॥ Goraksha Ashatakam 2 Kannada Lyrics ॥
॥ ಗೋರಕ್ಷಶತಕಮ್ 2 ॥
ಶ್ರೀಗುರುಂ ಪರಮಾನನ್ದಂ ವನ್ದೇ ಸ್ವಾನನ್ದವಿಗ್ರಹಮ್ ।
ಯಸ್ಯ ಸನ್ನಿಧ್ಯಮಾತ್ರೇಣ ಚಿದಾನನ್ದಾಯತೇ ತನುಃ ॥ 1 ॥
ಅನ್ತರ್ನಿಶ್ಚಲಿತಾತ್ಮದೀಪಕಲಿಕಾಸ್ವಾಧಾರಬನ್ಧಾದಿಭಿಃ
ಯೋ ಯೋಗೀ ಯುಗಕಲ್ಪಕಾಲಕಲನಾತ್ ತ್ವಂ ಜಜೇಗೀಯತೇ ।
ಜ್ಞಾನಾಮೋದಮಹೋದಧಿಃ ಸಮಭವದ್ಯತ್ರಾದಿನಾಥಃ ಸ್ವಯಂ
ವ್ಯಕ್ತಾವ್ಯಕ್ತಗುಣಾಧಿಕಂ ತಮನಿಶಂ ಶ್ರೀಮೀನನಾಥಂ ಭಜೇ ॥ 2 ॥
ನಮಸ್ಕೃತ್ಯ ಗುರುಂ ಭಕ್ತ್ಯಾ ಗೋರಕ್ಷೋ ಜ್ಞಾನಮುತ್ತಮಮ್ ।
ಅಭೀಷ್ಟಂ ಯೋಗಿನಾಂ ಬ್ರೂತೇ ಪರಮಾನನ್ದಕಾರಕಮ್ ॥ 3 ॥
ಗೋರಕ್ಷಃ ಶತಕಂ ವಕ್ತಿ ಯೋಗಿನಾಂ ಹಿತಕಾಮ್ಯಯಾ ।
ಧ್ರುವಂ ಯಸ್ಯಾವಬೋಧೇನ ಜಾಯತೇ ಪರಮಂ ಪದಮ್ ॥ 4 ॥
ಏತದ್ವಿಮುಕ್ತಿಸೋಪಾನಮೇತತ್ ಕಾಲಸ್ಯ ವಂಚನಮ್ ।
ಯದ್ವ್ಯಾವೃತ್ತಂ ಮನೋ ಮೋಹಾದ್ ಆಸಕ್ತಂ ಪರಮಾತ್ಮನಿ ॥ 5 ॥
ದ್ವಿಜಸೇವಿತಶಾಖಸ್ಯ ಶ್ರುತಿಕಲ್ಪತರೋಃ ಫಲಮ್ ।
ಶಮನಂ ಭವತಾಪಸ್ಯ ಯೋಗಂ ಭಜತಿ ಸಜ್ಜನಃ ॥ 6 ॥
ಆಸನಂ ಪ್ರಾಣಸಂಯಾಮಃ ಪ್ರತ್ಯಾಹಾರೋಽಥ ಧಾರಣಾ ।
ಧ್ಯಾನಂ ಸಮಾಧಿರೇತಾನಿ ಯೋಗಾಂಗಾನಿ ಭವನ್ತಿ ಷಟ್ ॥ 7 ॥
ಆಸನಾನಿ ತು ತಾವನ್ತಿ ಯಾವತ್ಯೋ ಜೀವಜಾತಯಃ ।
ಏತೇಷಾಮಖಿಲಾನ್ಭೇದಾನ್ವಿಜಾನಾತಿ ಮಹೇಶ್ವರಃ ॥ 8 ॥
ಚತುರಾಶೀತಿಲಕ್ಷಾಣಾಂ ಏಕಮೇಕಮುದಾಹೃತಮ್ ।
ತತಃ ಶಿವೇನ ಪೀಠಾನಾಂ ಷೋಡೇಶಾನಂ ಶತಂ ಕೃತಮ್ ॥ 9 ॥
ಆಸನೇಭ್ಯಃ ಸಮಸ್ತೇಭ್ಯೋ ದ್ವಯಮೇವ ವಿಶಿಷ್ಯತೇ ।
ಏಕಂ ಸಿದ್ಧಾಸನಂ ಪ್ರೋಕ್ತಂ ದ್ವಿತೀಯಂ ಕಮಲಾಸನಮ್ ॥ 10 ॥
ಯೋನಿಸ್ಥಾನಕಮಂಘ್ರಿಮೂಲಘಟಿತಂ ಕೃತ್ವಾ ದೃಢಂ ವಿನ್ಯಸೇ
ನ್ಮೇಢ್ರೇ ಪಾದಮಥೈಕಮೇವ ನಿಯತಂ ಕೃತ್ವಾ ಸಮಂ ವಿಗ್ರಹಮ್ ।
ಸ್ಥಾಣುಃ ಸಂಯಮಿತೇನ್ದ್ರಿಯೋಽಚಲದೃಶಾ ಪಶ್ಯನ್ ಭ್ರುವೋರನ್ತರಮ್
ಏತನ್ ಮೋಕ್ಷಕವಾಟಭೇದಜನಕಂ ಸಿದ್ಧಾಸನಂ ಪ್ರೋಚ್ಯತೇ ॥ 11 ॥
ವಾಮೋರೂಪರಿ ದಕ್ಷಿಣಂ ಹಿ ಚರಣಂ ಸಂಸ್ಥಾಪ್ಯ ವಾಮಂ ತಥಾ
