Narayaniyam Ekonasititama Dasakam In Kannada – Narayaneyam Dasakam 79

Narayaniyam Ekonasititama Dasakam in Kannada:

॥ ನಾರಾಯಣೀಯಂ ಏಕೋನಾಶೀತಿತಮ ದಶಕಮ್ ॥

ನಾರಾಯಣೀಯಂ ಏಕೋನಾಶೀತಿತಮ ದಶಕಮ್ (೭೯) – ರುಕ್ಮಿಣೀಹರಣಂ-ವಿವಾಹಮ್

ಬಲಸಮೇತಬಲಾನುಗತೋ ಭವಾನ್
ಪುರಮಗಾಹತ ಭೀಷ್ಮಕಮಾನಿತಃ ।
ದ್ವಿಜಸುತಂ ತ್ವದುಪಾಗಮವಾದಿನಂ
ಧೃತರಸಾ ತರಸಾ ಪ್ರಣನಾಮ ಸಾ ॥ ೭೯-೧ ॥

ಭುವನಕಾನ್ತಮವೇಕ್ಷ್ಯ ಭವದ್ವಪು-
ರ್ನೃಪಸುತಸ್ಯ ನಿಶಮ್ಯ ಚ ಚೇಷ್ಟಿತಮ್ ।
ವಿಪುಲಖೇದಜುಷಾಂ ಪುರವಾಸಿನಾಂ
ಸರುದಿತೈರುದಿತೈರಗಮನ್ನಿಶಾ ॥ ೭೯-೨ ॥

ತದನು ವನ್ದಿತುಮಿನ್ದುಮುಖೀ ಶಿವಾಂ
ವಿಹಿತಮಙ್ಗಲಭೂಷಣಭಾಸುರಾ ।
ನಿರಗಮದ್ಭವದರ್ಪಿತಜೀವಿತಾ
ಸ್ವಪುರತಃ ಪುರತಃ ಸುಭಟಾವೃತಾ ॥ ೭೯-೩ ॥

ಕುಲವಧೂಭಿರುಪೇತ್ಯ ಕುಮಾರಿಕಾ
ಗಿರಿಸುತಾಂ ಪರಿಪೂಜ್ಯ ಚ ಸಾದರಮ್ ।
ಮುಹುರಯಾಚತ ತತ್ಪದಪಙ್ಕಜೇ
ನಿಪತಿತಾ ಪತಿತಾಂ ತವ ಕೇವಲಮ್ ॥ ೭೯-೪ ॥

ಸಮವಲೋಕಕುತೂಹಲಸಙ್ಕುಲೇ
ನೃಪಕುಲೇ ನಿಭೃತಂ ತ್ವಯಿ ಚ ಸ್ಥಿತೇ ।
ನೃಪಸುತಾ ನಿರಗಾದ್ಗಿರಿಜಾಲಯಾ-
ತ್ಸುರುಚಿರಂ ರುಚಿರಞ್ಜಿತದಿಙ್ಮುಖಾ ॥ ೭೯-೫ ॥

ಭುವನಮೋಹನರೂಪರುಚಾ ತದಾ
ವಿವಶಿತಾಖಿಲರಾಜಕದಂಬಯಾ ।
ತ್ವಮಪಿ ದೇವ ಕಟಾಕ್ಷವಿಮೋಕ್ಷಣೈಃ
ಪ್ರಮದಯಾ ಮದಯಾಞ್ಚಕೃಷೇ ಮನಾಕ್ ॥ ೭೯-೬ ॥

ಕ್ವನು ಗಮಿಷ್ಯಸಿ ಚನ್ದ್ರಮುಖೀತಿ ತಾಂ
ಸರಸಮೇತ್ಯ ಕರೇಣ ಹರನ್ ಕ್ಷಣಾತ್ ।
ಸಮಧಿರೋಪ್ಯ ರಥಂ ತ್ವಮಪಾಹೃಥಾ
ಭುವಿ ತತೋ ವಿತತೋ ನಿನದೋ ದ್ವಿಷಾಮ್ ॥ ೭೯-೭ ॥

ಕ್ವ ನು ಗತಃ ಪಶುಪಾಲ ಇತಿ ಕ್ರುಧಾ
ಕೃತರಣಾ ಯದುಭಿಶ್ಚ ಜಿತಾ ನೃಪಾಃ ।
ನ ತು ಭವಾನುದಚಾಲ್ಯತ ತೈರಹೋ
ಪಿಶುನಕೈಃ ಶುನಕೈರಿವ ಕೇಸರೀ ॥ ೭೯-೮ ॥

ತದನು ರುಕ್ಮಿಣಮಾಗತಮಾಹವೇ
ವಧಮುಪೇಕ್ಷ್ಯ ನಿಬಧ್ಯ ವಿರೂಪಯನ್ ।
ಹೃತಮದಂ ಪರಿಮುಚ್ಯ ಬಲೋಕ್ತಿಭಿಃ
ಪುರಮಯಾ ರಮಯಾ ಸಹ ಕಾನ್ತಯಾ ॥ ೭೯-೯ ॥

See Also  108 Names Of Ranganatha – Ashtottara Shatanamavali In Kannada

ನವಸಮಾಗಮಲಜ್ಜಿತಮಾನಸಾಂ
ಪ್ರಣಯಕೌತುಕಜೃಂಭಿತಮನ್ಮಥಾಮ್ ।
ಅರಮಯಃ ಖಲು ನಾಥ ಯಥಾಸುಖಂ
ರಹಸಿ ತಾಂ ಹಸಿತಾಂಶುಲಸನ್ಮುಖೀಮ್ ॥ ೭೯-೧೦ ॥

ವಿವಿಧನರ್ಮಭಿರೇವಮಹರ್ನಿಶಂ
ಪ್ರಮದಮಾಕಲಯನ್ಪುನರೇಕದಾ ।
ಋಜುಮತೇಃ ಕಿಲ ವಕ್ರಾಗಿರಾ ಭವಾನ್
ವರತನೋರತನೋದತಿಲೋಲತಾಮ್ ॥ ೭೯-೧೧ ॥

ತದಧಿಕೈರಥ ಲಾಲನಕೌಶಲೈಃ
ಪ್ರಣಯಿನೀಮಧಿಕಂ ಸುಖಯನ್ನಿಮಾಮ್ ।
ಅಯಿ ಮುಕುನ್ದ ಭವಚ್ಚರಿತಾನಿ ನಃ
ಪ್ರಗದತಾಂ ಗದತಾನ್ತಿಮಪಾಕುರು ॥ ೭೯-೧೨ ॥

ಇತಿ ಏಕೋನಾಶೀತಿತಮದಶಕಂ ಸಮಾಪ್ತಂ

– Chant Stotras in other Languages –

Narayaneeyam Ekonasititama Dasakam in English – Kannada – TeluguTamil