భువన-కేలికలా-రసికే శివే
ఝటితి ఝఞ్ఝణ-ఝఙ్కృత-నూపూరే ।
ధ్వనిమయం భవ-బీజమనశ్వరం
జగదిదం తవ శబ్దమయం వపుః ॥ ౧॥
వివిధ-చిత్ర-విచిత్రమద్భుతం
సదసదాత్మకమస్తి చిదాత్మకమ్ ।
భవతి బోధమయం భజతాం హృది
శివ శివేతి శివేతి వచోఽనిశమ్ ॥ ౨॥
జనని మఞ్జుల-మఙ్గల-మన్దిరం
జగదిదం జగదమ్బ తవేప్సితమ్ ।
శివ-శివాత్మక-తత్త్వమిదం పరం
హ్యహమహో ను నతోఽస్మి నతోఽస్మ్యహమ్ ॥ ౩॥
స్తుతిమహో కిల కిం తవ కుర్మహే
సురగురోరపి వాక్పటుతా కుతః ।
ఇతి విచార్య పరే పరమేశ్వరి
హ్యహమహో ను నతోఽస్మి నతోఽస్మ్యహమ్ ॥ ౪॥
చితి చమత్కృతిచిన్తనమస్తు మే
నిజపరం భవభేద-నికృన్తనమ్ ।
ప్రతిపలం శివశక్తిమయం శివే
హ్యహమహో ను నతోఽస్మి నతోఽస్మ్యహమ్ ॥ ౫॥
ఇతి శ్రీదత్తాత్రేయానన్దనాథవిరచితం ప్రణతిపఞ్చకం సమ్పూర్ణమ్ ।