॥ Ananda Mandakini Bengali Lyrics ॥
॥ আনন্দমন্দাকিনী ॥
শ্রীমধুসূদনসরস্বতীবিরচিতা
আনন্দমন্দাকিনী ।
বাগ্দেবীচতুরাস্যপঞ্চবদনা নিত্যং সহস্রাননো-
ঽপ্যুচ্চৈর্যত্র জডাত্মতামুপগতাঃ কেঽন্যে বরাকাঃ সুরাঃ ।
মর্ত্যাঃ স্বল্পধিয়ঃ কথং নু কুশলাস্তত্রাপ্যহং প্রজ্ঞয়া
হীনঃ কিং করবাণি তাং ব্রজকুলোত্তংস প্রশংসাং তব ॥ ১ ॥
নিত্যং ব্রহ্মসুরেন্দ্রশঙ্করমুখৈর্দত্তোপহারায় তে
বিস্বাদাংস্তুষমিশ্রতণ্ডুলকণান্বিপ্রঃ সুদামা দদৌ ।
তদ্বদ্দেব নিরর্থকৈঃ কতিপয়ৈ রূক্ষাক্ষরৈর্নির্মিতাং
বাগীশপ্রমুখস্তুতস্য ভবতঃ কুর্যাং স্তুতিং নিস্ত্রপঃ ॥ ২ ॥
শশ্বদ্ব্রহ্মশিবেন্দ্রদেবগুরুবাগ্দেবীফণীন্দ্রাদিভিঃ
স্তুত্যস্যাপি হরে মমাস্তু রচিতা বাণী বিনোদায় তে ।
চিত্রালঙ্কৃতিশালিভিঃ সুললিতৈর্নিত্যং কবীনাং স্তবৈঃ
সম্রাজঃ সমুপাসিতস্য শুকগীর্ধত্তে প্রমোদং য়থা ॥ ৩ ॥
চিত্রাকারকিরীটকোটিবিলসদ্রত্নৌঘকান্তিচ্ছটা-
সঙ্ঘট্টেন বিচিত্রমম্বরতলং কুর্বত্স্থিতং মূর্ধনি ।
জীয়াত্কেকিশিখণ্ডমণ্ডনমিদং নীলাচলস্থায়িনী
স্বর্ণাদ্রেঃ শিখরে পুরন্দরধনুর্ব্যূহস্য নিন্দাবহম্ ॥ ৪ ॥
য়ত্পাদান্তনখাংশুচিন্তনবশাদজ্ঞানমন্ধং তমো-
ঽপ্যন্তং য়াতি মুকুন্দ তস্য ভবতো ধ্বান্তানি কিং মূর্ধনি ।
জ্ঞাতং ত্বাং দয়িতং সমেত্যজলদা য়ে কেশতামাশ্রিতা-
স্তে বদ্ধাশ্চপলাগণৈঃ প্রণয়জক্রোধাত্কিরীটচ্ছলাত্ ॥ ৫ ॥
ত্বচ্চক্ষুঃ সবিতুঃ সরোরুহরুচেঃ সাক্ষাত্কথং গণ্ডয়ো-
র্ভালে চ ব্রজনাথ নর্তনপরা ধ্বান্তার্ভকাঃ সন্ততম্ ।
নির্ণীতং মুখনেত্রপঙ্কজবনীমাধ্বীকপানান্মুহু-
র্মাদ্যন্তো মধুপা ভ্রমন্তি পরিতো বক্ত্রালকব্যাজতঃ ॥ ৬ ॥
ত্বদ্ভালে নিকষোপলে বিজয়তে কাশ্মীরগোরোচনা-
সম্ভূতস্তিলকঃ পরীক্ষণবিধৌ কিং হেমরেখোদ্গমঃ ।
চাঞ্চল্যং চপলা বিহায় জলদং কিং বা সমালম্বতে
কিং বা মারকতস্থলে সমুদিতঃ কন্দর্পবৃক্ষাঙ্কুরঃ ॥ ৭ ॥
ত্বদ্ভূবল্লিমিষেণ কার্মুকলতামাকৃষ্য পুষ্পাশুগঃ
কৃত্বা চম্পককোরকং চ তিলকব্যাজেন বাণং হরে ।
লক্ষ্যং কুন্তলনীলকণ্ঠমতুলশ্রীচন্দ্রকং বিধ্যতি
প্রায়ঃ শত্রুসমাননাম্ন্যপিজনে ক্রোধো য়দূর্জস্বিনাম্ ॥ ৮ ॥
নিঃশেষপ্রমদামনোমনসিজক্রীডামহামন্দির-
ব্রীডাবজ্রকপাটিকাবিঘটনপ্রৌঢাকৃতিঃ কুঞ্চিকা ।
দুর্মানগ্রহিলত্রিলোকমহিলামানচ্ছিদাকর্তরী
শৃঙ্গারদ্রুমমঞ্জরী স্ফুরতি কিং গোবিন্দ তে ভ্রূলতা ॥ ৯ ॥
নো কার্যং শ্রুতিবর্ত্মলঙ্ঘনমিদং নালীকমুগ্ধাকৃতিঃ
পর্যন্তাকলনং বিধায় সহজস্বচ্ছেন ভাব্যং সদা ।
অন্তঃ কৃষ্ণমুপাস্য তদ্রুচিমতা সম্ভাবনা সর্বতঃ
কার্যেত্যম্বুজলোচনাক্ষিয়ুগলং মানং দধৌ তে সতাম্ ॥ ১০ ॥
সৌন্দর্যামৃতদীর্ঘ্হিকে তব দৃশৌ পক্ষ্মাবলিশ্চৈতয়োঃ
কূলে কামকৃষীবলেন রচিতা শৃঙ্গারসস্যোন্নতিঃ ।
দৃগ্ভঙ্গীর্নিগদন্তি য়াস্তু বিবুধা রত্যম্ভসাং বীচয়-
স্তাঃ স্যুর্গোপবধূহৃদম্বুজবনীদোলায়িতা য়ত্নতঃ ॥ ১১ ॥
দূরে ব্রহ্মশিবেন্দ্রপূর্বদিবিষদ্বৃন্দে নমস্কুর্বতি
ব্যাবল্গদ্ব্রজবালকৌঘলগুডত্রুট্যত্কিরীটে হঠাত্ ।
সাবজ্ঞা মধুমত্তসুন্দরদৃশাং শোভাদ্বিষঃ সালসাঃ
দৃক্পাতাস্তব নন্দবংশতিলক স্বান্তে সদা সন্তু মে ॥ ১২ ॥
মুক্তেরপ্যতিদুর্লভা হিমগিরিপ্রস্যন্দিমন্দাকিনী-
ধারাতোঽপ্যতিশীতলাতিমসৃণা চান্দ্রান্ময়ূখাদপি ।
