॥ Lord Siva Gitimala and Ashtapadi Gujarati Lyrics ॥
॥ પ્રથમઃ સર્ગઃ ॥
ધ્યાનશ્લોકાઃ –
સકલવિઘ્નનિવર્તક શઙ્કરપ્રિયસુત પ્રણતાર્તિહર પ્રભો ॥
મમ હૃદમ્બુજમધ્યલસન્મણીરચિતમણ્ડપવાસરતો ભવ ॥ ૧ ॥
વિધિવદનસરોજાવાસમાધ્વીકધારા
વિવિધનિગમવૃન્દસ્તૂયમાનાપદાના ।
સમસમયવિરાજચ્ચન્દ્રકોટિપ્રકાશા
મમ વદનસરોજે શારદા સન્નિધત્તામ્ ॥ ૨ ॥
યદનુભવસુધોર્મીમાધુરીપારવશ્યં
વિશદયતિ મુનીનાત્મનસ્તાણ્ડવેન ।
કનકસદસિ રમ્યે સાક્ષિણીવીક્ષ્યમાણઃ
પ્રદિશતુ સ સુખં મે સોમરેખાવતંસઃ ॥ ૩ ॥
શર્વાણિ પર્વતકુમારિ શરણ્યપાદે
નિર્વાપયાસ્મદઘસન્તતિમન્તરાયમ્ ।
ઇચ્છામિ પઙ્ગુરિવ ગાઙ્ગજલાવગાહ-
મિચ્છામિમાં કલયિતું શિવગીતિમાલામ્ ॥ ૪ ॥
શિવચરણસરોજધ્યાનયોગામૃતાબ્ધૌ
જલવિહરણવાઞ્છાસઙ્ગતં યસ્ય ચેતઃ ।
નિખિલદુરિતમભઙ્ગવ્યાપૃતં વા મનોજ્ઞં
પરશિવચરિતાખ્યં ગાનમાકર્ણનીયમ્ ॥ ૫ ॥
॥ પ્રથમાષ્ટપદી ॥
માલવીરાગેણ આદિતાલેન ગીયતે
(પ્રલયપયોધિજલે ઇતિવત્)
કનકસભાસદને વદને દરહાસં
નટસિ વિધાય સુધાકરભાસં
શઙ્કર ધૃતતાપસરૂપ જય ભવતાપહર ॥ ૧ ॥
જલધિમથનસમયે ગરલાનલશૈલં
વહસિ ગલસ્થમુદિત્વરકીલં
શઙ્કર ધૃતનીલગલાખ્ય જય ભવતાપહર ॥ ૨ ॥
વિધુરવિરથચરણે નિવસન્નવનિરથે
પુરમિષુણા હૃતવાનિતયોધે
શઙ્કર વર વીરમહેશ જય ભવતાપહર ॥ ૩ ॥
કુસુમશરાસકરં પુરતો વિચરન્તં
ગિરિશ નિહિંસિતવાનચિરં તં
શઙ્કર મદનારિપદાખ્ય જય ભવતાપહર ॥ ૪ ॥
વટતરુતલમહિતે નિવસન્મણિપીઠે
દિશસિ પરાત્મકલામતિગાઢે
શઙ્કર ધૃતમૌન ગભીર જય ભવતાપહર ॥ ૫ ॥
જલનિધિસેતુતટે જનપાવનયોગે
રઘુકુલતિલકયશઃ પ્રવિભાગે
શઙ્કર રઘુરામમહેશ જય ભવતાપહર ॥ ૬ ॥
તનુ ભૃદવનકૃતે વરકાશીનગરે
તારકમુપદિશસિ સ્થલસારે
શઙ્કર શિવ વિશ્વમહેશ જય ભવતાપહર ॥ ૭ ॥
નિગમરસાલતલે નિરવધિબોધઘન
શ્રીકામક્ષિકુચકલશાઙ્કન
શઙ્કર સહકારમહેશ જય ભવતાપહર ॥ ૮ ॥
કચ્છપતનુહરિણા નિસ્તુલભક્તિયુજા
સન્તતપૂજિતચરણસરોજ
શઙ્કર શિવ કચ્છપ લિઙ્ગ જય ભવતાપહર ॥ ૯ ॥
શઙ્કરવરગુરુણા પરિપૂજિતપાદ
કાઞ્ચિપુરે વિવૃતાખિલવેદ
શઙ્કર વિધુમૌલિમહેશ જય ભવતાપહર ॥ ૧૦ ॥
શ્રીવિધુમૌલિયતેરિદમુદિતમુદારં
શ્રૃણુ કરુણાભરણાખિલસારં
શઙ્કરારુણશૈલમહેશ જય ભવતાપહર ॥ ૧૧ ॥
શ્લોકઃ
કનકસભાનટાય હરિનીલગળાય નમ-
સ્ત્રિપુરહરાય મારરિપવે મુનિમોહભિદે ।
રઘુકૃતસેતવે વિમલકાશિજુષે ભવતે
નિગમરસાલ કૂર્મહરિપૂજિત ચન્દ્રધર ॥ ॥ ૬ ॥
પાપં વારયતે પરં ઘટયતે કાલં પરાકુર્વતે
મોહં દૂરયતે મદં શમયતે મત્તાસુરાન્ હિંસતે ।
મારં મારયતે મહામુનિગણાનાનન્દિનઃ કુર્વતે
પાર્વત્યા સહિતાય સર્વનિધયે શર્વાય તુભ્યં નમઃ ॥ ૭ ॥
॥ દ્વિતીયાષ્ટપદી ॥
ભૈરવીરાગેણ ત્રિપુટતાલેન ગીયતે
(શ્રિતકમલાકુચ ઇતિવત્)
કલિહરચરિતવિભૂષણ શ્રુતિભાષણ
કરતલવિલસિતશૂલ જય ભવતાપહર ॥ ૧ ॥
દિનમણિનિયુતવિભાસુર વિજિતાસુર
નલિનનયનકૃતપૂજ જય ભવતાપહર ॥ ૨ ॥
નિર્જિતકુસુમશરાસન પુરશાસન
નિટિલતિલકશિખિકીલ જય ભવતાપહર ॥ ૩ ॥
પદયુગવિનતાખણ્ડલ ફણિકુણ્ડલ
ત્રિભુવનપાવન પાદ જય ભવતાપહર ॥ ૪ ॥
અન્ધકદાનવદારણ ભવતારણ
સ્મરતનુભસિતવિલેપ જય ભવતાપહર ॥ ૫ ॥
હિમકરશકલવતંસક ફણિહંસક
ગગનધુનીધૃતશીલ જય ભવતાપહર ॥ ૬ ॥
પરમતપોધનભાવિત સુરસેવિત
નિખિલભુવનજનપાલ જય ભવતાપહર ॥ ૭ ॥
કરિમુખશરભવનન્દન કૃતવન્દન
શ્રૃણુશશિધરયતિગીતં જય ભવતાપહર ॥ ૮ ॥
શ્લોકઃ
તુહિનગિરિકુમારી તુઙ્ગવક્ષોજકુમ્ભ-
સ્ફુટદૃઢપરિરમ્ભશ્લિષ્ટ દિવ્યાઙ્ગરાગમ્ ।
ઉદિતમદનખેદસ્વેદમંસાન્તરં માં
અવતુ પરશુપાણેર્વ્યક્ત ગાઢાનુરાગમ્ ॥ ૮ ॥
વાસન્તિકાકુસુમકોમલદર્શનીયૈઃ
અઙ્ગૈરનઙ્ગવિહિતજ્વરપારવશ્યાત્ ।
કમ્પાતટોપવનસીમનિ વિભ્રમન્તીં
ગૌરિમિદં સરસમાહ સખી રહસ્યમ્ ॥ ૯ ॥
॥ તૃતીયાષ્ટપદી ॥
વસન્તરાગેણ આદિતાલેન ગીયતે
(લલિતલવઙ્ગલતા ઇતિવત્)
વિકસદમલકુસુમાનુસમાગમશીતલમૃદુલસમીરે
અતિકુલકલરવસમ્ભૃતઘનમદપરભૃતઘોષગભીરે
