॥ Sanvichchatakam Gujarati Lyrics ॥
॥ સંવિચ્છતકમ્ ॥
॥ અથ ત્યાગરાજવિરચિતમ્ સંવિચ્છતકમ્ ॥
યસ્યા નિત્યં ચરણકમલદ્વન્દ્વમૈશ્ચર્યબીજં
પ્રધ્યાયન્તો હૃદયકમલે પુણ્યભાજો મુનીન્દ્રાઃ ।
નિર્દ્વન્દ્વં તત્ સમરસમહો પ્રાપ્ય તિષ્ઠન્તિ તસ્મિન્
તસ્યૈ દેવ્યૈ તપનરુચયે તત્ત્વતોઽસ્તુ પ્રણામઃ ॥ ૧ ॥
યા કલ્યાણગુણપ્રસૂઃ પરશિવાનન્દામૃતસ્યન્દિની
ભૂમાનન્દમયી પરાપરમયી તેજોમયી વાઙ્ગ્મયી ।
આદ્યાન્તાર્ણતનૂઃ શિવાદિવસુધાન્તાન્તઃપ્રકાશાત્મિકા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨ ॥
યસ્યાં પ્રોતમિદં ચતુર્દશજગત્ સૂત્રે મણિસ્તોમવદ્
યસ્યાં ભાતિ જડં જડેતરમિદં સ્તમ્ભાદિવદ્ દારુણિ ।
યસ્યાં પશ્યતિ વિશ્વમજ્ઞહૃદયાઃ સ્થાણૌ પુમાંસં યથા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩ ॥
મૂલૌડ્યાણગલોપરોધનમહામુદ્રાપ્રસન્ના પરા
તેજઃપુઞ્જમયી સદા ગતિયુતા હંસી સહસ્રારકમ્ ।
અમ્ભોજં પરહંસકેલિસદનં યા પ્રાપ્ય લેભે મુદં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪ ॥
પ્રાણાપાનરવીન્દુયોગપરમાનન્દપ્રબુદ્ધા સતી
સંસુપ્તા શ્રુતિપત્રપદ્મશયને સૌષુમ્નવીથ્યાદ્યુતમ્ ।
વર્ષત્યસભાનટં સમરસાનન્દામૃતં પ્રાપ્ય યા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫ ॥
યા મિત્રાવરુણાલયાત્ સમુદિતા તેજોમયી વલ્લરી
વીણાદણ્ડતરુશ્રિતા શિવવિયદ્યાન્તી સ્વભાવાત્ સદા ।
નાનાવર્ણપદાદિપુષ્પનિચયાન્ સ્વસ્મિન્ કિરન્તીચ્છયા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬ ॥
યા ચૈકોત્તરખાદિપઞ્ચકગુણાકારાર્ણમન્ત્રાત્મિકા
યા પીતારુણશુભ્રવિગ્રહમયી સંધ્યાત્રયે રાજતે ।
યાપ્યેકાક્ષરનાદસંતતિસુખોદ્બોધૈકમૂર્તિઃ પરા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭ ॥
યાવ્યક્તા નવવારનાથકરુણાપાઙ્ગા પ્રકાશાત્મિકા
નીલેન્દીવરપદ્મહર્ષકરદૃક્તત્ત્વાર્ણમુક્તાવલિઃ ।
કામેશ્યાદિસુધાંશુષોડશકલાપૂર્ણાત્મવક્ત્રામ્બુજા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮ ॥
યા સીમા નવખણ્ડચક્રવસુધાલંકારમેરોઃ પરા
નાનાદેશિકયોગિનીમણિલસચ્છુભ્રાદિવર્ણાવનેઃ ।
કામેશાઙ્કનિરભ્રનિર્મલમહાકાશસ્થવિદ્યુલ્લતા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯ ॥
યસ્યાઃ પ્રીતિરહર્નિશં કુલગિરિસ્રોતઃસુધાયાં પરા
નિષ્કામપ્રણતાન્તરઙ્ગકુસુમે હ્રીંકારઘણ્ટાધ્વનૌ ।
ગન્ધેઽહં શિવ એવ નાન્ય ઇતિ યો દીપે વિમર્શાત્મકે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૦ ॥
યા ચિત્રં ત્રિપુરા પુરાન્તકસમાશ્લિષ્ટા પરા જ્યોતિષામ્
અદ્વૈતાપિ શિવાર્ધર્મૂર્તિરમલા પાશાપહા પાશિની ।
પદ્મારાધ્યપદારવિન્દયુગલા ભિક્ષાટનેશપ્રિયા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૧ ॥
યા દૂરા લલિતાપિ દુષ્કૃતજુષાં યા કોમલાઙ્ગ્યદ્રિજા
યા નીલામ્બુદમેચકાપિ ભુવનં વિદ્યોતયત્યદ્ભુતમ્ ।
યા કલ્યાણગુણપ્રવાહસુમહાવારાંનિધિર્નિર્ગુણા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૨ ॥
નિષ્ક્રોધા નતલોકમૃત્યુમથને યા બદ્ધકચ્છા સદા
નિર્વૈરા નિજપૂજનાદિકૃતિનાં દૈન્યે દ્વિષન્ત્યદ્ભુતમ્ ।
