॥ Sanvichchatakam Kannada Lyrics ॥
॥ ಸಂವಿಚ್ಛತಕಮ್ ॥
॥ ಅಥ ತ್ಯಾಗರಾಜವಿರಚಿತಮ್ ಸಂವಿಚ್ಛತಕಮ್ ॥
ಯಸ್ಯಾ ನಿತ್ಯಂ ಚರಣಕಮಲದ್ವನ್ದ್ವಮೈಶ್ಚರ್ಯಬೀಜಂ
ಪ್ರಧ್ಯಾಯನ್ತೋ ಹೃದಯಕಮಲೇ ಪುಣ್ಯಭಾಜೋ ಮುನೀನ್ದ್ರಾಃ ।
ನಿರ್ದ್ವನ್ದ್ವಂ ತತ್ ಸಮರಸಮಹೋ ಪ್ರಾಪ್ಯ ತಿಷ್ಠನ್ತಿ ತಸ್ಮಿನ್
ತಸ್ಯೈ ದೇವ್ಯೈ ತಪನರುಚಯೇ ತತ್ತ್ವತೋಽಸ್ತು ಪ್ರಣಾಮಃ ॥ 1 ॥
ಯಾ ಕಲ್ಯಾಣಗುಣಪ್ರಸೂಃ ಪರಶಿವಾನನ್ದಾಮೃತಸ್ಯನ್ದಿನೀ
ಭೂಮಾನನ್ದಮಯೀ ಪರಾಪರಮಯೀ ತೇಜೋಮಯೀ ವಾಂಗ್ಮಯೀ ।
ಆದ್ಯಾನ್ತಾರ್ಣತನೂಃ ಶಿವಾದಿವಸುಧಾನ್ತಾನ್ತಃಪ್ರಕಾಶಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 2 ॥
ಯಸ್ಯಾಂ ಪ್ರೋತಮಿದಂ ಚತುರ್ದಶಜಗತ್ ಸೂತ್ರೇ ಮಣಿಸ್ತೋಮವದ್
ಯಸ್ಯಾಂ ಭಾತಿ ಜಡಂ ಜಡೇತರಮಿದಂ ಸ್ತಮ್ಭಾದಿವದ್ ದಾರುಣಿ ।
ಯಸ್ಯಾಂ ಪಶ್ಯತಿ ವಿಶ್ವಮಜ್ಞಹೃದಯಾಃ ಸ್ಥಾಣೌ ಪುಮಾಂಸಂ ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 3 ॥
ಮೂಲೌಡ್ಯಾಣಗಲೋಪರೋಧನಮಹಾಮುದ್ರಾಪ್ರಸನ್ನಾ ಪರಾ
ತೇಜಃಪುಂಜಮಯೀ ಸದಾ ಗತಿಯುತಾ ಹಂಸೀ ಸಹಸ್ರಾರಕಮ್ ।
ಅಮ್ಭೋಜಂ ಪರಹಂಸಕೇಲಿಸದನಂ ಯಾ ಪ್ರಾಪ್ಯ ಲೇಭೇ ಮುದಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 4 ॥
ಪ್ರಾಣಾಪಾನರವೀನ್ದುಯೋಗಪರಮಾನನ್ದಪ್ರಬುದ್ಧಾ ಸತೀ
ಸಂಸುಪ್ತಾ ಶ್ರುತಿಪತ್ರಪದ್ಮಶಯನೇ ಸೌಷುಮ್ನವೀಥ್ಯಾದ್ಯುತಮ್ ।
ವರ್ಷತ್ಯಸಭಾನಟಂ ಸಮರಸಾನನ್ದಾಮೃತಂ ಪ್ರಾಪ್ಯ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 5 ॥
ಯಾ ಮಿತ್ರಾವರುಣಾಲಯಾತ್ ಸಮುದಿತಾ ತೇಜೋಮಯೀ ವಲ್ಲರೀ
ವೀಣಾದಂಡತರುಶ್ರಿತಾ ಶಿವವಿಯದ್ಯಾನ್ತೀ ಸ್ವಭಾವಾತ್ ಸದಾ ।
ನಾನಾವರ್ಣಪದಾದಿಪುಷ್ಪನಿಚಯಾನ್ ಸ್ವಸ್ಮಿನ್ ಕಿರನ್ತೀಚ್ಛಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 6 ॥
ಯಾ ಚೈಕೋತ್ತರಖಾದಿಪಂಚಕಗುಣಾಕಾರಾರ್ಣಮನ್ತ್ರಾತ್ಮಿಕಾ
ಯಾ ಪೀತಾರುಣಶುಭ್ರವಿಗ್ರಹಮಯೀ ಸಂಧ್ಯಾತ್ರಯೇ ರಾಜತೇ ।
ಯಾಪ್ಯೇಕಾಕ್ಷರನಾದಸಂತತಿಸುಖೋದ್ಬೋಧೈಕಮೂರ್ತಿಃ ಪರಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 7 ॥
ಯಾವ್ಯಕ್ತಾ ನವವಾರನಾಥಕರುಣಾಪಾಂಗಾ ಪ್ರಕಾಶಾತ್ಮಿಕಾ
ನೀಲೇನ್ದೀವರಪದ್ಮಹರ್ಷಕರದೃಕ್ತತ್ತ್ವಾರ್ಣಮುಕ್ತಾವಲಿಃ ।
ಕಾಮೇಶ್ಯಾದಿಸುಧಾಂಶುಷೋಡಶಕಲಾಪೂರ್ಣಾತ್ಮವಕ್ತ್ರಾಮ್ಬುಜಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 8 ॥
ಯಾ ಸೀಮಾ ನವಖಂಡಚಕ್ರವಸುಧಾಲಂಕಾರಮೇರೋಃ ಪರಾ
ನಾನಾದೇಶಿಕಯೋಗಿನೀಮಣಿಲಸಚ್ಛುಭ್ರಾದಿವರ್ಣಾವನೇಃ ।
ಕಾಮೇಶಾಂಕನಿರಭ್ರನಿರ್ಮಲಮಹಾಕಾಶಸ್ಥವಿದ್ಯುಲ್ಲತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 9 ॥
ಯಸ್ಯಾಃ ಪ್ರೀತಿರಹರ್ನಿಶಂ ಕುಲಗಿರಿಸ್ರೋತಃಸುಧಾಯಾಂ ಪರಾ
ನಿಷ್ಕಾಮಪ್ರಣತಾನ್ತರಂಗಕುಸುಮೇ ಹ್ರೀಂಕಾರಘಂಟಾಧ್ವನೌ ।
ಗನ್ಧೇಽಹಂ ಶಿವ ಏವ ನಾನ್ಯ ಇತಿ ಯೋ ದೀಪೇ ವಿಮರ್ಶಾತ್ಮಕೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 10 ॥
ಯಾ ಚಿತ್ರಂ ತ್ರಿಪುರಾ ಪುರಾನ್ತಕಸಮಾಶ್ಲಿಷ್ಟಾ ಪರಾ ಜ್ಯೋತಿಷಾಮ್
ಅದ್ವೈತಾಪಿ ಶಿವಾರ್ಧರ್ಮೂರ್ತಿರಮಲಾ ಪಾಶಾಪಹಾ ಪಾಶಿನೀ ।
ಪದ್ಮಾರಾಧ್ಯಪದಾರವಿನ್ದಯುಗಲಾ ಭಿಕ್ಷಾಟನೇಶಪ್ರಿಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 11 ॥
ಯಾ ದೂರಾ ಲಲಿತಾಪಿ ದುಷ್ಕೃತಜುಷಾಂ ಯಾ ಕೋಮಲಾಂಗ್ಯದ್ರಿಜಾ
ಯಾ ನೀಲಾಮ್ಬುದಮೇಚಕಾಪಿ ಭುವನಂ ವಿದ್ಯೋತಯತ್ಯದ್ಭುತಮ್ ।
ಯಾ ಕಲ್ಯಾಣಗುಣಪ್ರವಾಹಸುಮಹಾವಾರಾಂನಿಧಿರ್ನಿರ್ಗುಣಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 12 ॥
ನಿಷ್ಕ್ರೋಧಾ ನತಲೋಕಮೃತ್ಯುಮಥನೇ ಯಾ ಬದ್ಧಕಚ್ಛಾ ಸದಾ
ನಿರ್ವೈರಾ ನಿಜಪೂಜನಾದಿಕೃತಿನಾಂ ದೈನ್ಯೇ ದ್ವಿಷನ್ತ್ಯದ್ಭುತಮ್ ।