বাঞ্ছাতোঽপ্যতিবিস্তৃতা বিষয়িণাং ত্বত্পাদচিন্তাপর-
স্বান্তাদপ্যতিনির্মলা ময়ি কৃপাদৃষ্টিস্তবাস্তাং হরে ॥ ১৩ ॥
কল্পান্তাগ্নিশিখোন্নতির্দিতিসুতব্রাতে প্রপন্নে জনে
পীয়ূষদ্রবসিন্ধুবৃদ্ধিরমরস্তোমে বিভূত্যায়তিঃ ।
সীমা প্রেমভরস্য গোপনিকরে কন্দর্পকাণ্ডাহতি-
র্ব্রহ্মাণ্ডোদরসুন্দরীহৃদি হরে জীয়াদ্দৃশোস্তে দ্যুতিঃ ॥ ১৪ ॥
নির্বন্ধেন য়দীন্দ্রনীলমহসা সম্পাদিতৌ দর্পণৌ
তাভ্যাং কিং তুলনা কপোলতলয়োঃ সম্ভাব্যতে বা ন বা ।
এবং জ্ঞাতুমুপাগতে শ্রুতিপথং নেত্রে ত্রপাকুঞ্চিতে
শঙ্কে দ্বৈধবতী ত্বদীয়বদনপ্রান্তশ্রিয়ং পশ্যতঃ ॥ ১৫ ॥
ত্বাং পাদাঙ্গদকঙ্কণাঙ্গদশিরোলঙ্কারহারাম্বরৈঃ
সম্পূজ্য প্রদদৌ সুতামথ মণিং রত্নাকরঃ কৌস্তুভম্ ।
আস্যে তস্য সুতঃ সুধাংশুরখিলাং কান্তিং য়দা দত্তবা-
ন্স্বাকারং ব্যতরংস্তদৈব মকরাঃ কিং কুণ্ডলান্তস্তব ॥ ১৬ ॥
লাবণ্যামৃতবাহিনী তব মুখস্যেয়ং মনোজ্ঞাকৃতি-
স্তস্যামদ্ভুতবুদ্বুদঃ সমভবত্তত্রাপি ফেনোদ্গমঃ ।
নাসাবংশগতং তমেব বিশদং মুক্তাফলং য়ে বিদু-
স্তে মান্যা মধুসূদন ত্বয়ি মনোবৃত্ত্যৈব ধন্যা য়তঃ ॥ ১৭ ॥
নেত্রাম্ভোজমুখেন্দুভালতিলকৈর্নিত্যং বিবাদো য়তঃ
সৌন্দর্যার্থমিতি প্রতীত্য বিধিনা সীতা কৃতা নাসিকা ।
তূণী বা কুসুমায়ুধস্য নৃপতের্যন্মল্লিকাকোরকঃ
কাণ্ডস্তত্র চকাস্তি মৌক্তিকফলব্যাজেন নন্দাত্মজ ॥ ১৮ ॥
য়োঽহং তে পদপঙ্কজদ্যুতিলবং প্রাপ্যাভবং পল্লবঃ
কল্পক্ষ্মারুহমস্তকাভরণতাং য়াতশ্চ রাধাপতে ।
তং মাং নিন্দতি বিম্ববিদ্রুমলতাশ্রীতস্করোঽয়ংশ্রুতা-
বেবং জল্পিতুমাগতে কিসলয়ে স্থানেঽধরো রাগবান্ ॥ ১৯ ॥
দৃগ্ভঙ্গীঃ স্ফুরদিন্দ্রনীলনিচয়ঃ পক্ষ্মাণি কস্তূরিকা
জিহ্বেয়ং তব পদ্মরাগনিকরঃ শোণাধরো বিদ্রুমঃ ।
দন্তালী গজমৌক্তিকানি মধুজিন্মন্দস্মিতং চন্দনং
পণ্যস্থানমিদং মনোজবণিজো জানে তবাস্তে মুখম্ ॥ ২০ ॥
য়া রক্তা বদনেন্দুমণ্ডলগতং মাধুর্যমুচ্চৈস্তরা-
মাস্বাদ্যেহ সরস্বতী স্থিতবতী সত্যং রসজ্ঞেব সা ।
য়ত্সপ্তস্বরমণ্ডলানি বহুধা ত্বত্কণ্ঠদেশাদ্বহিঃ
প্রাদুর্ভূয় মুদং শ্রুতৌ সুকৃতিনাং য়চ্ছন্তি নন্দাত্মজ ॥ ২১ ॥
সাম্যং ত্বদ্বদনস্য বাঞ্ছতি বিধুর্দোষাকরো য়দ্যপি
ক্ষিপ্তোঽপ্যম্বুনি পদ্মরাগশকলো দন্তচ্ছদং স্পর্ধতে ।
দৃষ্ট্বৈবং কুশলঃ কুশেশয়ভবঃ ক্লেশাদ্যশোদাত্মজ
ব্যক্তং ত্বচ্চিবুকং তথৈব বিদধে য়ত্তুল্যতা ন ক্বচিত্ ॥ ২২ ॥
মাধুর্যং ন লবং মধূনি দধতি দ্রাক্ষা তু সাক্ষাদ্বিষং
পীয়ূষান্যপি য়ান্তি নিম্বসমতাং কে দুগ্ধখণ্ডাদয়ঃ ।
প্রালেয়ানি ন শীতলানি সরসং নো কোকিলাকূজিতং
গোধুগ্বংশবতংস জাতু জয়তি ত্বদ্বাগ্বিলাসোদয়ে ॥ ২৩ ॥
বেদাশ্চন্দ্রমসং বদন্তি ভবতঃ স্বান্তং কথং তদ্বৃথা-
কুর্বন্ত্যত্র বিবাদমাত্রকুশলা গোবিন্দ নন্দাদয়ঃ ।
তস্যৈবামৃতপঙ্কিলাস্তব মুখাদাবির্ভবন্তো বহি-
র্ধ্বান্তং য়ত্তিরয়ন্তি হন্ত কিরণা মন্দস্মিতব্যাজতঃ ॥ ২৪ ॥
য়ন্নামস্মরণাদপি শ্রবণতঃ প্রক্ষীণরাগাশয়া
য়ান্তি ত্বত্পরমং সদাশিবপদং য়দ্যোগিনাং দুর্লভম্ ।
তস্যাপ্যাননপঙ্কজে তব জয়ত্যুচ্চৈস্তরাং রাগিতা
য়েনাভীরকুলপ্রদীপ তদলং তাম্বূলমাস্তাং মুদে ॥ ২৫ ॥
পীয়ূষদ্রবসারসারঘমধুদ্রোণী ত্বদীয়াধরা-
