॥ Maanasollaasa Bengali Lyrics ॥
॥ মানসোল্লাস ॥
॥ শ্রীদক্ষিণামূর্তিস্তোত্রম্ ॥
বিশ্বং দর্পণদৃশ্যমাননগরীতুল্যং নিজান্তর্গতং
পশ্যন্নাত্মনি মায়যা বহিরিবোদ্ভূতং যথা নিদ্রয়া ।
যঃ সাক্ষাৎকুরুতে প্রবোধসময়ে স্বাত্মানমেবাদ্বয়ং
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ১ ॥
বীজস্যান্তরিবাঙ্কুরো জগদিদং প্রাঙ্নির্বিকল্পং পুনঃ
মায়াকল্পিতদেশকালকলনাবৈচিত্র্যচিত্রীকৃতম্ ।
মায়াবীব বিজৃম্ভয়ত্যপি মহায়োগীব যঃস্বেচ্ছয়া
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ২ ॥
যস্যৈব স্ফুরণং সদাত্মকমসৎকল্পার্থগং ভাসতে
সাক্ষাত্তত্ত্বমসীতি বেদবচসা যো বোধয়ত্যাশ্রিতান্ ।
যৎসাক্ষাৎকরণাদ্ভবেন্নপুনরাবৃত্তির্ভবাম্ভোনিধৌ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৩ ॥
নানাচ্ছিদ্রঘটোদরস্থিতমহাদীপপ্রভাভাস্বরং
জ্ঞানং যস্য তু চক্ষুরাদিকরণদ্বারা বহিঃস্পন্দতে ।
জানামীতি তমেব ভান্তমনুভাত্যেতৎসমস্তং জগৎ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৪ ॥
দেহং প্রাণমপীন্দ্রিয়াণ্যপি চলাং বুদ্ধিং চ শূন্যং বিদুঃ
স্ত্রীবালান্ধজডোপমাস্ত্বহমিতি ভ্রান্তা ভৃশং বাদিনঃ ।
মায়াশক্তিবিলাসকল্পিতমহাব্যামোহসংহারিণে
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৫ ॥
রাহুগ্রস্তদিবাকরেন্দুসদৃশো মায়াসমাচ্ছাদনাৎ
সন্মাত্রঃ করণোপসংহরণতো যোঽভূৎসুষুপ্তঃ পুমান্ ।
প্রাগস্বাপ্সমিতি প্রবোধসময়ে যঃ প্রত্যভিজ্ঞায়তে
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৬ ॥
বাল্যাদিষ্বপি জাগ্রদাদিষু তথা সর্বাস্ববস্থাস্বপি
ব্যাবৃত্তাস্বনুবর্তমানমহমিত্যন্তঃ স্ফুরন্তং সদা ।
স্বাত্মানং প্রকটীকরোতি ভজতাং যো মুদ্রয়া ভদ্রয়া
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৭ ॥
বিশ্বং পশ্যতি কার্যকারণতয়া স্বস্বামিসংবন্ধতঃ
শিষ্যাচার্যতয়া তথৈব পিতৃপুত্রাদ্যাত্মনা ভেদতঃ ।
স্বপ্নে জাগ্রতি বা এষ পুরুষো মায়াপরিভ্রামিতঃ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৮ ॥
ভূরম্ভাংস্যনলোঽনিলোঽম্বরমহর্নাথো হিমাংশুঃ পুমান্
ইত্যাভাতি চরাচরাত্মকমিদং যস্যৈব মূর্ত্যষ্টকম্ ।
নান্যৎকিঞ্চন বিদ্যতে বিমৃশতাং যস্মাৎপরস্মাদ্বিভোঃ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৯ ॥
সর্বাত্মৎবমিতি স্ফুটীকৃতমিদং যস্মাদমুষ্মিংস্তবে
তেনাস্য শ্রবণাত্তদর্থমননাদ্ধ্যানাচ্চ সংকীর্তনাৎ ।
সর্বাত্মৎবমহাবিভূতিসহিতং স্যাদীশ্বরৎবং স্বতঃ
সিদ্ধ্যেত্তৎপুনরষ্টধা পরিণতং চৈশ্বর্যমব্যাহতম্ ॥ ১০ ॥
॥ মানসোল্লাস ॥
বিশ্বং দর্পণদৃশ্যমাননগরীতুল্যং নিজান্তর্গতং
পশ্যন্নাত্মনি মায়যা বহিরিবোদ্ভূতং যথা নিদ্রয়া ।
যঃ সাক্ষাৎকুরুতে প্রবোধসময়ে স্বাত্মানমেবাদ্বয়ং
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ১ ॥
মঙ্গল়ং দিশতু মে বিনায়কো
মঙ্গল়ং দিশতু মে সরস্বতী ।
মঙ্গল়ং দিশতু মে মহেশ্বরো
মঙ্গল়ং দিশতু মে সদাশিবঃ ॥ ১ ॥
আত্মলাভাৎপরো লাভো নাস্তীতি মুনয়ো বিদুঃ ।
তল্লাভার্থং কবিঃ স্তৌতি স্বাত্মানং পরমেশ্বরম্ ॥ ২ ॥
স্বেচ্ছয়া সৃষ্টমাবিশ্য বিশ্বং যো মনসি স্থিতঃ ।
স্তোত্রেণ স্তূয়তেঽনেন স এব পরমেশ্বরঃ ॥ ৩ ॥
অস্তি প্রকাশত ইতি ব্যবহারঃ প্রবর্ততে ।
তচ্চাস্তিৎবং প্রকাশৎবং কস্মিন্নর্থে প্রতিষ্ঠিতম্ ॥ ৪ ॥
কিং তেষু তেষু বাঽর্থেষু কিং বা সর্বাত্মনীশ্বরে ।
ঈশ্বরৎবং চ জীবৎবং সর্বাত্মৎবং চ কীদৃশম্ ॥ ৫ ॥
জানীয়াৎকথং জীবঃ কিং তজ্জ্ঞানস্য সাধনম্ ।
জ্ঞানাত্তস্য ফলং কিং স্যাদেকৎবং চ কথং ভবেৎ ॥ ৬ ॥
সর্বজ্ঞঃ সর্বকর্তা চ কথমাত্মা ভবিষ্যতি ।
শিষ্যং প্রতীত্থং পৃচ্ছন্তং বক্তুমারভতে গুরুঃ ॥ ৭ ॥
অন্তরস্মিন্নিমে লোকা অন্তর্বিশ্বমিদং জগৎ ।
বহির্বন্মায়যাঽঽভাতি দর্পণে স্বশরীরবৎ ॥ ৮ ॥
স্বপ্নে স্বান্তর্গতং বিশ্বং যথা পৃথগিবেক্ষ্যতে ।
তথৈব জাগ্রৎকালেঽপি প্রপঞ্চোঽয়ং বিবিচ্যতাম্ ॥ ৯ ॥
স্বপ্নে স্বসত্তৈবার্থানাং সত্তা নান্যেতি নিশ্চিতা ।
কো জাগ্রতি বিশেষোঽস্তি জডানামাশু নাশিনাম্ ॥ ১০ ॥
স্বপ্নে প্রকাশো ভাবানাং স্বপ্রকাশান্ন হীতরঃ ।
জাগ্রত্যপি তথৈবেতি নিশ্চিন্বন্তি বিপশ্চিতঃ ॥ ১১ ॥
নিদ্রয়া দর্শিতানর্থান্ন পশ্যতি যথোত্থিতঃ ।
সম্যগ্জ্ঞানোদয়াদূর্ধ্বং তথা বিশ্বং ন পশ্যতি ॥ ১২ ॥
অনাদিমায়যা সুপ্তো যদা জীবঃ প্রবুধ্যতে ।
অজন্মনিদ্রমস্বপ্নমদ্বৈতং বুধ্যতে তদা ॥ ১৩ ॥
শ্রুত্যাঽঽচার্যপ্রসাদেন যোগাভ্যাসবশেন চ ।
ঈশ্বরানুগ্রহেণাপি স্বাত্মবোধো যদা ভবেৎ ॥ ১৪ ॥
ভুক্তং যথাঽন্নং কুক্ষিস্থং স্বাত্মৎবেনৈব পশ্যতি ।
পূর্ণাহন্তাকবল়িতং বিশ্বং যোগীশ্বরস্তথা ॥ ১৫ ॥
যথা স্বপ্নে নৃপো ভূৎবা ভুক্ত্বা ভোগান্যথেপ্সিতান্ ।
চতুরঙ্গবলোপেতঃ শত্রুং জিৎবা রণাঙ্গণে ॥ ১৬ ॥
পরাৎপরাজিতো ভূৎবা বনং প্রাপ্য তপশ্চরন্ ।
মুহূর্তমাত্রমাত্মানং মন্যতে কল্পজীবিনম্ ॥ ১৭ ॥
তথৈব জাগ্রৎকালেঽপি মনোরাজ্যং করোত্যসৌ ।
কালনদ্যোঘয়োগেন ক্ষীণমায়ুর্ন পশ্যতি ॥ ১৮ ॥
মেঘচ্ছন্নোংঽশুমালীব মায়যা মোহিতোঽধিকম্ ।
কিঞ্চিৎকর্তা চ কিঞ্চিজ্জ্ঞো লক্ষ্যতে পরমেশ্বরঃ ॥ ১৯ ॥
যদ্যৎকরোতি জানাতি তস্মিন্তস্মিন্পরেশ্বরঃ ।
রাজা বিদ্বান্ স্বসামর্থ্যাদীশ্বরোঽয়মিতীর্যতে ॥ ২০ ॥
জ্ঞানক্রিয়ে শিবেনৈক্যাৎসঙ্ক্রান্তে সর্বজনুষু ।
ঈশ্বরৎবং চ জীবানাং সিদ্ধং তচ্ছক্তিসঙ্গমাৎ ॥ ২১ ॥
অয়ং ঘটোঽয়ং পট ইত্যেবং নানাপ্রতীতিষু ।
অর্কপ্রভেব স্বজ্ঞানং স্বয়মেব প্রকাশতে ॥ ২২ ॥
জ্ঞানং ন চেৎস্বয়ং সিদ্ধং জগদন্ধং তমো ভবেৎ ।
ন চেদস্য ক্রিয়া কাচিৎ ব্যবহারঃ কথং ভবেৎ ॥ ২৩ ॥
ক্রিয়া নাম পরিস্পন্দপরিণামস্বরূপিণী ।
স্পন্দমানে বহির্জ্ঞানে তদঙ্কুরবদুদ্ভবেৎ ॥ ২৪ ॥
উৎপাদ্যপ্রাপ্যসংস্কার্যবিকার্যোপাশ্রয়া ক্রিয়া ।
করোতি গচ্ছত্যুন্মার্ষ্টি ছিনত্তীতি প্রতীয়তে ॥ ২৫ ॥
শিবো ব্রহ্মাদিদেহেষু সর্বজ্ঞ ইতি ভাসতে ।
দেবতির্যঙ্মনুষ্যেষু কিঞ্চিজ্জ্ঞস্তারতম্যতঃ ॥ ২৬ ॥
