॥ Ananda Mandakini Kannada Lyrics ॥
॥ ಆನನ್ದಮನ್ದಾಕಿನೀ ॥
ಶ್ರೀಮಧುಸೂದನಸರಸ್ವತೀವಿರಚಿತಾ
ಆನನ್ದಮನ್ದಾಕಿನೀ ।
ವಾಗ್ದೇವೀಚತುರಾಸ್ಯಪಂಚವದನಾ ನಿತ್ಯಂ ಸಹಸ್ರಾನನೋ-
ಽಪ್ಯುಚ್ಚೈರ್ಯತ್ರ ಜಡಾತ್ಮತಾಮುಪಗತಾಃ ಕೇಽನ್ಯೇ ವರಾಕಾಃ ಸುರಾಃ ।
ಮರ್ತ್ಯಾಃ ಸ್ವಲ್ಪಧಿಯಃ ಕಥಂ ನು ಕುಶಲಾಸ್ತತ್ರಾಪ್ಯಹಂ ಪ್ರಜ್ಞಯಾ
ಹೀನಃ ಕಿಂ ಕರವಾಣಿ ತಾಂ ವ್ರಜಕುಲೋತ್ತಂಸ ಪ್ರಶಂಸಾಂ ತವ ॥ 1 ॥
ನಿತ್ಯಂ ಬ್ರಹ್ಮಸುರೇನ್ದ್ರಶಂಕರಮುಖೈರ್ದತ್ತೋಪಹಾರಾಯ ತೇ
ವಿಸ್ವಾದಾಂಸ್ತುಷಮಿಶ್ರತಂಡುಲಕಣಾನ್ವಿಪ್ರಃ ಸುದಾಮಾ ದದೌ ।
ತದ್ವದ್ದೇವ ನಿರರ್ಥಕೈಃ ಕತಿಪಯೈ ರೂಕ್ಷಾಕ್ಷರೈರ್ನಿರ್ಮಿತಾಂ
ವಾಗೀಶಪ್ರಮುಖಸ್ತುತಸ್ಯ ಭವತಃ ಕುರ್ಯಾಂ ಸ್ತುತಿಂ ನಿಸ್ತ್ರಪಃ ॥ 2 ॥
ಶಶ್ವದ್ಬ್ರಹ್ಮಶಿವೇನ್ದ್ರದೇವಗುರುವಾಗ್ದೇವೀಫಣೀನ್ದ್ರಾದಿಭಿಃ
ಸ್ತುತ್ಯಸ್ಯಾಪಿ ಹರೇ ಮಮಾಸ್ತು ರಚಿತಾ ವಾಣೀ ವಿನೋದಾಯ ತೇ ।
ಚಿತ್ರಾಲಂಕೃತಿಶಾಲಿಭಿಃ ಸುಲಲಿತೈರ್ನಿತ್ಯಂ ಕವೀನಾಂ ಸ್ತವೈಃ
ಸಮ್ರಾಜಃ ಸಮುಪಾಸಿತಸ್ಯ ಶುಕಗೀರ್ಧತ್ತೇ ಪ್ರಮೋದಂ ಯಥಾ ॥ 3 ॥
ಚಿತ್ರಾಕಾರಕಿರೀಟಕೋಟಿವಿಲಸದ್ರತ್ನೌಘಕಾನ್ತಿಚ್ಛಟಾ-
ಸಂಘಟ್ಟೇನ ವಿಚಿತ್ರಮಮ್ಬರತಲಂ ಕುರ್ವತ್ಸ್ಥಿತಂ ಮೂರ್ಧನಿ ।
ಜೀಯಾತ್ಕೇಕಿಶಿಖಂಡಮಂಡನಮಿದಂ ನೀಲಾಚಲಸ್ಥಾಯಿನೀ
ಸ್ವರ್ಣಾದ್ರೇಃ ಶಿಖರೇ ಪುರನ್ದರಧನುರ್ವ್ಯೂಹಸ್ಯ ನಿನ್ದಾವಹಮ್ ॥ 4 ॥
ಯತ್ಪಾದಾನ್ತನಖಾಂಶುಚಿನ್ತನವಶಾದಜ್ಞಾನಮನ್ಧಂ ತಮೋ-
ಽಪ್ಯನ್ತಂ ಯಾತಿ ಮುಕುನ್ದ ತಸ್ಯ ಭವತೋ ಧ್ವಾನ್ತಾನಿ ಕಿಂ ಮೂರ್ಧನಿ ।
ಜ್ಞಾತಂ ತ್ವಾಂ ದಯಿತಂ ಸಮೇತ್ಯಜಲದಾ ಯೇ ಕೇಶತಾಮಾಶ್ರಿತಾ-
ಸ್ತೇ ಬದ್ಧಾಶ್ಚಪಲಾಗಣೈಃ ಪ್ರಣಯಜಕ್ರೋಧಾತ್ಕಿರೀಟಚ್ಛಲಾತ್ ॥ 5 ॥
ತ್ವಚ್ಚಕ್ಷುಃ ಸವಿತುಃ ಸರೋರುಹರುಚೇಃ ಸಾಕ್ಷಾತ್ಕಥಂ ಗಂಡಯೋ-
ರ್ಭಾಲೇ ಚ ವ್ರಜನಾಥ ನರ್ತನಪರಾ ಧ್ವಾನ್ತಾರ್ಭಕಾಃ ಸನ್ತತಮ್ ।
ನಿರ್ಣೀತಂ ಮುಖನೇತ್ರಪಂಕಜವನೀಮಾಧ್ವೀಕಪಾನಾನ್ಮುಹು-
ರ್ಮಾದ್ಯನ್ತೋ ಮಧುಪಾ ಭ್ರಮನ್ತಿ ಪರಿತೋ ವಕ್ತ್ರಾಲಕವ್ಯಾಜತಃ ॥ 6 ॥
ತ್ವದ್ಭಾಲೇ ನಿಕಷೋಪಲೇ ವಿಜಯತೇ ಕಾಶ್ಮೀರಗೋರೋಚನಾ-
ಸಮ್ಭೂತಸ್ತಿಲಕಃ ಪರೀಕ್ಷಣವಿಧೌ ಕಿಂ ಹೇಮರೇಖೋದ್ಗಮಃ ।
ಚಾಂಚಲ್ಯಂ ಚಪಲಾ ವಿಹಾಯ ಜಲದಂ ಕಿಂ ವಾ ಸಮಾಲಮ್ಬತೇ
ಕಿಂ ವಾ ಮಾರಕತಸ್ಥಲೇ ಸಮುದಿತಃ ಕನ್ದರ್ಪವೃಕ್ಷಾಂಕುರಃ ॥ 7 ॥
ತ್ವದ್ಭೂವಲ್ಲಿಮಿಷೇಣ ಕಾರ್ಮುಕಲತಾಮಾಕೃಷ್ಯ ಪುಷ್ಪಾಶುಗಃ
ಕೃತ್ವಾ ಚಮ್ಪಕಕೋರಕಂ ಚ ತಿಲಕವ್ಯಾಜೇನ ಬಾಣಂ ಹರೇ ।
ಲಕ್ಷ್ಯಂ ಕುನ್ತಲನೀಲಕಂಠಮತುಲಶ್ರೀಚನ್ದ್ರಕಂ ವಿಧ್ಯತಿ
ಪ್ರಾಯಃ ಶತ್ರುಸಮಾನನಾಮ್ನ್ಯಪಿಜನೇ ಕ್ರೋಧೋ ಯದೂರ್ಜಸ್ವಿನಾಮ್ ॥ 8 ॥
ನಿಃಶೇಷಪ್ರಮದಾಮನೋಮನಸಿಜಕ್ರೀಡಾಮಹಾಮನ್ದಿರ-
ವ್ರೀಡಾವಜ್ರಕಪಾಟಿಕಾವಿಘಟನಪ್ರೌಢಾಕೃತಿಃ ಕುಂಚಿಕಾ ।
ದುರ್ಮಾನಗ್ರಹಿಲತ್ರಿಲೋಕಮಹಿಲಾಮಾನಚ್ಛಿದಾಕರ್ತರೀ
ಶೃಂಗಾರದ್ರುಮಮಂಜರೀ ಸ್ಫುರತಿ ಕಿಂ ಗೋವಿನ್ದ ತೇ ಭ್ರೂಲತಾ ॥ 9 ॥
ನೋ ಕಾರ್ಯಂ ಶ್ರುತಿವರ್ತ್ಮಲಂಘನಮಿದಂ ನಾಲೀಕಮುಗ್ಧಾಕೃತಿಃ
ಪರ್ಯನ್ತಾಕಲನಂ ವಿಧಾಯ ಸಹಜಸ್ವಚ್ಛೇನ ಭಾವ್ಯಂ ಸದಾ ।
ಅನ್ತಃ ಕೃಷ್ಣಮುಪಾಸ್ಯ ತದ್ರುಚಿಮತಾ ಸಮ್ಭಾವನಾ ಸರ್ವತಃ
ಕಾರ್ಯೇತ್ಯಮ್ಬುಜಲೋಚನಾಕ್ಷಿಯುಗಲಂ ಮಾನಂ ದಧೌ ತೇ ಸತಾಮ್ ॥ 10 ॥
ಸೌನ್ದರ್ಯಾಮೃತದೀರ್ಘ್ಹಿಕೇ ತವ ದೃಶೌ ಪಕ್ಷ್ಮಾವಲಿಶ್ಚೈತಯೋಃ
ಕೂಲೇ ಕಾಮಕೃಷೀವಲೇನ ರಚಿತಾ ಶೃಂಗಾರಸಸ್ಯೋನ್ನತಿಃ ।
ದೃಗ್ಭಂಗೀರ್ನಿಗದನ್ತಿ ಯಾಸ್ತು ವಿಬುಧಾ ರತ್ಯಮ್ಭಸಾಂ ವೀಚಯ-
ಸ್ತಾಃ ಸ್ಯುರ್ಗೋಪವಧೂಹೃದಮ್ಬುಜವನೀದೋಲಾಯಿತಾ ಯತ್ನತಃ ॥ 11 ॥
ದೂರೇ ಬ್ರಹ್ಮಶಿವೇನ್ದ್ರಪೂರ್ವದಿವಿಷದ್ವೃನ್ದೇ ನಮಸ್ಕುರ್ವತಿ
ವ್ಯಾವಲ್ಗದ್ವ್ರಜಬಾಲಕೌಘಲಗುಡತ್ರುಟ್ಯತ್ಕಿರೀಟೇ ಹಠಾತ್ ।
ಸಾವಜ್ಞಾ ಮಧುಮತ್ತಸುನ್ದರದೃಶಾಂ ಶೋಭಾದ್ವಿಷಃ ಸಾಲಸಾಃ
ದೃಕ್ಪಾತಾಸ್ತವ ನನ್ದವಂಶತಿಲಕ ಸ್ವಾನ್ತೇ ಸದಾ ಸನ್ತು ಮೇ ॥ 12 ॥
ಮುಕ್ತೇರಪ್ಯತಿದುರ್ಲಭಾ ಹಿಮಗಿರಿಪ್ರಸ್ಯನ್ದಿಮನ್ದಾಕಿನೀ-
