॥ Lankeshvara Krita Shivastuti Kannada Lyrics ॥
॥ ಶ್ರೀ ಶಿವ ಸ್ತುತಿಃ (ಲಂಕೇಶ್ವರ ಕೃತಂ) ॥
ಗಲೇ ಕಲಿತಕಾಲಿಮಃ ಪ್ರಕಟಿತೇನ್ದುಫಾಲಸ್ಥಲೇ
ವಿನಾಟಿತಜಟೋತ್ಕರಂ ರುಚಿರಪಾಣಿಪಾಥೋರುಹೇ ।
ಉದಞ್ಚಿತಕಪಾಲಜಂ ಜಘನಸೀಮ್ನಿ ಸನ್ದರ್ಶಿತ
ದ್ವಿಪಾಜಿನಮನುಕ್ಷಣಂ ಕಿಮಪಿ ಧಾಮ ವನ್ದಾಮಹೇ ॥ ೧ ॥
ವೃಷೋಪರಿ ಪರಿಸ್ಫುರದ್ಧವಲದಾಮಧಾಮಶ್ರಿಯಾ
ಕುಬೇರಗಿರಿ-ಗೌರಿಮಪ್ರಭವಗರ್ವನಿರ್ವಾಸಿ ತತ್ ।
ಕ್ವಚಿತ್ಪುನರುಮಾ-ಕುಚೋಪಚಿತಕುಙ್ಕುಮೈ ರಞ್ಜಿತಂ
ಗಜಾಜಿನವಿರಾಜಿತಂ ವೃಜಿನಭಙ್ಗಬೀಜಂ ಭಜೇ ॥ ೨ ॥
ಉದಿತ್ವರ-ವಿಲೋಚನತ್ರಯ-ವಿಸೃತ್ವರಜ್ಯೋತಿಷಾ
ಕಲಾಕರಕಲಾಕರ-ವ್ಯತಿಕರೇಣ ಚಾಹರ್ನಿಶಮ್ ।
ವಿಕಾಸಿತ ಜಟಾಟವೀ ವಿಹರಣೋತ್ಸವಪ್ರೋಲ್ಲಸ-
ತ್ತರಾಮರ ತರಙ್ಗಿಣೀ ತರಲ-ಚೂಡಮೀಡೇ ಮೃಡಮ್ ॥ ೩ ॥
ವಿಹಾಯ ಕಮಲಾಲಯಾವಿಲಸಿತಾನಿ ವಿದ್ಯುನ್ನಟೀ-
ವಿಡಂಬನಪಟೂನಿ ಮೇ ವಿಹರಣಂ ವಿಧತ್ತಾಂ ಮನಃ ।
ಕಪರ್ದಿನಿ ಕುಮುದ್ವತೀರಮಣಖಣ್ಡಚೂಡಾಮಣೌ
ಕಟೀ ತಟಪಟೀ ಭವತ್ಕರಟಿಚರ್ಮಣಿ ಬ್ರಹ್ಮಣಿ ॥ ೪ ॥
ಭವದ್ಭವನದೇಹಲೀ-ವಿಕಟತುಣ್ಡ-ದಣ್ಡಾಹತಿ
ತ್ರುಟನ್ಮುಕುಟಕೋಟಿಭಿ-ರ್ಮಘವದಾದಿಭಿರ್ಭೂಯತೇ ।
ವ್ರಜೇಮ ಭವದನ್ತಿಕಂ ಪ್ರಕೃತಿಮೇತ್ಯ ಪೈಶಾಚಕೀಂ
ಕಿಮಿತ್ಯಮರಸಮ್ಪದಃ ಪ್ರಮಥನಾಥ ನಾಥಾಮಹೇ ॥ ೫ ॥
ತ್ವದರ್ಚನಪರಾಯಣ-ಪ್ರಮಥಕನ್ಯಕಾಲುಣ್ಠಿತ
ಪ್ರಸೂನಸಫಲದ್ರುಮಂ ಕಮಪಿ ಶೈಲಮಾಶಾನ್ಮಹೇ ।
ಅಲಂ ತಟವಿತರ್ದಿಕಾಶಯಿತಸಿದ್ಧ-ಸೀಮನ್ತಿನೀ
ಪ್ರಕೀರ್ಣ ಸುಮನೋಮನೋ-ರಮಣಮೇರುಣಾಮೇರುಣಾ ॥ ೬ ॥
ನ ಜಾತು ಹರ ಯಾತು ಮೇ ವಿಷಯದುರ್ವಿಲಾಸಂ ಮನೋ
ಮನೋಭವಕಥಾಸ್ತು ಮೇ ನ ಚ ಮನೋರಥಾತಿಥ್ಯಭೂಃ ।
ಸ್ಫುರತ್ಸುರತರಙ್ಗಿಣೀ-ತಟಕುಟೀರಕೋಟಾ ವಸ-
ನ್ನಯೇ ಶಿವ ದಿವಾನಿಶಂ ತವ ಭವಾನಿ ಪೂಜಾಪರಃ ॥ ೭ ॥
ವಿಭೂಷಣ ಸುರಾಪಗಾ ಶುಚಿತರಾಲವಾಲಾವಲೀ-
ವಲದ್ಬಹಲಸೀಕರ-ಪ್ರಕರಸೇಕಸಂವರ್ಧಿತಾ ।
ಮಹೇಶ್ವರ ಸುರದ್ರುಮಸ್ಫುರಿತ-ಸಜ್ಜಟಾಮಞ್ಜರೀ
ನಮಜ್ಜನಫಲಪ್ರದಾ ಮಮ ನು ಹನ್ತ ಭೂಯಾದಿಯಮ್ ॥ ೮ ॥
ಬಹಿರ್ವಿಷಯಸಙ್ಗತಿ-ಪ್ರತಿನಿವರ್ತಿತಾಕ್ಷಾಪಲೇ-
ಸ್ಸಮಾಧಿಕಲಿತಾತ್ಮನಃ ಪಶುಪತೇರಶೇಷಾತ್ಮನಃ ।
ಶಿರಸ್ಸುರಸರಿತ್ತಟೀ-ಕುಟಿಲಕಲ್ಪಕಲ್ಪದ್ರುಮಂ
ನಿಶಾಕರ ಕಲಾಮಹಂ ವಟುವಿಮೃಷ್ಯಮಾಣಾಂ ಭಜೇ ॥ ೯ ॥
ತ್ವದೀಯ ಸುರವಾಹಿನೀ ವಿಮಲವಾರಿಧಾರಾವಲ-
ಜ್ಜಟಾಗಹನಗಾಹಿನೀ ಮತಿರಿಯಂ ಮಮ ಕ್ರಾಮತು ।
ಸುರೋತ್ತಮಸರಿತ್ತಟೀ-ವಿಟಪಿತಾಟವೀ ಪ್ರೋಲ್ಲಸ-
ತ್ತಪಸ್ವಿ-ಪರಿಷತ್ತುಲಾಮಮಲ ಮಲ್ಲಿಕಾಭ ಪ್ರಭೋ ॥ ೧೦ ॥
ಇತಿ ಶ್ರೀಲಙ್ಕೇಶ್ವರವಿರಚಿತಾ ಶಿವಸ್ತುತಿಃ ॥
– Chant Stotra in Other Languages –
Lankeshwara Krita Shiva Stuti in Sanskrit – English – Kannada – Telugu – Tamil