ದಕ್ಷೋರೂಪರಿ ಪಶ್ಚಿಮೇನ ವಿಧಿನಾ ಧೃತ್ವಾ ಕರಾಭ್ಯಾಂ ದೃಢಮ್ ।
ಅಂಗುಷ್ಠೌ ಹೃದಯೇ ನಿಧಾಯ ಚಿಬುಕಂ ನಾಸಾಗ್ರಮಾಲೋಕಯೇ
ದೇತದ್ವ್ಯಾಧಿವಿಕಾರಹಾರಿ ಯಮಿನಾಂ ಪದ್ಮಾಸನಂ ಪ್ರೋಚ್ಯತೇ ॥ 12 ॥
ಷಟ್ಚಕ್ರಂ ಷೋಡಶಾಧಾರಂ ತ್ರಿಲಕ್ಷಂ ವ್ಯೋಮಪಂಚಕಮ್ ।
ಸ್ವದೇಹೇ ಯೇ ನ ಜಾನನ್ತಿ ಕಥಂ ಸಿಧ್ಯನ್ತಿ ಯೋಗಿನಃ ॥ 13 ॥
ಏಕಸ್ತಮ್ಭಂ ನವದ್ವಾರಂ ಗೃಹಂ ಪಂಚಾಧಿದೈವತಮ್ ।
ಸ್ವದೇಹಂ ಯೇ ನ ಜಾನನ್ತಿ ಕಥಂ ಸಿಧ್ಯನ್ತಿ ಯೋಗಿನಃ ॥ 14 ॥
ಚತುರ್ದಲಂ ಸ್ಯಾದಾಧಾರಃ ಸ್ವಾಧಿಷ್ಠಾನಂ ಚ ಷಟ್ದಲಮ್ ।
ನಾಭೌ ದಶದಲಂ ಪದ್ಮಂ ಸೂರ್ಯಸಂಖ್ಯದಲಂ ಹೃದಿ ॥ 15 ॥
ಕಂಠೇ ಸ್ಯಾತ್ ಷೋಡಶದಲಂ ಭ್ರೂಮಧ್ಯೇ ದ್ವಿದಲಂ ತಥಾ ।
ಸಹಸ್ರದಲಮಾಖ್ಯಾತಂ ಬ್ರಹ್ಮರನ್ಧ್ರೇ ಮಹಾಪಥೇ ॥ 16 ॥
ಆಧಾರಃ ಪ್ರಥಮಂ ಚಕ್ರಂ ಸ್ವಾಧಿಷ್ಠಾನಂ ದ್ವಿತೀಯಕಮ್ ।
ಯೋನಿಸ್ಥಾನಂ ದ್ವಯೋರ್ಮಧ್ಯೇ ಕಾಮರೂಪಂ ನಿಗದ್ಯತೇ ॥ 17 ॥
ಆಧಾರಾಖ್ಯಂ ಗುದಸ್ಥಾನಂ ಪಂಕಜಂ ಚ ಚತುರ್ದಲಮ್ ।
ತನ್ಮಧ್ಯೇ ಪ್ರೋಚ್ಯತೇ ಯೋನಿಃ ಕಾಮಾಕ್ಷಾ ಸಿದ್ಧವನ್ದಿತಾ ॥ 18 ॥
ಯೋನಿಮಧ್ಯೇ ಮಹಾಲಿಂಗಂ ಪಶ್ಚಿಮಾಭಿಮುಖಂ ಸ್ಥಿತಮ್ ।
ಮಸ್ತಕೇ ಮಣಿವದ್ಬಿಮ್ಬಂ ಯೋ ಜಾನಾತಿ ಸ ಯೋಗವಿತ್ ॥ 19 ॥
ತಪ್ತಚಾಮೀಕರಾಭಾಸಂ ತಡಿಲ್ಲೇಖೇವ ವಿಸ್ಫುರತ್ ।
ತ್ರಿಕೋಣಂ ತತ್ಪುರಂ ವಹ್ನೇರಧೋಮೇಢ್ರಾತ್ ಪ್ರತಿಷ್ಠಿತಮ್ ॥ 20 ॥
ಯತ್ಸಮಾಧೌ ಪರಂ ಜ್ಯೋತಿರನನ್ತಂ ವಿಶ್ವತೋಮುಖಮ್ ।
ತಸ್ಮಿನ್ ದೃಷ್ಟೇ ಮಹಾಯೋಗೇ ಯಾತಾಯಾತಂ ನ ವಿದ್ಯತೇ ॥ 21 ॥
ಸ್ವಶಬ್ದೇನ ಭವೇತ್ ಪ್ರಾಣಃ ಸ್ವಾಧಿಷ್ಠಾನಂ ತದಾಶ್ರಯಃ ।
ಸ್ವಾಧಿಷ್ಠಾನಾತ್ ಪದಾದಸ್ಮಾನ್ಮೇಢ್ರಮೇವಾಭಿಧೀಯತೇ ॥ 22 ॥
ತನ್ತುನಾ ಮಣಿವತ್ ಪ್ರೋತೋ ಯತ್ರ ಕನ್ದಃ ಸುಷುಮ್ಣಯಾ ।
ತನ್ನಾಭಿಮಂಡಲಂ ಚಕ್ರಂ ಪ್ರೋಚ್ಯತೇ ಮಣಿಪೂರಕಮ್ ॥ 23 ॥
ದ್ವಾದಶಾರೇ ಮಹಾಚಕ್ರೇ ಪುಣ್ಯಪಾಪವಿವರ್ಜಿತೇ ।
