॥ Goraksha Ashatakam 2 Telugu Lyrics ॥
॥ గోరక్షశతకమ్ ౨ ॥
శ్రీగురుం పరమానన్దం వన్దే స్వానన్దవిగ్రహమ్ ।
యస్య సన్నిధ్యమాత్రేణ చిదానన్దాయతే తనుః ॥ ౧ ॥
అన్తర్నిశ్చలితాత్మదీపకలికాస్వాధారబన్ధాదిభిః
యో యోగీ యుగకల్పకాలకలనాత్ త్వం జజేగీయతే ।
జ్ఞానామోదమహోదధిః సమభవద్యత్రాదినాథః స్వయం
వ్యక్తావ్యక్తగుణాధికం తమనిశం శ్రీమీననాథం భజే ॥ ౨ ॥
నమస్కృత్య గురుం భక్త్యా గోరక్షో జ్ఞానముత్తమమ్ ।
అభీష్టం యోగినాం బ్రూతే పరమానన్దకారకమ్ ॥ ౩ ॥
గోరక్షః శతకం వక్తి యోగినాం హితకామ్యయా ।
ధ్రువం యస్యావబోధేన జాయతే పరమం పదమ్ ॥ ౪ ॥
ఏతద్విముక్తిసోపానమేతత్ కాలస్య వఞ్చనమ్ ।
యద్వ్యావృత్తం మనో మోహాద్ ఆసక్తం పరమాత్మని ॥ ౫ ॥
ద్విజసేవితశాఖస్య శ్రుతికల్పతరోః ఫలమ్ ।
శమనం భవతాపస్య యోగం భజతి సజ్జనః ॥ ౬ ॥
ఆసనం ప్రాణసంయామః ప్రత్యాహారోఽథ ధారణా ।
ధ్యానం సమాధిరేతాని యోగాఙ్గాని భవన్తి షట్ ॥ ౭ ॥
ఆసనాని తు తావన్తి యావత్యో జీవజాతయః ।
ఏతేషామఖిలాన్భేదాన్విజానాతి మహేశ్వరః ॥ ౮ ॥
చతురాశీతిలక్షాణాం ఏకమేకముదాహృతమ్ ।
తతః శివేన పీఠానాం షోడేశానం శతం కృతమ్ ॥ ౯ ॥
ఆసనేభ్యః సమస్తేభ్యో ద్వయమేవ విశిష్యతే ।
ఏకం సిద్ధాసనం ప్రోక్తం ద్వితీయం కమలాసనమ్ ॥ ౧౦ ॥
యోనిస్థానకమఙ్ఘ్రిమూలఘటితం కృత్వా దృఢం విన్యసే
న్మేఢ్రే పాదమథైకమేవ నియతం కృత్వా సమం విగ్రహమ్ ।
స్థాణుః సంయమితేన్ద్రియోఽచలదృశా పశ్యన్ భ్రువోరన్తరమ్
ఏతన్ మోక్షకవాటభేదజనకం సిద్ధాసనం ప్రోచ్యతే ॥ ౧౧ ॥
వామోరూపరి దక్షిణం హి చరణం సంస్థాప్య వామం తథా
దక్షోరూపరి పశ్చిమేన విధినా ధృత్వా కరాభ్యాం దృఢమ్ ।
అఙ్గుష్ఠౌ హృదయే నిధాయ చిబుకం నాసాగ్రమాలోకయే
దేతద్వ్యాధివికారహారి యమినాం పద్మాసనం ప్రోచ్యతే ॥ ౧౨ ॥
షట్చక్రం షోడశాధారం త్రిలక్షం వ్యోమపఞ్చకమ్ ।
స్వదేహే యే న జానన్తి కథం సిధ్యన్తి యోగినః ॥ ౧౩ ॥
ఏకస్తమ్భం నవద్వారం గృహం పఞ్చాధిదైవతమ్ ।
స్వదేహం యే న జానన్తి కథం సిధ్యన్తి యోగినః ॥ ౧౪ ॥
చతుర్దలం స్యాదాధారః స్వాధిష్ఠానం చ షట్దలమ్ ।