ભક્તાનાં ભયમોચિની ભવરતા શ્રીકામરાજાત્મિકા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૩ ॥
વિદ્યારણ્યપુલિન્દિકા શ્રુતિગિરા તત્ત્વોપદેષ્ટ્રી સતાં
વારાહી નકુલી વિલાસકુતુકા યાપ્યુત્તમબ્રાહ્મણી ।
યા ચિત્રં સુખશાન્ત્યતીતવસુધા શ્રીચણ્ડિકા શૂલિની
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૪ ॥
યા શાલા નિગમાગમસ્મૃતિકલાલીલાતતેસ્ત્ર્યક્ષરી
યા ફાલાક્ષમહાસતી સ્મરકલાહેલા પરાપ્યદ્ભુતમ્ ।
યા કાલાનલકાન્તિમત્યપિ સદા નીલાલકા શીતલા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૫ ॥
કલ્યાણાચલકાર્મુકસ્ય મહિષી પુણ્ડ્રેક્ષુચાપાદ્ભુતં
લક્ષ્મીવલ્લભસાયકસ્ય રમણી પુષ્પેષુહસ્તામ્બુજા ।
યા રામા પરમેશ્વરસ્ય લલિતા લોકત્રયેઽત્યદ્ભુતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૬ ॥
યા વાચામધિદેવતાપ્યવિષયા વાચાં શ્રુતેર્વર્ણિતું
શ્રોત્રાદીન્દ્રિયદેવતાપિ ન જડૈઃ શ્રોત્રાદિભિર્જ્ઞાયતે ।
અન્તઃસ્થામપિ યાં પ્રચોદકતયા નો જાનતે જન્તવઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૭ ॥
યા વીણા પરમેશ્વરાઙ્કનિલયા હ્રીંકારમન્ત્રી સદા
શ્યામા કાલસુમૂર્ચ્છનાદિકલનાહીનાપિ રાગિણ્યહો ।
નાથેનાહતનાદવિભ્રમવતી સ્થાણું શિવં ચાકરોત્
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૮ ॥
યા મોહાન્ધતમોઽપનોદનવિધૌ બોધાત્મિકા કૌમુદી
સંસારાર્ણવતારણે દૃઢતરા નૌકેન્દ્રચાપપ્રભા ।
દારિદ્ર્યાદ્રિવિદારણે કનકરુગ્ દમ્ભોલિરિચ્છાત્મિકા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૧૯ ॥
યા તાપત્રયજાડ્યશોકશમને કાચિન્નૃણાં સ્વર્ધુની
યા શાન્ત્યાદિગુણપ્રવાલમનિસંવૃદ્ધૌ સુધામ્બોનિધિઃ ।
પ્રત્યગ્દૃષ્ટ્યસિતાબ્જપોષણવિધૌ જાડ્યાપહા દીર્ઘિકા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૦ ॥
શોકારણ્યકુઠારિકા શુભફલોદ્યાનસ્ય યા વાપિકા
પાપક્ષ્વેલસુપર્ણકલ્પઘુટિકા પ્રાજ્ઞાજ્ઞયોરમ્બિકા ।
આશોચ્ચાટનમૂલિકા વિપણિકા વાગર્થવૃદ્ધેઃ કવેઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૧ ॥
યા વાઞ્છાપરિપૂરણે સુરલતા મોક્ષેન્દિરા દેવતા
સ્રષ્ટ્રાદેઃ કુલદેવતા સુચરિતા વિદ્યાસુ સર્વોન્નતા ।
નિત્યાનન્દરતા સુકર્મમુદિતા લોકત્રયારાધિતા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૨ ॥
સારાસારપયોવિવેચનવિધૌ હંસી પરં તુ ત્વિષા
શ્યામા મોહતમોપનોદનવિધૌ હંસઃ સદા ભાસકઃ ।
પ્રજ્ઞાસૌધવિહારિનિસ્તુલમહાજ્યોત્સ્ના દિવાપિ ધ્રુવા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૩ ॥
યા ચિન્તામણિરેવ દોષશમને દાને પરં ત્વદ્રિજા
વાસન્તી પિકસુન્દરી શ્રુતિસુખાલાપે સ્વયં પઞ્ચમી ।
યાને યૌવનસિન્ધુતીરકરિણી પદ્માટવીરક્ષિણી
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૪ ॥
યા શંભોર્નયનોત્પલેન્દુવદના કંદર્પદૂતીક્ષણા
ચેતશ્ચાતકનીલનીરદકચાજીવાતુસીમન્તિની ।
શૃઙ્ગારાદ્વયશાન્તિપાઠસુકૃતશ્રેયઃફલાગ્રયસ્તની
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૫ ॥
યા ત્ર્યક્ષસ્ય મનોરથઃ કિમુ તપઃપાકઃ સુખં નૈજકં