ತಾವಜ್ ಜೀವೋ ಭ್ರಮತ್ಯೇವ ಯಾವತ್ ತತ್ತ್ವಂ ನ ವಿನ್ದತಿ ॥ 24 ॥
ಊರ್ಧ್ವಂ ಮೇಢ್ರಾದ್ ಅಧೋ ನಾಭೇಃ ಕನ್ದಯೋನಿಃ ಖಗಾಂಡವತ್ ।
ತತ್ರ ನಾಡ್ಯಃ ಸಮುತ್ಪನ್ನಾಃ ಸಹಸ್ರಾಣಾಂ ದ್ವಿಸಪ್ತತಿಃ ॥ 25 ॥
ತೇಷು ನಾಡಿಸಹಸ್ರೇಷು ದ್ವಿಸಪ್ತತಿರುದಾಹೃತಾಃ ।
ಪ್ರಧಾನಂ ಪ್ರಾಣವಾಹಿನ್ಯೋ ಭೂಯಸ್ತತ್ರ ದಶ ಸ್ಮೃತಾಃ ॥ 26 ॥
ಇಡಾ ಚ ಪಿಂಗಲಾ ಚೈವ ಸುಷುಮ್ಣಾ ಚ ತೃತೀಯಕಾ ।
ಗಾನ್ಧಾರೀ ಹಸ್ತಿಜಿಹ್ವಾ ಚ ಪೂಷಾ ಚೈವ ಯಶಸ್ವಿನೀ ॥ 27 ॥
ಅಲಮ್ಬುಷಾ ಕುಹೂಶ್ ಚೈವ ಶಂಖಿನೀ ದಶಮೀ ಸ್ಮೃತಾ ।
ಏತನ್ ನಾಡಿಮಯಂ ಚಕ್ರಂ ಜ್ಞಾತವ್ಯಂ ಯೋಗಿಭಿಃ ಸದಾ ॥ 28 ॥
ಇಡಾ ವಾಮೇ ಸ್ಥಿತಾ ಭಾಗೇ ಪಿಂಗಲಾ ದಕ್ಷಿಣೇ ತಥಾ ।
ಸುಷುಮ್ಣಾ ಮಧ್ಯದೇಶೇ ತು ಗಾನ್ಧಾರೀ ವಾಮಚಕ್ಷುಷಿ ॥ 29 ॥
ದಕ್ಷಿಣೇ ಹಸ್ತಿಜಿಹ್ವಾ ಚ ಪೂಷಾ ಕರ್ಣೇ ಚ ದಕ್ಷಿಣೇ ।
ಯಶಸ್ವಿನೀ ವಾಮಕರ್ಣೇ ಚಾಸನೇ ವಾಪ್ಯಲಮ್ಬುಷಾ ॥ 30 ॥
ಕುಹೂಶ್ಚ ಲಿಂಗದೇಶೇ ತು ಮೂಲಸ್ಥಾನೇ ಚ ಶಂಖಿನೀ ।
ಏವಂ ದ್ವಾರಮುಪಾಶ್ರಿತ್ಯ ತಿಷ್ಠನ್ತಿ ದಶನಾಡಿಕಾಃ ॥ 31 ॥
ಇಡಾಪಿಂಗಲಾಸುಷುಮ್ಣಾ ಚ ತಿಸ್ರೋ ನಾಡ್ಯುದಾಹೃತಾಃ ।
ಸತತಂ ಪ್ರಾಣವಾಹಿನ್ಯಃ ಸೋಮಸೂರ್ಯಾಗ್ನಿದೇವತಾಃ ॥ 32 ॥
ಪ್ರಾಣೋಽಪಾನಃ ಸಮಾನಶ್ ಚೋದಾನೋ ವ್ಯಾನೌ ಚ ವಾಯವಃ ।
ನಾಗಃ ಕೂರ್ಮೋಽಥ ಕೃಕರೋ ದೇವದತ್ತೋ ಧನಂಜಯಃ ॥ 33 ॥
ಹೃದಿ ಪ್ರಾಣೋ ವಸೇನ್ ನಿತ್ಯಂ ಅಪಾನೋ ಗುದಮಂಡಲೇ ।
ಸಮಾನೋ ನಾಭಿದೇಶೇ ಸ್ಯಾದುದಾನಃ ಕಂಠಮಧ್ಯಗಃ ॥ 34 ॥
ಉದ್ಗಾರೇ ನಾಗಾಖ್ಯಾತಃ ಕೂರ್ಮ ಉನ್ಮೀಲನೇ ಸ್ಮೃತಃ ।
ಕೃಕರಃ ಕ್ಷುತಕೃಜ್ಜ್ಞೇಯೋ ದೇವದತ್ತೋ ವಿಜೃಮ್ಭಣೇ ॥ 35 ॥
ನ ಜಹಾತಿ ಮೃತಂ ಚಾಪಿ ಸರ್ವವ್ಯಾಪಿ ಧನಂಜಯಃ ।
ಏತೇ ಸರ್ವಾಸು ನಾಡೀಷು ಭ್ರಮನ್ತೇ ಜೀವರೂಪಿಣಃ ॥ 36 ॥
ಆಕ್ಷಿಪ್ತೋ ಭುಜದಂಡೇನ ಯಥೋಚ್ಚಲತಿ ಕನ್ದುಕಃ ।
ಪ್ರಾಣಾಪಾನಸಮಾಕ್ಷಿಪ್ತಸ್ತಥಾ ಜೀವೋ ನ ತಿಷ್ಠತಿ ॥ 38 ॥
