॥ Goraksha Ashatakam 1 Telugu Lyrics ॥
॥ గోరక్షశతకమ్ ౧ ॥
ఓం పరమగురవే గోరక్షనాథాయ నమః ।
ఓం గోరక్షశతకం వక్ష్యే భవపాశవిముక్తయే ।
ఆత్మబోధకరం పుంసాం వివేకద్వారకుఞ్చికామ్ ॥ ౧ ॥
ఏతద్విముక్తిసోపానమేతత్కాలస్య వఞ్చనమ్ ।
యద్వ్యావృత్తం మనో మోహాదాసక్తం పరమాత్మని ॥ ౨ ॥
ద్విజసేవితశాఖస్య శ్రుతికల్పతరోః ఫలమ్ ।
శమనం భవతాపస్య యోగం భజతి సజ్జనః ॥ ౩ ॥
ఆసనం ప్రాణసంయామః ప్రత్యాహారోఽథ ధారణా ।
ధ్యానం సమాధిరేతాని యోగాఙ్గాని భవన్తి షట్ ॥ ౪ ॥
ఆసనాని తు తావన్తి యావత్యో జీవజాతయః ।
ఏతేషామఖిలాన్భేదాన్విజానాతి మహేశ్వరః ॥ ౫ ॥
చతురాశీతిలక్షాణాం ఏకమేకముదాహృతమ్ ।
తతః శివేన పీఠానాం షోడేశానం శతం కృతమ్ ॥ ౬ ॥
ఆసనేభ్యః సమస్తేభ్యో ద్వయమేవ విశిష్యతే ।
ఏకం సిద్ధాసనం ప్రోక్తం ద్వితీయం కమలాసనమ్ ॥ ౭ ॥
యోనిస్థానకమంఘ్రిమూలఘటితం కృత్వా దృఢం విన్యసే-
న్మేఢ్రే పాదమథైకమేవ నియతం కృత్వా సమం విగ్రహమ్ ।
స్థాణుః సంయమితేన్ద్రియోఽచలదృశా పశ్యన్భ్రువోరన్తరం
ఏతన్మోక్షకవాటభేదజనకం సిద్ధాసనం ప్రోచ్యతే ॥ ౮ ॥
వామోరూపరి దక్షిణం హి చరణం సంస్థాప్య వామం తథా
దక్షోరూపరి పశ్చిమేన విధినా ధృత్వా కరాభ్యాం దృఢమ్ ।
అఙ్గుష్ఠౌ హృదయే నిధాయ చిబుకం నాసాగ్రమాలోకయే-
దేతద్వ్యాధివికారహారి యమినాం పద్మాసనం ప్రోచ్యతే ॥ ౯ ॥
ఆధారం ప్రథమం చక్రం స్వాధిష్ఠానం ద్వితీయకమ్ ।
యోనిస్థానం ద్వయోర్మధ్యే కామరూపం నిగద్యతే ॥ ౧౦ ॥
ఆధారాఖ్యే గుదస్థానే పఙ్కజం యచ్చతుర్దలమ్ ।
తన్మధ్యే ప్రోచ్యతే యోనిః కామాఖ్యా సిద్ధవన్దితా ॥ ౧౧ ॥
యోనిమధ్యే మహాలిఙ్గం పశ్చిమాభిముఖం స్థితమ్ ।
మస్తకే మణివద్భిన్నం యో జానాతి స యోగవిత్ ॥ ౧౨ ॥
తప్తచామీకరాభాసం తడిల్లేఖేవ విస్ఫురత్ ।
చతురస్రం పురం వహ్నేరధోమేఢ్రాత్ప్రితిష్ఠితమ్ ॥ ౧౩ ॥
స్వశబ్దేన భవేత్ప్రాణః స్వాధిష్ఠానం తదాశ్రయః ।
స్వాధిష్ఠానాఖ్యయా తస్మాన్మేఢ్రవాభిధీయతే ॥ ౧౪ ॥
తన్తునా మణివత్ప్రోతో యత్ర కన్దః సుషుమ్ణయా ।
తన్నాభిమణ్డలం చక్రం ప్రోచ్యతే మణిపూరకమ్ ॥ ౧౫ ॥
ఊర్ధ్వం మేఢ్రాదధో నాభేః కన్దయోనిః స్వగాణ్డవత్ ।