ಧಾರಾತೋಽಪ್ಯತಿಶೀತಲಾತಿಮಸೃಣಾ ಚಾನ್ದ್ರಾನ್ಮಯೂಖಾದಪಿ ।
ವಾಂಛಾತೋಽಪ್ಯತಿವಿಸ್ತೃತಾ ವಿಷಯಿಣಾಂ ತ್ವತ್ಪಾದಚಿನ್ತಾಪರ-
ಸ್ವಾನ್ತಾದಪ್ಯತಿನಿರ್ಮಲಾ ಮಯಿ ಕೃಪಾದೃಷ್ಟಿಸ್ತವಾಸ್ತಾಂ ಹರೇ ॥ 13 ॥
ಕಲ್ಪಾನ್ತಾಗ್ನಿಶಿಖೋನ್ನತಿರ್ದಿತಿಸುತವ್ರಾತೇ ಪ್ರಪನ್ನೇ ಜನೇ
ಪೀಯೂಷದ್ರವಸಿನ್ಧುವೃದ್ಧಿರಮರಸ್ತೋಮೇ ವಿಭೂತ್ಯಾಯತಿಃ ।
ಸೀಮಾ ಪ್ರೇಮಭರಸ್ಯ ಗೋಪನಿಕರೇ ಕನ್ದರ್ಪಕಾಂಡಾಹತಿ-
ರ್ಬ್ರಹ್ಮಾಂಡೋದರಸುನ್ದರೀಹೃದಿ ಹರೇ ಜೀಯಾದ್ದೃಶೋಸ್ತೇ ದ್ಯುತಿಃ ॥ 14 ॥
ನಿರ್ಬನ್ಧೇನ ಯದೀನ್ದ್ರನೀಲಮಹಸಾ ಸಮ್ಪಾದಿತೌ ದರ್ಪಣೌ
ತಾಭ್ಯಾಂ ಕಿಂ ತುಲನಾ ಕಪೋಲತಲಯೋಃ ಸಮ್ಭಾವ್ಯತೇ ವಾ ನ ವಾ ।
ಏವಂ ಜ್ಞಾತುಮುಪಾಗತೇ ಶ್ರುತಿಪಥಂ ನೇತ್ರೇ ತ್ರಪಾಕುಂಚಿತೇ
ಶಂಕೇ ದ್ವೈಧವತೀ ತ್ವದೀಯವದನಪ್ರಾನ್ತಶ್ರಿಯಂ ಪಶ್ಯತಃ ॥ 15 ॥
ತ್ವಾಂ ಪಾದಾಂಗದಕಂಕಣಾಂಗದಶಿರೋಲಂಕಾರಹಾರಾಮ್ಬರೈಃ
ಸಮ್ಪೂಜ್ಯ ಪ್ರದದೌ ಸುತಾಮಥ ಮಣಿಂ ರತ್ನಾಕರಃ ಕೌಸ್ತುಭಮ್ ।
ಆಸ್ಯೇ ತಸ್ಯ ಸುತಃ ಸುಧಾಂಶುರಖಿಲಾಂ ಕಾನ್ತಿಂ ಯದಾ ದತ್ತವಾ-
ನ್ಸ್ವಾಕಾರಂ ವ್ಯತರಂಸ್ತದೈವ ಮಕರಾಃ ಕಿಂ ಕುಂಡಲಾನ್ತಸ್ತವ ॥ 16 ॥
ಲಾವಣ್ಯಾಮೃತವಾಹಿನೀ ತವ ಮುಖಸ್ಯೇಯಂ ಮನೋಜ್ಞಾಕೃತಿ-
ಸ್ತಸ್ಯಾಮದ್ಭುತಬುದ್ಬುದಃ ಸಮಭವತ್ತತ್ರಾಪಿ ಫೇನೋದ್ಗಮಃ ।
ನಾಸಾವಂಶಗತಂ ತಮೇವ ವಿಶದಂ ಮುಕ್ತಾಫಲಂ ಯೇ ವಿದು-
ಸ್ತೇ ಮಾನ್ಯಾ ಮಧುಸೂದನ ತ್ವಯಿ ಮನೋವೃತ್ತ್ಯೈವ ಧನ್ಯಾ ಯತಃ ॥ 17 ॥
ನೇತ್ರಾಮ್ಭೋಜಮುಖೇನ್ದುಭಾಲತಿಲಕೈರ್ನಿತ್ಯಂ ವಿವಾದೋ ಯತಃ
ಸೌನ್ದರ್ಯಾರ್ಥಮಿತಿ ಪ್ರತೀತ್ಯ ವಿಧಿನಾ ಸೀತಾ ಕೃತಾ ನಾಸಿಕಾ ।
ತೂಣೀ ವಾ ಕುಸುಮಾಯುಧಸ್ಯ ನೃಪತೇರ್ಯನ್ಮಲ್ಲಿಕಾಕೋರಕಃ
ಕಾಂಡಸ್ತತ್ರ ಚಕಾಸ್ತಿ ಮೌಕ್ತಿಕಫಲವ್ಯಾಜೇನ ನನ್ದಾತ್ಮಜ ॥ 18 ॥
ಯೋಽಹಂ ತೇ ಪದಪಂಕಜದ್ಯುತಿಲವಂ ಪ್ರಾಪ್ಯಾಭವಂ ಪಲ್ಲವಃ
ಕಲ್ಪಕ್ಷ್ಮಾರುಹಮಸ್ತಕಾಭರಣತಾಂ ಯಾತಶ್ಚ ರಾಧಾಪತೇ ।
ತಂ ಮಾಂ ನಿನ್ದತಿ ಬಿಮ್ಬವಿದ್ರುಮಲತಾಶ್ರೀತಸ್ಕರೋಽಯಂಶ್ರುತಾ-
ವೇವಂ ಜಲ್ಪಿತುಮಾಗತೇ ಕಿಸಲಯೇ ಸ್ಥಾನೇಽಧರೋ ರಾಗವಾನ್ ॥ 19 ॥
ದೃಗ್ಭಂಗೀಃ ಸ್ಫುರದಿನ್ದ್ರನೀಲನಿಚಯಃ ಪಕ್ಷ್ಮಾಣಿ ಕಸ್ತೂರಿಕಾ
ಜಿಹ್ವೇಯಂ ತವ ಪದ್ಮರಾಗನಿಕರಃ ಶೋಣಾಧರೋ ವಿದ್ರುಮಃ ।
ದನ್ತಾಲೀ ಗಜಮೌಕ್ತಿಕಾನಿ ಮಧುಜಿನ್ಮನ್ದಸ್ಮಿತಂ ಚನ್ದನಂ
ಪಣ್ಯಸ್ಥಾನಮಿದಂ ಮನೋಜವಣಿಜೋ ಜಾನೇ ತವಾಸ್ತೇ ಮುಖಮ್ ॥ 20 ॥
ಯಾ ರಕ್ತಾ ವದನೇನ್ದುಮಂಡಲಗತಂ ಮಾಧುರ್ಯಮುಚ್ಚೈಸ್ತರಾ-
ಮಾಸ್ವಾದ್ಯೇಹ ಸರಸ್ವತೀ ಸ್ಥಿತವತೀ ಸತ್ಯಂ ರಸಜ್ಞೇವ ಸಾ ।
ಯತ್ಸಪ್ತಸ್ವರಮಂಡಲಾನಿ ಬಹುಧಾ ತ್ವತ್ಕಂಠದೇಶಾದ್ಬಹಿಃ
ಪ್ರಾದುರ್ಭೂಯ ಮುದಂ ಶ್ರುತೌ ಸುಕೃತಿನಾಂ ಯಚ್ಛನ್ತಿ ನನ್ದಾತ್ಮಜ ॥ 21 ॥
ಸಾಮ್ಯಂ ತ್ವದ್ವದನಸ್ಯ ವಾಂಛತಿ ವಿಧುರ್ದೋಷಾಕರೋ ಯದ್ಯಪಿ
ಕ್ಷಿಪ್ತೋಽಪ್ಯಮ್ಬುನಿ ಪದ್ಮರಾಗಶಕಲೋ ದನ್ತಚ್ಛದಂ ಸ್ಪರ್ಧತೇ ।
ದೃಷ್ಟ್ವೈವಂ ಕುಶಲಃ ಕುಶೇಶಯಭವಃ ಕ್ಲೇಶಾದ್ಯಶೋದಾತ್ಮಜ
ವ್ಯಕ್ತಂ ತ್ವಚ್ಚಿಬುಕಂ ತಥೈವ ವಿದಧೇ ಯತ್ತುಲ್ಯತಾ ನ ಕ್ವಚಿತ್ ॥ 22 ॥
ಮಾಧುರ್ಯಂ ನ ಲವಂ ಮಧೂನಿ ದಧತಿ ದ್ರಾಕ್ಷಾ ತು ಸಾಕ್ಷಾದ್ವಿಷಂ
ಪೀಯೂಷಾನ್ಯಪಿ ಯಾನ್ತಿ ನಿಮ್ಬಸಮತಾಂ ಕೇ ದುಗ್ಧಖಂಡಾದಯಃ ।
ಪ್ರಾಲೇಯಾನಿ ನ ಶೀತಲಾನಿ ಸರಸಂ ನೋ ಕೋಕಿಲಾಕೂಜಿತಂ
ಗೋಧುಗ್ವಂಶವತಂಸ ಜಾತು ಜಯತಿ ತ್ವದ್ವಾಗ್ವಿಲಾಸೋದಯೇ ॥ 23 ॥
ವೇದಾಶ್ಚನ್ದ್ರಮಸಂ ವದನ್ತಿ ಭವತಃ ಸ್ವಾನ್ತಂ ಕಥಂ ತದ್ವೃಥಾ-
ಕುರ್ವನ್ತ್ಯತ್ರ ವಿವಾದಮಾತ್ರಕುಶಲಾ ಗೋವಿನ್ದ ನನ್ದಾದಯಃ ।
ತಸ್ಯೈವಾಮೃತಪಂಕಿಲಾಸ್ತವ ಮುಖಾದಾವಿರ್ಭವನ್ತೋ ಬಹಿ-
ರ್ಧ್ವಾನ್ತಂ ಯತ್ತಿರಯನ್ತಿ ಹನ್ತ ಕಿರಣಾ ಮನ್ದಸ್ಮಿತವ್ಯಾಜತಃ ॥ 24 ॥
ಯನ್ನಾಮಸ್ಮರಣಾದಪಿ ಶ್ರವಣತಃ ಪ್ರಕ್ಷೀಣರಾಗಾಶಯಾ
ಯಾನ್ತಿ ತ್ವತ್ಪರಮಂ ಸದಾಶಿವಪದಂ ಯದ್ಯೋಗಿನಾಂ ದುರ್ಲಭಮ್ ।
ತಸ್ಯಾಪ್ಯಾನನಪಂಕಜೇ ತವ ಜಯತ್ಯುಚ್ಚೈಸ್ತರಾಂ ರಾಗಿತಾ
ಯೇನಾಭೀರಕುಲಪ್ರದೀಪ ತದಲಂ ತಾಮ್ಬೂಲಮಾಸ್ತಾಂ ಮುದೇ ॥ 25 ॥
ಪೀಯೂಷದ್ರವಸಾರಸಾರಘಮಧುದ್ರೋಣೀ ತ್ವದೀಯಾಧರಾ-
