భద్రాచల రామదాసు కీర్తనలు
॥ Ramaho Sitaramaho Lyrics ॥
అహిరి – ఆది (కేదారగౌళ – ఆది)
పల్లవి:
రామహో సీతారామహో రామహో సీతారామహో రా ॥
చరణము(లు):
రామహో శరణన్న నా మొరాలించి కావవు
ప్రేమలేదు గదరా నా దుష్కర్మమేమొ తెలియదాయె రా ॥
మ్రొక్కి నిన్ను వేడగా నాదిక్కుజూడవేమి చేతు
చక్కనయ్య నీ నా యందు ఎక్కడి వైరము బుట్టె రా ॥
ఎట్టకేలకైన నిన్ను గట్టిగ నమ్మితి నేను
పెట్టుపోతలడుగలేదు పట్టిమాటాడగరాదా రా ॥
నన్ను సంరక్షించుటది ఎన్నరాని బరువదేమి
మన్ననజేసి నేడు నాకన్నుల కెదురై వసింపు రా ॥
దినదినము నీచుట్టు దీనుడై నే తిరుగగాను
కనికరమింతైన లేక కఠినుడైనావు గదరా రా ॥
సారెసారెకు నిన్ను వేడి భారకుడవనుచు నమ్మి
కోరి పిలిచితేను నన్ను తేరిచూడవేమి చేతు రా ॥
చాలగ నమ్మితి రఘుస్వామి భద్రశైలవాసా
ఏలుకొనుము రామదాసు నెప్పుడేమరకుండ రా ॥