દક્ષસ્યેવ તપઃફલં કુલધનં દૈવં હિમાદ્રેરપિ ।
ભાગ્યં ભક્તજનસ્ય દેશિકદૃશોઃ શ્લાધ્યં કવીનાં ગિરાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૬ ॥
સેતુર્દુઃખમહોદધેર્મણિમયચ્છાયા વિભોસ્તત્તરોઃ
પાન્થાનાં પરમાર્થિનાં પ્રતિપદં કારુણ્યપાથઃપ્રપા ।
સત્યાનન્દચિદન્નદાનવિલસચ્છાલા ચ કલ્યાણધીઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૭ ॥
યા લોકત્રિતયૈકરત્નમજડં ભાન્વિન્દુભાશીતલં
નિર્દોષં ગુણવર્જિતં ચ નિખિલૈશ્ચર્યપ્રદં દેહિનામ્ ।
ચિત્રં ભિક્ષુકસાર્વભૌમનિલયં લોકત્રયે ભાસતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૮ ॥
યાપર્ણાપ્યનપાયકલ્પલતિકા સ્થાણુઃ પતિઃ કલ્પકો
યસ્યા ભક્તફલપ્રપૂરણવિધૌ પુત્રો વિશાખોઽદ્ભુતમ્ ।
ઇત્થં નિત્યકુટુમ્બિની ત્રિજગતાં રક્ષાકરી રાજતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૨૯ ॥
યા પુણ્યાશ્રમ એવ શાંકરતપઃસિદ્ધ્યૈ મહાયોગિનાં
નિર્વૈરો ગજપઞ્ચવક્ત્રગતિમધ્યઃ શાન્તિરઙ્ગસ્થલમ્ ।
નિર્દ્વન્દ્વસ્તનચક્રવાકલસિતઃ કોકારિચૂડામણિઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૦ ॥
યા કેદારમમૂલ્યમાનમભયં નિષ્પઙ્કમાશાસ્પદં
શ્રીકણ્ઠેતરભોગબન્ધરહિતં કલ્પે કદાપ્યદ્ભુતમ્ ।
પ્રજ્ઞાશાલિન એવ દિત્સતિ બત જ્ઞાનાઙ્કુરં કસ્યચિત્
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૧ ॥
યા ચિત્રં કરિણી હિમાચલભવા તામ્રારવિન્દેક્ષણા
કાન્ત્યા ભર્ત્સયતી વરં મરતકં પાશાઙ્કુશોક્ષ્વન્વિતા ।
પઞ્ચાસ્યપ્રભુમઞ્ચકોપરિ વસત્યાનન્દપુર્યાં મુદા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૨ ॥
એણાઙ્કાર્ભકમાત્મકુન્તલતમોરાત્ર્યામપિ દ્યોતય-
ત્યાશ્ચર્યં યમિનાં કટાક્ષયમુનાકલ્લોલમાલાં ચ યા ।
નિત્યં વક્ત્રશશાઙ્કમન્દહસિતજ્યોત્સ્નાં કૃપાયાં ગુરોઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૩ ॥
યા દૃષ્ટિઃ શ્રુતિમૂલશીલનપરા નીલાઞ્જનાદ્રિશ્રિયં
સ્વાત્મસ્મેરપયોદધૌ સહભવં શ્રીવલ્લભં તન્વતી ।
વાત્સલ્યાન્નતલોકમોહિતિમિરં ચિત્રં ધુનીતે ચ યા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૪ ॥
યા કારુણ્યકટાક્ષનીલવનજદ્વેષ્યાત્મજામ્ભઃસ્વહો
મુગ્ધસ્નિગ્ધમૃદુસ્મિતામરધુનીવીચીવિલાસાશ્રિતે ।
સુસ્નાતં નિજપાદપઙ્કજરજઃસિક્તં બત વ્યાતનોત્
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૫ ॥
શ્રીકણ્ઠાર્ધશરીરિણી ધ્રુવમપિ શ્રીકાન્તસોદર્યહો
નારાયણ્યપિ સર્વદા કુલનગોત્તંસાત્મજાત્યદ્ભુતમ્ ।
પ્રાલેયાચલકન્યકાપિ સકલાહંરૂપિણી યાદ્ભુતમ્
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૬ ॥
આનઙ્ગસ્મૃતિસંપ્રદાયમખિલં સ્વાપાઙ્ગશિષ્યેણ યા
કામદ્રોહિણમેવ શિક્ષયતિ હા લોકોત્તરાત્યદ્ભુતમ્ ।
તેનૈવાત્મપદારવિન્દરસપાનોથં ત્રિલોકેઽન્યથા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૭ ॥
બન્ધૂકસ્તબકં રુચા પરિહસત્યમ્ભોજમપ્યદ્ભુતં
કર્ણાસ્યેક્ષણપાણિના વનચરં મધ્યેન વક્ષોરુહા ।
ગત્યા સ્વાદુગિરા સુધાકરકલોત્તંસૈશ્ચ નીલાલકૈઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૮ ॥