తత్ర నాడ్యః సముత్పన్నాః సహస్రాణి ద్విసప్తతిః ॥ ౧౬ ॥
తేషు నాడిసహస్రేషు ద్విసప్తతిరుదాహృతాః ।
ప్రాధాన్యాత్ప్రాణవాహిన్యో భూయస్తత్ర దశ స్మృతాః ॥ ౧౭ ॥
ఇడా చ పిఙ్గలా చైవ సుషుమ్ణా చ తృతీయకా ।
గాన్ధారీ హస్తిజిహ్వా చ పూషా చైవ యశస్వినీ ॥ ౧౮ ॥
అలమ్బుషా కుహూశ్చైవ శఙ్ఖినీ దశమీ స్మృతా ।
ఏతన్నాడిమయం చక్రం జ్ఞాతవ్యం యోగిభిః సదా ॥ ౧౯ ॥
ఇడా వామే స్థితా భాగే పిఙ్గలా దక్షిణే తథా ।
సుషుమ్ణా మధ్యదేశే తు గాన్ధారీ వామచక్షుషి ॥ ౨౦ ॥
దక్షిణే హస్తిజిహ్వా చ పూషా కర్ణే చ దక్షిణే ।
యశస్వినీ వామకర్ణే చాసనే వాప్యలమ్బుషా ॥ ౨౧ ॥
కూహుశ్చ లిఙ్గదేశే తు మూలస్థానే చ శఙ్ఖినీ ।
ఏవం ద్వారముపాశ్రిత్య తిష్ఠన్తి దశ నాడికాః ॥ ౨౨ ॥
సతతం ప్రాణవాహిన్యః సోమసూర్యాగ్నిదేవతాః ।
ఇడాపిఙ్గలాసుషుమ్ణా చ తిస్రో నాడ్య ఉదాహృతాః ॥ ౨౩ ॥
ప్రాణాపానౌ సమానశ్చ హ్యుదానో వ్యాన ఏవ చ ।
నాగః కూర్మశ్చ కృకరో దేవదత్తో ధనఞ్జయః ॥ ౨౪ ॥
నాగాద్యాః పఞ్చ విఖ్యాతాః ప్రాణాద్యాః పఞ్చ వాయవః ।
ఏతే నాడిసహస్రేషు వర్తన్తే జీవరూపిణః ॥ ౨౫ ॥
ప్రాణాపానవశో జీవో హ్యధశ్చోర్ధ్వం చ ధావతి ।
వామదక్షిణమార్గేణ చఞ్చలత్వాన్న దృశ్యతే ॥ ౨౬ ॥
ఆక్షిప్తో భువి దణ్డేన యథోచ్చలతి కన్దుకః ।
ప్రాణాపానసమాక్షిప్తస్తథా జీవోఽనుకృష్యతే ॥ ౨౭ ॥
రజ్జుబద్ధో యథా శ్యేనో గతోఽప్యాకృష్యతే ।
గుణబద్ధస్తథా జీవః ప్రాణాపానేన కృష్యతే ॥ ౨౮ ॥
అపానః కర్షతి ప్రాణః ప్రాణోఽపానం చ కర్షతి ।
ఊర్ధ్వాధః సంస్థితావేతౌ యో జానాతి స యోగవిత్ ॥ ౨౯ ॥
కన్దోర్ధ్వే కుణ్డలీశక్తిరష్టధా కుణ్డలీకృతా ।
బ్రహ్మద్వారముఖం నిత్యం ముఖేనావృత్య తిష్ఠతి ॥ ౩౦ ॥
ప్రబుద్ధా వహ్నియోగేన మనసా మారుతా హతా ।
ప్రజీవగుణమాదాయ వ్రజత్యూర్ధ్వం సుషుమ్ణయా ॥ ౩౧ ॥
మహాముద్రాం నమోముద్రాముడ్డియానం జలన్ధరమ్ ।
మూలబన్ధం చ యో వేత్తి స యోగీ సిద్ధిభాజనమ్ ॥ ౩౨ ॥
వక్షోన్యస్తహనుర్నిపీడ్య సుచిరం యోనిం చ వామాంఘ్రిణా
హస్తాభ్యామవధారితం ప్రసరితం పాదం తథా దక్షిణమ్ ।
ఆపూర్య శ్వసనేన కుక్షియుగలం బద్ధ్వా శనై రేచయేద్
