Narayaniyam Navamadasakam in Kannada:

॥ ನಾರಾಯಣೀಯಂ ನವಮದಶಕಮ್ ॥

ನವಮದಶಕಮ್ (೯) – ಬ್ರಹ್ಮಣಃ ತಪಃ ತಥಾ ಲೋಕಸೃಷ್ಟಿಃ

ಸ್ಥಿತಃ ಸ ಕಮಲೋದ್ಭವಸ್ತವ ಹಿ ನಾಭಿಪಙ್ಕೇರುಹೇ
ಕುತಃ ಸ್ವಿದಿದಮಂಬುಧಾವುದಿತಮಿತ್ಯನಾಲೋಕಯನ್ ।
ತದೀಕ್ಷಣಕುತೂಹಲಾತ್ಪ್ರತಿದಿಶಂ ವಿವೃತ್ತಾನನ-
ಶ್ಚತುರ್ವದನತಾಮಗಾದ್ವಿಕಸದಷ್ಟದೃಷ್ಟ್ಯಂಬುಜಾಮ್ ॥ ೯-೧ ॥

ಮಹಾರ್ಣವವಿಘೂರ್ಣಿತಂ ಕಮಲಮೇವ ತತ್ಕೇವಲಂ
ವಿಲೋಕ್ಯ ತದುಪಾಶ್ರಯಂ ತವ ತನುಂ ತು ನಾಲೋಕಯನ್ ।
ಕ ಏಷ ಕಮಲೋದರೇ ಮಹತಿ ನಿಸ್ಸಹಾಯೋ ಹ್ಯಹಂ
ಕುತಃ ಸ್ವಿದಿದಮಂಬುಜಂ ಸಮಜನೀತಿ ಚಿನ್ತಾಮಗಾತ್ ॥ ೯-೨ ॥

ಅಮುಷ್ಯ ಹಿ ಸರೋರುಹಃ ಕಿಮಪಿ ಕಾರಣಂ ಸಂಭವೇ-
ದಿತಿ ಸ್ಮ ಕೃತನಿಶ್ಚಯಃ ಸ ಖಲು ನಾಲರನ್ಧ್ರಾಧ್ವನಾ ।
ಸ್ವಯೋಗಬಲವಿದ್ಯಯಾ ಸಮವರೂಢವಾನ್ಪ್ರೌಢಧೀಃ
ತ್ವದೀಯಮತಿಮೋಹನಂ ನ ತು ಕಲೇಬರಂ ದೃಷ್ಟವಾನ್ ॥ ೯-೩ ॥

ತತಸ್ಸಕಲನಾಲಿಕಾವಿವರಮಾರ್ಗಗೋ ಮಾರ್ಗಯನ್
ಪ್ರಯಸ್ಯ ಶತವತ್ಸರಂ ಕಿಮಪಿ ನೈವ ಸನ್ದೃಷ್ಟವಾನ್ ।
ನಿವೃತ್ಯ ಕಮಲೋದರೇ ಸುಖನಿಷಣ್ಣ ಏಕಾಗ್ರಧೀಃ
ಸಮಾಧಿಬಲಮಾದಧೇ ಭವದನುಗ್ರಹೈಕಾಗ್ರಹೀ ॥ ೯-೪ ॥

ಶತೇನ ಪರಿವತ್ಸರೈರ್ದೃಢಸಮಾಧಿಬನ್ಧೋಲ್ಲಸತ್-
ಪ್ರಬೋಧವಿಶದೀಕೃತಃ ಸ ಖಲು ಪದ್ಮಿನೀಸಂಭವಃ ।
ಅದೃಷ್ಟಚರಮದ್ಭುತಂ ತವ ಹಿ ರೂಪಮನ್ತರ್ದೃಶಾ
ವ್ಯಚಷ್ಟ ಪರಿತುಷ್ಟಧೀರ್ಭುಜಗಭೋಗಭಾಗಾಶ್ರಯಮ್ ॥ ೯-೫ ॥