ಪ್ರಾಣಾಪಾನವಶೋ ಜೀವೋ ಹ್ಯಧಶ್ ಚೋರ್ಧ್ವಂ ಚ ಧಾವತಿ ।
ವಾಮದಕ್ಷಿಣಮಾರ್ಗೇಣ ಚಂಚಲತ್ವಾನ್ ನ ದೃಶ್ಯತೇ ॥ 39 ॥
ರಜ್ಜುಬದ್ಧೋ ಯಥಾ ಶ್ಯೇನೋ ಗತೋಽಪ್ಯಾಕೃಷ್ಯತೇ ।
ಗುಣಬದ್ಧಸ್ತಥಾ ಜೀವಃ ಪ್ರಾಣಾಪಾನೇನ ಕೃಷ್ಯತೇ ॥ 40 ॥
ಅಪಾನಃ ಕರ್ಷತಿ ಪ್ರಾಣಃ ಪ್ರಾಣೋಽಪಾನಂ ಚ ಕರ್ಷತಿ ।
ಊರ್ಧ್ವಾಧಃ ಸಂಸ್ಥಿತಾವೇತೌ ಸಂಯೋಜಯತಿ ಯೋಗವಿತ್ ॥ 41 ॥
ಹಕಾರೇಣ ಬಹಿರ್ಯಾತಿ ಸಕಾರೇಣ ವಿಶೇತ್ಪುನಃ ।
ಹಂಸಹಂಸೇತ್ಯಮುಮ ಮನ್ತ್ರಂ ಜೀವೋ ಜಪತಿ ಸರ್ವದಾ ॥ 42 ॥
ಷಟ್ಶತಾನಿತ್ವಹೋರಾತ್ರೇ ಸಹಸ್ರಾಣ್ಯೇಕವಿಂಶತಿಃ ।
ಏತತ್ಸಂಖ್ಯಾನ್ವಿತಂ ಮನ್ತ್ರ ಜೀವೋ ಜಪತಿ ಸರ್ವದಾ ॥ 43 ॥
ಅಜಪಾ ನಾಮ ಗಾಯತ್ರೀ ಯೋಗಿನಾಂ ಮೋಕ್ಷದಾಯಿನೀ ।
ಅಸ್ಯಾಃ ಸಂಕಲ್ಪಮಾತ್ರೇಣ ಸರ್ವಪಾಪೈಃ ಪ್ರಮುಚ್ಯತೇ ॥ 44 ॥
ಅನಯಾ ಸದೃಶೀ ವಿದ್ಯಾ ಅನಯಾ ಸದೃಶೋ ಜಪಃ ।
ಅನಯಾ ಸದೃಶಂ ಜ್ಞಾನಂ ನ ಭೂತಂ ನ ಭವಿಷ್ಯತಿ ॥ 45 ॥
ಕುನ್ದಲಿನ್ಯಾಃ ಸಮುದ್ಭೂತಾ ಗಾಯತ್ರೀ ಪ್ರಾಣಧಾರಿಣೀ ।
ಪ್ರಾಣವಿದ್ಯಾ ಮಹಾವಿದ್ಯಾ ಯಸ್ತಾಂ ವೇತ್ತಿ ಸ ಯೋಗವಿತ್ ॥ 46 ॥
ಕನ್ದೋರ್ಧ್ವಂ ಕುಂಡಲೀ ಶಕ್ತಿರಷ್ಟಧಾ ಕುಂಡಲಾಕೃತಿ ।
ಬ್ರಹ್ಮದ್ವಾರಮುಖಂ ನಿತ್ಯಂ ಮುಖೇನಾಚ್ಛಾದ್ಯ ತಿಷ್ಠತಿ ॥ 47 ॥
ಯೇನ ದ್ವಾರೇಣ ಗನ್ತವ್ಯಂ ಬ್ರಹ್ಮಸ್ಥಾನಮನಾಮಯಮ್ ।
ಮುಖೇನಾಚ್ಛಾದ್ಯ ತದ್ದ್ವಾರಂ ಪ್ರಸುಪ್ತಾ ಪರಮೇಶ್ವರೀ ॥ 48 ॥
ಪ್ರಬುದ್ಧಾ ವಹ್ನಿಯೋಗೇನ ಮನಸಾ ಮಾರುತಾ ಹತಾ ।
ಸೂಚೀವದ್ ಗುಣಮಾದಾಯ ವ್ರಜತ್ಯೂರ್ಧ್ವಂ ಸುಷುಮ್ಣಯಾ ॥ 49 ॥
ಪ್ರಸ್ಫುರದ್ಭುಜಗಾಕಾರಾ ಪದ್ಮತನ್ತುನಿಭಾ ಶುಭಾ ।
ಪ್ರಬುದ್ಧಾ ವಹ್ನಿಯೋಗೇನ ವ್ರಜತಿ ಊರ್ಧ್ವಂ ಸುಷುಮ್ಣಯಾ ॥ 50 ॥
ಉದ್ಘಟಯೇತ್ಕಪಾತಂ ತು ಯಥಾ ಕುಂಚಿಕಯಾ ಹಠಾತ್ ।
ಕುಂಡಲಿನ್ಯಾ ತಥಾ ಯೋಗೀ ಮೋಕ್ಷದ್ವಾರಂ ಪ್ರಭೇದಯೇತ್ ॥ 51 ॥
ಕೃತ್ವಾ ಸಮ್ಪುಟಿತೌ ಕರೌ ದೃಢತರಂ ಬದ್ಧವಾತು ಪದ್ಮಾಸನಂ
