॥ Suratakathamritam Athava Arya Ashatakam Odia Lyrics ॥
ସୁରତକଥାମୃତଂ ଅଥଵା ଆର୍ୟଶତକମ୍
ମୂଲଗ୍ରନ୍ଥସ୍ୟ କେନ୍ଦ୍ରୀୟଶ୍ଲୋକଃ-
କଦାହଂ ସେଵିଷ୍ୟେ ଵ୍ରତତିଚମରୀଚାମରମରୁ-
ଦ୍ଵିନୋଦେନ କ୍ରୀଡା କୁସୁମଶୟନେ ନ୍ୟସ୍ତଵପୁଷୌ ।
ଦରୋନ୍ମୀଲନ୍ନେତ୍ରୌ ଶ୍ରମଜଲକଣକ୍ଲିଦ୍ୟଦଲକୌ
ବ୍ରୁଵାଣାଵନ୍ୟୋନ୍ୟଂ ଵ୍ରଜନଵୟୁଵାନାଵିହ ୟୁଵାମ୍ ॥
ଉତ୍କଲିକାଵଲ୍ଲରୀ ୫୨
ଶ୍ରୀକୃଷ୍ଣ ଉଵାଚ-
ଚିତ୍ରମିଦଂ ନହି ୟଦହୋ ଵିତରସ୍ୟଧରସୁଧାଂ ନିକାମଂ ମେ ।
ଅତି କୃପଣୋଽପି କଦାଚିଦ୍ଵଦାନ୍ୟତମତାଂ ଜନଃ ପ୍ରିୟେ ଧତ୍ତେ ॥ ୧ ॥
ଲୟମପି ନ ୟାତି ଦାନେ ପ୍ରତ୍ୟୁତ ଋଦ୍ଧିଂ ରସାଧିକାଂ ଲଭତେ ।
ଅଧରସୁଧୋତ୍ତମଵିଦ୍ୟାଂ ଵିବୁଧଵରାୟାଦ୍ୟ ମେ ଦେହି ॥ ୨ ॥
ସ୍ଵାନ୍ତେ ବିଭ୍ରତି ଭଵତୀଂ ସ୍ଵାନ୍ତେ ଵାସିନ୍ୟତିସ୍ନିଗ୍ଧେ ।
ମୟି କିମପୂର୍ଵାଂ ନାଦାସ୍ତ୍ଵମିମାଂ ଚ ୟସ୍ମାଦ୍ଵିଦୁଷ୍ୟହୋ ତତ୍ର ॥ ୩ ॥
ଶ୍ରୀରାଧାହ-
କୁଲରମଣୀତତିଲଜ୍ଜାନିର୍ମୂଲନତନ୍ତ୍ରକୌଶଲୋଦ୍ଗାରୈଃ ।
ପ୍ରଥୟସି କିମୁ ନିଜଗର୍ଵଂ ଜ୍ଞାତଂ ପାଣ୍ଡିତ୍ୟମସ୍ତି ତେ ତତ୍ର ॥ ୪ ॥
ଦୈଵାଦ୍ଵିପକ୍ଷତାମପି ମୟି ୟାନ୍ତ୍ୟା ବତ ମମୈଵ ସହଚର୍ୟା ।
ନ୍ୟସ୍ତାହଂ ତଵ ହସ୍ତେ କଥମତ୍ର ଗର୍ଵୋ ଭଵେନ୍ ନ ତେ ॥ ୫ ॥
ଅୟମପି ପରମୋ ଧର୍ମଃ ଶ୍ଲାଘା ମହତୀ ତଵେୟମେଵେଷ୍ଟା ।
ୟୌଵନଫଲମପି ଚେଦଂ କୁଲାବଲାପୀଡନଂ ୟଦହୋ ॥ ୬ ॥
ଶ୍ରୀକୃଷ୍ଣ ଆହ-
ସ୍ମରନରପତିଵରରାଜ୍ୟେ ଧର୍ମଃ ଶର୍ମପ୍ରଦୋଽୟମାଦିଷ୍ଟଃ ।
ଵତ୍ସ୍ୟାୟନମୁନିନିର୍ମିତପଦ୍ଧତ୍ୟୁକ୍ତାନୁସାରେଣ ହି ॥ ୭ ॥
ଅପି ଚ-
ଅତ୍ର ପ୍ରମାଣମିଷ୍ଟଂ ଚେନ୍ମଦୁକ୍ତେଽପି ନ ମନ୍ୟତେ କିଞ୍ଚିତ୍ ।
ଭରତମୁନେଃ କିଲ ଶାସ୍ତ୍ରଂ ଶାସ୍ତ୍ରାନ୍ତରମତ୍ର କୋ ଗଣୟେତ୍ ॥ ୮ ॥
ଵିଦ୍ୟୁତି ଵିଦ୍ୟୁତିଦାୟୀ ଶ୍ଲାଘାଂ ମନୁତେ ପୟୋଧରଃ ସ୍ଵୀୟାମ୍ ।
ଵିଦ୍ୟୁଦପି ସ୍ଵାଂ ସୁଷମାଂ ପୟୋଧରେ ଶ୍ଲାଘୟତ୍ୟଧିକାମ୍ ॥ ୯ ॥
ଶ୍ରୀରାଧାହ-
ଗୋଵର୍ଧନଗିରିକନ୍ଦରଵାସୀ ହରିରସୀତି ଶ୍ରୁତଂ କତିଧା ।
କୁଲବାଲାହରିଣୀତତିରଥାପି ଗଚ୍ଛତ୍ୟତୋ ନ ତେ ଦୋଷଃ ॥ ୧୦ ॥
କିଂ କୁର୍ମଃ ସ୍ଵାଚରିତୋ ଧର୍ମସ୍ତ୍ୟକ୍ତୁଂ କଥଂ ପୁନଃ ଶକ୍ୟଃ ।
ଦିନକରପୂଜନଵିଧିରିହ କୁସୁମାଵଚୟେ ପ୍ରଵର୍ତ୍ୟତେ ॥ ୧୧ ॥
ଶ୍ରୀକୃଷ୍ଣ ଆହ-
ଵୃନ୍ଦାରଣ୍ୟପୁରନ୍ଦରମପି ମାଂ ନ ଗିରାପି କର୍ହିଚିନ୍ମନୁଷେ ।