জরায়ুজোঽণ্ডজশ্চৈব স্বেদজঃ পুনরুদ্ভিদঃ ।
এতে চতুর্বিধাঃ দেহাঃ ক্রমশো ন্যূনবৃত্তয়ঃ ॥ ২৭ ॥
ব্রহ্মাদিস্তম্বপর্যন্তা স্বপ্নকল্পৈব কল্পনা ।
সাক্ষাৎকৃতেঽনবচ্ছিন্নপ্রকাশে পরমাত্মনি ॥ ২৮ ॥
অণোরণীয়ান্মহতো মহীয়ানিতি বেদবাক্ ।
রুদ্রোপনিষদপ্যেতং স্তৌতি সর্বাত্মকং শিবম্ ॥ ২৯ ॥
ঈশ্বরো গুরুরাত্মেতি মূর্তিভেদবিভাগিনে ।
ব্যোমবদ্ব্যাপ্তদেহায় দক্ষিণামূর্তয়ে নমঃ ॥ ৩০ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে প্রথমোল্লাসসংগ্রহঃ ॥ ৩১ ॥
বীজস্যান্তরিবাঙ্কুরো জগদিদং প্রাঙ্নির্বিকল্পং পুনঃ
মায়াকল্পিতদেশকালকলনাবৈচিত্র্যচিত্রীকৃতম্ ।
মায়াবীব বিজৃম্ভয়ত্যপি মহায়োগীব যঃস্বেচ্ছয়া
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ২ ॥
উপাদানং প্রপঞ্চস্য সংয়ুক্তাঃ পরমাণবঃ ।
মৃদন্বিতো ঘটস্তস্মাদ্ভাসতে নেশ্বরান্বিতঃ ॥ ১ ॥
পরমাণুগতা এব গুণা রূপরসাদয়ঃ ।
কার্যে সমানজাতীয়মারভন্তে গুণান্তরম্ ॥ ২ ॥
কার্যং যত্র সমন্বেতি কারণং সমবায়ি তৎ ।
চক্রাদ্যং সাধনং যত্তু ঘটস্যাসমবায়ি তৎ ॥ ৩ ॥
সমবায়িনি তিষ্ঠেদ্যৎ সমবায়্যাশ্রয়ে তথা ।
কার্যেঽবধৃতসামর্থ্যং কল্প্যতেঽসমবায়ি তৎ ॥ ৪ ॥
নিমিত্তং কারণং তেষামীশ্বরশ্চ কুলালবৎ ।
যৎকার্যং জায়তে যস্মাত্তস্মিন্ তৎপ্রতিতিষ্ঠতি ॥ ৫ ॥
মৃত্তিকায়াং ঘটস্তন্তৌ পটঃ স্বর্ণেঽঙ্গুলীয়কম্ ।
ইতি বৈশেষিকাঃ প্রাহুস্তথা নৈয়ায়িকা অপি ॥ ৬ ॥
রজঃ সত্ত্বং তমশ্চেতি প্রধানস্য গুণাস্ত্রয়ঃ ।
রজো রক্তং চলং তেষু সত্ত্বং শুক্লং প্রকাশকম্ ॥ ৭ ॥
তমঃ কৃষ্ণং চাবরকং সৃষ্টিস্থিত্যন্তহেতবঃ ।
ইতি সাংখ্যাশ্চ ভাষন্তে তেষাং দূষণ উচ্যতে ॥ ৮ ॥
অঙ্কুরাদিফলান্তেষু কার্যেষ্বস্তিৎবমিষ্যতে ।
কুত আগত্য সম্বদ্ধা বটবীজেষু তে কণাঃ ॥ ৯ ॥
কারণানুগতং কার্যমিতি সর্বৈশ্চ সম্মতম্ ।
তস্মাৎসত্তা স্ফুরত্তা চ সর্বত্রাপ্যনুবর্ততে ॥ ১০ ॥
পুষ্পে ফলৎবমাপন্নে ক্ষীরে চ দধিতাং গতে ।
বিজাতীয়াঃ প্রতীয়ন্তে গুণা রূপরসাদয়ঃ ॥ ১১ ॥
কারণং কার্যমংশোংঽশী জাতিব্যক্তী গুণী গুণঃ ।
ক্রিয়া ক্রিয়াবানিত্যাদ্যাঃ প্রকাশস্যৈব কল্পনাঃ ॥ ১২ ॥
চৈতন্যং পরমাণূনাং প্রধানস্যাপি নেষ্যতে ।
জ্ঞানক্রিয়ে জগৎক্লৃপ্তৌ দৃশ্যেতে চেতনাশ্রয়ে ॥ ১৩ ॥
কালরূপক্রিয়াশক্ত্যা ক্ষীরাৎপরিণমেদ্দধি ।
জ্ঞাতৃজ্ঞানজ্ঞেয়রূপং জ্ঞানশক্ত্যা ভবেজ্জগৎ ॥ ১৪ ॥
জ্ঞানং দ্বিধা বস্তুমাত্রদ্যোতকং নির্বিকল্পকম্ ।
সবিকল্পন্তু সংজ্ঞাদিদ্যোতকৎবাদনেকধা ॥ ১৫ ॥
সঙ্কল্পসংশয়ভ্রান্তিস্মৃতিসাদৃশ্যনিশ্চয়াঃ ।
ঊহোঽনধ্যবসায়শ্চ তথাঽন্যেনুভবা অপি ॥ ১৬ ॥
প্রত্যক্ষমেকং চার্বাকাঃ কণাদসুগতৌ পুনঃ ।
অনুমানঞ্ চ তচ্চাপি সাংখ্যাঃ শব্দং চ তে অপি ॥ ১৭ ॥
ন্যায়ৈকদর্শিনোপ্যবেমুপমানং চ কে চন ।
অর্থাপত্ত্যা সহৈতানি চৎবার্যাহ প্রভাকরঃ ॥ ১৮ ॥
অভাবষষ্ঠান্যেতানি ভাট্টা বেদান্তিনস্তথা ।
সম্ভবৈতিহ্যযুক্তানি তানি পৌরাণিকা জগুঃ ॥ ১৯ ॥
দ্রব্যং গুণস্তথা কর্ম সামন্যং চ বিশেষকম্ ।
সমবায়ং চ কাণাদাঃ পদার্থান্ষট্প্রচক্ষতে ॥ ২০ ॥
নব দ্রব্যাণি ভূতানি দিক্কালাত্মমনাংসি চ ।
চতুর্বিংশতিরেব স্যুর্গুণাঃ শব্দাদিপঞ্চকম্ ॥ ২১ ॥
পরিমাণং চ সঙ্খ্যা চ দ্বৌ সংয়োগবিভাগকৌ ।
স্বভাবতঃ পৃথক্ত্বং চ গুরুৎবং দ্রবতা পুনঃ ॥ ২২ ॥
পরৎবং চাপরৎবং চ স্নেহঃ সংস্কার ইত্যপি ।
ধীর্দ্বেষসুখদুঃখেচ্ছাধর্মাধর্মপ্রয়ত্নকাঃ ॥ ২৩ ॥
সংস্কারস্ত্রিবিধো বেগ ইষ্বাদের্গতিকারণম্ ।
দৃষ্টশ্রুতানুভূতার্থস্মৃতিহেতুশ্চ ভাবনা ॥ ২৪ ॥
স্থিতস্থাপকতা নাম পূর্ববৎস্থিতিকারণম্ ।
আকৃষ্টশাখাভূর্জাদৌ স্পষ্টমেবোপলক্ষ্যতে ॥ ২৫ ॥
উৎক্ষেপণমবক্ষেপো গমনং চ প্রসারণম্ ।
আকুঞ্চনমিতি প্রাহুঃ কর্ম পঞ্চবিধং বুধাঃ ॥ ২৬ ॥
সামান্যং দ্বিবিধং প্রোক্তং পরং চাপরমেব চ ।
পরং সত্তৈব সর্বত্র তদনুস্যূতবর্তনম্ ॥ ২৭ ॥
দ্রব্যৎবং চ গুণৎবাদ্যং সামান্যমপরং তথা ।
বিশেষাঃ স্যুরনন্তাস্তে ব্যাবৃত্তিজ্ঞানহেতবঃ ॥ ২৮ ॥
রূপস্যেব ঘটে নিত্যঃ সম্বন্ধঃ সমবায়কঃ ।
কালাকাশদিগাত্মানো নিত্যাশ্চ বিভবশ্চ তে ॥ ২৯ ॥
চতুর্বিধাঃ পরিচ্ছিন্না নিত্যাশ্চ পরমাণবঃ ।
ইতি বৈশেষিকমতে পদার্থাঃ ষট্ প্রকীর্তিতাঃ ॥ ৩০ ॥
মায়া প্রধানমব্যক্তমবিদ্যাঽজ্ঞানমক্ষরম্ ।
অব্যাকৃতং চ প্রকৃতিঃ তম ইত্যভিধীয়তে ॥ ৩১ ॥
মায়ায়াং ব্রহ্মচৈতন্যপ্রতিবিম্বানুষঙ্গতঃ ।
মহৎকালপুমাংসঃ স্যুঃ মহত্তত্ত্বাদহংকৃতিঃ ॥ ৩২ ॥
তামসাৎস্যুরহঙ্কারাৎখানিলাগ্ন্যম্বুভূময়ঃ ।
শব্দঃ স্পর্শশ্চ রূপং চ রসো গন্ধোপ্যনুক্রমাৎ ॥ ৩৩ ॥
ইন্দ্রিয়াণাং চ বিষয়া ভূতানামপি তে গুণাঃ ।
দেবাঃ সদাশিবশ্চেশো রুদ্রো বিষ্ণুশ্চতুর্মুখঃ ॥ ৩৪ ॥
সাত্ত্বিকাৎস্যাদহঙ্কারাদন্তঃকরণধীন্দ্রিয়ম্ ।
মনো বুদ্ধিরহঙ্কারশ্চিত্তং করণমান্তরম্ ॥ ৩৫ ॥
সংশয়ো নিশ্চয়ো গর্বঃ স্মরণং বিষয়া অমী ।
চন্দ্রঃ প্রজাপতী রুদ্রঃ ক্ষেত্রজ্ঞ ইতি দেবতাঃ ॥ ৩৬ ॥
শ্রোত্রং ৎবক্চক্ষু জিহ্বা ঘ্রাণং জ্ঞানেন্দ্রিয়ং বিদুঃ ।
দিগ্বাতসূর্যবরুণা নাসত্যৌ দেবতাঃ স্মৃতাঃ ॥ ৩৭ ॥
রাজসাৎস্যুরহঙ্কারাৎকর্মেন্দ্রিয়সমীরণাঃ ।
কর্মেন্দ্রিয়াণি বাক্পাণিঃ পাদঃ পায়ুরুপস্থকম্ ॥ ৩৮ ॥
বচনাদানগমনবিসর্গানন্দসংজ্ঞকাঃ ।
বিষয়া দেবতাস্তেষাং বহ্নীন্দ্রোপেন্দ্রমৃত্যুকাঃ ॥ ৩৯ ॥
প্রাণোপানঃ সমানশ্চোদানব্যানৌ চ বায়বঃ ।
ভূতৈস্তু পঞ্চভিঃ প্রাণৈঃ চতুর্দশভিরিন্দ্রিয়ৈঃ ॥ ৪০ ॥
চতুর্বিংশতিতত্ত্বানি সাঙ্খ্যশাস্ত্রবিদো বিদুঃ ।
মহান্কালঃ প্রধানং চ মায়াবিদ্যে চ পূরুষঃ ॥ ৪১ ॥
ইতি পৌরাণিকাঃ প্রাহুস্ত্রিংশত্তত্ত্বানি তৈঃ সহ ।
বিন্দুনাদৌ শক্তিশিবৌ শান্তাতীতৌ ততঃ পরম্ ॥ ৪২ ॥
ষট্ত্রিংশত্তৎবমিত্যুক্তং শৈবাগমবিশারদৈঃ ।
সর্বে বিকল্পাঃ প্রাগাসন্ বীজেঽঙ্কুর ইবাত্মনি ॥ ৪৩ ॥
ইচ্ছাজ্ঞানক্রিয়ারূপমায়যা তে বিজৃম্ভিতাঃ ।
ইচ্ছাজ্ঞানক্রিয়াপূর্বা যস্মাৎসর্বাঃ প্রবৃত্তয়ঃ ॥ ৪৪ ॥
সর্বেঽপি জন্তবস্তস্মাদীশ্বরা ইতি নিশ্চিতাঃ ।