স্বাদায়ার্কসুতাতটে শ্রিতবতী সদ্বংশজাতা তপঃ ।
তত্পুণ্যৈর্মুরলীমিষেণ রসিকা মাধুর্যমুচ্চৈস্তরা-
মাস্যেন্দোরনুভূয় গোকুলপতে গীতামৃতং মুঞ্চতি ॥ ২৬ ॥
সাফল্যং শ্রুতিসম্পদাং ত্রিজগতাং প্রালেয়ধারাপ্রপা
পীয়ূষদ্রবমাধুরী পরিভবক্লেশাম্বুধেঃ শোষণম্ ।
ব্রহ্মানন্দতিরস্কৃতিঃ কুলবধূধৈর্যাদ্রিবজ্রাহতিঃ
কংসধ্বংসন শংস কিং ন ভবতো বংশীনিনাদোদয়ঃ ॥ ২৭ ॥
ধৈর্যং ধিক্কুরুতে ত্রপাং বিচিনুতে কৌলং য়শঃ প্রোঞ্ছতি
প্রত্যেকং গুরুবর্গগঞ্জনশতং বিস্মারয়ত্যঞ্জসা ।
সাধ্বীনাম নিরাকরোতি ভবনং ভর্তুর্বিধত্তে বিষং
কিং কিং নো বিদধাতি হন্ত সুদৃশাং বংশীনিনাদস্তব ॥ ২৮ ॥
লাবণ্যৈরখিলৈস্ত্বদাস্যমুকুরং নির্মায় ঘাতা চিরা-
ন্মুষ্টিং মারকতং বিধায় তদধঃ কণ্ঠস্থলব্যাজতঃ ।
ধ্যায়ং ধ্যায়মশেষবস্তুসুষমাধারায় রেখাত্রয়ং
ব্রূতে নাস্তি বভূব নো ন ভবিতা সৌন্দর্যমেতাদৃশম্ ॥ ২৯ ॥
আশানাগকরপ্রসারিমহসা নিঃশেষবামভ্রুবা-
মাশাভিস্ত্রিদশেশনির্ভরশুভৈঃ কংসাদিনাশশ্রিয়া ।
প্রেম্ণা নন্দয়শোদয়োস্তনুজুষাং নিঃসীমভাগ্যৈর্দৃশাং
সৌভাগ্যৈর্ব্রজসুভ্রুবাং ব্রজপতে কিং তে ভুজৌ নির্মিতৌ ॥ ৩০ ॥
কং য়স্মাদলমভ্যুদেতি ভবতঃ সর্বাঙ্গমেতাদৃশং
সাম্যং বা ভজতাং কথং জলরুহে সর্বজ্ঞমধ্যস্যতোঃ ।
মত্তর্কঃ পুনরত্র গোকুলপতে ত্রৈলোক্যলক্ষ্মী য়ত-
স্ত্বত্পাণ্যোরিতি তৌ বদন্তি কমলে সা য়ত্তদেকালয়া ॥ ৩১ ॥
অঙ্গুল্যস্তব হস্তয়োর্মুরহর প্রায়ো রসালাঙ্কুর-
শ্রেণী য়ত্পরিতোঽঙ্গুলীয়কমিষস্নিগ্ধালবালাবলিঃ
কিং বা পঞ্চশরপ্রচণ্ডতপসা পঞ্চাশুগাঃ পঞ্চতো-
ত্তীর্ণাঃ সত্ফলিনঃ পুনর্ভবরুচা পুষ্ণন্তি নেত্রোত্সবান্ ॥ ৩২ ॥
ভক্তানুগ্রহকাতরেণ ভবতা কৃত্বা নৃসিংহাকৃতিং
রাগান্ধস্য পুরা হিরণ্যকশিপোর্বক্ষস্থলী পাটিতা ।
তেনাভূত্তব পাণিপঙ্কজয়ুগে রাগঃ স রাধাপতে
গোপীনাং কুচকুঙ্কুমৈর্দ্বিগুণিতো নাদ্যাপি বিশ্রাম্যতি ॥ ৩৩ ॥
এতৌ পঞ্চশিরস্ত্বিষা দশদিশঃ সম্ভাবয়ন্তৌ ভৃশং
দৈত্যপ্রাণসমীরসংহতিয়মৌ শ্যামৌ ভুজঙ্গোত্তমৌ ।
তন্মৌলিদ্যুতিশালিনী পুনরিয়ং রত্নাবলী জৃম্ভতে
য়াং প্রাহুস্তব গোকুলেশ নখরশ্রেণীং করস্থাং জনাঃ ॥ ৩৪ ॥
দোর্দণ্ডদ্বয়বন্ধনানি বিদধুর্নন্দোপনন্দাদয়-
স্তদ্গ্রন্থিত্রুটিশঙ্কয়াতিচকিতা গোবর্ধনোদ্ধারণে ।
তান্যেবাপ্রতিমপ্রভাণি হরিতো বিদ্যোতয়ন্ত্যদ্ভুতং
বিদ্বাংসস্তব কঙ্কণাঙ্গদতয়া গোবিন্দ য়জ্জানতে ॥ ৩৫ ॥
শৃঙ্গারদ্রুমসারকণ্ডনবশাত্ত্রৈলোক্যসীমন্তিনী-
ক্রীডামন্দিরমণ্ডনায় বিধিনা স্তম্ভৌ প্রলম্বৌ কৃতৌ ।
তন্মধ্যে পুনরিন্দ্রনীলমণিভিঃ সম্পাদিতা বেদিকা
তৌ বাহূ মধুজিদ্বদন্তি ভবতো বক্ষঃস্থলীং তামপি ॥ ৩৬ ॥
য়দ্রক্তঃ কমলাকরং করতলেনালম্বতে ভাস্কর-
স্ত্বচ্চক্ষুর্মুখপাণিপাদকমলে জাতস্ততঃ শোণিমা ।
তন্মিত্রং পুনরাকলয়্য স ধৃতঃ কণ্ঠে ত্বয়া কৌস্তুভ-
ব্যাজেনেতি মুকুন্দ মাদৃশি জনে তর্কঃ সমুজ্জৃম্ভতে ॥ ৩৭ ॥
আলোক্যাখিলবেদশাস্ত্রজলধেস্তত্ত্বং য়দেকান্ততঃ
কৃত্বা সঙ্কলিতং স্বকীয়নিলয়ে ক্ষীরাব্ধিমধ্যে ধৃতম্ ।
সর্বার্থপ্রতিভাসকং ব্রজকুলালঙ্কার তত্কৌস্তুভ-
ব্যাজাদ্বিস্মৃতিশঙ্কয়েব ভবতা কণ্ঠে কৃতং সাম্প্রতম্ ॥ ৩৮ ॥
য়াত্বা বিষ্ণুপদং সমাশ্রিতবতী নক্ষত্রমালা স্ফুর-
