శ్రీవిఘ్నేశపురాణసారముదితం వ్యాసాయ ధాత్రా పురా
తత్ఖణ్డం ప్రథమం మహాగణపతేశ్చోపాసనాఖ్యం యథా ।
సంహర్తుం త్రిపురం శివేన గణపస్యాదౌ కృతం పూజనం
కర్తుం సృష్టిమిమాం స్తుతః స విధినా వ్యాసేన బుద్ధ్యాప్తయే ॥
సఙ్కష్ట్యాశ్చ వినాయకస్య చ మనోః స్థానస్య తీర్థస్య వై
దూర్వాణాం మహిమేతి భక్తిచరితం తత్పార్థివస్యార్చనమ్ ।
తేభ్యో యైర్యదభీప్సితం గణపతిస్తత్తత్ప్రతుష్టో దదౌ
తాః సర్వా న సమర్థ ఏవ కథితుం బ్రహ్మా కుతో మానవః ॥
క్రీడాకాణ్డమథో వదే కృతయుగే శ్వేతచ్ఛవిః కాశ్యపః ।
సింహాఙ్కః స వినాయకో దశభుజో భూత్వాథ కాశీం యయౌ ।
హత్వా తత్ర నరాన్తకం తదనుజం దేవాన్తకం దానవం
త్రేతాయాం శివనన్దనో రసభుజో జాతో మయూరధ్వజః ॥
హత్వా తం కమలాసురం చ సగణం సిన్ధుం మహాదైత్యపం
పశ్చాత్ సిద్ధిమతీ సుతే కమలజస్తస్మై చ జ్ఞానం దదౌ ।
ద్వాపారే తు గజాననో యుగభుజో గౌరీసుతః సిన్దురం
సమ్మర్ద్య స్వకరేణ తం నిజముఖే చాఖుధ్వజో లిప్తవాన్ ॥
గీతాయా ఉపదేశ ఏవ హి కృతో రాజ్ఞే వరేణ్యాయ వై
తుష్టాయాథ చ ధూమ్రకేతురభిధో విప్రః సధర్మర్ధికః ।
అశ్వాఙ్కో ద్విభుజో సితో గణపతిర్మ్లేచ్ఛాన్తకః స్వర్ణదః
క్రీడాకాణ్డమిదం గణస్య హరిణా ప్రోక్తం విధాత్రే పురా ॥
ఏతచ్ఛ్లోకసుపఞ్చకం ప్రతిదినం భక్త్యా పఠేద్యః పుమాన్
నిర్వాణం పరమం వ్రజేత్ స సకలాన్ భుక్త్వా సుభోగానపి ।
॥ ఇతి శ్రీపంచశ్లోకిగణేశపురాణమ్ ॥