ఏషా పాతకనాశినీ సుమహతీ ముద్రా నౄణాం ప్రోచ్యతే ॥ ౩౩ ॥
కపాలకుహరే జిహ్వా ప్రవిష్టా విపరీతగా ।
భ్రువోరన్తర్గతా దృష్టిర్ముద్రా భవతి ఖేచరీ ॥ ౩౪ ॥
ఊర్ధ్వం మేఢ్రాదధో నాభేరుడ్డియానం ప్రచక్షతే ।
ఉడ్డియానజయో బన్ధో మృత్యుమాతఙ్గకేసరీ ॥ ౩౫ ॥
జాలన్ధరే కృతే బన్ధే కణ్ఠసఙ్కోచలక్షణే ।
న పీయూషం పతత్యగ్నౌ న చ వాయుః ప్రకుప్యతి ॥ ౩౬ ॥
పార్ష్ణిభాగేన సమ్పీడ్య యోనిమాకుఞ్చయేద్గుదమ్ ।
అపానమూర్ధ్వమాకృష్య మూలబన్ధో నిగద్యతే ॥ ౩౭ ॥
యతః కాలభయాత్ బ్రహ్మా ప్రాణాయామపరాయణః ।
యోగినో మునయశ్చైవ తతః ప్రాణం నిబన్ధయేత్ ॥ ౩౮ ॥
చలే వాతే చలం సర్వం నిశ్చలే నిశ్చలం భవేత్ ।
యోగీ స్థాణుత్వమాప్నోతి తతో వాయుం నిబన్ధయేత్ ॥ ౩౯ ॥
షట్త్రింశదఙ్గులం హంసః ప్రయాణం కురుతే బహిః ।
వామదక్షిణమార్గేణ తతః ప్రాణోఽభిధీయతే ॥ ౪౦ ॥
బద్ధపద్మాసనో యోగీ నమస్కృత్య గురుం శివమ్ ।
నాసాగ్రదృష్టిరేకాకీ ప్రాణాయామం సమభ్యసేత్ ॥ ౪౧ ॥
ప్రాణో దేహస్థితో వాయురాయామస్తన్నిబన్ధనమ్ ।
ఏకశ్వాసమయీ మాత్రా తద్యోగో గగనాయతే ॥ ౪౨ ॥
బద్ధపద్మాసనో యోగీ ప్రాణం చన్ద్రేణ పూరయేత్ ।
ధారయిత్వా యథాశక్తి భూయః సూర్యేణ రేచయేత్ ॥ ౪౩ ॥
అమృతోదధిసఙ్కాశం క్షీరోదధవలప్రభమ్ ।
ధ్యాత్వా చన్ద్రమయం బిమ్బం ప్రాణాయామే సుఖీ భవేత్ ॥ ౪౪ ॥
ప్రాణం సూర్యేణ చాకృష్య పూరయేదుదరం శనైః ।
కుమ్భయిత్వా విధానేన భూయశ్చన్ద్రేణ రేచయేత్ ॥ ౪౫ ॥
ప్రజ్వలజ్జ్వలన జ్వాలా పుఞ్జమాదిత్యమణ్డలమ్ ।
ధ్యాత్వా నాభిస్థితం యోగీ ప్రాణాయామే సుఖీ భవేత్ ॥ ౪౬ ॥
రేచకః పూరకశ్చైవ కుమ్భకః ప్రణవాత్మకః ।
ప్రాణాయామో భవేత్త్రేధా మాత్రా ద్వాదశసంయుతః ॥ ౪౭ ॥
ద్వాదశాధమకే మాత్రా మధ్యమే ద్విగుణాస్తతః ।
ఉత్తమే త్రిగుణా మాత్రాః ప్రాణాయామస్య నిర్ణయః ॥ ౪౮ ॥
అధమే చ ఘనో ఘర్మః కమ్పో భవతి మధ్యమే ।
ఉత్తిష్ఠత్యుత్తమే యోగీ బద్ధపద్మాసనో ముహుః ॥ ౪౯ ॥
అఙ్గానాం మర్దనం శస్తం శ్రమసంజాతవారిణా ।
కట్వమ్లలవణత్యాగీ క్షీరభోజనమాచరేత్ ॥ ౫౦ ॥
మన్దం మన్దం పిబేద్వాయుం మన్దం మన్దం వియోజయేత్ ।
నాధికం స్తమ్భయేద్వాయుం న చ శీఘ్రం విమోచయేత్ ॥ ౫౧ ॥