ಭಕ್ತಾನಾಂ ಭಯಮೋಚಿನೀ ಭವರತಾ ಶ್ರೀಕಾಮರಾಜಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 13 ॥
ವಿದ್ಯಾರಣ್ಯಪುಲಿನ್ದಿಕಾ ಶ್ರುತಿಗಿರಾ ತತ್ತ್ವೋಪದೇಷ್ಟ್ರೀ ಸತಾಂ
ವಾರಾಹೀ ನಕುಲೀ ವಿಲಾಸಕುತುಕಾ ಯಾಪ್ಯುತ್ತಮಬ್ರಾಹ್ಮಣೀ ।
ಯಾ ಚಿತ್ರಂ ಸುಖಶಾನ್ತ್ಯತೀತವಸುಧಾ ಶ್ರೀಚಂಡಿಕಾ ಶೂಲಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 14 ॥
ಯಾ ಶಾಲಾ ನಿಗಮಾಗಮಸ್ಮೃತಿಕಲಾಲೀಲಾತತೇಸ್ತ್ರ್ಯಕ್ಷರೀ
ಯಾ ಫಾಲಾಕ್ಷಮಹಾಸತೀ ಸ್ಮರಕಲಾಹೇಲಾ ಪರಾಪ್ಯದ್ಭುತಮ್ ।
ಯಾ ಕಾಲಾನಲಕಾನ್ತಿಮತ್ಯಪಿ ಸದಾ ನೀಲಾಲಕಾ ಶೀತಲಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 15 ॥
ಕಲ್ಯಾಣಾಚಲಕಾರ್ಮುಕಸ್ಯ ಮಹಿಷೀ ಪುಂಡ್ರೇಕ್ಷುಚಾಪಾದ್ಭುತಂ
ಲಕ್ಷ್ಮೀವಲ್ಲಭಸಾಯಕಸ್ಯ ರಮಣೀ ಪುಷ್ಪೇಷುಹಸ್ತಾಮ್ಬುಜಾ ।
ಯಾ ರಾಮಾ ಪರಮೇಶ್ವರಸ್ಯ ಲಲಿತಾ ಲೋಕತ್ರಯೇಽತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 16 ॥
ಯಾ ವಾಚಾಮಧಿದೇವತಾಪ್ಯವಿಷಯಾ ವಾಚಾಂ ಶ್ರುತೇರ್ವರ್ಣಿತುಂ
ಶ್ರೋತ್ರಾದೀನ್ದ್ರಿಯದೇವತಾಪಿ ನ ಜಡೈಃ ಶ್ರೋತ್ರಾದಿಭಿರ್ಜ್ಞಾಯತೇ ।
ಅನ್ತಃಸ್ಥಾಮಪಿ ಯಾಂ ಪ್ರಚೋದಕತಯಾ ನೋ ಜಾನತೇ ಜನ್ತವಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 17 ॥
ಯಾ ವೀಣಾ ಪರಮೇಶ್ವರಾಂಕನಿಲಯಾ ಹ್ರೀಂಕಾರಮನ್ತ್ರೀ ಸದಾ
ಶ್ಯಾಮಾ ಕಾಲಸುಮೂರ್ಚ್ಛನಾದಿಕಲನಾಹೀನಾಪಿ ರಾಗಿಣ್ಯಹೋ ।
ನಾಥೇನಾಹತನಾದವಿಭ್ರಮವತೀ ಸ್ಥಾಣುಂ ಶಿವಂ ಚಾಕರೋತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 18 ॥
ಯಾ ಮೋಹಾನ್ಧತಮೋಽಪನೋದನವಿಧೌ ಬೋಧಾತ್ಮಿಕಾ ಕೌಮುದೀ
ಸಂಸಾರಾರ್ಣವತಾರಣೇ ದೃಢತರಾ ನೌಕೇನ್ದ್ರಚಾಪಪ್ರಭಾ ।
ದಾರಿದ್ರ್ಯಾದ್ರಿವಿದಾರಣೇ ಕನಕರುಗ್ ದಮ್ಭೋಲಿರಿಚ್ಛಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 19 ॥
ಯಾ ತಾಪತ್ರಯಜಾಡ್ಯಶೋಕಶಮನೇ ಕಾಚಿನ್ನೃಣಾಂ ಸ್ವರ್ಧುನೀ
ಯಾ ಶಾನ್ತ್ಯಾದಿಗುಣಪ್ರವಾಲಮನಿಸಂವೃದ್ಧೌ ಸುಧಾಮ್ಬೋನಿಧಿಃ ।
ಪ್ರತ್ಯಗ್ದೃಷ್ಟ್ಯಸಿತಾಬ್ಜಪೋಷಣವಿಧೌ ಜಾಡ್ಯಾಪಹಾ ದೀರ್ಘಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 20 ॥
ಶೋಕಾರಣ್ಯಕುಠಾರಿಕಾ ಶುಭಫಲೋದ್ಯಾನಸ್ಯ ಯಾ ವಾಪಿಕಾ
ಪಾಪಕ್ಷ್ವೇಲಸುಪರ್ಣಕಲ್ಪಘುಟಿಕಾ ಪ್ರಾಜ್ಞಾಜ್ಞಯೋರಮ್ಬಿಕಾ ।
ಆಶೋಚ್ಚಾಟನಮೂಲಿಕಾ ವಿಪಣಿಕಾ ವಾಗರ್ಥವೃದ್ಧೇಃ ಕವೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 21 ॥
ಯಾ ವಾಂಛಾಪರಿಪೂರಣೇ ಸುರಲತಾ ಮೋಕ್ಷೇನ್ದಿರಾ ದೇವತಾ
ಸ್ರಷ್ಟ್ರಾದೇಃ ಕುಲದೇವತಾ ಸುಚರಿತಾ ವಿದ್ಯಾಸು ಸರ್ವೋನ್ನತಾ ।
ನಿತ್ಯಾನನ್ದರತಾ ಸುಕರ್ಮಮುದಿತಾ ಲೋಕತ್ರಯಾರಾಧಿತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 22 ॥
ಸಾರಾಸಾರಪಯೋವಿವೇಚನವಿಧೌ ಹಂಸೀ ಪರಂ ತು ತ್ವಿಷಾ
ಶ್ಯಾಮಾ ಮೋಹತಮೋಪನೋದನವಿಧೌ ಹಂಸಃ ಸದಾ ಭಾಸಕಃ ।
ಪ್ರಜ್ಞಾಸೌಧವಿಹಾರಿನಿಸ್ತುಲಮಹಾಜ್ಯೋತ್ಸ್ನಾ ದಿವಾಪಿ ಧ್ರುವಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 23 ॥
ಯಾ ಚಿನ್ತಾಮಣಿರೇವ ದೋಷಶಮನೇ ದಾನೇ ಪರಂ ತ್ವದ್ರಿಜಾ
ವಾಸನ್ತೀ ಪಿಕಸುನ್ದರೀ ಶ್ರುತಿಸುಖಾಲಾಪೇ ಸ್ವಯಂ ಪಂಚಮೀ ।
ಯಾನೇ ಯೌವನಸಿನ್ಧುತೀರಕರಿಣೀ ಪದ್ಮಾಟವೀರಕ್ಷಿಣೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 24 ॥
ಯಾ ಶಂಭೋರ್ನಯನೋತ್ಪಲೇನ್ದುವದನಾ ಕಂದರ್ಪದೂತೀಕ್ಷಣಾ
ಚೇತಶ್ಚಾತಕನೀಲನೀರದಕಚಾಜೀವಾತುಸೀಮನ್ತಿನೀ ।
ಶೃಂಗಾರಾದ್ವಯಶಾನ್ತಿಪಾಠಸುಕೃತಶ್ರೇಯಃಫಲಾಗ್ರಯಸ್ತನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 25 ॥
ಯಾ ತ್ರ್ಯಕ್ಷಸ್ಯ ಮನೋರಥಃ ಕಿಮು ತಪಃಪಾಕಃ ಸುಖಂ ನೈಜಕಂ