నాభౌ దశదలం పద్మం సూర్యసఙ్ఖ్యదలం హృది ॥ ౧౫ ॥
కణ్ఠే స్యాత్ షోడశదలం భ్రూమధ్యే ద్విదలం తథా ।
సహస్రదలమాఖ్యాతం బ్రహ్మరన్ధ్రే మహాపథే ॥ ౧౬ ॥
ఆధారః ప్రథమం చక్రం స్వాధిష్ఠానం ద్వితీయకమ్ ।
యోనిస్థానం ద్వయోర్మధ్యే కామరూపం నిగద్యతే ॥ ౧౭ ॥
ఆధారాఖ్యం గుదస్థానం పఙ్కజం చ చతుర్దలమ్ ।
తన్మధ్యే ప్రోచ్యతే యోనిః కామాక్షా సిద్ధవన్దితా ॥ ౧౮ ॥
యోనిమధ్యే మహాలిఙ్గం పశ్చిమాభిముఖం స్థితమ్ ।
మస్తకే మణివద్బిమ్బం యో జానాతి స యోగవిత్ ॥ ౧౯ ॥
తప్తచామీకరాభాసం తడిల్లేఖేవ విస్ఫురత్ ।
త్రికోణం తత్పురం వహ్నేరధోమేఢ్రాత్ ప్రతిష్ఠితమ్ ॥ ౨౦ ॥
యత్సమాధౌ పరం జ్యోతిరనన్తం విశ్వతోముఖమ్ ।
తస్మిన్ దృష్టే మహాయోగే యాతాయాతం న విద్యతే ॥ ౨౧ ॥
స్వశబ్దేన భవేత్ ప్రాణః స్వాధిష్ఠానం తదాశ్రయః ।
స్వాధిష్ఠానాత్ పదాదస్మాన్మేఢ్రమేవాభిధీయతే ॥ ౨౨ ॥
తన్తునా మణివత్ ప్రోతో యత్ర కన్దః సుషుమ్ణయా ।
తన్నాభిమణ్డలం చక్రం ప్రోచ్యతే మణిపూరకమ్ ॥ ౨౩ ॥
ద్వాదశారే మహాచక్రే పుణ్యపాపవివర్జితే ।
తావజ్ జీవో భ్రమత్యేవ యావత్ తత్త్వం న విన్దతి ॥ ౨౪ ॥
ఊర్ధ్వం మేఢ్రాద్ అధో నాభేః కన్దయోనిః ఖగాణ్డవత్ ।
తత్ర నాడ్యః సముత్పన్నాః సహస్రాణాం ద్విసప్తతిః ॥ ౨౫ ॥
తేషు నాడిసహస్రేషు ద్విసప్తతిరుదాహృతాః ।
ప్రధానం ప్రాణవాహిన్యో భూయస్తత్ర దశ స్మృతాః ॥ ౨౬ ॥
ఇడా చ పిఙ్గలా చైవ సుషుమ్ణా చ తృతీయకా ।
గాన్ధారీ హస్తిజిహ్వా చ పూషా చైవ యశస్వినీ ॥ ౨౭ ॥
అలమ్బుషా కుహూశ్ చైవ శఙ్ఖినీ దశమీ స్మృతా ।
ఏతన్ నాడిమయం చక్రం జ్ఞాతవ్యం యోగిభిః సదా ॥ ౨౮ ॥
ఇడా వామే స్థితా భాగే పిఙ్గలా దక్షిణే తథా ।
సుషుమ్ణా మధ్యదేశే తు గాన్ధారీ వామచక్షుషి ॥ ౨౯ ॥
దక్షిణే హస్తిజిహ్వా చ పూషా కర్ణే చ దక్షిణే ।
యశస్వినీ వామకర్ణే చాసనే వాప్యలమ్బుషా ॥ ౩౦ ॥
కుహూశ్చ లిఙ్గదేశే తు మూలస్థానే చ శఙ్ఖినీ ।
ఏవం ద్వారముపాశ్రిత్య తిష్ఠన్తి దశనాడికాః ॥ ౩౧ ॥
ఇడాపిఙ్గలాసుషుమ్ణా చ తిస్రో నాడ్యుదాహృతాః ।
సతతం ప్రాణవాహిన్యః సోమసూర్యాగ్నిదేవతాః ॥ ౩౨ ॥
ప్రాణోఽపానః సమానశ్ చోదానో వ్యానౌ చ వాయవః ।