ಗಾಢಂ ವಕ್ಷಸಿ ಸನ್ನಿಧಾಯ ಚಿಬುಕಂ ಧ್ಯಾತ್ವಾ ತತ್ಪ್ರೇಕ್ಷಿತಮ್ ।
ವಾರಂ ವಾರಮಪಾನಮೂರ್ಧ್ವಮನಿಲಂ ಪ್ರೋಚ್ಚಾರಯೇತ್ಪೂರಿತಂ
ಮುಂಚನ್ಪ್ರಾಣಮುಪೈತಿ ಬೋಧಮತುಲಂ ಶಕ್ತಿಪ್ರಬೋಧಾನ್ನರಃ ॥ 52 ॥
ಅಂಗಾನಾಂ ಮರ್ದನಂ ಕುರ್ಯಾಚ್ಛ್ರಮಜಾತೇನ ವಾರಿಣಾ ।
ಕಟ್ವಾಮ್ಲಲವಣತ್ಯಾಗೀ ಕ್ಷೀರಭೋಜನಮಾಚರೇತ್ ॥ 53 ॥
ಬ್ರಹ್ಮಚಾರೀ ಮಿತಾಹಾರೀ ತ್ಯಾಗೀ ಯೋಗಪರಾಯಣಃ ।
ಅಬ್ದಾದುರ್ಧ್ವಂ ಭವೇತ್ಸಿದ್ಧೋ ನಾತ್ರ ಕಾರ್ಯಾ ವಿಚಾರಣಾ ॥ 54 ॥
ಸುಸ್ನಿಗ್ಧಂ ಮಧುರಾಹಾರಂ ಚತುರ್ಥಾಂಶವಿವರ್ಜಿತಮ್ ।
ಭುಜ್ಯತೇ ಸುರಸಮ್ಪ್ರೀತ್ಯೈ ಮಿತಾಹಾರಃ ಸ ಉಚ್ಯತೇ ॥ 55 ॥
ಕನ್ದೋರ್ಧ್ವಂ ಕುಂಡಲೀ ಶಕ್ತಿರಷ್ಟಧಾ ಕುಂಡಲಾಕೃತಿಃ ।
ಬನ್ಧನಾಯ ಚ ಮೂಢಾನಾಂ ಯೋಗಿನಾಂ ಮೋಕ್ಷದಾ ಸ್ಮೃತಾ ॥ 56 ॥
ಮಹಾಮುದ್ರಾಂ ನಮೋಮುದ್ರಾಮುಡ್ಡಿಯಾನಂ ಜಲನ್ಧರಮ್ ।
ಮೂಲಬನ್ಧಂ ಚ ಯೋ ವೇತ್ತಿ ಸ ಯೋಗೀ ಸಿದ್ಧಿಭಾಜನಮ್ ॥ 57 ॥
ಶೋಧನಂ ನಾಡಿಜಾಲಸ್ಯ ಚಾಲನಂ ಚನ್ದ್ರಸೂರ್ಯಯೋಃ ।
ರಸಾನಾಂ ಶೋಷಣಂ ಚೈವ ಮಹಾಮುದ್ರಾಭಿಧೀಯತೇ ॥ 58 ॥
ವಕ್ಷೋನ್ಯಸ್ತಹನುರ್ನಿಪೀಡ್ಯ ಸುಚಿರಂ ಯೋನಿಂ ಚ ವಾಮಾಂಘ್ರಿಣಾ
ಹಸ್ತಾಭ್ಯಾಮವಧಾರಿತಂ ಪ್ರಸರಿತಂ ಪಾದಂ ತಥಾ ದಕ್ಷಿಣಮ್ ।
ಆಪೂರ್ಯ ಶ್ವಸನೇನ ಕುಕ್ಷಿಯುಗಲಂ ಬದ್ಧ್ವಾ ಶನೈ ರೇಚಯೇದ್
ಏಷಾ ಪಾತಕನಾಶಿನೀ ಸುಮಹತೀ ಮುದ್ರಾ ನೄಣಾಂ ಪ್ರೋಚ್ಯತೇ ॥ 59 ॥
ಚನ್ದ್ರಾಂಗೇನ ಸಮಭ್ಯಸ್ಯ ಸೂರ್ಯಾಂಗೇನಾಭ್ಯಸೇತ್ ಪುನಃ ।
ಯಾವತ್ ತುಲ್ಯಾ ಭವೇತ್ಸಂಖ್ಯಾ ತತೋ ಮುದ್ರಾಂ ವಿಸರ್ಜಯೇತ್ ॥ 60 ॥
ನ ಹಿ ಪಥ್ಯಮಪಥ್ಯಂ ವಾ ರಸಾಃ ಸರ್ವೇಽಪಿ ನೀರಸಾಃ ।
ಅಪಿ ಮುಕ್ತಂ ವಿಷಂ ಘೋರಂ ಪೀಯೂಷಮಪಿ ಜೀರ್ಯತೇ ॥ 61 ॥
ಕ್ಷಯಕುಷ್ಠಗುದಾವರ್ತಗುಲ್ಮಾಜೀರ್ಣಪುರೋಗಮಾಃ ।
ರೋಗಾಸ್ತಸ್ಯ ಕ್ಷಯಂ ಯಾನ್ತಿ ಮಹಾಮುದ್ರಾಂ ತು ಯೋಽಭ್ಯಸೇತ್ ॥ 62 ॥
ಕಥಿತೇಯಂ ಮಹಾಮುದ್ರಾ ಮಹಾಸಿದ್ಧಿಕರಾ ನೄಣಾಮ್ ।