નિઃસ્પન્દં નિગમાગમાદ્યવિષયં શ્રોત્રાદિહીનં પરં
નિઃશબ્દં તદહો પુમાંસમકરોત્ કામેશ ઇત્યાખ્યયા ।
યા ચિત્રં નિજદાસમચ્છહૃદયં શક્ત્યા તનોત્યન્યથા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૩૯ ॥
વાગર્થેન યથા યુતાપિ પરમાનન્દાત્મના શૂલિના
નિત્યં યા વિહરત્યહો જનમનોગેહેષુ મુગ્ધેષુ હા ।
નિર્ભીતા કુલટેવ કર્મ કુરુતે સર્વેન્દ્રિયાણાં સદા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૦ ॥
નાસામૌક્તિકદૈત્યદેશિકમહો મન્દસ્મિતૈઃ પુષ્ણતી
તાટઙ્કદ્યુતિભિર્દિનેશશશિનૌ દેવૌ તિરસ્કુર્વતી ।
મારારેર્ગુહમેધિની મનસિજં રક્ષત્યપાઙ્ગોટજે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૧ ॥
બન્ધચ્છેદવિચક્ષણા પશુજનસ્તોમાતિદૂરાદ્ભુતં
યા રક્ષત્યગરાજશેખરસુતાપ્યામ્નાયસૂત્રૈર્દૃઢમ્ ।
બદ્ધ્વા દેવપશૂન્ સદા પશુપતેઃ સંસર્ગદોષેણ હા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૨ ॥
ધારા દેશિકદિવ્યદૃષ્ટિમધુનો મારારિનેત્રામૃતં
ધારા દુર્મતદારુદારિપરશોસ્તારાવલિર્યોગિનામ્ ।
તીરં મન્ત્રમહોદધેઃ કવિગિરાં પૂરઃ સુખામ્ભોનિધેઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૩ ॥
કામાક્ષીતિ વદન્તિ કેચન બુધાઃ કામેશ્વરીત્યદ્ભુતં
રામાસ્તોમશિરોમણીતિ મદનારાતેર્દૃશોઃ પારણા ।
સીમા ભૂમસુખસ્ય ચિન્મયકલા શૃઙ્ગારમૂર્તિશ્ચ યા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૪ ॥
મુગ્ધસ્નિગ્ધકટાક્ષમિત્રતનયા યસ્યાઃ સદાનન્દિની
મન્દસ્મેરપયોનિધિં નિજપતિં સંગમ્ય વાણીશ્રિયઃ ।
સંસૂય પ્રદદાત્યયાચિતતત્યા ભક્તેભ્ય એવાદરાત્
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૫ ॥
ઔન્નત્યં મુહુરેતિ ચિત્રમમરશ્રેણીષુ યદ્યોગતો
દક્ષદ્વેષ્યપિ ભિક્ષુકોઽપિ વિષમાક્ષોઽપ્યુક્ષયાનોઽપિ વા ।
અજ્ઞાતાન્વયસંભવોઽપિ નિગમાતીતોઽપિ લુબ્ધસ્તથા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૬ ॥
યા લોકૈકસુમઙ્ગલા સ્મરકલા નીલામ્બુદશ્યામલા
ડોલા શંકરલોચનદ્વયશિશોર્માલાષ્ટસિદ્ધિશ્રિયામ્ ।
કાલાતીતકલા કલાનિધિકલોત્તંસાતુલા નિર્મલા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૭ ॥
અસ્તં યા નલિનેક્ષણેન નયતિ ક્ષોભાતપં યોગિનાં
સ્વાનન્દામૃતચન્દ્રિકાં કરુણયા નિત્યં તનોત્યદ્ભુતમ્ ।
વર્ષત્યાનનપઙ્કજે સુકવિતાપીયૂષધારાઃ કવેઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૮ ॥
યા વિદ્યુત્કમલેષુ તિષ્ઠતિ પરા તાપિઞ્છગુચ્છચ્છવિ-
શ્ચિતં પ્રાણભૃતાં દૃશોઃ સુખકરી ભીમપ્રકાશિન્યલમ્ ।
જ્યોતિઃ શીતલભૂભૃતસ્ત્રિભુવનક્ષેમપ્રવાહપ્રદા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૪૯ ॥
યા કાચિદ્ધરિણી મરાલગમના ચિદ્વ્યોમસંચારિણી
હ્રીંકારસ્વનસંતતેઃ પરવશા હૃદ્યાનવદ્યા દૃશામ્ ।
અસ્ત્રૈવ્યાર્ધવરં પિનાકિનમહો સંમોહયન્ત્યન્વહં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૦ ॥
ધેનુર્યા પરમાત્મનઃ પશુપતેઃ સર્વજ્ઞતાદોહિની
ચિત્રં ષણ્મુખવક્રતુણ્ડજનની પ્રાલેયશૈલાત્મજા ।