ସୂର୍ୟାରାଧନଗର୍ଵସ୍ତଦୟଂ ରାଧେ ନ ତେ ଭଵେତ୍ଖର୍ଵଃ ॥ ୧୨ ॥
ଗୋଵର୍ଧନଗିରିଧାରଣକାରଣମୋଜୋ ନ ତେଽଧିକଂ ମନୁତେ ।
ତଵ ସଵୟସ୍ତତିରପି ସ ତଵୈକକୁଚଶୈଲଗର୍ଵେଣ ॥ ୧୩ ॥
ଶ୍ରୀରାଧାହ-
ନ କିଲ କୁଚୌ ମମ ଶୈଲୌ ପଶ୍ୟାମ୍ବୁଜକୋରକୌ ନଵୋତ୍ପନ୍ନୌ ।
ନ ତୟୋର୍ଦଲନଂ ମରକତଶିଲାନିଭେନୋରସାଽଦ୍ୟ ତେ ୟୋଗ୍ୟମ୍ ॥ ୧୪ ॥
କୌସ୍ତୁଭମଣିରତିତରଲଃ ସରଲମତିଃ ପୁନରହଂ କୁଲ ପ୍ରମଦା ।
ତଦଲମନେନ ଧିନୋତୁ ତ୍ଵାଂ ନିଜସଦୃଶଂ ଭୃଶଂ ହୃଦିସ୍ଥସ୍ତେ ॥ ୧୫ ॥
ଶ୍ରୀକୃଷ୍ଣ ଆହ-
ସତ୍ୟମୟଂ ଭୟତରଲଃ କଣ୍ଠତଟାନ୍ତଂ ମମ ପ୍ରିୟେ ଶ୍ରୟତେ ।
ଦୟତେ ତଵ କୁଚଦ୍ଵୟମଧିକଂ ସମ୍ମର୍ଦୟତ୍ୟହୋ ସଦ୍ୟଃ ॥ ୧୬ ॥
ଶ୍ରୀରାଧାହ-
ତଵ ଖରନଖରଵିଦାରଣସହନଂ କୁଚୟୋରିୟଂ ଵରା ଶକ୍ତିଃ ।
କିମତ୍ର ସମ୍ଭଵତି ସ୍ଫୁଟମନୟୋଃ ସ୍ଵବଲପ୍ରକାଶନାଟୋପଃ ॥ ୧୭ ॥
ଶ୍ରୀକୃଷ୍ଣ ଆହ-
ମମ ଖରନଖରମହାଙ୍କୁଶଘାତାଦପି ଶତଗୁଣଂ ବଲଂ ଲବ୍ଧ୍ଵା ।
କୋଲାଦିଵ କୁଚ କୁମ୍ଭୌ ମମାର୍ଦୟତୋ ଭୃଶଂ ପ୍ରିୟେ ପଶ୍ୟ ॥ ୧୮ ॥
ଶ୍ରୀରାଧାହ-
କୁଚପଦ୍ମକୁଟ୍ମଲୟୁଗଂ ମର୍ଦୟତି ତ୍ଵାଂ ନିଜାତିଦୌରାତ୍ମ୍ୟାତ୍ ।
ଵୃନ୍ଦାଵନଵରସିନ୍ଧୁର ନନୁ ଦୟସେ ତ୍ଵଂ ନିସର୍ଗକାରୁଣ୍ୟାତ୍ ॥ ୧୯ ॥
ଶ୍ରୀକୃଷ୍ଣ ଆହ-
ତନ୍ଵାତେ ମୁଦମୁଚ୍ଚୈସ୍ତାଵକକୁଚକୋରକୌ ୟଦିମୌ ।
ନଖଚନ୍ଦ୍ରୋଦୟମଧି କିଂ ସ୍ଵୟୋଗ୍ୟମତୁଲଂ ନ ଶୋଭତେ ପ୍ରିୟେ ॥ ୨୦ ॥
ଶ୍ରୀରାଧାହ-
ନଖରାନାମତିଖରତାରତାୟ ତେ ତାଵକେନ କିଲ ଵିଧିନା ।
ଵ୍ରଜଵନିତାନାମରୁଚ୍ୟ ରୁଷେଵ ନିରମାୟି କିଂ ନୂନମ୍ ॥ ୨୧ ॥
ଶ୍ରୀକୃଷ୍ଣ ଆହ-
କୁସୁମାଦପି ମୃଦୁଲାଙ୍ଗ୍ୟାଃ କୁଚୟୋରେଵାସ୍ତି ହନ୍ତ କାଠିନ୍ୟମ୍ ।
ଇତି ତନ୍ ନିଷ୍କାଶୟିତୁଂ କ୍ଷୁଣତ୍ତି ନଖରାଵଲୀ ଚତୁରା ॥ ୨୨ ॥
ଶ୍ରୀରାଧାହ-
ହନ୍ତ କୃତଂ ବତ କିମିଦଂ ସୁରତରସୋନ୍ମଦକୁଲସ୍ତ୍ରିୟାଃ କଦନମ୍ ।
ହାରାସ୍ତ୍ରୁଟିତାଃ କାଞ୍ଚୀ ଗଲିତା ସ୍ଖଲିତା ତଥୈଵ ମେ ଵେଣୀ ॥ ୨୩ ॥
ଶ୍ରୀକୃଷ୍ଣ ଆହ-
ହାରା ବଲାଦୁରୁଭାରାଃ କୃଶମପି ମଧ୍ୟଂ ଚ ନହ୍ୟତେ କାଞ୍ଚୀ ।
ଚିକୁରକଦର୍ଥନଭୂତା ଵେଣୀ ତଦିମା ରକ୍ଷିତୁଂ ନ ୟୋଗ୍ୟାଃ ॥ ୨୪ ॥
ଶ୍ରୀରାଧାହ-
ଊଧୋ ୟେନ ଗିରୀନ୍ଦ୍ରସ୍ତମପି ନ ଵହତୋ ମମୋରସୋ ଭାରଃ ।
ହାରୈର୍ଭୂଷଣଭୂତୈରଭୂଦିୟଂ ସ୍ନେହମୁଦ୍ରା କିମ୍ ॥ ୨୫ ॥