ಸ್ವಾದಾಯಾರ್ಕಸುತಾತಟೇ ಶ್ರಿತವತೀ ಸದ್ವಂಶಜಾತಾ ತಪಃ ।
ತತ್ಪುಣ್ಯೈರ್ಮುರಲೀಮಿಷೇಣ ರಸಿಕಾ ಮಾಧುರ್ಯಮುಚ್ಚೈಸ್ತರಾ-
ಮಾಸ್ಯೇನ್ದೋರನುಭೂಯ ಗೋಕುಲಪತೇ ಗೀತಾಮೃತಂ ಮುಂಚತಿ ॥ 26 ॥
ಸಾಫಲ್ಯಂ ಶ್ರುತಿಸಮ್ಪದಾಂ ತ್ರಿಜಗತಾಂ ಪ್ರಾಲೇಯಧಾರಾಪ್ರಪಾ
ಪೀಯೂಷದ್ರವಮಾಧುರೀ ಪರಿಭವಕ್ಲೇಶಾಮ್ಬುಧೇಃ ಶೋಷಣಮ್ ।
ಬ್ರಹ್ಮಾನನ್ದತಿರಸ್ಕೃತಿಃ ಕುಲವಧೂಧೈರ್ಯಾದ್ರಿವಜ್ರಾಹತಿಃ
ಕಂಸಧ್ವಂಸನ ಶಂಸ ಕಿಂ ನ ಭವತೋ ವಂಶೀನಿನಾದೋದಯಃ ॥ 27 ॥
ಧೈರ್ಯಂ ಧಿಕ್ಕುರುತೇ ತ್ರಪಾಂ ವಿಚಿನುತೇ ಕೌಲಂ ಯಶಃ ಪ್ರೋಂಛತಿ
ಪ್ರತ್ಯೇಕಂ ಗುರುವರ್ಗಗಂಜನಶತಂ ವಿಸ್ಮಾರಯತ್ಯಂಜಸಾ ।
ಸಾಧ್ವೀನಾಮ ನಿರಾಕರೋತಿ ಭವನಂ ಭರ್ತುರ್ವಿಧತ್ತೇ ವಿಷಂ
ಕಿಂ ಕಿಂ ನೋ ವಿದಧಾತಿ ಹನ್ತ ಸುದೃಶಾಂ ವಂಶೀನಿನಾದಸ್ತವ ॥ 28 ॥
ಲಾವಣ್ಯೈರಖಿಲೈಸ್ತ್ವದಾಸ್ಯಮುಕುರಂ ನಿರ್ಮಾಯ ಘಾತಾ ಚಿರಾ-
ನ್ಮುಷ್ಟಿಂ ಮಾರಕತಂ ವಿಧಾಯ ತದಧಃ ಕಂಠಸ್ಥಲವ್ಯಾಜತಃ ।
ಧ್ಯಾಯಂ ಧ್ಯಾಯಮಶೇಷವಸ್ತುಸುಷಮಾಧಾರಾಯ ರೇಖಾತ್ರಯಂ
ಬ್ರೂತೇ ನಾಸ್ತಿ ಬಭೂವ ನೋ ನ ಭವಿತಾ ಸೌನ್ದರ್ಯಮೇತಾದೃಶಮ್ ॥ 29 ॥
ಆಶಾನಾಗಕರಪ್ರಸಾರಿಮಹಸಾ ನಿಃಶೇಷವಾಮಭ್ರುವಾ-
ಮಾಶಾಭಿಸ್ತ್ರಿದಶೇಶನಿರ್ಭರಶುಭೈಃ ಕಂಸಾದಿನಾಶಶ್ರಿಯಾ ।
ಪ್ರೇಮ್ಣಾ ನನ್ದಯಶೋದಯೋಸ್ತನುಜುಷಾಂ ನಿಃಸೀಮಭಾಗ್ಯೈರ್ದೃಶಾಂ
ಸೌಭಾಗ್ಯೈರ್ವ್ರಜಸುಭ್ರುವಾಂ ವ್ರಜಪತೇ ಕಿಂ ತೇ ಭುಜೌ ನಿರ್ಮಿತೌ ॥ 30 ॥
ಕಂ ಯಸ್ಮಾದಲಮಭ್ಯುದೇತಿ ಭವತಃ ಸರ್ವಾಂಗಮೇತಾದೃಶಂ
ಸಾಮ್ಯಂ ವಾ ಭಜತಾಂ ಕಥಂ ಜಲರುಹೇ ಸರ್ವಜ್ಞಮಧ್ಯಸ್ಯತೋಃ ।
ಮತ್ತರ್ಕಃ ಪುನರತ್ರ ಗೋಕುಲಪತೇ ತ್ರೈಲೋಕ್ಯಲಕ್ಷ್ಮೀ ಯತ-
ಸ್ತ್ವತ್ಪಾಣ್ಯೋರಿತಿ ತೌ ವದನ್ತಿ ಕಮಲೇ ಸಾ ಯತ್ತದೇಕಾಲಯಾ ॥ 31 ॥
ಅಂಗುಲ್ಯಸ್ತವ ಹಸ್ತಯೋರ್ಮುರಹರ ಪ್ರಾಯೋ ರಸಾಲಾಂಕುರ-
ಶ್ರೇಣೀ ಯತ್ಪರಿತೋಽಂಗುಲೀಯಕಮಿಷಸ್ನಿಗ್ಧಾಲವಾಲಾವಲಿಃ
ಕಿಂ ವಾ ಪಂಚಶರಪ್ರಚಂಡತಪಸಾ ಪಂಚಾಶುಗಾಃ ಪಂಚತೋ-
ತ್ತೀರ್ಣಾಃ ಸತ್ಫಲಿನಃ ಪುನರ್ಭವರುಚಾ ಪುಷ್ಣನ್ತಿ ನೇತ್ರೋತ್ಸವಾನ್ ॥ 32 ॥
ಭಕ್ತಾನುಗ್ರಹಕಾತರೇಣ ಭವತಾ ಕೃತ್ವಾ ನೃಸಿಂಹಾಕೃತಿಂ
ರಾಗಾನ್ಧಸ್ಯ ಪುರಾ ಹಿರಣ್ಯಕಶಿಪೋರ್ವಕ್ಷಸ್ಥಲೀ ಪಾಟಿತಾ ।
ತೇನಾಭೂತ್ತವ ಪಾಣಿಪಂಕಜಯುಗೇ ರಾಗಃ ಸ ರಾಧಾಪತೇ
ಗೋಪೀನಾಂ ಕುಚಕುಂಕುಮೈರ್ದ್ವಿಗುಣಿತೋ ನಾದ್ಯಾಪಿ ವಿಶ್ರಾಮ್ಯತಿ ॥ 33 ॥
ಏತೌ ಪಂಚಶಿರಸ್ತ್ವಿಷಾ ದಶದಿಶಃ ಸಮ್ಭಾವಯನ್ತೌ ಭೃಶಂ
ದೈತ್ಯಪ್ರಾಣಸಮೀರಸಂಹತಿಯಮೌ ಶ್ಯಾಮೌ ಭುಜಂಗೋತ್ತಮೌ ।
ತನ್ಮೌಲಿದ್ಯುತಿಶಾಲಿನೀ ಪುನರಿಯಂ ರತ್ನಾವಲೀ ಜೃಮ್ಭತೇ
ಯಾಂ ಪ್ರಾಹುಸ್ತವ ಗೋಕುಲೇಶ ನಖರಶ್ರೇಣೀಂ ಕರಸ್ಥಾಂ ಜನಾಃ ॥ 34 ॥
ದೋರ್ದಂಡದ್ವಯಬನ್ಧನಾನಿ ವಿದಧುರ್ನನ್ದೋಪನನ್ದಾದಯ-
ಸ್ತದ್ಗ್ರನ್ಥಿತ್ರುಟಿಶಂಕಯಾತಿಚಕಿತಾ ಗೋವರ್ಧನೋದ್ಧಾರಣೇ ।
ತಾನ್ಯೇವಾಪ್ರತಿಮಪ್ರಭಾಣಿ ಹರಿತೋ ವಿದ್ಯೋತಯನ್ತ್ಯದ್ಭುತಂ
ವಿದ್ವಾಂಸಸ್ತವ ಕಂಕಣಾಂಗದತಯಾ ಗೋವಿನ್ದ ಯಜ್ಜಾನತೇ ॥ 35 ॥
ಶೃಂಗಾರದ್ರುಮಸಾರಕಂಡನವಶಾತ್ತ್ರೈಲೋಕ್ಯಸೀಮನ್ತಿನೀ-
ಕ್ರೀಡಾಮನ್ದಿರಮಂಡನಾಯ ವಿಧಿನಾ ಸ್ತಮ್ಭೌ ಪ್ರಲಮ್ಬೌ ಕೃತೌ ।
ತನ್ಮಧ್ಯೇ ಪುನರಿನ್ದ್ರನೀಲಮಣಿಭಿಃ ಸಮ್ಪಾದಿತಾ ವೇದಿಕಾ
ತೌ ಬಾಹೂ ಮಧುಜಿದ್ವದನ್ತಿ ಭವತೋ ವಕ್ಷಃಸ್ಥಲೀಂ ತಾಮಪಿ ॥ 36 ॥
ಯದ್ರಕ್ತಃ ಕಮಲಾಕರಂ ಕರತಲೇನಾಲಮ್ಬತೇ ಭಾಸ್ಕರ-
ಸ್ತ್ವಚ್ಚಕ್ಷುರ್ಮುಖಪಾಣಿಪಾದಕಮಲೇ ಜಾತಸ್ತತಃ ಶೋಣಿಮಾ ।
ತನ್ಮಿತ್ರಂ ಪುನರಾಕಲಯ್ಯ ಸ ಧೃತಃ ಕಂಠೇ ತ್ವಯಾ ಕೌಸ್ತುಭ-
ವ್ಯಾಜೇನೇತಿ ಮುಕುನ್ದ ಮಾದೃಶಿ ಜನೇ ತರ್ಕಃ ಸಮುಜ್ಜೃಮ್ಭತೇ ॥ 37 ॥
ಆಲೋಕ್ಯಾಖಿಲವೇದಶಾಸ್ತ್ರಜಲಧೇಸ್ತತ್ತ್ವಂ ಯದೇಕಾನ್ತತಃ
ಕೃತ್ವಾ ಸಂಕಲಿತಂ ಸ್ವಕೀಯನಿಲಯೇ ಕ್ಷೀರಾಬ್ಧಿಮಧ್ಯೇ ಧೃತಮ್ ।
ಸರ್ವಾರ್ಥಪ್ರತಿಭಾಸಕಂ ವ್ರಜಕುಲಾಲಂಕಾರ ತತ್ಕೌಸ್ತುಭ-
ವ್ಯಾಜಾದ್ವಿಸ್ಮೃತಿಶಂಕಯೇವ ಭವತಾ ಕಂಠೇ ಕೃತಂ ಸಾಮ್ಪ್ರತಮ್ ॥ 38 ॥
ಯಾತ್ವಾ ವಿಷ್ಣುಪದಂ ಸಮಾಶ್ರಿತವತೀ ನಕ್ಷತ್ರಮಾಲಾ ಸ್ಫುರ-