નિર્નિદ્રામલપુણ્ડરીકનયના શુભ્રાંશુચૂડામણિઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૧ ॥
યાં દણ્ડં વરવિદ્રુમાત્મકમતિશ્લક્ષણં સુસૂક્ષ્મં ધ્રુવં
ગાઢં નિર્વિષયાઃ પુરાણપુરુષા આલમ્બ્ય ગચ્છન્ત્યહો ।
તીર્ત્વા દુસ્તરજન્મપઙ્કનિબિડં માયામહીમણ્ડલં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૨ ॥
યા કુમ્ભોદ્ભવ એવ મન્મથરિપોર્ધૈર્યામ્બુધેઃ પ્રાશને
પ્રારબ્ધાત્મકવિન્ધ્યભૂધરગતિધ્વંસે તથા ધીમતામ્ ।
આચાર્યઃ શિવબોધને નિજપતેરાનઙ્ગદીક્ષાક્રમે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૩ ॥
યા ક્ષીરાબ્ધિસહોદરસ્મિતરુચા કમ્બું તિરસ્કુર્વતી
કામારેર્હૃદયં વિશુદ્ધમપિ સંમુગ્ધં કરોત્યન્વહમ્ ।
આશ્ચર્યાં નમતાં ધુનોતિ તિમિરં સ્વાજ્ઞાનરૂપં પરં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૪ ॥
યસ્યા હાસમરાલિકામૃદુગતિઃ શ્રીકામજેત્રે મુદા
વિદ્યાં બોધયિતું પરાં વિતનુતેઽપાઙ્ગાર્કજાતોર્મિષુ ।
સ્થિત્વા શ્રૌતપથસ્થકુણ્ડલયુગેનાલોચનાસંતતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૫ ॥
યસ્યા વીક્ષણશક્રમેચકમણીસામ્રાજ્યસિંહાસનં
શ્રિત્વા પુષ્પશરપ્રભુર્વિજયતે ત્ર્યક્ષસ્ય પાર્શ્વેઽદ્ભુતમ્ ।
પીયૂષાર્ણવફેનજેતૃસહિતશ્રીચામરાસેવિતઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૬ ॥
નીહારાદ્રિયશોઽભિવર્ધનપરે કુઞ્જે કટાક્ષાત્મકે
યસ્યાઃ ક્રીડતિ નીલકણ્ઠવિમલપ્રજ્ઞામયૂરાર્ભકઃ ।
પશ્યન્ નિત્યસુગન્ધિકુન્તલમયીં કાદમ્બિનીં સંતતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૭ ॥
યા હાસાર્જુનભૂભૃતા સુખયતિ દ્રાગ્ ભીમચિત્તં પરં
ધર્મં પાલયતિ પ્રવેશયતિ વૈવર્ણેઽનુકૂલાં ગતિમ્ ।
માલિન્યં નયતેતરાં ધ્રુવમહો તદ્ધાર્તરાષ્ટ્રં કુલં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૮ ॥
યા મુક્તાફલમદ્ભુતં ગિરિભવં શ્યામં પ્રકાશાસ્પદં
સત્સૂત્રં સકલાર્થદં શશિકલાચૂડં ત્રિણેત્રં ચરમ્ ।
નિર્દોષંભવકૌતુકપ્રદમનાદ્યન્તં પરં નિસ્તુલં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૫૯ ॥
યા વાપી ભુવનપ્રદા રસમયી તૃષ્ણાર્દિતાનાં પરં
નિષ્પાશાભિગતાભિમાનમમતાપાશાભિલાષાન્વિતા ।
સત્પાત્રે ફલદાયિની સ્મૃતિમતાં તાપત્રયધ્વંસિની
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૦ ॥
શૃઙ્ગારામ્બુધવીચિવિભ્રમવતી શૃઙ્ગારબીજાનિલ-
વ્યાલોલા કુમુદપ્રિયધ્વજપટી પ્રત્યક્ચરી પાર્વતી ।
દ્રોણી યા વિષમેક્ષણાનુસરણી ચિત્રં સદા રાજતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૧ ॥
યસ્યા નીરદભાઃ કટાક્ષયદુપઃ કર્ણાનુવૃત્તોઽદ્ભુતં
દીવ્યત્કુણ્ડલહાસચક્રજલજશ્લિષ્ટઃ કૃપાનીરદઃ ।
સ્થાનોર્ગોકુલમન્વહં નયતિ તદ્વક્ષોજશૈલાન્તરં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૨ ॥
યા ચિત્રં મહતીં મહાગુણવતીમપ્યશ્રિતં સંતતં
કાઠિન્યં ન વિમુઞ્ચતિ સ્તનયુગં માન્દ્યં ગતિઃ કુન્તલાઃ ।
કૌટિલ્યં નયનામ્બુજં ચપલતાં બિમ્બાધરો રાગિતાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૩ ॥
યા મન્દસ્મિતકૌમુદીં વિતનુતે નિત્યોદિતે સર્વત-