વિલસતિ સુરતરુસદસિ નિશાન્તે
વરયુવતિજનમોહનતનુરિહ શુભદતિ વિતતવસન્તે વિલસતિ ॥ ૧ ॥
કુસુમશરાસનશબરનિષૂદિતકુપિતવધૂધૃતમાને
ધનરસકુઙ્કુમપઙ્કવિલેપનવિટજનકુતુકવિધાને વિલસતિ ॥ ૨ ॥
કુસુમિતબાલરસાલમનોહરકિસલયમદનકૃપાણે
મધુકરમિથુનપરસ્પરમધુરસપાનનિયોગધુરીણે વિલસતિ ॥ ૩ ॥
મદનમહીપતિશુભકરમન્ત્રજપાયિતમધુકરઘોષે
અવિરલકુસુમમરન્દકૃતાભિનિષેચનતરુમુનિપોષે વિલસતિ ॥ ૪ ॥
મદનનિદેશનિવૃત્તકલેબરમર્દનમલયસમીરે
તુષિતમધુવ્રતસઞ્ચલદતિથિસુપૂજનમધુરસપૂરે વિલસતિ ॥ ૫ ॥
સુચિરકૃતવ્રતમૌનવનપ્રિયમુનિજનવાગનુકૂલે
લલિતલતાગૃહવિહૃતિકૃતશ્રમયુવતિસુખાનિલશીલે વિલસતિ ॥ ૬ ॥
વિષમશરાવનિપાલરથાયિતમૃદુલસમીરણજાલે
વિરહિજનાશયમોહનભસિતપરાગવિજૃમ્ભણકાલે વિલસતિ ॥ ૭ ॥
શ્રીશિવપૂજનયતમતિ ચન્દ્રશિખામણિયતિવરગીતં
શ્રીશિવચરણયુગસ્મૃતિસાધકમુદયતુ વન્યવસન્તં વિલસતિ ॥ ૮ ॥
શ્લોકઃ
વિકચકમલકમ્પાશૈવલિન્યાસ્તરઙ્ગૈઃ
અવિરલપરિરમ્ભઃ સમ્ભ્રમન્ મઞ્જરીણામ્ ।
પરિસરરસરાગૈર્વ્યાપ્તગાત્રાનુલેપો
વિચરતિ કિતવોઽયં મન્દમન્દં સમીરઃ ॥ ૯ ॥
॥ દ્વિતીયઃ સર્ગઃ ॥
શ્લોકઃ
પ્રગલ્ભતરભામિની શિવચરિત્ર ગાનામૃત-
પ્રભૂતનવમઞ્જરીસુરભિગન્ધિમન્દાનિલે ।
રસાલતરુમૂલગસ્ફુરિતમાધવી મણ્ડપે
મહેશમુપદર્શયન્ત્યસકૃદાહ ગૌરીમસૌ ॥
॥ ચતુર્થાષ્ટપદી ॥
રામક્રિયારાગેણ આદિતાલેન ગીયતે
(ચન્દનચર્ચિત ઇતિવત્)
અવિરલ કુઙ્કુમપઙ્કકરમ્બિતમૃગમદચન્દ્રવિલેપં
નિટિલ વિશેષકભાસુરવહ્નિવિલોચન કૃતપુરતાપં
શશિમુખિ શૈલવધૂતનયે વિલોકય હરમથ કેલિમયે શશિમુખિ ॥ ૧ ॥
યુવતિજનાશયમદનશરાયિતશુભતરનયન વિલાસં
ભુવનવિજૃમ્ભિતઘનતરતિમિરનિષૂદનનિજતનુ ભાસં શશિમુખિ ॥ ૨ ॥
પાણિ સરોજમૃગીપરિશઙ્કિતબાલતૃણાલિગલાભં
યૌવતહૃદયવિદારણપટુતરદરહસિતામિતશોભં શશિમુખિ ॥ ૩ ॥
ચરણસરોજલસન્મણિનૂપુરઘોષવિવૃતપદજાતં
ગગનધુનીસમતનુરુચિસંહતિકારિતભુવનવિભાતં શશિમુખિ ॥ ૪ ॥
નિખિલવધૂજનહૃદયસમાહૃતિપટુતરમોહનરૂપં
મુનિવરનિકરવિમુક્તિવિધાયકબોધવિભાવનદીપં શશિમુખિ ॥ ૫ ॥
વિકચસરોરુહલોચનસકૃદવલોકનકૃતશુભજાતં
ભુજગશિરોમણિશોણરુચા પરિભીતમૃગીસમુપેતં શશિમુખિ ॥ ૬ ॥
રજતમહીધરસદૃશમહાવૃષદૃષ્ટપુરોવનિભાગં
સનકસનન્દનમુનિપરિશોભિતદક્ષિણતદિતરભાગં શશિમુખિ ॥ ૭ ॥
શ્રીશિવપરિચરણવ્રતચન્દ્રશિખામણિ નિયમધનેન
શિવચરિતં શુભગીતમિદં કૃતમુદયતુ બોધઘનેન શશિમુખિ ॥ ૮ ॥
શ્લોકઃ
મદનકદનશાન્ત્યૈ ફુલ્લમલ્લી પ્રસૂનૈઃ
વિરચિતવરશય્યામાપ્નુવન્નિન્દુમૌલિઃ ।
મૃદુમલયસમીરં મન્યમાનઃ સ્ફુલિઙ્ગાન્
કલયતિ હૃદયે ત્વામન્વહં શૈલ કન્યે ॥ ૧૨ ॥
ઇતિ સહચરીવાણીમાકર્ણ્ય સાપિ સુધાઝરીં
અચલદુહિતા નેતુઃ શ્રુત્વાભિરૂપ્યગુણોદયમ્ ।
વિરહજનિતામાર્તિં દૂરીચકાર હૃદિ સ્થિતાં
દયિતનિહિતપ્રેમા કામં જગાદ મિથઃ સખીમ્ ॥ ૧૩ ॥
॥ પઞ્ચમાષ્ટપદી ॥
તોડિરાગેણ ચાપુતાલેન ગીયતે
(સઞ્ચરદધર ઇતિવત્)
જલરુહશિખરવિરાજિતહિમકરશઙ્કિતકરનખરાભં
રુચિરરદનકિરણામરસરિદિવ શોણનદાધર શોભં
સેવે નિગમરસાલનિવાસં – યુવતિમનોહરવિવિધવિલાસં સેવે ॥ ૧ ॥
શુભતનુસૌરભલોભવિભૂષણકૈતવમહિત ભુજઙ્ગં
મુકુટવિરાજિતહિમકરશકલવિનિર્ગલદમૃતસિતાઙ્ગં સેવે ॥ ૨ ॥
મકુટપરિભ્રમદમરધુનીનખવિક્ષતશઙ્કિત ચન્દ્રં
ઉરસિ વિલેપિતમલયજપઙ્કવિમર્દિતશુભતરચન્દ્રં સેવે ॥ ૩ ॥
પન્નગકર્ણવિભૂષણમૌલિગમણિરુચિ શોણકપોલં
અગણિતસરસિજસમ્ભવમૌલિકપાલનિવેદિત કાલં સેવે ॥ ૪ ॥
હરિદનુપાલસુરેશપદોન્નતિમુપનમતો વિતરન્તં
અનવધિમહિમચિરન્તનમુનિહૃદયેષુ સદા વિહરન્તં સેવે ॥ ૫ ॥
નારદપર્વતવરમુનિકિન્નરસન્નુત વૈભવ જાતં
અન્ધકસુરરિપુગન્ધસિન્ધુર વિભઙ્ગમૃગાદિપરીતં સેવે ॥ ૬ ॥
વિષયવિરતવિમલાશયકોશમહાધનચરણસરોજં
ઘનતરનિજતનુમઞ્જુલતાપરિ નિર્જિતનિયુત મનોજં સેવે ॥ ૭ ॥
શ્રીશિવ ભજન મનોરથચન્દ્રશિખામણિયતિવરગીતં
શ્રોતુમુદઞ્ચિતકૌતુકમવિરતમમરવધૂપરિ ગીતં સેવે ॥ ૮ ॥