বীজাদ্বৃক্ষস্তরোবীজং পারম্পর্যেণ জায়তে ॥ ৪৫ ॥
ইতিশঙ্কানিবৃত্ত্যর্থং যোগিদৃষ্টান্তকীর্তনম্ ।
বিশ্বামিত্রাদয়ঃ পূর্বে পরিপক্বসমাধয়ঃ ॥ ৪৬ ॥
উপাদানোপকরণপ্রয়োজনবিবার্জিতাঃ ।
স্বেচ্ছয়া সসৃজুঃ সর্গং সর্বভোগোপবৃংহিতম্ ॥ ৪৭ ॥
ঈশ্বরোঽনন্তশক্তিৎবাৎস্বতন্ত্রোঽন্যানপেক্ষকঃ ।
স্বেচ্ছামাত্রেণ সকলং সৃজত্যবতি হন্তি চ ॥ ৪৮ ॥
ন কারকাণাং ব্যাপারাৎকর্তা স্যান্নিত্য ঈশ্বরঃ ।
নাপি প্রমাণব্যাপরাৎ জ্ঞাতাঽসৌ স্বপ্রকাশকঃ ॥ ৪৯ ॥
জ্ঞাতৃৎবমপি কর্তৃৎবং স্বাতন্ত্র্যাত্তস্য কেবলম্ ।
যা চেচ্ছাশক্তিবৈচিত্রী সাঽস্য স্বচ্ছন্দকারিতা ॥ ৫০ ॥
যয়া কর্তুং ন বা কর্তুমন্যথা কর্তুমর্হতি ।
স্বতন্ত্রামীশ্বরেচ্ছাং কে পরিচ্ছেতুমিহেশতে ॥ ৫১ ॥
শ্রুতিশ্চ সোঽকাময়তেতীচ্ছয়া সৃষ্টিমীশিতুঃ ।
তস্মাদাত্মন আকাশঃ সম্ভূত ইতি চাব্রবীৎ ॥ ৫২ ॥
নিমিত্তমাত্রং চেদস্য জগতঃ পরমেশ্বরঃ ।
বিকারিৎবং বিনাশিৎবং ভবেদস্য কুলালবৎ ॥ ৫৩ ॥
বুদ্ধ্যাদয়ো নব গুণাঃ নিত্যা এবেশ্বরস্য চেৎ ।
নিত্যেচ্ছাবান্ং জগৎসৃষ্টৌ প্রবতেতৈব সর্বদা ॥ ৫৪ ॥
প্রবৃত্ত্যুপরমাভাবাৎসংসারো নৈব নশ্যতি ।
মোক্ষোপদেশো ব্যর্থঃ স্যাদাগমোঽপি নিরর্থকঃ ॥ ৫৫ ॥
তস্মান্মায়াবিলাসোঽয়ং জগৎকর্তৃৎবমীশিতুঃ ।
বন্ধমোক্ষোপদেশাদিব্যবহারোঽপি মায়যা ॥ ৫৬ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে দ্বিতীয়োল্লাসসংগ্রহঃ ॥ ৫৭ ॥
যস্যৈব স্ফুরণং সদাত্মকমসৎকল্পার্থগং ভাসতে
সাক্ষাত্তত্ত্বমসীতি বেদবচসা যো বোধয়ত্যাশ্রিতান্ ।
যৎসাক্ষাৎকরণাদ্ভবেন্নপুনরাবৃত্তির্ভবাম্ভোনিধৌ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৩ ॥
সত্তাস্ফুরত্তে ভাবেষু কুত আগত্য সঙ্গতে ।
বিম্বাদিদর্পণন্যায়াদিত্থং পৃচ্ছন্ প্রবোধ্যতে ॥ ১ ॥
অসৎকল্পেষু ভাবেষু জডেষু ক্ষণনাশিষু ।
অস্তিৎবং চ প্রকাশৎবং নিত্যাৎসংক্রামতীশ্বরাৎ ॥ ২ ॥
আত্মসত্তৈব সত্তৈষাং ভাবানাং ন ততোঽধিকা ।
তথৈব স্ফুরণং চৈষাং নাত্মস্ফুরণতোঽধিকম্ ॥ ৩ ॥
জ্ঞানানি বহুরূপাণি তেষং চ বিষয়া অপি ।
অহঙ্কারেঽনুষজ্যন্তে সূত্রে মণিগণা ইব ॥ ৪ ॥
প্রকাশাভিন্নমেবৈতদ্বিশ্বং সর্বস্য ভাসতে ।
লহরীবুদ্বুদাদীনাং সলিলান্ন পৃথক্স্থিতিঃ ॥ ৫ ॥
জানামিত্যেব যজ্জ্ঞানং ভাবানাবিশ্য বর্ততে ।
জ্ঞাতং ময়েতি তৎপশ্চাদ্বিশ্রাম্যত্যন্তরাত্মনি ॥ ৬ ॥
ঘটাদিকানি কার্যাণি বিশ্রাম্যন্তি মৃদাদিষু ।
বিশ্বং প্রকাশাভিন্নৎবাদ্বিশ্রাম্যেৎপরমেশ্বরে ॥ ৭ ॥
স্বগতেনৈব কাল়িম্না দর্পণং মলিনং যথা ॥
অজ্ঞানেনাবৃতং জ্ঞানং তেন মুহ্যন্তি জন্তবঃ ॥ ৮ ॥
ঘটাকাশো মহাকাশো ঘটোপাধিকৃতো যথা ।
দেহোপাধিকৃতো ভেদো জীবাৎপরমাত্মনোঃ ॥ ৯ ॥
তত্ত্বমস্যাদিবাক্যৈস্তু তয়োরৈক্যং প্রদর্শ্যতে ।
সোয়ং পুরুষ ইত্যুক্তে পুমানেকো হি দৃশ্যতে ॥ ১০ ॥
যজ্জগৎকারণং তত্ত্বং তৎপদার্থঃ স উচ্যতে ।
দেহাদিভিঃ পরিচ্ছিন্নো জীবস্তু ৎবংপদাভিধঃ ॥ ১১ ॥
তদ্দেশকালাবস্থাদৌ দৃষ্টঃ স ইতি কথ্যতে ।
তথৈতদ্দেশকালাদৌ দৃষ্টোঽয়মিতি কীর্ত্যতে ॥ ১২ ॥
মুখ্যং তদেতদ্বৈশিষ্ট্যং বিসৃজ্য পদয়োর্দ্বয়োঃ ।
পুম্মাত্রং লক্ষয়ত্যেকং যথা সোয়ং পুমান্বচঃ ॥ ১৩ ॥
প্রত্যক্ত্বং চ পরাক্ত্বং চ ত্যক্ত্বা তত্ত্বমসীতি বাক্ ।
তথৈব লক্ষয়ত্যৈকং জীবাত্মপরমাত্মনোঃ ॥ ১৪ ॥
সামানাধিকরণাখ্যঃ সম্বন্ধঃ পদয়োরিহ ।
বিশেষণবিশেষ্যৎবং সম্বন্ধঃ স্যাৎপদার্থয়োঃ ॥ ১৫ ॥
লক্ষ্যলক্ষণসংয়োগাদ্বাক্যমৈক্যং চ বোধয়েৎ ।
গঙ্গায়াং ঘোষ ইতিবন্ন জহল্লক্ষণা ভবেৎ ॥ ১৬ ॥
নাজহল্লক্ষণাঽপি স্যাচ্ছ্বেতোধাবতিবাক্যবৎ ।
তত্ত্বমস্যাদিবাক্যানাং লক্ষণা ভাগলক্ষণা ॥ ১৭ ॥
সোঽয়ং পুরুষ ইত্যাদিবাক্যানামিব কীর্তিতা ।
ভিন্নবৃত্তিনিমিত্তানাং শব্দানামেকবস্তুনি ॥ ১৮ ॥
প্রবৃত্তিস্তু সমানাধিকরণৎবমিহোচ্যতে ।
পরস্যাংশো বিকারো বা জীবো বাক্যেন নোচ্যতে ॥ ১৯ ॥
জীবাত্মনা প্রবিষ্ঠৎবাৎস্বমায়াসৃষ্টমূর্তিষু ।
নিরংশো নির্বিকারোঽসৌ শ্রুত্যা যুক্ত্যা চ গম্যতে ॥ ২০ ॥
ঘটাকাশো বিকরো বা নাংশো বা বিয়তো যথা ।
ৎবমিন্দ্রোসীতিবদ্বাক্যং ন খলু স্তুতিতৎপরম্ ॥ ২১ ॥
ন সাদৃশ্যপরং বাক্যমগ্নির্মাণবকাদিবৎ ।
ন কার্যকারণৎবস্য সাধনং মৃদ্ঘটাদিবৎ ॥ ২২ ॥
ন জাতি ব্যক্তিগমকং গৌঃ খণ্ড ইতিবদ্বচঃ ।
গুণগুণ্যাত্মকং বাক্যং নৈতন্নীলোৎপলাদিবৎ ॥ ২৩ ॥
নোপাসনাপরং বাক্যং প্রতিমাস্বীশবুদ্ধিবৎ ।
ন বৌপচারিকং বাক্যং রাজবদ্রাজপূরুষে ॥ ২৪ ॥
জীবাত্মনা প্রবিষ্টোঽসাবীশ্বরঃ শ্রূয়তে যতঃ ।
দেহেন্দ্রিয়মনোবুদ্ধিপ্রাণাহঙ্কারসংহতৌ ॥ ২৫ ॥
আত্মসঙ্কলনাদজ্ঞৈরাত্মৎবং প্রতিপাদ্যতে ।
বহ্নিধীঃ কাষ্ঠলোহাদৌ বহ্নিসঙ্কলনাদিব ॥ ২৬ ॥
দেহমন্নময়ং কোশমাবিশ্যাত্মা প্রকাশতে ।
স্থূলো বালঃ কৃশঃ কৃষ্ণো বর্ণাশ্রমবিকল্পবান্ ॥ ২৭ ॥
প্রাণকোশেঽপি জীবামি ক্ষুধিতোঽস্মি পিপাসিতঃ ।
সংশিতো নিশ্চিতো মন্যে ইতি কোশে মনোময়ে ॥ ২৮ ॥
বিজ্ঞানময়কোশস্থো বিজানামীতি তিষ্ঠতি ।
আনন্দময়কোশাখ্যে ৎবহঙ্কারে পুরাকৃতৈঃ ॥ ২৯ ॥
পুণ্যৈরুপাসনাভিশ্চ সুখিতোঽস্মীতি মোদতে ।
এবং কংচুকিতঃ কোশৈঃ কংচুকৈরিব পঞ্চভিঃ ॥ ৩০ ॥
পরিচ্ছিন্ন ইবাভাতি ব্যাপ্তোঽপি পরমেশ্বরঃ ।
যথা সলিলমাবিশ্য বহুধা ভাতি ভস্করঃ ॥ ৩১ ॥
তথা শরীরাণ্যাবিশ্য বহুধা স্ফুরতীশ্বরঃ ।
কারণৎবং চ কার্যৎবং তটস্থং লক্ষণং তয়োঃ ॥ ৩২ ॥
শাখায়াং চন্দ্র ইতিবন্নৈব মুখ্যমিদং মতম্ ।
মহাপ্রকাশ ইত্যুক্তং স্বরূপং চন্দ্রলক্ষণম্ ॥ ৩৩ ॥
সচ্চিদানন্দরূপৎবং স্বরূপং লক্ষণং তয়োঃ ।
একলক্ষণয়োরৈক্যং বাক্যেন প্রতিপাদ্যতে ॥ ৩৪ ॥
তস্মাদেকপ্রকাশৎবং সর্বাত্মৎবমিতি স্থিতম্ ।
দেবতির্যঙ্মনুষ্যাণাং প্রকাশান্ন পৃথক্স্থিতিঃ ॥ ৩৫ ॥
জীবঃ প্রকাশাভিন্নৎবাৎসর্বাত্মেত্যভিধীয়তে ।
এবং প্রকাশরূপৎবপরিজ্ঞানে দৃঢীকৃতে ॥ ৩৬ ॥
পুনরাবৃত্তিরহিতং কৈবল্যং পদমশ্নুতে ।
সকৃৎপ্রসক্তমাত্রোঽপি সর্বাত্মৎব যদৃচ্ছয়া ॥ ৩৭ ॥
সর্বপাপবিনির্মুক্তঃ শিবলোকে মহীয়তে ।
সর্বাত্মভাবনা যস্য পরিপক্বা মহাত্মনঃ ।