ದಕ್ಷಸ್ಯೇವ ತಪಃಫಲಂ ಕುಲಧನಂ ದೈವಂ ಹಿಮಾದ್ರೇರಪಿ ।
ಭಾಗ್ಯಂ ಭಕ್ತಜನಸ್ಯ ದೇಶಿಕದೃಶೋಃ ಶ್ಲಾಧ್ಯಂ ಕವೀನಾಂ ಗಿರಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 26 ॥
ಸೇತುರ್ದುಃಖಮಹೋದಧೇರ್ಮಣಿಮಯಚ್ಛಾಯಾ ವಿಭೋಸ್ತತ್ತರೋಃ
ಪಾನ್ಥಾನಾಂ ಪರಮಾರ್ಥಿನಾಂ ಪ್ರತಿಪದಂ ಕಾರುಣ್ಯಪಾಥಃಪ್ರಪಾ ।
ಸತ್ಯಾನನ್ದಚಿದನ್ನದಾನವಿಲಸಚ್ಛಾಲಾ ಚ ಕಲ್ಯಾಣಧೀಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 27 ॥
ಯಾ ಲೋಕತ್ರಿತಯೈಕರತ್ನಮಜಡಂ ಭಾನ್ವಿನ್ದುಭಾಶೀತಲಂ
ನಿರ್ದೋಷಂ ಗುಣವರ್ಜಿತಂ ಚ ನಿಖಿಲೈಶ್ಚರ್ಯಪ್ರದಂ ದೇಹಿನಾಮ್ ।
ಚಿತ್ರಂ ಭಿಕ್ಷುಕಸಾರ್ವಭೌಮನಿಲಯಂ ಲೋಕತ್ರಯೇ ಭಾಸತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 28 ॥
ಯಾಪರ್ಣಾಪ್ಯನಪಾಯಕಲ್ಪಲತಿಕಾ ಸ್ಥಾಣುಃ ಪತಿಃ ಕಲ್ಪಕೋ
ಯಸ್ಯಾ ಭಕ್ತಫಲಪ್ರಪೂರಣವಿಧೌ ಪುತ್ರೋ ವಿಶಾಖೋಽದ್ಭುತಮ್ ।
ಇತ್ಥಂ ನಿತ್ಯಕುಟುಮ್ಬಿನೀ ತ್ರಿಜಗತಾಂ ರಕ್ಷಾಕರೀ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 29 ॥
ಯಾ ಪುಣ್ಯಾಶ್ರಮ ಏವ ಶಾಂಕರತಪಃಸಿದ್ಧ್ಯೈ ಮಹಾಯೋಗಿನಾಂ
ನಿರ್ವೈರೋ ಗಜಪಂಚವಕ್ತ್ರಗತಿಮಧ್ಯಃ ಶಾನ್ತಿರಂಗಸ್ಥಲಮ್ ।
ನಿರ್ದ್ವನ್ದ್ವಸ್ತನಚಕ್ರವಾಕಲಸಿತಃ ಕೋಕಾರಿಚೂಡಾಮಣಿಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 30 ॥
ಯಾ ಕೇದಾರಮಮೂಲ್ಯಮಾನಮಭಯಂ ನಿಷ್ಪಂಕಮಾಶಾಸ್ಪದಂ
ಶ್ರೀಕಂಠೇತರಭೋಗಬನ್ಧರಹಿತಂ ಕಲ್ಪೇ ಕದಾಪ್ಯದ್ಭುತಮ್ ।
ಪ್ರಜ್ಞಾಶಾಲಿನ ಏವ ದಿತ್ಸತಿ ಬತ ಜ್ಞಾನಾಂಕುರಂ ಕಸ್ಯಚಿತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 31 ॥
ಯಾ ಚಿತ್ರಂ ಕರಿಣೀ ಹಿಮಾಚಲಭವಾ ತಾಮ್ರಾರವಿನ್ದೇಕ್ಷಣಾ
ಕಾನ್ತ್ಯಾ ಭರ್ತ್ಸಯತೀ ವರಂ ಮರತಕಂ ಪಾಶಾಂಕುಶೋಕ್ಷ್ವನ್ವಿತಾ ।
ಪಂಚಾಸ್ಯಪ್ರಭುಮಂಚಕೋಪರಿ ವಸತ್ಯಾನನ್ದಪುರ್ಯಾಂ ಮುದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 32 ॥
ಏಣಾಂಕಾರ್ಭಕಮಾತ್ಮಕುನ್ತಲತಮೋರಾತ್ರ್ಯಾಮಪಿ ದ್ಯೋತಯ-
ತ್ಯಾಶ್ಚರ್ಯಂ ಯಮಿನಾಂ ಕಟಾಕ್ಷಯಮುನಾಕಲ್ಲೋಲಮಾಲಾಂ ಚ ಯಾ ।
ನಿತ್ಯಂ ವಕ್ತ್ರಶಶಾಂಕಮನ್ದಹಸಿತಜ್ಯೋತ್ಸ್ನಾಂ ಕೃಪಾಯಾಂ ಗುರೋಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 33 ॥
ಯಾ ದೃಷ್ಟಿಃ ಶ್ರುತಿಮೂಲಶೀಲನಪರಾ ನೀಲಾಂಜನಾದ್ರಿಶ್ರಿಯಂ
ಸ್ವಾತ್ಮಸ್ಮೇರಪಯೋದಧೌ ಸಹಭವಂ ಶ್ರೀವಲ್ಲಭಂ ತನ್ವತೀ ।
ವಾತ್ಸಲ್ಯಾನ್ನತಲೋಕಮೋಹಿತಿಮಿರಂ ಚಿತ್ರಂ ಧುನೀತೇ ಚ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 34 ॥
ಯಾ ಕಾರುಣ್ಯಕಟಾಕ್ಷನೀಲವನಜದ್ವೇಷ್ಯಾತ್ಮಜಾಮ್ಭಃಸ್ವಹೋ
ಮುಗ್ಧಸ್ನಿಗ್ಧಮೃದುಸ್ಮಿತಾಮರಧುನೀವೀಚೀವಿಲಾಸಾಶ್ರಿತೇ ।
ಸುಸ್ನಾತಂ ನಿಜಪಾದಪಂಕಜರಜಃಸಿಕ್ತಂ ಬತ ವ್ಯಾತನೋತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 35 ॥
ಶ್ರೀಕಂಠಾರ್ಧಶರೀರಿಣೀ ಧ್ರುವಮಪಿ ಶ್ರೀಕಾನ್ತಸೋದರ್ಯಹೋ
ನಾರಾಯಣ್ಯಪಿ ಸರ್ವದಾ ಕುಲನಗೋತ್ತಂಸಾತ್ಮಜಾತ್ಯದ್ಭುತಮ್ ।
ಪ್ರಾಲೇಯಾಚಲಕನ್ಯಕಾಪಿ ಸಕಲಾಹಂರೂಪಿಣೀ ಯಾದ್ಭುತಮ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 36 ॥
ಆನಂಗಸ್ಮೃತಿಸಂಪ್ರದಾಯಮಖಿಲಂ ಸ್ವಾಪಾಂಗಶಿಷ್ಯೇಣ ಯಾ
ಕಾಮದ್ರೋಹಿಣಮೇವ ಶಿಕ್ಷಯತಿ ಹಾ ಲೋಕೋತ್ತರಾತ್ಯದ್ಭುತಮ್ ।
ತೇನೈವಾತ್ಮಪದಾರವಿನ್ದರಸಪಾನೋಥಂ ತ್ರಿಲೋಕೇಽನ್ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 37 ॥
ಬನ್ಧೂಕಸ್ತಬಕಂ ರುಚಾ ಪರಿಹಸತ್ಯಮ್ಭೋಜಮಪ್ಯದ್ಭುತಂ
ಕರ್ಣಾಸ್ಯೇಕ್ಷಣಪಾಣಿನಾ ವನಚರಂ ಮಧ್ಯೇನ ವಕ್ಷೋರುಹಾ ।
ಗತ್ಯಾ ಸ್ವಾದುಗಿರಾ ಸುಧಾಕರಕಲೋತ್ತಂಸೈಶ್ಚ ನೀಲಾಲಕೈಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 38 ॥