କୁଚଗିରିଵହନପଟୁତ୍ଵଂ କୃଶମପି ମଧ୍ୟଂ ୟତୋ ବଲାଦ୍ଧତ୍ତେ ।
ମଣିମୟକାଞ୍ଚୀବନ୍ଧାଦେଵ ତମୃତେ ଦୃଢତାଽସ୍ୟ କେନ ସ୍ୟାତ୍ ॥ ୨୬ ॥
ଉତ୍କର୍ଷଣାଵାକର୍ଷଣପର୍ୟାୟୋଦିତପରସ୍ପରାସକ୍ତ୍ୟା ।
ପ୍ରୀତିରିୟଂ କିଲ ଵେଣୀଚିକୁରାଣାଂ ନ ଚ କଦର୍ଥନଂ ଵାଚ୍ୟମ୍ ॥ ୨୭ ॥
ଶ୍ରୀକୃଷ୍ଣ ଆହ-
ସତ୍ୟମହଂ ଗିରିଧାରୀ କରନଲିନାଭ୍ୟାଂ ଗିରିଦ୍ଵୟଂ ଧାସ୍ୟେ ।
ମଧ୍ୟସ୍ୟାତ୍ର ପଟୁତ୍ଵୈରଲଂ ବଲଂ କିଲ ମମୈଵାସ୍ତାମ୍ ॥ ୨୮ ॥
ଚିକୁରାଣାମପି ଵେଣ୍ୟାଃ ପରସ୍ପରାସକ୍ତିଃ ସୂଚିତା ।
ପ୍ରୀତ୍ୟା କିଂ ଫଲମିହ ୟଦି ପରିଚରଣଂ ତେ ନ କୁର୍ଵନ୍ତି ॥ ୨୯ ॥
ଵେଣୀବନ୍ଧଵିମୁକ୍ତଶ୍ଚିକୁର କଲାପୋଽତ୍ର ଵେଲ୍ଲିତୋ ମରୁତା ।
ଚାମରତାମୁପୟାତଃ ସ୍ଵିନ୍ନାଙ୍ଗୀଂ ଵୀଜୟତ୍ୟହୋ ଭଵତୀମ୍ ॥ ୩୦ ॥
ଶ୍ରୀରାଧାହ-
ଆଵିସ୍କୃତ ପୁରୁ ଶିଲ୍ପଂ ସଖ୍ୟା ମେ ବହୁ ଵିଲମ୍ବତୋ ରଚିତମ୍ ।
ଚିତ୍ରକମଲିକତଟେ ତତ୍କ୍ଷଣେନ ଵିଧ୍ଵଂସିତଂ ଭଵତା ॥ ୩୧ ॥
ଶ୍ରୀକୃଷ୍ଣ ଆହ-
ସ୍ମିତମୁଖି ରୁଚାର୍ଧଵିଧୁନା ସୁଚାରୁଭାଲେନ ମେ ମିଲନ୍ତ୍ୟେଷା ।
ତ୍ଵଦଲିକଵିଧୁରେଖାଽସ୍ମୈ ପ୍ରେମ୍ନାଽର୍ପୟତି ସ୍ମ ସର୍ଵସ୍ଵମ୍ ॥ ୩୨ ॥
ଶ୍ରୀରାଧାହ-
ଗଣ୍ଡତଟେ ମମ ମକରୀ ଶ୍ୟାମା ସରଲାତିଚିତ୍ରିତାପ୍ୟବଲାମ୍ ।
ମକରଦ୍ଵୟତାଟଙ୍କଶ୍ଚପଲୋ ଧୃଷ୍ଟଃ କଦର୍ଥୟତ୍ୟେନାମ୍ ॥ ୩୩ ॥
ଶ୍ରୀକୃଷ୍ଣ ଆହ-
ରମଣି ମମ ଶ୍ରୁତିୟୁଗଲଂ ତ୍ଵଦୁଦିତସୌଧଦ୍ରଵୈଃ ପ୍ଲୁତଂ ତଦପି ।
ଦ୍ଵିଗୁଣିତତୃଷ୍ଣଂ ଜାତଂ ଲୋଲୁପତାୟାଃ ସ୍ଵରୂପମେଵୈତତ୍ ॥ ୩୪ ॥
ଶ୍ରୀରାଧାହ-
ଲୋଲୁପଚୂଡାମଣିରସି ତଵାଙ୍ଗଵୃନ୍ଦଂ ଚ ଲୋଲୁପଂ ୟଦୟମ୍ ।
ମନ୍ନୟନାକ୍ତମସୀମପ୍ୟଧରୋ ରାଗୀ ସ୍ଵ ମଣ୍ଡନଂ କୁରୁତେ ॥ ୩୫ ॥
ଶ୍ରୀକୃଷ୍ଣ ଆହ-
ବନ୍ଧୂକାନ୍ତରଵର୍ତିନମଲିନମିଵାୟଂ ମସୀଦ୍ରଵଂ ଧୃତ୍ଵା ।
ଅକ୍ଷ୍ଣୋରେଵ ମୁଦଂ ତେ ତନୁତେ ତଦିମଂ କିମାକ୍ଷିପସି ॥ ୩୬ ॥
ଶ୍ରୀରାଧାହ-
ଵନ୍ଦେ ତଵ ପରିହସିତଂ କଂ ଦେଵଂ ପରିଚରସ୍ୟହୋ ନିଭିଋତମ୍ ।
ୟତ୍ପ୍ରସାଦାଦଧୀତା ସୌରତଵିଦ୍ୟାତିଚାତୁରୀଧାରା ॥ ୩୭ ॥
ଶ୍ରୀକୃଷ୍ଣ ଆହ-
ତଵ ଜଘନୋତ୍ତମସଦନଂ ସରସଂ ଦେଵଂ ସମୁପଚରାମ୍ୟତୁଲମ୍ ।
ନିଭୃତନିକୁଞ୍ଜଗୃହସ୍ଥଃ ପ୍ରତି ଦିନମୁଚିତାଧିକାର ଏଵାହମ୍ ॥ ୩୮ ॥
ଶ୍ରୀରାଧାହ-
ସତ୍ୟମତଃ ସ୍ଵାରୂପ୍ୟଂ ଲବ୍ଧ୍ଵା ଦୃପ୍ତଃ କୁଲାବଲାନଲିନୀଃ ।
