ভুবন-কেলিকলা-রসিকে শিবে
ঝটিতি ঝঞ্ঝণ-ঝঙ্কৃত-নূপূরে ।
ধ্বনিময়ং ভব-বীজমনশ্বরং
জগদিদং তব শব্দময়ং বপুঃ ॥ ১॥
বিবিধ-চিত্র-বিচিত্রমদ্ভুতং
সদসদাত্মকমস্তি চিদাত্মকম্ ।
ভবতি বোধময়ং ভজতাং হৃদি
শিব শিবেতি শিবেতি বচোঽনিশম্ ॥ ২॥
জননি মঞ্জুল-মঙ্গল-মন্দিরং
জগদিদং জগদম্ব তবেপ্সিতম্ ।
শিব-শিবাত্মক-তত্ত্বমিদং পরং
হ্যহমহো নু নতোঽস্মি নতোঽস্ম্যহম্ ॥ ৩॥
স্তুতিমহো কিল কিং তব কুর্মহে
সুরগুরোরপি বাক্পটুতা কুতঃ ।
ইতি বিচার্য পরে পরমেশ্বরি
হ্যহমহো নু নতোঽস্মি নতোঽস্ম্যহম্ ॥ ৪॥
চিতি চমত্কৃতিচিন্তনমস্তু মে
নিজপরং ভবভেদ-নিকৃন্তনম্ ।
প্রতিপলং শিবশক্তিময়ং শিবে
হ্যহমহো নু নতোঽস্মি নতোঽস্ম্যহম্ ॥ ৫॥
ইতি শ্রীদত্তাত্রেয়ানন্দনাথবিরচিতং প্রণতিপঞ্চকং সম্পূর্ণম্ ।