সংসারতারকঃ সাক্ষাৎস এব পরমেশ্বরঃ ॥ ৩৮ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে তৃতীয়োল্লাসসংগ্রহঃ ॥ ৩৯ ॥
নানাচ্ছিদ্রঘটোদরস্থিতমহাদীপপ্রভাভাস্বরং
জ্ঞানং যস্য তু চক্ষুরাদিকরণদ্বারা বহিঃস্পন্দতে ।
জানামীতি তমেব ভান্তমনুভাত্যেতৎসমস্তং জগৎ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৪ ॥
স্বতঃ সন্তঃ প্রকাশন্তে ভাবা ঘটপটাদয়ঃ ।
নেশ্বরস্য সমাবেশাদিত্যস্যোত্তরমুচ্যতে ॥ ১ ॥
অহমিত্যনুসন্ধাতা জানামীতি ন চেৎস্ফুরেৎ ।
কস্য কো বা প্রকাশেত জগচ্চ স্যাৎসুষুপ্তবৎ ॥ ২ ॥
প্রাগূর্ধ্বং চাসতাং সত্ত্বং বর্তমানেঽপি ন স্বতঃ ।
তস্মাদীশে স্থিতং সত্ত্বং প্রাগূর্ধ্বৎববিবর্জিতে ॥ ৩ ॥
স্বয়মেব প্রকাশেরন্ জডা যদি বিনেশ্বরম্ ।
সর্বং সর্বস্য ভাসেত ন বা ভাসেত কিঞ্চন ॥ ৪ ॥
তস্মাৎসর্বজ্ঞমজ্ঞং বা জগৎস্যাদেকরূপকম্ ।
তুল্যে স্বয়ংপ্রকাশৎবে জডচেতনয়োর্মিথঃ ॥ ৫ ॥
তুল্যমেব প্রসজ্যেরন্ গ্রাহ্যগ্রাহকতাদয়ঃ ।
ইন্দ্রিয়াণামনিয়মাচ্চাক্ষুষা স্যূ রসাদয়ঃ ॥ ৬ ॥
মলিনামলিনাদর্শপশ্চাৎপ্রাগ্ভাগতুল্যযোঃ ।
ক্রিয়াশক্তিজ্ঞানশক্ত্যেরন্তঃকরণভাগয়োঃ ॥ ৭ ॥
প্রতিবিম্বে স্ফুরন্নীশঃ কর্তা জ্ঞাতেতি কথ্যতে ।
বুদ্ধিঃ সত্ত্বগুণোৎকর্ষান্নির্মলো দর্পণো যথা ॥ ৮ ॥
গৃহ্ণাতি বিষয়চ্ছায়ামাত্মচ্ছায়ানুভাবতঃ ।
অন্তঃকরণসম্বন্ধান্নিখিলানীন্দ্রিয়াণ্যপি ॥ ৯ ॥
রথাঙ্গনেমিবলয়ে কীলিতা ইব কীলকাঃ ।
নাড্যোঽন্তঃকরণে স্যূতা জলসংস্যূতসূত্রবৎ ॥ ১০ ॥
তাভিস্তু গোল়কান্তাভিঃ প্রসর্পন্তি স্ফুলিঙ্গবৎ ।
করণানি সমস্তানি যথাস্বং বিষয়ং প্রতি ॥ ১১ ॥
দেহস্য মধ্যমং স্থানং মূলাধার ইতীর্যতে ।
গুদাত্তু দ্ব্যঙ্গুলাদূর্ধ্বং মেঢ্রাত্তু দ্ব্যঙ্গুলাদধঃ ॥ ১২ ॥
ত্রিকোণোঽধোমুখাগ্রশ্চ কন্যকায়োনিসন্নিভঃ ।
যত্র কুণ্ডলিনী নাম পরাশক্তিঃ প্রতিষ্ঠিতা ॥ ১৩ ॥
প্রাণাগ্নিবিন্দুনাদানাং সবিত্রী সা সরস্বতী ।
মূলাধারাগ্রকোণস্থা সুষুম্না ব্রহ্মরন্ধ্রগা ॥ ১৪ ॥
মূলেঽর্ধচ্ছিন্নবংশাভা ষডাধারসমন্বিতা ।
তৎপার্শ্বকোণয়োর্জাতে দ্বে ইডাপিঙ্গলে স্থিতে ॥ ১৫ ॥
নাডীচক্রমিতি প্রাহুঃ তস্মান্নাড্যঃ সমুদ্গতাঃ ।
গান্ধারী হস্তিজিহ্বা চ নয়নান্তং প্রধাবতঃ ॥ ১৬ ॥
নাডীচক্রেণ সংস্যূতে নাসিকান্তমুভে গতে ।
নাভিমণ্ডলমাশ্রিত্য কুক্কুটাণ্ডমিব স্থিতম্ ॥ ১৭ ॥
নাডীচক্রমিতি প্রাহুস্তস্মান্নাড্যঃ সমুদ্গতাঃ ।
পূষা চালাম্বুষা নাডী কর্ণদ্বয়মুপাশ্রিতে ।
নাডী শুক্লাহ্বয়া তস্মাদ্ ভ্রূমধ্যমুপসর্পতি ॥ ১৮ ॥
সরস্বত্যাহ্বয়া নাডী জিহ্বান্তা বাক্প্রসারিণী ।
নাডী বিশ্বোদরী নাম ভুঙ্ক্তেঽন্নং সা চতুর্বিধম্ ॥ ১৯ ॥
পীৎবা পয়স্বিনী তোয়ং কণ্ঠস্থা কুরুতে ক্ষুতম্ ।
নাডীচক্রাৎসমুদ্ভূতা নাড্যস্তিস্রস্ত্বধোমুখাঃ ॥ ২০ ॥
রাকা শুক্লং সিনীবালী মূত্রং মুঞ্চেৎকুহুর্মলম্ ।
ভুক্তান্নরসমাদায় শঙ্খিনী ধমনী পুনঃ ॥ ২১ ॥
কপালকুহরং গৎবা মূর্ধ্নি সঞ্চিনুতে সুধাম্ ।
শতং চৈকা চ নাড্যঃ স্যুস্তাসামেকা শিরোগতা ॥ ২২ ॥
তয়োর্ধ্বমায়ন্মুক্তঃ স্যাদিতি বেদান্তশাসনম্ ।
যদা বুদ্ধিগতৈঃ পুণ্যৈঃ প্রেরিতেন্দ্রিয়মার্গতঃ ॥ ২৩ ॥
শব্দাদীন্ বিষয়ান্ ভুঙ্ক্তে তদা জাগরিতং ভবেৎ ।
সংহৃতেষ্বিন্দ্রিয়েষ্বেষু জাগ্রৎসংস্কারজান্পুমান্ ॥ ২৪ ॥
মানসান্বিষয়ান্ভুঙ্ক্তে স্বপ্নাবস্থা তদা ভবেৎ ।
মনসোপ্যুপসংহারঃ সুষুপ্তিরিতি কথ্যতে ॥ ২৫ ॥
তত্র মায়াসমাচ্ছন্নঃ সন্মাত্রো বর্ততে পুমান্ ।
মূঢো জডোঽজ্ঞ ইত্যেবং মায়াবেশাৎপ্রকাশতে ॥ ২৬ ॥
সুখমস্বাপ্সমিত্যেবং প্রবোধসময়ে পুমান্ ।
সচ্চিদানন্দরূপঃ সন্ সম্যগেব প্রকাশতে ॥ ২৭ ॥
ইত্থং জগৎসমাবিশ্য ভাসমানে মহেশ্বরে ।
সূর্যাদয়োঽপি ভাসন্তে কিমুতান্যে ঘটাদয়ঃ ॥ ২৮ ॥
তস্মাৎসত্তা স্ফুরত্তা চ ভাবানামীশ্বরাশ্রয়াৎ ।
সত্যং জ্ঞানমনন্তং চ শ্রুত্যা ব্রহ্মোপদিশ্যতে ॥ ২৯ ॥
জাগ্রৎস্বপ্নোদ্ভবং সর্বমসত্যং জডমন্ধবৎ ।
ঈশ্বরশ্চাহমিত্যেবং ভাসতে সর্বজন্তুষু ॥ ৩০ ॥
নির্বিকল্পশ্চ শুদ্ধশ্চ মলিনশ্চেত্যহং ত্রিধা ।
নির্বিকল্পং পরং ব্রহ্ম নির্ধূতাখিলকল্পনম্ ॥ ৩১ ॥
ধূল্যন্ধকারধূমাভ্রনির্মুক্তগগনোপমম্ ।
বিবেকসময়ে শুদ্ধং দেহাদীনাং ব্যপোহনাৎ ॥ ৩২ ॥
যথাঽন্তরিক্ষং সংক্ষিপ্তং নক্ষত্রৈঃ কিঞ্চিদীক্ষ্যতে ।
দেহেন্দ্রিয়াদিসংসর্গান্মলিনং কলুষীকৃতম্ ॥ ৩৩ ॥
যথাঽঽকাশং তমোরূঢং স্ফুরত্যনবকাশবৎ ।
অহমিত্যৈশ্বরং ভাবং যদা জীবঃ প্রবুধ্যতে ॥ ৩৪ ॥
সর্বজ্ঞঃ সর্বকর্তা চ তদা জীবো ভবিষ্যতি ।
মায়যাধিকসম্মূঢো বিদ্যযেশঃ প্রকাশতে ॥ ৩৫ ॥
নির্বিকল্পানুসন্ধানে সম্যগাত্মা প্রকাশতে ।
অবিদ্যাখ্যতিরোধানব্যপায়ে পরমেশ্বরঃ ।
দক্ষিণামূর্তিরূপোসৌ স্বয়মেব প্রকাশতে ॥ ৩৬ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে চতুর্থোল্লাসসংগ্রহঃ ॥ ৩৭ ॥
দেহং প্রাণমপীন্দ্রিয়াণ্যপি চলাং বুদ্ধিং চ শূন্যং বিদুঃ
স্ত্রীবালান্ধজডোপমাস্ত্বহমিতি ভ্রান্তা ভৃশং বাদিনঃ ।
মায়াশক্তিবিলাসকল্পিতমহাব্যামোহসংহারিণে
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৫ ॥
প্রমাণমেকং প্রত্যক্ষং তত্ত্বং ভূতচতুষ্টয়ম্ ।
মোক্ষশ্চ মরণান্নান্যঃ কামার্থৌ পুরুষার্থকৌ ॥ ১ ॥
ন হি খল্বীশ্বরঃ কর্তা পরলোককথা বৃথা ।
দেহং বিনাঽস্তি চেদাত্মা কুম্ভবদ্দৃশ্যতাং পুরঃ ॥ ২ ॥
হ্রস্বো দীর্ঘো যুবা বাল ইতি দেহো হি দৃশ্যতে ।
অস্তি জাতঃ পরিণতো বৃদ্ধঃ ক্ষীণো জরন্মৃতঃ ॥ ৩ ॥
ইত্যেবমুক্তাঃ ষড্ভাববিকারা দেহসংশ্রয়াঃ ।
বর্ণাশ্রমবিভাগশ্চ দেহেষ্বেব প্রতিষ্ঠিতঃ ॥ ৪ ॥
জাতকর্মাদিসংস্কারো দেহস্যৈব বিধীয়তে ।
শতং জীবেতি দেহস্য প্রয়ুঞ্জন্ত্যাশিষং শুভাম্ ॥ ৫ ॥
ইতি প্রপঞ্চং চার্বাকো বংচয়ত্যল্পচেতনঃ ।
কেচিচ্ছ্বসিমি জীবামি ক্ষুধিতোস্মি পিপাসিতঃ ॥ ৬ ॥
ইত্যাদিপ্রত্যযবলাৎপ্তাণমাত্মেতি মন্বতে ।
কেচিচ্ছৃণোমি পশ্যামি জিঘ্রাম্যা স্বাদয়াম্যহম্ ॥ ৭ ॥
ইতীন্দ্রিয়াণামাত্মৎবং প্রতিয়ন্তি ততোধিকম্ ।
জানামিপ্রত্যযবলাদ্বুদ্ধিরিত্যপরে জগুঃ ॥ ৮ ॥