నాగః కూర్మోఽథ కృకరో దేవదత్తో ధనఞ్జయః ॥ ౩౩ ॥
హృది ప్రాణో వసేన్ నిత్యం అపానో గుదమణ్డలే ।
సమానో నాభిదేశే స్యాదుదానః కణ్ఠమధ్యగః ॥ ౩౪ ॥
ఉద్గారే నాగాఖ్యాతః కూర్మ ఉన్మీలనే స్మృతః ।
కృకరః క్షుతకృజ్జ్ఞేయో దేవదత్తో విజృమ్భణే ॥ ౩౫ ॥
న జహాతి మృతం చాపి సర్వవ్యాపి ధనఞ్జయః ।
ఏతే సర్వాసు నాడీషు భ్రమన్తే జీవరూపిణః ॥ ౩౬ ॥
ఆక్షిప్తో భుజదణ్డేన యథోచ్చలతి కన్దుకః ।
ప్రాణాపానసమాక్షిప్తస్తథా జీవో న తిష్ఠతి ॥ ౩౮ ॥
ప్రాణాపానవశో జీవో హ్యధశ్ చోర్ధ్వం చ ధావతి ।
వామదక్షిణమార్గేణ చఞ్చలత్వాన్ న దృశ్యతే ॥ ౩౯ ॥
రజ్జుబద్ధో యథా శ్యేనో గతోఽప్యాకృష్యతే ।
గుణబద్ధస్తథా జీవః ప్రాణాపానేన కృష్యతే ॥ ౪౦ ॥
అపానః కర్షతి ప్రాణః ప్రాణోఽపానం చ కర్షతి ।
ఊర్ధ్వాధః సంస్థితావేతౌ సంయోజయతి యోగవిత్ ॥ ౪౧ ॥
హకారేణ బహిర్యాతి సకారేణ విశేత్పునః ।
హంసహంసేత్యముమ మన్త్రం జీవో జపతి సర్వదా ॥ ౪౨ ॥
షట్శతానిత్వహోరాత్రే సహస్రాణ్యేకవింశతిః ।
ఏతత్సఙ్ఖ్యాన్వితం మన్త్ర జీవో జపతి సర్వదా ॥ ౪౩ ॥
అజపా నామ గాయత్రీ యోగినాం మోక్షదాయినీ ।
అస్యాః సఙ్కల్పమాత్రేణ సర్వపాపైః ప్రముచ్యతే ॥ ౪౪ ॥
అనయా సదృశీ విద్యా అనయా సదృశో జపః ।
అనయా సదృశం జ్ఞానం న భూతం న భవిష్యతి ॥ ౪౫ ॥
కున్దలిన్యాః సముద్భూతా గాయత్రీ ప్రాణధారిణీ ।
ప్రాణవిద్యా మహావిద్యా యస్తాం వేత్తి స యోగవిత్ ॥ ౪౬ ॥
కన్దోర్ధ్వం కుణ్డలీ శక్తిరష్టధా కుణ్డలాకృతి ।
బ్రహ్మద్వారముఖం నిత్యం ముఖేనాచ్ఛాద్య తిష్ఠతి ॥ ౪౭ ॥
యేన ద్వారేణ గన్తవ్యం బ్రహ్మస్థానమనామయమ్ ।
ముఖేనాచ్ఛాద్య తద్ద్వారం ప్రసుప్తా పరమేశ్వరీ ॥ ౪౮ ॥
ప్రబుద్ధా వహ్నియోగేన మనసా మారుతా హతా ।
సూచీవద్ గుణమాదాయ వ్రజత్యూర్ధ్వం సుషుమ్ణయా ॥ ౪౯ ॥
ప్రస్ఫురద్భుజగాకారా పద్మతన్తునిభా శుభా ।
ప్రబుద్ధా వహ్నియోగేన వ్రజతి ఊర్ధ్వం సుషుమ్ణయా ॥ ౫౦ ॥
ఉద్ఘటయేత్కపాతం తు యథా కుఞ్చికయా హఠాత్ ।
కుణ్డలిన్యా తథా యోగీ మోక్షద్వారం ప్రభేదయేత్ ॥ ౫౧ ॥
కృత్వా సమ్పుటితౌ కరౌ దృఢతరం బద్ధవాతు పద్మాసనం
