॥ Shiva Upanishads Malayalam Lyrics ॥
॥ ശ്രീശിവോപനിഷത് ॥
കൈലാസശിഖരാസീനമശേഷാമരപൂജിതം ।
കാലഘ്നം ശ്രീമഹാകാലമീശ്വരം ജ്ഞാനപാരഗം ॥ 1-1 ॥
സമ്പൂജ്യ വിധിവദ്ഭക്ത്യാ ഋഷ്യാത്രേയഃ സുസംയതഃ ।
സർവഭൂതഹിതാർഥായ പപ്രച്ഛേദം മഹാമുനിഃ ॥ 1-2 ॥
ജ്ഞാനയോഗം ന വിന്ദന്തി യേ നരാ മന്ദബുദ്ധയഃ ।
തേ മുച്യന്തേ കഥം ഘോരാദ്ഭഗവൻഭവസാഗരാത് ॥ 1-3 ॥
ഏവം പൃഷ്ടഃ പ്രസന്നാത്മാ ഋഷ്യാത്രേയേണ ധീമതാ ।
മന്ദബുദ്ധിവിമുക്ത്യർഥം മഹാകാലഃ പ്രഭാഷതേ ॥ 1-4 ॥
മഹാദേവ ഉവാച
പുരാ രുദ്രേണ ഗദിതാഃ ശിവധർമാഃ സനാതനാഃ ।
ദേവ്യാഃ സർവഗണാനാം ച സങ്ക്ഷേപാദ്ഗ്രന്ഥകോടിഭിഃ ॥ 1-5 ॥
ആയുഃ പ്രജ്ഞാം തഥാ ശക്തിം പ്രസമീക്ഷ്യ നൄണാമിഹ ।
താപത്രയപ്രപീഡാം ച ഭോഗതൃഷ്ണാവിമോഹിനീം ॥ 1-6 ॥
തേ ധർമാഃ സ്കന്ദനന്ദിഭ്യാമന്യൈശ്ച മുനിസത്തമൈഃ ।
സാരമാദായ നിർദിഷ്ടാഃ സമ്യക്പ്രകരണാന്തരൈഃ ॥ 1-7 ॥
സാരാദപി മഹാസാരം ശിവോപനിഷദം പരം ।
അൽപഗ്രന്ഥം മഹാർഥം ച പ്രവക്ഷ്യാമി ജഗദ്ധിതം ॥ 1-8 ॥
ശിവഃ ശിവ ഇമേ ശാന്ത- നാമ ചാദ്യം മുഹുർമുഹുഃ ।
ഉച്ചാരയന്തി തദ്ഭക്ത്യാ തേ ശിവാ നാത്ര സംശയഃ ॥ 1-9 ॥
അശിവാഃ പാശസംയുക്താഃ പശവഃ സർവചേതനാഃ ।
യസ്മാദ്വിലക്ഷണാസ്തേഭ്യസ്തസ്മാദീശഃ ശിവഃ സ്മൃതഃ ॥ 1-10 ॥
ഗുണോ ബുദ്ധിരഹങ്കാരസ്തന്മാത്രാണീന്ദ്രിയാനി ച ।
ഭൂതാനി ച ചതുർവിംശദിതി പാശാഃ പ്രകീർതിതാഃ ॥ 1-11 ॥
പഞ്ചവിംശകമജ്ഞാനം സഹജം സർവദേഹിനാം ।
പാശാജാലസ്യ തന്മൂലം പ്രകൃതിഃ കാരണായ നഃ ॥ 1-12 ॥
സത്യജ്ഞാനേ നിബധ്യന്തേ പുരുഷാഃ പാശബന്ധനൈഃ ।
മദ്ഭാവാച്ച വിമുച്യന്തേ ജ്ഞാനിനഃ പാശപഞ്ജരാത് ॥ 1-13 ॥
ഷഡ്വിംശകശ്ച പുരുഷഃ പശുരജ്ഞഃ ശിവാഗമേ ।
സപ്തവിംശ ഇതി പ്രോക്തഃ ശിവഃ സർവജഗത്പതിഃ ॥ 1-14 ॥
യസ്മാച്ഛിവഃ സുസമ്പൂർണഃ സർവജ്ഞഃ സർവഗഃ പ്രഭുഃ ।
തസ്മാത്സ പാശഹരിതഃ സ വിശുദ്ധഃ സ്വഭാവതഃ ॥ 1-15 ॥
പശുപാശപരഃ ശാന്തഃ പരമജ്ഞാനദേശികഃ ।
ശിവഃ ശിവായ ഭൂതാനാം തം വിജ്ഞായ വിമുച്യതേ ॥ 1-16 ॥
ഏതദേവ പരം ജ്ഞാനം ശിവ ഇത്യക്ഷരദ്വയം ।
വിചാരാദ്യാതി വിസ്താരം തൈലബിന്ദുരിവാംഭസി ॥ 1-17 ॥
സകൃദുച്ചാരിതം യേന ശിവ ഇത്യക്ഷരദ്വയം ।
ബദ്ധഃ പരികരസ്തേന മോക്ഷോപഗമനം പ്രതി ॥ 1-18 ॥
ദ്വ്യക്ഷരഃ ശിവമന്ത്രോ ഽയം ശിവോപനിഷദി സ്മൃതഃ ।
ഏകാക്ഷരഃ പുനശ്ചായമോമിത്യേവം വ്യവസ്ഥിതഃ ॥ 1-19 ॥
നാമസങ്കീർതണാദേവ ശിവസ്യാശേഷപാതകൈഃ ।
യതഃ പ്രമുച്യതേ ക്ഷിപ്രം മന്ത്രോ ഽയം ദ്വ്യക്ഷരഃ പരഃ ॥ 1-20 ॥
യഃ ശിവം ശിവമിത്യേവം ദ്വ്യക്ഷരം മന്ത്രമഭ്യസേത് ।
ഏകാക്ഷരം വാ സതതം സ യാതി പരമം പദം ॥ 1-21 ॥
മിത്രസ്വജനബന്ധൂനാം കുര്യാന്നാമ ശിവാത്മകം ।
അപി തത്കീർതനാദ്യാതി പാപമുക്തഃ ശിവം പുരം ॥ 1-22 ॥
വിജ്ഞേയഃ സ ശിവഃ ശാന്തോ നരസ്തദ്ഭാവഭാവിതഃ ।
ആസ്തേ സദാ നിരുദ്വിഗ്നഃ സ ദേഹാന്തേ വിമുച്യതേ ॥ 1-23 ॥
ഹൃദ്യന്തഃകരണം ജ്ഞേയം ശിവസ്യ ആയതനം പരം ।
ഹൃത്പദ്മം വേദികാ തത്ര ലിംഗമോങ്കാരമിഷ്യതേ ॥ 1-24 ॥
പുരുഷഃ സ്ഥാപകോ ജ്ഞേയഃ സത്യം സംമാർജനം സ്മൃതം ।
അഹിംസാ ഗോമയം പ്രോക്തം ശാന്തിശ്ച സലിലം പരം ॥ 1-25 ॥
കുര്യാത്സംമാർജനം പ്രാജ്ഞോ വൈരാഗ്യം ചന്ദനം സ്മൃതം ।
പൂജയേദ്ധ്യാനയോഗേന സന്തോഷൈഃ കുസുമൈഃ സിതൈഃ ॥ 1-26 ॥
ധൂപശ്ച ഗുഗ്ഗുലുർദേയഃ പ്രാണായാമസമുദ്ഭവഃ ।
പ്രത്യാഹാരശ്ച നൈവേദ്യമസ്തേയം ച പ്രദക്ഷിണം ॥ 1-27 ॥
ഇതി ദിവ്യോപചാരൈശ്ച സമ്പൂജ്യ പരമം ശിവം ।
ജപേദ്ധ്യായേച്ച മുക്ത്യർഥം സർവസംഗവിവർജിതഃ ॥ 1-28 ॥
ജ്ഞാനയോഗവിനിർമുക്തഃ കർമയോഗസമാവൃത്തഃ ।
മൃതഃ ശിവപുരം ഗച്ഛേത്സ തേന ശിവകർമണാ ॥ 1-29 ॥
തത്ര ഭുക്ത്വാ മഹാഭോഗാൻപ്രലയേ സർവദേഹിനാം ।
ശിവധർമാച്ഛിവജ്ഞാനം പ്രാപ്യ മുക്തിമവാപ്നുയാത് ॥ 1-30 ॥
ജ്ഞാനയോഗേന മുച്യന്തേ ദേഹപാതാദനന്തരം ।
ഭോഗാൻഭുക്ത്വാ ച മുച്യന്തേ പ്രലയേ കർമയോഗിനഃ ॥ 1-31 ॥
തസ്മാജ്ജ്ഞാനവിദോ യോഗാത്തഥാജ്ഞാഃ കർമയോഗിനഃ ।
സർവ ഏവ വിമുച്യന്തേ യേ നരാഃ ശിവമാശ്രിതാഃ ॥ 1-32 ॥
സ ഭോഗഃ ശിവവിദ്യാർഥം യേഷാം കർമാസ്തി നിർമലം ।
തേ ഭോഗാൻപ്രാപ്യ മുച്യന്തേ പ്രലയേ ശിവവിദ്യയാ ॥ 1-33 ॥
വിദ്യാ സങ്കീർതനീയാ ഹി യേഷാം കർമ ന വിദ്യതേ ।
തേ ചാവർത്യ വിമുച്യന്തേ യാവത്കർമ ന തദ്ഭവേത് ॥ 1-34 ॥
ശിവജ്ഞാനവിദം തസ്മാത്പൂജയേദ്വിഭവൈർഗുരും ।
വിദ്യാദാനം ച കുർവീത ഭോഗമോക്ഷജിഗീഷയാ ॥ 1-35 ॥
ശിവയോഗീ ശിവജ്ഞാനീ ശിവജാപീ തപോഽധികഃ ।
ക്രമശഃ കർമയോഗീ ച പഞ്ചൈതേ മുക്തിഭാജനാഃ ॥ 1-36 ॥
കർമയോഗസ്യ യന്മൂലം തദ്വക്ഷ്യാമി സമാസതഃ ।
ലിംഗമായതനം ചേതി തത്ര കർമ പ്രവർതതേ ॥ 1-37 ॥
॥ ഇതി ശിവോപനിഷദി മുക്തിനിർദേശാധ്യായഃ പ്രഥമഃ ॥
അഥ പൂർവസ്ഥിതോ ലിംഗേ ഗർഭഃ സ ത്രിഗുണോ ഭവേത് ।
ഗർഭാദ്വാപി വിഭാഗേന സ്ഥാപ്യ ലിംഗം ശിവാലയേ ॥ 2-1 ॥
യാവല്ലിംഗസ്യ ദൈർഘ്യം സ്യാത്താവദ്വേദ്യാശ്ച വിസ്തരഃ ।
ലിംഗതൃതീയഭാഗേന ഭവേദ്വേദ്യാഃ സമുച്ഛ്രയഃ ॥ 2-2 ॥
ഭാഗമേകം ന്യസേദ്ഭൂമൗ ദ്വിതീയം വേദിമധ്യതഃ ।
തൃതീയഭാഗേ പൂജാ സ്വാദിതി ലിംഗം ത്രിധാ സ്ഥിതം ॥ 2-3 ॥
ഭൂമിസ്ഥം ചതുരശ്രം സ്വാദഷ്ടാശ്രം വേദിമധ്യതഃ ।
പൂജാർഥം വർതുലം കാര്യം ദൈർഘ്യാത്ത്രിഗുണവിസ്തരം ॥ 2-4 ॥
അധോഭാഗേ സ്ഥിതഃ സ്കന്ദഃ സ്ഥിതാ ദേവീ ച മധ്യതഃ ।
ഊർധ്വം രുദ്രഃ ക്രമാദ്വാപി ബ്രഹ്മവിഷ്ണുമഹേശ്വരാഃ ॥ 2-5 ॥
ഏത ഏവ ത്രയോ ലോകാ ഏത ഏവ ത്രയോ ഗുണാഃ ।
ഏത ഏവ ത്രയോ വേദാ ഏതച്ചാന്യത്സ്ഥിതം ത്രിധാ ॥ 2-6 ॥
നവഹസ്തഃ സ്മൃതോ ജ്യേഷ്ഠഃ ഷഡ്ഢസ്തശ്ചാപി മധ്യമഃ ।
വിദ്യാത്കനീയസ്ത്രൈഹസ്തം ലിംഗമാനമിദം സ്മൃതം ॥ 2-7 ॥
ഗർഭസ്യാനതഃ പ്രവിസ്താരസ്തദൂനശ്ച ന ശസ്യതേ ।
ഗർഭസ്യാനതഃ പ്രവിസ്താരാദ്തദുപര്യപി സംസ്ഥിതം ॥ 2-8 ॥
പ്രാസാദം കൽപയേച്ഛ്രീമാന്വിഭജേത ത്രിധാ പുനഃ ।
ഭാഗ ഏകോ ഭവേജ്ജംഘാ ദ്വൗ ഭാഗൗ മഞ്ജരീ സ്മൃതാ ॥ 2-9 ॥
മഞ്ജര്യാ അർധഭാഗസ്ഥം ശുകനാസം പ്രകൽപയേത് ।
ഗർഭാദർധേന വിസ്താരമായാമം ച സുശോഭനം ॥ 2-10 ॥
ഗർഭാദ്വാപി ത്രിഭാഗേന ശുകനാസം പ്രകൽപയേത് ।
ഗർഭാദർധേന വിസ്തീർണാ ഗർഭാച്ച ദ്വിഗുണായതാ ॥ 2-11 ॥
ജംഘാഭിശ്ച ഭവേത്കാര്യാ മഞ്ജര്യംഗുലരാശിനാ ।
പ്രാസാദാർധേന വിജ്ഞേയോ മണ്ഡപസ്തസ്യ വാമതഃ ॥ 2-12 ॥
മണ്ഡപാത്പാദവിസ്തീർണാ ജഗതീ താവദുച്ഛ്രിതാ ।
പ്രാസാദസ്യ പ്രമാണേന ജഗത്യാ സാർധമംഗണം ॥ 2-13 ॥
പ്രാകാരം തത്സമന്താച്ച ഗുപുരാദാലഭൂഷിതം ।
പ്രാകാരാന്തഃ സ്ഥിതം കാര്യം വൃഷസ്ഥാനം സമുച്ഛ്രിതം ॥ 2-14 ॥
നന്ദീശ്വരമഹാകാലൗ ദ്വാരശാഖാവ്യവസ്ഥിതൗ ।
പ്രാകാരാദ്ദക്ഷിണേ കാര്യം സർവോപകരണാന്വിതം ॥ 2-15 ॥
പഞ്ചഭൗമം ത്രിഭൗമം വാ യോഗീന്ദ്രാവസഥം മഹത് ।