ಕಿರೀಟಮುಕುಟೋಲ್ಲಸತ್ಕಟಕಹಾರಕೇಯೂರಯುಙ್-
ಮಣಿಸ್ಫುರಿತಮೇಖಲಂ ಸುಪರಿವೀತಪೀತಾಂಬರಮ್ ।
ಕಲಾಯಕುಸುಮಪ್ರಭಂ ಗಲತಲೋಲ್ಲಸತ್ಕೌಸ್ತುಭಂ
ವಪುಸ್ತದಯಿ ಭಾವಯೇ ಕಮಲಜನ್ಮನೇ ದರ್ಶಿತಮ್ ॥ ೯-೬ ॥

ಶ್ರುತಿಪ್ರಕರದರ್ಶಿತಪ್ರಚುರವೈಭವ ಶ್ರೀಪತೇ
ಹರೇ ಜಯ ಜಯ ಪ್ರಭೋ ಪದಮುಪೈಷಿ ದಿಷ್ಟ್ಯಾ ದೃಶೋಃ ।
ಕುರುಷ್ವ ಧಿಯಮಾಶು ಮೇ ಭುವನನಿರ್ಮಿತೌ ಕರ್ಮಠಾ-
ಮಿತಿ ದ್ರುಹಿಣವರ್ಣಿತಸ್ವಗುಣಬಂಹಿಮಾ ಪಾಹಿ ಮಾಮ್ ॥ ೯-೭ ॥

ಲಭಸ್ವ ಭುವನತ್ರಯೀರಚನದಕ್ಷತಾಮಕ್ಷತಾಂ
ಗೃಹಾಣ ಮದನುಗ್ರಹಂ ಕುರು ತಪಶ್ಚ ಭೂಯೋ ವಿಧೇ ।
ಭವತ್ವಖಿಲಸಾಧನೀ ಮಯಿ ಚ ಭಕ್ತಿರತ್ಯುತ್ಕಟೇ-
ತ್ಯುದೀರ್ಯ ಗಿರಮಾದಧಾ ಮುದಿತಚೇತಸಂ ವೇಧಸಮ್ ॥ ೯-೮ ॥

ಶತಂ ಕೃತತಪಾಸ್ತತಃ ಸ ಖಲು ದಿವ್ಯಸಂವತ್ಸರಾ-
ನವಾಪ್ಯ ಚ ತಪೋಬಲಂ ಮತಿಬಲಂ ಚ ಪೂರ್ವಾಧಿಕಮ್ ।
ಉದೀಕ್ಷ್ಯ ಕಿಲ ಕಮ್ಪಿತಂ ಪಯಸಿ ಪಙ್ಕಜಂ ವಾಯುನಾ
ಭವದ್ಬಲವಿಜೃಂಭಿತಃ ಪವನಪಾಥಸೀ ಪೀತವಾನ್ ॥ ೯-೯ ॥

ತವೈವ ಕೃಪಯಾ ಪುನಃ ಸರಸಿಜೇನ ತೇನೈವ ಸಃ
ಪ್ರಕಲ್ಪ್ಯ ಭುವನತ್ರಯೀಂ ಪ್ರವವೃತೇ ಪ್ರಜಾನಿರ್ಮಿತೌ ।
ತಥಾವಿಧಕೃಪಾಭರೋ ಗುರುಮರುತ್ಪುರಾಧೀಶ್ವರ
ತ್ವಮಾಶು ಪರಿಪಾಹಿ ಮಾಂ ಗುರುದಯೋಕ್ಷಿತೈರೀಕ್ಷಿತೈಃ ॥ ೯-೧೦ ॥

ಇತಿ ನವಮದಶಕಂ ಸಮಾಪ್ತಮ್ ॥

– Chant Stotras in other Languages –

Narayaniyam Navamadasakam in English –  Kannada – Telugu – Tamil