ನಿಃಸ್ಪನ್ದಂ ನಿಗಮಾಗಮಾದ್ಯವಿಷಯಂ ಶ್ರೋತ್ರಾದಿಹೀನಂ ಪರಂ
ನಿಃಶಬ್ದಂ ತದಹೋ ಪುಮಾಂಸಮಕರೋತ್ ಕಾಮೇಶ ಇತ್ಯಾಖ್ಯಯಾ ।
ಯಾ ಚಿತ್ರಂ ನಿಜದಾಸಮಚ್ಛಹೃದಯಂ ಶಕ್ತ್ಯಾ ತನೋತ್ಯನ್ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 39 ॥
ವಾಗರ್ಥೇನ ಯಥಾ ಯುತಾಪಿ ಪರಮಾನನ್ದಾತ್ಮನಾ ಶೂಲಿನಾ
ನಿತ್ಯಂ ಯಾ ವಿಹರತ್ಯಹೋ ಜನಮನೋಗೇಹೇಷು ಮುಗ್ಧೇಷು ಹಾ ।
ನಿರ್ಭೀತಾ ಕುಲಟೇವ ಕರ್ಮ ಕುರುತೇ ಸರ್ವೇನ್ದ್ರಿಯಾಣಾಂ ಸದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 40 ॥
ನಾಸಾಮೌಕ್ತಿಕದೈತ್ಯದೇಶಿಕಮಹೋ ಮನ್ದಸ್ಮಿತೈಃ ಪುಷ್ಣತೀ
ತಾಟಂಕದ್ಯುತಿಭಿರ್ದಿನೇಶಶಶಿನೌ ದೇವೌ ತಿರಸ್ಕುರ್ವತೀ ।
ಮಾರಾರೇರ್ಗುಹಮೇಧಿನೀ ಮನಸಿಜಂ ರಕ್ಷತ್ಯಪಾಂಗೋಟಜೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 41 ॥
ಬನ್ಧಚ್ಛೇದವಿಚಕ್ಷಣಾ ಪಶುಜನಸ್ತೋಮಾತಿದೂರಾದ್ಭುತಂ
ಯಾ ರಕ್ಷತ್ಯಗರಾಜಶೇಖರಸುತಾಪ್ಯಾಮ್ನಾಯಸೂತ್ರೈರ್ದೃಢಮ್ ।
ಬದ್ಧ್ವಾ ದೇವಪಶೂನ್ ಸದಾ ಪಶುಪತೇಃ ಸಂಸರ್ಗದೋಷೇಣ ಹಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 42 ॥
ಧಾರಾ ದೇಶಿಕದಿವ್ಯದೃಷ್ಟಿಮಧುನೋ ಮಾರಾರಿನೇತ್ರಾಮೃತಂ
ಧಾರಾ ದುರ್ಮತದಾರುದಾರಿಪರಶೋಸ್ತಾರಾವಲಿರ್ಯೋಗಿನಾಮ್ ।
ತೀರಂ ಮನ್ತ್ರಮಹೋದಧೇಃ ಕವಿಗಿರಾಂ ಪೂರಃ ಸುಖಾಮ್ಭೋನಿಧೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 43 ॥
ಕಾಮಾಕ್ಷೀತಿ ವದನ್ತಿ ಕೇಚನ ಬುಧಾಃ ಕಾಮೇಶ್ವರೀತ್ಯದ್ಭುತಂ
ರಾಮಾಸ್ತೋಮಶಿರೋಮಣೀತಿ ಮದನಾರಾತೇರ್ದೃಶೋಃ ಪಾರಣಾ ।
ಸೀಮಾ ಭೂಮಸುಖಸ್ಯ ಚಿನ್ಮಯಕಲಾ ಶೃಂಗಾರಮೂರ್ತಿಶ್ಚ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 44 ॥
ಮುಗ್ಧಸ್ನಿಗ್ಧಕಟಾಕ್ಷಮಿತ್ರತನಯಾ ಯಸ್ಯಾಃ ಸದಾನನ್ದಿನೀ
ಮನ್ದಸ್ಮೇರಪಯೋನಿಧಿಂ ನಿಜಪತಿಂ ಸಂಗಮ್ಯ ವಾಣೀಶ್ರಿಯಃ ।
ಸಂಸೂಯ ಪ್ರದದಾತ್ಯಯಾಚಿತತತ್ಯಾ ಭಕ್ತೇಭ್ಯ ಏವಾದರಾತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 45 ॥
ಔನ್ನತ್ಯಂ ಮುಹುರೇತಿ ಚಿತ್ರಮಮರಶ್ರೇಣೀಷು ಯದ್ಯೋಗತೋ
ದಕ್ಷದ್ವೇಷ್ಯಪಿ ಭಿಕ್ಷುಕೋಽಪಿ ವಿಷಮಾಕ್ಷೋಽಪ್ಯುಕ್ಷಯಾನೋಽಪಿ ವಾ ।
ಅಜ್ಞಾತಾನ್ವಯಸಂಭವೋಽಪಿ ನಿಗಮಾತೀತೋಽಪಿ ಲುಬ್ಧಸ್ತಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 46 ॥
ಯಾ ಲೋಕೈಕಸುಮಂಗಲಾ ಸ್ಮರಕಲಾ ನೀಲಾಮ್ಬುದಶ್ಯಾಮಲಾ
ಡೋಲಾ ಶಂಕರಲೋಚನದ್ವಯಶಿಶೋರ್ಮಾಲಾಷ್ಟಸಿದ್ಧಿಶ್ರಿಯಾಮ್ ।
ಕಾಲಾತೀತಕಲಾ ಕಲಾನಿಧಿಕಲೋತ್ತಂಸಾತುಲಾ ನಿರ್ಮಲಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 47 ॥
ಅಸ್ತಂ ಯಾ ನಲಿನೇಕ್ಷಣೇನ ನಯತಿ ಕ್ಷೋಭಾತಪಂ ಯೋಗಿನಾಂ
ಸ್ವಾನನ್ದಾಮೃತಚನ್ದ್ರಿಕಾಂ ಕರುಣಯಾ ನಿತ್ಯಂ ತನೋತ್ಯದ್ಭುತಮ್ ।
ವರ್ಷತ್ಯಾನನಪಂಕಜೇ ಸುಕವಿತಾಪೀಯೂಷಧಾರಾಃ ಕವೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 48 ॥
ಯಾ ವಿದ್ಯುತ್ಕಮಲೇಷು ತಿಷ್ಠತಿ ಪರಾ ತಾಪಿಂಛಗುಚ್ಛಚ್ಛವಿ-
ಶ್ಚಿತಂ ಪ್ರಾಣಭೃತಾಂ ದೃಶೋಃ ಸುಖಕರೀ ಭೀಮಪ್ರಕಾಶಿನ್ಯಲಮ್ ।
ಜ್ಯೋತಿಃ ಶೀತಲಭೂಭೃತಸ್ತ್ರಿಭುವನಕ್ಷೇಮಪ್ರವಾಹಪ್ರದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 49 ॥
ಯಾ ಕಾಚಿದ್ಧರಿಣೀ ಮರಾಲಗಮನಾ ಚಿದ್ವ್ಯೋಮಸಂಚಾರಿಣೀ
ಹ್ರೀಂಕಾರಸ್ವನಸಂತತೇಃ ಪರವಶಾ ಹೃದ್ಯಾನವದ್ಯಾ ದೃಶಾಮ್ ।
ಅಸ್ತ್ರೈವ್ಯಾರ್ಧವರಂ ಪಿನಾಕಿನಮಹೋ ಸಂಮೋಹಯನ್ತ್ಯನ್ವಹಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 50 ॥
ಧೇನುರ್ಯಾ ಪರಮಾತ್ಮನಃ ಪಶುಪತೇಃ ಸರ್ವಜ್ಞತಾದೋಹಿನೀ
ಚಿತ್ರಂ ಷಣ್ಮುಖವಕ್ರತುಂಡಜನನೀ ಪ್ರಾಲೇಯಶೈಲಾತ್ಮಜಾ ।