মায়াব্যামূঢচিত্তানাং তেষাং দূষণমুচ্যতে ।
দেহাদীনাং জডার্থানাং পাষাণবদনাত্মনাম্ ॥ ৯ ॥
কথং ভবেদহম্ভাবঃ সমাবেশং বিনেশিতুঃ ।
দেহস্তাবদয়ং নাত্মা দৃশ্যৎবাচ্চ জডৎবতঃ ॥ ১০ ॥
রূপাদিমত্ত্বাৎসাংশৎবাদ্ভৌতিকৎবাচ্চ কুম্ভবৎ ॥
মূর্চ্ছাসুষুপ্তিমরণেশ্বপি দেহঃ প্রতীয়তে ॥ ১১ ॥
দেহাদিব্যতিরিক্তৎবাত্তদাঽঽত্মা ন প্রকাশতে ।
যথা জগৎপ্রবৃত্তীনামাদিকারণমংশুমান্ ॥ ১২ ॥
পুমাংস্তথৈব দেহাদিপ্রবৃত্তৌ কারণং পরম্ ।
মম দেহোয়মিত্যেবং স্ত্রীবালান্ধাশ্চ মন্বতে ॥ ১৩ ॥
দেহোহমিতি নাবৈতি কদাচিদপি কশ্চন ।
ইন্দ্রিয়াণ্যপি নাত্মানঃ করণৎবাৎপ্রদীপবৎ ॥ ১৪ ॥
বীণাদিবাদ্যবচ্ছ্রোত্রং শব্দগ্রহণসাধনম্ ।
চক্ষুস্তেজস্ত্রিতয়বদ্রূপগ্রহণসাধনম্ ॥ ১৫ ॥
গন্ধস্য গ্রাহকং ঘ্রাণং পুষ্পসম্পুটকাদিবৎ ।
রসস্য গ্রাহিকা জিহ্বা দধিক্ষৌদ্রঘৃতাদিবৎ ॥ ১৬ ॥
ইন্দ্রিয়াণি ন মে সন্তি মূকোন্ধো বধিরোস্ম্যহম্ ।
ইত্যাহুরিন্দ্রিয়ৈর্হীনা জনাঃ কিং তে নিরাত্মকাঃ ॥ ১৭ ॥
প্রাণোপ্যাত্মা ন ভবতি জ্ঞানাভাবাৎসুষুপ্তিষু ।
জাগ্রৎস্বপ্নোপভোগোত্থশ্রমবিচ্ছিত্তিহেতবে ॥ ১৮ ॥
সুষুপ্তিং পুরুষে প্রাপ্তে শরীরমভিরক্ষিতুম্ ।
শেষকর্মোভোগার্থং প্রাণশ্চরতি কেবলম্ ॥ ১৯ ॥
প্রাণস্য তত্রাচৈতন্যং করণোপরমে যদি ।
প্রাণে ব্যাপ্রিয়মাণে তু করণোপরমঃ কথম্ ॥ ২০ ॥
সম্রাজি হি রণোদ্যুক্তে বিরমন্তি ন সৈনিকাঃ ।
তস্মান্ন করণস্বামী প্রাণো ভবিতুমর্হতি ॥ ২১ ॥
মনসঃ প্রেরকে পুংসি বিরতে বিরমন্ত্যতঃ ।
করণানি সমস্তানি তেষাং স্বামী ততঃ পুমান্ ॥ ২২ ॥
বুদ্ধিস্তু ক্ষণিকা বেদ্যা গমাগমসমন্বিতা ।
আত্মনঃ প্রতিবিম্বেন ভাসিতা ভাসয়েজ্জগৎ ॥ ২৩ ॥
আত্মন্যুৎপদ্যতে বুদ্ধিরাত্মন্যেব প্রলীয়তে ।
প্রাগূর্ধ্বং চাসতী বুদ্ধিঃ স্বয়মেব ন সিধ্যতি ॥ ২৪ ॥
জ্ঞানাচ্চেৎপূর্বপূর্বস্মাদুত্তরোত্তরসম্ভবঃ ।
যুগপদ্বহুবুদ্ধিৎবং প্রসজ্যেত ক্ষণে ক্ষণে ॥ ২৫ ॥
বুদ্ধ্যন্তরং ন জনয়েন্নাশোত্ত্রমসত্ত্বতঃ ।
এষাং সঙ্ঘাত আত্মা চেদেকদেশে পৃথক্কৃতে ॥ ২৬ ॥
ন চৈতন্যং প্রসজ্যেত সঙ্ঘাতাভাবতস্তদা ।
ভিন্নদৃগ্গত্যভিপ্রায়ে বহুচেতনপুঞ্জিতম্ ॥ ২৭ ॥
সদ্যো ভিন্নং ভবেদেতন্নিষ্ক্রিয়ং বা ভবিষ্যতি ।
দেহস্যান্তর্গতোপ্যাত্মা ব্যাপ্ত এবেতি বুধ্যতে ॥ ২৮ ॥
অণুপ্রমাণশ্চেদেষ ব্যাপ্নুয়ান্নাখিলং বপুঃ ।
দেহপ্রমাণশ্চেন্ন স্যাদ্বালস্য স্থবিরাদিতা ॥ ২৯ ॥
দেহবৎপরিণামী চেত্তদ্বদেব বিনঙ্ক্ষ্যতি ।
কর্মণাং পরিণামেন ক্রিমিহস্ত্যাদিমূর্তিষু ॥ ৩০ ॥
ব্যাপ্তৎবাৎপ্রবিশত্যাত্মা ঘটাদিষ্বন্তরিক্ষবৎ ।
পরমাণুপ্রমাণেঽপি মনসি প্রতিভাসতে ॥ ৩১ ॥
স্বপ্নে চরাচরং বিশ্বমাত্মন্যেব প্রতিষ্ঠিতম্ ।
দেহাদিষ্বহমিত্যেবং ভ্রমঃ সংসারহেতুকঃ ॥ ৩২ ॥
অন্তঃ প্রবিষ্টঃ শাস্তেতি মোক্ষায়োপাদিশচ্ছ্রুতিঃ ।
এবমেষা মহামায়া বাদিনামপি মোহিনী ॥ ৩৩ ॥
যস্মাৎসাক্ষাৎকৃতে সদ্যো লীয়তে চ সদাশিবে ।
দেহেন্দ্রিয়াসুহীনায় মানদূরস্বরূপিণে ।
জ্ঞানানন্দস্বরূপায় দক্ষিণামূর্তয়ে নমঃ ॥ ৩৪ ॥
ইতি শ্রীদক্ষিণামূর্তিস্তোত্রার্থ প্রতিপাদকে ।
প্রবন্ধে মানসোল্লাসে পঞ্চমোল্লাসসঙ্গ্রহঃ ॥ ৩৫ ॥
রাহুগ্রস্তদিবাকরেন্দুসদৃশো মায়াসমাচ্ছাদনাৎ
সন্মাত্রঃ করণোপসংহরণতো যোঽভূৎসুষুপ্তঃ পুমান্ ।
প্রাগস্বাপ্সমিতি প্রবোধসময়ে যঃ প্রত্যভিজ্ঞায়তে
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৬ ॥
স্বপ্নে বিশ্বং যথাঽন্তস্থং জাগ্রত্যপি তথেতি চেৎ ।
সুষুপ্তৌ কস্য কিং ভাতি কঃ স্থায়ী তত্র চেতনঃ ॥ ১ ॥
সর্বং চ ক্ষণিকং শূন্যং সর্বমেব স্বলক্ষণম্ ।
সঙ্ঘাতঃ পরমাণূনাং মহ্যম্ব্বগ্নিসমীরণাঃ ॥ ২ ॥
মনুষ্যাদিশরীরাণি স্কন্ধপংচকসংহতিঃ ।
স্কন্ধাশ্চ রূপবিজ্ঞানসংজ্ঞাসংকারবেদনাঃ ॥ ৩ ॥
রূপ্যন্ত ইতি রূপাণি বিষয়াশ্চেন্দ্রিয়াণ্যপি ।
বিষয়েন্দ্রিয়যোর্জ্ঞানং বিজ্ঞানস্কন্ধ উচ্যতে ॥ ৪ ॥
সংজ্ঞাগুণক্রিয়াজাতিবিশিষ্টপ্রত্যযাত্মিকা ।
পঞ্চধা কল্পনা প্রোক্তা সংজ্ঞাস্কন্ধস্য সৌগতৈঃ ॥ ৫ ॥
গবাং গৌরিতি সংজ্ঞোক্তা জাতির্গোৎবং তু গোগতম্ ।
গুণাঃ শুক্লাদয়স্তস্য গচ্ছত্যাদ্যাস্তথা ॥ ৬ ॥
শৃঙ্গী চতুষ্পাল্লাঙ্গূলী বিশিষ্টপ্রত্যযো হ্যসৌ ।
এবং পঞ্চবিধা ক্লৃপ্তঃ সংজ্ঞাস্কন্ধ ইতীর্যতে ॥ ৭ ॥
রাগাদ্যাঃ পুণ্যপাপে চ সংস্কারস্কন্ধ উচ্যতে ।
সুখং দুঃখং চ মোক্ষশ্চ স্কন্ধঃ স্যাদ্বেদনাহ্বয়ঃ ॥ ৮ ॥
পঞ্চভ্য এব স্কন্ধেভ্যো নান্য আত্মাস্তি কশ্চন ।
ন কশ্চদীশ্বরঃ কর্তা স্বগতাতিশয়ং জগৎ ॥ ৯ ॥
স্কন্ধেভ্যঃ পরমাণুভ্যঃ ক্ষণিকেভ্যোঽভিজায়তে ।
পূর্বপূর্বক্ষণাদেব ক্ষণঃ স্যাদুত্তরোত্তরঃ ॥ ১০ ॥
পূর্বস্মাদেব হি জ্ঞানাজ্জায়তে জ্ঞানমুত্তরম্ ।
স এবায়মিতি জ্ঞানং সেয়ং জ্বালেব বিভ্রমঃ ॥ ১১ ॥
অস্তি ভাতীতিধীভ্রান্তৈরাত্মানাত্মসু কল্প্যতে ।
হানোপাদানরাহিত্যাদাকাশঃ কিং প্রকাশতে ॥ ১২ ॥
ইত্যেবং বৌদ্ধসিদ্ধান্তী ভাষমাণো নিষিদ্ধ্যতে ।
শূন্যং চেজ্জগতো হেতুঃ জগদেব ন সিদ্ধ্যতি ॥ ১৩ ॥
ঘটঃ শূন্যঃ পটঃ শূন্যঃ ইতি কৈঃ প্রতিপাদ্যতে ।
নৈব ভাসেত শূন্যং চেজ্জগন্নরবিষাণবৎ ॥ ১৪ ॥
বস্ত্বর্থী কিমুপাদদ্যাদ্ভারার্থঃ কিং পরিত্যজেৎ ।
কো বিদধ্যান্নিষিদ্ধ্যেদ্বা শূন্যৎবাৎস্বস্য চাত্মনঃ ॥ ১৫ ॥
অবসীদেন্নীরাকূতং তস্মাৎসর্বমিদং জগৎ ।
স্কন্ধানাং পরমাণূনাং ন সঙ্ঘাতয়িতাস্তি চেৎ ॥ ১৬ ॥
সঙ্ঘাতো ন বিনা হেতুং জডা ঘটপটাদয়ঃ ।
মহানুভাবো ভূয়াসমিতি ভ্রান্তশ্চ মন্যতে ॥ ১৭ ॥
আত্মাপলাপকো বৌদ্ধঃ কিমর্থং চরতি ব্রতম্ ।
প্রত্যভিজ্ঞা যদি ভ্রান্তিঃ ভোজনাদি কথং ভবেৎ ॥ ১৮ ॥
ইষ্টসাধনমেবৈতদন্নং গতদিনান্নবৎ ।
ইতি নিশ্চিত্য বালোঽপি ভোজনাদৌ প্রবর্ততে ॥ ১৯ ॥
অবকাশপ্রদাতৃৎবমাকাশার্থক্রিয়া যথা ।
তথৈবার্থক্রিয়া পুংসঃ কর্তৃৎবজ্ঞাতৃতাদিকা ॥ ২০ ॥
সুষুপ্তিসময়েপ্যাত্মা সত্যজ্ঞানসুখাত্মকঃ ।
সুখমস্বাপ্সমিত্যেবং প্রত্যভিজ্ঞায়তে যতঃ ॥ ২১ ॥
প্রত্যভিজ্ঞায়ত ইতি প্রয়োগঃ কর্মকর্তরি ।
আত্মা স্বয়ংপ্রকাশাৎবাজ্জানাত্যাত্মানমাত্মনা ॥ ২২ ॥