പ്രാകാരഗുപ്തം തത്കാര്യം മൈത്രസ്ഥാനസമന്വിതം ॥ 2-16 ॥
സ്ഥാനാദ്ദശസമായുക്തം ഭവ്യവൃക്ഷജലാന്വിതം ।
തന്മഹാനസമാഗ്നേയ്യാം പൂർവതഃ സത്ത്രമണ്ഡപം ॥ 2-17 ॥
സ്ഥാനം ചണ്ഡേശമൈശാന്യാം പുഷ്പാരാമം തഥോത്തരം ।
കോഷ്ഠാഗാരം ച വായവ്യാം വാരുണ്യാം വരുണാലയം ॥ 2-18 ॥
ശമീന്ധനകുശസ്ഥാനമായുധാനാം ച നൈരൃതം ।
സർവലോകോപകാരായ നഗരസ്ഥം പ്രകൽപയേത് ॥ 2-19 ॥
ശ്രീമദായതനം ശംഭോര്യോഗിനാം വിജനേ വനേ ।
ശിവസ്യായതനേ യാവത്സമേതാഃ പരമാണവഃ ॥ 2-20 ॥
മന്വന്തരാണി താവന്തി കർതുർഭോഗാഃ ശിവേ പുരേ ।
മഹാപ്രതിമലിംഗാനി മഹാന്ത്യായതനാനി ച ॥ 2-21 ॥
കൃത്വാപ്നോതി മഹാഭോഗാനന്തേ മുക്തിം ച ശാശ്വതീം ।
ലിംഗപ്രതിഷ്ഠാം കുർവീത യദാ തല്ലക്ഷണം കൃതീ ॥ 2-22 ॥
പഞ്ചഗവ്യേന സംശോധ്യ പൂജയിത്വാധിവാസയേത് ।
പാലാശോദുംബരാശ്വത്ഥ- പൃഷദാജ്യതിലൈര്യവൈഃ ॥ 2-23 ॥
അഗ്നികാര്യം പ്രകുർവീത ദദ്യാത്പൂർണാഹുതിത്രയം ।
ശിവസ്യാഷ്ടശതം ഹുത്വാ ലിംഗമൂലം സ്പൃശേദ്ബുധഃ ॥ 2-24 ॥
ഏവം മധ്യേ ഽവസാനേ തന്മൂർതിമന്ത്രൈശ്ച മൂർതിഷു ।
അഷ്ടൗ മൂർതീശ്വരാഃ കാര്യാഃ നവമഃ സ്ഥാപകഃ സ്മൃതഃ ॥ 2-25 ॥
പ്രാതഃ സംസ്ഥാപയേല്ലിംഗം മന്ത്രൈസ്തു നവഭിഃ ക്രമാത് ।
മഹാസ്നാപനപൂജാം ച സ്ഥാപ്യ ലിംഗം പ്രപൂജയേത് ॥ 2-26 ॥
ഗുരോർമൂർതിധരാണാം ച ദദ്യാദുത്തമദക്ഷിണാം ।
യതീനാം ച സമസ്താനാം ദദ്യാന്മധ്യമദക്ഷിണാം ॥ 2-27 ॥
ദീനാന്ധകൃപണേഭ്യശ്ച സർവാസാമുപകൽപയേത് ।
സർവഭക്ഷ്യാന്നപാനാദ്യൈരനിഷിദ്ധം ച ഭോജനം ॥ 2-28 ॥
കൽപയേദാഗതാനാം ച ഭൂതേഭ്യശ്ച ബലിം ഹരേത് ।
രാത്രൗ മാതൃഗണാനാം ച ബലിം ദദ്യാദ്വിശേഷതഃ ॥ 2-29 ॥
ഏവം യഃ സ്ഥാപയേല്ലിംഗം തസ്യ പുണ്യഫലം ശൃണു ।
കുലത്രിംശകമുദ്ധൃത്യ ഭൃത്യൈശ്ച പരിവാരിതഃ ॥ 2-30 ॥
കലത്രപുത്രമിത്രാദ്യൈഃ സഹിതഃ സർവബാന്ധവൈഃ ।
വിമുച്യ പാപകലിലം ശിവലോകം വ്രജേന്നരഃ ।
തത്ര ഭുക്ത്വാ മഹാഭോഗാൻപ്രലയേ മുക്തിമാപ്നുയാത് ॥ 2-31 ॥
॥ ഇതി ശിവോപനിഷദി ലിംഗായതനാധ്യായോ ദ്വിതീയഃ ॥
അഥാന്യൈരൽപവിത്തൈശ്ച നൃപൈശ്ച ശിവഭാവിതൈഃ ।
ശക്തിതഃ സ്വാശ്രമേ കാര്യം ശിവശാന്തിഗൃഹദ്വയം ॥ 3-1 ॥
ഗൃഹസ്യേശാനദിഗ്ഭാഗേ കാര്യമുത്തരതോ ഽപി വാ ।
ഖാത്വാ ഭൂമിം സമുദ്ധൃത്യ ശല്യാനാകോട്യ യത്നതഃ ॥ 3-2 ॥
ശിവദേവഗൃഹം കാര്യമഷ്ടഹസ്തപ്രമാണതഃ ।
ദക്ഷിണോത്തരദിഗ്ഭാഗേ കിഞ്ചിച്ദീർഘം പ്രകൽപയേത് ॥ 3-3 ॥
ഹസ്തമാത്രപ്രമാണം ച ദൃഢപട്ടചതുഷ്ടയം ।
ചതുഷ്കോണേഷു സംയോജ്യമർഘ്യപാത്രാദിസംശ്രയം ॥ 3-4 ॥
ഗർഭമധ്യേ പ്രകുർവീത ശിവവേദിം സുശോഭനാം ।
ഉദഗർവാക്ച്ഛ്രിതാം(?) കിഞ്ചിച്ചതുഃശീർഷകസംയുതാം ॥ 3-5 ॥
ത്രിഹസ്തായാമവിസ്താരാമ്ഷോഡശാംഗുലമുച്ഛ്രിതാം ।
തച്ഛീർഷാണീവ ഹസ്താർധമായാമാദ്വിസ്തരേണ ച ॥ 3-6 ॥
ശിവസ്ഥണ്ഡിലമിത്യേതച്ചതുർഹസ്തം സമം ശിരഃ ।
മൂർതിനൈവേദ്യദീപാനാം വിന്യാസാർഥം പ്രകൽപയേത് ॥ 3-7 ॥
ശൈവലിംഗേന കാര്യം സ്യാത്കാര്യം മണിജപാർഥിവൈഃ ।
സ്ഥണ്ഡിലാർധേ ച കുർവന്തി വേദിമന്യാം സവർതുലാം ॥ 3-8 ॥
ഷോഡശാംഗുലമുത്സേധാം വിസ്തീർണാം ദ്വിഗുണേന ച ।
ഗൃഹേ ന സ്ഥാപയേച്ഛൈലം ലിംഗം മണിജമർചയേത് ॥ 3-9 ॥
ത്രിസന്ധ്യം പാർഥിവം വാപി കുര്യാദന്യദ്ദിനേദിനേ ।
സർവേഷാമേവ വർണാനാം സ്ഫാടികം സർവകാമദം ॥ 3-10 ॥
സർവദോഷവിനിർമുക്തമന്യഥാ ദോഷമാവഹേത് ।
ആയുഷ്മാൻബലവാഞ്ശ്രീമാൻപുത്രവാന്ധനവാൻസുഖീ ॥ 3-11 ॥
വരമിഷ്ടം ച ലഭതേ ലിംഗം പാർഥിവമർചയൻ ।
തസ്മാദ്ധി പാർഥിവം ലിംഗം ജ്ഞേയം സർവാർഥസാധകം ॥ 3-12 ॥
നിർദോഷം സുലഭം ചൈവ പൂജയേത്സതതം ബുധഃ ।
യഥാ യഥാ മഹാലിംഗം പൂജാ ശ്രദ്ധാ യഥാ യഥാ ॥ 3-13 ॥
തഥാ തഥാ മഹത്പുണ്യം വിജ്ഞേയമനുരൂപതഃ ।
പ്രതിമാലിംഗവേദീഷു യാവന്തഃ പരമാണവഃ ।
താവത്കൽപാന്മഹാഭോഗസ്തത്കർതാസ്തേ ശിവേ പുരേ ॥ 3-14 ॥
॥ ഇതി ശിവോപനിഷദി ശിവഗൃഹാധ്യായസ്തൃതീയഃ ॥
അഥൈകഭിന്നാവിച്ഛിന്നം പുരതഃ ശാന്തിമണ്ഡപം ।
പൂർവാപരാഷ്ടഹസ്തം സ്യാദ്ദ്വാദശോത്തരദക്ഷിണേ ॥ 4-1 ॥
തദ്ദ്വാരഭിത്തിസംബദ്ധം കപിച്ഛുകസമാവൃതം ।
പടദ്വയം ഭവേത്സ്ഥാപ്യ സ്രുവാദ്യാവാരഹേതുനാ ॥ 4-2 ॥
ദ്വാരം ത്രിശാഖം വിജ്ഞേയം നവത്യംഗുലമുച്ഛ്രിതം ।
തദർധേന ച വിസ്തീർണം സത്കവാടം ശിവാലയേ ॥ 4-3 ॥
ദീർഘം പഞ്ചനവത്യാ ച പഞ്ചശാഖാസുശോഭിതം ।
സത്കവാടദ്വയോപേതം ശ്രീമദ്വാഹനമണ്ടപം ॥ 4-4 ॥
ദ്വാരം പശ്ചാന്മുഖം ജ്ഞേയമശേഷാർഥപ്രസാധകം ।
അഭാവേ പ്രാങ്മുഖം കാര്യമുദഗ്ദക്ഷിണതോ ന ച ॥ 4-5 ॥
ഗവാക്ഷകദ്വയം കാര്യമപിധാനം സുശോഭനം ।
ധൂമനിർഗമനാർഥായ ദക്ഷിണോത്തരകുഡ്യയോഃ ॥ 4-6 ॥
ആഗ്നേയഭാഗാത്പരിതഃ കാര്യാ ജാലഗവാക്ഷകാഃ ।
ഊർധ്വസ്തൂപികയാ യുക്താ ഈഷച്ഛിദ്രപിധാനയാ ॥ 4-7 ॥
ശിവാഗ്നിഹോത്രകുണ്ഡം ച വൃത്തം ഹസ്തപ്രമാണതഃ ।
ചതുരശ്രവേദി(kA) ശ്രീമന്മേഖലാത്രയഭൂഷിതം ॥ 4-8 ॥
കുഡ്യം ദ്വിഹസ്തവിസ്തീഋണം പഞ്ചഹസ്തസമുച്ഛ്രിതം ।
ശിവാഗ്നിഹോത്രശരണം കർതവ്യമതിശോഭനം ॥ 4-9 ॥
ജഗതീസ്തംഭപട്ടാദ്യം സപ്തസംഖ്യം ച കൽപയേത് ।
ബന്ധയോഗവിനിർമുക്തം തുല്യസ്ഥാനപദാന്തരം ॥ 4-10 ॥
ഐഷ്ടകം കൽപയേദ്യത്നാച്ഛിവാഗ്ന്യായതനം മഹത് ।
ചതുഃപ്രേഗീവകോപേതം(?) ഏകപ്രേഗീവകേന വാ(?) ॥ 4-11 ॥
സുധാപ്രലിപ്തം കർതവ്യം പഞ്ചാണ്ഡകബിഭൂഷിതം ।
ശിവാഗ്നിഹോത്രശരണം ചതുരണ്ഡകസംയുതം ॥ 4-12 ॥
ബഹിസ്തദേവ ജഗതീ ത്രിഹസ്താ വാ സുകുട്ടിമാ ।
താവദേവ ച വിസ്തീർണാ മേഖലാദിവിഭൂഷിതാ ॥ 4-13 ॥
കർതവ്യാ ചാത്ര ജഗതീ തസ്യാശ്ചാധഃ സമന്തതഃ ।
ദ്വിഹസ്തമാത്രവിസ്തീർണാ തദർധാർധസമുച്ഛ്രിതാ ॥ 4-14 ॥
അന്യാ വൃത്താ പ്രകർതവ്യാ രുദ്രവേദീ സുശോഭനാ ।
ദശഹസ്തപ്രമാണാ ച ചതുരംഗുലമുച്ഛ്രിതാ ॥ 4-15 ॥
രുദ്രമാതൃഗണാനാം ച ദിക്പതീനാം ച സർവദാ ।
സർവാഗ്രപാകസംയുക്തം താസു നിത്യബലിം ഹരേത് ॥ 4-16 ॥
വേദ്യന്യാ സർവഭൂതാനാം ബഹിഃ കാര്യാ ദ്വിഹസ്തികാ ।
വൃഷസ്ഥാനം ച കർതവ്യം ശിവാലോകനസംമുഖം ॥ 4-17 ॥
അഗ്രാർഷസവിതുർവ്യോമ വൃഷഃ കാര്യശ്ച പശ്ചിമേ ।
വ്യോമ്നശ്ചാധസ്ത്രിഗർഭം സ്യാത്പിതൃതർപണവേദികാ ॥ 4-18 ॥
പ്രാകാരാന്തർബഹിഃ കാര്യം ശ്രീമദ്ഗോപുരഭൂഷിതം ।
പുഷ്പാരാമജലോപേതം പ്രാകാരാന്തം ച കാരയേത് ॥ 4-19 ॥
മൃദ്ദാരുജം തൃണച്ഛന്നം പ്രകുർവീത ശിവാലയം ।
ഭൂമികാദ്വയവിന്യാസാദുത്ക്ഷിപ്തം കൽപയേദ്ബുധഃ ॥ 4-20 ॥
ശിവദക്ഷിണതഃ കാര്യം തഭുക്തേര്യോഗ്യമാലയം ।
ശയ്യാസനസമായുക്തം വാസ്തുവിദ്യാവിനിർമിതം ॥ 4-21 ॥
ധ്വജസിംഹൗ വൃഷഗജൗ ചത്വാരഃ ശോഭനാഃ സ്മൃതാഃ ।
ധൂമശ്വഗർദഭധ്വാങ്ക്ഷാശ്ചത്വാരശ്ചാർഥനാശകാഃ ॥ 4-22 ॥
ഗൃഹസ്യായാമവിസ്താരം കൃത്വാ ത്രിഗുണമാദിതഃ ।
അഷ്ടഭിഃ ശോധയേദാപൈഃ ശേഷശ്ച ഗൃഹമാദിശേത് ॥ 4-23 ॥