ମଲିନୀଃ କୁରୁଷେ କା ତଵ ନୟନେ ପତିତା ସ୍ଵକଂ ପତିଂ ଭଜତାମ୍ ॥ ୩୯ ॥
ଶ୍ରୀକୃଷ୍ଣ ଆହ-
ସଖି ତଵ ନିରାଵୃତାନ୍ୟତିରୁଚିରାନ୍ୟଙ୍ଗାନ୍ୟତୀଵ ସଙ୍କୁଚନ୍ତି ।
ସମ୍ପ୍ରତି ମନ୍ନୟନାନ୍ତର୍ଵିଶନ୍ତି ମନ୍ଦାକ୍ଷମଗ୍ନାନି ॥ ୪୦ ॥
ଶ୍ରୀରାଧାହ-
ଧୃଷ୍ଟତମେ ତଵ ନୟନେ ୟନ୍ମିତ୍ରଂ କୌସ୍ତୁଭୋ ଦ୍ୟୁତିଂ ତନୁତେ ।
ତଦିହ ମଦଙ୍ଗାନ୍ୟଧୁନା ଶରଣଂ ୟାନ୍ତୁ ତ୍ଵଦଙ୍ଗାନାମ୍ ॥ ୪୧ ॥
ଶ୍ରୀକୃଷ୍ଣ ଆହ-
ହିତ୍ଵା ସତୃଷଦୃଶୌ ମମ ଵୈରାଦିଵ କୌସ୍ତୁଭଂ ପରାଭୂୟ ।
ଵିଶତି ତଵ ସ୍ତନୟୁଗଲଂ ମଦ୍ଧୃଦୟାନ୍ତଃ ସ୍ଵଵିକ୍ରମଂ ବିଭ୍ରତ୍ ॥ ୪୨ ॥
ଶ୍ରୀରାଧାହ-
କଠିନତମଂ ତଵ ହୃଦୟଂ କୁଚୟୁଗମପି ମେ ପ୍ରତୀୟତେ କଠିନମ୍ ।
ତଦୁଚିତମନୟୋର୍ମିଲନଂ ୟୋଗ୍ୟଂ ୟୋଗ୍ୟେନ ୟୁଜ୍ୟତେ ୟସ୍ମାତ୍ ॥ ୪୩ ॥
ଶ୍ରୀକୃଷ୍ଣ ଆହ-
ମଦୁରଃ ପକ୍ଷଗତା ତ୍ଵଂ ମମ ୟଦ୍ୟକ୍ଷ୍ଣୋର୍ଵିପକ୍ଷତାଂ କୁରୁଷେ ।
ତଦପି ତୟୋସ୍ତ୍ଵଦ୍ଵଦନଂ ପ୍ରକାମସୁଭଗଂ ମୁଦଂ ତନୁତେ ॥ ୪୪ ॥
ଶ୍ରୀରାଧାହ-
ସ୍ଵଚ୍ଛନ୍ଦଂ ୟଦି ରମସେ ରମସ୍ଵ ତତ୍ରାବଲାସ୍ମି କିଂ କୁର୍ୟାମ୍ ।
କ୍ଷିପସି ଦୃଶଂ ୟଦଲଜ୍ଜଂ ମଦପଘନେ ତତ୍କଥଂ ସହେ କୁଲଜା ॥ ୪୫ ॥
ଶ୍ରୀକୃଷ୍ଣ ଆହ-
ୟଦି ମମ ଦୃଷ୍ତିଚକୋର୍ୟା ଵିଧୁମୁଖି ନୈଵୋପଲଭ୍ୟସେ ଦୈଵାତ୍ ।
ହୃଦୟଗୃହେ ଖେଲସ୍ୟପି ତଥାପି ହା ଜ୍ଵଲୟସି ପ୍ରସଭମ୍ ॥ ୪୬ ॥
ଶ୍ରୀରାଧାହ-
ତଵ ଭୁଜୟୁଗଦୃଢବନ୍ଧଂ ଵାମାପୀହେଽନ୍ୟଥା ଭଵନ୍ନୟନେ ।
ନିସ୍ତ୍ରପଶିରୋମଣେ ମାଂ ତ୍ରପାମ୍ବୁଧୌ ପାତୟିଷ୍ୟତଃ ପ୍ରକଟମ୍ ॥ ୪୭ ॥
ଶ୍ରୀକୃଷ୍ଣ ଆହ-
ତ୍ଵନ୍ନୟନେ ଚ ମଦକ୍ଷ୍ଣୋରନ୍ତେଵାସିତ୍ଵମିଚ୍ଛତଃ କିନ୍ତୁ ।
ଗର୍ଵାଦିଵ ନ ଚ ପଠତଃ ପ୍ରକଟଂ ପ୍ରୌଢିଃ କିୟତୋ ଅହୋ ୟଦିୟମ୍ ॥ ୪୮ ॥
ଶ୍ରୀରାଧାହ-
ଚେତଃ ସ୍ଫୁଟତି ସ୍ଵୟଂ ଚ ତଥାପି ନୟନେ ନ ତାଦୃଶେ ଭଵତଃ ।
ସାଧ୍ଵୀନାମିୟମୁଚିତା ଏଵ ନିସର୍ଗତ୍ରପାକୁଲତା ॥ ୪୯ ॥
ଶ୍ରୀକୃଷ୍ଣ ଆହ-
ସମ୍ପ୍ରତି ସତ୍ୟଂ ବ୍ରୂଷେ ତ୍ରପାଵତୀନାଂ ଶିରୋମଣିସ୍ତ୍ଵମସି ।
ଵତ୍ସ୍ୟାୟନତନ୍ତ୍ରୋକ୍ତଃ ସାଧ୍ଵୀନାମୟମେଵ ଧର୍ମଃ ॥ ୫୦ ॥
ଶ୍ରୀରାଧାହ-
ୟଦ୍ୟପ୍ୟରୁନ୍ଧତୀ ସା ସାଧ୍ଵୀଗଣଗଣ୍ୟଗୌରଵା ଜଗତି ।
ଧର୍ମମିମଂ ପାଠୟିତୁଂ ତାମପି ଶକ୍ନୋତି ତେ ନୟନମ୍ ॥ ୫୧ ॥
ଶ୍ରୀକୃଷ୍ଣ ଆହ-
ରାଢେ ଦ୍ଵିଗୁଣିତଶୋଭଂ ମଦାସ୍ୟପଙ୍କେରୁହଂ ଧ୍ରୁଵଂ ପିବତୁ ।