দ্দীপ্তির্যোগ্যমিদং কথং মুররিপো নক্তন্দিনং দ্যোততে ।
আং জ্ঞাতং দয়িতং তবাননবিধুং য়ান্তীমিমাং য়ামিনী
রোমশ্রেণিমিষাত্ততো ধৃতবতী জ্ঞাত্বা সপ্ত্নীমিয়ম্ ॥ ৩৯ ॥
য়ঃ পাশেন য়শোদয়া নিয়মিতো য়েনাপরাধং বিনা
তস্মিন্নস্তি বলিস্ত্রিধা ময়ি পুরঃ সোঽয়ং বলিধ্বংসিনঃ ।
এবং চিন্তনতত্পরঃ কৃশতরস্ত্বন্মধ্যদেশো ভৃশং
য়াশোদেয় স শোকমুদ্গিরতি তে রোমাবলিব্যাজতঃ ॥ ৪০ ॥
সৃষ্ট্যাদৌ প্রকৃতির্গুণত্রয়ময়ী য়া স্বীকৃতাঽঽসীত্ত্বয়া
সেয়ং সত্ত্বময়ী সুখায় জগতাং হারাকৃতিস্তে ভুবি ।
গুঞ্জাদামমিষান্মুকুন্দ দধতী রাগাদ্রজোবিগ্রহং
নাভীসীম্নি তমোময়ী পুনরিয়ং রোমাবলী রাজতে ॥ ৪১ ॥
সৌন্দর্যামৃতবারিধৌ স্মরমহায়াদঃসমারম্ভতঃ
সম্ভূতা ভ্রমিরম্ভসাং সুললিতা জাতাস্ততো বীচয়ঃ ।
তাং জানে স্ফুরদিন্দ্রনীলঘটিতশ্রীসম্পুটার্ধদ্যুতিং
ত্বন্নাভীমপি তাং বলিত্রয়মিতি শ্যামাভিরামাকৃতে ॥ ৪২ ॥
নীলাম্ভোরুহবল্লিরুল্লসতি তে নাভীসরস্যাং ধ্রুবং
য়চ্ছ্রীবত্সমিষাদ্বিভর্তি কুসুমং নালং চ রোমাবলী ।
য়ং বা বক্ষসি কৌস্তুভং বুধজনা জানন্তি নন্দাত্মজ
প্রায়ঃ সোঽপ্যনুরাগ এব ভবিতা ত্রৈলোক্যবামভ্রুবাম্ ॥ ৪৩ ॥
নীরূপোঽপি ঘনদ্যুতির্মুনিমনোমাত্রৈকপাত্রীকৃতো-
ঽপ্যাভীরীগণসঙ্গতঃ সুখঘনোঽপ্যানন্দিতো বন্ধবৈঃ ।
জ্ঞানাত্মাপ্যতিমুগ্ধতামুপগতো বামভ্রুবাং বিভ্রমৈ-
রিত্থং তে ত্রিবলীমিষান্মুরহর ত্রয়্যস্তি চিত্রার্পিতা ॥ ৪৪ ॥
দেব্যঃ পল্লবসম্পদা বিদধতে সৌভাগ্যলক্ষ্মীং শ্রুতৌ
স্বচ্ছন্দং সুমনঃফলানি বিবুধা বিন্দন্তি তে সেবয়া ।
বেদেনাপি নিগদ্যতে মুরহর ত্বং ভক্তকল্পদ্রুমঃ
প্রায়ঃ কল্পলতা ততঃ শ্রিতবতী ত্বাং বৈজয়ন্তীছলাত্ ॥ ৪৫ ॥
বিশ্বানন্দকদম্বসম্পদমতিস্নিগ্ধং তমালদ্যুতিং
দৃষ্ট্বা নির্ভরবিভ্রমং ঘন ইতি ত্বাং সঙ্গতা বিদ্যুতঃ ।
ত্বদ্রূপামৃতসিন্ধুসঙ্গমবশাত্প্রাপ্যাম্বরপ্রচ্যবং
চাঞ্চল্যাত্কিমু নন্দনন্দন ভবত্পীতাম্বরত্বং দধুঃ ॥ ৪৬ ॥
কাঞ্চী তে ধৃতয়োগসম্পদভিতো জাতা বিশালাকৃতি-
র্যাবন্তী মধুরা ধ্বনিং বিদধতী পশ্চাদয়োধ্যাভবত্ ।
মায়াদ্বারবতী শিবাধিবসতিঃ সা কাশিকা দৃশ্যতে
তচ্চিত্রং ন বদামি মাধব য়তস্ত্বাং সা সদা সংশ্রিতা ॥ ৪৭ ॥
জানীমঃ সহজাং ত্বদঙ্গমিলিতামালোক্য পদ্মালয়াং
তত্সঙ্গস্থিতিভঙ্গকাতরতমৌ কল্পদ্রুমৈরাবতৌ ।
আদ্যঃ পল্লবসম্পদং করপদে বিম্বাধরে চাপরঃ
শুণ্ডাদণ্ডগুণং তবোরুয়ুগলে য়েনাদধে মাধব ॥ ৪৮ ॥
রম্ভাস্তম্ভয়ুগং ন তদ্যদুপরি স্থূলং তথোরুদ্বয়ং
তূণীরৌ মকরধ্বজস্য সুমনোমোদেন বিদ্মো বয়ম্ ।
হা কষ্টং মধুকৈটভৌ স্ফুটমদৌ কিং কৈটভারে হঠা-
ন্নিষ্পিষ্টৌ শতকোটিকোটিকঠিনৌ তস্মিন্স্থলে কোমলে ॥ ৪৯ ॥
স্তম্ভদ্বৈতমিদং পয়োনিধিসুতাগেহস্য মন্দাকিনী-
স্যন্দামন্দমরন্দিতাঙ্ঘ্রিকমলদ্বন্দ্বস্য নালায়ুগম্ ।
ত্বজ্জঙ্ঘায়ুগলং বিমুক্তিকলশীনির্মাণদণ্ডদ্বয়ং
সম্পত্তিদ্বিপসঙ্ঘয়ন্ত্রণবিধাবালানয়ুগ্মং ভজে ॥ ৫০ ॥
বিদ্বান্ সোঽপি কথং কঠোরকমঠীপৃষ্ঠেন তুল্যং বদ-
ন্নীদৃক্পাদয়ুগং কথং নু কমলাবক্ষোজশৈলে দধত্ ।
ধিঙ্মন্দাং বসুধামিদং মধুরিপো গোচারণে সঞ্চরত্-
পাষাণাঙ্কুরকণ্টকাদিষু হঠাদ্দৃষ্ট্বা বিদীর্ণা ন য়ত্ ॥ ৫১ ॥
য়দ্রত্নৌঘমরীচয়োঽপি সমতাব্যাবর্তনং বিশ্বতঃ