શ્લોકઃ
સહચરિ મુખં ચેતઃ પ્રાતઃ પ્રફુલ્લસરોરુહ-
પ્રતિમમનઘં કાન્તં કાન્તસ્ય ચન્દ્રશિખામણેઃ ।
સ્મરતિ પરિતોદૃષ્ટિસ્તુષ્ટા તદાકૃતિમાધુરી-
ગતિવિષયિણી વાણી તસ્ય બ્રવીતિ ગુણોદયમ્ ॥ ૧૪ ॥
॥ ષષ્ટાષ્ટપદી ॥
કામ્ભોજિરાગેણ ત્રિપુટતાલેન ગીયતે
(નિભૃતનિકુઞ્જ ઇતિવત્)
નિખિલચરાચરનિર્મિતિકૌશલભરિતચરિત્ર વિલોલં
લલિતરસાલનિબદ્ધલતાગૃહવિહરણ કૌતુક શીલં
કલયે કાલમથનમધીશં
ઘટય મયા સહ ઘનતરકુચપરિરમ્ભણ કેલિકૃતાશં કલયે ॥ ૧ ॥
કુવલયસૌરભવદનસમીરણવસિતનિખિલદિગન્તં
ચરણસરોજવિલોકનતોઽખિલતાપરુજં શમયન્તં કલયે ॥ ૨ ॥
પટુતરચાટુવચોમૃતશિશિરનિવારિતમનસિજતાપં
તરુણવનપ્રિયભાષણયા સહ સાદરવિહિતસુલાપં કલયે ॥ ૩ ॥
ચલિતદૃગઞ્ચલમસમશરાનિવ યુવતિજને નિદધાનં
રહસિ રસાલગૃહં ગતયા સહ સરસવિહારવિધાનં કલયે ॥ ૪ ॥
દરહસિતદ્યુતિચન્દ્રિકયા ગતખેદ વિકારચકોરં
લસદરુણાધરવદનવશીકૃતયુવતિજનાશયચોરં કલયે ॥ ૫ ॥
મલયજપઙ્કવિલેપનમુરુતરકુચયુગમાકલયન્તં
કૃતકરુષો મમ સુતનુલતાપરિરમ્ભણકેળિમયન્તં કલયે ॥ ૬ ॥
સુરતરુકુસુમસુમાલિકયા પરિમણ્ડિતચિકુરનિકાયં
અલઘુપુલકકટસીમનિ મૃગમદપત્રવિલેખવિધેયં કલયે ॥ ૭ ॥
શ્રીશિવસેવનચન્દ્રશિખામણિયતિવરગીતમુદારં
સુખયતુ શૈલજયા કથિતં શિવચરિતવિશેષિતસારં કલયે ॥ ૮ ॥
શ્લોકઃ
લીલાપ્રસૂનશરપાશસૃણિપ્રકાણ્ડ-
પુણ્ડ્રેક્ષુભાસિકરપલ્લવમમ્બુજાક્ષમ્ ।
આલોક્ય સસ્મિતમુખેન્દુકમિન્દુમૌલિં
ઉત્કણ્ઠતે હૃદયમીક્ષિતુમેવ ભૂયઃ ॥ ૧૫ ॥
॥ તૃતીયઃ સર્ગઃ ॥
શ્લોકઃ
ઇતિ બહુ કથયન્તીમાલિમાલોક્ય બાલાં
અલઘુવિરહદૈન્યામદ્રિજામીક્ષમાણઃ ।
સપદિ મદનખિન્નઃ સોમરેખાવતંસઃ
કિમપિ વિરહશાન્ત્યૈ ચિન્તયામાસ ધીરઃ ॥ ૧૬ ॥
॥ સપ્તમાષ્ટપદી ॥
ભૂપાલરાગેણ ત્રિપુટતાલેન ગીયતે
(મામિયં ચલિતા ઇતિવત્)
શ્લોકઃ
લીલયા કલહે ગતા કપટક્રુધા વનિતેયં
માનિની મદનેન મામપિ સન્તનોતિ વિધેયમ્ ॥
શિવ શિવ કુલાચલસુતા ॥ ૧ ॥
તાપિતો મદનજ્વરેણ તનૂનપાદધિકેન
યાપયમિ કતં નુ તદ્વિરહં ક્ષણં કુતુકેન શિવ શિવ ॥ ૨ ॥
યત્સમાગમસમ્મદેન સુખી ચિરં વિહરામિ ।
યદ્વિયોગરુજા ન જાતુ મનોહિતં વિતનોમિ શિવ શિવ ॥ ૩ ॥
લીલયા કુપિતા યદા મયિ તામથાનુચરામિ ।
ભૂયસા સમયેન તામનુનીય સંવિહરામિ શિવ શિવ ॥ ૪ ॥
અર્પિતં શિરસિ ક્રુધા મમ હા યદઙ્ઘ્રિસરોજં
પાણિના પરિપૂજિતં બત જૃમ્ભમાણમનોજં શિવ શિવ ॥ ૫ ॥
દૃશ્યસે પુરતોઽપિ ગૌરિ ન દૃશ્યસે ચપલેવ ।
નાપરાધકથા મયિ પ્રણતં જનં કૃપયાવ શિવ શિવ ॥ ૬ ॥
નીલનીરદવેણિ કિં તવ મત્કૃતેઽનુનયેન ।
સન્નિધેહિ ન ગન્તુમર્હસિ માદૃશે દયનેન શિવ શિવ ॥ ૭ ॥
વર્ણિતં શિવદાસચન્દ્રશિખામણિશ્રમણેન ।
વૃત્તમેતદુદેતુ સન્તતં ઈશિતુઃ પ્રવણેન શિવ શિવ ॥ ૮ ॥
શ્લોકઃ
ભુવનવિજયી વિક્રાન્તેષુ ત્વમેવ ન ચેતરઃ
તવ ન કૃપણે યુક્તં માદૃગ્વિધે શરવર્ષણમ્ ।
મદન યદિ તે વૈરં નિર્યાતુ ભો નિયતં પુરા
વિહિતમહિતો નાહં નિત્યં તવાસ્મિ નિદેશગઃ ॥ ૧૭ ॥
મધુકરમયજ્યાઘોષેણ પ્રકમ્પયસે મનઃ
પરભૃતવધૂગાને કર્ણજ્વરં તનુષેતરામ્ ।
કુસુમરજસાં બૃન્દૈરુત્માદયસ્યચિરાદિતઃ
સ્મર વિજયસે વિશ્વં ચિત્રીયતે કૃતિરીદૃશી ॥ ૧૮ ॥
ચલિતલલિતાપાઙ્ગ શ્રેણીપ્રસારણકૈતવાત્
દરવિકસિતસ્વચ્છચ્છાયાસિતોત્પલવર્ષણૈઃ ।
વિરહશિખિના દૂનં દીનં ન મામભિરક્ષિતું
યદિ ન મનુષે જાનાસિ ત્વં મદીયદશાં તતઃ ॥ ૧૯ ॥
શુભદતિ વિચરાવઃ શુભ્રકમ્પાતટિન્યાસ્તટ
ભુવિ રમણીયોદ્યાનકેળિં ભજાવઃ ।
પ્રતિમુહુરિતિ ચિન્તાવિહ્વલઃ શૈલકન્યામભિ
શુભતરવાદઃ પાતુ ચન્દ્રાર્ધમૌલેઃ ॥ ૨૦ ॥
॥ ચતુર્થઃ સર્ગઃ ॥
શ્લોકઃ
કમ્પાતીરપ્રચુરરુચિરોદ્યાનવિદ્યોતમાન-
શ્રીમાકન્દદ્રુમપરિસર માધવીક્લૃપ્તશાલામ્ ।
અધ્યાસીનં રહસિ વિરહશ્રાન્તમશ્રાન્તકેલિં
વાચં ગૌરીપ્રિયસહચરી પ્રાહ ચન્દ્રાવતંસમ્ ॥ ૨૧ ॥
॥ અષ્ટમાષ્ટપદી ॥
સૌરાષ્ટ્રરાગેણ આદિતાલેન ગીયતે
(નિન્દતિ ચન્દનં ઇતિવત્)