ସମ୍ପ୍ରତ୍ୟପି ନିଜଲୋଚନମଧୁକରୟୁଗଂ କିଂ ନ ସର୍ଵଥା ଦିଶସି ॥ ୫୨ ॥
ଶ୍ରୀରାଧାହ-
ଲାଵଣ୍ୟାଦ୍ଭୁତଵନ୍ୟାମୟଂ ତ୍ଵଦଙ୍ଗଂ ନ ଶୀଲୟତ୍ୟଧିକମ୍ ।
ଲୋଚନଶଫରୟୁଗଂ ମମ ଦୃଗନ୍ତଜାଲଂ ୟଦା ନୁ ତତ୍କ୍ଷିପସି ॥ ୫୩ ॥
ଶ୍ରୀକୃଷ୍ଣ ଆହ-
ନୂପୁରମଙ୍ଗଲଵାଦ୍ୟଜ୍ଞାପିତମନସିଜନୃପୋତ୍ସଵାମୋଦଃ ।
ତ୍ଵରିତମୁପୟାତି ଅଲିଵନ୍ଦୀ କୀର୍ତିଂ ଚ ତଵ ପ୍ରଥୟନ୍ଵିରାଜତେ ॥ ୫୪ ॥
ଶ୍ରୀରାଧାହ-
ଦୟିତ ନୃପୋଽସ୍ୟନୁଭୂତଃ ସତ୍ୟଂ ମନସିଜପରଃଶତାନାଂ ତ୍ଵମ୍ ।
ଦିଶି ଦିଶି ସତୀଷୁ ଵିକ୍ରମଵିଜୟଂ ଶଂସତି ତଵୈଵାୟମ୍ ॥ ୫୫ ॥
ଶ୍ରୀକୃଷ୍ଣ ଆହ-
ସୁରତମହାମଖଭେରୀ ତ୍ରିଜଗତି ଗର୍ଜଂସ୍ତଵୈଷ ନୂପୁରଃ ।
ତର୍ଜତି ଗର୍ଵଵତୀସ୍ତାଃ ପ୍ରକାମମମରାଙ୍ଗନା ଅପି ପ୍ରସଭମ୍ ॥ ୫୬ ॥
ଶ୍ରୀରାଧାହ-
ରମଣମହୋଦିତମଦଭରମତ୍ତାହଂ କିଂ ବ୍ରଵୀମି ତେ ଚରିତମ୍ ।
ସ୍ତୌଷି ମୁହୁର୍ନୂପୁରମପି ନୂପୁରମାତ୍ରାଵଶିଷ୍ଟଭୂଷାୟାଃ ॥ ୫୭ ॥
ଶ୍ରୀକୃଷ୍ଣ ଆହ-
କିଂ କଥ୍ୟସେ ସ୍ଵୟଂ ବତ ରମଣମହେ ତ୍ଵଂ ସମୁଦ୍ଧତା ସତ୍ୟମ୍ ।
ମଦଭରମତ୍ତ ୟନ୍ ନିଜପରିହିତଵାସୋଽପି କୁରୁଷେ ସ୍ମରସାତ୍ ॥ ୫୮ ॥
ଶ୍ରୀରାଧାହ-
ସ କିଲ ତଵେଷ୍ଟା ଦେଵତା ମଦନଃ ଶ୍ରଦ୍ଧାଵତୀରତୋ ୟୁଵତୀଃ ।
ଉପଦିଷ୍ୟୈତନ୍ମନ୍ତ୍ରଂ ଶିଷ୍ୟାଃ କୁରୁଷେ ଵିତୀର୍ଣସର୍ଵସ୍ଵାଃ ॥ ୫୯ ॥
ଶ୍ରୀକୃଷ୍ଣ ଆହ-
ତ୍ଵୟି ପୁନରସୌ ରସଜ୍ଞଃ ସ୍ମରୋଽପି ରୋପିତମୁଦା ଵସତି ।
ୟଦିଦଂ କୁଚହାଟକ ସମ୍ପୁଟୟୁଗମସ୍ୟ ସର୍ଵସ୍ଵମ୍ ॥ ୬୦ ॥
ଶ୍ରୀରାଧାହ-
ଏଵଂ ଚେତ୍କଥମନୟୋଃ କଞ୍ଚୁକମଥ ମୌକ୍ତିକଂ ଲସଦ୍ଧାରମ୍ ।
ମୃଗମଦଚର୍ଚାଂ ଦଲୟସି କଲୟସି ଚ କଠିନକରାଘାତମ୍ ॥ ୬୧ ॥
ଶ୍ରୀକୃଷ୍ଣ ଆହ-
ସ୍ଵଧନଵ୍ୟଵହୃତିସମୟେ ହାଟକମୟସମ୍ପୁତସ୍ୟ ୟଦ୍ଦୃଷ୍ଟଃ ।
ମଙ୍ଗଲଭୂଷଣଵସନୋଦ୍ଘାଟୋ ମୁଖଦାର୍ଢ୍ୟତଃ ନଖାଘାତଃ ॥ ୬୨ ॥
ଶ୍ରୀରାଧାହ-
ତଦ୍ଵ୍ୟଵହର୍ତା ପୁନରଥ କୃତ୍ଵା ଦ୍ଵିଗୁଣିତସୁସମ୍ଭାରମ୍ ।
ଆଵୃତ୍ୟାତିରହଃସ୍ଥଂ କୁରୁତେ ସମ୍ପୁଟମିଦଂ ଚ ଭୋ ଦୃଷ୍ଟମ୍ ॥ ୬୩ ॥
ଶ୍ରୀକୃଷ୍ଣ ଆହ-
ସ୍ମରମଣିସମ୍ପୁଟକୁଚୟୁଗମଧୁନାପ୍ୟୁତ୍ତାନମସ୍ତି ତତ୍କାନ୍ତେ ।
ହୃଦୟଗୃହଂ ମମ ପୂରୟ କୃତ୍ଵାଽଧୋ ମୁଖମିଦଂ ମହାରତ୍ନୈଃ ॥ ୬୪ ॥
ଶ୍ରୀରାଧାହ-
ଵିଧିନା ଵିମୃଶ୍ୟ ନିହିତଂ ୟାସାମବଲେତି ନାମ ୟୁକ୍ତାର୍ଥମ୍ ।
ତାସାଂ କୁଚସମ୍ପୁଟୟୋରଧୋ ମୁଖୀ କୃତିଵିଧୌ କ୍ଵ ଵା ଶକ୍ତିଃ ॥ ୬୫ ॥