কৃত্বা দিগ্বলয়ং ভ্রমন্তি মহিতা নাদৈর্মধুস্যন্দিভিঃ ।
য়চ্চ ব্রহ্মশিবেন্দ্রবন্দিতপদদ্বন্দ্বোপরি দ্যোততে
তত্কৃষ্ণস্য পদাঙ্গদদ্বয়মতঃ কিং বর্ণ্যতাং মাদৃশৈঃ ॥ ৫২ ॥
শেতে য়ত্কমলালয়া তব পদাম্ভোজদ্বয়ে সংগতা
ধাতা তত্র তনূপধান্যুগলং গুল্ফচ্ছলান্নির্মমে ।
কিং বা মন্মথকারুণা বিরচিতে তস্যা মুদে কন্দুকে
সা য়ত্ক্রীডতি পাণিপঙ্কজতলে কৃত্বা সখীভিঃ সহ ॥ ৫৩ ॥
য়া রক্তা দশলোকপালমুকুটপ্রান্তত্বিষঃ সন্ততং
কল্পক্ষ্মারুহপুষ্পসম্ভৃতরুচস্ত্বত্পাদমূলে বভুঃ ।
তা দীব্যন্নখরাঞ্চিতাঙ্গুলিতয়া জানন্তি সত্যং জনাঃ
স্বস্মিন্নেব সদাধরেণ দধতে লেখা য়দূর্ধ্বশ্রিয়ম্ ॥ ৫৪ ॥
পীয়ুষদ্যুতিবিম্বমম্বরতলে বিদ্যোতমানং পুরঃ
প্রেক্ষ্যোত্ফুল্লদৃশা ত্বয়া মুহুরিদং দেহীতি য়দ্ভাষিতম্ ।
তন্মন্যে তব পঙ্কজেক্ষণ মহচ্চিত্রং য়শোদার্থনং
য়ত্ত্বত্পাদসরোজয়োর্নখমণিব্যাজেন শীতাংশবঃ ॥ ৫৫ ॥
সত্যং য়দ্বিবুধা বদন্তি পদয়োর্দ্বন্দ্বং তবাম্ভোরুহে
গোধূলিচ্ছলতঃ স্থিতানি পরিতো হংসালিচেতাংস্যলম্ ।
পীত্বৈতন্মকরন্দবিন্দুমসকৃদ্বৃন্দাবনীভূপতে
মঞ্জীরদ্বয়মঞ্জুশিঞ্জিতমিষাদঞ্চন্তি য়ত্পঞ্চমম্ ॥ ৫৬ ॥
আকৃপ্যাখিলবস্তুতঃ প্রথমতো রাগং মুনীন্দ্রৈস্ততঃ
কৃত্বা মানসপঙ্কজে তব পদদ্বন্দ্বং স তস্মিন্ধৃতৈঃ ।
য়েনাস্মিন্নরবিন্দলোচন পুনস্তত্কেসরাণাং দ্যুতি-
স্তোমেনাপি সমঞ্চিতঃ সমুদয়ত্যুচ্চৈস্তরাং শোণিমা ॥ ৫৭ ॥
হংসাস্ত্বামুপনীয় মানসসরোজন্মপ্রদেশেঽনিশং
ক্রীডন্তঃ কমলালয়েন ভবতা সার্ধং প্রমোদং দধুঃ ।
স ত্বং লোচনলোহিতাধরপদদ্যোতঃ শ্রিতো হংসতাং var লোহিতলোচনা
তত্সম্পর্কবশাদিতি ব্রজকুলালঙ্কার শঙ্কামহে ॥ ৫৮ ॥
ক্ষুদ্রাত্মা নিতরাং কিমুন্নততরঃ কাঠিন্যবান্নির্ভয়ং
কিং য়া কেবলকোমলঃ শ্রয়তি চেত্কিঞ্চিন্মদীয়ং পদম্ ।
ধন্যঃ সোঽয়মিতীব লোকমখিলং সম্বোধয়ন্মাধব
ত্বং ধত্সে পদয়োর্যবং ধ্বজবরং দম্ভোলিমম্ভোরুহম্ ॥ ৫৯ ॥
ত্বাং নিত্যং সমুপাস্য দাস্যবিধয়া স্থাস্যাম ইত্যাশয়া
ব্রহ্মেন্দ্রাদ্যমরৈস্ত্বদীয়পদয়োঃ স্বীয়া ধৃতাঃ সম্পদঃ ।
তাসামঙ্কুশনীরজাশনিলসচ্ছত্রধ্বজাদ্যাকৃতিং
বিভ্রাণা বিজয়শ্রিয়ং ত্রিজগতাং বন্দ্যারবিন্দালয়া ॥ ৬০ ॥
ত্বত্পাদাম্বুজসঙ্গমাত্ত্রিজগতাং বন্দ্যারবিন্দালয়া
স্থানে স্থানগুণাদ্ভবন্তি হি জনাঃ প্রায়ঃ পদং সম্পদাম্ ।
কিং ত্বেকং শতপত্রলোচন মহচ্চিত্রং য়দস্মাদধঃ
পাতা পুণ্যতমা বিমুক্তিনগরীনিঃশ্রেণিকা স্বর্ধুনী ॥ ৬১ ॥
য়ত্পাদাম্বু বিধায় মূর্ধনি চিতাবাসঃ শিবত্বং হঠা-
ত্প্রাপ্তো ভক্ষিতকালকূটনিকরো মৃত্যুজয়ত্বং য়য়ৌ ।
দিগ্বাসা নৃকপালমাত্রবিভবশ্চাবিন্দদীশানতাং
স ত্বং নন্দসি য়স্য মন্দিরগতো নন্দায় তস্মৈ নমঃ ॥ ৬২ ॥
ধূলীধূসরিতং মুখং তব শরত্পূর্ণেন্দুনিন্দাবহং
ব্যালোলালককুণ্ডলদ্যুতি চলন্নেত্রশ্রিয়া প্রোল্লসত্ ।
য়ালোক্যার্দ্রবিলোচনা স্মিতমুখী প্রস্যন্দমানস্তনী
পাণিভ্যামবলম্ব্য চুম্বিতবতী তাং নন্দজায়াং ভজে ॥ ৬৩ ॥
পীত্বা স্তন্যবিষং সহাসুপবনৈঃ সম্পাতিতে পূতনা-
দেহে বৈ ভবতা জনার্দন তৃণাবর্তে চ নীতে ক্ষয়ম্ ।
রাহূন্মুক্তসুধাময়ূখসুষমা য়াদৃক্চকোরালিভি-
র্যাভিস্ত্বদ্বদনদ্যুতিশ্চুলুকিতা তা গোপকন্যাঃ স্তুমঃ ॥ ৬৪ ॥