યા હિ પુરા હર કુતુકવતી પરિહાસકથાસુ વિરાગિણી
અસિતકુટિલ ચિકુરાવળિ મણ્ડનશુભતરદામ નિરોધિની
શઙ્કર શરણમુપૈતિ શિવામતિહન્તિ સ શમ્બરવૈરી
શિવ વિરહકૃશા તવ ગૌરી ॥ ૧ ॥
કુસુમ શયનમુપગમ્ય સપદિ મદનશરવિસરપરિદૂના
મલયજરજસિ મહનલતતિમિવ કલયતિ મતિમતિદીના
શિવ વિરહકૃશા તવ ગૌરી ॥ ૨ ॥
ઉરસિરુચિરમણિહારલતાગતબલભિદુપલતતિનીલા
મઞ્જુવચનગૃહપઞ્જરશુકપરિભાષણપરિહૃતલીલા
શિવ વિરહકૃશા તવ ગૌરી ॥ ૩ ॥
ભૃશકૃતભવદનુભાવનયેક્ષિત ભવતિ વિહિતપરિવાદા
સપદિ વિહિત વિરહાનુગમનાદનુસમ્ભૃતહૃદય વિષાદા
શિવ વિરહકૃશા તવ ગૌરી ॥ ૪ ॥
બાલહરિણપરિલીઢપદા તદનાદરવિગત વિનોદા
ઉન્મદપરભૃતવિરુતાકર્ણનકર્ણશલ્યકૃતબાધા
શિવ વિરહકૃશા તવ ગૌરી ॥ ૫ ॥
કોકમિથુનબહુકેળિવિલોકનજૃમ્ભિતમદન વિકારા
શઙ્કરહિમકરશેખર પાલય મામિતિ વદતિ ન ધીરા
શિવ વિરહકૃશા તવ ગૌરી ॥ ૬ ॥
દૂષિતમૃગમદરુચિરવિશેષક નિટિલભસિકૃતરેખા
અતનુતનુજ્વરકારિતયા પરિવર્જિતચન્દ્રમયૂખા
શિવ વિરહકૃશા તવ ગૌરી ॥ ૭ ॥
શ્રીશિવચરણનિષેવણચન્દ્રશિખામણિયતિવરગીતં
શ્રીગિરિજાવિરહક્રમવર્ણનમુદયતુ વિનયસમેતં
શિવ વિરહકૃશા તવ ગૌરી ॥ ૮ ॥
શ્લોકઃ
આવાસમન્દિરમિદં મનુતે મૃડાની ઘોરાટવીસદૃશમાપ્તસખીજનેન ।
ના ભાષણાનિ તનુતે નલિનાયતાક્ષી દેવ ત્વયા વિરહિતા હરિણાઙ્કમૌલે ॥
॥ નવમાષ્ટપદી ॥
બિલહરિરાગેણ ત્રિપુટતાલેન ગીયતે
(સ્તનવિનિહત ઇતિવત્)
હિમકરમણિમયદામનિકાય કલયતિ વહ્નિશિખામુરસીયં
શૈલજા શિવ શૈલજા વિરહે તવ શઙ્કર શૈલજા ॥ ૧ ॥
વપુષિ પતિતઘનહિમકરપૂરં સન્તનુતે હૃદિ દિવિ દુરિતારં શૈલજા ॥ ૨ ॥
ઉરસિ નિહિતમૃદુ વિતતમૃણાલં પશ્યતિ સપદિ વિલસદળિનીલં શૈલજા ॥ ૩ ॥
સહચરયુવતિષુ નયનમનીલં નમિતમુખી વિતનોતિ વિશાલં શૈલજા ॥ ૪ ॥
રુષ્યતિ ખિદ્યતિ મુહુરનિદાનં ન પ્રતિવક્તિ સખીમપિ દીનં શૈલજા ॥ ૫ ॥
શિવ ઇતિ શિવ ઇતિ વદતિ સકામં પશ્યતિ પશુરિવ કિમપિ લલામં શૈલજા ॥ ૬ ॥
સુરતરુવિવિધફલામૃતસારં પશ્યતિ વિષમિવ ભૃશમતિઘોરં શૈલજા ॥ ૭ ॥
યતિવરચન્દ્રશિખામણિગીતં સુખયતુ સાધુજનં શુભગીતં શૈલજા ॥ ૮ ॥
શ્લોકઃ
ત્વદ્ભાવનૈકરસિકાં ત્વદધીનવૃત્તિં
ત્વન્નામસંસ્મરણસંયુતચિત્તવૃત્તિમ્ ।
બાલામિમાં વિરહિણીં કૃપણૈકબન્ધો
નોપેક્ષસે યદિ તદા તવ શઙ્કરાખ્યા ॥ ૨૩ ॥
વસ્તૂનિ નિસ્તુલગુણાનિ નિરાકૃતાનિ
કસ્તૂરિકારુચિરચિત્રકપત્રજાતમ્ ।
ઈદૃગ્વિધં વિરહિણી તનુતે મૃડાની
તામાદ્રિયસ્વ કરુણાભરિતૈરપાઙ્ગૈઃ ॥ ૨૪ ॥
॥ પઞ્ચમઃ સર્ગઃ ॥
શ્લોકઃ
એકામ્રમૂલવિલસન્નવમઞ્જરીક
શ્રીમાધવીરુચિરકુઞ્જગૃહેવસામિ ।
તામાનયાનુનય મદ્વચનેન ગૌરીમિત્થં
શિવેન પુનરાહ સખી નિયુક્તા ॥
॥ દશમાષ્ટપદી ॥
આનન્દભૈરવીરાગેણ આદિતાલેન ગીયતે
(વહતિ મલયસમીરે ઇતિવત્)
જયતિ મદનનૃપાલે શિવે કુપિતપથિક જાલં
ભ્રમરમિથુન જાલે શિવે પિબતિ મધુ સલીલં
વિરહરુજા પુરવૈરી પરિખિદ્યતિ ગૌરી શિવવિરહરુજા ॥ ૧ ॥
મલયમરુતિ વલમાને શિવે વિરહ વિઘટનાય
સતિ ચ મધુપગાને શિવે સરસવિહરણાય શિવ વિરહરુજા ॥ ૨ ॥
કુસુમભરિતસાલે શિવે વિતતસુમધુકાલે
કૃપણવિરહિજાલે શિવે કિતવહૃદનુકૂલે શિવવિરહરુજા ॥ ૩ ॥
મદનવિજયનિગમં શિવે જપતિ પિકસમૂહે
ચતુરકિતવસઙ્ગ (શિવે) કુટિલરવદુરૂહે શિવવિરહરુજા ॥ ૪ ॥
કુસુમરજસિ ભરિતે શિવે કિતવમૃદુળમરુતા
દિશિ ચ વિદિશિ વિતતે શિવે વિરહિવપુષિ ચરતા શિવવિરહરુજા ॥ ૫ ॥
વિમલતુહિનકિરણે શિવે વિકિરતિ કરજાલં
વિહૃતિવિરતિહરણે શિવે વિયતિ દિશિ વિશાલં શિવવિરહરુજા ॥ ૬ ॥
મૃદુલકુસુમશયને શિવે વપુષિ વિરહદૂને
ભ્રમતિ લુઠતિ દીને શિવે સુહિતશરણહીને શિવવિરહરુજા ॥ ૭ ॥
જયતિ ગિરિશમતિના શિવે ગિરિશવિરહકથનં
ચન્દ્રમકુટયતિના શિવે નિખિલકલુષમથનં શિવવિરહરુજા ॥ ૮ ॥
શ્લોકઃ
યત્રત્વામનુરઞ્જયન્નતિતરામારબ્ધકામાગમં
વ્યાપારૈરચલાધિરાજતનયે કેલીવિશેષૈર્યુતઃ ।
તત્ર ત્વામનુચિન્તયન્નથ ભવન્નામૈકતન્ત્રં જપન્