ಗೋಪನೀಯಾ ಪ್ರಯತ್ನೇನ ನ ದೇಯಾ ಯಸ್ಯ ಕಸ್ಯಚಿತ್ ॥ 63 ॥
ಕಪಾಲಕುಹರೇ ಜಿಹ್ವಾ ಪ್ರವಿಷ್ಟಾ ವಿಪರೀತಗಾ ।
ಭ್ರುವೋರನ್ತರ್ಗತಾ ದೃಷ್ಟಿರ್ಮುದ್ರಾ ಭವತಿ ಖೇಚರೀ ॥ 64 ॥
ನ ರೋಗೋ ಮರಣಂ ತನ್ದ್ರಾ ನ ನಿದ್ರಾ ನ ಕ್ಷುಧಾ ತೃಷಾ ।
ನ ಚ ಮೂರ್ಚ್ಛಾ ಭವೇತ್ತಸ್ಯ ಯೋ ಮುದ್ರಾಂ ವೇತ್ತಿ ಖೇಚರೀಮ್ ॥ 65 ॥
ಪೀಡ್ಯತೇ ನ ಸ ರೋಗೇಣ ಲಿಪ್ಯತೇ ನ ಚ ಕರ್ಮಣಾ ।
ಬಾಧ್ಯತೇ ನ ಸ ಕಾಲೇನ ಯೋ ಮುದ್ರಾಂ ವೇತ್ತಿ ಖೇಚರೀಮ್ ॥ 66 ॥
ಚಿತ್ತಂ ಚರತಿ ಖೇ ಯಸ್ಮಾಜ್ಜಿಹ್ವಾ ಚರತಿ ಖೇ ಗತಾ ।
ತೇನೈಷಾ ಖೇಚರೀ ನಾಮ ಮುದ್ರಾ ಸಿದ್ಧೈರ್ನಿರೂಪಿತಾ ॥ 67 ॥
ಬಿನ್ದುಮೂಲಂ ಶರೀರಂ ತು ಶಿರಾಸ್ತತ್ರ ಪ್ರತಿಷ್ಠಿತಾಃ ।
ಭಾವಯನ್ತಿ ಶರೀರಂ ಯಾ ಆಪಾದತಲಮಸ್ತಕಮ್ ॥ 68 ॥
ಖೇಚರ್ಯಾ ಮುದ್ರಿತಂ ಯೇನ ವಿವರಂ ಲಮ್ಬಿಕೋರ್ಧ್ವತಃ ।
ನ ತಸ್ಯ ಕ್ಷರತೇ ಬಿನ್ದುಃ ಕಾಮಿನ್ಯಾಲಿಂಗಿತಸ್ಯ ಚ ॥ 69 ॥
ಯಾವದ್ಬಿನ್ದುಃ ಸ್ಥಿತೋ ದೇಹೇ ತಾವತ್ಕಾಲಭಯಂ ಕುತಃ ।
ಯಾವದ್ಬದ್ಧಾ ನಭೋಮುದ್ರಾ ತಾವದ್ಬಿನ್ದುರ್ನ ಗಚ್ಛತಿ ॥ 70 ॥
ಚಲಿತೋಽಪಿ ಯದಾ ಬಿನ್ದುಃ ಸಮ್ಪ್ರಾಪ್ತಶ್ಚ ಹುತಾಶನಮ್ ।
ವ್ರಜತ್ಯೂರ್ಧ್ವಂ ಹೃತಃ ಶಕ್ತ್ಯಾ ನಿರುದ್ಧೋ ಯೋನಿಮುದ್ರಯಾ ॥ 71 ॥
ಸ ಪುನರ್ದ್ವಿವಿಧೋ ಬಿನ್ದುಃ ಪಂಡುರೋ ಲೋಹಿತಸ್ತಥಾ ।
ಪಾಂಡುರಂ ಶುಕ್ರಮಿತ್ಯಾಹುರ್ಲೋಹಿತಂ ತು ಮಹಾರಾಜಃ ॥ 72 ॥
ಸಿನ್ದೂರದ್ರವಸಂಕಾಶಂ ರವಿಸ್ಥಾನೇ ಸ್ಥಿತಂ ರಜಃ ।
ಶಶಿಸ್ಥಾನೇ ಸ್ಥಿತೋ ಬಿನ್ದುಸ್ತಯೋರೈಕ್ಯಂ ಸುದುರ್ಲಭಮ್ ॥ 73 ॥
ಬಿನ್ದುಃ ಶಿವೋ ರಜಃ ಶಕ್ತಿರ್ಬಿನ್ದುಮಿನ್ದೂ ರಜೋ ರವಿಃ ।
ಉಭಯೋಃ ಸಂಗಮಾದೇವ ಪ್ರಾಪ್ಯತೇ ಪರಮಂ ಪದಮ್ ॥ 74 ॥
ವಾಯುನಾ ಶಕ್ತಿಚಾರೇಣ ಪ್ರೇರಿತಂ ತು ಮಹಾರಜಃ ।
ಬಿನ್ದುನೈತಿ ಸಹೈಕತ್ವಂ ಭವೇದ್ದಿವ್ಯಂ ವಪುಸ್ತದಾ ॥ 75 ॥
ಶುಕ್ರಂ ಚನ್ದ್ರೇಣ ಸಂಯುಕ್ತಂ ರಜಃ ಸೂರ್ಯೇಣ ಸಂಯುತಮ್ ।