ದ್ದೀಪ್ತಿರ್ಯೋಗ್ಯಮಿದಂ ಕಥಂ ಮುರರಿಪೋ ನಕ್ತನ್ದಿನಂ ದ್ಯೋತತೇ ।
ಆಂ ಜ್ಞಾತಂ ದಯಿತಂ ತವಾನನವಿಧುಂ ಯಾನ್ತೀಮಿಮಾಂ ಯಾಮಿನೀ
ರೋಮಶ್ರೇಣಿಮಿಷಾತ್ತತೋ ಧೃತವತೀ ಜ್ಞಾತ್ವಾ ಸಪ್ತ್ನೀಮಿಯಮ್ ॥ 39 ॥
ಯಃ ಪಾಶೇನ ಯಶೋದಯಾ ನಿಯಮಿತೋ ಯೇನಾಪರಾಧಂ ವಿನಾ
ತಸ್ಮಿನ್ನಸ್ತಿ ವಲಿಸ್ತ್ರಿಧಾ ಮಯಿ ಪುರಃ ಸೋಽಯಂ ಬಲಿಧ್ವಂಸಿನಃ ।
ಏವಂ ಚಿನ್ತನತತ್ಪರಃ ಕೃಶತರಸ್ತ್ವನ್ಮಧ್ಯದೇಶೋ ಭೃಶಂ
ಯಾಶೋದೇಯ ಸ ಶೋಕಮುದ್ಗಿರತಿ ತೇ ರೋಮಾವಲಿವ್ಯಾಜತಃ ॥ 40 ॥
ಸೃಷ್ಟ್ಯಾದೌ ಪ್ರಕೃತಿರ್ಗುಣತ್ರಯಮಯೀ ಯಾ ಸ್ವೀಕೃತಾಽಽಸೀತ್ತ್ವಯಾ
ಸೇಯಂ ಸತ್ತ್ವಮಯೀ ಸುಖಾಯ ಜಗತಾಂ ಹಾರಾಕೃತಿಸ್ತೇ ಭುವಿ ।
ಗುಂಜಾದಾಮಮಿಷಾನ್ಮುಕುನ್ದ ದಧತೀ ರಾಗಾದ್ರಜೋವಿಗ್ರಹಂ
ನಾಭೀಸೀಮ್ನಿ ತಮೋಮಯೀ ಪುನರಿಯಂ ರೋಮಾವಲೀ ರಾಜತೇ ॥ 41 ॥
ಸೌನ್ದರ್ಯಾಮೃತವಾರಿಧೌ ಸ್ಮರಮಹಾಯಾದಃಸಮಾರಮ್ಭತಃ
ಸಮ್ಭೂತಾ ಭ್ರಮಿರಮ್ಭಸಾಂ ಸುಲಲಿತಾ ಜಾತಾಸ್ತತೋ ವೀಚಯಃ ।
ತಾಂ ಜಾನೇ ಸ್ಫುರದಿನ್ದ್ರನೀಲಘಟಿತಶ್ರೀಸಮ್ಪುಟಾರ್ಧದ್ಯುತಿಂ
ತ್ವನ್ನಾಭೀಮಪಿ ತಾಂ ವಲಿತ್ರಯಮಿತಿ ಶ್ಯಾಮಾಭಿರಾಮಾಕೃತೇ ॥ 42 ॥
ನೀಲಾಮ್ಭೋರುಹವಲ್ಲಿರುಲ್ಲಸತಿ ತೇ ನಾಭೀಸರಸ್ಯಾಂ ಧ್ರುವಂ
ಯಚ್ಛ್ರೀವತ್ಸಮಿಷಾದ್ಬಿಭರ್ತಿ ಕುಸುಮಂ ನಾಲಂ ಚ ರೋಮಾವಲೀ ।
ಯಂ ವಾ ವಕ್ಷಸಿ ಕೌಸ್ತುಭಂ ಬುಧಜನಾ ಜಾನನ್ತಿ ನನ್ದಾತ್ಮಜ
ಪ್ರಾಯಃ ಸೋಽಪ್ಯನುರಾಗ ಏವ ಭವಿತಾ ತ್ರೈಲೋಕ್ಯವಾಮಭ್ರುವಾಮ್ ॥ 43 ॥
ನೀರೂಪೋಽಪಿ ಘನದ್ಯುತಿರ್ಮುನಿಮನೋಮಾತ್ರೈಕಪಾತ್ರೀಕೃತೋ-
ಽಪ್ಯಾಭೀರೀಗಣಸಂಗತಃ ಸುಖಘನೋಽಪ್ಯಾನನ್ದಿತೋ ಬನ್ಧವೈಃ ।
ಜ್ಞಾನಾತ್ಮಾಪ್ಯತಿಮುಗ್ಧತಾಮುಪಗತೋ ವಾಮಭ್ರುವಾಂ ವಿಭ್ರಮೈ-
ರಿತ್ಥಂ ತೇ ತ್ರಿವಲೀಮಿಷಾನ್ಮುರಹರ ತ್ರಯ್ಯಸ್ತಿ ಚಿತ್ರಾರ್ಪಿತಾ ॥ 44 ॥
ದೇವ್ಯಃ ಪಲ್ಲವಸಮ್ಪದಾ ವಿದಧತೇ ಸೌಭಾಗ್ಯಲಕ್ಷ್ಮೀಂ ಶ್ರುತೌ
ಸ್ವಚ್ಛನ್ದಂ ಸುಮನಃಫಲಾನಿ ವಿಬುಧಾ ವಿನ್ದನ್ತಿ ತೇ ಸೇವಯಾ ।
ವೇದೇನಾಪಿ ನಿಗದ್ಯತೇ ಮುರಹರ ತ್ವಂ ಭಕ್ತಕಲ್ಪದ್ರುಮಃ
ಪ್ರಾಯಃ ಕಲ್ಪಲತಾ ತತಃ ಶ್ರಿತವತೀ ತ್ವಾಂ ವೈಜಯನ್ತೀಛಲಾತ್ ॥ 45 ॥
ವಿಶ್ವಾನನ್ದಕದಮ್ಬಸಮ್ಪದಮತಿಸ್ನಿಗ್ಧಂ ತಮಾಲದ್ಯುತಿಂ
ದೃಷ್ಟ್ವಾ ನಿರ್ಭರವಿಭ್ರಮಂ ಘನ ಇತಿ ತ್ವಾಂ ಸಂಗತಾ ವಿದ್ಯುತಃ ।
ತ್ವದ್ರೂಪಾಮೃತಸಿನ್ಧುಸಂಗಮವಶಾತ್ಪ್ರಾಪ್ಯಾಮ್ಬರಪ್ರಚ್ಯವಂ
ಚಾಂಚಲ್ಯಾತ್ಕಿಮು ನನ್ದನನ್ದನ ಭವತ್ಪೀತಾಮ್ಬರತ್ವಂ ದಧುಃ ॥ 46 ॥
ಕಾಂಚೀ ತೇ ಧೃತಯೋಗಸಮ್ಪದಭಿತೋ ಜಾತಾ ವಿಶಾಲಾಕೃತಿ-
ರ್ಯಾವನ್ತೀ ಮಧುರಾ ಧ್ವನಿಂ ವಿದಧತೀ ಪಶ್ಚಾದಯೋಧ್ಯಾಭವತ್ ।
ಮಾಯಾದ್ವಾರವತೀ ಶಿವಾಧಿವಸತಿಃ ಸಾ ಕಾಶಿಕಾ ದೃಶ್ಯತೇ
ತಚ್ಚಿತ್ರಂ ನ ವದಾಮಿ ಮಾಧವ ಯತಸ್ತ್ವಾಂ ಸಾ ಸದಾ ಸಂಶ್ರಿತಾ ॥ 47 ॥
ಜಾನೀಮಃ ಸಹಜಾಂ ತ್ವದಂಗಮಿಲಿತಾಮಾಲೋಕ್ಯ ಪದ್ಮಾಲಯಾಂ
ತತ್ಸಂಗಸ್ಥಿತಿಭಂಗಕಾತರತಮೌ ಕಲ್ಪದ್ರುಮೈರಾವತೌ ।
ಆದ್ಯಃ ಪಲ್ಲವಸಮ್ಪದಂ ಕರಪದೇ ಬಿಮ್ಬಾಧರೇ ಚಾಪರಃ
ಶುಂಡಾದಂಡಗುಣಂ ತವೋರುಯುಗಲೇ ಯೇನಾದಧೇ ಮಾಧವ ॥ 48 ॥
ರಮ್ಭಾಸ್ತಮ್ಭಯುಗಂ ನ ತದ್ಯದುಪರಿ ಸ್ಥೂಲಂ ತಥೋರುದ್ವಯಂ
ತೂಣೀರೌ ಮಕರಧ್ವಜಸ್ಯ ಸುಮನೋಮೋದೇನ ವಿದ್ಮೋ ವಯಮ್ ।
ಹಾ ಕಷ್ಟಂ ಮಧುಕೈಟಭೌ ಸ್ಫುಟಮದೌ ಕಿಂ ಕೈಟಭಾರೇ ಹಠಾ-
ನ್ನಿಷ್ಪಿಷ್ಟೌ ಶತಕೋಟಿಕೋಟಿಕಠಿನೌ ತಸ್ಮಿನ್ಸ್ಥಲೇ ಕೋಮಲೇ ॥ 49 ॥
ಸ್ತಮ್ಭದ್ವೈತಮಿದಂ ಪಯೋನಿಧಿಸುತಾಗೇಹಸ್ಯ ಮನ್ದಾಕಿನೀ-
ಸ್ಯನ್ದಾಮನ್ದಮರನ್ದಿತಾಂಘ್ರಿಕಮಲದ್ವನ್ದ್ವಸ್ಯ ನಾಲಾಯುಗಮ್ ।
ತ್ವಜ್ಜಂಘಾಯುಗಲಂ ವಿಮುಕ್ತಿಕಲಶೀನಿರ್ಮಾಣದಂಡದ್ವಯಂ
ಸಮ್ಪತ್ತಿದ್ವಿಪಸಂಘಯನ್ತ್ರಣವಿಧಾವಾಲಾನಯುಗ್ಮಂ ಭಜೇ ॥ 50 ॥
ವಿದ್ವಾನ್ ಸೋಽಪಿ ಕಥಂ ಕಠೋರಕಮಠೀಪೃಷ್ಠೇನ ತುಲ್ಯಂ ವದ-
ನ್ನೀದೃಕ್ಪಾದಯುಗಂ ಕಥಂ ನು ಕಮಲಾವಕ್ಷೋಜಶೈಲೇ ದಧತ್ ।
ಧಿಙ್ಮನ್ದಾಂ ವಸುಧಾಮಿದಂ ಮಧುರಿಪೋ ಗೋಚಾರಣೇ ಸಂಚರತ್-
ಪಾಷಾಣಾಂಕುರಕಂಟಕಾದಿಷು ಹಠಾದ್ದೃಷ್ಟ್ವಾ ವಿದೀರ್ಣಾ ನ ಯತ್ ॥ 51 ॥
ಯದ್ರತ್ನೌಘಮರೀಚಯೋಽಪಿ ಸಮತಾವ್ಯಾವರ್ತನಂ ವಿಶ್ವತಃ