ఊర్ధ్వమాకృష్య చాపానం వాతం ప్రాణే నియోజయేత్ ।
మూర్ధానం నీయతే శక్త్యా సర్వపాపైః ప్రముచ్యతే ॥ ౫౨ ॥
ప్రాణాయామో భవత్యేవం పాతకేన్ధనపాతకః ।
ఏనోమ్బుధిమహాసేతుః ప్రోచ్యతే యోగిభిః సదా ॥ ౫౩ ॥
ఆసనేన రుజో హన్తి ప్రాణాయామేన పాతకమ్ ।
వికారం మానసం యోగీ ప్రత్యాహారేణ సర్వదా ॥ ౫౪ ॥
చన్ద్రామృతమయీం ధారాం ప్రత్యాహారతి భాస్కరః ।
తత్ప్రత్యాహరణం తస్య ప్రత్యాహారః స ఉచ్యతే ॥ ౫౫ ॥
ఏకా స్త్రీ భుజ్యతే ద్వాభ్యామాగతా సోమమణ్డలాత్ ।
తృతీయో యో భవేత్తాభ్యాం స భవత్యజరామరః ॥ ౫౬ ॥
నాభిదేశే భవత్యేకో భాస్కరో దహనాత్మకః ।
అమృతాత్మా స్థితో నిత్యం తాలుమూలే చ చన్ద్రమాః ॥ ౫౭ ॥
వర్షత్యధోముఖశ్చన్ద్రో గ్రసత్యూర్ధ్వముఖో రవిః ।
జ్ఞాతవ్యం కరణం తత్ర యేన పీయూషమాప్యతే ॥ ౫౮ ॥
ఊర్ధ్వనాభిరధస్తాలు ఊర్ధ్వభానురధః శశీ ।
కరణం విపరీతాఖ్యం గురువక్త్రేణ లభ్యతే ॥ ౫౯ ॥
త్రిధా బద్ధో వృషో యత్ర రౌరవీతి మహాస్వనమ్ ।
అనాహతం చ తచ్ చక్రం హృదయే యోగినో విదుః ॥ ౬౦ ॥
అనాహతమతిక్రమ్య చాక్రమ్య మణిపూరకమ్ ।
ప్రాప్తే ప్రాణం మహాపద్మం యోగిత్వమమృతాయతే ॥ ౬౧ ॥
విశబ్దః సంస్మృతో హంసో నిర్మలః శుద్ధ ఉచ్యతే ।
అతః కణ్ఠే విశుద్ధాఖ్యే చక్రం చక్రవిదో విదుః ॥ ౬౨ ॥
విశుద్ధే పరమే చక్రే ధృత్వా సోమకలాజలమ్ ।
మాసేన న క్షయం యాతి వఞ్చయిత్వా ముఖం రవేః ॥ ౬౩ ॥
సమ్పీడ్య రసనాగ్రేణ రాజదన్తబిలం మహత్ ।
ధ్యాత్వామృతమయీం దేవీం షణ్మాసేన కవిర్భవేత్ ॥ ౬౪ ॥
అమృతాపూర్ణదేహస్య యోగినో ద్విత్రివత్సరాత్ ।
ఊర్ధ్వం ప్రవర్తతే రేతోఽప్యణిమాదిగుణోదయః ॥ ౬౫ ॥
ఇన్ధనాని యథా వహ్నిస్తైలవర్తి చ దీపకః ।
తథా సోమకలాపూర్ణం దేహీ దేహం న ముఞ్చతి ॥ ౬౬ ॥
ఆసనేన సమాయుక్తః ప్రాణాయామేన సంయుతః ।
ప్రత్యాహారేణ సంయుక్తో ధారణాం చ సమభ్యసేత్ ॥ ౬౭ ॥
హృదయే పఞ్చభూతానాం ధారణాశ్చ పృథక్ పృథక్ ।
మనసో నిశ్చలత్వేన ధారణా చ విధీయతే ॥ ౬౮ ॥
యా పృథ్వీ హరితాలదేశరుచిరా పీతా లకారాన్వితా
సంయుక్తా కమలాసనేన హి చతుష్కోణా హృది స్థాయినీ ।
ప్రాణం తత్ర వినీయ పఞ్చఘటికాశ్చిత్తాన్వితం ధారయేద్