ભૂયસ્તત્પરિતમ્ભસમ્ભ્રમસુખં પ્રાણેશ્વરઃ કાઙ્ક્ષતિ ॥ ૨૬ ॥
॥ એકાદશાષ્ટપદી ॥
કેદારગૌળરાગેણ આદિતાલેન ગીયતે
(રતિસુખસારે ગતમભિસારે ઇતિવત્)
હિમગિરિતનયે ગુરુતરવિનયે નિયુતમદનશુભરૂપં
નિટિલનયનમનુરઞ્જય સતિ તવ વિરહજનિતઘનતાપમ્ ।
મલયજપવને કમ્પાનુવને વસતિ સુદતિ પુરવૈરી
યુવતિહૃદયમદમર્દનકુશલી સમ્ભૃત કેલિવિહારી । મલયજપવને ॥ ૧ ॥
વદ મૃદુ દયિતે મમ હૃદિ નિયતે બહિરિવ ચરસિ સમીપં
વદતિ મુહુર્મુહુરિતિ હર મામકદેહમદનઘનતાપમ્ । મલયજપવને ॥ ૨ ॥
ઉરુઘન સારં હિમજલ પૂરં વપુષિ પતિતમતિઘોરં
સપદિ ન મૃષ્યતિ શપતિ મનોભવમતિમૃદુમલય સમીરમ્ ।
મલયજપવને ॥ ૩ ॥
વિલિખતિ ચિત્રં તવ ચ વિચિત્રં પશ્યતિ સપદિ સમોદં
વદતિ ઝટિતિ બહુ મામિતિ શમ્બરરિપુરતિકલયતિ ખેદમ્ ।
મલયજપવને ॥ ૪ ॥
અર્પયનીલં મયિ ધૃતલીલં નયનકુસુમમતિલોલં
વિરહતરુણિ વિરહાતુરમનુભજ મામિહ (તિ) વિલપતિ સા (સોઽ) લમ્ ।
મલયજપવને ॥ ૫ ॥
લસદપરાધં મનસિજબાધં વિમૃશ વિનેતુમુપાયં
ગુરુતરતુઙ્ગપયોધરદુર્ગમપાનય હરમનપાયમ્ । મલયજપવને ॥ ૬ ॥
અતિધૃતમાને પરભૃતગાને કિઞ્ચિદુદઞ્ચય ગાનં
જહિ જહિ માનમનૂનગુણૈ રમયાશુ વિરહચિરદીનમ્ । મલયજપવને ॥ ૭ ॥
ઇતિ શિવવિરહં ઘનતરમોહં ભણતિ નિયમિજનધીરે
ચન્દ્રશિખામણિનામનિ કુશલમુપનય ગજવરચીરે । મલયજપવને ॥ ૮ ॥
શ્લોકઃ
વિમલ સલિલોદઞ્ચત્કમ્પાસરોરુહધોરણી-
પરિમલરજઃ પાલીસઙ્ક્રાન્તમન્દસમીરણે ।
વિતપતિ વિયદ્ગઙ્ગામઙ્ગીચકાર શિરઃ સ્થિતાં
તવ હિ વિરહાક્રાન્તઃ કાન્તઃ નતોઽપિ ન વેદિતઃ ॥ ૨૭ ॥
અનુભવતિ મૃગાક્ષી ત્વદ્વિયોગક્ષણાનાં
લવમિવ યુગકલ્પં સ્વલ્પમાત્માપરાધમ્ ।
ત્વયિ વિહિતમનલ્પં મન્યમાનઃ કથઞ્ચિત્
નયતિ સમયમેનં દેવિ તસ્મિન્પ્રસીદ ॥ ૨૮ ॥
ઇતિ સહચરીવાણીમેણાઙ્કમૌળિમનોભવ-
વ્યથનકથનીમેનામાકર્ણ્ય કર્ણસુધાઝરીમ્ ।
સપદિ મુદિતા વિન્યસ્યન્તી પદાનિ શનૈઃ શનૈઃ
જયતિ જગતાં માતા નેતુઃ પ્રવિશ્ય લતાગૃહમ્ ॥ ૨૯ ॥
સા દક્ષદેવનવિહારજયાનુષઙ્ગલીલાહવે ભવતિ શૈલજયા શિવસ્ય ।
ચેતઃ પ્રસાદમનયોસ્તરસા વિધાય દેવ્યા કૃતં કથયતિ સ્મ સખી રહસ્યમ્ ॥ ૩૦ ॥
॥ દ્વાદશાષ્ટપદી ॥
શઙ્કરાભરણરાગેણ ત્રિપુટતાલેન ગીયતે
(પશ્યતિ દિશિ દિશિ ઇતિવત્)
કલયતિ કલયતિ મનસિ ચરન્તં
કુચકલશસ્પૃશમયતિ ભવન્તમ્ ।
પાહિ વિભો શિવ પાહિ વિભો
નિવસતિ ગૌરી કેળિવને પાહિ વિભો ॥ ૧ ॥
જપતિ જપતિ તવ નામ સુમન્ત્રં
પ્રતિ મુહુરુદિતસુમાયુધતન્ત્રં પાહિ ॥ ૨ ॥
ઉપચિતકુસુમસુદામવહન્તી
ભવદનુચિન્તનમાકલયન્તી પાહિ ॥ ૩ ॥
મલયજરજસિ નિરાકૃતરાગા
વપુષિ ભસિત ધૃતિસંયતયોગા પાહિ ॥ ૪ ॥
પરિહૃતવેણિ જટાકચ ભારા
નિજપતિઘટકજનાશયધારા પાહિ ॥ ૫ ॥
અવિધૃતમણિમુકુટાદિલલામા
બિસવલયાદિવિધારણકામા પાહિ ॥ ૬ ॥
મુહુરવલોકિત કિસલયશયના
બહિરુપસઙ્ગત સુલલિત નયના પાહિ ॥ ૭ ॥
ઇતિ શિવ ભજનગુણેન વિભાન્તં
ચન્દ્રશિખામણિના શુભગીતમ્ ॥ પાહિ ॥ ૮ ॥
શ્લોકઃ
સા વીક્ષતે સહચરીં મદનેન લજ્જા-
ભારેણ નોત્તરવચો વદતિ પ્રગલ્ભા ।
વ્યાધૂન્વતિ શ્વસિતકોષ્ણસમીરણેન
તુઙ્ગસ્તનોત્તરપટં ગિરિજા વિયુક્તા ॥ ૩૧ ॥
॥ ષષ્ઠઃ સર્ગઃ ॥
શ્લોકઃ
અથ વિરહિણીમર્મચ્છેદાનુસમ્ભૃતપાતક-
શ્રિત ઇવ નિશાનાથઃ સઙ્ક્રાન્તનીલગુણાન્તરઃ ।
કિરણનિકરૈરઞ્ચત્કમ્પાસરિત્તટરમ્યભૂ-
વલયમભિતો વ્યાપ્ત્યા વિભ્રાજયન્પરિજૃમ્ભતે ॥ ૩૨ ॥
વિકિરતિ નિજકરજાલં હિમકરબિમ્બેઽપિ નાગતે કાન્તે ।
અકૃતકમનીયરૂપા સ્વાત્મગતં કિમપિ વદતિ ગિરિકન્યા ॥ ૩૩ ॥
॥ ત્રયોદશાષ્ટપદી ॥
આહિરિરાગેણ ઝમ્પતાલેન ગીયતે
(કથિતસમયેઽપિ ઇતિવત્)
સુચિરવિરહાપનય સુકૃતભિકામિતં
સફલયતિ કિમિહ વિધિરુત ન વિભવામિતં
કામિની કિમિહ કલયે સહચરીવઞ્ચિતાહં કામિની ॥ ૧ ॥
યદનુભજનેન મમ સુખમખિલમાયતં
તમનુકલયે કિમિહ નયનપથમાગતં કામિની ॥ ૨ ॥
યેન મલયજરેણુનિકરમિદમીરિતં
ન ચ વહતિ કુચયુગલમુરુ તદવધીરિતું કામિની ॥ ૩ ॥