ಕೃತ್ವಾ ದಿಗ್ವಲಯಂ ಭ್ರಮನ್ತಿ ಮಹಿತಾ ನಾದೈರ್ಮಧುಸ್ಯನ್ದಿಭಿಃ ।
ಯಚ್ಚ ಬ್ರಹ್ಮಶಿವೇನ್ದ್ರವನ್ದಿತಪದದ್ವನ್ದ್ವೋಪರಿ ದ್ಯೋತತೇ
ತತ್ಕೃಷ್ಣಸ್ಯ ಪದಾಂಗದದ್ವಯಮತಃ ಕಿಂ ವರ್ಣ್ಯತಾಂ ಮಾದೃಶೈಃ ॥ 52 ॥
ಶೇತೇ ಯತ್ಕಮಲಾಲಯಾ ತವ ಪದಾಮ್ಭೋಜದ್ವಯೇ ಸಂಗತಾ
ಧಾತಾ ತತ್ರ ತನೂಪಧಾನ್ಯುಗಲಂ ಗುಲ್ಫಚ್ಛಲಾನ್ನಿರ್ಮಮೇ ।
ಕಿಂ ವಾ ಮನ್ಮಥಕಾರುಣಾ ವಿರಚಿತೇ ತಸ್ಯಾ ಮುದೇ ಕನ್ದುಕೇ
ಸಾ ಯತ್ಕ್ರೀಡತಿ ಪಾಣಿಪಂಕಜತಲೇ ಕೃತ್ವಾ ಸಖೀಭಿಃ ಸಹ ॥ 53 ॥
ಯಾ ರಕ್ತಾ ದಶಲೋಕಪಾಲಮುಕುಟಪ್ರಾನ್ತತ್ವಿಷಃ ಸನ್ತತಂ
ಕಲ್ಪಕ್ಷ್ಮಾರುಹಪುಷ್ಪಸಮ್ಭೃತರುಚಸ್ತ್ವತ್ಪಾದಮೂಲೇ ಬಭುಃ ।
ತಾ ದೀವ್ಯನ್ನಖರಾಂಚಿತಾಂಗುಲಿತಯಾ ಜಾನನ್ತಿ ಸತ್ಯಂ ಜನಾಃ
ಸ್ವಸ್ಮಿನ್ನೇವ ಸದಾಧರೇಣ ದಧತೇ ಲೇಖಾ ಯದೂರ್ಧ್ವಶ್ರಿಯಮ್ ॥ 54 ॥
ಪೀಯುಷದ್ಯುತಿಬಿಮ್ಬಮಮ್ಬರತಲೇ ವಿದ್ಯೋತಮಾನಂ ಪುರಃ
ಪ್ರೇಕ್ಷ್ಯೋತ್ಫುಲ್ಲದೃಶಾ ತ್ವಯಾ ಮುಹುರಿದಂ ದೇಹೀತಿ ಯದ್ಭಾಷಿತಮ್ ।
ತನ್ಮನ್ಯೇ ತವ ಪಂಕಜೇಕ್ಷಣ ಮಹಚ್ಚಿತ್ರಂ ಯಶೋದಾರ್ಥನಂ
ಯತ್ತ್ವತ್ಪಾದಸರೋಜಯೋರ್ನಖಮಣಿವ್ಯಾಜೇನ ಶೀತಾಂಶವಃ ॥ 55 ॥
ಸತ್ಯಂ ಯದ್ವಿಬುಧಾ ವದನ್ತಿ ಪದಯೋರ್ದ್ವನ್ದ್ವಂ ತವಾಮ್ಭೋರುಹೇ
ಗೋಧೂಲಿಚ್ಛಲತಃ ಸ್ಥಿತಾನಿ ಪರಿತೋ ಹಂಸಾಲಿಚೇತಾಂಸ್ಯಲಮ್ ।
ಪೀತ್ವೈತನ್ಮಕರನ್ದಬಿನ್ದುಮಸಕೃದ್ವೃನ್ದಾವನೀಭೂಪತೇ
ಮಂಜೀರದ್ವಯಮಂಜುಶಿಂಜಿತಮಿಷಾದಂಚನ್ತಿ ಯತ್ಪಂಚಮಮ್ ॥ 56 ॥
ಆಕೃಪ್ಯಾಖಿಲವಸ್ತುತಃ ಪ್ರಥಮತೋ ರಾಗಂ ಮುನೀನ್ದ್ರೈಸ್ತತಃ
ಕೃತ್ವಾ ಮಾನಸಪಂಕಜೇ ತವ ಪದದ್ವನ್ದ್ವಂ ಸ ತಸ್ಮಿನ್ಧೃತೈಃ ।
ಯೇನಾಸ್ಮಿನ್ನರವಿನ್ದಲೋಚನ ಪುನಸ್ತತ್ಕೇಸರಾಣಾಂ ದ್ಯುತಿ-
ಸ್ತೋಮೇನಾಪಿ ಸಮಂಚಿತಃ ಸಮುದಯತ್ಯುಚ್ಚೈಸ್ತರಾಂ ಶೋಣಿಮಾ ॥ 57 ॥
ಹಂಸಾಸ್ತ್ವಾಮುಪನೀಯ ಮಾನಸಸರೋಜನ್ಮಪ್ರದೇಶೇಽನಿಶಂ
ಕ್ರೀಡನ್ತಃ ಕಮಲಾಲಯೇನ ಭವತಾ ಸಾರ್ಧಂ ಪ್ರಮೋದಂ ದಧುಃ ।
ಸ ತ್ವಂ ಲೋಚನಲೋಹಿತಾಧರಪದದ್ಯೋತಃ ಶ್ರಿತೋ ಹಂಸತಾಂ var ಲೋಹಿತಲೋಚನಾ
ತತ್ಸಮ್ಪರ್ಕವಶಾದಿತಿ ವ್ರಜಕುಲಾಲಂಕಾರ ಶಂಕಾಮಹೇ ॥ 58 ॥
ಕ್ಷುದ್ರಾತ್ಮಾ ನಿತರಾಂ ಕಿಮುನ್ನತತರಃ ಕಾಠಿನ್ಯವಾನ್ನಿರ್ಭಯಂ
ಕಿಂ ಯಾ ಕೇವಲಕೋಮಲಃ ಶ್ರಯತಿ ಚೇತ್ಕಿಂಚಿನ್ಮದೀಯಂ ಪದಮ್ ।
ಧನ್ಯಃ ಸೋಽಯಮಿತೀವ ಲೋಕಮಖಿಲಂ ಸಮ್ಬೋಧಯನ್ಮಾಧವ
ತ್ವಂ ಧತ್ಸೇ ಪದಯೋರ್ಯವಂ ಧ್ವಜವರಂ ದಮ್ಭೋಲಿಮಮ್ಭೋರುಹಮ್ ॥ 59 ॥
ತ್ವಾಂ ನಿತ್ಯಂ ಸಮುಪಾಸ್ಯ ದಾಸ್ಯವಿಧಯಾ ಸ್ಥಾಸ್ಯಾಮ ಇತ್ಯಾಶಯಾ
ಬ್ರಹ್ಮೇನ್ದ್ರಾದ್ಯಮರೈಸ್ತ್ವದೀಯಪದಯೋಃ ಸ್ವೀಯಾ ಧೃತಾಃ ಸಮ್ಪದಃ ।
ತಾಸಾಮಂಕುಶನೀರಜಾಶನಿಲಸಚ್ಛತ್ರಧ್ವಜಾದ್ಯಾಕೃತಿಂ
ಬಿಭ್ರಾಣಾ ವಿಜಯಶ್ರಿಯಂ ತ್ರಿಜಗತಾಂ ವನ್ದ್ಯಾರವಿನ್ದಾಲಯಾ ॥ 60 ॥
ತ್ವತ್ಪಾದಾಮ್ಬುಜಸಂಗಮಾತ್ತ್ರಿಜಗತಾಂ ವನ್ದ್ಯಾರವಿನ್ದಾಲಯಾ
ಸ್ಥಾನೇ ಸ್ಥಾನಗುಣಾದ್ಭವನ್ತಿ ಹಿ ಜನಾಃ ಪ್ರಾಯಃ ಪದಂ ಸಮ್ಪದಾಮ್ ।
ಕಿಂ ತ್ವೇಕಂ ಶತಪತ್ರಲೋಚನ ಮಹಚ್ಚಿತ್ರಂ ಯದಸ್ಮಾದಧಃ
ಪಾತಾ ಪುಣ್ಯತಮಾ ವಿಮುಕ್ತಿನಗರೀನಿಃಶ್ರೇಣಿಕಾ ಸ್ವರ್ಧುನೀ ॥ 61 ॥
ಯತ್ಪಾದಾಮ್ಬು ವಿಧಾಯ ಮೂರ್ಧನಿ ಚಿತಾವಾಸಃ ಶಿವತ್ವಂ ಹಠಾ-
ತ್ಪ್ರಾಪ್ತೋ ಭಕ್ಷಿತಕಾಲಕೂಟನಿಕರೋ ಮೃತ್ಯುಜಯತ್ವಂ ಯಯೌ ।
ದಿಗ್ವಾಸಾ ನೃಕಪಾಲಮಾತ್ರವಿಭವಶ್ಚಾವಿನ್ದದೀಶಾನತಾಂ
ಸ ತ್ವಂ ನನ್ದಸಿ ಯಸ್ಯ ಮನ್ದಿರಗತೋ ನನ್ದಾಯ ತಸ್ಮೈ ನಮಃ ॥ 62 ॥
ಧೂಲೀಧೂಸರಿತಂ ಮುಖಂ ತವ ಶರತ್ಪೂರ್ಣೇನ್ದುನಿನ್ದಾವಹಂ
ವ್ಯಾಲೋಲಾಲಕಕುಂಡಲದ್ಯುತಿ ಚಲನ್ನೇತ್ರಶ್ರಿಯಾ ಪ್ರೋಲ್ಲಸತ್ ।
ಯಾಲೋಕ್ಯಾರ್ದ್ರವಿಲೋಚನಾ ಸ್ಮಿತಮುಖೀ ಪ್ರಸ್ಯನ್ದಮಾನಸ್ತನೀ
ಪಾಣಿಭ್ಯಾಮವಲಮ್ಬ್ಯ ಚುಮ್ಬಿತವತೀ ತಾಂ ನನ್ದಜಾಯಾಂ ಭಜೇ ॥ 63 ॥
ಪೀತ್ವಾ ಸ್ತನ್ಯವಿಷಂ ಸಹಾಸುಪವನೈಃ ಸಮ್ಪಾತಿತೇ ಪೂತನಾ-
ದೇಹೇ ವೈ ಭವತಾ ಜನಾರ್ದನ ತೃಣಾವರ್ತೇ ಚ ನೀತೇ ಕ್ಷಯಮ್ ।
ರಾಹೂನ್ಮುಕ್ತಸುಧಾಮಯೂಖಸುಷಮಾ ಯಾದೃಕ್ಚಕೋರಾಲಿಭಿ-
ರ್ಯಾಭಿಸ್ತ್ವದ್ವದನದ್ಯುತಿಶ್ಚುಲುಕಿತಾ ತಾ ಗೋಪಕನ್ಯಾಃ ಸ್ತುಮಃ ॥ 64 ॥