ഇതി ശാന്തിഗൃഹം കൃത്വാ രുദ്രാഗ്നിം യഃ പ്രവർതയേത് ।
അപ്യേകം ദിവസം ഭക്ത്യാ തസ്യ പുണ്യഫലം ശൃണു ॥ 4-24 ॥
കലത്രപുത്രമിത്രാദ്യൈഃ സ ഭൃത്യൈഃ പരിവാരിതഃ ।
കുലൈകവിംശദുത്താര്യ ദേവലോകമവാപ്നുയാത് ॥ 4-25 ॥
നീലോത്പലദലശ്യാമാഃ പീനവൃത്തപയോധരാഃ ।
ഹേമവർണാഃ സ്ത്രിയശ്ചാന്യാഃ സുന്ദര്യഃ പ്രിയദർശനാഃ ॥ 4-26 ॥
താഭിഃ സാർധം മഹാഭോഗൈർവിമാനൈഃ സാർവകാമികൈഃ ।
ഇച്ഛയാ ക്രീഡതേ താവദ്യാവദാഭൂതസമ്പ്ലവം ॥ 4-27 ॥
തതഃ കൽപാഗ്നിനാ സാർധം ദഹ്യമാനം സുവിഹ്വലം ।
ദൃഷ്ട്വാ വിരജ്യതേ ഭൂയോ ഭവഭോഗമഹാർണവാത് ॥ 4-28 ॥
തതഃ സമ്പൃച്ഛതേ രുദ്രാംസ്തത്രസ്ഥാൻജ്ഞാനപാരഗാൻ ।
തേഭ്യഃ പ്രാപ്യ ശിവജ്ഞാനം ശാന്തം നിർവാണമാപ്നുയാത് ॥ 4-29 ॥
അവിരക്തശ്ച ഭോഗേഭ്യഃ സപ്ത ജന്മാനി ജായതേ ।
പൃഥിവ്യധിപതിഃ ശ്രീമാനിച്ഛയാ വാ ദ്വിജോത്തമഃ ॥ 4-30 ॥
സപ്തമാജ്ജന്മനശ്ചാന്തേ ശിവജ്ഞാനമനാപ്നുയാത് ।
ജ്ഞാനാദ്വിരക്തഃ സംസാരാച്ഛുദ്ധഃ ഖാന്യധിതിഷ്ഠതി ॥ 4-31 ॥
ഇത്യേതദഖിലം കാര്യം ഫലമുക്തം സമാസതഃ ।
ഉത്സവേ ച പുനർബ്രൂമഃ പ്രത്യേകം ദ്രവ്യജം ഫലം ॥ 4-32 ॥
സദ്ഗന്ധഗുടികാമേകാം ലാക്ഷാം പ്രാണ്യംഗവർജിതാം ।
കർപാസാസ്ഥിപ്രമാണം ച ഹുത്വാഗ്നൗ ശൃണുയാത്ഫലം ॥ 4-33 ॥
യാവത്സത്ഗന്ധഗുടികാ ശിവാഗ്നൗ സംഖ്യയാ ഹുതാ ।
താവത്കോട്യസ്തു വർഷാണി ഭോഗാൻഭുങ്ക്തേ ശിവേ പുരേ ॥ 4-34 ॥
ഏകാംഗുലപ്രമാണേന ഹുത്വാഗ്നൗ ചന്ദനാഹുതിം ।
വർഷകോടിദ്വയം ഭോഗൈർദിവ്യൈഃ ശിവപുരേ വസേത് ॥ 4-35 ॥
യാവത്കേസരസംഖ്യാനം കുസുമസ്യാനലേ ഹുതം ।
താവദ്യുഗസഹസ്രാണി ശിവലോകേ മഹീയതേ ॥ 4-36 ॥
നാഗകേസരപുഷ്പം തു കുങ്കുമാർധേന കീർതിതം ।
യത്ഫലം ചന്ദനസ്യോക്തമുശീരസ്യ തദർധകം ॥ 4-37 ॥
യത്പുഷ്പധൂപഭഷ്യാന്ന- ദധിക്ഷീരഘൃതാദിഭിഃ ।
പുണ്യലിംഗാർചനേ പ്രോക്തം തദ്ധോമസ്യ ദശാധികം ॥ 4-38 ॥
ഹുത്വാഗ്നൗ സമിധസ്തിസ്രൗ ശിവോമാസ്കന്ദനാമഭിഃ ।
പശ്ചാദ്ദദ്യാത്തിലാന്നാനി ഹോമയീത യഥാക്രമം ॥ 4-39 ॥
പലാശാങ്കുരജാരിഷ്ട- പാലാല്യഃ(?) സമിധഃ ശുഭാഃ ।
പൃഷദാജ്യപ്ലുതാ ഹുത്വാ ശൃണു യത്ഫലമാപ്നുയാത് ॥ 4-40 ॥
പലാശാങ്കുരസംഖ്യാനാം യാവദഗ്നൗ ഹുതം ഭവേത് ।
താവത്കൽപാന്മഹാഭോഗൈഃ ശിവലോകേ മഹീയതേ ॥ 4-41 ॥
തല്ലക്ഷ്യമധ്യസംഭൂതം ഹുത്വാഗ്നൗ സമിധഃ ശുഭാഃ ।
കൽപാർധസംമിതം കാലം ഭോഗാൻഭുങ്ക്തേ ശിവേ പുരേ ॥ 4-42 ॥
ശമീസമിത്ഫലം ദേയമബ്ദാനപി ച ലക്ഷകം ।
ശമ്യർധഫലവച്ഛേഷാഃ സമിധഃ ക്ഷീരവൃക്ഷജാഃ ॥ 4-43 ॥
തിലസംഖ്യാംസ്തിലാൻഹുത്വാ ഹ്യാജ്യാക്താ(?) യാവതീ ഭവേത് ।
താവത്സ വർഷലക്ഷാംസ്തു ഭോഗാൻഭുങ്ക്തേ ശിവേ പുരേ ॥ 4-44 ॥
യാവത്സുരൗഷധീരജ്ഞസ്(?) തിലതുല്യഫലം സ്മൃതം ।
ഇതരേഭ്യസ്തിലേഭ്യശ്ച കൃഷ്ണാനാം ദ്വിഗുണം ഫലം ॥ 4-45 ॥
ലാജാക്ഷതാഃ സഗോധൂമാഃ വർഷലക്ഷഫലപ്രദാഃ ।
ദശസാഹസ്രികാ ജ്ഞേയാഃ ശേഷാഃ സ്യുർബീജജാതയഃ ॥ 4-46 ॥
പലാശേന്ധനജേ വഹ്നൗ ഹോമസ്യ ദ്വിഗുണം ഫലം ।
ക്ഷീരവൃക്ഷസമൃദ്ധേ ഽഗ്നൗ ഫലം സാർധാർധികം ഭവേത് ॥ 4-47 ॥
അസമിദ്ധേ സധൂമേ ച ഹോമകർമ നിരർഥകം ।
അന്ധശ്ച ജായമാനഃ സ്യാദ്ദാരിദ്ര്യോപഹതസ്തഥാ ॥ 4-48 ॥
ന ച കണ്ടകിഭിർവൃക്ഷൈരഗ്നിം പ്രജ്വാല്യ ഹോമയേത് ।
ശുഷ്കൈർനവൈഃ പ്രശസ്തൈശ്ച കാഷ്ഠൈരഗ്നിം സമിന്ധയേത് ॥ 4-49 ॥
ഏവമാജ്യാഹുതിം ഹുത്വാ ശിവലോകമവാപ്നുയാത് ।
തത്ര കൽപശതം ഭോഗാൻഭുങ്ക്തേ ദിവ്യാന്യഥേപ്സിതാൻ ॥ 4-50 ॥
സ്രുചൈകാഹിതമാത്രേണ വ്രതസ്യാപൂരിതേന ച ।
യാഹുതിർദീയതേ വഹ്നൗ സാ പൂർണാഹുതിരുച്യതേ ॥ 4-51 ॥
ഏകാം പൂർണാഹുതിം ഹുത്വാ ശിവേന ശിവഭാവിതഃ ।
സർവകാമമവാപ്നോതി ശിവലോകേ വ്യവസ്ഥിതഃ ॥ 4-52 ॥
അശേഷകുലജൈർസാർധം സ ഭൃത്യൈഃ പരിവാരിതഃ ।
ആഭൂതസമ്പ്ലവം യാവദ്ഭോഗാൻഭുങ്ക്തേ യഥേപ്സിതാൻ ॥ 4-53 ॥
തതശ്ച പ്രലയേ പ്രാപ്തേ സമ്പ്രാപ്യ ജ്ഞാനമുത്തമം ।
പ്രസാദാദീശ്വരസ്യൈവ മുച്യതേ ഭവസാഗരാത് ॥ 4-54 ॥
ശിവപൂർണാഹുതിം വഹ്നൗ പതന്തീം യഃ പ്രപശ്യതി ।
സോ ഽപി പാപരി നരഃ സർവൈർമുക്തഃ ശിവപുരം വ്രജേത് ॥ 4-55 ॥
ശിവാഗ്നിധൂമസംസ്പൃഷ്ടാ ജീവാഃ സർവേ ചരാചരാഃ ।
തേ ഽപി പാപവിനിർമുക്താഃ സ്വർഗം യാന്തി ന സംശയഃ ॥ 4-56 ॥
ശിവയജ്ഞമഹാവേദ്യാ ജായതേ യേ ന സന്തി വാ ।
തേ ഽപി യാന്തി ശിവസ്ഥാനം ജീവാഃ സ്ഥാവരജംഗമാഃ ॥ 4-57 ॥
പൂർണാഹുതിം ഘൃതാഭാവേ ക്ഷീരതൈലേന കൽപയേത് ।
ഹോമയേദതസീതൈലം തിലതൈലം വിനാ നരഃ ॥ 4-58 ॥
സർഷപേംഗുഡികാശാമ്ര- കരഞ്ജമധുകാക്ഷജം ।
പ്രിയംഗുബിൽവപൈപ്പല്യ- നാലികേരസമുദ്ഭവം(?) ॥ 4-59 ॥
ഇത്യേവമാദികം തൈലമാജ്യാഭാവേ പ്രകൽപയേത് ।
ദൂർവയാ ബിൽവപത്ത്രൈർവാ സമിധഃ സമ്പ്രകീർതിതാഃ ॥ 4-60 ॥
അന്നാർഥം ഹോമയേത്ക്ഷീരം ദധി മൂലഫലാനി വാ ।
തിലാർഥം തണ്ഡുലൈഃ കുര്യാദ്ദർഭാർഥം ഹരിതൈസ്തൃണൈഃ ॥ 4-61 ॥
പരിധീനാമഭാവേന ശരൈർവംശൈശ്ച കൽപയേത് ।
ഇന്ധനാനാമഭാവേന ദീപയേത്തൃണഗോമയൈഃ ॥ 4-62 ॥
ഗോമയാനാമഭാവേന മഹത്യംഭസി ഹോമയേത് ।
അപാമസംഭവേ ഹോമം ഭൂമിഭാഗേ മനോഹരേ ॥ 4-63 ॥
വിപ്രസ്യ ദക്ഷിണേ പാണാവശ്വത്ഥേ തദഭാവതഃ ।
ഛാഗസ്യ ദക്ഷിണേ കർണേ കുശമൂലേ ച ഹോമയേത് ॥ 4-64 ॥
സ്വാത്മാഗ്നൗ ഹോമയേത്പ്രാജ്ഞഃ സർവാഗ്നീനാമസംഭവേ ।
അഭാവേ ന ത്യജേത്കർമ കർമയോഗവിധൗ സ്ഥിതഃ ॥ 4-65 ॥
ആപത്കാലേ ഽപി യഃ കുര്യാച്ഛിവാഗ്നേർമനസാർചനം ।
സ മോഹകഞ്ചുകം ത്യക്ത്വാ പരാം ശാന്തിമവാപ്നുയാത് ॥ 4-66 ॥
പ്രാണാഗ്നിഹോത്രം കുർവന്തി പരമം ശിവയോഗിനഃ ।
ബാഹ്യകർമവിനിർമുക്താ ജ്ഞാനധ്യാനസമാകുലാഃ ॥ 4-67 ॥
॥ ഇതി ശിവോപനിഷദി ശാന്തിഗൃഹാഗ്നികാര്യാധ്യായശ്ചതുർഥഃ ॥
അഥാഗ്നേയം മഹാസ്നാനമലക്ഷ്മീമലനാശനം ।
സർവപാപഹരം ദിവ്യം തപഃ ശ്രീകീർതിവർധനം ॥ 5-1 ॥
അഗ്നിരൂപേണ രുദ്രേണ സ്വതേജഃ പരമം ബലം ।
ഭൂതിരൂപം സമുദ്ഗീർണം വിശുദ്ധം ദുരിതാപഹം ॥ 5-2 ॥
യക്ഷരക്ഷഃപിശാചാനാം ധ്വംസനം മന്ത്രസത്കൃതം ।
രക്ഷാർഥം ബാലരൂപാണാം സൂതികാനാം ഗൃഹേഷു ച ॥ 5-3 ॥
യശ്ച ഭുങ്ക്തേ ദ്വിജഃ കൃത്വാ അന്നസ്യ വാ പരിധിത്രയം(?) ।
അപി ശൂദ്രസ്യ പങ്ക്തിസ്ഥഃ പങ്ക്തിദോഷൈർന ലിപ്യതേ ॥ 5-4 ॥
ആഹാരമർധഭുക്തം ച കീടകേശാദിദൂഷിതം ।
താവന്മാത്രം സമുദ്ധൃത്യ ഭൂതിസ്പൃഷ്ടം വിശുദ്ധ്യതി ॥ 5-5 ॥
ആരണ്യം ഗോമയകൃതം കരീഷം വാ പ്രശസ്യതേ ।
ശർകരാപാംസുനിർമുക്തമഭാവേ കാഷ്ഠഭസ്മനാ ॥ 5-6 ॥
സ്വഗൃഹാശ്രമവല്ലിഭ്യഃ കുലാലാലയഭസ്മനാ ।
ഗോമയേഷു ച ദഗ്ധേഷു ഹീഷ്ടകാനി ച യേഷു ച ॥ 5-7 ॥
സർവത്ര വിദ്യതേ ഭസ്മ ദുഃഖാപാർജനരക്ഷണം(duHkhopAr) ।
ശംഖകുന്ദേന്ദുവർണാഭമാദദ്യാജ്ജന്തുവർജിതം ॥ 5-8 ॥
ഭസ്മാനീയ പ്രയത്നേന തദ്രക്ഷേദ്യത്നവാംസ്തഥാ ।