યચ્ચરણપરિચરણમખિલફલદાયકં
ન સ્પૃશતિ મનસિ મમ હા તદુપનાયકં કામિની ॥ ૪ ॥
નિગમશિરસિ સ્ફુરતિ યતિમનસિ યત્પદમ્ ।
વિતતસુખદં તદપિ હૃદિ ન મે કિમિદં કામિની ॥ ૫ ॥
વિરહસમયેષુ કિલ હૃદિ યદનુચિન્તનમ્ ।
ન સ ભજતિ નયનપથમખિલભય કૃન્તનં કામિની ॥ ૬ ॥
કુચયુગલમભિમૃશતિ સ યદિ રતસૂચિતમ્ ।
સફલમિહ નિખિલગુણસહિતમપિ જીવિતં કામિની ॥ ૭ ॥
નિયમધનવિધુમૌળિફણિતમિદમઞ્ચિતમ્ ।
બહુજનિષુ કલુષભયમપનયતુ સઞ્ચિતં કામિની ॥ ૮ ॥
શ્લોકઃ
આજગ્મુષીં સહચરીં હરમન્તરેણ
ચિન્તાવિજૃમ્ભિતવિષાદભરેણ દીના ।
આલોક્ય લોકજનની હૃદિ સન્દિહાના
કાન્તં કયાભિરમિતં નિજગાદ વાક્યમ્ ॥ ૩૪ ॥
॥ ચતુર્દશાષ્ટપદી ॥
સારઙ્ગરાગેણ ત્રિપુટતાલેન ગીયતે
(સ્મરસમરોચિત ઇતિવત્)
કુસુમશરાહવસમુચિતરૂપા પ્રિયપરિરમ્ભણપરિહૃતતાપા
કાપિ પુરરિપુણા રમયતિ હૃદયમમિતગુણા કાપિ ॥ ૧ ॥
ઘનતરકુચયુગમૃગમદલેપા
દયિતવિહિતરતિનવ્યસુલાપા ॥ કાપિ ॥ ૨ ॥
રમણરચિતકટપત્રવિશેષા
ઉરસિલુલિતમણિહારવિભૂષા ॥ કાપિ ॥ ૩ ॥
દયિતનિપીતસુધાધરસીમા
ગલિતવસનકટિપરિહૃતદામા ॥ કાપિ ॥ ૪ ॥
અધિગતમૃદુતરકિસલયશયના
દરપરિમીલિતચાલિતનયના ॥ કાપિ ॥ ૫ ॥
વિહિતમધુરરતિકૂજિતભેદા
દૃઢપરિરમ્ભણહતમેતિ ભેદા ॥ કાપિ ॥ ૬ ॥
મહિત મહોરસિ સરભસપતિતા
લુલિતકુસુમકુટિલાલકમુદિતા ॥ કાપિ ॥ ૭ ॥
ચન્દ્રશિખામણિયતિવરભણિતમ્ ।
સુખયતુ સાધુજનં શિવચરિતમ્ ॥ કાપિ ॥ ૮ ॥
॥ સપ્તમઃ સર્ગઃ ॥
શ્લોકઃ
ચકોરાણાં પ્રીતિં કલયસિ મયૂખૈર્નિજકલા-
પ્રદાનૈર્દેવાનમપિ દયિતભાજાં મૃગદૃશામ્ ।
ન કોકાનાં રાકાહિમકિરણ માદૃગ્વિરહિણી-
જનાનાં યુક્તં તે કિમિદમસમં હન્ત ચરિતમ્ ॥ ૩૫ ॥
ગઙ્ગામઙ્ગનિષઙ્ગિપઙ્કજરજોગન્ધાવહામઙ્ગનાં
આશ્લિષ્યન્નિભૃતં નિરઙ્કુશરહઃ કેળીવિશેષૈરલમ્ ।
વિભ્રાન્તઃ કિમદભ્રરાગભરિતસ્તસ્યામુત સ્યાદયં
કાન્તોઽશ્રાન્તમનઙ્ગનાગવિહતો નાભ્યાશમભ્યાગતઃ ॥ ૩૬ ॥
સન્તાપયન્નખિલગાત્રમમિત્રભાવાત્
સન્દૃશ્યતે જડધિયામિહ શીતભાનુઃ ।
દોષાકરો વપુષિ સઙ્ગતરાજયક્ષ્મા
ઘોરાકૃતિર્હિ શિવદૂતિ નિશાચરાણામ્ ॥ ૩૭ ॥
॥ પઞ્ચદશાષ્ટપદી ॥
સાવેરિરાગેણ આદિતાલેન ગીયતે
(સમુદિતવદને ઇતિવત્)
વિરહિતશરણે રમણીચરણે વિજિતારુણપઙ્કજે
અરુણિમરુચિરં કલયતિ સુચિરં મતિમિવ વપુષિ નિજે
રમતે કમ્પામહિતવને વિજયી પુરારિજને ॥ રમતે ॥ ૧ ॥
અલિકુલવલિતે પરિમળલલિતે યુવતિકુટિલાલકે
કલયતિ કુસુમં વિલસિતસુષુમં સુમશરપરિપાલકે ॥ રમતે ॥ ૨ ॥
કુચગિરિયુગલે નિજમતિનિગલે મૃગમદરચનાકરે
મણિસરનિકરં વિલસિતમુકુરં ઘટયતિ સુમનોહરે ॥ રમતે ॥ ૩ ॥
વિલસિતરદને તરુણીવદને કિસલયરુચિરાધરે
રચયતિ પત્રં મકરવિચિત્રં સ્મિતરુચિપરિભાસુરે ॥ રમતે ॥ ૪ ॥
કટિતટભાગે મનસિજયોગે વિગળિતકનકામ્બરે
મણિમયરશનં રવિરચિવસનં ઘટયતિ તુહિનકરે ॥ રમતે ॥ ૫ ॥
અધરસુધાળિં રુચિરરદાલિં પિબતિ સુમુખશઙ્કરે
વિદધતિ મધુરં હસતિ ચ વિધુરં રતિનિધિનિહિતાદરે ॥ રમતે ॥ ૬ ॥
મૃદુલસમીરે વલતિ ગભીરે વિલસતિ તુહિનકરે
ઉદિતમનોજં વિકસદુરોજં શિવરતિવિહિતાદરે ॥ રમતે ॥ ૭ ॥
ઇતિ રસવચને શિવનતિ રચને પુરહરભજનાદરે
બહુજનિકલુષં નિરસતુ પરુષં યતિવરવિધુશેખરે ॥ રમતે ॥ ૮ ॥
શ્લોકઃ
આયાતવાનિહ ન ખેદપરાનુષઙ્ગ-
વાઞ્છાભરેણ વિવશસ્તરુણેન્દુમૌલિઃ ।
સ્વચ્છ્ન્દમેવ રમતાં તવ કોઽત્ર દોષઃ
પશ્યાચિરેણ દયિતં મદુપાશ્રયસ્થમ્ ॥ ૩૮ ॥
॥ અષ્ટમઃ સર્ગઃ ॥
શ્લોકઃ
મત્પ્રાણનેતુરસહાયરસાલમૂલ-
લીલાગૃહસ્ય મયિ ચેદનુરાગબન્ધઃ ।
અન્યાકથાનુભવિનઃ પ્રણયાનુબન્ધો
દૂતિ પ્રસીદતિ મમૈષ મહાનુભાવઃ ॥
॥ ષોડશાષ્ટપદી ॥
પુન્નાગવરાલી રાગેણ આદિતાલેન ગીયતે
(અનિલતરલકુવલયનયનેન ઇતિવત્)
અરુણકમલશુભતરચરણેન સપદિ ગતા ન હિ ભવતરણેન ।
યા વિહૃતા પુરવૈરિણા ॥ ૧ ॥
સ્મિતરુચિહિમકરશુભવદનેન નિહિતગુણા વિલસિતસદનેન ।
યા વિહૃતા પુરવૈરિણા ॥ ૨ ॥
સરસવચનજિતકુસુમરસેન હૃદિ વિનિહિતરતિકૃતરભસેન ।