ಯದ್ಬನ್ಧಸ್ಯ ವಿಧಿತ್ಸಯಾಪಿ ವಿವಶಃ ಕೀನಾಶಪಾಶೈರ್ದೃಢಂ
ಬದ್ಧಃ ಸಾನುಗಪುತ್ರಬಾನ್ಧವಜನೋ ದುರ್ಯೋಧನೋಽನ್ತಂ ಗತಃ ।
ತಂ ತ್ವಾಂ ಯೇನ ನಿಬಧ್ಯ ನನ್ದದಯಿತಾ ವೃನ್ದಾರಕೈರ್ವನ್ದಿತಾ
ಜಾತಾಽಽನನ್ದಮಯೀ ಮುಕುನ್ದ ಮಹತೇ ಭಾವಾಯ ತಸ್ಮೈ ನಮಃ ॥ 65 ॥
ನಿರ್ಭಿನ್ನೇ ಯಮಲಾರ್ಜುನೇಽತಿಚಕಿತಾಸ್ತೂರ್ಣಂ ಗೃಹಾನ್ನಿರ್ಗತಾಃ
ಪೀತ್ವಾ ದೃಕ್ಚಷಕೈಸ್ತ್ವದಕ್ಷತತನೂರೂಪಾಮೃತಂ ನಿರ್ವೃತಾಃ ।
ತ್ವಾಮಾದಾಯ ವಿಧಾಯ ನೇತ್ರಸಲಿಲೈಃ ಸಿಕ್ತಂ ತ್ವರಾಮಾಶ್ರಿತಾ
ಯೇ ವೃನ್ದಾವನಮಾಗತಾಃ ಕೃತಧಿಯಸ್ತಾನ್ಗೋಪವೃದ್ಧಾನ್ಸ್ತುಮಃ ॥ 66 ॥
ಕೃತ್ವಾ ಕಾಲಿಯದನ್ದಶೂಕದಮನಂ ತ್ವಯ್ಯಾಸ್ಥಿತೇ ತಾಂಡವಂ
ತಸ್ಯೋತ್ತಬ್ಧಸಮಸ್ತಮಸ್ತಕಮಣಿಸ್ತೋಮೇ ಸಮುತ್ತಸ್ಥುಷಿ ।
ಯೇನಾಲಮ್ಭಿ ವಿಭಾತಭಾಸ್ಕರಸುರಪ್ರಾಗ್ಭಾರಶೋಭಾಸ್ಫುರ-
ದ್ರತ್ನಾಮ್ಭೋಜಯುಗದ್ಯುತಿಃ ಪ್ರತಿಪದಂ ತತ್ತೇಽಂಘ್ರಿಯುಗ್ಮಂ ಭಜೇ ॥ 67 ॥
ಉತ್ಫುಲ್ಲೈಃ ಪರಿಪೀಯ ಕರ್ಣಪುಟಕೈರ್ವಂಶೀನಿನಾದಾಮೃತಂ
ತಚ್ಚ ಘ್ರಾಣಮುದಸ್ಯ ದತ್ತಕವಲಂ ಪ್ರೋದ್ಭಿನ್ನರೋಮಾಂಕುರಮ್ ।
ನಿಃಸ್ಪನ್ದೈರ್ನಯನೈರಮನ್ದಮಧುರೈಃ ಶ್ಯಾಮಂ ಮಹಸ್ತಾವಕಂ
ಯೇನೋದ್ವೀಕ್ಷಿತಮಮ್ಬುಜೇಕ್ಷಣ ಭಜೇ ತದ್ಗೋಕದಮ್ಬಂ ತವ ॥ 68 ॥
ಜಮ್ಮಾರೇಃ ಸ್ಫುರದಾಯುಧಸ್ಯ ಭವತಾ ದಮ್ಭಾದ್ರಿವಿದ್ರಾವಣಂ
ಕೃತ್ವಾ ವಾಮಭುಜೇನ ಸಪ್ತದಿವಸಾನ್ಯೋಽಸೌ ಧೃತಃ ಪರ್ವತಃ ।
ಸೋಽಸ್ತು ಸ್ನಿಗ್ಧತಮಾಲಸಾರಘಟಿತಸ್ತಮ್ಭೈಕಸಮ್ಭಾವಿತ-
ಪ್ರಾಸಾದದ್ಯುತಿನಿನ್ದಕಃ ಪ್ರತಿಪದಂ ಭವ್ಯಾಯ ಗೋವರ್ಧನಃ ॥ 69 ॥
ತ್ವದ್ಬಾಹೂದ್ಧೃತಪರ್ವತಾರ್ಪಿತದೃಶಃ ಪ್ರೇಕ್ಷ್ಯ ಪ್ರಿಯಾಯಾಃ ಸ್ಖಲ-
ದ್ವಾಸಃಪೀನಪಯೋಧರಕ್ಷಿತಿಧರೌ ದೋಃಸ್ತಮ್ಭಕಮ್ಪೇ ತವ ।
ಶೈಲೇ ಚಂಚಲತಾಂ ಗತೇ ವ್ರಜಪತೇ ತ್ರಾಸಾಕುಲೇ ಗೋಕುಲೇ
ನನ್ದೇ ಮನ್ದಮುಖದ್ಯುತೌ ಜಯತಿ ತೇ ಮನ್ದಾಕ್ಷಮನ್ದೇಕ್ಷಣಮ್ ॥ 70 ॥
ಪೌಗಂಡಂ ಮದಖಂಡನಂ ಬಲಭಿದಃ ಕಿಂ ತೇ ಹರೇ ಸ್ತೂಯತೇ
ಕೌಮಾರಂ ಚರಿತಂ ಯತೋ ವಿಜಯತೇ ವ್ಯಾಮೋಹನಂ ಬ್ರಹ್ಮಣಃ ।
ಕಿಂ ಸ್ತವ್ಯಂ ತವ ಯೌವನಂ ತ್ರಿಪುರಜಿದ್ಯದ್ಬಾಣಯುದ್ಧೇ ಜಿತಃ
ಸಮ್ಮೋಹಂ ಗಮಿತಾಸ್ತ್ವಯಾ ಯದಬಲಾ ಭಾವೇಽಪಿ ನೇತ್ರಶ್ರಿಯಾ ॥ 71 ॥
ಪೀತೇ ದಾವಹುತಾಶನೇ ನಿಜಜನತ್ರಾಣೈಕಹೇತೋಸ್ತ್ವಯಾ
ನಿಃಸ್ಪನ್ದಂ ಪಶುಪೌಘಪಕ್ಷಿಪಶುಭಿಃ ಪೇಪೀಯಮಾನೇ ತ್ವಯಿ ।
ಪ್ರೇಮಾರ್ದ್ರಾಣ್ಯತಿನಿರ್ಮಲಾನಿ ದಿವಿಷಚ್ಚಿತ್ತಾನಿ ಸತ್ಯಂ ಮುಹು-
ಸ್ತ್ವದ್ಗಾತ್ರೇ ನು ವಿತೀರ್ಯಮಾಣಕುಸುಮವ್ಯಾಜೇನ ಭಾನ್ತಿ ಪ್ರಭೋ ॥ 72 ॥
ಕಂಕೇಲ್ಲಿಸ್ತಬಕಂ ಮುಹುಃ ಕಮಲಿನೀಕಾನ್ತಂ ಪ್ರತೀಚೀಗತಂ
ಪರ್ಯಾಲೋಚ್ಯ ವಿಲೋಕ್ಯ ಧೂಮಪಟಲಂ ಗೋಧೂಲಿಬುದ್ಧ್ಯಾಕುಲಾಃ ।
ಉಚ್ಚೈಃ ಕೋಕಿಲಕೂಜಿತಂ ಚ ಮುರಲೀನಾದಂ ವಿದಿತ್ವಾ ಗೃಹಾ-
ತ್ತ್ವಾಂ ಯಾ ವೀಕ್ಷಿತುಮಾಗತಾಃ ಪಥಿ ಗವಾಂ ಗೋಪಾಂಗನಾಸ್ತಾಃ ಸ್ತುಮಃ ॥ 73 ॥
ಸಾಯಾಹ್ನೇ ಸಮುದಂಚತಿ ಶ್ರುತಿಪಥಂ ವಂಶೀನಿನಾದೇ ಹಠಾ-
ನ್ನೇಪಥ್ಯಸ್ಯ ಸಮಾಪನೇನ ಶಪಥೈರಾಲೀಜನೈಃ ಪ್ರಾರ್ಥಿತೇ ।
ಪಾಣಿಭ್ಯಾಮವಲಮ್ಬ್ಯ ನೀವಿರಶನಾ ನಿರ್ಗಮ್ಯ ತೂರ್ಣಂ ಬಹಿ-
ರ್ದೃಗ್ಭ್ಯಾಂ ತೇ ಮುಖಸೌರಭಂ ಚುಲುಕಿತಂ ಯಾಭಿರ್ಭಜೇ ತಾ ಜನೀಃ ॥ 74 ॥
ಯತ್ರಾಘಾಸುರಕೇಶಿಧೇನುಕಬಕಾರಿಷ್ಟಪ್ರಲಮ್ಬಾದಯಃ
ಕ್ರೋಧಾಗ್ನೌ ಭವತಾ ಹುತಾ ದಿತಿಸುತಾಃ ಸನ್ತರ್ಪಿತಾ ದೇವತಾಃ ।
ಯಸ್ಮಿಂಸ್ತೇ ಪದಪಂಕಜದ್ವಯರಜಃ ಪದ್ಮೋದ್ಭವಪ್ರಾರ್ಥಿತಂ
ಭೇಜುರ್ಗೋಮೃಗಪಕ್ಷಿಭೂರುಹಲತಾ ವೃನ್ದಾವನಂ ತದ್ಭಜೇ ॥ 75 ॥
ದೇವೇನ್ದ್ರಸ್ಯ ಪರಾಭವಂ ಕಿಮಪರಂ ವ್ಯಾಮೋಹನಂ ಬ್ರಹ್ಮಣಃ
ಸಮ್ಪಶ್ಯನ್ನಪಿ ವೈಭವಂ ವ್ರಜಕುಲೋತ್ತಂಸ ಪ್ರಚೇತಾಸ್ತವ ।
ನನ್ದಂ ಯತ್ಪಿತರಂ ಜಹಾರ ಭವತಃ ಸ್ಥಾನೇ ಜಲಾತ್ಮನ್ಯದಃ
ಸ್ಥಾನೇ ತಾದೃಶಿ ತೇ ಬಭೂವ ನ ಮನಾಕ್ಕ್ರೋಧಸ್ಯ ಲೇಶೋಽಪಿ ತತ್ ॥ 76 ॥
ಮಂಜೀರದ್ವಯಕಂಕಣಾವಲಿಲಸತ್ಕಾಂಚೀಘಟಾಶಿಂಜಿತೇ
ವೀಣಾವೇಣುಮೃದಂಗಝರ್ಝರಕರೋತ್ತಾಲೇ ದಿಶಶ್ಚುಮ್ಬತಿ ।
ಕಾಮಂ ಪೂರ್ಣಕಲಾನಿಧೌ ವಿಲಸತಿ ಭ್ರಶ್ಯತ್ಪಟೇ ಸ್ವರ್ವಧೂ-
ವೃನ್ದೇ ವರ್ಷತಿ ದೈವತೇ ಸುಮನಸೋ ರಾಸಸ್ತವಾಸ್ತಾಂ ಮುದೇ ॥ 77 ॥
