॥ માતૃપઞ્ચકમ્ ॥
ૐ
શ્રીરામજયમ્ ।
ૐ સદ્ગુરુશ્રીત્યાગરાજસ્વામિને નમો નમઃ ।
માતૃગાયત્રી
ૐ માતૃદેવ્યૈ ચ વિદ્મહે । વરદાયૈ ચ ધીમહિ ।
તન્નો લક્ષ્મીઃ પ્રચોદયાત્ ॥
લક્ષ્મીં વરદપત્નીં ચ ક્ષાન્તાં સુપ્રિયસેવિતામ્ ।
વીણાસઙ્ગીતલોલાં ચ મન્માતરં નમામ્યહમ્ ॥ ૧॥
અન્નપૂર્ણાં બુભુક્ષાહાં સ્વસ્તિવાચાસ્પદાં વરામ્ ।
સત્કારુણ્યગુણામમ્બાં મન્માતરં નમામ્યહમ્ ॥ ૨॥
રોગપીડાપહશ્લોકાં રોગશોકોપશામનીમ્ ।
શ્લોકપ્રિયાં સ્તુતાં સ્તુત્યાં મન્માતરં નમામ્યહમ્ ॥ ૩॥
રામકૃષ્ણપ્રિયાં ભક્તાં રામાયણકથાપ્રિયામ્ ।
શ્રીમદ્ભાગવતપ્રીતાં મન્માતરં નમામ્યહમ્ ॥ ૪॥
ત્યાગરાજકૃતિપ્રીતાં પુત્રીપુષ્પાપ્રિયસ્તુતામ્ ।
શતાયુર્મઙ્ગલાશીદાં મન્માતરં નમામ્યહમ્ ॥ ૫॥
મઙ્ગલં મમ માત્રે ચ લક્ષ્મીનામ્ન્યૈ સુમઙ્ગલમ્ ।
મઙ્ગલં પ્રિયદાત્ર્યૈ ચ મનોગાયૈ સુમઙ્ગલમ્ ॥ ૬॥
ઇતિ માતૃપઞ્ચકં પુત્ર્યા પુષ્પયા પ્રીત્યા
માતરિ લક્ષ્મ્યાં સમર્પિતમ્ ।
ૐ શુભમસ્તુ ।