॥ శ్రీరామప్రాతఃస్మరణమ్ శ్రీరామపఞ్చకమ్ Telugu Lyrics ॥
ప్రాతః స్మరామి రఘునాథముఖారవిన్దం
మన్దస్మితం మధురభాషి విశాలభాలమ్ ।
కర్ణావలమ్బిచలకుణ్డలశోభిగణ్డం
కర్ణాన్తదీర్ఘనయనం నయనాభిరామమ్ ॥ ౧॥
ప్రాతర్భజామి రఘునాథకరారవిన్దం
రక్షోగణాయ భయదం వరదం నిజేభ్యః ।
యద్రాజసంసది విభజ్య మహేశచాపం
సీతాకరగ్రహణమఙ్గలమాప సద్యః ॥ ౨॥
ప్రాతర్నమామి రఘునాథపదారవిన్దం
వజ్రాఙ్కుశాదిశుభరేఖి సుఖావహం మే ।
యోగీన్ద్రమానసమధువ్రతసేవ్యమానం
శాపాపహం సపది గౌతమధర్మపత్న్యాః ॥ ౩॥
ప్రాతర్వదామి వచసా రఘునాథ నామ
వాగ్దోషహారి సకలం శమలం నిహన్తి ।
యత్పార్వతీ స్వపతినా సహ భోక్తుకామా
ప్రీత్యా సహస్రహరినామసమం జజాప ॥ ౪॥
ప్రాతః శ్రయే శ్రుతినుతాం రఘునాథమూర్తిం
నీలామ్బుజోత్పలసితేతరరత్ననీలామ్ ।
ఆముక్తమౌక్తికవిశేషవిభూషణాఢ్యాం
ధ్యేయాం సమస్తమునిభిర్జనముక్తిహేతుమ్ ॥ ౫॥
యః శ్లోకపఞ్చకమిదం ప్రయతః పఠేద్ధి
నిత్యం ప్రభాతసమయే పురుషః ప్రబుద్ధః ।
శ్రీరామకిఙ్కరజనేషు స ఏవ ముఖ్యో
భూత్వా ప్రయాతి హరిలోకమనన్యలభ్యమ్ ॥
॥ ఇతి శ్రీరామకర్ణామృతాన్తర్గతమ్ శ్రీరామప్రాతఃస్మరణమ్ ॥