മാർജാരമൂഷികാദ്യൈശ്ച നോപഹന്യേത തദ്യഥാ ॥ 5-9 ॥
പഞ്ചദോഷവിനിർമുക്തം ഗുണപഞ്ചകസംയുതം ।
ശിവൈകാദശികാജപ്തം ശിവഭസ്മ പ്രകീർതിതം ॥ 5-10 ॥
ജാതികാരുകവാക്കായ- സ്ഥാനദുഷ്ടം ച പഞ്ചമം ।
പാപഘ്നം ശാങ്കരം രക്ഷാ- പവിത്രം യോഗദം ഗുണാഃ(?) ॥ 5-11 ॥
ശിവവ്രതസ്യ ശാന്തസ്യ ഭാസകത്വാച്ഛുഭസ്യ ച ।
ഭക്ഷണാത്സർവപാപാനാം ഭസ്മേതി പരികീർതിതം ॥ 5-12 ॥
ഭസ്മസ്നാനം ശിവസ്നാനം വാരുണാദധികം സ്മൃതം ।
ജന്തുശൈവാലനിർമുക്തമാഗ്നേയം പങ്കവർജിതം ॥ 5-13 ॥
അപവിത്രം ഭവേത്തോയം നിശി പൂർവമനാഹൃതം ।
നദീതഡാഗവാപിഷു ഗിരിപ്രസ്രവണേഷു ച ॥ 5-14 ॥
സ്നാനം സാധാരണം പ്രോക്തം വാരുണം സർവദേഹിനാം ।
അസാധാരണമേവോക്തം ഭസ്മസ്നാനം ദ്വിജന്മനാം ॥ 5-15 ॥
ത്രികാലം വാരുണസ്നാനാദനാരോഗ്യം പ്രജായതേ ।
ആഗ്നേയം രോഗശമനമേതസ്മാദ്സാർവകാമികം ॥ 5-16 ॥
സന്ധ്യാത്രയേ ഽർധരാത്രേ ച ഭുക്ത്വാ ചാന്നവിരേചനേ ।
ശിവയോഗ്യാചരേത്സ്നാനമുച്ചാരാദിക്രിയാസു ച ॥ 5-17 ॥
ഭസ്മാസ്തൃതേ മഹീഭാഗേ സമേ ജന്തുവിവർജിതേ ।
ധ്യായമാനഃ ശിവം യോഗീ രജന്യന്തം ശയീത ച ॥ 5-18 ॥
ഏകരാത്രോഷിതസ്യാപി യാ ഗതിർഭസ്മശായിനഃ ।
ന സാ ശക്യാ ഗൃഹസ്ഥേന പ്രാപ്തും യജ്ഞശതൈരപി ॥ 5-19 ॥
ഗൃഹസ്ഥസ്ത്ര്യായുഷോങ്കാരൈഃ സ്നാനം കുര്യാത്ത്രിപുണ്ഡ്രകൈഃ ।
യതിഃ സാർവാംഗികം സ്നാനമാപാദതലമസ്തകാത് ॥ 5-20 ॥
ശിവഭക്തസ്ത്രിധാ വേദ്യാം ഭസ്മസ്നാനഫലം ലഭേത് ।
ഹൃദി മൂർധ്നി ലലാടേ ച ശൂദ്രഃ ശിവഗൃഹാശ്രമീ ॥ 5-21 ॥
ഗണാഃ പ്രവ്രജിതാഃ ശാന്താഃ ഭൂതിമാലഭ്യ പഞ്ചധാ ।
ശിരോലലാടേ ഹൃദ്ബാഹ്വോർഭസ്മസ്നാനഫലം ലഭേത് ॥ 5-22 ॥
സംവത്സരം തദർധം വാ ചതുർദശ്യഷ്ടമീഷു ച ।
യഃ കുര്യാദ്ഭസ്മനാ സ്നാനം തസ്യ പുണ്യഫലം ശൃനു ॥ 5-23 ॥
ശിവഭസ്മനി യാവന്തഃ സമേതാഃ പരമാണവഃ ।
താവദ്വർഷസഹസ്രാണി ശിവലോകേ മഹീയതേ ॥ 5-24 ॥
ഏകവിംശകുലോപേതഃ പത്നീപുത്രാദിസംയുതഃ ।
മിത്രസ്വജനഭൃത്യൈശ്ച സമസ്തൈഃ പരിവാരിതഃ ॥ 5-25 ॥
തത്ര ഭുക്ത്വാ മഹാഭോഗാനിച്ഛയാ സാർവകാമികാൻ ।
ജ്ഞാനയോഗം സമാസാദ്യ പ്രലയേ മുക്തിമാപ്നുയാത് ॥ 5-26 ॥
ഭസ്മ ഭസ്മാന്തികം യേന ഗൃഹീതം നൈഷ്ഠികവ്രതം(?) ।
അനേന വൈ സ ദേഹേന രുദ്രശ്ചങ്ക്രമതേ ക്ഷിതൗ ॥ 5-27 ॥
ഭസ്മസ്നാനരതം ശാന്തം യേ നമന്തി ദിനേ ദിനേ ।
തേ സർവപാപനിർമുക്താ നരാ യാന്തി ശിവം പുരം ॥ 5-28 ॥
ഇത്യേതത്പരമം സ്നാനമാഗ്നേയം ശിവനിർമിതം ।
ത്രിസന്ധ്യമാചരേന്നിത്യം ജാപീ യോഗമവാപ്നുയാത് ॥ 5-29 ॥
ഭസ്മാനീയ പ്രദദ്യാദ്യഃ സ്നാനാർഥം ശിവയോഗിനേ ।
കൽപം ശിവപുരേ ഭോഗാൻഭുക്ത്വാന്തേ സ്യാദ്ദ്വിജോത്തമഃ ॥ 5-30 ॥
ആഗ്നേയം വാരുണം മാന്ത്രം വായവ്യം ത്വൈന്ദ്രപഞ്ചമം ।
മാനസം ശാന്തിതോയം ച ജ്ഞാനസ്നാനം തഥാഷ്ടമം ॥ 5-31 ॥
ആഗ്നേയം രുദ്രമന്ത്രേണ ഭസ്മസ്നാനമനുത്തമം ।
അംഭസാ വാരുണം സ്നാനമ്കാര്യം വാരുണമൂർതിനാ ॥ 5-32 ॥
മൂർധാനം പാണിനാലഭ്യ ശിവൈകാദശികാം ജപേത് ।
ധ്യായമാനഃ ശിവം ശാന്തമ്മന്ത്രസ്നാനം പരം സ്മൃതം ॥ 5-33 ॥
ഗവാം ഖുരപുടോത്ഖാത- പവനോദ്ധൂതരേണുനാ ।
കാര്യം വായവ്യകം സ്നാനമ്മന്ത്രേണ മരുദാത്മനാ ॥ 5-34 ॥
വ്യഭ്രേ ഽർകേ വർഷതി സ്നാനം കുര്യാദൈന്ദ്രീം ദിശം സ്ഥിതഃ ।
ആകാശമൂർതിമന്ത്രേണ തദൈന്ദ്രമിതി കീർതിതം ॥ 5-35 ॥
ഉദകം പാണിനാ ഗൃഹ്യ സർവതീർഥാനി സംസ്മരേത് ।
അഭ്യുക്ഷയേച്ഛിരസ്തേന സ്നാനം മാനസമുച്യതേ ॥ 5-36 ॥
പൃഥിവ്യാം യാനി തീർഥാനി സരാംസ്യായതനാനി ച ।
തേഷു സ്നാതസ്യ യത്പുണ്യം തത്പുണ്യം ക്ഷാന്തിവാരിണാ ॥ 5-37 ॥
ന തഥാ ശുധ്യതേ തീർഥൈസ്തപോഭിർവാ മഹാധ്വരൈഃ ।
പുരുഷഃ സർവദാനൈശ്ച യഥാ ക്ഷാന്ത്യാ വിശുദ്ധ്യതി ॥ 5-38 ॥
ആക്രുഷ്ടസ്താഡിതസ്തസ്മാദധിക്ഷിപ്തസ്തിരസ്കൃത ।
ക്ഷമേദക്ഷമമാനാനാം സ്വർഗമോക്ഷജിഗീഷയാ ॥ 5-39 ॥
യൈവ ബ്രഹ്മവിദാം പ്രാപ്തിര്യൈവ പ്രാപ്തിസ്തപസ്വിനാം ।
യൈവ യോഗാഭിയുക്താനാം ഗതിഃ സൈവ ക്ഷമാവതാം ॥ 5-40 ॥
ജ്ഞാനാമലാംഭസാ സ്നാതഃ സർവദൈവ മുനിഃ ശുചിഃ ।
നിർമലഃ സുവിശുദ്ധശ്ച വിജ്ഞേയഃ സൂര്യരശ്മിവത് ॥ 5-41 ॥
മേധ്യാമേധ്യരസം യദ്വദപി വത്സ വിനാ കരൈഃ ।
നൈവ ലിപ്യതി തദ്ദോഷൈസ്തദ്വജ്ജ്ഞാനീ സുനിർമലഃ ॥ 5-42 ॥
ഏഷാമേകതമേ സ്നാതഃ ശുദ്ധഭാവഃ ശിവം വ്രജേത് ।
അശുദ്ധഭാവഃ സ്നാതോ ഽപി പൂജയന്നാപ്നുയാത്ഫലം ॥ 5-43 ॥
ജലം മന്ത്രം ദയാ ദാനം സത്യമിന്ദ്രിയസംയമഃ ।
ജ്ഞാനം ഭാവാത്മശുദ്ധിശ്ച ശൗചമഷ്ടവിധം ശ്രുതം ॥ 5-44 ॥
അംഗുഷ്ഠതലമൂലേ ച ബ്രാഹ്മം തീർഥമവസ്ഥിതം ।
തേനാചമ്യ ഭവേച്ഛുദ്ധഃ ശിവമന്ത്രേണ ഭാവിതഃ ॥ 5-45 ॥
യദധഃ കന്യകായാശ്ച തത്തീർഥം ദൈവമുച്യതേ ।
തീർഥം പ്രദേശിനീമൂലേ പിത്ര്യം പിതൃവിധോദയം(?) ॥ 5-46 ॥
മധ്യമാംഗുലിമധ്യേന തീർഥമാരിഷമുച്യതേ ।
കരപുഷ്കരമധ്യേ തു ശിവതീർഥം പ്രതിഷ്ഠിതം ॥ 5-47 ॥
വാമപാണിതലേ തീർഥമൗമമ്നാമ പ്രകീർതിതം ।
ശിവോമാതീർഥസംയോഗാത്കുര്യാത്സ്നാനാഭിഷേചനം ॥ 5-48 ॥
ദേവാന്ദൈവേന തീർഥേന തർപയേദകൃതാംഭസാ ।
ഉദ്ധൃത്യ ദക്ഷിണം പാണിമുപവീതീ സദാ ബുധഃ ॥ 5-49 ॥
പ്രാചീനാവീതിനാ കാര്യം പിതൄണാം തിലവാരിണാ ।
തർപണം സർവഭൂതാനാമാരിഷേണ നിവീതിനാ ॥ 5-50 ॥
സവ്യസ്കന്ധേ യദാ സൂത്രമുപവീത്യുച്യതേ തദാ ।
പ്രാചീനാവീത്യസവ്യേന നിവീതീ കണ്ഠസംസ്ഥിതേ ॥ 5-51 ॥
പിതൄണാം തർപണം കൃത്വാ സൂര്യായാർഘ്യം പ്രകൽപയേത് ।
ഉപസ്ഥായ തതഃ സൂര്യം യജേച്ഛിവമനന്തരം ॥ 5-52 ॥
॥ ഇതി ശിവോപനിഷദി ശിവഭസ്മസ്നാനാധ്യായഃ പഞ്ചമഃ ॥
അഥ ഭക്ത്യാ ശിവം പൂജ്യ നൈവേദ്യമുപകൽപയേത് ।
യദന്നമാത്മനാശ്നീയാത്തസ്യാഗ്രേ വിനിവേദയേത് ॥ 6-1 ॥
യഃ കൃത്വാ ഭക്ഷ്യഭോജ്യാനി യത്നേന വിനിവേദയേത് ।
ശിവായ സ ശിവേ ലോകേ കൽപകോടിം പ്രമോദതേ ॥ 6-2 ॥
യഃ പക്വം ശ്രീഫലം ദദ്യാച്ഛിവായ വിനിവേദയേത് ।
ഗുരോർവാ ഹോമയേദ്വാപി തസ്യ പുണ്യഫലം ശൃണു ॥ 6-3 ॥
ശ്രീമദ്ഭിഃ സ മഹായാനൈർഭോഗാൻഭുങ്ക്തേ ശിവേ പുരേ ।
വർഷാണാമയുതം സാഗ്രം തദന്തേ ശ്രീപതിർഭവേത് ॥ 6-4 ॥
കപിത്ഥമേകം യഃ പക്വമീശ്വരായ നിവേദയേത് ।
വർഷലക്ഷം മഹാഭോഗൈഃ ശിവലോകേ മഹീയതേ ॥ 6-5 ॥
ഏകമാമ്രഫലം പക്വം യഃ ശംഭോർവിനിവേദയേത് ।
വർഷാണാമ്യുതം ഭോഗൈഃ ക്രീഡതേ സ ശിവേ പുരേ ॥ 6-6 ॥
ഏകം വടഫലം പക്വം യഃ ശിവായ നിവേദയേത് ।
വർഷലക്ഷം മഹാഭോഗൈഃ ശിവലോകേ മഹീയതേ ॥ 6-7 ॥
യഃ പക്വം ദാഡിമം ചൈകം ദദ്യാദ്വികസിതം നവം ।
ശിവായ ഗുരവേ വാപി തസ്യ പുണ്യഫലം ശൃണു ॥ 6-8 ॥
യാവത്തദ്ബീജസംഖ്യാനം ശോഭനം പരികീർതിതം ।
താവദഷ്ടായുതാന്യുച്ചൈഃ ശിവലോകേ മഹീയതേ ॥ 6-9 ॥
ദ്രാക്ഷാഫലാനി പക്വാനി യഃ ശിവായ നിവേദയേത് ।
ഭക്ത്യാ വാ ശിവയോഗിഭ്യസ്തസ്യ പുണ്യഫലം ശൃണു ॥ 6-10 ॥