સ્તાટઙ્કાત્મનિ ભાસ્કરે સ્વયમહો કાલામ્બુદશ્યામલા ।
બિમ્બોષ્ઠદ્યુતિસંધ્યયા દ્વિજગણે શ્રીશાંભવે રાગિતાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૪ ॥
જારે મારકિરાતજીવનકરે ચિત્રં કટાક્ષાત્મકે
યસ્યાઃ કુણ્ડલરશ્મિવેણુકલિતે લગ્ના સુખં રાજતે ।
કામારેર્મતિશારિકા શ્રુતિશિરોદ્યાનાન્તરોલ્લાસિની
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૫ ॥
નિત્યં સોમકલાધરોઽધ્વરપતિર્વ્યાઘ્રાજિનાલંકૃત-
સ્તાટઙ્કદ્યુતિવહ્નિવીક્ષણશિખાધૂમાતિલોલેક્ષણઃ ।
યસ્યા હાસપયોનિધાવવભૃથવ્યાજેન મજ્જત્યહો
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૬ ॥
યસ્યાઃ કાપિ દયાત્મિકા પ્રતિદિનં શૈલૂષબાલાદ્ભુતં
નીરાગાલયકાલવર્જિતવતી નિર્મૂર્ચ્છના કામના ।
નિર્લજ્જૈવ દિગમ્બરા નટતિ હા સંમોહશાન્ત્યૈ નૃણાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૭ ॥
માઙ્ગલ્યં હરિનીલકાન્તિસુગુણં શ્લાધ્યં સુરસ્ત્રીજનૈ-
ર્યસ્યા મઞ્જુલવીક્ષણં સ્મરહારાજસ્ય દેવ્યા રતેઃ ।
ઓષ્ઠશીર્વરકુઙ્કુમં સ્મિતમહો સ્રઙ્માધવી શાશ્વતી
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૮ ॥
ચિત્રં કાપિ સુધા શિવેતરસુરાલભ્યા હિમાદ્ર્યુદ્ભવા
દ્રુહ્યન્તી કુરુવિન્દમાત્મરુચિભિર્દોષાકરોત્તંસિની ।
આસ્તે યા મદનજ્વરં શશિભૃતઃ સંધુક્ષયન્ત્યન્વહં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૬૯ ॥
અર્ધં રાજ્યમનન્યસાધ્યમખિલૈશ્ચર્યપ્રદં શૂલિનઃ
શુદ્ધં મૂર્તિમયં યયાતિવિનયૈઃ પ્રાપ્તં તદન્યત્ પુનઃ ।
વ્યાપ્તું વાઞ્છતિ ગારુડોપલવપુઃ કાન્ત્યા મહત્યા પરં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૦ ॥
અર્ધં સોમકલાધરી શશિકલાચૂડસ્ય યા ત્ર્યમ્બક-
સ્ત્ર્યક્ષાયા અથવા સનાતનતનૂ જાયાપતી શાશ્વતૌ ।
એકં વેત્યવધારિતું મુનિવરા અદ્યાપ્યલં નાદ્ભુતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૧ ॥
દારિદ્ર્યાસ્તધરાધરોઽપિ પરમં ભદ્રોદયોઽત્યદ્ભુતં
પાપારણ્યદવાનલોઽપિ નમતાં કારુણ્યધારાધરઃ ।
યા દુહ્ખામ્બુદમાલિકાપવનરાણ્નૈશ્ચલ્યરૂપાસ્તિ વૈ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૨ ॥
શ્રૌતં માર્ગમતીત્ય ગચ્છતિ મુદા કાપાલિકં દૃક્ પરં
મધ્યઃ શૂન્યમતં ગતોઽતિવિમલે દ્વન્દ્વે કુચૌ દ્વૈતિનૌ ।
સૌરે કુણ્ડલયુગ્મમાત્મરુચિભિર્યસ્યાઃ કૃપા શાંભવે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૩ ॥
વલ્લી કાપિ શિવાઙ્કણે લસતિ યા મન્દસ્મિતૈઃ પુષ્પિતા
તામ્બૂલેન સુગન્ધિતા સુફલિતા વક્ષોરુહાભ્યાં પરમ્ ।
કાન્ત્યા પલ્લવિતા કચૈર્ભ્રમરિતા દૃગ્ભ્યાં પરં પત્રિતા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૪ ॥
યસ્યા વીક્ષણદેશિકઃ શ્રુતિગતિસ્તેજોમયઃ સર્વવિત્
સંતુષ્ટો જિતકામશત્રુરણિમાદ્યષ્ટાભિરારાધિતા ।
સચ્ચિત્સૌખ્યરતઃ શિવં નટમપિ ક્ષિપ્રં કરોત્યદ્ભુતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૫ ॥
યસ્યાશ્ચારુકપોલદર્પણતલે દૃષ્ટ્વા કપર્દી રુષા
ભીતો જહ્નુસુતાં મૃદુસ્મિતમયીં સંકેતમિત્થં વ્યધાત્ ।
