾಮ್ ।
ವನಮಾರ್ತಮೃಗಂ ವಿಷಣ್ಣವೃಕ್ಷಂ
ಸಮತೀತೋ ಯಮುನಾತಟೀಮಯಾಸೀಃ ॥ ೭೩-೬ ॥

ನಿಯಮಾಯ ನಿಮಜ್ಯ ವಾರಿಣಿ ತ್ವಾ-
ಮಭಿವೀಕ್ಷ್ಯಾಥ ರಥೇಽಪಿ ಗಾನ್ದಿನೇಯಃ ।
ವಿವಶೋಽಜನಿ ಕಿನ್ನ್ವಿದಂ ವಿಭೋಸ್ತೇ
ನನು ಚಿತ್ರಂ ತ್ವವಲೋಕನಂ ಸಮನ್ತಾತ್ ॥ ೭೩-೭ ॥

ಪುನರೇಷ ನಿಮಜ್ಯ ಪುಣ್ಯಶಾಲೀ
ಪುರುಷಂ ತ್ವಾಂ ಪರಮಂ ಭುಜಙ್ಗಭೋಗೇ ।
ಅರಿಕಂಬುಗದಾಂಬುಜೈಃ ಸ್ಫುರನ್ತಂ
ಸುರಸಿದ್ಧೌಘಪರೀತಮಾಲುಲೋಕೇ ॥ ೭೩-೮ ॥

ಸ ತದಾ ಪರಮಾತ್ಮಸೌಖ್ಯಸಿನ್ಧೌ
ವಿನಿಮಗ್ನಃ ಪ್ರಣುವನ್ಪ್ರಕಾರಭೇದೈಃ ।
ಅವಿಲೋಕ್ಯ ಪುನಶ್ಚ ಹರ್ಷಸಿನ್ಧೋ-
ರನುವೃತ್ಯಾ ಪುಲಕಾವೃತೋ ಯಯೌ ತ್ವಾಮ್ ॥ ೭೩-೯ ॥

ಕಿಮು ಶೀತಲಿಮಾ ಮಹಾನ್ ಜಲೇ ಯ-
ತ್ಪುಲಕೋಽಸಾವಿತಿ ಚೋದಿತೇನ ತೇನ ।
ಅತಿಹರ್ಷನಿರುತ್ತರೇಣ ಸಾರ್ಧಂ
ರಥವಾಸೀ ಪವನೇಶ ಪಾಹಿ ಮಾಂ ತ್ವಮ್ ॥ ೭೩-೧೦ ॥

ಇತಿ ತ್ರಿಸಪ್ತತಿತಮದಶಕಂ ಸಮಾಪ್ತಮ್ ।

– Chant Stotras in other Languages –

Narayaneeyam Trisaptatitamadasakam in English – Kannada – Telugu – Tamil