യാവത്തത്ഫലസംഖ്യാനമുഭയോർവിനിവേദിതം ।
താവദ്യുഗസഹസ്രാണി രുദ്രലോകേ മഹീയതേ ॥ 6-11 ॥
ദ്രാക്ഷാഫലേഷു യത്പുണ്യം തത്ഖർജൂരഫലേഷു ച ।
തദേവ രാജവൃക്ഷേഷു പാരാവതഫലേഷു ച ॥ 6-12 ॥
യോ നാരംഗഫലം പക്വം വിനിവേദ്യ മഹേശ്വരേ ।
അഷ്ടലക്ഷം മഹാഭോഗൈഃ കൃഡതേ സ ശിവേ പുരേ ॥ 6-13 ॥
ബീജപൂരേഷു തസ്യാർധം തദർധം ലികുചേഷു ച ।
ജംബൂഫലേഷു യത്പുണ്യം തത്പുണ്യം തിന്ദുകേഷു ച ॥ 6-14 ॥
പനസം നാരികേലം വാ ശിവായ വിനിവേദയേത് ।
വർഷലക്ഷം മഹാഭോഗൈഃ ശിവലോകേ മഹീയതേ ॥ 6-15 ॥
പുരുഷം ച പ്രിയാലം ച മധൂകകുസുമാനി ച ।
ജംബൂഫലാനി പക്വാനി വൈകങ്കതഫലാനി ച ॥ 6-16 ॥
നിവേദ്യ ഭക്ത്യാ ശർവായ പ്രത്യേകം തു ഫലേ ഫലേ ।
ദശവർഷസഹസ്രാണി രുദ്രലോകേ മഹീയതേ ॥ 6-17 ॥
ക്ഷീരികായാഃ ഫലം പക്വം യഃ ശിവായ നിവേദയേത് ।
വർഷലക്ഷം മഹാഭോഗൈർമോദതേ സ ശിവേ പുരേ ॥ 6-18 ॥
വാലുകാത്രപുസാദീനി യഃ ഫലാനി നിവേദയേത് ।
ശിവായ ഗുരവേ വാപി പക്വം ച കരമർദകം ॥ 6-19 ॥
ദശവർഷസഹസ്രാണി രുദ്രലോകേ മഹീയതേ ।
ബദരാണി സുപക്വാനി തിന്തിഡീകഫലാനി ച ॥ 6-20 ॥
ദർശനീയാനി പക്വാനി ഹ്യാമലക്യാഃ ഫലാനി ച ।
ഏവമാദീനി ചാന്യാനി ശാകമൂലഫലാനി ച ॥ 6-21 ॥
നിവേദയതി ശർവായ ശൃണു യത്ഫലമാപ്നുയാത് ।
ഏകൈകസ്മിൻഫലേ ഭോഗാൻപ്രാപ്നുയാദനുപൂർവശഃ ॥ 6-22 ॥
പഞ്ചവർഷസഹസ്രാണി രുദ്രലോകേ മഹീയതേ ।
ഗോധൂമചന്ദകാദ്യാനി സുകൃതം സക്തുഭർജിതം ॥ 6-23 ॥
നിവേദയീത ശർവായ തസ്യ പുണ്യഫലം ശൃണു ।
യാവത്തദ്ബീജസംഖ്യാനം ശുഭം ഭ്രഷ്ടം നിവേദയേത് ॥ 6-24 ॥
താവദ്വർഷസഹസ്രാണി രുദ്രലോകേ മഹീയതേ ।
യഃ പക്വാനീക്ഷുദണ്ഡാനി ശിവായ വിനിവേദയേത് ॥ 6-25 ॥
ഗുരവേ വാപി തദ്ഭക്ത്യാ തസ്യ പുണ്യഫലം ശൃണു ।
ഇക്ഷുപർണാനി ചൈകൈകം വർഷലോകം പ്രമോദതേ ॥ 6-26 ॥
സാകം ശിവപുരേ ഭോഗൈഃ പൗണ്ഡ്രം പഞ്ചഗുണം ഫലം ।
നിവേദ്യ പരമേശായ ശുക്തിമാത്രരസസ്യ തു ॥ 6-27 ॥
വർഷകോടിം മഹാഭോഗൈഃ ശിവലോകേ മഹീയതേ ।
നിവേദ്യ ഫാണിതം ശുദ്ധം ശിവായ ഗുരവേ ഽപി വാ ॥ 6-28 ॥
രസാത്സഹസ്രഗുണിതം ഫലം പ്രാപ്നോതി മാനവഃ ।
ഗുഡസ്യ ഫലമേകം യഃ ശിവായ വിനിവേദയേത് ॥ 6-29 ॥
അംബകോടിം ശിവേ ലോകേ മഹാഭോഗൈഃ പ്രമോദതേ ।
ഖണ്ഡസ്യ പലനൈവേദ്യം ഗുഡാച്ഛതഗുണം ഫലം ॥ 6-30 ॥
ഖണ്ഡാത്സഹസ്രഗുണിതം ശർകരായാ നിവേദനേ ।
മത്സണ്ഡികാം മഹാശുദ്ധാം ശങ്കരായ നിവേദയേത് ॥ 6-31 ॥
കൽപകോടിം നരഃ സാഗ്രം ശിവലോകേ മഹീയതേ ।
പരിശുദ്ധം ഭൃഷ്ടമാജ്യം സിദ്ധം ചൈവ സുസംസ്കൃതം ॥ 6-32 ॥
മാസം നിവേദ്യ ശർവായ ശൃണു യത്ഫലമാപ്നുയാത് ।
അശേഷഫലദാനേന യത്പുണ്യം പരികീർതിതം ॥ 6-33 ॥
തത്പുണ്യം പ്രാപ്നുയാത്സർവം മഹാദാനനിവേദനേ ।
പനസാനി ച ദിവ്യാനി സ്വാദൂനി സുരഭീണി ച ॥ 6-34 ॥
നിവേദയേത്തു ശർവായ തസ്യ പുണ്യഫലം ശൃണു ।
കൽപകോടിം നരഃ സാഗ്രം ശിവലോകേ വ്യവസ്ഥിതഃ ॥ 6-35 ॥
പിബൻശിവാമൃതം ദിവ്യം മഹാഭോഗൈഃ പ്രമോദതേ ।
ദിനേ ദിനേ ച യസ്ത്വാപം വസ്ത്രപൂതം സമാചരേത് ॥ 6-36 ॥
സുഖായ ശിവഭക്തേഭ്യസ്തസ്യ പുണ്യഫലം ശൃണു ।
മഹാസരാംസി യഃ കുര്യാദ്ഭവേത്പുണ്യം ശിവാഗ്രതഃ ॥ 6-37 ॥
തത്പുണ്യം സകലം പ്രാപ്യ ശിവലോകേ മഹീയതേ ।
യദിഷ്ടമാത്മനഃ കിഞ്ചിദന്നപാനഫലാദികം ॥ 6-38 ॥
തത്തച്ഛിവായ ദേയം സ്യാദുത്തമം ഭോഗമിച്ഛതാ ।
ന ശിവഃ പരിപൂർണത്വാത്കിഞ്ചിദശ്നാതി കസ്യചിത് ॥ 6-39 ॥
കിന്ത്വീശ്വരനിഭം കൃത്വാ സർവമാത്മനി ദീയതേ ।
ന രോഹതി യഥാ ബീജം സ്വസ്ഥമാശ്രയവർജിതം ॥ 6-40 ॥
പുണ്യബീജം തഥാ സൂക്ഷ്മം നിഷ്ഫലം സ്യാന്നിരാശ്രയം ।
സുക്ഷേത്രേഷു യഥാ ബീജമുപ്തം ഭവതി സത്ഫലം ॥ 6-41 ॥
അൽപമപ്യക്ഷയം തദ്വത്പുണ്യം ശിവസമാശ്രയാത് ।
തസ്മാദീശ്വരമുദ്ദിശ്യ യദ്യദാത്മനി രോചതേ ॥ 6-42 ॥
തത്തദീശ്വരഭക്തേഭ്യഃ പ്രദാതവ്യം ഫലാർഥിനാ ।
യഃ ശിവായ ഗുരോർവാപി രചയേന്മണിഭൂമികം ॥ 6-43 ॥
നൈവേദ്യ ഭോജനാർഥം യഃ പത്ത്രൈഃ പുഷ്പൈശ്ച ശോഭനം ।
യാവത്തത്പത്ത്രപുഷ്പാണാം പരിസംഖ്യാ വിധീയതേ ॥ 6-44 ॥
താവദ്വർഷസഹസ്രാണി സുരലോകേ മഹീയതേ ।
പലാശകദലീപദ്മ- പത്ത്രാണി ച വിശേഷതഃ ॥ 6-45 ॥
ദത്ത്വാ ശിവായ ഗുരവേ ശൃണു യത്ഫലമാപ്നുയാത് ।
യാവത്തത്പത്ത്രസംഖ്യാനമീശ്വരായ നിവേദിതം ॥ 6-46 ॥
താവദബ്ദായുതാനാം സ ലോകേ ഭോഗാനവാപ്നുയാത് ।
യാവത്താംബുലപത്ത്രാണി പൂഗാംശ്ച വിനിവേദയേത് ॥ 6-47 ॥
താവന്തി വർഷലക്ഷാണി ശിവലോകേ മഹീയതേ ।
യച്ഛുദ്ധം ശംഖചൂർണം വാ ഗുരവേ വിനിവേദയേത് ॥ 6-48 ॥
താംബൂലയോഗസിദ്ധ്യർഥം തസ്യ പുണ്യഫലം ശൃണു ।
യാവത്താംബൂലപത്ത്രാണി ചൂർണമാനേന ഭക്ഷയേത് ॥ 6-49 ॥
താവദ്വർഷസഹസ്രാണി രുദ്രലോകേ മഹീയതേ ।
ജാതീഫലം സകങ്കോലം ലതാകസ്തൂരികോത്പലം ॥ 6-50 ॥
ഇത്യേതാനി സുഗന്ധീനി ഫലാനി വിനിവേദയേത് ।
ഫലേ ഫലേ മഹാഭോഗൈർവർഷലക്ഷം തു യത്നതഃ ॥ 6-51 ॥
കാമികേന വിമാനേന ക്രീഡതേ സ ശിവേ പുരേ ।
ത്രുടിമാത്രപ്രമാണേന കർപൂരസ്യ ശിവേ ഗുരൗ ॥ 6-52 ॥
വർഷകോടിം മഹാഭോഗൈഃ ശിവലോകേ മഹീയതേ ।
പൂഗതാംബൂലപത്ത്രാണാമാധാരം യോ നിവേദയേത് ॥ 6-53 ॥
വർഷകോട്യഷ്ടകം ഭോഗൈഃ ശിവലോകേ മഹീയതേ ।
യശ്ചൂഏണാധാരസത്പാത്രം കസ്യാപി വിനിവേദയേത് ॥ 6-54 ॥
മോദതേ സ ശിവേ ലോകേ വർഷകോടീശ്ചതുർദശ ।
മൃത്കാഷ്ഠവംശഖണ്ഡാനി യഃ പ്രദദ്യാച്ഛിവാശ്രമേ ॥ 6-55 ॥
പ്രാപ്നുയാദ്വിപുലാൻഭോഗാന്ദിവ്യാഞ്ഛിവപുരേ നരഃ ।
മാണിക്യം കലശം പാത്രീം സ്ഥാല്യാദീൻഭാണ്ഡസമ്പുടാൻ ॥ 6-56 ॥
ദത്ത്വാ ശിവാഗ്രജസ്തേഭ്യഃ ശിവലോകേ മഹീയതേ ।
തോയാധാരപിധാനാനി മൃദ്വസ്ത്രതരുജാനി വാ ॥ 6-57 ॥
വംശാലാബുസമുത്ഥാനി ദത്ത്വാപ്നോതി ശിവം പുരം ।
പഞ്ചസംമാർജനീതോയം ഗോമയാഞ്ജനകർപടാൻ ॥ 6-58 ॥
മൃത്കുംഭപീടികാം ദദ്യാദ്ഭോഗാഞ്ഛിവപുരേ ലഭേത് ।
യഃ പുഷ്പധൂപഗന്ധാനാം ദധിക്ഷീരഘൃതാംഭസാം ॥ 6-59 ॥
ദദ്യാദാധാരപാത്രാണി ശിവലോകേ സ ഗച്ഛതി ।
വംശതാലാദിസംഭൂതം പുഷ്പാധാരകരണ്ഡകം ॥ 6-60 ॥
ഇത്യേവമാദ്യാന്യോ ദദ്യാച്ഛിവലോകമവാപ്നുയാത് ।
യഃ സ്രുക്സ്രുവാദിപാത്രാണി ഹോമാർഥം വിനിവേദയേത് ॥ 6-61 ॥
വർഷകോടിം മഹാഭാഗൈഃ ശിവലോകേ മഹീയതേ ।
യഃ സർവധാതുസംയുക്തം ദദ്യാല്ലവണപർവതം ॥ 6-62 ॥
ശിവായ ഗുരവേ വാപി തസ്യ പുണ്യഫലം ശൃണു ।
കൽപകോടിസഹസ്രാണി കൽപകോടിശതാനി ച ॥ 6-63 ॥
സ ഗോത്രഭൃത്യസംയുക്തോ വസേച്ഛിവപുരേ നരഃ ।
വിമാനയാനൈഃ ശ്രീമദ്ഭിഃ സർവകാമസമന്വിതൈഃ ॥ 6-64 ॥
ഭോഗാൻഭുക്ത്വാ തു വിപുലാംസ്തദന്തേ സ മഹീപതിഃ ।
മനഃശിലാം ഹരീതാലം രാജപട്ടം ച ഹിംഗുലം ॥ 6-65 ॥
ഗൈരികം മണിദന്തം ച ഹേമതോയം തഥാഷ്ടമം ।
യശ്ച തം പർവതവരം ശാലിതണ്ഡുലകൽപിതം ॥ 6-66 ॥
ശിവായഗുരവേ വാപി തസ്യ പുണ്യഫലം ശൃണു ।