ನಿರ್ನಿದ್ರಾಮಲಪುಂಡರೀಕನಯನಾ ಶುಭ್ರಾಂಶುಚೂಡಾಮಣಿಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 51 ॥
ಯಾಂ ದಂಡಂ ವರವಿದ್ರುಮಾತ್ಮಕಮತಿಶ್ಲಕ್ಷಣಂ ಸುಸೂಕ್ಷ್ಮಂ ಧ್ರುವಂ
ಗಾಢಂ ನಿರ್ವಿಷಯಾಃ ಪುರಾಣಪುರುಷಾ ಆಲಮ್ಬ್ಯ ಗಚ್ಛನ್ತ್ಯಹೋ ।
ತೀರ್ತ್ವಾ ದುಸ್ತರಜನ್ಮಪಂಕನಿಬಿಡಂ ಮಾಯಾಮಹೀಮಂಡಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 52 ॥
ಯಾ ಕುಮ್ಭೋದ್ಭವ ಏವ ಮನ್ಮಥರಿಪೋರ್ಧೈರ್ಯಾಮ್ಬುಧೇಃ ಪ್ರಾಶನೇ
ಪ್ರಾರಬ್ಧಾತ್ಮಕವಿನ್ಧ್ಯಭೂಧರಗತಿಧ್ವಂಸೇ ತಥಾ ಧೀಮತಾಮ್ ।
ಆಚಾರ್ಯಃ ಶಿವಬೋಧನೇ ನಿಜಪತೇರಾನಂಗದೀಕ್ಷಾಕ್ರಮೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 53 ॥
ಯಾ ಕ್ಷೀರಾಬ್ಧಿಸಹೋದರಸ್ಮಿತರುಚಾ ಕಮ್ಬುಂ ತಿರಸ್ಕುರ್ವತೀ
ಕಾಮಾರೇರ್ಹೃದಯಂ ವಿಶುದ್ಧಮಪಿ ಸಂಮುಗ್ಧಂ ಕರೋತ್ಯನ್ವಹಮ್ ।
ಆಶ್ಚರ್ಯಾಂ ನಮತಾಂ ಧುನೋತಿ ತಿಮಿರಂ ಸ್ವಾಜ್ಞಾನರೂಪಂ ಪರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 54 ॥
ಯಸ್ಯಾ ಹಾಸಮರಾಲಿಕಾಮೃದುಗತಿಃ ಶ್ರೀಕಾಮಜೇತ್ರೇ ಮುದಾ
ವಿದ್ಯಾಂ ಬೋಧಯಿತುಂ ಪರಾಂ ವಿತನುತೇಽಪಾಂಗಾರ್ಕಜಾತೋರ್ಮಿಷು ।
ಸ್ಥಿತ್ವಾ ಶ್ರೌತಪಥಸ್ಥಕುಂಡಲಯುಗೇನಾಲೋಚನಾಸಂತತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 55 ॥
ಯಸ್ಯಾ ವೀಕ್ಷಣಶಕ್ರಮೇಚಕಮಣೀಸಾಮ್ರಾಜ್ಯಸಿಂಹಾಸನಂ
ಶ್ರಿತ್ವಾ ಪುಷ್ಪಶರಪ್ರಭುರ್ವಿಜಯತೇ ತ್ರ್ಯಕ್ಷಸ್ಯ ಪಾರ್ಶ್ವೇಽದ್ಭುತಮ್ ।
ಪೀಯೂಷಾರ್ಣವಫೇನಜೇತೃಸಹಿತಶ್ರೀಚಾಮರಾಸೇವಿತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 56 ॥
ನೀಹಾರಾದ್ರಿಯಶೋಽಭಿವರ್ಧನಪರೇ ಕುಂಜೇ ಕಟಾಕ್ಷಾತ್ಮಕೇ
ಯಸ್ಯಾಃ ಕ್ರೀಡತಿ ನೀಲಕಂಠವಿಮಲಪ್ರಜ್ಞಾಮಯೂರಾರ್ಭಕಃ ।
ಪಶ್ಯನ್ ನಿತ್ಯಸುಗನ್ಧಿಕುನ್ತಲಮಯೀಂ ಕಾದಮ್ಬಿನೀಂ ಸಂತತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 57 ॥
ಯಾ ಹಾಸಾರ್ಜುನಭೂಭೃತಾ ಸುಖಯತಿ ದ್ರಾಗ್ ಭೀಮಚಿತ್ತಂ ಪರಂ
ಧರ್ಮಂ ಪಾಲಯತಿ ಪ್ರವೇಶಯತಿ ವೈವರ್ಣೇಽನುಕೂಲಾಂ ಗತಿಮ್ ।
ಮಾಲಿನ್ಯಂ ನಯತೇತರಾಂ ಧ್ರುವಮಹೋ ತದ್ಧಾರ್ತರಾಷ್ಟ್ರಂ ಕುಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 58 ॥
ಯಾ ಮುಕ್ತಾಫಲಮದ್ಭುತಂ ಗಿರಿಭವಂ ಶ್ಯಾಮಂ ಪ್ರಕಾಶಾಸ್ಪದಂ
ಸತ್ಸೂತ್ರಂ ಸಕಲಾರ್ಥದಂ ಶಶಿಕಲಾಚೂಡಂ ತ್ರಿಣೇತ್ರಂ ಚರಮ್ ।
ನಿರ್ದೋಷಂಭವಕೌತುಕಪ್ರದಮನಾದ್ಯನ್ತಂ ಪರಂ ನಿಸ್ತುಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 59 ॥
ಯಾ ವಾಪೀ ಭುವನಪ್ರದಾ ರಸಮಯೀ ತೃಷ್ಣಾರ್ದಿತಾನಾಂ ಪರಂ
ನಿಷ್ಪಾಶಾಭಿಗತಾಭಿಮಾನಮಮತಾಪಾಶಾಭಿಲಾಷಾನ್ವಿತಾ ।
ಸತ್ಪಾತ್ರೇ ಫಲದಾಯಿನೀ ಸ್ಮೃತಿಮತಾಂ ತಾಪತ್ರಯಧ್ವಂಸಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 60 ॥
ಶೃಂಗಾರಾಮ್ಬುಧವೀಚಿವಿಭ್ರಮವತೀ ಶೃಂಗಾರಬೀಜಾನಿಲ-
ವ್ಯಾಲೋಲಾ ಕುಮುದಪ್ರಿಯಧ್ವಜಪಟೀ ಪ್ರತ್ಯಕ್ಚರೀ ಪಾರ್ವತೀ ।
ದ್ರೋಣೀ ಯಾ ವಿಷಮೇಕ್ಷಣಾನುಸರಣೀ ಚಿತ್ರಂ ಸದಾ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 61 ॥
ಯಸ್ಯಾ ನೀರದಭಾಃ ಕಟಾಕ್ಷಯದುಪಃ ಕರ್ಣಾನುವೃತ್ತೋಽದ್ಭುತಂ
ದೀವ್ಯತ್ಕುಂಡಲಹಾಸಚಕ್ರಜಲಜಶ್ಲಿಷ್ಟಃ ಕೃಪಾನೀರದಃ ।
ಸ್ಥಾನೋರ್ಗೋಕುಲಮನ್ವಹಂ ನಯತಿ ತದ್ವಕ್ಷೋಜಶೈಲಾನ್ತರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 62 ॥
ಯಾ ಚಿತ್ರಂ ಮಹತೀಂ ಮಹಾಗುಣವತೀಮಪ್ಯಶ್ರಿತಂ ಸಂತತಂ
ಕಾಠಿನ್ಯಂ ನ ವಿಮುಂಚತಿ ಸ್ತನಯುಗಂ ಮಾನ್ದ್ಯಂ ಗತಿಃ ಕುನ್ತಲಾಃ ।
ಕೌಟಿಲ್ಯಂ ನಯನಾಮ್ಬುಜಂ ಚಪಲತಾಂ ಬಿಮ್ಬಾಧರೋ ರಾಗಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 63 ॥
ಯಾ ಮನ್ದಸ್ಮಿತಕೌಮುದೀಂ ವಿತನುತೇ ನಿತ್ಯೋದಿತೇ ಸರ್ವತ-