ଶ୍ରୀକୃଷ୍ଣ ଆହ-
କତି ନ କରଗ୍ରହଵିଧିନା କୁଚସମ୍ପୁଟକାନ୍ତରାହୃତ ରାଧେ ।
ମୋଦମଣୀନାଂ ତତୟସ୍ତଦପି ନ ମେ ପୂର୍ୟତେ ହୃଦୟମ୍ ॥ ୬୬ ॥
ଶ୍ରୀରାଧାହ-
ଵ୍ରଜଵନିତାଃ ଶତକୋଟ୍ୟସ୍ତଵୈଵ ତାଃ ପଣ୍ଡିତାଶ୍ଚ ରତିତନ୍ତ୍ରେ ।
ହୃଦୟଂ ତଦପି ରତୌ ବତ ରଙ୍କତମତ୍ଵଂ ନ ତେ ତ୍ୟଜତି ॥ ୬୭ ॥
ଶ୍ରୀକୃଷ୍ଣ ଆହ-
ସ୍ମରଶିଖିତପ୍ତେ ମମ ହୃଦି ସୁକୁମାର୍ୟସ୍ତାଃ ଵିଶନ୍ତୁ କିଂ ମୁଗ୍ଧାଃ ।
ତ୍ଵମତିସମର୍ଥା ପ୍ରସଭଂ ପ୍ରଵିଶ୍ୟ ରାଜସି ସଦୈଵୈକା ॥ ୬୮ ॥
ଶ୍ରୀରାଧାହ-
ତଦୟେ ସ୍ଵରଙ୍ଗଦାନେ ସ୍ଵରଙ୍ଗନାସ୍ତାଃ ସମାନୟ କ୍ଷିପ୍ରମ୍ ।
ତତ୍ତନ୍ନାମ ଗୃହୀତ୍ଵା ମୁରଲୀଗାନେ ତଵାତ୍ର କୋ ୟତ୍ନଃ ॥ ୬୯ ॥
ଶ୍ରୀକୃଷ୍ଣ ଆହ-
ନନ୍ଦନଵନକୁସୁମାଞ୍ଚିତଶିରୋଽପି ଧର୍ତୁଂ ନିଜାତ୍ୟୟୋଗ୍ୟତୟା ।
ତଵ ପଦନଖତଲସଵିଧେ ଲଜ୍ଜଂ ତେ ସୁରଵରାଙ୍ଗନା ଅପି ତାଃ ॥ ୭୦ ॥
ଶ୍ରୀରାଧାହ-
ନାଭୀଵିଵରଵରାନ୍ମେ ସମୁଦ୍ଗତେୟଂ ନ କାନ୍ତରୋମାଲୀ ।
କିନ୍ତୁ ପ୍ରକୁପିତଭୁଜଗୀ ତଦୁନ୍ମୁଖଂ କିମୁ ଚିକୀର୍ଷସି ସ୍ଵକରମ୍ ॥ ୭୧ ॥
ଶ୍ରୀକୃଷ୍ଣ ଆହ-
ତଵ ରୋମାଲୀଭୁଜଗୀଂ ଖେଲୟିତୁଂ ମତ୍କରଶ୍ଚଲତ୍ୟଭିତଃ ।
ଭଵଦଖିଲାଙ୍ଗଗତାନ୍ୟପି ରୋମାନ୍ୟୁଦ୍ୟାନ୍ତି କିଂ ରୋଦ୍ଧୁମ୍ ॥ ୭୨ ॥
ଶ୍ରୀରାଧାହ-
ମଦଖିଲଗାତ୍ରଭଟା ଅପି ୟତଃ ପରାଭଵମଵାପ୍ୟ ମୁହ୍ୟନ୍ତି ।
ସ୍ମରରଣମତ୍ତେ ତ୍ଵୟି କିଂ ବତ ରୋମ୍ନାଂ ୟୁଜ୍ୟତେ ୟୁଦ୍ଧମ୍ ॥ ୭୩ ॥
ଶ୍ରୀକୃଷ୍ଣ ଆହ-
ଵୟମତିକୃଶାଶ୍ଚ ତଦପି ପ୍ରଭଵାମୋଦ୍ଗମଵିଧାଵିତି ପ୍ରକଟମ୍ ।
ଭଵତୀମୁଦ୍ଗମଚର୍ୟାଂ ରୋମଭଟାଃ ସ୍ମରୟନ୍ତ୍ୟହୋ ଚତୁରାଃ ॥ ୭୪ ॥
ଶ୍ରୀରାଧାହ-
ରତିରସପରଵଶ ! ସହତେ ତେଽତଥ୍ୟଂ କିଂ ମେ ତନୋରନ୍ଵୟଃ ।
ରମୟସ୍ଵ ଅତିଵାମାମପି ତାଂ ନ ଚ ଦୟସେ କାନ୍ତ୍ୟା ଵେଦୟସେ ॥ ୭୫ ॥
ଶ୍ରୀକୃଷ୍ଣ ଆହ-
ସ୍ମରଶରରାଧେ ରାଧେ ସମରେ ସମରେଖୟାଞ୍ଚିତେ ଦ୍ଵିତୟେ ।
ଇହ ଭଵଦଙ୍ଗମଦଙ୍ଗେ ପ୍ରତିଭଟମଧୁନା ଧୁନାନେସ୍ତାମ୍ ॥ ୭୬ ॥
ଶ୍ରୀରାଧାହ-
ପ୍ରସ୍ଵେଦାମ୍ବୁ ଵମନ୍ତୀ ଘନରସସିକ୍ତେଵ ଗାତ୍ରଵଲ୍ଲୀ ମେ ।
ଦଲିତୋ ଲଲିତାକଲ୍ପସ୍ତଲ୍ପଶ୍ଚ ଖଣ୍ଡିତୋ ନୋ ଵା କତିଧା ॥ ୭୭ ॥
ଶ୍ରୀକୃଷ୍ଣ ଆହ-
ମଦନଘନାଘନ ଏଷ ସ୍ଵେଦମିଷାଦ୍ଵର୍ଷତୀହ ତନୁଵଲ୍ଲୀମ୍ ।
ଘନରସଭରୈଃ ପ୍ରତିପଦମୁଦିତଲସତ୍କୋରକାଂ କାନ୍ତେ ॥ ୭୮ ॥