കൽപകോടിശതം സാഗ്രം ഭോഗാൻഭുങ്ക്തേ ശിവേ പുരേ ॥ 6-67 ॥
യഃ സർവധാന്യശിഖരൈരുപേതം യവപർവതം ।
ഘൃതതൈലനദീയുക്തം തസ്യ പുണ്യഫലം ശൃണു ॥ 6-68 ॥
കൽപകോടിശതം സാഗ്രം ഭോഗാൻഭുങ്ക്തേ ശിവേ പുരേ ।
സമസ്തകുലജൈഃ സാർധം തസ്യാന്തേ സ മഹീപതിഃ ॥ 6-69 ॥
തിലധേനും പ്രദദ്യാദ്യഃ കൃത്വാ കൃഷ്ണാജിനേ നരഃ ।
കപിലായാഃ പ്രദാനസ്യ യത്ഫലം തദവാപ്നുയാത് ॥ 6-70 ॥
ഘൃതധേനും നരഃ കൃത്വാ കാംസ്യപാത്രേ സകാഞ്ചനാൻ ।
നിവേദ്യ ഗോപ്രദാനസ്യ സമഗ്രം ഫലമാപ്നുയാത് ॥ 6-71 ॥
ദ്വീപിചർമണി യഃ സ്ഥാപ്യ പ്രദദ്യാല്ലവണാഢകം ।
അശേഷരസദാനസ്യ യത്പുണ്യം തദവാപ്നുയാത് ॥ 6-72 ॥
മരിചാഢേന കുർവീത(?) മാരീചം നാമ പർവതം ।
ദദ്യാദ്യജ്ജീരകം പൂർവമാഗ്നേയം ഹിംഗുമുത്തമം ॥ 6-73 ॥
ദക്ഷിണേ ഗുഡശുണ്ഠീം ച നൈരൃതേ നാഗകേസരം ।
പിപ്പലീം പശ്ചിമേ ദദ്യാദ്വായവ്യേ കൃഷ്ണജീരകം ॥ 6-74 ॥
കൗബേര്യാമജമോദം ച ത്വഗേലാശ്ചേശദൈവതേ ।
കുസ്തുംബര്യാഃ പ്രദേയാഃ സ്യുർബഹിഃ പ്രാകാരതഃ സ്ഥിതാഃ ॥ 6-75 ॥
കകുഭാമന്തരാലേഷു സമന്താത്സൈന്ധവം ന്യസേത് ।
സപുഷ്പാക്ഷതതോയേന ശിവായ വിനിവേദയേത് ॥ 6-76 ॥
യാവത്തദ്ദീപസംഖ്യാനം സർവമേകത്ര പർവതേ ।
താവദ്വർഷശതാദൂർധ്വം ഭോഗാൻഭുങ്ക്തേ ശിവേ പുരേ ॥ 6-77 ॥
കൂശ്മാണ്ഡം മധ്യതഃ സ്ഥാപ്യ കാലിംഗം പൂർവതോ ന്യസേത് ।
ദക്ഷിണേ ക്ഷീരതുംബീം തു വൃന്താകം പശ്ചിമേ ന്യസേത് ॥ 6-78 ॥
പടീസാന്യുത്തരേ സ്ഥാപ്യ കർകടീമീശദൈവതേ ।
ന്യസേദ്ഗജപടോലാംശ്ച മധുരാന്വഹ്നിദൈവതേ ॥ 6-79 ॥
കാരവേല്ലാംശ്ച നൈരൃത്യാം വായവ്യാം നിംബകം ഫലം ।
ഉച്ചാവചാനി ചാന്യാനി ഫലാനി സ്ഥാപയേദ്ബഹിഃ ॥ 6-80 ॥
അഭ്യർച്യ പുഷ്പധൂപൈശ്ച സമന്താത്ഫലപർവതം ।
ശിവായ ഗുരവേ വാപി പ്രണിപത്യ നിവേദയേത് ॥ 6-81 ॥
യാവത്തത്ഫലസംഖ്യാനം തദ്ദീപാനാം ച മധ്യതഃ ।
താവദ്വർഷസഹസ്രാണി രുദ്രലോകേ മഹീയതേ ॥ 6-82 ॥
മൂലകം മധ്യതഃ സ്ഥാപ്യ തത്പൂർവേ വാലമൂലകം ।
ആഗ്നേയ്യാം വാസ്തുകം സ്ഥാപ്യ യാമ്യായാം ക്ഷാരവാസ്തുകം ॥ 6-83 ॥
പാലക്യം നൈരൃതേ സ്ഥാപ്യ സുമുഖം പശ്ചിമേ ന്യസേത് ।
കുഹദ്രകം ച വായവ്യാമുത്തരേ വാപി താലികീം ॥ 6-84 ॥
കുസുംഭശാകമൈശാന്യാം സർവശാകാനി തദ്ബഹിഃ ।
പൂർവക്രമേണ വിന്യസ്യ ശിവായ വിനിവേദയേത് ॥ 6-85 ॥
യാവത്തന്മൂലനാലാനാം പത്ത്രസംഖ്യാ ച കീർതിതാ ।
താവദ്വർഷസഹസ്രാണി രുദ്രലോകേ മഹീയതേ ॥ 6-86 ॥
ദത്ത്വാ ലഭേന്മഹാഭോഗാൻഗുഗ്ഗുൽവദ്രേഃ പലദ്വയം ।
വർഷകോടിദ്വയം സ്വർഗേ ദ്വിഗുണം ഗുഡമിശ്രിതൈഃ ॥ 6-87 ॥
ഗുഡാർദ്രകം സലവണമാമ്രമഞ്ജരിസംയുതം ।
നിവേദ്യ ഗുരവേ ഭക്ത്യാ സൗഭാഗ്യം പരമം ലഭേത് ॥ 6-88 ॥
ഹസ്താരോപ്യേണ വാ കൃത്വാ മഹാരത്നാന്വിതാം മഹീം ।
നിവേദയിത്വാ ശർവായ ശിവതുല്യഃ പ്രജായതേ ॥ 6-89 ॥
വജ്രേന്ദ്രനീലവൈഡൂര്യ- പദ്മരാഗം സമൗക്തികം ।
കീടപക്ഷം സുവർണം ച മഹാരത്നാനി സപ്ത വൈ ॥ 6-90 ॥
യശ്ച സിംഹാസനം ദദ്യാന്മഹാരത്നാന്വിതം നൃപഃ ।
ക്ഷുദ്രരത്നൈശ്ച വിവിധൈസ്തസ്യ പുണ്യഫലം ശൃണു ॥ 6-91 ॥
കുലത്രിംശകസംയുക്തഃ സാന്തഃപുരപരിച്ഛദഃ ।
സമസ്തഭൃത്യസംയുക്തഃ ശിവലോകേ മഹീയതേ ॥ 6-92 ॥
തത്ര ഭുക്ത്വാ മഹാഭോഗാൻശിവതുല്യപരാക്രമഃ ।
ആമഹാപ്രലയം യാവത്തദന്തേ മുക്തിമാപ്നുയാത് ॥ 6-93 ॥
യദി ചേദ്രാജ്യമാകങ്ക്ഷേത്തതഃ സർവസമാഹിതഃ ।
സപ്തദ്വീപസമുദ്രായാഃ ക്ഷിതേരധിപതിർഭവേത് ॥ 6-94 ॥
ജന്മകോടിസഹസ്രാണി ജന്മകോടിശതാനി ച ।
രാജ്യം കൃത്വാ തതശ്ചാന്തേ പുനഃ ശിവപുരം വ്രജേത് ॥ 6-95 ॥
ഏതദേവ ഫലം ജ്ഞേയം മകുടാഭരണാദിഷു ।
രത്നാസനപ്രദാനേന പാദുകേ വിനിവേദയേത് ॥ 6-96 ॥
ദദ്യാദ്യഃ കേവലം വജ്രം ശുദ്ധം ഗോധൂമമാത്രകം ।
ശിവായ സ ശിവേ ലോകേ തിഷ്ഠേദാപ്രലയം സുഖീ ॥ 6-97 ॥
ഇന്ദ്രനീലപ്രദാനേന സ വൈഡൂര്യപ്രദാനതഃ ।
മോദതേ വിവിധൈർഭോഗൈഃ കൽപകോടിം ശിവേ പുരേ ॥ 6-98 ॥
മസൂരമാത്രമപി യഃ പദ്മരാഗം സുശോഭനം ।
നിവേദയിത്വാ ശർവായ മോദതേ കാലമക്ഷയം ॥ 6-99 ॥
നിവേദ്യ മൗക്തികം സ്വച്ഛമേകഭാഗൈകമാത്രകം ।
ഭോഗൈഃ ശിവപുരേ ദിവ്യൈഃ കൽപകോടിം പ്രമോദതേ ॥ 6-100 ॥
കീടപക്ഷം മഹാശുദ്ധം നിവേദ്യ യവമാത്രകം ।
ശിവായാദ്യഃ ശിവേ ലോകേ മോദതേ കാലമക്ഷയം ॥ 6-101 ॥
ഹേമ്നാ കൃത്വാ ച യഃ പുഷ്പമപി മാഷകമാത്രകം ।
നിവേദയിത്വാ ശർവായ വർഷകോടിം വസേദ്ദിവി ॥ 6-102 ॥
ക്ഷുദ്രരത്നാനി യോ ദദ്യാദ്ധേമ്നി ബദ്ധാനി ശംഭവേ ।
മോദതേ സ ശിവേ ലോകേ കൽപകോട്യയുതം നരഃ ॥ 6-103 ॥
യഥാ യഥാ മഹാരത്നം ശോഭനം ച യഥാ യഥാ ।
തഥാ തഥാ മഹത്പുണ്യം ജ്ഞേയം തച്ഛിവദാനതഃ ॥ 6-104 ॥
ഭൂമിഭാഗേ സ(?)വിസ്തീഋണേ ജംബൂദ്വീപം പ്രകൽപയേത് ।
അഷ്ടാവരണസംയുക്തം നഗേന്ദ്രാഷ്ടകഭൂഷിതം ॥ 6-105 ॥
തന്മധ്യേ കാരയേദ്ദിവ്യം മേരുപ്രാസാദമുത്തമം ।
അനേകശിഖരാകീർണമശേഷാമരസംയുതം ॥ 6-106 ॥
ബഹിഃ സുവർണനിചിതം സർവരത്നോപശോഭിതം ।
ചതുഃപ്രഗ്രീവകോപേതം ചക്ഷുർലിംഗസമായുതം ॥ 6-107 ॥
ചതുർദിക്ഷു വനോപേതം ചതുർഭിഃ സംയുതൈഃ ശരൈഃ ।
ചതുർണാം പുരയുക്തേന പ്രാകാരേണ ച സംയുതം ॥ 6-108 ॥
മേരുപ്രാസാദമിത്യേവം ഹേമരത്നവിഭൂഷിതം ।
യഃ കാരയേദ്വനോപേതം സോ ഽനന്തഫലമാപ്നുയാത് ॥ 6-109 ॥
ഭൂമ്യംഭഃപരമാണൂനാം യഥാ സംഖ്യാ ന വിദ്യതേ ।
ശിവായതനപുണ്യസ്യ തഥാ സംഖ്യാ ന വിദ്യതേ ॥ 6-110 ॥
കുലത്രിംശകസംയുക്തഃ സർവഭൃത്യസമന്വിതഃ ।
കലത്രപുത്രമിത്രൈശ്ച സർവസ്വജനസംയുതഃ ॥ 6-111 ॥
ആശ്ര്തിതോപാശ്രിതൈഃ സർവൈരശേഷഗണസംയുതഃ ।
യഥാ ശിവസ്തഥൈവായം ശർവലോകേ സ പൂജ്യതേ ॥ 6-112 ॥
ന ച മാനുഷ്യകം ലോകമാഗച്ഛേത്കൃപണം പുനഃ ।
സർവജ്ഞഃ പരിപൂർണശ്ച മുക്തഃ സ്വാത്മനി തിഷ്ഠതി ॥ 6-113 ॥
യഃ ശിവായ വനം കൃത്വാ മുദാബ്ദസലിലോത്ഥിതം(?) ।
തദ്ദണ്ഡകോപശോഭം ച ഹസ്തേ കുർവീത സർവദാ ॥ 6-114 ॥
ശോഭയേദ്ഭൂതനാഥം വാ ചന്ദ്രശാലാം ക്വചിത്ക്വചിത് ।
വേദീം വാഥാഭ്യപദ്യന്ത പ്രോന്നതാഃ സ്തംഭപങ്ക്തയഃ ॥ 6-115 ॥
ശാതകുംഭമയീം വാപി സർവലക്ഷണസംയുതാം ।
ഈശ്വരപ്രതിമാം സൗമ്യാം കാരയേത്പുരുഷോച്ഛ്രിതാം ॥ 6-116 ॥
ത്രിശൂലസവ്യഹസ്താം ച വരദാഭയദായികാം ।
സവ്യഹസ്താക്ഷമാലാം ച ജടാകുസുമഭൂഷിതാം ॥ 6-117 ॥
പദ്മസിംഹാസനാസീനാം വൃഷസ്ഥാം വാ സമുച്ഛ്രിതാം ।
വിമാനസ്ഥാം രഥസ്ഥാം വാ വേദിസ്ഥാം വാ പ്രഭാന്വിതാം ॥ 6-118 ॥
സൗമ്യവക്ത്രാം കരാലാം വാ മഹാഭൈരവരൂപിണീം ।
അത്യുച്ഛ്രിതാം സുവിസ്തീർണാം നൃത്യസ്ഥാം യോഗസംസ്ഥിതാം ॥ 6-119 ॥
കുര്യാദസംഭവേ ഹേമ്നസ്താരേണ വിമലേന ച ।
ആരകൂടമയീം വാപി താമ്രമൃച്ഛൈലദാരുജാം ॥ 6-120 ॥
അശേഷകൈഃ സരൂപൈശ്ച വർണകൈർവാ പടേ ലിഖേത് ।
കുഡ്യേ വാ ഫലകേ വാപി ഭക്ത്യാ വിത്താനുസാരതഃ ॥ 6-121 ॥
ഏകാം സപരിവാരാം വാ പാർവതീം ഗണസംയുതാം ।