ಸ್ತಾಟಂಕಾತ್ಮನಿ ಭಾಸ್ಕರೇ ಸ್ವಯಮಹೋ ಕಾಲಾಮ್ಬುದಶ್ಯಾಮಲಾ ।
ಬಿಮ್ಬೋಷ್ಠದ್ಯುತಿಸಂಧ್ಯಯಾ ದ್ವಿಜಗಣೇ ಶ್ರೀಶಾಂಭವೇ ರಾಗಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 64 ॥
ಜಾರೇ ಮಾರಕಿರಾತಜೀವನಕರೇ ಚಿತ್ರಂ ಕಟಾಕ್ಷಾತ್ಮಕೇ
ಯಸ್ಯಾಃ ಕುಂಡಲರಶ್ಮಿವೇಣುಕಲಿತೇ ಲಗ್ನಾ ಸುಖಂ ರಾಜತೇ ।
ಕಾಮಾರೇರ್ಮತಿಶಾರಿಕಾ ಶ್ರುತಿಶಿರೋದ್ಯಾನಾನ್ತರೋಲ್ಲಾಸಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 65 ॥
ನಿತ್ಯಂ ಸೋಮಕಲಾಧರೋಽಧ್ವರಪತಿರ್ವ್ಯಾಘ್ರಾಜಿನಾಲಂಕೃತ-
ಸ್ತಾಟಂಕದ್ಯುತಿವಹ್ನಿವೀಕ್ಷಣಶಿಖಾಧೂಮಾತಿಲೋಲೇಕ್ಷಣಃ ।
ಯಸ್ಯಾ ಹಾಸಪಯೋನಿಧಾವವಭೃಥವ್ಯಾಜೇನ ಮಜ್ಜತ್ಯಹೋ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 66 ॥
ಯಸ್ಯಾಃ ಕಾಪಿ ದಯಾತ್ಮಿಕಾ ಪ್ರತಿದಿನಂ ಶೈಲೂಷಬಾಲಾದ್ಭುತಂ
ನೀರಾಗಾಲಯಕಾಲವರ್ಜಿತವತೀ ನಿರ್ಮೂರ್ಚ್ಛನಾ ಕಾಮನಾ ।
ನಿರ್ಲಜ್ಜೈವ ದಿಗಮ್ಬರಾ ನಟತಿ ಹಾ ಸಂಮೋಹಶಾನ್ತ್ಯೈ ನೃಣಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 67 ॥
ಮಾಂಗಲ್ಯಂ ಹರಿನೀಲಕಾನ್ತಿಸುಗುಣಂ ಶ್ಲಾಧ್ಯಂ ಸುರಸ್ತ್ರೀಜನೈ-
ರ್ಯಸ್ಯಾ ಮಂಜುಲವೀಕ್ಷಣಂ ಸ್ಮರಹಾರಾಜಸ್ಯ ದೇವ್ಯಾ ರತೇಃ ।
ಓಷ್ಠಶೀರ್ವರಕುಂಕುಮಂ ಸ್ಮಿತಮಹೋ ಸ್ರಙ್ಮಾಧವೀ ಶಾಶ್ವತೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 68 ॥
ಚಿತ್ರಂ ಕಾಪಿ ಸುಧಾ ಶಿವೇತರಸುರಾಲಭ್ಯಾ ಹಿಮಾದ್ರ್ಯುದ್ಭವಾ
ದ್ರುಹ್ಯನ್ತೀ ಕುರುವಿನ್ದಮಾತ್ಮರುಚಿಭಿರ್ದೋಷಾಕರೋತ್ತಂಸಿನೀ ।
ಆಸ್ತೇ ಯಾ ಮದನಜ್ವರಂ ಶಶಿಭೃತಃ ಸಂಧುಕ್ಷಯನ್ತ್ಯನ್ವಹಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 69 ॥
ಅರ್ಧಂ ರಾಜ್ಯಮನನ್ಯಸಾಧ್ಯಮಖಿಲೈಶ್ಚರ್ಯಪ್ರದಂ ಶೂಲಿನಃ
ಶುದ್ಧಂ ಮೂರ್ತಿಮಯಂ ಯಯಾತಿವಿನಯೈಃ ಪ್ರಾಪ್ತಂ ತದನ್ಯತ್ ಪುನಃ ।
ವ್ಯಾಪ್ತುಂ ವಾಂಛತಿ ಗಾರುಡೋಪಲವಪುಃ ಕಾನ್ತ್ಯಾ ಮಹತ್ಯಾ ಪರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 70 ॥
ಅರ್ಧಂ ಸೋಮಕಲಾಧರೀ ಶಶಿಕಲಾಚೂಡಸ್ಯ ಯಾ ತ್ರ್ಯಮ್ಬಕ-
ಸ್ತ್ರ್ಯಕ್ಷಾಯಾ ಅಥವಾ ಸನಾತನತನೂ ಜಾಯಾಪತೀ ಶಾಶ್ವತೌ ।
ಏಕಂ ವೇತ್ಯವಧಾರಿತುಂ ಮುನಿವರಾ ಅದ್ಯಾಪ್ಯಲಂ ನಾದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 71 ॥
ದಾರಿದ್ರ್ಯಾಸ್ತಧರಾಧರೋಽಪಿ ಪರಮಂ ಭದ್ರೋದಯೋಽತ್ಯದ್ಭುತಂ
ಪಾಪಾರಣ್ಯದವಾನಲೋಽಪಿ ನಮತಾಂ ಕಾರುಣ್ಯಧಾರಾಧರಃ ।
ಯಾ ದುಹ್ಖಾಮ್ಬುದಮಾಲಿಕಾಪವನರಾಣ್ನೈಶ್ಚಲ್ಯರೂಪಾಸ್ತಿ ವೈ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 72 ॥
ಶ್ರೌತಂ ಮಾರ್ಗಮತೀತ್ಯ ಗಚ್ಛತಿ ಮುದಾ ಕಾಪಾಲಿಕಂ ದೃಕ್ ಪರಂ
ಮಧ್ಯಃ ಶೂನ್ಯಮತಂ ಗತೋಽತಿವಿಮಲೇ ದ್ವನ್ದ್ವೇ ಕುಚೌ ದ್ವೈತಿನೌ ।
ಸೌರೇ ಕುಂಡಲಯುಗ್ಮಮಾತ್ಮರುಚಿಭಿರ್ಯಸ್ಯಾಃ ಕೃಪಾ ಶಾಂಭವೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 73 ॥
ವಲ್ಲೀ ಕಾಪಿ ಶಿವಾಂಕಣೇ ಲಸತಿ ಯಾ ಮನ್ದಸ್ಮಿತೈಃ ಪುಷ್ಪಿತಾ
ತಾಮ್ಬೂಲೇನ ಸುಗನ್ಧಿತಾ ಸುಫಲಿತಾ ವಕ್ಷೋರುಹಾಭ್ಯಾಂ ಪರಮ್ ।
ಕಾನ್ತ್ಯಾ ಪಲ್ಲವಿತಾ ಕಚೈರ್ಭ್ರಮರಿತಾ ದೃಗ್ಭ್ಯಾಂ ಪರಂ ಪತ್ರಿತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 74 ॥
ಯಸ್ಯಾ ವೀಕ್ಷಣದೇಶಿಕಃ ಶ್ರುತಿಗತಿಸ್ತೇಜೋಮಯಃ ಸರ್ವವಿತ್
ಸಂತುಷ್ಟೋ ಜಿತಕಾಮಶತ್ರುರಣಿಮಾದ್ಯಷ್ಟಾಭಿರಾರಾಧಿತಾ ।
ಸಚ್ಚಿತ್ಸೌಖ್ಯರತಃ ಶಿವಂ ನಟಮಪಿ ಕ್ಷಿಪ್ರಂ ಕರೋತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 75 ॥
ಯಸ್ಯಾಶ್ಚಾರುಕಪೋಲದರ್ಪಣತಲೇ ದೃಷ್ಟ್ವಾ ಕಪರ್ದೀ ರುಷಾ
ಭೀತೋ ಜಹ್ನುಸುತಾಂ ಮೃದುಸ್ಮಿತಮಯೀಂ ಸಂಕೇತಮಿತ್ಥಂ ವ್ಯಧಾತ್ ।
ಮುಗ್ಧೇ ಗಚ್ಛ ನಿಜಸ್ಥಲಂ ದ್ರುತತರ್ಂ ಜಾಗರ್ತಿ ದೃಷ್ಟಿರ್ಯತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 76 ॥