ತಯೋಃ ಸಮರಸೈಕತ್ವಂ ಯೋಜಾನಾತಿ ಸ ಯೋಗವಿತ್ ॥ 76 ॥
ಉಡ್ಡೀನಂ ಕುರುತೇ ಯಸ್ಮಾದವಿಶ್ರಾನ್ತಂ ಮಹಾಖಗಃ ।
ಉಡ್ಡೀಯಾನಂ ತದೇವ ಸ್ಯಾತ್ತವ ಬನ್ಧೋಽಭಿಧೀಯತೇ ॥ 77 ॥
ಉದರಾತ್ಪಶ್ಚಿಮೇ ಭಾಗೇ ಹ್ಯಧೋ ನಾಭೇರ್ನಿಗದ್ಯತೇ ।
ಉಡ್ಡೀಯಾನಸ್ಯ ಬನ್ಧೋಽಯಂ ತತ್ರ ಬನ್ಧೋ ವಿಧೀಯತೇ ॥ 78 ॥
ಬಧ್ನಾತಿ ಹಿ ಸಿರಾಜಾಲಮಧೋಗಾಮಿ ಶಿರೋಜಲಮ್ ।
ತತೋ ಜಾಲನ್ಧರೋ ಬನ್ಧಃ ಕಂಠದುಃಖೌಘನಾಶನಃ ॥ 79 ॥
ಜಾಲನ್ಧರೇ ಕೃತೇ ಬನ್ಧೇ ಕಂಠಸಂಕೋಚಲಕ್ಷಣೇ ।
ಪೀಯೂಷಂ ನ ಪತತ್ಯಗ್ನೌ ನ ಚ ವಾಯುಃ ಪ್ರಕುಪ್ಯತಿ ॥ 80 ॥
ಪಾರ್ಷ್ಣಿಭಾಗೇನ ಸಮ್ಪೀಡ್ಯ ಯೋನಿಮಾಕುಂಚಯೇದ್ಗುದಮ್ ।
ಅಪಾನಮೂರ್ಧ್ವಮಾಕೃಷ್ಯ ಮೂಲಬನ್ಧೋಽಭಿಧೀಯತೇ ॥ 81 ॥
ಅಪಾನಪ್ರಾಣಯೋರೈಕ್ಯಾತ್ ಕ್ಷಯಾನ್ಮೂತ್ರಪುರೀಷಯೋಃ ।
ಯುವಾ ಭವತಿ ವೃದ್ಧೋಽಪಿ ಸತತಂ ಮೂಲಬನ್ಧನಾತ್ ॥ 82 ॥
ಪದ್ಮಾಸನಂ ಸಮಾರುಹ್ಯ ಸಮಕಾಯಶಿರೋಧರಃ ।
ನಾಸಾಗ್ರದೃಷ್ಟಿರೇಕಾನ್ತೇ ಜಪೇದೋಂಕಾರಮವ್ಯಯಮ್ ॥ 83 ॥
ಭೂರ್ಭುವಃ ಸ್ವರಿಮೇ ಲೋಕಾಃ ಸೋಮಸೂರ್ಯಾಗ್ನಿದೇವತಾಃ ।
ಯಸ್ಯಾ ಮಾತ್ರಾಸು ತಿಷ್ಠನ್ತಿ ತತ್ಪರಂ ಜ್ಯೋತಿರೋಮಿತಿ ॥ 84 ॥
ತ್ರಯಃಕಾಲಾಸ್ತ್ರಯೋ ವೇದಾಸ್ತ್ರಯೋ ಲೋಕಾಸ್ತ್ರಯಃ ಸ್ವೇರಾಃ ।
ತ್ರಯೋದೇವಾಃ ಸ್ಥಿತಾ ಯತ್ರ ತತ್ಪರಂ ಜ್ಯೋತಿರೋಮಿತಿ ॥ 85 ॥
ಕ್ರಿಯಾ ಚೇಚ್ಛಾ ತಥಾ ಜ್ಞಾನಾಬ್ರಾಹ್ಮೀರೌದ್ರೀಶ್ಚ ವೈಷ್ಣವೀ ।
ತ್ರಿಧಾಶಕ್ತಿಃ ಸ್ಥಿತಾ ಯತ್ರ ತತ್ಪರಂ ಜ್ಯೋತಿರೋಮಿತಿ ॥ 86 ॥
ಆಕಾರಾಶ್ಚ ತಥೋಕಾರೋಮಕಾರೋ ಬಿನ್ದುಸಂಜ್ಞಕಃ ।
ತಿಸ್ರೋಮಾತ್ರಾಃ ಸ್ಥಿತಾ ಯತ್ರ ತತ್ಪರಂ ಜ್ಯೋತಿರೋಮಿತಿ ॥ 87 ॥
ವಚಸಾ ತಜ್ಜಯೇದ್ಬೀಜಂ ವಪುಷಾ ತತ್ಸಮಭ್ಯಸೇತ್ ।
ಮನಸಾ ತತ್ಸ್ಮರೇನ್ನಿತ್ಯಂ ತತ್ಪರಂ ಜ್ಯೋತಿರೋಮಿತಿ ॥ 88 ॥
ಶುಚಿರ್ವಾಪ್ಯಶುಚಿರ್ವಾಪಿ ಯೋ ಜಪೇತ್ಪ್ರಣವಂ ಸದಾ ।
ಲಿಪ್ಯತೇ ನ ಸ ಪಾಪೇನ ಪದ್ಮಪತ್ರಮಿವಾಮ್ಭಸಾ ॥ 89 ॥