గాఢం వక్షసి సన్నిధాయ చిబుకం ధ్యాత్వా తత్ప్రేక్షితమ్ ।
వారం వారమపానమూర్ధ్వమనిలం ప్రోచ్చారయేత్పూరితం
ముఞ్చన్ప్రాణముపైతి బోధమతులం శక్తిప్రబోధాన్నరః ॥ ౫౨ ॥
అఙ్గానాం మర్దనం కుర్యాచ్ఛ్రమజాతేన వారిణా ।
కట్వామ్లలవణత్యాగీ క్షీరభోజనమాచరేత్ ॥ ౫౩ ॥
బ్రహ్మచారీ మితాహారీ త్యాగీ యోగపరాయణః ।
అబ్దాదుర్ధ్వం భవేత్సిద్ధో నాత్ర కార్యా విచారణా ॥ ౫౪ ॥
సుస్నిగ్ధం మధురాహారం చతుర్థాంశవివర్జితమ్ ।
భుజ్యతే సురసమ్ప్రీత్యై మితాహారః స ఉచ్యతే ॥ ౫౫ ॥
కన్దోర్ధ్వం కుణ్డలీ శక్తిరష్టధా కుణ్డలాకృతిః ।
బన్ధనాయ చ మూఢానాం యోగినాం మోక్షదా స్మృతా ॥ ౫౬ ॥
మహాముద్రాం నమోముద్రాముడ్డియానం జలన్ధరమ్ ।
మూలబన్ధం చ యో వేత్తి స యోగీ సిద్ధిభాజనమ్ ॥ ౫౭ ॥
శోధనం నాడిజాలస్య చాలనం చన్ద్రసూర్యయోః ।
రసానాం శోషణం చైవ మహాముద్రాభిధీయతే ॥ ౫౮ ॥
వక్షోన్యస్తహనుర్నిపీడ్య సుచిరం యోనిం చ వామాఙ్ఘ్రిణా
హస్తాభ్యామవధారితం ప్రసరితం పాదం తథా దక్షిణమ్ ।
ఆపూర్య శ్వసనేన కుక్షియుగలం బద్ధ్వా శనై రేచయేద్
ఏషా పాతకనాశినీ సుమహతీ ముద్రా నౄణాం ప్రోచ్యతే ॥ ౫౯ ॥
చన్ద్రాఙ్గేన సమభ్యస్య సూర్యాఙ్గేనాభ్యసేత్ పునః ।
యావత్ తుల్యా భవేత్సఙ్ఖ్యా తతో ముద్రాం విసర్జయేత్ ॥ ౬౦ ॥
న హి పథ్యమపథ్యం వా రసాః సర్వేఽపి నీరసాః ।
అపి ముక్తం విషం ఘోరం పీయూషమపి జీర్యతే ॥ ౬౧ ॥
క్షయకుష్ఠగుదావర్తగుల్మాజీర్ణపురోగమాః ।
రోగాస్తస్య క్షయం యాన్తి మహాముద్రాం తు యోఽభ్యసేత్ ॥ ౬౨ ॥
కథితేయం మహాముద్రా మహాసిద్ధికరా నౄణామ్ ।
గోపనీయా ప్రయత్నేన న దేయా యస్య కస్యచిత్ ॥ ౬౩ ॥
కపాలకుహరే జిహ్వా ప్రవిష్టా విపరీతగా ।
భ్రువోరన్తర్గతా దృష్టిర్ముద్రా భవతి ఖేచరీ ॥ ౬౪ ॥
న రోగో మరణం తన్ద్రా న నిద్రా న క్షుధా తృషా ।
న చ మూర్చ్ఛా భవేత్తస్య యో ముద్రాం వేత్తి ఖేచరీమ్ ॥ ౬౫ ॥
పీడ్యతే న స రోగేణ లిప్యతే న చ కర్మణా ।
బాధ్యతే న స కాలేన యో ముద్రాం వేత్తి ఖేచరీమ్ ॥ ౬౬ ॥
చిత్తం చరతి ఖే యస్మాజ్జిహ్వా చరతి ఖే గతా ।
తేనైషా ఖేచరీ నామ ముద్రా సిద్ధైర్నిరూపితా ॥ ౬౭ ॥
