Narayaniyam Sasthadasakam in Kannada:

॥ ನಾರಾಯಣೀಯಂ ಷಷ್ಠದಶಕಮ್ ॥

ಷಷ್ಠದಶಕಮ್ (೬) – ವಿರಾಟ್-ಸ್ವರೂಪವರ್ಣನಮ್

ಏವಂ ಚತುರ್ದಶಜಗನ್ಮಯತಾಂ ಗತಸ್ಯ
ಪಾತಾಲಮೀಶ ತವ ಪಾದತಲಂ ವದನ್ತಿ ।
ಪಾದೋರ್ಧ್ವದೇಶಮಪಿ ದೇವ ರಸಾತಲಂ ತೇ
ಗುಲ್ಫದ್ವಯಂ ಖಲು ಮಹಾತಲಮದ್ಭುತಾತ್ಮನ್ ॥ ೬-೧ ॥

ಜಙ್ಘೇ ತಲಾತಲಮಥೋ ಸುತಲಂ ಚ ಜಾನೂ
ಕಿಞ್ಚೋರುಭಾಗಯುಗಲಂ ವಿತಲಾತಲೇ ದ್ವೇ ।
ಕ್ಷೋಣೀತಲಂ ಜಘನಮಂಬರಮಙ್ಗ ನಾಭಿ
ರ್ವಕ್ಷಶ್ಚ ಶಕ್ರನಿಲಯಸ್ತವ ಚಕ್ರಪಾಣೇ ॥ ೬-೨ ॥

ಗ್ರೀವಾ ಮಹಸ್ತವ ಮುಖಂ ಚ ಜನಸ್ತಪಸ್ತು
ಫಾಲಂ ಶಿರಸ್ತವ ಸಮಸ್ತಮಯಸ್ಯ ಸತ್ಯಮ್ ।
ಏವಂ ಜಗನ್ಮಯತನೋ ಜಗದಾಶ್ರಿತೈರ-
ಪ್ಯನ್ಯೈರ್ನಿಬದ್ಧವಪುಷೇ ಭಗವನ್ನಮಸ್ತೇ ॥ ೬-೩ ॥

ತ್ವದ್ಬ್ರಹ್ಮರನ್ಧ್ರಪದಮೀಶ್ವರ ವಿಶ್ವಕನ್ದ
ಛನ್ದಾಂಸಿ ಕೇಶವ ಘನಾಸ್ತವ ಕೇಶಪಾಶಾಃ ।
ಉಲ್ಲಾಸಿಚಿಲ್ಲಿಯುಗಲಂ ದ್ರುಹಿಣಸ್ಯ ಗೇಹಂ
ಪಕ್ಷ್ಮಾಣಿ ರಾತ್ರಿದಿವಸೌ ಸವಿತಾ ಚ ನೇತ್ರೇ ॥ ೬-೪ ॥

ನಿಶ್ಶೇಷವಿಶ್ವರಚನಾ ಚ ಕಟಾಕ್ಷಮೋಕ್ಷಃ
ಕರ್ಣೌ ದಿಶೋಽಶ್ವಿಯುಗಲಂ ತವ ನಾಸಿಕೇ ದ್ವೇ ।
ಲೋಭತ್ರಪೇ ಚ ಭಗವನ್ನಧರೋತ್ತರೋಷ್ಠೌ
ತಾರಾಗಣಾಶ್ಚ ದಶನಾಃ ಶಮನಶ್ಚ ದಂಷ್ಟ್ರಾ ॥ ೬-೫ ॥

ಮಾಯಾ ವಿಲಾಸಹಸಿತಂ ಶ್ವಸಿತಂ ಸಮೀರೋ
ಜಿಹ್ವಾ ಜಲಂ ವಚನಮೀಶ ಶಕುನ್ತಪಙ್ಕ್ತಿಃ ।
ಸಿದ್ಧಾದಯಃ ಸ್ವರಗಣಾ ಮುಖರನ್ಧ್ರಮಗ್ನಿ-
ರ್ದೇವಾ ಭುಜಾಃ ಸ್ತನಯುಗಂ ತವ ಧರ್ಮದೇವಃ ॥ ೬-೬ ॥

ಪೃಷ್ಠಂ ತ್ವಧರ್ಮ ಇಹ ದೇವ ಮನಃ ಸುಧಾಂಶು-
ರವ್ಯಕ್ತಮೇವ ಹೃದಯಾಂಬುಜಮಂಬುಜಾಕ್ಷ ।
ಕುಕ್ಷಿಃ ಸಮುದ್ರನಿವಹಾ ವಸನಂ ತು ಸನ್ಧ್ಯೇ
ಶೇಫಃ ಪ್ರಜಾಪತಿರಸೌ ವೃಷಣೌ ಚ ಮಿತ್ರಃ ॥ ೬-೭ ॥

ಶ್ರೋಣೀಸ್ಥಲಂ ಮೃಗಗಣಾಃ ಪದಯೋರ್ನಖಾಸ್ತೇ
ಹಸ್ತ್ಯುಷ್ಟ್ರಸೈನ್ಧವಮುಖಾ ಗಮನಂ ತು ಕಾಲಃ ।
ವಿಪ್ರಾದಿವರ್ಣಭವನಂ ವದನಾಬ್ಜಬಾಹು-
ಚಾರೂರುಯುಗ್ಮಚರಣಂ ಕರುಣಾಂಬುಧೇ ತೇ ॥ ೬-೮ ॥

ಸಂಸಾರಚಕ್ರಮಯಿ ಚಕ್ರಧರ ಕ್ರಿಯಾಸ್ತೇ
ವೀರ್ಯಂ ಮಹಾಸುರಗಣೋಽಸ್ಥಿಕುಲಾನಿ ಶೈಲಾಃ ।
ನಾಡ್ಯಸ್ಸರಿತ್ಸಮುದಯಸ್ತರವಶ್ಚ ರೋಮ
ಜೀಯಾದಿದಂ ವಪುರನಿರ್ವಚನೀಯಮೀಶ ॥ ೬-೯ ॥

ಈದೃಗ್ಜಗನ್ಮಯವಪುಸ್ತವ ಕರ್ಮಭಾಜಾಂ
ಕರ್ಮಾವಸಾನಸಮಯೇ ಸ್ಮರಣೀಯಮಾಹುಃ ।
ತಸ್ಯಾನ್ತರಾತ್ಮವಪುಷೇ ವಿಮಲಾತ್ಮನೇ ತೇ
ವಾತಾಲಯಾಧಿಪ ನಮೋಽಸ್ತು ನಿರುನ್ಧಿ ರೋಗಾನ್ ॥ ೬-೧೦ ॥

ಇತಿ ಷಷ್ಠದಶಕಂ ಸಮಾಪ್ತಮ್ ॥

– Chant Stotras in other Languages –

Narayaniyam Sasthadasakam in English –  Kannada – Telugu – Tamil