ಚಲೇ ವಾತೇ ಚಲೋ ಬಿನ್ದುರ್ನಿಶ್ಚಲೇ ನಿಶ್ಚಲೋ ಭವೇತ್ ।
ಯೋಗೀ ಸ್ಥಾಣುತ್ವಮಾಪ್ನೋತಿ ತತೋ ವಾಯುಂ ನಿರೋಧಯೇತ್ ॥ 90 ॥
ಯಾವದ್ವಾಯುಃ ಸ್ಥಿತೋ ದೇಹೇ ತಾವಜ್ಜೀವನಮುಚ್ಯತೇ ।
ಮರಣಂ ತಸ್ಯ ನಿಷ್ಕ್ರಾನ್ತಿಸ್ತತೋ ವಾಯುಂ ನಿರೋಧಯೇತ್ ॥ 91 ॥
ಯಾವದ್ಬದ್ಧೋ ಮರುದ್ದೇಹೇ ಯಾವಚ್ಚಿತ್ತಂ ನಿರಾಕುಲಮ್ ।
ಯಾವದ್ದೃಷ್ಟಿರ್ಭ್ರುವೋರ್ಮಧ್ಯೇ ತಾವತ್ಕಾಲಭಯಂ ಕುತಃ ॥ 92 ॥
ಅತಃ ಕಾಲಭಯಾದ್ ಬ್ರಹ್ಮಾ ಪ್ರಾಣಾಯಾಮಪರಾಯಣಃ ।
ಯೋಗಿನೋ ಮುನಯಶ್ಚೈವ ತತೋ ವಾಯುಂ ನಿರೋಧಯೇತ್ ॥ 93 ॥
ಷಟ್ತ್ರಿಂಶದಂಗುಲೋಹಂಸಃ ಪ್ರಯಾಣಂ ಕುರುತೇ ಬಹಿಃ ।
ವಾಮದಕ್ಷಿಣಮಾರ್ಗೇಣ ತತಃ ಪ್ರಾಣೋಽಭಿಧೀಯತೇ ॥ 94 ॥
ಶುದ್ಧಿಮೇತಿ ಯದಾ ಸರ್ವಂ ನಾಡೀಚಕ್ರಂ ಮಲಾಕುಲಮ್ ।
ತದೈವ ಜಾಯತೇ ಯೋಗೀ ಪ್ರಾಣಸಂಗ್ರಹಣೇ ಕ್ಷಮಃ ॥ 95 ॥
ಬದ್ಧಪದ್ಮಾಸನೋ ಯೋಗೀ ಪ್ರಾಣಂ ಚನ್ದ್ರೇಣ ಪೂರಯೇತ್ ।
ಧಾರಯಿತ್ವಾ ಯಥಾಶಕ್ತಿ ಭೂಯಃ ಸೂರ್ಯೇಣ ರೇಚಯೇತ್ ॥ 96 ॥
ಅಮೃತಂ ದಧಿಸಂಕಾಶಂ ಗೋಕ್ಷೀರರಜತೋಪಮಮ್ ।
ಧ್ಯಾತ್ವಾ ಚನ್ದ್ರಮಸೋ ಬಿಮ್ಬಂ ಪ್ರಾಣಾಯಾಮೀ ಸುಖೀ ಭವೇತ್ ॥ 97 ॥
ದಕ್ಷಿಣೋ ಶ್ವಾಸಮಾಕೃಷ್ಯ ಪೂರಯೇದುದರಂ ಶನೈಃ ।
ಕುಮ್ಭಯಿತ್ವಾ ವಿಧಾನೇನ ಪುರಶ್ಚನ್ದ್ರೇಣ ರೇಚಯೇತ್ ॥ 98 ॥
ಪ್ರಜ್ವಲಜ್ಜ್ವಲನಜ್ವಾಲಾಪುಂಜಮಾದಿತ್ಯಮಂಡಲಮ್ ।
ಧ್ಯಾತ್ವಾ ನಾಭಿಸ್ಥಿತಂ ಯೋಗೀ ಪ್ರಾಣಾಯಾಮೇ ಸುಖೀ ಭವೇತ್ ॥ 99 ॥
ಪ್ರಾಣಂ ಚೋದಿಡಯಾ ಪಿಬೇನ್ಪರಿಮಿತಂ ಭೂಯೋಽನ್ಯಯಾ ರೇಚಯೇತ್
ಪೀತ್ವಾ ಪಿಂಗಲಯಾ ಸಮೀರಣಮಥೋ ಬದ್ಧ್ವಾ ತ್ಯಜೇದ್ವಾಮಯಾ ।
ಸೂರ್ಯಚನ್ದ್ರಮಸೋರನೇನ ವಿಧಿನಾ ಬಿಮ್ಬದ್ವಯಂ ಧ್ಯಾಯತಃ
ಶುದ್ಧಾ ನಾಡಿಗಣಾ ಭವನ್ತಿ ಯಮಿನೋ ಮಾಸತ್ರಯಾದೂರ್ಧ್ವತಃ ॥ 100 ॥
ಯಥೇಷ್ಠಂ ಧಾರಣಂ ವಾಯೋರನಲಸ್ಯ ಪ್ರದೀಪನಮ್ ।
ನಾದಾಭಿವ್ಯಕ್ತಿರಾರೋಗ್ಯಂ ಜಾಯತೇ ನಾಡಿಶೋಧನಾತ್ ॥ 101 ॥
॥ ಇತಿ ಶ್ರೀ ಗೋರಕ್ಷನಾಥಪ್ರಣೀತಃ ಗೋರಕ್ಷಶತಕಂ ಸಮ್ಪೂರ್ಣಮ್ ॥