Narayaniyam Ekavimsadasakam in Kannada:

॥ ನಾರಾಯಣೀಯಂ ಏಕವಿಂಶದಶಕಮ್ ॥

ನಾರಾಯಣೀಯಂ ಏಕವಿಂಶದಶಕಮ್ (೨೧) – ನವ ವರ್ಷಾಃ ತಥಾ ಸಪ್ತದ್ವೀಪಾಃ – ಜಂಬೂದ್ವೀಪಾದಿಷು ಉಪಾಸನಾಪದ್ಧತಿಃ ।

ಮಧ್ಯೋದ್ಭವೇ ಭುವ ಇಲಾವೃತನಾಮ್ನಿ ವರ್ಷೇ
ಗೌರೀಪ್ರಧಾನವನಿತಾಜನಮಾತ್ರಭಾಜಿ ।
ಶರ್ವೇಣ ಮನ್ತ್ರನುತಿಭಿಃ ಸುಮುಪಾಸ್ಯಮಾನಂ
ಸಙ್ಕರ್ಷಣಾತ್ಮಕಮಧೀಶ್ವರ ಸಂಶ್ರಯೇ ತ್ವಾಮ್ ॥ ೨೧-೧ ॥

ಭದ್ರಾಶ್ವನಾಮಕ ಇಲಾವೃತಪೂರ್ವವರ್ಷೇ
ಭದ್ರಶ್ರವೋಭಿರೃಷಿಭಿಃ ಪರಿಣೂಯಮಾನಮ್ ।
ಕಲ್ಪಾನ್ತಗೂಢನಿಗಮೋದ್ಧರಣಪ್ರವೀಣಂ
ಧ್ಯಾಯಾಮಿ ದೇವ ಹಯಶೀರ್ಷತನುಂ ಭವನ್ತಮ್ ॥ ೨೧-೨ ॥

ಧ್ಯಾಯಾಮಿ ದಕ್ಷಿಣಗತೇ ಹರಿವರ್ಷವರ್ಷೇ
ಪ್ರಾಹ್ಲಾದಮುಖ್ಯಪುರುಷೈಃ ಪರಿಷೇವ್ಯಮಾಣಮ್ ।
ಉತ್ತುಙ್ಗಶಾನ್ತಧವಲಾಕೃತಿಮೇಕಶುದ್ಧ-
ಜ್ಞಾನಪ್ರದಂ ನರಹರಿಂ ಭಗವನ್ ಭವನ್ತಮ್ ॥ ೨೧-೩ ॥

ವರ್ಷೇ ಪ್ರತೀಚಿ ಲಲಿತಾತ್ಮನಿ ಕೇತುಮಾಲೇ
ಲೀಲಾವಿಶೇಷಲಲಿತಸ್ಮಿತಶೋಭನಾಙ್ಗಮ್ ।
ಲಕ್ಷ್ಮ್ಯಾ ಪ್ರಜಾಪತಿಸುತೈಶ್ಚ ನಿಷೇವ್ಯಮಾಣಂ
ತಸ್ಯಾಃ ಪ್ರಿಯಾಯ ಧೃತಕಾಮತನುಂ ಭಜೇ ತ್ವಾಮ್ ॥ ೨೧-೪ ॥

ರಮ್ಯೇ ಹ್ಯುದೀಚಿ ಖಲು ರಮ್ಯಕನಾಮ್ನಿ ವರ್ಷೇ
ತದ್ವರ್ಷನಾಥಮನುವರ್ಯಸಪರ್ಯಮಾಣಮ್ ।
ಭಕ್ತೈಕವತ್ಸಲಮಮತ್ಸರಹೃತ್ಸು ಭಾನ್ತಂ
ಮತ್ಸ್ಯಾಕೃತಿಂ ಭುವನನಾಥ ಭಜೇ ಭವನ್ತಮ್ ॥ ೨೧-೫ ॥

ವರ್ಷಂ ಹಿರಣ್ಮಯಸಮಾಹ್ವಯಮೌತ್ತರಾಹ-
ಮಾಸೀನಮದ್ರಿಧೃತಿಕರ್ಮಠಕಾಮಠಾಙ್ಗಮ್ ।
ಸಂಸೇವತೇ ಪಿತೃಗಣಪ್ರವರೋಽರ್ಯಮಾ ಯಂ
ತಂ ತ್ವಾಂ ಭಜಾಮಿ ಭಗವನ್ ಪರಚಿನ್ಮಯಾತ್ಮನ್ ॥ ೨೧-೬ ॥