সুষুপ্তৌ মায়যা মূঢঃ জডোন্ধ ইতি লক্ষ্যতে ।
অপ্রকাশতয়া ভাতি স্বপ্রকাশতয়াপি চ ॥ ২৩ ॥
জডাত্মনি চ দেহাদৌ সাক্ষাদীশো বিবিচ্যতে ।
এষৈব মোহিনী নাম মায়াশক্তির্মহেশিতুঃ ॥ ২৪ ॥
মোহাপোহঃ প্রমাতৄণাং মোক্ষ ইত্যভিধীয়তে ।
অবস্থাত্রয়নির্মুক্তো দোষদিভিরনাবিলঃ ॥ ২৫ ॥
ইষীক ইব সন্মাত্রো ন্যগ্রোধকণিকোপমঃ ।
বাহ্যাবাহ্যদল়োন্মুক্তকদল়ীকন্দসন্নিভঃ ॥ ২৬ ॥
নিরংশো নির্বিকারশ্চ নিরাভাসো নিরঞ্জনঃ ।
পুরুষঃ কেবলঃ পূর্ণঃ প্রোচ্যতে পরমেশ্বরঃ ॥ ২৭ ॥
বাচো যত্র নিবর্তন্তে মনো যত্র বিলীয়তে ।
একীভবন্তি যত্রৈব ভূতানি ভুবনানি চ ॥ ২৮ ॥
সমস্তানি চ তত্ত্বানি সমুদ্রে সিন্ধবো যথা ।
কঃ শোকস্তত্র কো মোহ একৎবমনুপশ্যতঃ ॥ ২৯ ॥
বাচ্যবাচকরূপৎবাৎসবিকল্পোপি সন্নয়ম্ ।
দেহাদীনাং ব্যপোহেন সম্ভবেন্নির্বিকল্পকম্ ॥ ৩০ ॥
অসন্নেব ভবেদ্বিদ্বানসদ্ব্রহ্মেতি বেদ চেৎ ।
অস্তি ব্রহ্মেতি চেদ্বেদ সন্তেমেনং ততো বিদুঃ ॥ ৩১ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে ষষ্ঠোল্লাসস্য সঙ্গ্রহঃ ॥ ৩২ ॥
বাল্যাদিষ্বপি জাগ্রদাদিষু তথা সর্বাস্ববস্থাস্বপি
ব্যাবৃত্তাস্বনুবর্তমানমহমিত্যন্তঃ স্ফুরন্তং সদা ।
স্বাত্মানং প্রকটীকরোতি ভজতাং যো মুদ্রয়া ভদ্রয়া
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৭ ॥
প্রত্যভিজ্ঞাবলাদাত্মা স্থায়ী নির্ধার্যতে যদি ।
কা নাম প্রত্যভিজ্ঞৈষা কিং বা তস্যাঃ প্রয়োজনম্ ॥ ১ ॥
প্রত্যক্ষাদিপ্রমাণেষু প্রত্যভিজ্ঞা ন পঠ্যতে ।
কথং তস্যাঃ প্রমাণৎবমিতি পৃচ্ছন্ প্রবোধ্যতে ॥ ২ ॥
ভাতস্য কস্য চিৎপূর্বং ভাসমানস্য সাম্প্রতম্ ।
সোঽয়মিত্যনুসন্ধানং প্রত্যভিজ্ঞানমুচ্যতে ॥ ৩ ॥
তদ্দেশকালাকারাদীনবধূয়ানুষ্ঙ্গিকান্ ।
যথৈকং বস্ত্বনুস্যূতং সোঽয়মিত্যভিধীয়তে ॥ ৪ ॥
মায়ানুষ্ঙ্গসঞ্জাতকিঞ্চিজ্জ্ঞৎবাদ্যপোহনাৎ ।
সর্বজ্ঞৎবাদিবিজ্ঞানং প্রত্যভিজ্ঞানমাত্মনঃ ॥ ৫ ॥
পূর্বজন্মানুভূতার্থস্মরণান্মৃগশাবকঃ ।
জননীস্তন্যপানায় স্বয়মেব প্রবর্ততে ॥ ৬ ॥
তস্মান্নিশ্চীয়তে স্থায়ীত্যাত্মা দেহান্তরেষ্বপি ।
স্মৃতিং বিনা ন ঘটতে স্তন্যপানং শিশোর্যতঃ ॥ ৭ ॥
পূর্বত্রানুভবে কালে স্মৃতিকালে পরত্র সন্ ।
আত্মা সংস্কাররূপেণ স্মরত্যর্থং স্বনিষ্ঠিতম্ ॥ ৮ ॥
প্রত্যভিজ্ঞেতি ভাবানাং স্মৃতিশ্চেদভিধীয়তে ।
আত্মস্থৈর্যে প্রমাণৎবং স্মৃতিশ্চ প্রাপ্নুয়াৎকথম্ ॥ ৯ ॥
স্মৃতৌ প্রকাশো নার্থস্য ন চাপ্যর্থস্য নিশ্চয়ঃ ।
ন চাপ্যর্থানুভবয়োরঙ্গুল্যোরিব সম্ভবেৎ ॥ ১০ ॥
নানুভূতিবিশিষ্টস্য পদার্থস্য চ দণ্ডিবৎ ।
সর্বত্রাপ্যেবমিত্যেবং প্রসঙ্গাদিতি চেচ্ছৃণু ॥ ১১ ॥
প্রাক্তনানুভবে নষ্টে তদবষ্টম্ভসম্ভবাৎ ।
সংস্কারসংজ্ঞাৎসামগ্র্যাৎ পৌরুষাজ্জায়তে স্মৃতিঃ ॥ ১২ ॥
আবেদ্যানুভবে নষ্টে তদীয়ং বিষয়ং প্রতি ।
অনুভাবকমাত্মানং বোধয়ত্যনপায়িনম্ ॥ ১৩ ॥
বিষয়ে চ প্রমুষিতে নষ্টে বাঽনুভবে সতি ।
স্ববিশ্রান্তং স্মরত্যর্থং দেবোঽপ্রমুষিতঃ সদা ॥ ১৪ ॥
প্রমোষণং প্রমাতৄণাং মায়যা তমসা কৃতম্ ।
মায়াবিদ্যে প্রভোঃ শক্তী ভানোশ্ছায়াপ্রভোপমে ॥ ১৫ ॥
অর্থানাচ্ছদয়েন্মায়া বিদ্যা ব্যাক্ষিপ্য দর্শয়েৎ ।
প্রত্যভিজ্ঞৈব সর্বেষাং প্রমাণানাং চ সাধনম্ ॥ ১৬ ॥
ঈশ্বরোন্যোহমপ্যন্য ইতি বিচ্ছেদকারিণীম্ ।
ব্যাক্ষিপ্য বিদ্যযা মায়ামীশ্বরোহমিতি স্মৃতিঃ ॥ ১৭ ॥
ঈষৎপ্রকাশোভূদীশো মায়ায়বনিকাবৃতঃ ।
সম্যগাবরণাপায়ে সহস্রাংশুরিব স্ফুরেৎ ॥ ১৮ ॥
ন কারণানাং ব্যাপারঃ প্রমাণানাং ন বা পুনঃ ।
প্রত্যভিজ্ঞাপনং নাম মোহাপসরণং পরম্ ॥ ১৯ ॥
যাবন্তি সন্তি মানানি ব্যবহারপ্রবৃত্তয়ে ।
তেষাং মোহাপসরণাদ্ব্যপারোন্যো ন বিদ্যতে ॥ ২০ ॥
জডানৃতপরিচ্ছিন্নদেহধর্মাশ্চিদাত্মনি ।
সত্যজ্ঞানসুখাত্মৎবং মোহাদ্দেহেঽপি কল্প্যতে ॥ ২১ ॥
শুক্তৌ রজতমিত্যেবং যথা ব্যামুহ্যতেঽন্যথা ।
সএব র্রূপ্যং চেদ্ভাতি বিলয়স্তে ন সিধ্যতি ॥ ২২
নাত্যন্তাসৎপ্রকাশেত নরশৃঙ্গাদিবৎক্বচিৎ ।
কান্তাকরাদৌ রজতমিতি স্যাৎস্মরণং ভ্রমে ॥ ২৩ ॥
তেনেদং তুল্যমিত্যেবং স্যাৎসাদৃশ্যাদ্যদি ভ্রমঃ ।
পীতঃ শঙ্খো গুডস্তিক্ত ইত্যাদৌ নাস্তি তুল্যতা ॥ ২৪ ॥
তাদাত্ম্যেন স্ফুরতি চেদ্রজতৎবেন শুক্তিকা ।
বিভ্রমো নিরধিষ্ঠানো বাধো নিরবধির্ভবেৎ ॥ ২৫ ॥
বুদ্ধিস্থিতং চেদ্রজতং বাহ্যৎবেন প্রতীয়তে ।
গুঞ্জাদৌ জ্বলনারোপে দেহদাহঃ প্রসজ্যতে ॥ ২৬ ॥
যুক্তিহীনপ্রকাশৎবাদ্ ভ্রান্তের্ন হ্যস্তি লক্ষণম্ ।
যদি স্যাল্লক্ষণং কিংচিদ্ ভ্রান্তিরেব ন সিধ্যতি ॥ ২৭ ॥
জলচন্দ্রবদেকস্মিন্নির্ভয়ে রজ্জুসর্পবৎ ।
প্রতীয়তে যথা স্বর্ণে কারণে কটকাদিবৎ ॥ ২৮ ॥
উপাত্তে রূপ্যবচ্ছুক্তৌ ব্যাপ্তে যক্ষপুরীব খে ।
রশ্ম্যম্বুবৎস্ফুরদ্রূপে স্থাণৌ চোরবদক্রিয়ে ॥ ২৯ ॥
অসৎকল্পমিদং বিশ্বমাত্মন্যারোপ্যতে ভ্রমাৎ ।
স্বয়ংপ্রকাশং সদ্রূপং ভ্রান্তিবাধবিবর্জিতম্ ॥ ৩০ ॥
প্রত্যভিজ্ঞায়তে বস্তু প্রাগ্বন্মোহে ব্যপোহিতে ।
দেহাদ্যুপাধৌ নির্ধূতে স্যাদাত্মৈব মহেশ্বরঃ ॥ ৩১ ॥
স্মৃতিঃ প্রত্যক্ষমৈতিহ্যমিত্যাদীন্যপরাণ্যপি ।
প্রমাণান্যাপ্তবাগাহ প্রত্যভিজ্ঞাপ্রসিদ্ধয়ে ॥ ৩২ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে সপ্তমোল্লাসসঙ্গ্রহঃ ॥ ৩৩ ॥
বিশ্বং পশ্যতি কার্যকারণতয়া স্বস্বামিসংবন্ধতঃ
শিষ্যাচার্যতয়া তথৈব পিতৃপুত্রাদ্যাত্মনা ভেদতঃ ।
স্বপ্নে জাগ্রতি বা এষ পুরুষো মায়াপরিভ্রামিতঃ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৮ ॥
প্রকাশব্যতিরেকেণ পদার্থঃ কোঽপি নাস্তি চেৎ ।
পরমার্থোপদেশান্তো ব্যবহারঃ কথং ভবেৎ ॥ ১ ॥
কস্য বন্ধশ্চ মোক্ষশ্চ বধ্যতে কেন হেতুনা ।
মায়যা লক্ষণং কিং স্যাদিত্যেবং পরিপৃচ্ছতঃ ॥ ২ ॥
প্রশনঃ স্যাদুত্তরং বক্তুং প্রতিপত্তুং সুখেন চ ।
উক্তোর্থঃ সপ্তভিঃ শ্লোকৈঃ পুনঃ সংক্ষিপ্য কথ্যতে ॥ ৩ ॥
পৌনরুক্ত্যং ন দোষোঽত্র শব্দেনার্থেন বা ভবেৎ ।
অভ্যাসেন গরীয়স্ত্বমর্থস্য প্রতিপাদ্যতে ॥ ৪ ॥