ನೃತ್ಯದ್ಭ್ರೂನಯನೋತ್ಪಲಸ್ಮಿತಮುಖಸ್ವಿದ್ಯತ್ಕಪೋಲಸ್ಥಲಂ
ಲೀಲಾಚಂಚಲಕುಂಡಲಂ ಭುಜಲತಾನ್ದೋಲಕ್ವಣತ್ಕಂಕಣಮ್ ।
ತ್ರುಟ್ಯತ್ಕಂಚುಕಬನ್ಧಮುನ್ನತಕುಚಂ ತಿರ್ಯಕ್ತ್ರಿಕಂ ಪ್ರಸ್ಖಲ-
ನ್ನೀವಿ ವ್ಯಂಜಿತಶಿಂಜಿತಂ ಜಯತಿ ತೇ ರಾಸಃ ಪ್ರಿಯಾಭಿಃ ಸಹ ॥ 78 ॥
ಆಕುಂಚದ್ವದನಂ ಕ್ವಚಿದ್ವಿಲಸಿತಾಮ್ಭೋಜಾಸ್ಯಶೋಮಂ ಕ್ವಚಿ-
ನ್ಮನ್ದಸ್ಯನ್ದಿವಿಲೋಚಲಂ ಕ್ವಚಿದಲಂ ದೃಕ್ಚಾಪಲಂ ಕುತ್ರಚಿತ್ ।
ಕ್ವಾಪ್ಯುದ್ದಾಮಮದಾನ್ಧಸಿನ್ಧುರಗತಂ ಕುತ್ರಾಪಿ ವಿದುಲ್ಲತಾ-
ಚಾಂಚಲ್ಯಂ ಸ್ಮರವರ್ಧನಂ ವಿಜಯತೇ ಲಾಸ್ಯಂ ಪ್ರಿಯಾಣಾಂ ತವ ॥ 79 ॥
ಅಧ್ಯಾಸ್ಯೋರುತಲಂ ವಪುಃ ಪುಲಕಿತಂ ಸ್ವಿದ್ಯತ್ಕಪೋಲಸ್ಥಲೀಂ
ದೋರ್ವಲ್ಲೀಮಪಿ ತಾವಕಾಂಸಮಿಲಿತಾಂ ಕಮ್ಪಾಕುಲಾಂ ಬಿಭ್ರತಿ ।
ಪ್ರೋದ್ಯತ್ಪೂರ್ಣಕಲಾನಿಧಾವರುಚಿರೇ ಸ್ಮೇರೇ ಮುಹುಃಸೀತ್ಕೃತೇ
ರಾಧಾ ಧನ್ಯತಮಾ ದಧಾರ ವದನೇ ತಾಮ್ಬೂಲಕಲ್ಕಂ ತವ ॥ 80 ॥
ಯಸ್ಯಾಂ ತುಂಗತರಂಗಸಂಗಮವಶಾದ್ಭೀತಾ ಭುಜಂಗಭ್ರಮಾ-
ದಾಲಿಂಗತಿ ವರಾಂಗನಾಸ್ತವ ಜಲಕ್ರೀಡಾಜುಶೋಽಂಗಂ ಹಠಾತ್ ।
ಸಾ ನಿತ್ಯಂ ದಲಿತೇನ್ದ್ರನೀಲನಿಕರಶ್ರೀತಸ್ಕರಾ ಭಾಸ್ಕರ-
ಸ್ಯಾಪತ್ಯಂ ತಟಿನೀ ಶಿವಂ ದಿಶತು ಮೇ ಗೋಪಾಲಭೂಪಾಲಜ ॥ 81 ॥
ಉತ್ಫುಲ್ಲಾಮ್ಬುಜಮಾಕಲಯ್ಯ ದಯಿತಾಸ್ಮೇರಾನನಂ ವಿಭ್ರಮ-
ದ್ಭೃಂಗಶ್ರೇಣಿಮನಂಗಭಂಗುರದೃಶಸ್ತಸ್ಯಾಃ ಕಟಾಕ್ಷಚ್ಛಟಾಮ್ ।
ಶೈವಾಲಂ ಪರಿಗೃಹ್ಯ ಕುನ್ತಲಧಿಯಾ ದ್ರಾಕ್ಚುಮ್ಬನಾಯೋದ್ಯತ-
ಸ್ತ್ವಂ ಯಸ್ಯಾಂ ಹಸಿತಃ ಪ್ರಿಯಾಭಿರಭಿತಸ್ತಾಂ ಭಾನುಕನ್ಯಾಂ ಭಜೇ ॥ 82 ॥
ಪುಷ್ಪಂ ತ್ವಯ್ಯವಚಿನ್ವತಿ ಪ್ರಿಯತಮಾವೃನ್ದೇನ ಸಾರ್ಧಂ ಮುದಾ
ವೃನ್ದಾರಣ್ಯಮಹೀರುಹಸ್ಯ ನಿಕರೇ ಕಮ್ಪಾಕುಲೇ ನಿರ್ಭರಮ್ ।
ತಸ್ಮಿನ್ವರ್ಷತಿ ಕೌತುಕೇನ ಕುಸುಮಾನ್ಯುಚ್ಚೈಃ ಪುನರ್ದೈವತ-
ಸ್ತೋಮೇಽಪಿ ವ್ರಜಭೂಪತೇ ವಿಜಯತೇ ತೈಸ್ತೈಶ್ಚಿತಂ ತೇ ವಪುಃ ॥ 83 ॥
ಕಾನ್ತಾಕೋಟಿಕಲಾಕುಲಸ್ಯ ಭವತಃ ಸನ್ತೋಷ್ಯ ರಾಸೇ ಸ್ಮರ-
ಕ್ಷೀಣಾಂ ವೀಕ್ಷ್ಯ ನಿಶಾಂ ನಿಶಾಕರಕರಸ್ತೋಮೇ ಪರಂ ಮುಂಚತಿ ।
ಸಾತಂಕಂ ಸಮುಪಾಗತಸ್ಯ ಸದನಾದ್ಯಾನ್ತಂ ಶಯಾನೇ ಜನೇ
ಕೀರಸ್ಯಾಪಿ ಗಿರಾ ಜಯನ್ತಿ ಪರಿತಃ ಪರ್ಯಾಕುಲಾ ದೃಷ್ಟಯಃ ॥ 84 ॥
ಉದ್ಯನ್ನೇವ ಭವಾನಿವ ವ್ರಜಭುವಾಂ ಸರ್ವಾಪದಾಂ ಸಂಹತಿ-
ಧ್ವಾನ್ತಸ್ತೋಮಮನುತ್ತಮಂ ತಮನಯತ್ಕಾನ್ತಃ ಸರೋಜನ್ಮನಾಮ್ ।
ಸೋಲ್ಲಾಸಾನಿ ಸರೋರುಹಾಣಿ ನಯನಾನೀವ ತ್ವದಾಲೋಕನೇ
ಲೋಕಾನಾಂ ಕಿಲ ನನ್ದವಂಶತಿಲಕ ಸ್ವಾಪಸ್ಯ ನಾಯಂ ಕ್ಷಣಃ ॥ 85 ॥
ಮಿತ್ರೇಣೇಹ ತಮಸ್ವಿನೀಂ ವಿನಿಹತಾಂ ನಾಥ ತ್ವಯಾ ಪೂತನಾಂ
ವ್ಯಾಧೂತಾಮಿವ ಕೈರವೇಷ್ವಪಿ ಭವದ್ವಿದ್ವೇಷಿವಕ್ತ್ರದ್ಯುತಿಮ್ ।
ಆಶಾಂ ಪಶ್ಯ ಪುರನ್ದರಸ್ಯ ದಯಿತಾಂ ರಕ್ತಾಮ್ಬರಾಲಂಕೃತಾಂ
ಸಿನ್ದೂರಾನ್ವಿತಕುಮ್ಭಮಮ್ಬರಮಣೇರ್ಬಿಮ್ಬಂ ವಹನ್ತೀಂ ಪುರಃ ॥ 86 ॥
ಗೀತಜ್ಞಾಃ ಕವಯೋ ನಟಾ ಬಹುಕಲಾಶಿಕ್ಷಾಸು ದಕ್ಷಾಃ ಪರೇ
ವಿಪ್ರೇನ್ದ್ರಾಃ ಕುಶಪಾಣಯೋಽಪಿ ಭವನದ್ವಾರೇಷು ಸನ್ತ್ಯುತ್ಸುಕಾಃ ।
ತಲ್ಪಂ ಮುಂಚ ದದಸ್ವ ಲೋಚನಫಲಂ ತ್ವಂ ದೇಹಭಾಜಾಮಿತಿ
ಪ್ರಾತರ್ವನ್ದಿಗಿರೋ ಜಯನ್ತಿ ಭವತಃ ಸಮ್ಬೋಧನೇ ನಿತ್ಯಶಃ ॥ 87 ॥ (ವಿಶೇಷಕಮ್)
ಭಾನೋರ್ಮಂಡಲಮಾವಿರಸ್ತಿ ಪುರತೋ ನಾದ್ಯಾಪಿ ನಿದ್ರಾಹತಿಃ
ಕಿಂ ತೇ ತಾತ ಬಲಾನುಜೇತಿ ಜನನೀವಾಗ್ವೀಚಿಮಾಚಾಮತಃ ।
ಅರ್ಧೋನ್ಮೀಲಿತಪಾಟಲಾಕ್ಷಿಯುಗಲಂ ಪರ್ಯಸ್ತನೀಲಾಲಕಂ
ಜೃಮ್ಭಾರಮ್ಭವಿಶೇಷಶೋಭಿ ವದನಾಮ್ಭೋಜಂ ಭಜಾಮಸ್ತವ ॥ 88 ॥
ಮುಂಚನ್ತಂ ಶಯನಂ ಭವನ್ತಮಭಿತಃ ಸಂಗಮ್ಯಗೋಪಾಂಗನಾ-
ಸ್ತೈಲಾಭ್ಯಂಜನಮಂಜನಾದಿ ದಧತೀಃ ಸಂವೀಕ್ಷ್ಯ ದೇವ್ಯಶ್ಚಿರಮ್ ।
ಉಜ್ಝನ್ತ್ಯಃ ಸುಮನೋಽಮ್ಬರಾಣಿ ಸುಮನೋಭಾವಾ ವರಂ ಸಂಗತಾಃ
ಪ್ರಾಯೋ ಗೋಪವಧೂತ್ವಲಬ್ಧಿಮನಸೈವಾಕಾಶಸಾಮ್ಯಂ ದಧುಃ ॥ 89 ॥ var ಭೂಯೋ
ಪ್ರಾತರ್ಭೋಜನಮಾರಚಯ್ಯ ವಿಪಿನಂ ಪ್ರಸ್ಥಾತುಕಾಮೇ ತ್ವಯಿ
ಪ್ರಾಯೋ ಗೋಪವಧೂಲತಾಸು ಮಿಲಿತಃ ಕನ್ದರ್ಪದಾವಾನಲಃ ।
ಯದ್ಗೋಧೂಲಿಮಿಷಾದುದೇತಿ ಪರಿತೋ ಧೂಮಾಲಿರಭ್ರಂಲಿಹಾ