బిన్దుమూలం శరీరం తు శిరాస్తత్ర ప్రతిష్ఠితాః ।
భావయన్తి శరీరం యా ఆపాదతలమస్తకమ్ ॥ ౬౮ ॥
ఖేచర్యా ముద్రితం యేన వివరం లమ్బికోర్ధ్వతః ।
న తస్య క్షరతే బిన్దుః కామిన్యాలిఙ్గితస్య చ ॥ ౬౯ ॥
యావద్బిన్దుః స్థితో దేహే తావత్కాలభయం కుతః ।
యావద్బద్ధా నభోముద్రా తావద్బిన్దుర్న గచ్ఛతి ॥ ౭౦ ॥
చలితోఽపి యదా బిన్దుః సమ్ప్రాప్తశ్చ హుతాశనమ్ ।
వ్రజత్యూర్ధ్వం హృతః శక్త్యా నిరుద్ధో యోనిముద్రయా ॥ ౭౧ ॥
స పునర్ద్వివిధో బిన్దుః పణ్డురో లోహితస్తథా ।
పాణ్డురం శుక్రమిత్యాహుర్లోహితం తు మహారాజః ॥ ౭౨ ॥
సిన్దూరద్రవసఙ్కాశం రవిస్థానే స్థితం రజః ।
శశిస్థానే స్థితో బిన్దుస్తయోరైక్యం సుదుర్లభమ్ ॥ ౭౩ ॥
బిన్దుః శివో రజః శక్తిర్బిన్దుమిన్దూ రజో రవిః ।
ఉభయోః సఙ్గమాదేవ ప్రాప్యతే పరమం పదమ్ ॥ ౭౪ ॥
వాయునా శక్తిచారేణ ప్రేరితం తు మహారజః ।
బిన్దునైతి సహైకత్వం భవేద్దివ్యం వపుస్తదా ॥ ౭౫ ॥
శుక్రం చన్ద్రేణ సంయుక్తం రజః సూర్యేణ సంయుతమ్ ।
తయోః సమరసైకత్వం యోజానాతి స యోగవిత్ ॥ ౭౬ ॥
ఉడ్డీనం కురుతే యస్మాదవిశ్రాన్తం మహాఖగః ।
ఉడ్డీయానం తదేవ స్యాత్తవ బన్ధోఽభిధీయతే ॥ ౭౭ ॥
ఉదరాత్పశ్చిమే భాగే హ్యధో నాభేర్నిగద్యతే ।
ఉడ్డీయానస్య బన్ధోఽయం తత్ర బన్ధో విధీయతే ॥ ౭౮ ॥
బధ్నాతి హి సిరాజాలమధోగామి శిరోజలమ్ ।
తతో జాలన్ధరో బన్ధః కణ్ఠదుఃఖౌఘనాశనః ॥ ౭౯ ॥
జాలన్ధరే కృతే బన్ధే కణ్ఠసంకోచలక్షణే ।
పీయూషం న పతత్యగ్నౌ న చ వాయుః ప్రకుప్యతి ॥ ౮౦ ॥
పార్ష్ణిభాగేన సమ్పీడ్య యోనిమాకుఞ్చయేద్గుదమ్ ।
అపానమూర్ధ్వమాకృష్య మూలబన్ధోఽభిధీయతే ॥ ౮౧ ॥
అపానప్రాణయోరైక్యాత్ క్షయాన్మూత్రపురీషయోః ।
యువా భవతి వృద్ధోఽపి సతతం మూలబన్ధనాత్ ॥ ౮౨ ॥
పద్మాసనం సమారుహ్య సమకాయశిరోధరః ।
నాసాగ్రదృష్టిరేకాన్తే జపేదోఙ్కారమవ్యయమ్ ॥ ౮౩ ॥
భూర్భువః స్వరిమే లోకాః సోమసూర్యాగ్నిదేవతాః ।
యస్యా మాత్రాసు తిష్ఠన్తి తత్పరం జ్యోతిరోమితి ॥ ౮౪ ॥
త్రయఃకాలాస్త్రయో వేదాస్త్రయో లోకాస్త్రయః స్వేరాః ।
త్రయోదేవాః స్థితా యత్ర తత్పరం జ్యోతిరోమితి ॥ ౮౫ ॥