ଶ୍ରୀରାଧାହ-
ପ୍ରିୟ ତଵ ତରୁଣିମଜଲଧେରଵଧେରନ୍ଵେଷଣଂ କଥଂ କୁରୁତାମ୍ ।
ମହିଲାମତିମକରୀ ତଦ୍ଵିରମ୍ୟତାଂ ରମ୍ୟତାଂ ରତଂ ୟାତୁ ॥ ୭୯ ॥
ଶ୍ରୀକୃଷ୍ଣ ଆହ-
ଅତିନିଃଶ୍ଵସିତସମୀରଣଵେଗାଦ୍ଦ୍ଵିଗୁଣୀଭଵନ୍ମହାଵୀଚିମ୍ ।
କେଲିସୁଧାସରିତଂ ନୌ ମାନସକରିଣୌ ମୁହୁର୍ମୁହୁର୍ଭଜତାମ୍ ॥ ୮୦ ॥
ଶ୍ରୀରାଧାହ-
ଖେଲତି ମନଃକରୀ ତେ ସତ୍ୟଂ ପ୍ରକଟଂ ସ ଲକ୍ଷ୍ୟତେ କିନ୍ତୁ ।
ତତ୍ରୈକ୍ୟଂ ମମ ମନସୋ ବ୍ରୂଷେ କୋଽତ୍ରାଭିପ୍ରାୟସ୍ତେ ॥ ୮୧ ॥
ଶ୍ରୀକୃଷ୍ଣ ଆହ-
ଶ୍ରୀମନ୍ମଦନସୁରୋତ୍ତମସେଵା ସମ୍ସିଦ୍ଧୟେ ତୁ ନୌ ମନସୀ ।
ଐକ୍ୟମଵାପ୍ୟ ତ୍ଵରୟା ତତ୍ର ଚ ସାୟୁଜ୍ୟମୀହେତେ ॥ ୮୨ ॥
ଶ୍ରୀରାଧାହ-
ସ୍ଵସ୍ମିନ୍ନେଵ ତନୋର୍ମମ ମନସଶ୍ଚାପ୍ୟେକଦୈଵ ସାୟୁଜ୍ୟମ୍ ।
ପ୍ରସଭଂ କୁରୁଷେ ଦେଵ ତ୍ଵମେଵ ସାକ୍ଷାନ୍ମହାମଦନଃ ॥ ୮୩ ॥
ଶ୍ରୀକୃଷ୍ଣ ଆହ-
ସର୍ଵସ୍ଵାତ୍ମସମର୍ପଣକାରିଣ୍ୟୈ ତେ ମୁଦା ମାରଃ ।
ସ୍ଵୀୟାଂ ମୌକ୍ତିକମାଲାମଲିକେ ସ୍ଵେଦକଣଵ୍ୟାଜାଦ୍ଦତ୍ତେ ॥ ୮୪ ॥
ଶ୍ରୀରାଧାହ-
ତ୍ଵଦଲକନିକରସ୍ତାମପି ନୀତ୍ଵା ସ୍ତିମ୍ୟତି ହଠାଦୟଂ ଚପଲଃ ।
ମଦନପ୍ରସାଦ ଇତ୍ୟତିଭାଗ୍ୟଂ ସଂଶ୍ଲାଘତେ ସ୍ଵୀୟମ୍ ॥ ୮୫ ॥
ଶ୍ରୀକୃଷ୍ଣ ଆହ-
ତାମ୍ବୂଲାମୃତରସଲଵଲାଭେନୈଵାତ୍ର ଗର୍ଵିତେ ଭଵନ୍ନୟନେ ।
ଅନ୍ତର୍ବହିରପି ତଦ୍ରସମୁଦିତେ ଗଣ୍ଡେ କଥଂ ନୁ ମେ ହସତଃ ॥ ୮୬ ॥
ଶ୍ରୀରାଧାହ-
ୟତ୍ସୂଚୟସି ରସପ୍ରିୟ ତଦିଦଂ ସ୍ଵେନୈଵ ପାଠିତଂ ତନ୍ତ୍ରମ୍ ।
ସ୍ଵୟମେଵ ଵ୍ୟାଚଷ୍ଟେ ସ ଭଵାନିତି କିଲ ନମସ୍ତୁଭ୍ୟମ୍ ॥ ୮୭ ॥
ଶ୍ରୀକୃଷ୍ଣ ଆହ-
ମନ୍ମୁଖପଙ୍କେରୁହମପି ଚିତ୍ରମିଦଂ ୟଦ୍ଵିକାଶୟସ୍ୟଧିକମ୍ ।
ଗୁଣଵତ୍ୟତିସୁରଭିତେନ ସ୍ଵଵଦନସୁଧାକରସୁଧାଦ୍ରଵେଣ ହି ॥ ୮୮ ॥
ଶ୍ରୀରାଧାହ-
ନୀଲନିଧେର୍ବତ ପୋତୋ ବିନ୍ଦୁଵ୍ୟାଜେନ ରକ୍ଷିତଶ୍ଚିବୁକେ ।
ତମପି ଚ ଭଵଦଧରୋଽୟଂ ହୃତଵାନିତି କତି ମୃଷାମ୍ୟନୟମ୍ ॥ ୮୯ ॥
ଶ୍ରୀକୃଷ୍ଣ ଆହ-
ଅନୁରାଗିଣମପି ସାଗସମଧରଂ ମେ ଦଣ୍ଡୟସ୍ୟତଃ କୋପାତ୍ ।
ରଦନାସ୍ତ୍ରେଣ ତଦପ୍ୟଭିମନୁତେ ଲବ୍ଧପ୍ରସାଦମେଵାୟମ୍ ॥ ୯୦ ॥
ଶ୍ରୀରାଧାହ-
ଅଧି ରଦନଚ୍ଛନ୍ଦନଂ ମେ ସ୍ଵରଦନକୀର୍ତିଂ ନ କିଂ ଵିଚାରୟସି ।
ୟୁଵତୀସଭାସୁ ଚିତ୍ରଂ ତ୍ରପାକୁଲତମତେୟଂ ନୁ ମୟି ସୃଷ୍ଟା ॥ ୯୧ ॥
ଶ୍ରୀକୃଷ୍ଣ ଆହ-