য়দ্বন্ধস্য বিধিত্সয়াপি বিবশঃ কীনাশপাশৈর্দৃঢং
বদ্ধঃ সানুগপুত্রবান্ধবজনো দুর্যোধনোঽন্তং গতঃ ।
তং ত্বাং য়েন নিবধ্য নন্দদয়িতা বৃন্দারকৈর্বন্দিতা
জাতাঽঽনন্দময়ী মুকুন্দ মহতে ভাবায় তস্মৈ নমঃ ॥ ৬৫ ॥
নির্ভিন্নে য়মলার্জুনেঽতিচকিতাস্তূর্ণং গৃহান্নির্গতাঃ
পীত্বা দৃক্চষকৈস্ত্বদক্ষততনূরূপামৃতং নির্বৃতাঃ ।
ত্বামাদায় বিধায় নেত্রসলিলৈঃ সিক্তং ত্বরামাশ্রিতা
য়ে বৃন্দাবনমাগতাঃ কৃতধিয়স্তান্গোপবৃদ্ধান্স্তুমঃ ॥ ৬৬ ॥
কৃত্বা কালিয়দন্দশূকদমনং ত্বয়্যাস্থিতে তাণ্ডবং
তস্যোত্তব্ধসমস্তমস্তকমণিস্তোমে সমুত্তস্থুষি ।
য়েনালম্ভি বিভাতভাস্করসুরপ্রাগ্ভারশোভাস্ফুর-
দ্রত্নাম্ভোজয়ুগদ্যুতিঃ প্রতিপদং তত্তেঽঙ্ঘ্রিয়ুগ্মং ভজে ॥ ৬৭ ॥
উত্ফুল্লৈঃ পরিপীয় কর্ণপুটকৈর্বংশীনিনাদামৃতং
তচ্চ ঘ্রাণমুদস্য দত্তকবলং প্রোদ্ভিন্নরোমাঙ্কুরম্ ।
নিঃস্পন্দৈর্নয়নৈরমন্দমধুরৈঃ শ্যামং মহস্তাবকং
য়েনোদ্বীক্ষিতমম্বুজেক্ষণ ভজে তদ্গোকদম্বং তব ॥ ৬৮ ॥
জম্মারেঃ স্ফুরদায়ুধস্য ভবতা দম্ভাদ্রিবিদ্রাবণং
কৃত্বা বামভুজেন সপ্তদিবসান্যোঽসৌ ধৃতঃ পর্বতঃ ।
সোঽস্তু স্নিগ্ধতমালসারঘটিতস্তম্ভৈকসম্ভাবিত-
প্রাসাদদ্যুতিনিন্দকঃ প্রতিপদং ভব্যায় গোবর্ধনঃ ॥ ৬৯ ॥
ত্বদ্বাহূদ্ধৃতপর্বতার্পিতদৃশঃ প্রেক্ষ্য প্রিয়ায়াঃ স্খল-
দ্বাসঃপীনপয়োধরক্ষিতিধরৌ দোঃস্তম্ভকম্পে তব ।
শৈলে চঞ্চলতাং গতে ব্রজপতে ত্রাসাকুলে গোকুলে
নন্দে মন্দমুখদ্যুতৌ জয়তি তে মন্দাক্ষমন্দেক্ষণম্ ॥ ৭০ ॥
পৌগণ্ডং মদখণ্ডনং বলভিদঃ কিং তে হরে স্তূয়তে
কৌমারং চরিতং য়তো বিজয়তে ব্যামোহনং ব্রহ্মণঃ ।
কিং স্তব্যং তব য়ৌবনং ত্রিপুরজিদ্যদ্বাণয়ুদ্ধে জিতঃ
সম্মোহং গমিতাস্ত্বয়া য়দবলা ভাবেঽপি নেত্রশ্রিয়া ॥ ৭১ ॥
পীতে দাবহুতাশনে নিজজনত্রাণৈকহেতোস্ত্বয়া
নিঃস্পন্দং পশুপৌঘপক্ষিপশুভিঃ পেপীয়মানে ত্বয়ি ।
প্রেমার্দ্রাণ্যতিনির্মলানি দিবিষচ্চিত্তানি সত্যং মুহু-
স্ত্বদ্গাত্রে নু বিতীর্যমাণকুসুমব্যাজেন ভান্তি প্রভো ॥ ৭২ ॥
কঙ্কেল্লিস্তবকং মুহুঃ কমলিনীকান্তং প্রতীচীগতং
পর্যালোচ্য বিলোক্য ধূমপটলং গোধূলিবুদ্ধ্যাকুলাঃ ।
উচ্চৈঃ কোকিলকূজিতং চ মুরলীনাদং বিদিত্বা গৃহা-
ত্ত্বাং য়া বীক্ষিতুমাগতাঃ পথি গবাং গোপাঙ্গনাস্তাঃ স্তুমঃ ॥ ৭৩ ॥
সায়াহ্নে সমুদঞ্চতি শ্রুতিপথং বংশীনিনাদে হঠা-
ন্নেপথ্যস্য সমাপনেন শপথৈরালীজনৈঃ প্রার্থিতে ।
পাণিভ্যামবলম্ব্য নীবিরশনা নির্গম্য তূর্ণং বহি-
র্দৃগ্ভ্যাং তে মুখসৌরভং চুলুকিতং য়াভির্ভজে তা জনীঃ ॥ ৭৪ ॥
য়ত্রাঘাসুরকেশিধেনুকবকারিষ্টপ্রলম্বাদয়ঃ
ক্রোধাগ্নৌ ভবতা হুতা দিতিসুতাঃ সন্তর্পিতা দেবতাঃ ।
য়স্মিংস্তে পদপঙ্কজদ্বয়রজঃ পদ্মোদ্ভবপ্রার্থিতং
ভেজুর্গোমৃগপক্ষিভূরুহলতা বৃন্দাবনং তদ্ভজে ॥ ৭৫ ॥
দেবেন্দ্রস্য পরাভবং কিমপরং ব্যামোহনং ব্রহ্মণঃ
সম্পশ্যন্নপি বৈভবং ব্রজকুলোত্তংস প্রচেতাস্তব ।
নন্দং য়ত্পিতরং জহার ভবতঃ স্থানে জলাত্মন্যদঃ
স্থানে তাদৃশি তে বভূব ন মনাক্ক্রোধস্য লেশোঽপি তত্ ॥ ৭৬ ॥
মঞ্জীরদ্বয়কঙ্কণাবলিলসত্কাঞ্চীঘটাশিঞ্জিতে
বীণাবেণুমৃদঙ্গঝর্ঝরকরোত্তালে দিশশ্চুম্বতি ।
কামং পূর্ণকলানিধৌ বিলসতি ভ্রশ্যত্পটে স্বর্বধূ-
বৃন্দে বর্ষতি দৈবতে সুমনসো রাসস্তবাস্তাং মুদে ॥ ৭৭ ॥