ತಾಸಾಮಶ್ರುರಸಾಃ ಸ್ರವನ್ತಿ ಚ ಮುಹುರ್ದನ್ದಹ್ಯಮಾನೇಽನ್ತರೇ ॥ 90 ॥
ಪಂಚಾಸ್ಯೇ ಚತುರಾನನೇ ದಶಶತೀನೇತ್ರಾದಿಪೂರ್ವೇ ಗವಾ-
ಮಧ್ವನ್ಯಧ್ವನಿ ಲೋಕಪಾಲನಿವಹೇ ಭೂಮೀಲುಠನ್ಮೂರ್ಧನಿ ।
ತದ್ವ್ಯಾಘ್ರಾಜಿನಭೂಷಣಾದಿಭಿರಲಂ ತ್ರಸ್ತೇ ಸಮಸ್ತೇ ಪಶೌ
ಗೋಪಾಃ ಕೋಪವಶಾದ್ಗೃಹೀತಲಗುಡಾ ಹೀಹೀರವಾಃ ಸ್ಯುರ್ಮುದೇ ॥ 91 ॥
ತಿಗ್ಮಾಂಶೌ ತಪತಿ ಕ್ವಚಿಜ್ಜಲಮುಚಾಂ ಸ್ತೋಮೇ ಜಲಂ ಮುಂಚತಿ
ಪ್ರೇಮಾರ್ದ್ರಃ ಪ್ರತನೋತಿ ಯಃ ಸ್ವವಪುಷಾ ಚಿತ್ರಾತಪತ್ರಂ ತವ ।
ಸೋಽಯಂ ಭಾಸ್ಕರಕೋಟಿಭಾಸ್ವರಮಹಃಸಮ್ಭಾರಪಾಟಚ್ಚರಃ
ಪಾರೀನ್ದ್ರೋಽಸುರದನ್ತಿನಾಂ ದಿಶತು ಮೇಂ ಭವ್ಯಂ ಭುಜಂಗಾನ್ತಕಃ ॥ 92 ॥
ಮಧ್ಯಾಹ್ನೇ ಯಮುನಾತಟೇ ವಿಟಪಿನಾಂ ಮೂಲೇ ವಯಸ್ಯೈಃ ಸಮಂ
ದಧ್ಯನ್ನಾನ್ಯುಪಭುಜ್ಯ ರಜ್ಯತಿ ಪುನಸ್ತತ್ಕ್ರೀಡನೇ ಚ ತ್ವಯಿ ।
ದೇವೇನ್ದ್ರಸ್ತ್ರಿಪುರಾನ್ತಕಃ ಕಮಲಭೂರನ್ಯೇ ಚ ನಾಕಾಲಯಾಃ
ಕಾಕಾಕಾರಜುಷೋ ಮುಹುಃ ಕವಲಯನ್ತ್ಯುಚ್ಛಿಷ್ಟಮಿಷ್ಟಂ ತವ ॥ 93 ॥
ನಿದ್ರಾಣೇ ತ್ವಯಿ ಶೀತಲೇ ತರುತಲೇ ತಲ್ಪೈ ದಲೈಃ ಕಲ್ಪಿತೇ
ಸಂವೀಕ್ಷ್ಯಾಮ್ಬುಜಪತ್ರಮನ್ದಮರುತಾ ಸಂವಾಹಿತೇ ಪಾದಯೋಃ ।
ರುದ್ರಬ್ರಹ್ಮಮಹೇನ್ದ್ರತರ್ಜನವಿಧೌ ಗೋಪಾರ್ಭಕಾಣಾಂ ಕರ-
ವ್ಯಾಧೂತಾನಿ ಜಯನ್ತಿ ಭಂಗುರದೃಶಾಂ ಕಾನ್ತಿಶ್ಚ ಶೋಣಾಯಿತಾ ॥ 94 ॥
ಸ್ಫೂರ್ಜನ್ತಸ್ತಪಸಾ ಪುಲಸ್ತ್ಯಪುಲಹಾಗಸ್ತ್ಯಾಃ ಸದುರ್ವಾಸಸಃ
ಸನ್ತ್ಯುಚ್ಚೈರ್ಯಶಸಃ ಪರೇಽಪಿ ಸ ಪರಂ ಧನ್ಯೋ ಮುನಿರ್ನಾರದಃ ।
ಯಸ್ಯ ತ್ವದ್ಗುಣಗಾನಮಗ್ನಮನಸೋ ವ್ಯಾಪಾದಿತೇ ಕೇಶಿನಿ
ಪ್ರಾಲೇಯಾದ್ರಿವಿನಿಃಸೃತಾಮರಧುನೀಧಾರಾಯತೇಽಸ್ರಾವಲಿಃ ॥ 95 ॥
ಲಕ್ಷ್ಮಾಣಿ ಧ್ವಜವಜ್ರಪಂಕಜಯವಚ್ಛತ್ರೋರ್ಧ್ವಲೇಖಾಯುತಾ-
ನ್ಯಾಲಕ್ಷ್ಮ್ಯಾಮ್ಬುರುಹಾಕ್ಷ ತೇ ಚರಣಯೋಃ ಕ್ಷೋಣೀತಲೇಽಹ್ನಾಯ ಯಃ ।
ಧ್ಯಾಯತ್ತ್ಯುತ್ಪುಲಕತ್ಯುದಂಚತಿ ಲುಠತ್ಯಾಕ್ರನ್ದತಿ ಪ್ರೀಯತೇ
ಕೋಽನ್ಯೋ ಧನ್ಯತಮಸ್ತತಸ್ತ್ರಿಭುವನೇ ಸ್ಯಾದ್ಗಾನ್ದಿನೀನನ್ದನಾತ್ ॥ 96 ॥
ಧನ್ಯಂ ತಸ್ಯ ಜನುಸ್ತಥೈವ ಪಿತರೌ ಧನ್ಯಂ ತದೀಯಂ ಕುಲಂ
ಧನ್ಯಾ ತೇನ ವಸುನ್ಧರಾ ಕಿಮಧಿಕಂ ತೇನೈವ ಧನ್ಯಂ ಜಗತ್ ।
ಯಃ ಕಂಸೈಕನಿದೇಶವರ್ತ್ಯಪಿ ಭವತ್ಪಾದಾಮ್ಬುಜಾಲೋಕನಾ-
ದಕ್ರೂರೋಽಶ್ರುನಿರುದ್ಧಕಂಠಕುಹರಃ ಪ್ರೇಮಾಬ್ಧಿಮಗ್ನೋಽಜನಿ ॥ 97 ॥
ಪರ್ಯಾವೃತ್ತ್ಯ ಪಶೂನಶೇಷಸಖಿಭಿಃ ಸಾಕಂ ತ್ವಯಾ ಸ್ವೀಕೃತೇ
ಗೋಪೀಲೋಚನಪಂಕಜಾಲಿನಿಚಿತೇ ಸಾಯಂ ಗವಾಮಧ್ವನಿ ।
ಜೀಯಾಸುರ್ದಯಿತಾನನೇಷು ನಿತರಾಂ ಸಾಕೂತನೃತ್ಯಾಕುಲಾಃ
ಕಾಲಿನ್ದೀಸದೃಶಾಃ ಸ್ಮಿತೇನ ಸುರಸಾಸ್ತ್ವಚ್ಚಕ್ಷುಷೋಃ ಕಾನ್ತಯಃ ॥ 98 ॥
ಯೋ ವಾಚೋ ಮನಸೋಽಪಿ ನೈವ ವಿಷಯಸ್ತ್ವಂ ತ್ವಾಂ ವಿಧಾಯಾತ್ಮಜಂ
ಯಾಭ್ಯಂಗಸ್ನಪನಾಶನಪ್ರಭೃತಿಭಿಃ ಸಂಲಾಲಯತ್ಯನ್ವಹಮ್ ।
ನೋ ದಾನೇನ ನ ಚೇಜ್ಯಯಾ ನ ತಪಸಾ ನೋ ಸಾಂಖ್ಯಯೋಗಾದಿಭಿ-
ರ್ಯಲ್ಲಭ್ಯಂ ತದವಾಪ ಗೋಪದಯಿತಾ ಸಾಽಽಸ್ತಾಂ ಯಶೋದಾ ಮುದೇ ॥ 99 ॥
ಪೂರ್ಣೇ ದಾನಪತೇರ್ಮನೋರಥಶತೈಃ ಸಾರ್ಧಂ ಪ್ರಲಮ್ಬಾರಿಣಾ
ತಲ್ಪೇ ನಿನ್ದಿತದುಗ್ಧಸಿನ್ಧುಸುಷಮಾಸಾರೇ ತ್ವಯಾ ಸ್ವೀಕೃತೇ ।
ಸನ್ದಷ್ಟೋಷ್ಠಮುದಶ್ರು ಮರ್ದಿತಕರಂ ತಚ್ಚೇಷ್ಟಿತಂ ಶೃಣ್ವತಃ
ಕಂಸಧ್ವಂಸಮಭೀಪ್ಸತೋ ಜಯತಿ ತೇ ಭ್ರಾತಾ ಸಮಂ ಮನ್ತ್ರಣಾ ॥ 100 ॥
ಯಾ ಸಂವ್ಯಾಪ್ಯ ಸುವರ್ಣಭೂಧರಪದಂ ಜಾತಾ ಗಿರೀಶಾರ್ಚಿತಾ
ಸ್ವಚ್ಛಾ ಹಂಸಕವಿಪ್ರಿಯಾ ಕಮಲಮುದ್ಗಾಮ್ಭೀರ್ಯಮಭ್ಯಂಚತಿ ।
ಯೇಯಂ ಕೃಷ್ಣಪದಾಬ್ಜಭಕ್ತಿವಸುಧಾಪಾತಾಲಮಾಲಮ್ಬಿತಾ
ಸಾ ತಾಪಂ ಮಮ ಸರ್ವತಃ ಪ್ರಶಮಯತ್ವಾನನ್ದಮನ್ದಾಕಿನೀ ॥ 101 ॥
ಯೇ ಪಾಂಡಿತ್ಯಕವಿತ್ವಸೂನುಧರಣೀಧರ್ಮಾರ್ಥಕಾಮಾಣಿಮಾ-
ದೀಶಿತ್ವೇನ್ದ್ರಪದಾಪ್ತಿಮೋಕ್ಷಮಥವಾ ವಾಂಛನ್ತಿ ಭಕ್ತಿಂ ಹರೌ ।
ಸಮ್ಭೂತಾಂ ಮಧುಸೂದನಪ್ರಪದತಃ ಸನ್ತೋ ಭಜನ್ತ್ವಾದರಾ-
ತ್ತೇ ಸಂಸಾರದವಾಗ್ನಿತಾಪಶಮನೀಮಾನನ್ದಮನ್ದಾಕಿನೀಮ್ ॥ 102 ॥
ಇತಿ ಶ್ರೀಮನ್ನನ್ದನನ್ದನಪದದ್ವನ್ದ್ವಸಮುದಂಚನ್ನಖಚನ್ದ್ರಚನ್ದ್ರಿಕಾಚಯ-
ದತ್ತಚಿತ್ತಚಕೋರಶ್ರೀಮಧುಸೂದನಸರಸ್ವತೀವಿರಚಿತಾನನ್ದಮನ್ದಾಕಿನೀ ಸಮ್ಪೂರ್ಣಾ ॥