പ്രതീഹാരസമോപേതാം(?) കുര്യാദേവാവികൽപതഃ ॥ 6-122 ॥
പീഠം വാ കാരയേദ്രൗപ്യം താമ്രം പിത്തലസംഭവം ।
ചതുർമുഖൈകവക്ത്രം വാ ബഹിഃ കാഞ്ചനസംസ്കൃതം ॥ 6-123 ॥
പൃഥക്പൃഥഗനേകാനി കാരയിത്വാ മുഖാനി തു ।
സൗമ്യഭൈരവരൂപാണി ശിവസ്യ ബഹുരൂപിണഃ ॥ 6-124 ॥
നാനാഭരണയുക്താനി ഹേമരൗപ്യകൃതാനി ച ।
ശിവസ്യ രഥയാത്രായാം താനി ലോകസ്യ ദർശയേത് ॥ 6-125 ॥
ഉക്താനി യാനി പുണ്യാനി സങ്ക്ഷേപേണ പൃഥക്പൃഥക് ।
കൃത്വൈകേന മമൈതേഷാമക്ഷയം ഫലമാപ്നുയാത് ॥ 6-126 ॥
മാതുഃ പിതുഃ സഹോപായൈർ(?) ദശഭിർദശഭിഃ കുലൈഃ ।
കലത്രപുത്രമിത്രാദ്യൈർഭൃത്യൈര്യുക്തഃ സ ബാന്ധവൈഃ ॥ 6-127 ॥
അയുതേന വിമാനാനാം സർവകാമയുതേന ച ।
ഭുങ്ക്തേ സ്വയം മഹാഭോഗാനന്തേ മുക്തിമവാപ്നുയാത് ॥ 6-128 ॥
മണ്ഡപസ്തംഭപര്യന്തേ കീലയേദ്ദർപണാന്വിതം ।
അഭിഷിച്യ ജനാ യസ്മിൻപുജാം കുവന്തി ബിൽവകൈഃ ॥ 6-129 ॥
കാലകാലകൃതിം കൃത്വാ കീലയേദ്യഃ ശിവാശ്രമേ ।
സർവലോകോപകാരായ പൂജയേച്ച ദിനേ ദിനേ ॥ 6-130 ॥
ധൂപവേലാപ്രമാണാർഥം കൽപയേദ്യഃ ശിവാശ്രമേ ।
ക്ഷരന്തീം പൂര്യമാണാം വാ സദായാമേ ഘടീം നൃപഃ ॥ 6-131 ॥
ഏഷാമേകതമം പുണ്യം കൃത്വാ പാപവിവർജിതഃ ।
ശിവലോകേ നരഃ പ്രാപ്യ സർവജ്ഞഃ സ സുഖീ ഭവേത് ॥ 6-132 ॥
രഥയാത്രാം പ്രവക്ഷ്യാമി ശിവസ്യ പരമാത്മനഃ ।
സർവലോകഹിതാർഥായ മഹാശിൽപിവിനിർമിതാം ॥ 6-133 ॥
രഥമധ്യേ സമാവേശ്യ യഥാ യഷ്ടിം തു കീലയേത് ।
യഷ്ടേർമധ്യേ സ്ഥിതം കാര്യം വിമാനമതിശോഭിതം ॥ 6-134 ॥
പഞ്ചഭൗമം ത്രിഭൗമം വാ ദൃഢവംശപ്രകൽപിതം ।
കർമണാ സുനിബദ്ധം ച രജ്ജുഭിശ്ച സുസംയുതം ॥ 6-135 ॥
പഞ്ചശാലാണ്ഡികൈര്യുക്തം നാനാഭക്തിസമന്വിതം ।
ചിത്രവർണപരിച്ഛന്നം പടൈർവാ വർണകാന്വിതൈഃ ॥ 6-136 ॥
ലംബകൈഃ സൂത്രദാമ്നാ ച ഘണ്ടാചാമരഭൂഷിതം ।
ബുദ്ബുദൈരർധചന്ദ്രൈശ്ച ദർപണൈശ്ച സമുജ്ജ്വലം ॥ 6-137 ॥
കദല്യർധധ്വജൈര്യുക്തം മഹാച്ഛത്ത്രം മഹാധ്വജം ।
പുഷ്പമാലാപരിക്ഷിപ്തം സർവശോഭാസമന്വിതം ॥ 6-138 ॥
മഹാരഥവിമാനേ ഽസ്മിൻസ്ഥാപയേദ്ഗണസംയുതം ।
ഈശ്വരപ്രതിമാം ഹേമ്നി പ്രഥമേ പുരമണ്ഡപേ ॥ 6-139 ॥
മുഖത്രയം ച ബധ്നീയാദ്ബഹിഃ കുര്യാത്തഥാശ്രിതം ।
പുരേ പുരേ ബഹിർദിക്ഷു ഗൃഹകേഷു സമാശ്രിതം ॥ 6-140 ॥
ചതുഷ്കം ശിവവക്ത്രാണാം സംസ്ഥാപ്യ പ്രതിപൂജയേത് ।
ദിനത്രയം പ്രകുർവീത സ്നാനമർചനഭോജനം ॥ 6-141 ॥
നൃത്യക്രീഡാപ്രയോഗേണ ഗേയമംഗലപാഠകൈഃ ।
മഹാവാദിത്രനിർഘോഷൈഃ പൗഷപൂർണിമപർവണി ॥ 6-142 ॥
ഭ്രാമയേദ്രാജമാർഗേണ ചതുർഥേ ഽഹനി തദ്രഥം ।
തതഃ സ്വസ്ഥാനമാനീയ തച്ഛേഷമപി വർധയേത് ॥ 6-143 ॥
അവധാര്യ ജഗദ്ധാത്രീ പ്രതിമാമവതാരയേത് ।
മഹാവിമാനയാത്രൈഷാ കർതവ്യാ പട്ടകേ ഽപി വാ ॥ 6-144 ॥
വംശൈർനവൈഃ സുപക്വൈശ്ച കടം കുര്യാദ്ഭരക്ഷമം(?) ।
വൃത്തം ദ്വിഗുണദീർഘം ച ചതുരശ്രമധഃ സമം ॥ 6-145 ॥
സർവത്ര ചർമണാ ബദ്ധം മഹായഷ്ടിസമാശ്രിതം ।
മുഖം ബദ്ധം ച കുർവീത വംശമണ്ഡലിനാ ദൃഢം ॥ 6-146 ॥
കടേ ഽസ്മിംസ്താനി വസ്ത്രാണി സ്ഥാപ്യ ബധ്നീത യത്നതഃ ।
ഉപര്യുപരി സർവാണി തന്മധ്യേ പ്രതിമാം ന്യസേത് ॥ 6-147 ॥
വർണകൈഃ കുങ്കുമാദ്യൈശ്ച ചിത്രപുഷ്പൈശ്ച പൂജയേത് ।
നാനാഭരണപൂജാഭിർമുക്താഹാരപ്രലംബിഭിഃ ॥ 6-148 ॥
രഥസ്യ മഹതോ മധ്യേ സ്ഥാപ്യ പട്ടദ്വയം ദൃഢം ।
അധരോത്തരഭാഗേന മധ്യേ ഛിദ്രസമന്വിതം ॥ 6-149 ॥
കടിയഷ്ടേരധോഭാഗം സ്ഥാപ്യ ഛിദ്രമയം ശുഭൈഃ ।
ആബദ്ധ്യ കീലയേദ്യത്നാദ്യഷ്ട്യർധം ച ധ്വജാഷ്ടകം ॥ 6-150 ॥
കടസ്യ പൃഷ്ടം സർവത്ര കാരയേത്പടസംവൃതം ।
തത്പടേ ച ലിഖേത്സോമം സഗണം സവൃഷം ശിവം ॥ 6-151 ॥
വിചിത്രപുഷ്പസ്രഗ്ദാമ്നാ സമന്താദ്ഭൂഷയേത്കടം ।
രവകൈഃ കിങ്കിണീജാലൈർഘണ്ടാചാമരഭൂഷിതൈഃ ॥ 6-152 ॥
മഹാപൂജാവിശേഷൈശ്ച കൗതൂഹലസമന്വിതം ।
വാദ്യാരംഭോപചാരേണ മാർഗശോഭാം പ്രകൽപയേത് ॥ 6-153 ॥
തദ്രഥം ഭ്രാമയേദ്യത്നാദ്രാജമാർഗേണ സർവതഃ ।
തതഃ സ്വാശ്രമമാനീയ സ്ഥാപയേത്തത്സമീപതഃ ॥ 6-154 ॥
മഹാശബ്ദം തതഃ കുര്യാത്താലത്രയസമന്വിതം ।
തതസ്തുഷ്ണീം സ്ഥിതേ ലോകേ തച്ഛാന്തിമിഹ ധാരയേത് ॥ 6-155 ॥
ശിവം തു സർവജഗതഃ ശിവം ഗോബ്രാഹ്മണസ്യ ച ।
ശിവമസ്തു നൃപാണാം ച തദ്ഭക്താനാം ജനസ്യ ച ॥ 6-156 ॥
രാജാ വിജയമാപ്നോതി പുത്രപൗത്രൈശ്ച വർധതാം ।
ധർമനിഷ്ഠശ്ച ഭവതു പ്രജാനാം ച ഹിതേ രതഃ ॥ 6-157 ॥
കാലവർഷീ തു പർജന്യഃ സസ്യസമ്പത്തിരുത്തമാ ।
സുഭിക്ഷാത്ക്ഷേമമാപ്നോതി കാര്യസിദ്ധിശ്ച ജായതാം ॥ 6-158 ॥
ദോഷാഃ പ്രയാന്തു നാശം ച ഗുണാഃ സ്ഥൈര്യം ഭജന്തു വഃ ।
ബഹുക്ഷീരയുതാ ഗാവോ ഹൃഷ്ടപുഷ്ടാ ഭവന്തു വഃ ॥ 6-159 ॥
ഏവം ശിവമഹാശാന്തിമുച്ചാര്യ ജഗതഃ ക്രമാത് ।
അഭിവർധ്യ തതഃ ശേഷമൈശ്വരീം സാർവകാമികീം ॥ 6-160 ॥
ശിവമാലാം സമാദായ സദാസീപരിചാരികഃ ।
ഫലൈർഭക്ഷൈശ്ച സംയുക്താം ഗൃഹ്യ പാത്രീം നിവേശയേത് ॥ 6-161 ॥
പാത്രീം ച ധാരയേന്മൂർധ്നാ സോഷ്ണീഷാം ദേവപുത്രകഃ ।
അലങ്കൃതഃ ശുക്ലവാസാ ധാർമികഃ സതതം ശുചിഃ ॥ 6-162 ॥
തതശ്ച താം സമുത്ക്ഷിപ്യ പാണിനാ ധാരയേദ്ബുധഃ ।
പ്രബ്രൂയാദപരശ്ചാത്ര ശിവധർമസ്യ ഭാജകഃ ॥ 6-163 ॥
തോയം യഥാ ഘടീസംസ്ഥമജസ്രം ക്ഷരതേ തഥാ ।
ക്ഷരതേ സർവലോകാനാം തദ്വദായുരഹർനിശം ॥ 6-164 ॥
യദാ സർവം പരിത്യജ്യ ഗന്തവ്യമവശൈർധ്രുവം ।
തദാ ന ദീയതേ കസ്മാത്പാഥേയാർഥമിദം ധനം ॥ 6-165 ॥
കലത്രപുത്രമിത്രാണി പിതാ മാതാ ച ബാന്ധവാഃ ।
തിഷ്ഠന്തി ന മൃതസ്യാർഥേ പരലോകേ ധനാനി ച ॥ 6-166 ॥
നാസ്തി ധർമസമം മിത്രം നാസ്തി ധർമസമഃ സഖാ ।
യതഃ സർവൈഃ പരിത്യക്തം നരം ധർമോ ഽനുഗച്ഛതി ॥ 6-167 ॥
തസ്മാദ്ധർമം സമുദ്ദിശ്യ യഃ ശേഷാമഭിവർധയേത് ।
സമസ്തപാപനിർമുക്തഃ ശിവലോകം സ ഗച്ഛതി ॥ 6-168 ॥
ഉപര്യുപരി വിത്തേന യഃ ശേഷാമഭിവർധയേത് ।
തസ്യേയമുത്തമാ ദേയാ യതശ്ചാന്യാ ന വർധതേ ॥ 6-169 ॥
ഇത്യേവം മധ്യമാം ശേഷാം വർധയേദ്വാ കനീയസീം ।
തതസ്തേഷാം പ്രദാതവ്യാ സർവശോകസ്യ ശാന്തയേ ॥ 6-170 ॥
യേനോത്തമാ ഗൃഹീതാ സ്യാച്ശിവശേഷാ മഹീയസീ ।
പ്രാപണീയാ ഗൃഹം തസ്യ തഥൈവ ശിരസാ വൃതാ ॥ 6-171 ॥
ധ്വജച്ഛത്ത്രവിമാനാദ്യൈർമഹാവാദിത്രനിഃസ്വനൈഃ ।
ഗൃഹദ്വാരം തതഃ പ്രാപ്തമർചയിത്വാ നിവേശയേത് ॥ 6-172 ॥
ദദ്യാദ്ഗോത്രകലത്രാണാം ഭൃത്യാനാം സ്വജനസ്യ ച ।
തർപയേച്ചാനതാൻ(?) ഭക്ത്യാ വാദിത്രധ്വജവാഹകാൻ ॥ 6-173 ॥
ഏവമാദീയതേ ഭക്ത്യാ യഃ ശിവസ്യോത്തമാ ഗൃഹേ ।
ശോഭയാ രാജമാർഗേണ തസ്യ ധർമഫലം ശൃണു ॥ 6-174 ॥
സമസ്തപാപനിർമുക്തഃ സമസ്തകുലസംയുതഃ ।
ശിവലോകമവാപ്നോതി സഭൃത്യപരിചാരകഃ ॥ 6-175 ॥
തത്ര ദിവ്യൈർമഹാഭോഗൈർവിമാനൈഃ സാർവകാമികൈഃ ।
കൽപാനാം ക്രീഡതേ കോടിമന്തേ നിർവാണമാപ്നുയാത് ॥ 6-176 ॥