ಶೃಂಗಾರೈಕರಸಂ ವಸನ್ತಸುಹೃದಂ ಕಂದರ್ಪದರ್ಪಪ್ರದಂ
ಚಿತ್ರಂ ಕೋಕನದಪ್ರಬೋಧನಕರಂ ಚನ್ದ್ರೋದಯಂ ಶ್ರೀಕರಮ್ ।
ಯಸ್ಯಾ ಹಾಸಮಯಂ ಚಿರಮಪ್ಯಾಸ್ತೇ ಪುರಾಣಃ ಶಿವಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 77 ॥
ಯಾ ಕಾಚಿತ್ ಪಿಕಕಾಮಿನೀ ಶ್ರುತಿಗತಿಃ ಸಪ್ತಸ್ವರಾಲಾಪಿನೀ
ನಿತ್ಯಂ ಮಾಧವಬೋಧಿನೀ ತ್ರಿಭುವನೇ ನಿಷ್ಪಕ್ಷಪಾತಾ ಸುಖಮ್ ।
ಚಿತ್ರಂ ಚೂತನವಪ್ರಸೂನವಿಶಿಖದ್ವೇಷ್ಯಾಶ್ರಯೇ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 78 ॥
ಯಸ್ಯಾ ವೀಕ್ಷಣಮಾನ್ತ್ರಿಕಃ ಸುಕೃತಿನಾಮಗ್ರೇಸರಃ ಶಂಕರೀ-
ಮನ್ತ್ರಾಮ್ಭೋನಿಧಿಪಾರಗಃ ಸ್ಮಿತವಿಭೂತ್ಯೋಚ್ಚಾಲಯನ್ ಸರ್ವದಾ ।
ದ್ವೇಷಂ ಶಂಕರಕರ್ತೃಕಂ ಸುಮಶರೇ ವಿಭ್ರಾಜತೇ ಶಾಶ್ವತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 79 ॥
ಯಸ್ಯಾ ದೃಗ್ರಮಣೀಮಣಿರ್ವಿವದತೇ ಕಾಮಾರಿಸಲ್ಲಾಪನೇ
ಸ್ವಾಧೀನಪ್ರಿಯಯಾ ಮೃದುಸ್ಮಿತಶರೀರಿಣ್ಯಾ ಪರಂ ಗಂಗಯಾ ।
ಆದ್ಯಾಹಂಶ್ರುತಿಮೂಲಗಾಧರಭವಾ ತ್ವಂ ಸ್ವೀಕೃತೇತಿ ಧ್ರುವಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 80 ॥
ಯಾ ಕಾಚಿದ್ ಭುಜಗೀ ಸದಾ ಸರಲಗಾ ಪೀಯೂಷದಾಯಿನ್ಯಹೋ
ಪದ್ಮಾರಣ್ಯವಿಹಾರಿಣೀ ಶ್ರುತಿಮತೀ ತೇಜಸ್ತನೂರ್ನಿರ್ಭಯಾ ।
ಜನ್ಮಾಬ್ಧಿಪ್ಲವವರ್ಧಿನೀ ವಶಯತಿ ಶ್ರೀನೀಲಕಂಠಂ ದೃಶಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 81 ॥
ಆಸ್ಯಾಮ್ಭೋಜಭವಾ ಪತಿಂ ನಿಜಮನಾದ್ಯನ್ತಂ ಕಟಾಕ್ಷಾತ್ಮಕಂ
ಪೃಚ್ಛನ್ತೀತಿ ಪಯೋನಿಧೇಃ ಸ್ಮಿತಮಯಾನ್ಮಜ್ಜನ್ಮ ಕಿಂ ವಾಮ್ಬುಜಾತ್ ।
ಯಸ್ಯಾ ನಿಃಸ್ಮರಸಂಪದಂ ಸುಧನಿಕಂ ಕರ್ತುಂ ಶಿವಂ ಕಾಂಕ್ಷತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 82 ॥
ಯಸ್ಯಾಃ ಪಾಣಿಪರಿಗ್ರಹೇ ಮೃದುತನೋರ್ಹೇಮಾದ್ರಿಧನ್ವಾ ಶಿವಃ
ಪಾದಾನ್ಯಾಸವಿಧೌ ದೃಷದ್ಯಪಿ ಸುರಸ್ತ್ರೀಣಾಂ ಪುರೋ ಲಜ್ಜಿತಃ ।
ಮನ್ದಾಕ್ಷಂ ಗತವಾನನಂಗಕಲಿಕಾಂ ಯಾಂ ವೀಕ್ಷಿತುಂ ನಾದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 83 ॥
ಯಸ್ಯಾಃ ಪಾದಕೇಶಶಯಶ್ರಿಯಮಹೋ ಶ್ರುತ್ವಾನಿಲಾದನ್ವಹಂ
ಗಾಂಗಾನ್ಯಮ್ಬುರುಹಾಣಿ ಹನ್ತ ಕತಿಚಿತ್ ಪ್ರಾಪ್ತುಂ ಪರಾಂ ತಾಂ ದ್ರುತಮ್ ।
ಪೀತ್ವಾ ಕ್ಷೀರಲವಂ ತಪನ್ತಿ ತಪನಂ ಪಶ್ಯನ್ತಿ ಮಜ್ಜನ್ತ್ಯಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 84 ॥
ನಿತ್ಯಂ ಸಂಧಿಮಪೇಕ್ಷತೇ ಸುಚರಿತಾ ದೂತೀ ಕಟಾಕ್ಷಾತ್ಮಿಕಾ
ರಾಜಸ್ಯಾಧರರಾಮಯಾಪಿ ನ ತಯಾ ಗರ್ಭೇ ವಹನ್ತ್ಯಾಮೃತಮ್ ।
ಕಾಮಾರೇ ರತಿಸಾತ್ತ್ವಿಕದ್ವಿಜಮಣೇರ್ಮೋದಾಯ ಸುಶ್ರೇಯಸೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 85 ॥
ಪಕ್ಷೇ ಶೈವಮನೋಮಹೀಭೃತಿ ಮನೋಜಾಗ್ನಿಂ ಧ್ರುವಂ ಸಾಧಯನ್
ಯಸ್ಯಾ ಮಂಜುಕಟಾಕ್ಷಧೂಮಶಿಶುನಾ ಶ್ರೌತೇನ ಸದ್ಧೇತುನಾ ।
ಓಷ್ಠದ್ವನ್ದ್ವಸಭಾನ್ತರೇ ಸ್ಮಿತಮಯೋ ನೈಯಾಯಿಕೋ ಭಾಸತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 86 ॥
ಯಾ ಪದ್ಮಂ ಹಿಮಶೈಲಜಂ ಮರತಕಂ ಭಾಸಾ ಭೃಶಂ ಭರ್ತ್ಸಯತ್
ಕಂದರ್ಪಸ್ಯ ಜ್ಯೇನ್ದಿರಾಜನಿಗೃಹಂ ನಿರ್ಹೇತುಕೋತ್ಫುಲ್ಲನಮ್ ।
ಸ್ಥಾಣೋರ್ಲೋಚನಭೃಂಗಸಂಭ್ರಮಕರಂ ಶೀತಾಂಶುಲೇಖಾಂಕಿತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 87 ॥
ಯಸ್ಯಾ ಮನ್ದಗತಿಃ ಪರಂ ಶುಭಗತಿಃ ಕಾಮಸ್ಯ ಕಾಮದ್ರುಹಃ
ಕಾಮೋದ್ರೇಕಗತಿಶ್ಚಿರಂ ಭಜನಕೃದ್ಧಂಸಾಂಗನಾಸಂತತೇಃ ।
ಕಾಮಂ ದತ್ತಗತಿಃ ಸದಾ ವಿಜಯತೇ ಹಂಸಾತ್ಮಿಕಾ ಯೋಗಿನಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 88 ॥
ನಿಃಸ್ನೇಹಾಪಿ ಶಿವಾತಿರಾಗಕಲಿತಾ ಯಾ ದೀಪಿಕಾ ಕಾಪ್ಯಹೋ