ಕಿಂ ಚೋತ್ತರೇಷು ಕುರುಷು ಪ್ರಿಯಯಾ ಧರಣ್ಯಾ
ಸಂಸೇವಿತೋ ಮಹಿತಮನ್ತ್ರನುತಿಪ್ರಭೇದೈಃ ।
ದಂಷ್ಟ್ರಾಗ್ರಘೃಷ್ಟಘನಪೃಷ್ಠಗರಿಷ್ಠವರ್ಷ್ಮಾ
ತ್ವಂ ಪಾಹಿ ವಿಜ್ಞನುತ ಯಜ್ಞವರಾಹಮೂರ್ತೇ ॥ ೨೧-೭ ॥

ಯಾಮ್ಯಾಂ ದಿಶಂ ಭಜತಿ ಕಿಮ್ಪುರುಷಾಖ್ಯವರ್ಷೇ
ಸಂಸೇವಿತೋ ಹನುಮತಾ ದೃಢಭಕ್ತಿಭಾಜಾ ।
ಸೀತಾಭಿರಾಮಪರಮಾದ್ಭುತರೂಪಶಾಲೀ
ರಾಮಾತ್ಮಕಃ ಪರಿಲಸನ್ಪರಿಪಾಹಿ ವಿಷ್ಣೋ ॥ ೨೧-೮ ॥

ಶ್ರೀನಾರದೇನ ಸಹ ಭಾರತಖಣ್ಡಮುಖ್ಯೈ-
ಸ್ತ್ವಂ ಸಾಙ್ಖ್ಯಯೋಗನುತಿಭಿಃ ಸಮುಪಾಸ್ಯಮಾನಃ ।
ಆಕಲ್ಪಕಾಲಮಿಹ ಸಾಧುಜನಾಭಿರಕ್ಷೀ
ನಾರಾಯಣೋ ನರಸಖಃ ಪರಿಪಾಹಿ ಭೂಮನ್ ॥ ೨೧-೯ ॥

ಪ್ಲಾಕ್ಷೇಽರ್ಕರೂಪಮಯಿ ಶಾಲ್ಮಲ ಇನ್ದುರೂಪಂ
ದ್ವೀಪೇ ಭಜನ್ತಿ ಕುಶನಾಮನಿ ವಹ್ನಿರೂಪಮ್ ।
ಕ್ರೌಞ್ಚೇಽಂಬುರೂಪಮಥ ವಾಯುಮಯಂ ಚ ಶಾಕೇ
ತ್ವಾಂ ಬ್ರಹ್ಮರೂಪಮಯಿ ಪುಷ್ಕರನಾಮ್ನಿ ಲೋಕಾಃ ॥ ೨೧-೧೦ ॥

ಸರ್ವೈರ್ಧ್ರುವಾದಿಭಿರುಡುಪ್ರಕರೈರ್ಗ್ರಹೈಶ್ಚ
ಪುಚ್ಛಾದಿಕೇಷ್ವವಯವೇಷ್ವಭಿಕಲ್ಪ್ಯಮಾನೈಃ ।
ತ್ವಂ ಶಿಂಶುಮಾರವಪುಷಾ ಮಹತಾಮುಪಾಸ್ಯಃ
ಸನ್ಧ್ಯಾಸು ರುನ್ಧಿ ನರಕಂ ಮಮ ಸಿನ್ಧುಶಾಯಿನ್ ॥ ೨೧-೧೧ ॥

ಪಾತಾಲಮೂಲಭುವಿ ಶೇಷತನುಂ ಭವನ್ತಂ
ಲೋಲೈಕಕುಣ್ಡಲವಿರಾಜಿಸಹಸ್ರಶೀರ್ಷಮ್ ।
ನೀಲಾಂಬರಂ ಧೃತಹಲಂ ಭುಜಗಾಙ್ಗನಾಭಿ-
ರ್ಜುಷ್ಟಂ ಭಜೇ ಹರ ಗದಾನ್ಗುರುಗೇಹನಾಥ ॥ ೨೧-೧೨ ॥

ಇತಿ ಏಕವಿಂಶದಶಕಂ ಸಮಾಪ್ತಮ್ ॥

– Chant Stotras in other Languages –

Narayaniyam Ekavimsadasakam in English – Kannada – Telugu – Tamil