স্বয়ংপ্রকাশে সদ্রূপেঽপ্যেকস্মিন্পরমেশ্বরে ।
কার্যকারণসম্বন্ধাদ্যনেকবিধকল্পনা ॥ ৫ ॥
রাহোঃ শিরঃ সুষিঃ খস্য মমাত্মা প্রতিমাবপুঃ ।
ইত্যাদিকল্পনা তুল্যা ন পৃথগ্বস্তুগোচরা ॥ ৬ ॥
উপাস্যোপাসকৎবেন গুরুশিষ্যক্রমেণ চ ।
স্বামিভৃতাদিরূপেণ ক্রীডতি স্বেচ্ছয়েশ্বরঃ ॥ ৭ ॥
পিতরং প্রতি পুত্রো যঃ পুত্রং প্রতি পিতৈব সঃ ।
এক এব হি নানেব কল্প্যতে শব্দমাত্রতঃ ॥ ৮ ॥
তস্মাৎপ্রকাশ এবাস্তি পরমার্থনিরূপণে ।
ভেদপ্রতীতির্মিথ্যৈব মায়যাঽঽত্মনি কল্পিতা ॥ ৯ ॥
মিথ্যাৎবং নাম বাধ্যৎবং সম্যগ্জ্ঞানোদয়ে সতি ।
শিষ্যাচার্যোপদেশাদি স্বপ্নবৎপ্রতিভাসতে ॥ ১০ ॥
মিথ্যাভূতোঽপি বেদান্তঃ সত্যমর্থং প্রবোধয়েৎ ।
দেবতাপ্রতিমাবচ্চ চিত্রবৎপ্রতিবিম্ববৎ ॥ ১১ ॥
সর্বোঽপি ব্যবহারোঽয়ং মায়যা পরিজৃম্ভণম্ ।
সুষুপ্তিসদৃশী মায়া স্বপ্রবোধেন বাধ্যতে ॥ ১২ ॥
যুক্তিহীনপ্রকাশস্য সংজ্ঞা মায়েতি কথ্যতে ।
নাসতী দৃশ্যমানা সা বাধ্যমানা ন বা সতী ॥ ১৩ ॥
ন প্রকাশাদিয়ং ভিন্না ছায়েবার্কস্য তামসী ।
ন চাভিন্না জডৎবেন বিরোধান্নোভয়াত্মিকা ॥ ১৪ ॥
স্বহেৎববয়বাভাবান্নেয়ং সাবয়বোচ্যতে ।
ন চাবয়বহীনা সা কার্যেষ্ববয়বান্বিতা ॥ ১৫ ॥
অবিচারিতসিদ্ধেয়ং মায়াবেশ্যাবিলাসিনী ।
পুরুষং বঞ্চয়ত্যেব মিথ্যাভূতৈঃ স্ববিভ্রমৈঃ ॥ ১৬ ॥
ন তস্যা মূলবিচ্ছেদমভিবাঞ্ছতি কেচন ।
তেষাং পক্ষে কথং মোক্ষো মনসঃ সম্ভবিষ্যতি ॥ ১৭ ॥
তিস্রোপ্যবস্থা মনসো জাগ্রৎস্বপ্নসুষুপ্তয়ঃ ।
চক্রবৎপরিবর্তন্তে ভেদভ্রান্ত্যেকহেতবঃ ॥ ১৮ ॥
তাভিঃ করোতি কর্মাণি পুনস্তৈর্বধ্যতে মনঃ ।
মনসঃ কেবলঃ সাক্ষী ভানুবৎপুরুষঃ পরঃ ॥ ১৯ ॥
যথা প্রাণিকৃতৈরর্কঃ কর্মভির্নৈব বধ্যতে ।
তথা মনঃকৃতৈরাত্মা সাক্ষিৎবান্নৈব বধ্যতে ॥ ২০ ॥
আত্মা করোতি কর্মাণি বধ্যতে মুচ্যতে চ তৈঃ ।
ইত্যৌপচারিকী ক্লৃপ্তির্ভ্রমমাত্রৈব কেবলম্ ॥ ২১ ॥
ধূমাভ্রধূলীনীহারৈরস্পৃষ্টোঽপি দিবাকরঃ ।
যথা ছন্ন ইবাভাতি তথৈবাত্মাঽপি মায়যা ॥ ২২ ॥
যথা লীলাবশাৎকশ্চিদ্ভ্রাম্যমাণঃ কুমারকঃ ।
ভ্রমত্তৎপশ্যতি জগৎ শতচন্দ্রং নভঃস্থলম্ ॥ ২৩ ॥
তথৈব মায়যা জীবো ভ্রামিতো বাসনাবশাৎ ।
নানাকারমিদং বিশ্বং ভ্রমমাণং চ পশ্যতি ॥ ২৪ ॥
সংসৃজ্য মনসা দেবঃ সংসরন্নিব লক্ষ্যতে ।
যথাঽর্কো জলসংসর্গাচ্চলন্নানেব লক্ষ্যতে ॥ ২৫ ॥
যোগাভ্যাসবশাদ্যেন মনো নির্বিষয়ং কৃতম্ ।
নিবৃত্তঃ স পুমাংসদ্যো জীবন্মুক্তো ভবিষ্যতি ॥ ২৬ ॥
দ্বা সুপর্ণৌ চ সয়ুজাভবন্মায়যা শিবঃ ।
অজামেকাং জুষন্নেকো নানেবাসীদিতি শ্রুতিঃ ॥ ২৭ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে অষ্টমোল্লাসসঙ্গ্রহঃ ॥ ২৮ ॥
ভূরম্ভাংস্যনলোঽনিলোঽম্বরমহর্নাথো হিমাংশুঃ পুমান্
ইত্যাভাতি চরাচরাত্মকমিদং যস্যৈব মূর্ত্যষ্টকম্ ।
নান্যৎকিঞ্চন বিদ্যতে বিমৃশতাং যস্মাৎপরস্মাদ্বিভোঃ
তস্মৈ শ্রী গুরুমূর্তয়ে নম ইদং শ্রীদক্ষিণামূর্তয়ে ॥ ৯ ॥
কথমেবংবিধা মায়া নিবর্তেতেতি পৃচ্ছতঃ ।
ঈশ্বরোপাসনারূপস্তদুপায়ঃ প্রকীর্ত্যতে ॥ ১ ॥
ষট্ত্রিংশত্তত্ত্বরূপাসু পরমেশ্বরমূর্তিষু ।
প্রত্যক্ষেণোপলভ্যন্তে সর্বৈরপ্যষ্টমূর্তয়ঃ ॥ ২ ॥
অমেয়াসু মনঃ ক্ষিপ্রমারোঢুং নার্হতীত্যতঃ ।
মূর্ত্যষ্টকময়ীং ব্রূত গুরুঃ সর্বাত্মভাবনাম্ ॥ ৩ ॥
বিরাট্ছরীরে ব্রহ্মাণ্ডে প্রাণিনামপি বিগ্রহে ।
ষট্ত্রিংশত্তত্ত্বসঙ্ঘাতঃ সর্বত্রাপ্যনুবর্ততে ॥ ৪ ॥
ব্যাপ্তির্ব্যষ্টিশরীরেঽস্মিন্মনসো ব্যষ্টিরূপিণঃ ।
তস্মাৎসর্বাত্মকমিদং স্বশরীরং বিচিন্তয়েৎ ॥ ৫ ॥
ব্যষ্ট্যুপাসনয়া পুংসঃ সমষ্টিব্যাপ্তিমাপ্নুয়াৎ ।
উপসংক্রামতীত্যেবং দশকৃৎব উপাদিশৎ ॥ ৬ ॥
ব্রহ্মাণ্ডস্যোদরে লোকাঃ সপ্তভূরাদয়ঃ স্মৃতাঃ ।
মূলাদিব্রহ্মরন্ধ্রান্তেষ্বাধারেষু বসন্তি তে ॥ ৭ ॥
বীণাদণ্ডো মহামেরুস্থীনি কুলপর্বতাঃ ।
গঙ্গা তু পিঙ্গল়া নাডী যমুনেডা প্রকীর্তিতা ॥ ৮ ॥
সরস্বতী সুষুম্নোক্তা নাড্যোন্যাঃ পুণ্যনিম্নগাঃ ।
দ্বীপাঃ স্যুর্ধাতবঃ সপ্ত স্বেদবাষ্পাদয়োব্ধয়ঃ ॥ ৯ ॥
মূলে তিষ্ঠতি কালাগ্নিরস্থিমধ্যে চ বাডবঃ ।
বৈদ্যুতোগ্নিঃ সুষুম্নায়াং পার্থিবো নাভিমণ্ডলে ॥ ১০ ॥
হৃদি তিষ্ঠতি সূর্যাগ্নিঃ কপালে চন্দ্রমণ্ডলম্ ।
নক্ষত্রাণ্যপরাণ্যাহুর্নেত্রাদীনীন্দ্রিয়াণ্যপি ॥ ১১ ॥
ধার্যন্তে বায়ুভির্লোকাঃ যথা প্রবহণাদিভিঃ ।
প্রাণাদিভির্দশবিধৈর্ধার্যতে বায়ুভির্বপুঃ ॥ ১২ ॥
প্রাপ্যেডাপিঙ্গল়ে প্রাণো মূলাৎসূর্যস্বরূপতঃ ।
নাসিকাভ্যাং বহির্গৎবা লীয়তে দ্বিষডঙ্গুলে ॥ ১৩ ॥
অষ্টাঙ্গুল়েন সোমাত্মা নাডীভ্যামন্তরাবিশৎ ।
মলমূত্রমরুচ্ছুক্রাণ্যপানো বিসৃজেদ্বহিঃ ॥ ১৪ ॥
অগ্নীষোমময়ো ভূৎবা সুষুম্নারন্ধ্রমাশ্রিতঃ ।
আব্রহ্মরন্ধ্রমুদ্গচ্ছন্নুদানো বর্ধতে স্বয়ম্ ॥ ১৫ ॥
ব্যাপয়েদ্বপুষি ব্যানো ভুক্তান্নরসমন্বহম্ ।
সন্ধুক্ষণং সমানস্তু কায়াগ্নেঃ কুরুতে সদা ॥ ১৬ ॥
নাগো হিক্কাকরঃ কূর্মো নিমেষোন্মেষকারকঃ ।
ক্ষুতং করোতি কৃকরো দেবদত্তো বিজৃম্ভণম্ ॥ ১৭ ॥
স্থৌল্যং ধনঞ্জয়ঃ কুর্যান্মৃতং চাপি ন মুঞ্চতি ।
আকাশো বহিরপ্যন্তরবকাশং প্রয়চ্ছতি ॥ ১৮ ॥
চন্দ্রার্কৌ কালনেতারৌ প্রাণাপানৌ শরীরিণাম্ ।
সাক্ষী পুরুষ ইত্যেবং মূর্ত্যষ্টকমিদং বপুঃ ॥ ১৯ ॥
সমনস্কমিদং যোগী সেবমান উপাসনম্ ।
অষ্টাঙ্গয়োগয়ুক্তঃ সন্নমনস্কং স গচ্ছতি । ২০ ॥
মনঃ প্রসাদঃ সন্তোষো মৌনমিন্দ্রিয়নিগ্রহঃ ।
দয়া দাক্ষিণ্যমাস্তিক্যমার্জবং মার্দবং ক্ষমা ॥ ২১ ॥
ভাবশুদ্ধিরহিংসা চ ব্রহ্মচর্যং স্মৃতির্ধৃতিঃ ।
ইত্যেবমাদয়োন্যে চ মনঃ সাধ্যা যমাঃ স্মৃতাঃ ॥ ২২ ॥
স্নানং শৌচং ক্রতুঃ সত্যং জপো হোমশ্চ তর্পণম্ ।
তপো দানং তিতিক্ষা চ নমস্কারঃ প্রদক্ষিণম্ ॥ ২৩ ॥
ব্রতোপবাসাদ্যাশ্চান্যে কায়িকা নিয়মাঃ স্মৃতাঃ ।
স্বস্তিকং গোমুখং পদ্যং হংসাখ্যং ব্রাহ্মমাসনম্ ॥ ২৪ ॥
নৃসিংহং গরুডং কূর্মং নাগাখ্যং বৈষ্ণবাসনম্ ।
বীরং ময়ূরং বজ্রাখ্যং সিদ্ধাখ্যং রৌদ্রমাসনম্ ॥ ২৫ ॥
যোন্যাসনং বিদুঃ শাক্তং শৈবং পশ্চিমতানকম্ ।
নিরালম্বনয়োগস্য নিরালম্বনমাসনম্ ॥ ২৬ ॥