ఏషా స్తమ్భకరీ సదా క్షితిజయం కుర్యాద్భువో ధారణా ॥ ౬౯ ॥
అర్ధేన్దుప్రతిమం చ కున్దధవలం కణ్ఠేఽమ్బుతత్తవం స్థితం
యత్పీయూషవకారబీజసహితం యుక్తం సదా విష్ణునా ।
ప్రాణం తత్ర వినీయ పఞ్చఘటికాశ్చిత్తాన్వితం ధారయేద్
ఏషా దుర్వహకాలకూటజరణా స్యాద్వారిణీ ధారణా ॥ ౭౦ ॥
యత్తాలస్థితమిన్ద్రగోపసదృశం తత్త్వం త్రికోణోజ్జ్వలం
తేజోరేఫమయం ప్రవాలరుచిరం రుద్రేణ యత్సఙ్గతమ్ ।
ప్రాణం తత్ర వినీయ పఞ్చఘటికాశ్చిత్తాన్వితం ధారయే
ఏషా వహ్నిజయం సదా విదధతే వైశ్వానరీ ధారణా ॥ ౭౧ ॥
యద్భిన్నాఞ్జనపుఞ్జసాన్నిభమిదం తత్త్వం భ్రువోరన్తరే
వృత్తం వాయుమయం యకారసహితం యత్రేశ్వరో దేవతా ।
ప్రాణం తత్ర వినీయ పఞ్చఘటికాశ్చిత్తాన్వితం ధారయేద్
ఏషా ఖే గమనం కరోతి యమినాం స్యాద్వాయవీ ధారణా ॥ ౭౨ ॥
ఆకాశం సువిశుద్ధవారిసదృశం యద్బ్రహ్మరన్ధ్రే స్థితం
తత్రాద్యేన సదాశివేన సహితం శాన్తం హకారాక్షరమ్ ।
ప్రాణం తత్ర వినీయ పఞ్చఘటికాశ్చిత్తాన్వితం ధారయేద్
ఏషా మోక్షకవాటపాటనపటుః ప్రోక్తా నభోధారణా ॥ ౭౩ ॥
స్తమ్భనీ ద్రావణీ చైవ దహనీ భ్రామణీ తథా ।
శోషణీ చ భవన్త్యేవం భూతానాం పఞ్చధారణాః ॥ ౭౪ ॥
కర్మణా మనసా వాచా ధారణాః పఞ్చ దుర్లభాః ।
విధాయ సతతం యోగీ సర్వపాపైః ప్రముచ్యతే ॥ ౭౫ ॥
సర్వం చిన్తాసమావర్తి యోగినో హృది వర్తతే ।
యత్తత్త్వే నిశ్చితం చేతస్తత్తు ధ్యానం ప్రచక్షతే ॥ ౭౬ ॥
ద్విధా భవతి తద్ధ్యానం సగుణం నిర్గుణం తథా ।
సగుణం వర్ణభేదేన నిర్గుణం కేవలం విదుః ॥ ౭౭ ॥
ఆధారం ప్రథమం చక్రం తప్తకాఞ్చనసన్నిభమ్ ।
నాసాగ్రే దృష్టిమాదాయ ధ్యాత్వా ముఞ్చతి కిల్బిషమ్ ॥ ౭౮ ॥
స్వాధిష్ఠానం ద్వితీయం తు సన్మాణిక్యసుశోభనమ్ ।
నాసాగ్రే దృష్టిమాదాయ ధ్యాత్వా ముఞ్చతి పాతకమ్ ॥ ౭౯ ॥
తరుణాదిత్యసంకాశం చక్రం చ మణిపూరకమ్ ।
నాసాగ్రే దృష్టిమాదాయ ధ్యాత్వా సంక్షోభయేజ్జగత్ ॥ ౮౦ ॥
[verse missing]
విద్యుత్ప్రభావం హృత్పద్మే ప్రాణాయామవిభేదనైః ।
నాసాగ్రే దృష్టిమాదాయ ధ్యాత్వా బ్రహ్మమయో భవేత్ ॥ ౮౨ ॥
సన్తతం ఘణ్టికామధ్యే విశుద్ధం చామృతోద్భవమ్ ।