મુગ્ધે ગચ્છ નિજસ્થલં દ્રુતતર્ં જાગર્તિ દૃષ્ટિર્યતઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૬ ॥
શૃઙ્ગારૈકરસં વસન્તસુહૃદં કંદર્પદર્પપ્રદં
ચિત્રં કોકનદપ્રબોધનકરં ચન્દ્રોદયં શ્રીકરમ્ ।
યસ્યા હાસમયં ચિરમપ્યાસ્તે પુરાણઃ શિવઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૭ ॥
યા કાચિત્ પિકકામિની શ્રુતિગતિઃ સપ્તસ્વરાલાપિની
નિત્યં માધવબોધિની ત્રિભુવને નિષ્પક્ષપાતા સુખમ્ ।
ચિત્રં ચૂતનવપ્રસૂનવિશિખદ્વેષ્યાશ્રયે રાજતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૮ ॥
યસ્યા વીક્ષણમાન્ત્રિકઃ સુકૃતિનામગ્રેસરઃ શંકરી-
મન્ત્રામ્ભોનિધિપારગઃ સ્મિતવિભૂત્યોચ્ચાલયન્ સર્વદા ।
દ્વેષં શંકરકર્તૃકં સુમશરે વિભ્રાજતે શાશ્વતઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૭૯ ॥
યસ્યા દૃગ્રમણીમણિર્વિવદતે કામારિસલ્લાપને
સ્વાધીનપ્રિયયા મૃદુસ્મિતશરીરિણ્યા પરં ગઙ્ગયા ।
આદ્યાહંશ્રુતિમૂલગાધરભવા ત્વં સ્વીકૃતેતિ ધ્રુવં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૦ ॥
યા કાચિદ્ ભુજગી સદા સરલગા પીયૂષદાયિન્યહો
પદ્મારણ્યવિહારિણી શ્રુતિમતી તેજસ્તનૂર્નિર્ભયા ।
જન્માબ્ધિપ્લવવર્ધિની વશયતિ શ્રીનીલકણ્ઠં દૃશા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૧ ॥
આસ્યામ્ભોજભવા પતિં નિજમનાદ્યન્તં કટાક્ષાત્મકં
પૃચ્છન્તીતિ પયોનિધેઃ સ્મિતમયાન્મજ્જન્મ કિં વામ્બુજાત્ ।
યસ્યા નિઃસ્મરસંપદં સુધનિકં કર્તું શિવં કાઙ્ક્ષતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૨ ॥
યસ્યાઃ પાણિપરિગ્રહે મૃદુતનોર્હેમાદ્રિધન્વા શિવઃ
પાદાન્યાસવિધૌ દૃષદ્યપિ સુરસ્ત્રીણાં પુરો લજ્જિતઃ ।
મન્દાક્ષં ગતવાનનઙ્ગકલિકાં યાં વીક્ષિતું નાદ્ભુતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૩ ॥
યસ્યાઃ પાદકેશશયશ્રિયમહો શ્રુત્વાનિલાદન્વહં
ગાઙ્ગાન્યમ્બુરુહાણિ હન્ત કતિચિત્ પ્રાપ્તું પરાં તાં દ્રુતમ્ ।
પીત્વા ક્ષીરલવં તપન્તિ તપનં પશ્યન્તિ મજ્જન્ત્યલં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૪ ॥
નિત્યં સંધિમપેક્ષતે સુચરિતા દૂતી કટાક્ષાત્મિકા
રાજસ્યાધરરામયાપિ ન તયા ગર્ભે વહન્ત્યામૃતમ્ ।
કામારે રતિસાત્ત્વિકદ્વિજમણેર્મોદાય સુશ્રેયસે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૫ ॥
પક્ષે શૈવમનોમહીભૃતિ મનોજાગ્નિં ધ્રુવં સાધયન્
યસ્યા મઞ્જુકટાક્ષધૂમશિશુના શ્રૌતેન સદ્ધેતુના ।
ઓષ્ઠદ્વન્દ્વસભાન્તરે સ્મિતમયો નૈયાયિકો ભાસતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૬ ॥
યા પદ્મં હિમશૈલજં મરતકં ભાસા ભૃશં ભર્ત્સયત્
કંદર્પસ્ય જ્યેન્દિરાજનિગૃહં નિર્હેતુકોત્ફુલ્લનમ્ ।
સ્થાણોર્લોચનભૃઙ્ગસંભ્રમકરં શીતાંશુલેખાઙ્કિતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૭ ॥
યસ્યા મન્દગતિઃ પરં શુભગતિઃ કામસ્ય કામદ્રુહઃ
કામોદ્રેકગતિશ્ચિરં ભજનકૃદ્ધંસાઙ્ગનાસંતતેઃ ।
કામં દત્તગતિઃ સદા વિજયતે હંસાત્મિકા યોગિનાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૮ ॥
નિઃસ્નેહાપિ શિવાતિરાગકલિતા યા દીપિકા કાપ્યહો