নৃত্যদ্ভ্রূনয়নোত্পলস্মিতমুখস্বিদ্যত্কপোলস্থলং
লীলাচঞ্চলকুণ্ডলং ভুজলতান্দোলক্বণত্কঙ্কণম্ ।
ত্রুট্যত্কঞ্চুকবন্ধমুন্নতকুচং তির্যক্ত্রিকং প্রস্খল-
ন্নীবি ব্যঞ্জিতশিঞ্জিতং জয়তি তে রাসঃ প্রিয়াভিঃ সহ ॥ ৭৮ ॥
আকুঞ্চদ্বদনং ক্বচিদ্বিলসিতাম্ভোজাস্যশোমং ক্বচি-
ন্মন্দস্যন্দিবিলোচলং ক্বচিদলং দৃক্চাপলং কুত্রচিত্ ।
ক্বাপ্যুদ্দামমদান্ধসিন্ধুরগতং কুত্রাপি বিদুল্লতা-
চাঞ্চল্যং স্মরবর্ধনং বিজয়তে লাস্যং প্রিয়াণাং তব ॥ ৭৯ ॥
অধ্যাস্যোরুতলং বপুঃ পুলকিতং স্বিদ্যত্কপোলস্থলীং
দোর্বল্লীমপি তাবকাংসমিলিতাং কম্পাকুলাং বিভ্রতি ।
প্রোদ্যত্পূর্ণকলানিধাবরুচিরে স্মেরে মুহুঃসীত্কৃতে
রাধা ধন্যতমা দধার বদনে তাম্বূলকল্কং তব ॥ ৮০ ॥
য়স্যাং তুঙ্গতরঙ্গসঙ্গমবশাদ্ভীতা ভুজঙ্গভ্রমা-
দালিঙ্গতি বরাঙ্গনাস্তব জলক্রীডাজুশোঽঙ্গং হঠাত্ ।
সা নিত্যং দলিতেন্দ্রনীলনিকরশ্রীতস্করা ভাস্কর-
স্যাপত্যং তটিনী শিবং দিশতু মে গোপালভূপালজ ॥ ৮১ ॥
উত্ফুল্লাম্বুজমাকলয়্য দয়িতাস্মেরাননং বিভ্রম-
দ্ভৃঙ্গশ্রেণিমনঙ্গভঙ্গুরদৃশস্তস্যাঃ কটাক্ষচ্ছটাম্ ।
শৈবালং পরিগৃহ্য কুন্তলধিয়া দ্রাক্চুম্বনায়োদ্যত-
স্ত্বং য়স্যাং হসিতঃ প্রিয়াভিরভিতস্তাং ভানুকন্যাং ভজে ॥ ৮২ ॥
পুষ্পং ত্বয়্যবচিন্বতি প্রিয়তমাবৃন্দেন সার্ধং মুদা
বৃন্দারণ্যমহীরুহস্য নিকরে কম্পাকুলে নির্ভরম্ ।
তস্মিন্বর্ষতি কৌতুকেন কুসুমান্যুচ্চৈঃ পুনর্দৈবত-
স্তোমেঽপি ব্রজভূপতে বিজয়তে তৈস্তৈশ্চিতং তে বপুঃ ॥ ৮৩ ॥
কান্তাকোটিকলাকুলস্য ভবতঃ সন্তোষ্য রাসে স্মর-
ক্ষীণাং বীক্ষ্য নিশাং নিশাকরকরস্তোমে পরং মুঞ্চতি ।
সাতঙ্কং সমুপাগতস্য সদনাদ্যান্তং শয়ানে জনে
কীরস্যাপি গিরা জয়ন্তি পরিতঃ পর্যাকুলা দৃষ্টয়ঃ ॥ ৮৪ ॥
উদ্যন্নেব ভবানিব ব্রজভুবাং সর্বাপদাং সংহতি-
ধ্বান্তস্তোমমনুত্তমং তমনয়ত্কান্তঃ সরোজন্মনাম্ ।
সোল্লাসানি সরোরুহাণি নয়নানীব ত্বদালোকনে
লোকানাং কিল নন্দবংশতিলক স্বাপস্য নায়ং ক্ষণঃ ॥ ৮৫ ॥
মিত্রেণেহ তমস্বিনীং বিনিহতাং নাথ ত্বয়া পূতনাং
ব্যাধূতামিব কৈরবেষ্বপি ভবদ্বিদ্বেষিবক্ত্রদ্যুতিম্ ।
আশাং পশ্য পুরন্দরস্য দয়িতাং রক্তাম্বরালঙ্কৃতাং
সিন্দূরান্বিতকুম্ভমম্বরমণের্বিম্বং বহন্তীং পুরঃ ॥ ৮৬ ॥
গীতজ্ঞাঃ কবয়ো নটা বহুকলাশিক্ষাসু দক্ষাঃ পরে
বিপ্রেন্দ্রাঃ কুশপাণয়োঽপি ভবনদ্বারেষু সন্ত্যুত্সুকাঃ ।
তল্পং মুঞ্চ দদস্ব লোচনফলং ত্বং দেহভাজামিতি
প্রাতর্বন্দিগিরো জয়ন্তি ভবতঃ সম্বোধনে নিত্যশঃ ॥ ৮৭ ॥ (বিশেষকম্)
ভানোর্মণ্ডলমাবিরস্তি পুরতো নাদ্যাপি নিদ্রাহতিঃ
কিং তে তাত বলানুজেতি জননীবাগ্বীচিমাচামতঃ ।
অর্ধোন্মীলিতপাটলাক্ষিয়ুগলং পর্যস্তনীলালকং
জৃম্ভারম্ভবিশেষশোভি বদনাম্ভোজং ভজামস্তব ॥ ৮৮ ॥
মুঞ্চন্তং শয়নং ভবন্তমভিতঃ সঙ্গম্যগোপাঙ্গনা-
স্তৈলাভ্যঞ্জনমঞ্জনাদি দধতীঃ সংবীক্ষ্য দেব্যশ্চিরম্ ।
উজ্ঝন্ত্যঃ সুমনোঽম্বরাণি সুমনোভাবা বরং সঙ্গতাঃ
প্রায়ো গোপবধূত্বলব্ধিমনসৈবাকাশসাম্যং দধুঃ ॥ ৮৯ ॥ var ভূয়ো
প্রাতর্ভোজনমারচয়্য বিপিনং প্রস্থাতুকামে ত্বয়ি
প্রায়ো গোপবধূলতাসু মিলিতঃ কন্দর্পদাবানলঃ ।
য়দ্গোধূলিমিষাদুদেতি পরিতো ধূমালিরভ্রংলিহা