নিরালম্বতয়া ধ্যানং নিরালম্বঃ সদাশিবঃ ।
রেচকঃ পূরকশ্চৈব কুম্ভকঃ প্রাণসংয়মঃ ॥ ২৭ ॥
ইন্দ্রিয়াণাং সমস্তানাং বিষয়েভ্যো নিবারণম্ ।
প্রত্যাহার ইতি প্রোক্তং প্রত্যাহারার্থবেদিভিঃ ॥ ২৮ ॥
আধারে ক্বাপি মনসঃ স্থাপনং ধারণোচ্যতে ।
ব্রহ্মবিষ্ণুশিবাদীনাং চিন্তা ধ্যানং প্রচক্ষতে ॥ ২৯ ॥
ধ্যানাদস্পন্দনং বুদ্ধেঃ সমাধিরভিধীয়তে ।
অমনস্কসমাধিস্তু সর্বচিন্তাবিবর্জিতম্ ॥ ৩০ ॥
চিত্তে নিশ্চলতাং যাতে প্রাণো ভবতি নিশ্চলঃ ।
চিত্তস্য নিশ্চলৎবায় যোগং সধ্যানমভ্যসেৎ ॥ ৩১ ॥
আকুঞ্চনমপানস্য প্রাণস্য চ নিরোধনম্ ।
লম্বিকোপরি জিহ্বায়াঃ স্থাপনং যোগসাধনম্ ॥ ৩২ ॥
চিত্তে নিশ্চলতাং যাতে প্রাণে মধ্যপথং গতে ।
চিহ্নান্যেতানি জায়ন্তে পঞ্চভূতজয়াৎপৃথক্ ॥ ৩৩ ॥
মলমূত্রকফাল্পৎবমারোগ্যং লঘুতা তনোঃ ।
সুগন্ধঃ স্বর্ণ[স্বর] বর্ণৎবং প্রথমং যোগলক্ষণম্ ॥ ৩৪ ॥
কণ্টকাগ্রেষ্বসঙ্গৎবং জলপঙ্কেষ্বমজ্জনম্ ।
ক্ষুত্তৃডাদিসহিষ্ণুৎবং দ্বিতীয়ং যোগলক্ষণম্ ॥ ৩৫ ॥
বহ্বন্নপানভোক্তৃৎবমাতপাগ্নিসহিষ্ণুতা ।
দর্শনং শ্রবণং দূরাত্তৃতীয়ং যোগলক্ষণম্ ॥ ৩৬ ॥
মণ্ডূকপ্লবনং ভূমৌ মর্কটপ্লবনং দ্রুমে ।
আকাশগমনং চেতি চতুর্থং যোগলক্ষণম্ ॥ ৩৭ ॥
জ্ঞানং ত্রিকালবিষয়মৈশ্বর্যমণিমাদিকম্ ।
অনন্তশক্তিমৎবং চ পঞ্চমং যোগলক্ষণম্ ॥ ৩৮ ॥
প্রাণে সুষুম্নাং সম্প্রাপ্তে নাদোন্তঃ শ্রূয়তেষ্টধা ।
ঘণ্টাদুন্দুভিশঙ্খাব্ধিবীণাবেণ্বাদিতালবৎ ॥ ৩৯ ॥
তনূনপাত্তটিত্তারাতারেশতপনোপমম্ ।
ব্রহ্মনাডীং গতে প্রাণে বিম্বরূপং প্রকাশতে ॥ ৪০ ॥
শ্বাসাশ্চরন্তি যাবন্তো মনুষ্যস্য দিনং প্রতি ।
তাবন্তি যোজনান্যর্কঃ শ্বাসেশ্বাসে প্রধাবতি ॥ ৪১ ॥
একবিংশতিসাহস্রং ষট্ছতং শ্বাসসঙ্খ্যযা ।
সোঽহমিত্যুচ্চরত্যাত্মা মন্ত্রং প্রত্যহমায়ুষে ॥ ৪২ ॥
সকারং চ হকারং চ লোপয়িৎবা প্রয়োজয়েৎ ।
সন্ধিং বৈ পূর্বরূপাখ্যং ততোঽসৌ প্রণবো ভবেৎ ॥ ৪৩ ॥
অকারশ্চাপ্যুকারশ্চ মকারো বিন্দুনাদকৌ ।
পঞ্চাক্ষরাণ্যমূন্যাহুঃ প্রণবস্থানি পণ্ডিতাঃ ॥
ব্রহ্মা বিষ্ণুশ্চ রুদ্রশ্চাপীশ্বরশ্চ সদাশিবঃ ।
তেষ্বক্ষরেষু তিষ্ঠন্তি ষট্ত্রিংশত্তত্ত্বসংয়ুতাঃ ॥ ৪৫ ॥
গুরুপ্রসাদাল্লভতে যোগমষ্টাঙ্গলক্ষণম্ ।
শিবপ্রসাদাল্লভতে যোগসিদ্ধিং চ শাশ্বতীম্ ॥ ৪৬ ॥
সচ্চিদানন্দরূপায় বিন্দুনাদান্তরাত্মনে ।
আদিমধ্যান্তশূন্যায় গুরূণাং গুরবে নমঃ ॥ ৪৭ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে নবমোল্লাসসঙ্গ্রহঃ ॥ ৪৮ ॥
সর্বাত্মৎবমিতি স্ফুটীকৃতমিদং যস্মাদমুষ্মিংস্তবে
তেনাস্য শ্রবণাত্তদর্থমননাদ্ধ্যানাচ্চ সংকীর্তনাৎ ।
সর্বাত্মৎবমহাবিভূতিসহিতং স্যাদীশ্বরৎবং স্বতঃ
সিদ্ধ্যেত্তৎপুনরষ্টধা পরিণতং চৈশ্বর্যমব্যাহতম্ ॥ ১০ ॥
পরিচ্ছিন্নমহম্ভাবং পরিত্যজ্যানুষঙ্গিকম্ ।
পূর্ণাহম্ভাবলাভোস্য স্তোত্রস্য ফলমুচ্যতে ॥ ১ ॥
পুত্রপৌত্রগৃহক্ষেত্রধনধান্যসমৃদ্ধয়ঃ ।
অর্বাচীনাশ্চ সিধ্যন্তি স্বর্গপাতাল়ভূমিষু ॥ ২ ॥
পাকে প্রবর্তমানস্য শীতাদিপরিহারবৎ ।
প্রাসঙ্গিকাশ্চ সিধ্যন্তি স্তোত্রেণানেন সর্বদা ॥ ৩ ॥
ঐশ্বর্যমীশ্বরৎবং হি তস্য নাস্তি পৃথক্স্থিতিঃ ।
পুরুষে ধাবমানেঽপি ছায়া তমনুধাবতি ॥ ৪ ॥
অনন্তশক্তিরৈশ্বর্যং নিষ্যন্দাশ্চাণিমাদয়ঃ ।
স্বস্যেশ্বরৎবে সংসিদ্ধে সিধ্যন্তি স্বয়মেব হি ॥ ৫ ॥
যদীয়ৈশ্বর্যবিপ্রুড্ভির্ব্রহ্মবিষ্ণুশিবাদয়ঃ ।
ঐশ্বর্যবন্তো শাসন্তে স এবাত্মা সদাশিবঃ ॥ ৬ ॥
পুষ্পমানয়তা গন্ধো বিনেচ্ছামনুভূয়তে ।
পূর্ণাহম্ভাবয়ুক্তেন পরিচ্ছিন্না বিভূতয়ঃ ॥ ৭ ॥
অণিমা মহিমা চৈব গরিমা লঘিমা তথা ।
প্রাপ্তিঃ প্রাকাম্যমীশিৎবং বশিৎবং চাষ্টসিদ্ধয়ঃ ॥ ৮ ॥
অত্যন্তমণুষু প্রাণিষ্বাত্মৎবেন প্রবেশনম্ ।
অণিমাসংজ্ঞমৈশ্বর্যং ব্যাপ্তস্য পরমাত্মনঃ ॥ ৯ ॥
ব্রহ্মাণ্ডাদিশিবান্তায়াঃ ষট্ত্রিংশত্তত্ত্বসংহতেঃ ।
বহিশ্চ ব্যাপ্যবৃত্তিৎবমৈশ্বর্যং মহিমাহ্বয়ম্ ॥ ১০ ॥
মহামেরুসমাঙ্গস্য সমুদ্ধরণকর্মণি ।
লাঘবে তূলতুল্যৎবং লঘিমানং বিদুর্বুধাঃ ॥ ১১ ॥
পরমাণুসমাঙ্গস্য সমুদ্ধরণকর্মণি ।
গুরবে মেরুতুল্যৎবং গরিমাণং বিদুর্বুধাঃ ॥ ১২ ॥
পাতালবাসিনঃ পুংসো ব্রহ্মলোকাবলোকনম্ ।
প্রাপ্তির্নাম মহৈশ্বর্যং সুদুষ্প্রাপময়োগিনাম্ ॥ ১৩ ॥
আকাশগমনাদীনামন্যাসং সিদ্ধিসম্পদাম্ ।
স্বেচ্ছামাত্রেণ সংসিদ্ধিঃ প্রাকাম্যমভিধীয়তে ॥ ১৪ ॥
স্বশরীরপ্রকাশেন সর্বার্থানাং প্রকাশনম্ ।
প্রাকাশ্যমিদমৈশ্বর্যমিতি কেচিৎপ্রচক্ষতে ॥ ১৫ ॥
স্বেচ্ছামাত্রেণ লোকানাং সৃষ্টিস্থিত্যন্তকর্তৃতা ।
সূর্যাদিনাং নিয়োক্তৃৎবমীশিৎবমভিধীয়তে ॥ ১৬ ॥
সলোকপালাঃ সর্বেঽপি লোকাঃ স্ববশবর্তিনঃ ।
তদৈশ্বর্যং বশিৎবাখ্যং সুলভং শিবয়োগিনাম্ ॥ ১৭ ॥
যস্ত্বেবং ব্রাহ্মণো বেত্তি তস্য দেবা বশে স্থিতাঃ ।
কিং পুনঃ ক্ষ্মাপতিব্যাঘ্রব্যাল়স্ত্রীপুরুষাদয়ঃ ॥ ১৮ ॥
সর্বাত্মভাবসাম্রাজ্যনিরন্তরিতচেতসাম্ ।
পরিপক্বসমাধীনাং কিং কিং নাম ন সিধ্যতি ॥ ১৯ ॥
স্তোত্রমেতৎপঠেদ্ধীমান্সর্বাত্মৎবং চ ভাবয়েৎ ।
অর্বাচীনে স্পৃহাং মুক্ত্বা ফলে স্বর্গাদিসম্ভবে ॥ ২০ ॥
স্বর্গাদিরাজ্যং সাম্রাজ্যং মনুতে ন হি পণ্ডিতঃ ।
তদেব তস্য সাম্রাজ্যং যত্তু স্বারাজ্যমাত্মনি ॥ ২১ ॥
সর্বাত্মভাবনাবন্তং সেবন্তে সর্বসিদ্ধয়ঃ ।
তস্মাদাত্মনি সাম্রাজ্যং কুর্যান্নিয়তমানসঃ ॥ ২২ ॥
যস্য দেবে পরা ভক্তির্যথা দেবে তথা গুরৌ ।
তস্যৈতে কথিতা হ্যর্থাঃ প্রকাশন্তে মহাত্মনঃ ॥ ২৩ ॥
প্রকাশাত্মিকয়া শক্ত্যা প্রকাশানাং প্রভাকরঃ ।
প্রকাশয়তি যো বিশ্বং প্রকাশোঽয়ং প্রকাশতাম্ ॥ ২৪ ॥
ইতি শ্রীদক্ষিণামূর্তিস্তোত্রার্থপ্রতিপাদকে ।
প্রবন্ধে মানসোল্লাসে দশম্মোল্লাসসঙ্গ্রহঃ ॥ ২৫ ॥
ইতি শ্রীমচ্ছঙ্করভগবৎপাদাচার্যকৃত
দক্ষিণামূর্তিস্তোত্রভাবার্থবার্তিকং
সুরেশ্বরাচার্যকৃতং সমাপ্তম্ ॥
ওঁ তৎ সৎ ॥
– Chant Stotra in Other Languages –
Manasollasa in Sanskrit – English – Marathi । Bengali – Gujarati – Kannada – Malayalam – Odia – Telugu – Tamil