યા વિહૃતા પુરવૈરિણા ॥ ૩ ॥
વિહિત વિવિધકુસુમશરવિહૃતે નાનાગતરસા નયગુણ વિહિતેન ।
યા વિહૃતા પુરવૈરિણા ॥ ૪ ॥
ઉદિતજલજરુચિરગળેન સ્ફુટિતમના ન યુવતિનિગળેન ।
યા વિહૃતા પુરવૈરિણા ॥ ૫ ॥
કનકરુચિરસુજટાપટલેનાનુહતસુખાસતિલકનિટિલેન ।
યા વિહૃતા પુરવૈરિણા ॥ ૬ ॥
નિખિલયુવતિમદનોદયનેન જ્વરિતમાના ન વિરહદહનેન ।
યા વિહૃતા પુરવૈરિણા ॥ ૭ ॥
તુહિનકિરણધરયતિરચનેન સુખયતુ માં શિવહિતવચનેન ।
યા વિહૃતા પુરવૈરિણા ॥ ૮ ॥
શ્લોકઃ
અયિ મલયસમીર ક્રૂર ભાવોરગાણાં
શ્વસિતજનિત કિં તે માદૃશીહિંસનેન ।
ક્ષણમિવ સહકારાદીશગાત્રાનુષઙ્ગ-
ઉપહૃતપરિમલાત્મા સન્નિધેહિ પ્રસન્નઃ ॥ ૪૦ ॥
॥ નવમઃ સર્ગઃ ॥
શ્લોકઃ
ઇત્થં રુષા સહચરીં પરુષં વદન્તી
શૈલાધિરાજતનુજા તનુજાતકાર્શ્યા ।
નીત્વા કથં કથમપિ ક્ષણદાં મહેશઃ
માગઃ પ્રશાન્તિ વિનતં કુટિલં બભાષે ॥ ૪૧ ॥
॥ સપ્તદશાષ્ટપદી ॥
આરભીરાગેણ ત્રિપુટતાલેન ગીયતે
(રજનિજનિતગુરુ ઇતિવત્)
ચતુરયુવતિસુરતાદર જાગરિતારુણમધૃતવિલાસં
નિટિલનયન નયનદ્વિતયં તવ કથયતિ તદભિનિવેશમ્ ।
પાહિ તામિહ ફાલલોચન યા તવ દિશતિ વિહારં
ગરળમિલિતધવલામૃતમિવ હરમાગમવચનમસારં પાહિ ॥
ગુરુતરકુચપરિરમ્ભણસમ્ભૃતકુઙ્કુમપઙ્કિલહારં
સ્મરતિ વિશાલમુરો વિશદં તવ રતિરભસાદનુરાગં પાહિ ॥ ૨ ॥
રતિપતિસમરવિનિર્મિત નિશિતનખક્ષતચિહ્નિતરેખં
વપુરિદમળિકવિલોચન લસદિવ રતિભરકૃતજયરેખં પાહિ ॥ ૩ ॥
રદનવસનમરુણમિદં તવ પુરહર ભજતિ વિરાગં
વિગલિતહિમકરશકલમુદઞ્ચિતદર્શિતરતિભરવેગં પાહિ ॥ ૪ ॥
યુવતિપદસ્થિતયાવકરસપરિચિન્તિતરતિકમનીયં
વિલસતિ વપુરિદમલઘુબહિર્ગતમયતિ વિરાગમમેયં પાહિ ॥ ૫ ॥
યુવતિકૃતવ્રણમધરગતં તવ કલયતિ મમ હૃદિ રોષં
પ્રિયવચનાવસરેઽપિ મયા સહ સ્ફુટયતિ તત્પરિતોષં પાહિ ॥ ૬ ॥
સુરતરુસુમદામનિકાયનિબદ્ધજટાવલિવલયમુદારં
કિતવમનોભવસઙ્ગરશિથિલિતમનુકથયતિ સુવિહારં પાહિ ॥ ૭ ॥
ઇતિ હિમગિરિકુલદીપિકયા કૃતશિવપરિવદનવિધાનં
સુખયતુ બુધજનમીશનિષેવણયતિવરવિધુશેખરગાનં પાહિ ॥ ૮ ॥
શ્લોકઃ
ઈદૃગ્વિધાનિ સુબહૂનિ તવ પ્રિયાયાં
ગાઢાનુરાગકૃતસઙ્ગમલાઞ્છિતાનિ ।
સાક્ષદવેક્ષિતવતીમિહ મામુપેત્ય
કિં ભાષસે કિતવશેખર ચન્દ્રમૌળે ॥ ૪૨
॥ દશમઃ સર્ગઃ ॥
શ્લોકઃ
તામુદ્યતપ્રસવબાણવિકારખિન્નાં
સઞ્ચિન્ત્યમાનશશિમૌલિચરિત્રલીલામ્ ।
બાલાં તુષારગિરિજાં રતિકેલિભિન્નાં
આળિઃ પ્રિયાથ કલહાન્તરિતામુવાચ ॥ ૪૩ ॥
॥ અષ્ટાદશાષ્ટપદી ॥
યદુકુલકામ્ભોજિરાગેણ આદિતાલેન ગીયતે
(હરિરભિસરતિ ઇતિવત્)
પુરરિપુરભિરતિમતિ હૃદિ તનુતે
ભવદુપગૂહનમિહ બહુ મનુતે ।
શઙ્કરે હે શઙ્કરિ મા ભજ
માનિનિ પરિમાનમુમે શઙ્કરે ॥ ૧ ॥
મૃગમદરસમય ગુરુકુચયુગલે
કલયતિ પુરરિપુરથ મતિ નિગલે ॥ શઙ્કરે ॥ ૨ ॥
સુચિરવિરહભવમપહર કલુષં
ભવદધરામૃતમુપહર નિમિષં ॥ શઙ્કરે ॥ ૩ ॥
સરસ નિટિલકૃતચિત્રકરુચિરં
તવ વદનં સ ચ કલયતિ સુચિરં ॥ શઙ્કરે ॥ ૪ ॥
વિભુરયમેષ્યતિ શુભતરમનસા
તદુરસિ કુચયુગમુપકુરુ સહસા ॥ શઙ્કરે ॥ ૫ ॥
સકુસુમનિકરમુદઞ્ચય ચિકુરં
સુદતિ વિલોકય મણિમય મુકુરં ॥ શઙ્કરે ॥ ૬ ॥
શ્રૃણુ સખિ શુભદતિ મમ હિતવચનં
ઘટય જઘનમપિ વિગલિતરશનં ॥ શઙ્કરે ॥ ૭ ॥
શ્રીવિધુશેખરયતિવરફણિતં
સુખયતુ સાધુજનં શિવચરિતં ॥ શઙ્કરે ॥ ૮ ॥
મહાદેવે તસ્મિન્પ્રણમતિ નિજાગઃ શમયિતું
તદીયં મૂર્ધાનં પ્રહરસિ પદાભ્યાં ગિરિસુતે ।
સ એષ ક્રુદ્ધશ્ચેત્તુહિનકિરણં સ્થાપયતિ ચેત્
મૃદૂન્યઙ્ગાન્યઙ્ગારક ઇવ તનોત્યેષ પવનઃ ॥ ૪૪ ॥
॥ એકાદશઃ સર્ગઃ ॥
ઇત્થં પ્રિયાં સહચરીં ગિરમુદ્ગિરન્તીં
ચિન્તાભરેણ ચિરમીક્ષિતુમપ્યધીરા ।
ગૌરી કથઞ્ચિદભિમાનવતી દદર્શ
કાન્તં પ્રિયાનુનયવાક્ય મુદીરયન્તમ્ ॥ ૪૫ ॥
બાલે કુલાચલકુમારિ વિમુઞ્ચ રોષં
દોષં ચ મય્યધિગતં હૃદયે ન કુર્યાઃ ।
શક્ષ્યામિ નૈવ ભવિતું ભવતીં વિનાહં
વક્ષ્યામિ કિં તવ પુરઃ પ્રિયમન્યદસ્માત્ ॥ ૪૬ ॥