ಝಂಝಾಮಾರುತಭೀತಿದಾಪಿ ಚಪಲಾ ನಿಷ್ಕಲ್ಮಷಾ ಸಾಂಜನಾ ।
ತ್ರೈಲೋಕ್ಯೇಽಪಿ ವಿರಾಜತೇ ಶ್ರಿತವತೀ ಶ್ರೀಶಂಕರಾಂಕಂ ಧ್ರುವಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 89 ॥
ನಿರ್ಯತ್ನೈವ ಮಹಾಸತೀ ಸುಚರಿತಾ ಯಾ ಶೈಲರಾಜಾತ್ಮಜಾ
ನಾಥಂ ಲೋಕವಿಲಕ್ಷಣಂ ಪ್ರಹೃತವತ್ಯದ್ಯಾಪಿ ಸೇವಾಜನೇ ।
ಗಾಂಡೀವೇನ ವರಾಶ್ಮಭಿಶ್ಚ ಮುಸಲೇನೋಪಾನಹಾ ವರ್ತತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 90 ॥
ಯಸ್ಯಾಃ ಪಾದಕಿಸಾಲಯಪ್ರಭುವರಂ ಯಾಚನ್ತ್ಯಜಸ್ರಂ ಪರಂ
ಕಸ್ತೂರ್ಯಃ ಸುರಯೋಷಿತಾಂ ತಿಲಕಿತಾಃ ಸದ್ವಾಸನಾಂ ರಾಗಿತಾಮ್ ।
ಬಿಮ್ಬೋಷ್ಠಂ ಮೃದುತಾಂ ಶ್ರಿಯಂ ಚ ಯುಗಪದ್ಧಸ್ತಾಃ ಪ್ರವಾಲಪ್ರಿಯಾಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 91 ॥
ಯಸ್ಯಾಃ ಪಾದಸಹಸ್ರರಶ್ಮಿಚರಲಂ ಕಾಮಾರಿಚಿತ್ತಾತ್ಮಕಂ
ಹೈಮಂ ಭ್ರಾಮಯತಿ ಪ್ರಣಾಶಯತಿ ಸಂತಾಪಂ ಸತಾಮಂಕುರಮ್ ।
ಪ್ರಜ್ಞಾನಾತ್ಮಕಮದ್ಭುತಂ ಶಿಶಿರಯತ್ಯಕ್ಷೀಣ್ಯಲಂ ಪಶ್ಯತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 92 ॥
ಚಿತ್ರಂ ಯಾ ಕುರುತೇ ಮನೋಽಪಿ ಯಮಿನಾಂ ಬದ್ಧಂ ಮಹಾಯತ್ನತೋ
ಮುಕ್ತಂ ಶೋಣಪದಾರವಿನ್ದಯುಗಲೇ ನೀರಾಗಿಣಂ ರಾಗಿಣಮ್ ।
ಮಂಜೀರಸ್ವನಮನ್ಮಥಸ್ಮಿತರವೈಃ ಸಂಮೋಹನಂ ಶೂಲಿನಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 93 ॥
ಪಾದಾಮ್ಭೋಜರಜೋ ರಜಾಂಸಿ ಹರತಿ ಪ್ರೌಢಾನಿ ಯಸ್ಯಾ ನೃಣಾಂ
ಸತ್ತ್ವಂ ವರ್ಧಯತಿ ಪ್ರದರ್ಶಯತಿ ಸನ್ಮಾರ್ಗಂ ಸುರಾಣಾಮಪಿ ।
ಜನ್ಮವ್ಯಾಧಿಮೃತಿಪ್ರವಾಹಮತುಲಂ ಸಂರೋಧಯತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 94 ॥
ನಾಹಂ ವಿಶ್ವಮಿದಂ ಚರಾಚರಮಯಂ ಮಾಯಾವಿಲಾಸಾಸ್ಪದಂ
ದೃಶ್ಯತ್ವಾದಿತಿ ಶೋಧಯನ್ತಿ ಸುಧಿಯಃ ಸರ್ವಂ ಯಯಾ ಪ್ರಜ್ಞಯಾ ।
ಆತ್ಮೈವಾಯಮಿದಂ ವದನ್ತಿ ಪುನಸ್ತೂಷ್ಣೀಂಭವನ್ತಃ ಸ್ಥಿತಾಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 95 ॥
ರಾಹುಂ ನಿನ್ದತಿ ಚನ್ದ್ರಚೂಡಚಿಕುರೈಸ್ತಾಟಂಕಕಾನ್ತ್ಯಾ ರವಿಂ
ವಕ್ತ್ರಾಬ್ಜೇನ ವಿಧುಂ ಗುರುಂ ನತಗಿರಾ ಸೌಗ್ಯಂ ದೃಶಾ ಭದ್ರಯಾ ।
ಗತ್ಯಾ ಮನ್ದಮಹೋ ಕುಜಂ ತನುರುಚಾ ನಾಸಾಗ್ರಮಣ್ಯಾ ಕವಿಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 96 ॥
ನಿಃಶ್ರೇಣೀ ಕೃತಿನಾಂ ಪರಾಮೃತಫಲಪ್ರಾಪ್ತೌ ಪ್ರವಾಲದ್ಯುತಿ-
ರ್ಯಾ ನೀಲಾಂಜನಮಕ್ಷರಾತ್ಮಕನಿಧೇಃ ಸಂದರ್ಶನೇ ಶ್ರೀಮತಾಮ್ ।
ನಿತ್ಯಾನನ್ದರಸಾ ಪರೋಕ್ಷಕರಣೇ ಶ್ರೀದೇಶಿಕಶ್ರೀಕೃಪಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 97 ॥
ಯಾ ಕುಂಠೀಕುರುತೇ ನಿಜಸ್ತುತಿವಿಧೌ ಗರ್ವಾತ್ ಪ್ರವೃತ್ತಾಂ ಗಿರಂ
ವೇದಾನಾಮಪಿ ಗೀಷ್ಪತೇರಪಿ ಮಹಾಭಾಷ್ಯಾರ್ಥವಿಜ್ಞಾನಿನಃ ।
ದತ್ತೇ ವಾಗ್ಭವವೈಭವಾಮೃತಝರೀಂ ಮೂಕಾಜ್ಞಯೋರ್ವಾಗ್ಮಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 98 ॥
ಆದ್ಯಾಮಮ್ಬುರುಹೇಕ್ಷಣಾಮನುಪಮಾಮಾಪೀನತುಂಗಸ್ತನೀ-
ಮಾರ್ಯಾಮಾಗಮಸಾರಮೂರ್ತಿಮರುಣಾಮಾನನ್ದಚನ್ದ್ರಾನನಾಮ್ ।
ಸಾಧ್ವೀಂ ಸತ್ಕವಿವಾಗ್ಝರೀಂ ಸಮರಸಾನನ್ದಾಮೃತಸ್ಯನ್ದಿನೀಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ 99 ॥
ಗುರುಚರಣಸರೋಜಂ ಗುಪ್ತಗಂಗಾತರಂಗ-
ಸ್ತಿಮಿತಮಮಿತಶುಕ್ಲಜ್ಯೋತಿಷಾಂ ಜ್ಯೋತಿರೇಕಮ್ ।
ನಿರುಪಮಮಕರನ್ದಸ್ಪನ್ದಮಾನನ್ದಕನ್ದಂ
ನಿಧನಜನನಹೀನೋ ನಿರ್ಮಲೋಽಹಂ ನಿಷೇವೇ ॥ 100 ॥
ಶಾರ್ದೂಲವೃತ್ತಮಪಿ ಸಾಧು ಭವತ್ಯಹೋ ತತ್
ಸಾರಸ್ವತಂ ಸಮರಸಾಮೃತಲೋಚನಾನಾಮ್ ।
ಸದ್ಯೋ ಜಯತ್ಯಘರಿಪುಂ ಶ್ರುತಿಮಾರ್ಗಯೋಗಾತ್
ತ್ಯಾಗೇಶಸಾನ್ದ್ರಕರುಣಾದ್ಭುತಮೇವ ಭದ್ರಮ್ ॥ 101 ॥
ಇತ್ಯಾನನ್ದನಾಥಪಾದಪಪದ್ಮೋಪಜೀವಿನಾ ಕಾಶ್ಯಪಗೋತ್ರೋತ್ಪನ್ನೇನಾನ್ಧ್ರೇಣ
ತ್ಯಾಗರಾಜನಾಮ್ನಾ ವಿರಚಿತಂ ಸಂವಿಚ್ಛತಕಂ ಸಂಪೂರ್ಣಮ್