ઝઞ્ઝામારુતભીતિદાપિ ચપલા નિષ્કલ્મષા સાઞ્જના ।
ત્રૈલોક્યેઽપિ વિરાજતે શ્રિતવતી શ્રીશંકરાઙ્કં ધ્રુવં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૮૯ ॥
નિર્યત્નૈવ મહાસતી સુચરિતા યા શૈલરાજાત્મજા
નાથં લોકવિલક્ષણં પ્રહૃતવત્યદ્યાપિ સેવાજને ।
ગાણ્ડીવેન વરાશ્મભિશ્ચ મુસલેનોપાનહા વર્તતે
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૦ ॥
યસ્યાઃ પાદકિસાલયપ્રભુવરં યાચન્ત્યજસ્રં પરં
કસ્તૂર્યઃ સુરયોષિતાં તિલકિતાઃ સદ્વાસનાં રાગિતામ્ ।
બિમ્બોષ્ઠં મૃદુતાં શ્રિયં ચ યુગપદ્ધસ્તાઃ પ્રવાલપ્રિયાઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૧ ॥
યસ્યાઃ પાદસહસ્રરશ્મિચરલં કામારિચિત્તાત્મકં
હૈમં ભ્રામયતિ પ્રણાશયતિ સંતાપં સતામઙ્કુરમ્ ।
પ્રજ્ઞાનાત્મકમદ્ભુતં શિશિરયત્યક્ષીણ્યલં પશ્યતાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૨ ॥
ચિત્રં યા કુરુતે મનોઽપિ યમિનાં બદ્ધં મહાયત્નતો
મુક્તં શોણપદારવિન્દયુગલે નીરાગિણં રાગિણમ્ ।
મઞ્જીરસ્વનમન્મથસ્મિતરવૈઃ સંમોહનં શૂલિનઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૩ ॥
પાદામ્ભોજરજો રજાંસિ હરતિ પ્રૌઢાનિ યસ્યા નૃણાં
સત્ત્વં વર્ધયતિ પ્રદર્શયતિ સન્માર્ગં સુરાણામપિ ।
જન્મવ્યાધિમૃતિપ્રવાહમતુલં સંરોધયત્યદ્ભુતં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૪ ॥
નાહં વિશ્વમિદં ચરાચરમયં માયાવિલાસાસ્પદં
દૃશ્યત્વાદિતિ શોધયન્તિ સુધિયઃ સર્વં યયા પ્રજ્ઞયા ।
આત્મૈવાયમિદં વદન્તિ પુનસ્તૂષ્ણીંભવન્તઃ સ્થિતાઃ
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૫ ॥
રાહું નિન્દતિ ચન્દ્રચૂડચિકુરૈસ્તાટઙ્કકાન્ત્યા રવિં
વક્ત્રાબ્જેન વિધું ગુરું નતગિરા સૌગ્યં દૃશા ભદ્રયા ।
ગત્યા મન્દમહો કુજં તનુરુચા નાસાગ્રમણ્યા કવિં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૬ ॥
નિઃશ્રેણી કૃતિનાં પરામૃતફલપ્રાપ્તૌ પ્રવાલદ્યુતિ-
ર્યા નીલાઞ્જનમક્ષરાત્મકનિધેઃ સંદર્શને શ્રીમતામ્ ।
નિત્યાનન્દરસા પરોક્ષકરણે શ્રીદેશિકશ્રીકૃપા
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૭ ॥
યા કુણ્ઠીકુરુતે નિજસ્તુતિવિધૌ ગર્વાત્ પ્રવૃત્તાં ગિરં
વેદાનામપિ ગીષ્પતેરપિ મહાભાષ્યાર્થવિજ્ઞાનિનઃ ।
દત્તે વાગ્ભવવૈભવામૃતઝરીં મૂકાજ્ઞયોર્વાગ્મિતાં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૮ ॥
આદ્યામમ્બુરુહેક્ષણામનુપમામાપીનતુઙ્ગસ્તની-
માર્યામાગમસારમૂર્તિમરુણામાનન્દચન્દ્રાનનામ્ ।
સાધ્વીં સત્કવિવાગ્ઝરીં સમરસાનન્દામૃતસ્યન્દિનીં
સા સંવિત્ સુકૃતોદયા સ્ફુરતુ નશ્ચિત્તે સદા સર્વગા ॥ ૯૯ ॥
ગુરુચરણસરોજં ગુપ્તગઙ્ગાતરઙ્ગ-
સ્તિમિતમમિતશુક્લજ્યોતિષાં જ્યોતિરેકમ્ ।
નિરુપમમકરન્દસ્પન્દમાનન્દકન્દં
નિધનજનનહીનો નિર્મલોઽહં નિષેવે ॥ ૧૦૦ ॥
શાર્દૂલવૃત્તમપિ સાધુ ભવત્યહો તત્
સારસ્વતં સમરસામૃતલોચનાનામ્ ।
સદ્યો જયત્યઘરિપું શ્રુતિમાર્ગયોગાત્
ત્યાગેશસાન્દ્રકરુણાદ્ભુતમેવ ભદ્રમ્ ॥ ૧૦૧ ॥
ઇત્યાનન્દનાથપાદપપદ્મોપજીવિના કાશ્યપગોત્રોત્પન્નેનાન્ધ્રેણ
ત્યાગરાજનામ્ના વિરચિતં સંવિચ્છતકં સંપૂર્ણમ્