॥ એકોનવિંશાષ્ટપદી ॥
મુખારિ રાગેણ ઝમ્પતાલેન ગીયતે
(વદસિ યદિ કિઞ્ચિદપિ ઇતિવત્)
ભજસિ યદિ મયિ રોષમરુણવારિરુહાક્ષિ
કિમિહ મમ શરણમભિજાતં
શરણમુપયાયતવતિ કલુષપરિભાવનં
ન વરમિતિ સતિ સુજનગીતં શિવે શૈલકન્યે
પઞ્ચશરતપનમિહ જાતં
હરકમલશીતલં સરસનયનાઞ્ચલં
મયિ કલય રતિષુ કમનીયં શિવે શૈલકન્યે ॥ ૧ ॥
સ્પૃશસિ યદિ વપુરરુણકમલસમપાણિના
ન સ્પૃશસિ તપનમનિવારં
દરહસિતચન્દ્રકરનિકરમનુષઞ્જયસિ
યદિ મમ ચ હૃદયમતિધીરં શિવે શૈલકન્યે ॥ ૨ ॥
કુસુમદામચયેન મમ જટાવલિજૂટનિચયમયિ સુદતિ સવિલાસં
સપદિ કલયામિ વલયાકૃતિસરોજવનસુરસરિતમુપહસિતભાસમ્
શિવે શૈલકન્યે ॥ ૩ ॥
અમલમણિહારનિકરેણ પરિભૂષયસિ
પૃથુલ કુચયુગલ મતિભારમ્ ।
તુહિનગરિશિખરાનુગળિતસુરનિમ્નગા
સુગળસમભાવસુગભીરમ્ શિવે શૈલકન્યે ॥ ૪ ॥
વિકસદસિતામ્બુરુહવિમલનયના-
ઞ્ચલૈરુપચરસિ વિરહપરિદૂનમ્ ।
સફલમિહ જીવિતં મમ સુદતિ કોપને
વિસૃજ મયિ સફલમતિમાનમ્ શિવે શૈલકન્યે ॥ ૫ ॥
ભવદધર મધુ વિતર વિષમશરવિકૃતિ-
હરમયિ વિતર રતિનિયતભાનં
સ્ફુયમદપરાધશતમગણનીયમિહ
વિમૃશ ભવદનુસૃતિવિધાનં શિવે શૈલકન્યે ॥ ૬ ॥
કુપિતહૃદયાસિ મયિ કલય ભુજબન્ધને
કુરુ નિશિતરદનપરિપાતં
ઉચિતમિદમખિલં તુ નાયિકે સુદતિ મમ
શિક્ષણં સ્વકુચગિરિપાતં શિવે શૈલકન્યે ॥ ૭ ॥
ઇતિ વિવિધવચનમપિ ચતુરપુરવૈરિણા
હિમશિખરિજનુષમભિરામં
શિવભજનનિયતમતિયતિચન્દ્રમૌલિના
ફણિતમપિ જયતુ ભુવિ કામં શિવે શૈલકન્યે ॥ ૮ ॥
શ્લોકઃ
સુચિર વિરહાક્રાન્તં વિભ્રાન્તચિત્તમિતસ્તતઃ
સ્મરપરવશં દીનં નોપેક્ષસે યદિ માં પ્રિયે ।
અહમિહ ચિરં જીવન્ભાવત્કસેવનમાદ્રિયે
યદપકરણં સર્વં ક્ષન્તવ્યમદ્રિકુમારિકે ॥ ૪૭ ॥
॥ દ્વાદશઃ સર્ગઃ ॥
શ્લોકઃ
ઇતિ વિરહિતામેનાં ચેતઃ પ્રસાદવતીં શિવાં
અનુનયગિરાં ગુમ્ફૈઃ સમ્ભાવયન્નિજપાણિના ।
ઝટિતિ ઘટયન્મન્દસ્મેરસ્તદીયકરામ્બુજં
હિમકરકલામૌલિઃ સંપ્રાપ કેલિલતાગૃહમ્ ॥ ૪૮ ॥
સંપ્રાપ્ય કેળીગૃહમિન્દુમૌલિઃ ઇન્દીવરાક્ષીમનુવીક્ષમાણઃ ।
જહૌ રહઃ કેલિકુતૂહલેન વિયોગજાર્તિં પુનરાબભાષે ॥ ૪૯ ॥
॥ વિંશાષ્ટપદી ॥
ઘણ્ટારાગેણ ઝમ્પતાલેન ગીયતે
(મઞ્જુતરકુઞ્જતલ ઇતિવત્)
પૃથુલતરલલિતકુચયુગલમયિ તે
મૃગમદરસેન કલયામિ દયિતે ।
રમય બાલે ભવદનુગમેનં ॥ રમય બાલે ॥ ૧ ॥
વિધુશકલરુચિરમિદમલિકમયિ તે
શુભતિલકમભિલસતુ કેલિનિયતે ॥ રમય બાલે ॥ ૨ ॥
ઇહ વિહર તરુણિ નવ કુસુમશયને
ભવદધરમધુ વિતર મકરનયને ॥ રમય બાલે ॥ ૩ ॥
અયિ સુચિરવિરહરુજમપહર શિવે
સરસમભિલપ રમણિ પરભૃતરવે ॥ રમય બાલે ॥ ૪ ॥
કલય મલયજપઙ્કમુરસિ મમ તે
કઠિનકુચયુગમતનુ ઘટય લલિતે ॥ રમય બાલે ॥ ૫ ॥
ઇદમમરતરુકુસુમનિકરમયિ તે
ઘનચિકુરમુપચરતુ સપદિ વનિતે ॥ રમય બાલે ॥ ૬ ॥
દરહસિતવિધુકરમુદઞ્ચય મનો-
ભવતપનમપનુદતુ વિલસિતઘને ॥ રમય બાલે ॥ ૭ ॥
શિવચરણપરિચરણયતવિચારે
ફણતિ હિમકરમૌળિનિયમિધીરે ॥ રમય બાલે ॥ ૮ ॥
શ્લોકઃ
ઈદૃગ્વિધૈશ્ચટુલચાટુવચોવિલાસૈઃ
ગાઢોપગૂહનમુખામ્બુજચુમ્ભનાદ્યૈઃ ।
આહ્લાદયન્ ગિરિસુતામધિકાઞ્ચિ નિત્યં
એકામ્રમૂલવસતિર્જયતિ પ્રસન્નઃ ॥ ૫૦ ॥
વિદ્યાવિનીતજયદેવકવેરુદાર-
ગીતિપ્રબન્ધસરણિપ્રણિધાનમાત્રાત્ ।
એષા મયા વિરચિતા શિવગીતિમાલા
મોદં કરોતુ શિવયોઃ પદયોજનીયા ॥ ૫૧ ॥
અવ્યક્તવર્ણમુદિતેન યથાર્ભકસ્ય
વાક્યેન મોદભરિતં હૃદયં હિ પિત્રોઃ ।
એકામ્રનાથ ભવદઙ્ઘ્રિસમર્પિતેયં
મોદં કરોતુ ભવતઃ શિવગીતિમાલા ॥ ૫૨ ॥
ગુણાનુસ્યૂતિરહિતા દોષગ્રન્થિવિદૂષિતા ।
તથાપિ શિવગીતિર્નો માલિકા ચિત્રમીદૃશી ॥ ૫૩ ॥
ૐ નમઃ શિવાયૈ ચ નમઃ શિવાય
ઇતિ શ્રીચન્દ્રશેખરેન્દ્રસરસ્વતીવિરચિતા શિવગીતિમાલા
અથવા શિવાષ્ટપદી સમાપ્તા ।
॥ શુભમસ્તુ ॥
– Chant Stotra in Other Languages –
Sri Shiva Gitimala – Shiva Ashtapadi Lyrics in Sanskrit » English » Bengali » Kannada » Malayalam » Odia » Telugu » Tamil