క్రియా చేచ్ఛా తథా జ్ఞానాబ్రాహ్మీరౌద్రీశ్చ వైష్ణవీ ।
త్రిధాశక్తిః స్థితా యత్ర తత్పరం జ్యోతిరోమితి ॥ ౮౬ ॥
ఆకారాశ్చ తథోకారోమకారో బిన్దుసంజ్ఞకః ।
తిస్రోమాత్రాః స్థితా యత్ర తత్పరం జ్యోతిరోమితి ॥ ౮౭ ॥
వచసా తజ్జయేద్బీజం వపుషా తత్సమభ్యసేత్ ।
మనసా తత్స్మరేన్నిత్యం తత్పరం జ్యోతిరోమితి ॥ ౮౮ ॥
శుచిర్వాప్యశుచిర్వాపి యో జపేత్ప్రణవం సదా ।
లిప్యతే న స పాపేన పద్మపత్రమివామ్భసా ॥ ౮౯ ॥
చలే వాతే చలో బిన్దుర్నిశ్చలే నిశ్చలో భవేత్ ।
యోగీ స్థాణుత్వమాప్నోతి తతో వాయుం నిరోధయేత్ ॥ ౯౦ ॥
యావద్వాయుః స్థితో దేహే తావజ్జీవనముచ్యతే ।
మరణం తస్య నిష్క్రాన్తిస్తతో వాయుం నిరోధయేత్ ॥ ౯౧ ॥
యావద్బద్ధో మరుద్దేహే యావచ్చిత్తం నిరాకులమ్ ।
యావద్దృష్టిర్భ్రువోర్మధ్యే తావత్కాలభయం కుతః ॥ ౯౨ ॥
అతః కాలభయాద్ బ్రహ్మా ప్రాణాయామపరాయణః ।
యోగినో మునయశ్చైవ తతో వాయుం నిరోధయేత్ ॥ ౯౩ ॥
షట్త్రింశదఙ్గులోహంసః ప్రయాణం కురుతే బహిః ।
వామదక్షిణమార్గేణ తతః ప్రాణోఽభిధీయతే ॥ ౯౪ ॥
శుద్ధిమేతి యదా సర్వం నాడీచక్రం మలాకులమ్ ।
తదైవ జాయతే యోగీ ప్రాణసంగ్రహణే క్షమః ॥ ౯౫ ॥
బద్ధపద్మాసనో యోగీ ప్రాణం చన్ద్రేణ పూరయేత్ ।
ధారయిత్వా యథాశక్తి భూయః సూర్యేణ రేచయేత్ ॥ ౯౬ ॥
అమృతం దధిసఙ్కాశం గోక్షీరరజతోపమమ్ ।
ధ్యాత్వా చన్ద్రమసో బిమ్బం ప్రాణాయామీ సుఖీ భవేత్ ॥ ౯౭ ॥
దక్షిణో శ్వాసమాకృష్య పూరయేదుదరం శనైః ।
కుమ్భయిత్వా విధానేన పురశ్చన్ద్రేణ రేచయేత్ ॥ ౯౮ ॥
ప్రజ్వలజ్జ్వలనజ్వాలాపుఞ్జమాదిత్యమణ్డలమ్ ।
ధ్యాత్వా నాభిస్థితం యోగీ ప్రాణాయామే సుఖీ భవేత్ ॥ ౯౯ ॥
ప్రాణం చోదిడయా పిబేన్పరిమితం భూయోఽన్యయా రేచయేత్
పీత్వా పిఙ్గలయా సమీరణమథో బద్ధ్వా త్యజేద్వామయా ।
సూర్యచన్ద్రమసోరనేన విధినా బిమ్బద్వయం ధ్యాయతః
శుద్ధా నాడిగణా భవన్తి యమినో మాసత్రయాదూర్ధ్వతః ॥ ౧౦౦ ॥
యథేష్ఠం ధారణం వాయోరనలస్య ప్రదీపనమ్ ।
నాదాభివ్యక్తిరారోగ్యం జాయతే నాడిశోధనాత్ ॥ ౧౦౧ ॥
॥ ఇతి శ్రీ గోరక్షనాథప్రణీతః గోరక్షశతకం సమ్పూర్ణమ్ ॥