నాసాగ్రే దృష్టిమాదాయ ధ్యాత్వా బ్రహ్మమయో భవేత్ ॥ ౮౩ ॥
భ్రువోర్మధ్యే స్థితం దేవం స్నిగ్ధమౌక్తికసన్నిభమ్ ।
నాసాగ్రే దృష్టిమాదాయ ధ్యాత్వాఽనన్దమయో భవేత్ ॥ ౮౪ ॥
నిర్గుణం చ శివం శాన్తం గగనే విశ్వతోముఖమ్ ।
నాసాగ్రే దృష్టిమాదాయ ధ్యాత్వా దుఃఖాద్విముచ్యతే ॥ ౮౫ ॥
గుదం మేఢ్రం చ నాభిం చ హృత్పద్మే చ తదూర్ధ్వతః ।
ఘణ్టికాం లమ్పికాస్థానం భ్రూమధ్యే పరమేశ్వరమ్ ॥ ౮౬ ॥
నిర్మలం గగనాకారం మరీచిజలసన్నిభమ్ ।
ఆత్మానం సర్వగం ధ్యాత్వా యోగీ యోగమవాప్నుయాత్ ॥ ౮౭ ॥
కథితాని యథైతాని ధ్యానస్థానాని యోగినామ్ ।
ఉపాధితత్త్వయుక్తాని కుర్వన్త్యష్టగుణోదయమ్ ॥ ౮౮ ॥
ఉపాధిశ్చ తథా తత్త్వం ద్వయమేవముదాహృతమ్ ।
ఉపాధిః ప్రోచ్యతే వర్ణస్తత్త్వమాత్మాభిధీయతే ॥ ౮౯ ॥
ఉపాధిరన్యథాజ్ఞానం తత్త్వం సంస్థితమన్యథా ।
సమస్తోపాధివిధ్వంసి సదాభ్యాసేన యోగినామ్ ॥ ౯౦ ॥
ఆత్మవర్ణేన భేదేన దృశ్యతే స్ఫాటికో మణిః ।
ముక్తో యః శక్తిభేదేన సోఽయమాత్మా ప్రశస్యతే ॥ ౯౧ ॥
నిరాతఙ్కం నిరాలమ్బం నిష్ప్రపఞ్చం నిరాశ్రయమ్ ।
నిరామయం నిరాకారం తత్త్వం తత్త్వవిదో విదుః ॥ ౯౨ ॥
శబ్దాద్యాః పఞ్చ యా మాత్రా యావత్ కర్ణాదిషు స్మృతాః ।
తావదేవ స్మృతం ధ్యానం తత్సమాధిరతః పరమ్ ॥ ౯౩ ॥
యదా సంక్షీయతే ప్రాణో మానసం చ విలీయతే ।
తదా సమరసైకత్వం సమాధిరభిధీయతే ॥ ౯౪ ॥
[verse missing]
ధారణాః పఞ్చనాడ్యస్తు ధ్యానం చ షష్ఠినాడికాః ।
దినద్వాదశకేనైవ సమాధిః ప్రాణసంయమః ॥ ౯౬ ॥
న గన్ధం న రసం రూపం న స్పర్శం న చ నిఃస్వనమ్ ।
ఆత్మానం న పరం వేత్తి యోగీ యుక్తః సమాధినా ॥ ౯౭ ॥
ఖాద్యతే న చ కాలేన బాధ్యతే న చ కర్మణా ।
సాధ్యతే న చ కేనాపి యోగీ యుక్తః సమాధినా ॥ ౯౮ ॥
నిర్మలం నిశ్చలం నిత్యం నిష్క్రియం నిర్గుణం మహత్ ।
వ్యోమవిజ్ఞానమానన్దం బ్రహ్మ బ్రహ్మవిదో విదుః ॥ ౯౯ ॥
దుగ్ధే క్షీరం ధృతే సర్పిరగ్నౌ వహ్నిరివార్పితః ।
అద్వయత్వం వ్రజేన్నిత్యం యోగవిత్పరమే పదే ॥ ౧౦౦ ॥
భవభయవనే వహ్నిర్ముక్తిసోపానమార్గతః ।
అద్వయత్వం వ్రజేన్నిత్యం యోగవిత్పరమే పదే ॥ ౧౦౧ ॥
॥ ఇతి శ్రీ గోరక్షనాథప్రణీతః గోరక్షశతకం సమాప్తమ్ ॥