ଵିଷମାଶୁଗରଣରଙ୍ଗେ ସ୍ଵାଙ୍ଗେନାତୁଲ ପରାକ୍ରମା କ୍ରମସେ ।
ଦର୍ଶୟ ଭୁଜବଲମୟି ଭୋ ମୟି ତେ ଦୟିତେ ଗୁଣାଵଲୀ ଫଲତୁ ॥ ୯୨ ॥
ଶ୍ରୀରାଧାହ-
ତନ୍ଵୀମପି ତନୁମେତାଂ ମୁହୁରତିଦାର୍ଢ୍ୟେନ ଵେଷ୍ଟୟତେ ।
ତ୍ଵଦ୍ଭୁଜଭୁଜାଙ୍ଗପାଶଃ ଶ୍ଵାସୋ ମେ କେଵଲଂ ଵଲତେ ॥ ୯୩ ॥
ଶ୍ରୀକୃଷ୍ଣ ଆହ-
ସମ୍ପ୍ରତି ସାକ୍ଷାତ୍କାରୋ ମଦନସ୍ୟ ସ୍ୟାଦିତୀଵ ଜାନୀମଃ ।
ୟନ୍ ନଶ୍ଚେତସ୍ତ୍ଵରତେ ନିରୁପମମତ୍ରୈକଭାଵାୟ ॥ ୯୪ ॥
ଶ୍ରୀରାଧାହ-
ତାଣ୍ଡଵପଣ୍ଡିତ ନିତରାମଲମଧ୍ୟାପନଶ୍ରମେଣ ତେ ।
ମଦପଘନାଃ ସ୍ଵୟମେତେ ଚାରଣଚର୍ୟାସୁ ୟାନ୍ତି ନୈପୁଣ୍ୟମ୍ ॥ ୯୫ ॥
ଶ୍ରୀକୃଷ୍ଣ ଆହ-
ମଦନମହାଘନଘୂର୍ଣାଘ୍ରାତାନ୍ୟଙ୍ଗାନି ନୌ ପ୍ରିୟେ ୟୁଗପତ୍ ।
ଶ୍ଵାସୋଦିତଜୟଚତୁରିମଭରମନ୍ୟୋନ୍ୟଂ ଦିଶନ୍ତି ସୋନ୍ମାଦମ୍ ॥ ୯୬ ॥
(ଶ୍ରୀ ଗ୍ରନ୍ଥକର୍ତାହ- )
ଲୋଚନମୀନଚତୁଷ୍ଟୟମଧୁନା ନିଷ୍ପନ୍ଦତାମୁରୀକୁରୁତେ ।
ରସଭରଵିସ୍ମୟମତ୍ତେ ନୈସର୍ଗିକଚେଷ୍ଟିତସ୍ମୃତିଃ କିଂ ସ୍ୟାତ୍ ॥ ୯୭ ॥
ଚନ୍ଦନନଲଦସୁଧାଂଶୁଦ୍ରଵମୟଜଲୟନ୍ତ୍ରଵେଶ୍ମମଧ୍ୟସ୍ଥେ ।
ସ୍ଥଲଜଲରୁହଦଲକଲ୍ପିତତଲ୍ପେଽସୁପ୍ତାଂ ରତଶ୍ରାନ୍ତୌ ॥ ୯୮ ॥
କ୍ରମଵଲିତୈର୍ନିଃଶ୍ଵସିତୈଃ ସୁରଭୟତୋଃ ସ୍ଵାମିନୋରଥାନ୍ୟୋନ୍ୟମ୍ ।
ନିଦ୍ରାଵୃଦ୍ଧିମଵେତ୍ୟ ପ୍ରମୋଦସିନ୍ଧାଵୟଂ ଜନଃ ପ୍ଲଵତାମ୍ ॥ ୯୯ ॥
ସୁରତକଥାମୃତମାର୍ୟଶତକଂ ନତକନ୍ଧରୋ ଜନୋ ଜୁଷତାମ୍ ।
ରତସୁଖଧାମଗଵାକ୍ଷଶ୍ରିତନୟନଃ ସ୍ଵାମିନୋରହୋ କୃପୟା ॥ ୧୦୦ ॥
ପ୍ରଵିଶତୁ ଶନୈଃ ଶନୈରଥ ମୂକିତନୂପୁରଂ ଜନସ୍ତତ୍ର ।
ଗାତ୍ରେ ନିଭାଲ୍ୟ ୟୂନୋଃ ସ୍ଵଵଲୟରାଜୀଂ ପିଧାୟ ବଧ୍ନାତୁ ॥ ୧୦୧ ॥
କମ୍ପନଚକିତୈରଲିଭିସ୍ତ୍ୟକ୍ତୁମଶକ୍ୟେନ ତାଲଵୃନ୍ତେନ ।
ଵୀଜୟତୁ ଶ୍ରମସଲିଲଂ ପ୍ରତ୍ୟଙ୍ଗଂ ଶୋଷିତଂ ନିରୂପୟତୁ ॥ ୧୦୨ ॥
ରାଧାକୁଣ୍ଡତଟଵାସମହାସମ୍ପଦଂ ମଦଃ ସୋଽୟମ୍ ।
କିମୁ ଵାଞ୍ଛିତମତିଦୁର୍ଲଭଵସ୍ତୁନି ତମୃତେ ମମାସ୍ତୁ ସମ୍ଭାଵ୍ୟମ୍ ॥ ୧୦୩ ॥
ଅଷ୍ଟମକ୍ ଅଧିକରହସ୍ୟଵ୍ୟଞ୍ଜକଂ ମଥ୍ନନ୍ ନିବଧ୍ୟତେଽତ୍ର ଶତକେ ।
ତାଦୃଶଭାଵଵିଭାଵିତହୃଦୟେନୈଵାସ୍ତୁ ତତ୍ସେଵ୍ୟମ୍ ॥ ୧୦୪ ॥
ଖଵିୟଦୃତୁକ୍ଷମାଗଣିତେ ଶାକେ ଵୃଷସଂସ୍ଥିତେ ଦିଵାଧୀଶେ ।
ସୁରତକଥାମୃତମୁଦଗଦୁଦୟତାଂ ଚ ଭକ୍ତହୃନ୍ନଭସି ॥ ୧୦୫ ॥
ଇତି ମହାମହୋପାଧ୍ୟାୟଶ୍ରୀଵିଶ୍ଵନାଥଚକ୍ରଵର୍ତିଵିରଚିତଂ
ସୁରତକଥାମୃତଂ ସମାପ୍ତମ୍ ॥