॥ Mangala Ashtakam Malayalam Lyrics ॥
॥ മങ്ഗലാഷ്ടകം ॥
ബ്രഹ്മാവിഷ്ണുര്‍ഗിരീശഃ സുരപതിരനലഃ പ്രേതരാഡ്യാതുനാഥ-
സ്തോയാധീശശ്ച വായുര്‍ധനദഗുഹഗണേശാര്‍കചന്ദ്രാശ്ച രുദ്രാഃ ।
വിശ്വാദിത്യാശ്വിസധ്യാ വസുപിതൃമരുതസ്സിദ്ധവിദ്യാശ്ച യക്ഷാ
ഗന്ധര്‍വാഃ കിന്നരാദ്യാഖിലഗഗനചരാ മങ്ഗലം മേ ദിശന്തു ॥ 1 ॥
വാണീ ലക്ഷ്മീ ധരിത്രീ ഹിമഗിരിതനയാ ചണ്ഡികാ ഭദ്രകാലീ
ബ്രഹ്മാദ്യാ മാതൃസങ്ഘാ അദിതിദിതിസതീത്യാദയോ ദക്ഷപുത്ര്യഃ ।
സാവിത്രീ ജഹ്നുകന്യാ ദിനകരതനയാരുന്ധതീ ദേവപത്ന്യഃ
പൌലോമാദ്യാസ്തഥാന്യാഃ ഖചരയുവതയോ മങ്ഗലം മേ ദിശന്തു ॥ 2 ॥
മത്സ്യഃ കൂര്‍മോ വരാഹോ നൃഹരിരഥ വടുര്‍ഭാര്‍ഗവോ രാമചന്ദ്ര-
സ്സീരീ കൃഷ്ണശ്ച ഖഡ്ഗീ സകപിലനരനാരായണാത്രേയവൈദ്യാഃ ।
അന്യേ നാനാവതാരാഃ നരകവിജയിനശ്ചക്രമുഖ്യായുധാനി
തത്പത്ന്യസ്തത്സുതാശ്ചാപ്യഖിലഹരികുലാ മങ്ഗലം മേ ദിശന്തു ॥ 3 ॥
വിശ്വാമിത്രോ വസിഷ്ഠഃ കലശഭവ ഉതഥ്യോഽങ്ഗിരാഃ കാശ്യപശ്ച
വ്യാസഃ കണ്വോ മരീചീ ക്രതുഭൃഗുപുലഹാ ശൌനകോഽത്രിഃ പുലസ്ത്യഃ ।
അന്യേ സര്‍വേ മുനീന്ദ്രാഃ കുജബുധഗുരുശുക്രാര്‍കജാദ്യാ ഗ്രഹാ യേ
നക്ഷത്രാണി പ്രജേശാഃ ഫണിഗണമനവോ മങ്ഗലം മേ ദിശന്തു ॥ 4 ॥
താര്‍ക്ഷ്യോഽനന്തോ ഹനൂമാന്‍ ബലിരപി സനകാദ്യാഃ ശുകോ നാരദശ്ച
പ്രഹ്ലാദഃ പാണ്ഡുപുത്രാ നൃഗനലനഹുഷാഃ വിഷ്ണുരാതോഽംബരീഷഃ ।
ഭീഷ്മാക്രൂരോദ്ധവോശീനരഭരതഹരിശ്ചന്ദ്രരുക്മാങ്ഗദാദ്യാഃ
അന്യേ സര്‍വേ നരേന്ദ്രാ രവിശശികുലജാ മങ്ഗലം മേ ദിശന്തു ॥ 5 ॥
ആകൂത്യാദ്യാശ്ച തിസ്രഃ സകലമുനികലത്രാണി ദാരാ മനൂനാം
താരാ കുന്തീ ച പാഞ്ചാല്യഥ നലദയിതാ രുക്മിണീ സത്യഭാമാ ।
ദേവക്യാദ്യാശ്ച സര്‍വാ യദുകുലവനിതാ രാജഭാര്യാസ്തഥാന്യാഃ
ഗോപ്യശ്ചാരിത്രയുക്താഃ സകലയുവതയോ മങ്ഗലം മേ ദിശന്തു ॥ 6 ॥
വിപ്രാ ഗാവശ്ച വേദാഃ സ്മൃതിരപി തുലസീ സര്‍വതീര്‍ഥാനി വിദ്യാഃ
നാനാശാസ്ത്രേതിഹാസാ അപി സകലപുരാണാനി വര്‍ണാശ്രമാശ്ച ।
സാങ്ഖ്യം ജ്ഞാനം ച യോഗാവപി യമനിയമൌ സര്‍വകര്‍മാണി കാലാഃ
സര്‍വേ ധര്‍മാശ്ച സത്യാദ്യവയവസഹിതാ മങ്ഗലം മേ ദിശന്തു ॥ 7 ॥
ലോകാ ദ്വീപാഃ സമുദ്രാഃ ക്ഷിതിധരപതയോ മേരുകൈലാസമുഖ്യാഃ
കാവേരീനര്‍മദാദ്യാഃ ശുഭജലസരിതഃ സ്വര്‍ദ്രുമാ ദിഗ്ഗജേന്ദ്രാഃ ।
മേഘാ ജ്യോതീംഷിനാനാനരമൃഗപക്ഷ്യാദയഃ പ്രാണിനോഽന്യേ
സര്‍വൌഷധ്യശ്ച വൃക്ഷാഃ സകലതൃണലതാ മങ്ഗലം മേ ദിശന്തു ॥ 8 ॥
ഭക്ത്യാ സംയുക്തചിത്താഃ പ്രതിദിവസമിമാന്‍ മങഗലസ്തോത്രമുഖ്യാന്‍
അഷ്ടൌ ശ്ലോകാന്‍ പ്രഭാതേ ദിവസപരിണതൌ യേ ച മര്‍ത്യാഃ പഠന്തി ।
തേ നിത്യം പൂര്‍ണകാമാ ഇഹ ഭുവി സുഖിനശ്ചാര്‍ഥവന്തോഽപി ഭൂത്വാ
നിര്‍മുക്താ സര്‍വപാപൈര്‍വയസി ച ചരമേ വിഷ്ണുലോകം പ്രയാന്തി ॥ 9 ॥
ഇതി മങ്ഗലാഷ്ടകസ്തോത്രം സമാപ്തം ॥
– Chant Stotra in Other Languages –
Mangala Ashtakam Lyrics in Sanskrit » English » Bengali » Gujarati » Kannada » Odia » Telugu » Tamil