భద్రాచల రామదాసు కీర్తనలు
॥ Raksincudinuni Ramarama Lyrics ॥
పున్నాగవరాళి – ఆది (- త్రిపుట)
పల్లవి:
రక్షించుదీనుని రామరామ నీ రమణితోడు నన్ను
రక్షింపకున్నను మీతండ్రి దశరథరాజు తోడు ర ॥
చరణము(లు):
అరుదుమీరగ విభీషణుని బ్రోచితివల్లనాడు అట్లు
కరుణింపకున్నను మీతల్లి కౌసల్యాదేవి తోడు ర ॥
గిరికొన్న ప్రేమ సుగ్రీవు బ్రోచితివి అల్లనాడు అట్లు
సిరులియ్యకున్నను మీకులగురువు వసిష్ఠుని తోడు ర ॥
అలివేణి యహల్య శాపము బాపితి వల్లనాడు అట్లు
కలుషములన్నియు బాపకున్న లక్ష్మణుని తోడు ర ॥
పాపాత్ముడైన కబంధు బ్రోచితి వల్లనాడు అట్లె
నెపములెన్నక కృపజూడకున్న మీయింటితోడు ర ॥
వదలక నీమీదనే నానలు పెట్టవలసె నేడు
భద్రాచల రామదాసుని యేలకున్న నీ పాదము తోడు ర ॥