তাসামশ্রুরসাঃ স্রবন্তি চ মুহুর্দন্দহ্যমানেঽন্তরে ॥ ৯০ ॥
পঞ্চাস্যে চতুরাননে দশশতীনেত্রাদিপূর্বে গবা-
মধ্বন্যধ্বনি লোকপালনিবহে ভূমীলুঠন্মূর্ধনি ।
তদ্ব্যাঘ্রাজিনভূষণাদিভিরলং ত্রস্তে সমস্তে পশৌ
গোপাঃ কোপবশাদ্গৃহীতলগুডা হীহীরবাঃ স্যুর্মুদে ॥ ৯১ ॥
তিগ্মাংশৌ তপতি ক্বচিজ্জলমুচাং স্তোমে জলং মুঞ্চতি
প্রেমার্দ্রঃ প্রতনোতি য়ঃ স্ববপুষা চিত্রাতপত্রং তব ।
সোঽয়ং ভাস্করকোটিভাস্বরমহঃসম্ভারপাটচ্চরঃ
পারীন্দ্রোঽসুরদন্তিনাং দিশতু মেং ভব্যং ভুজঙ্গান্তকঃ ॥ ৯২ ॥
মধ্যাহ্নে য়মুনাতটে বিটপিনাং মূলে বয়স্যৈঃ সমং
দধ্যন্নান্যুপভুজ্য রজ্যতি পুনস্তত্ক্রীডনে চ ত্বয়ি ।
দেবেন্দ্রস্ত্রিপুরান্তকঃ কমলভূরন্যে চ নাকালয়াঃ
কাকাকারজুষো মুহুঃ কবলয়ন্ত্যুচ্ছিষ্টমিষ্টং তব ॥ ৯৩ ॥
নিদ্রাণে ত্বয়ি শীতলে তরুতলে তল্পৈ দলৈঃ কল্পিতে
সংবীক্ষ্যাম্বুজপত্রমন্দমরুতা সংবাহিতে পাদয়োঃ ।
রুদ্রব্রহ্মমহেন্দ্রতর্জনবিধৌ গোপার্ভকাণাং কর-
ব্যাধূতানি জয়ন্তি ভঙ্গুরদৃশাং কান্তিশ্চ শোণায়িতা ॥ ৯৪ ॥
স্ফূর্জন্তস্তপসা পুলস্ত্যপুলহাগস্ত্যাঃ সদুর্বাসসঃ
সন্ত্যুচ্চৈর্যশসঃ পরেঽপি স পরং ধন্যো মুনির্নারদঃ ।
য়স্য ত্বদ্গুণগানমগ্নমনসো ব্যাপাদিতে কেশিনি
প্রালেয়াদ্রিবিনিঃসৃতামরধুনীধারায়তেঽস্রাবলিঃ ॥ ৯৫ ॥
লক্ষ্মাণি ধ্বজবজ্রপঙ্কজয়বচ্ছত্রোর্ধ্বলেখায়ুতা-
ন্যালক্ষ্ম্যাম্বুরুহাক্ষ তে চরণয়োঃ ক্ষোণীতলেঽহ্নায় য়ঃ ।
ধ্যায়ত্ত্যুত্পুলকত্যুদঞ্চতি লুঠত্যাক্রন্দতি প্রীয়তে
কোঽন্যো ধন্যতমস্ততস্ত্রিভুবনে স্যাদ্গান্দিনীনন্দনাত্ ॥ ৯৬ ॥
ধন্যং তস্য জনুস্তথৈব পিতরৌ ধন্যং তদীয়ং কুলং
ধন্যা তেন বসুন্ধরা কিমধিকং তেনৈব ধন্যং জগত্ ।
য়ঃ কংসৈকনিদেশবর্ত্যপি ভবত্পাদাম্বুজালোকনা-
দক্রূরোঽশ্রুনিরুদ্ধকণ্ঠকুহরঃ প্রেমাব্ধিমগ্নোঽজনি ॥ ৯৭ ॥
পর্যাবৃত্ত্য পশূনশেষসখিভিঃ সাকং ত্বয়া স্বীকৃতে
গোপীলোচনপঙ্কজালিনিচিতে সায়ং গবামধ্বনি ।
জীয়াসুর্দয়িতাননেষু নিতরাং সাকূতনৃত্যাকুলাঃ
কালিন্দীসদৃশাঃ স্মিতেন সুরসাস্ত্বচ্চক্ষুষোঃ কান্তয়ঃ ॥ ৯৮ ॥
য়ো বাচো মনসোঽপি নৈব বিষয়স্ত্বং ত্বাং বিধায়াত্মজং
য়াভ্যঙ্গস্নপনাশনপ্রভৃতিভিঃ সংলালয়ত্যন্বহম্ ।
নো দানেন ন চেজ্যয়া ন তপসা নো সাঙ্খ্যয়োগাদিভি-
র্যল্লভ্যং তদবাপ গোপদয়িতা সাঽঽস্তাং য়শোদা মুদে ॥ ৯৯ ॥
পূর্ণে দানপতের্মনোরথশতৈঃ সার্ধং প্রলম্বারিণা
তল্পে নিন্দিতদুগ্ধসিন্ধুসুষমাসারে ত্বয়া স্বীকৃতে ।
সন্দষ্টোষ্ঠমুদশ্রু মর্দিতকরং তচ্চেষ্টিতং শৃণ্বতঃ
কংসধ্বংসমভীপ্সতো জয়তি তে ভ্রাতা সমং মন্ত্রণা ॥ ১০০ ॥
য়া সংব্যাপ্য সুবর্ণভূধরপদং জাতা গিরীশার্চিতা
স্বচ্ছা হংসকবিপ্রিয়া কমলমুদ্গাম্ভীর্যমভ্যঞ্চতি ।
য়েয়ং কৃষ্ণপদাব্জভক্তিবসুধাপাতালমালম্বিতা
সা তাপং মম সর্বতঃ প্রশময়ত্বানন্দমন্দাকিনী ॥ ১০১ ॥
য়ে পাণ্ডিত্যকবিত্বসূনুধরণীধর্মার্থকামাণিমা-
দীশিত্বেন্দ্রপদাপ্তিমোক্ষমথবা বাঞ্ছন্তি ভক্তিং হরৌ ।
সম্ভূতাং মধুসূদনপ্রপদতঃ সন্তো ভজন্ত্বাদরা-
ত্তে সংসারদবাগ্নিতাপশমনীমানন্দমন্দাকিনীম্ ॥ ১০২ ॥
ইতি শ্রীমন্নন্দনন্দনপদদ্বন্দ্বসমুদঞ্চন্নখচন্দ্রচন্দ্রিকাচয়-
দত্তচিত্তচকোরশ্রীমধুসূদনসরস্বতীবিরচিতানন্দমন্দাকিনী সম্পূর্ণা ॥