ಭುವನ-ಕೇಲಿಕಲಾ-ರಸಿಕೇ ಶಿವೇ
ಝಟಿತಿ ಝಂಝಣ-ಝಂಕೃತ-ನೂಪೂರೇ ।
ಧ್ವನಿಮಯಂ ಭವ-ಬೀಜಮನಶ್ವರಂ
ಜಗದಿದಂ ತವ ಶಬ್ದಮಯಂ ವಪುಃ ॥ 1॥
ವಿವಿಧ-ಚಿತ್ರ-ವಿಚಿತ್ರಮದ್ಭುತಂ
ಸದಸದಾತ್ಮಕಮಸ್ತಿ ಚಿದಾತ್ಮಕಮ್ ।
ಭವತಿ ಬೋಧಮಯಂ ಭಜತಾಂ ಹೃದಿ
ಶಿವ ಶಿವೇತಿ ಶಿವೇತಿ ವಚೋಽನಿಶಮ್ ॥ 2॥
ಜನನಿ ಮಂಜುಲ-ಮಂಗಲ-ಮನ್ದಿರಂ
ಜಗದಿದಂ ಜಗದಮ್ಬ ತವೇಪ್ಸಿತಮ್ ।
ಶಿವ-ಶಿವಾತ್ಮಕ-ತತ್ತ್ವಮಿದಂ ಪರಂ
ಹ್ಯಹಮಹೋ ನು ನತೋಽಸ್ಮಿ ನತೋಽಸ್ಮ್ಯಹಮ್ ॥ 3॥
ಸ್ತುತಿಮಹೋ ಕಿಲ ಕಿಂ ತವ ಕುರ್ಮಹೇ
ಸುರಗುರೋರಪಿ ವಾಕ್ಪಟುತಾ ಕುತಃ ।
ಇತಿ ವಿಚಾರ್ಯ ಪರೇ ಪರಮೇಶ್ವರಿ
ಹ್ಯಹಮಹೋ ನು ನತೋಽಸ್ಮಿ ನತೋಽಸ್ಮ್ಯಹಮ್ ॥ 4॥
ಚಿತಿ ಚಮತ್ಕೃತಿಚಿನ್ತನಮಸ್ತು ಮೇ
ನಿಜಪರಂ ಭವಭೇದ-ನಿಕೃನ್ತನಮ್ ।
ಪ್ರತಿಪಲಂ ಶಿವಶಕ್ತಿಮಯಂ ಶಿವೇ
ಹ್ಯಹಮಹೋ ನು ನತೋಽಸ್ಮಿ ನತೋಽಸ್ಮ್ಯಹಮ್ ॥ 5॥
ಇತಿ ಶ್ರೀದತ್ತಾತ್ರೇಯಾನನ್ದನಾಥವಿರಚಿತಂ ಪ್ರಣತಿಪಂಚಕಂ ಸಮ್ಪೂರ್ಣಮ್ ।