രഥസ്യ യാത്രാം യഃ കുര്യാദിത്യേവമുപശോഭയാ ।
ഭക്ഷഭോജ്യപ്രദാനൈശ്ച തത്ഫലം ശൃനു യത്നതഃ ॥ 6-177 ॥
അശേഷപാപനിർമുക്തഃ സർവഭൃത്യസമന്വിതഃ ।
കുലത്രിംശകമുദ്ധൃത്യ സുഹൃദ്ഭിഃ സ്വജനൈഃ സഹ ॥ 6-178 ॥
സർവകാമയുതൈർദിവ്യൈഃ സ്വച്ഛന്ദഗമനാലയൈഃ ।
മഹാവിമാനൈഃ ശ്രീമദ്ഭിർദിവ്യസ്ത്രീപരിവാരിതഃ ॥ 6-179 ॥
ഇച്ഛയാ ക്രീഡതേ ഭോഗൈഃ കൽപകോടിം ശിവേ പുരേ ।
ജ്ഞാനയോഗം തതഃ പ്രാപ്യ സംസാരാദവമുച്യതേ ॥ 6-180 ॥
ശിവസ്യ രഥയാത്രായാമുപവാസപരഃ ക്ഷമീ ।
പുരതഃ പൃഷ്ഠതോ വാപി ഗച്ഛംസ്തസ്യ ഫലം ശൃണു ॥ 6-181 ॥
അശേഷപാപനിർമുക്തഃ ശുദ്ധഃ ശിവപുരം ഗതഃ ।
മഹാരഥോപമൈര്യാനൈഃ കൽപാശീതിം പ്രമോദതേ᳚ ॥ 6-182 ॥
ധ്വജച്ഛത്ത്രപതാകാഭിർദീപദർപണചാമരൈഃ ।
ധൂപൈർവിതാനകലശൈരുപശോഭാ സഹസ്രശഃ ॥ 6-183 ॥
ഗൃഹീത്വാ യാതി പുരതഃ സ്വേച്ഛയാ വാ പരേച്ഛയാ ।
സമ്പർകാത്കൗതുകാല്ലാഭാച്ഛിവലോകേ വ്രജന്തേ തേ ॥ 6-184 ॥
ശിവസ്യ രഥയാത്രാം തു യഃ പ്രപശ്യതി ഭക്തിതഃ ।
പ്രസംഗാത്കൗതുകാദ്വാപി തേ ഽപി യാന്തി ശിവം പുരം ॥ 6-185 ॥
നാനായത്നാദിശേഷാന്തേ നാനാപ്രേക്ഷണകാനി ച ।
കുർവീത രഥയാത്രായാം രമതേ ച വിഭൂഷിതാ ॥ 6-186 ॥
തേ ഭോഗൈർവിവിധൈർദിവ്യൈഃ ശിവാസന്നാ ഗണേശ്വരാഃ ।
ക്രീഡന്തി രുദ്രഭവനേ കൽപാനാം വിംശതീർനരാഃ ॥ 6-187 ॥
മഹതാ ജ്ഞാനസംഘേന തസ്മാച്ഛിവരഥേന ച ।
പൃഥക്ജീവാ മൃതാ യാന്തി ശിവലോകം ന സംശയഃ ॥ 6-188 ॥
ശ്രീപർവതേ മഹാകാലേ വാരാണസ്യാം മഹാലയേ ।
ജൽപേശ്വരേ കുരുക്ഷേത്രേ കേദാരേ മണ്ഡലേശ്വരേ ॥ 6-189 ॥
ഗോകർണേ ഭദ്രകർണേ ച ശങ്കുകർണേ സ്ഥലേശ്വരേ ।
ഭീമേശ്വരേ സുവർണാക്ഷേ കാലഞ്ജരവനേ തഥാ ॥ 6-190 ॥
ഏവമാദിഷു ചാന്യേഷു ശിവക്ഷേത്രേഷു യേ മൃതാഃ ।
ജീവാശ്ചരാചരാഃ സർവേ ശിവലോകം വ്രജന്തി തേ ॥ 6-191 ॥
പ്രയാഗം കാമികം തീർഥമവിമുക്തം തു നൈഷ്ഠികം ।
ശ്രീപർവതം ച വിജ്ഞേയമിഹാമുത്ര ച സിദ്ധിദം ॥ 6-192 ॥
പ്രസംഗേനാപി യഃ പശ്യേദന്യത്ര പ്രസ്ഥിതഃ ക്വചിത് ।
ശ്രീപർവതം മഹാപുണ്യം സോ ഽപി യാതി ശിവം പുരം ॥ 6-193 ॥
വ്രജേദ്യഃ ശിവതീർഥാനി സർവപാപൈഃ പ്രമുച്യതേ ।
പാപയുക്തഃ ശിവജ്ഞാനം പ്രാപ്യ നിർവാണമാപ്നുയാത് ॥ 6-194 ॥
തീർഥസ്ഥാനേഷു യഃ ശ്രാദ്ധം ശിവരാത്രേ പ്രയത്നതഃ ।
കൽപയിത്വാനുസാരേണ കാലസ്യ വിഷുവസ്യ ച ॥ 6-195 ॥
തീർഥയാത്രാഗതം ശാന്തം ഹാഹാഭൂതമചേതനം ।
ക്ഷുത്പിപാസാതുരം ലോകേ പാംസുപാദം ത്വരാന്വിതം ॥ 6-196 ॥
സന്തർപയിത്വാ യത്നേന മ്ലാനലക്ഷ്മീമിവാംബുഭിഃ ।
പാദ്യാസനപ്രദാനേന കസ്തേന പുരുഷഃ സമഃ ॥ 6-197 ॥
അശ്നന്തി യാവത്തത്പിണ്ഡം തീർഥനിർധൂതകൽമഷാഃ ।
താവദ്വർഷസഹസ്രാണി തദ്ദാതാസ്തേ ശിവേ പുരേ ॥ 6-198 ॥
ദദ്യാദ്യഃ ശിവസത്ത്രാർഥം മഹിഷീം സുപയസ്വിനീം ।
മോദതേ സ ശിവേ ലോകേ യുഗകോടിശതം നരഃ ॥ 6-199 ॥
ആർതായ ശിവഭക്തായ ദദ്യാദ്യഃ സുപയസ്വിനീം ।
അജാമേകാം സുപുഷ്ടാംഗീം തസ്യ പുണ്യഫലം ശൃണു ॥ 6-200 ॥
യാവത്തദ്രോമസംഖ്യാനം തത്പ്രസൂതികുലേഷു ച ।
താവദ്വർഷസഹസ്രാണി രുദ്രലോകേ മഹീയതേ ॥ 6-201 ॥
മൃദുരോമാഞ്ചിതാം കൃഷ്ണാം നിവേദ്യ ഗുരവേ നരഃ ।
രോമ്ണി രോമ്ണി സുവർണസ്യ ദത്തസ്യ ഫലമാപ്നുയാത് ॥ 6-202 ॥
ഗജാശ്വരഥസംയുക്തൈർവിമാനൈഃ സാർവകാമികൈഃ ।
സാനുഗഃ ക്രീഡതേ ഭോഗൈഃ കൽപകോടിം ശിവേ പുരേ ॥ 6-203 ॥
നിവേദ്യാശ്വതരം പുഷ്ടമദുഷ്ടം ഗുരവേ നരഃ ।
സംഗതിം സോപകരണം ഭോഗാൻഭുങ്ക്തേ ശിവേ പുരേ ॥ 6-204 ॥
ദിവ്യാശ്വയുക്തൈഃ ശ്രീമദ്ഭിർവിമാനൈഃ സാർവകാമികൈഃ ।
കോടിം കോടിം ച കൽപാനാം തദന്തേ സ്യാന്മഹീപതിഃ ॥ 6-205 ॥
അപി യോജനമാത്രായ ശിബികാം പരികൽപയേത് ।
ഗുരോഃ ശാന്തസ്യ ദാന്തസ്യ തസ്യ പുണ്യഫലം ശൃണു ॥ 6-206 ॥
വിമാനാനാം സഹസ്രേണ സർവകാമയുതേന ച ।
കൽപകോട്യയുതം സാഗ്രം ഭോഗാൻഭുങ്ക്തേ ശിവേ പുരേ ॥ 6-207 ॥
ഛാഗം മേഷം മയൂരം ച കുക്കുടം ശാരികാം ശുകം ।
ബാലക്രീഡനകാനേതാനിത്യാദ്യാനപരാനപി ॥ 6-208 ॥
നിവേദയിത്വാ സ്കന്ദായ തത്സായുജ്യമവാപ്നുയാത് ।
ഭുക്ത്വാ തു വിപുലാൻഭോഗാംസ്തദന്തേ സ്യാദ്ദ്വിജോത്തമഃ ॥ 6-209 ॥
മുസലോലൂഖലാദ്യാനി ഗൃഹോപകരണാനി ച ।
ദദ്യാച്ഛിവഗൃഹസ്ഥേഭ്യസ്തസ്യ പൂണ്യഫലം ശൃണു ॥ 6-210 ॥
പ്രത്യേകം കൽപമേകൈകം ഗൃഹോപകരണൈർനരഃ ।
അന്തേ ദിവി വസേദ്ഭോഗൈസ്തദന്തേ ച ഗൃഹീ ഭവേത് ॥ 6-211 ॥
ഖർജൂരതാലപത്ത്രൈർവാ ചർമണാ വാ സുകൽപിതം ।
ദത്ത്വാ കോട്യാസനം വൃത്തം ശിവലോകമവാപ്നുയാത് ॥ 6-212 ॥
പ്രാതർനീഹാരവേലായാം ഹേമന്തേ ശിവയോഗിനാം ।
കൃത്വാ പ്രതാപനായാഗ്നിം ശിവലോകേ മഹീയതേ ॥ 6-213 ॥
സൂര്യായുതപ്രഭാദീപ്തൈർവിമാനൈഃ സാർവകാമികൈഃ ।
കൽപകോടിശതം ഭോഗാൻഭുക്ത്വാ സ തു മഹീപതിഃ ॥ 6-214 ॥
യഃ പ്രാന്തരം വിദേശം വാ ഗച്ഛന്തം ശിവയോഗിനം ।
ഭോജയീത യഥാശക്ത്യാ ശിവലോകേ മഹീയതേ ॥ 6-215 ॥
യശ്ഛത്ത്രം ധാരയേദ്ഗ്രീഷ്മേ ഗച്ഛതേ ശിവയോഗിനേ ।
സ മൃതഃ പൃഥിവീം കൃത്സ്നാമേകച്ഛത്ത്രാമവാപ്നുയാത് ॥ 6-216 ॥
യഃ സമുദ്ധരതേ മാർഗേ മാത്രോപകരണാസനം ।
ശിവയോഗപ്രവൃത്തസ്യ തസ്യ പുണ്യഫലം ശൃണു ॥ 6-217 ॥
കൽപായുതം നരഃ സാഗ്രം ഭുക്ത്വാ ഭോഗാഞ്ഛിവേ പുരേ ।
തദന്തേ പ്രാപ്നുയാദ്രാജ്യം സർവൈശ്വര്യസമന്വിതം ॥ 6-218 ॥
അഭ്യംഗോദ്വർതനം സ്നാനമാർതസ്യ ശിവയോഗിനഃ ।
കൃത്വാപ്നോതി മഹാഭോഗാൻകൽപാഞ്ഛിവപുരേ നരഃ ॥ 6-219 ॥
അപനീയ സമുച്ഛിഷ്ടം ഭക്തിതഃ ശിവയോഗിനാം ।
ദശധേനുപ്രദാനസ്യ ഫലമാപ്നോതി മാനവഃ ॥ 6-220 ॥
പഞ്ചഗവ്യസമം ജ്ഞേയമുച്ഛിഷ്ടം ശിവയോഗിനാം ।
തദ്ഭുക്ത്വാ ലഭതേ ശുദ്ധിം മഹതഃ പാതകാദപി ॥ 6-221 ॥
നാരീ ച ഭുക്ത്വാ സത്പുത്രം കുലാധാരം ഗുണാന്വിതം ।
രാജ്യയോഗ്യം ധനാഢ്യം ച പ്രാപ്നുയാദ്ധർമതത്പരം ॥ 6-222 ॥
യശ്ച യാം ശിവയജ്ഞായ ഗൃഹസ്ഥഃ പരികൽപയേത് ।
ശിവഭക്തോ ഽസ്യ മഹതഃ പരമം ഫലമാപ്നുയാത് ॥ 6-223 ॥
ശിവോമാം ച പ്രയത്നേന ഭക്ത്യാബ്ദം യോ ഽനുപാലയേത് ।
ഗവാം ലക്ഷപ്രദാനസ്യ സമ്പൂർണം ഫലമാപ്നുയാത് ॥ 6-224 ॥
പ്രാതഃ പ്രദദ്യാത്സഘൃതം സുകൃതം ബാലപിണ്ഡകം ।
ദൂർവാം ച ബാലവത്സാനാം(?) തസ്യ പുണ്യഫലം ശൃണു ॥ 6-225 ॥
യാവത്തദ്ബാലവത്സാനാം പാനാഹാരം പ്രകൽപയേത് ।
താവദഷ്ടായുതാൻപൂർവൈർഭോഗാൻഭുങ്ക്തേ ശിവേ പുരേ ॥ 6-226 ॥
വിധവാനാഥവൃദ്ധാനാം പ്രദദ്യാദ്യഃ പ്രജീവനം ।
ആഭൂതസ്സമ്പ്ലവം യാവച്ഛിവലോകേ മഹീയതേ ॥ 6-227 ॥
ദദ്യാദ്യഃ സർവജന്തൂനാമാഹാരമനുയത്നതഃ ।
ത്രിഃ പൃഥ്വീം രത്നസമ്പൂർണാം യദ്ദത്ത്വാ തത്ഫലം ലഭേത് ॥ 6-228 ॥
വിനയവ്രതദാനാനി യാനി സിദ്ധാനി ലോകതഃ ।
താനി തേനൈവ വിധിനാ ശിവമന്ത്രേണ കൽപയേത് ॥ 6-229 ॥
നിവേദയീത രുദ്രായ രുദ്രാണ്യാഃ ഷൺമുഖസ്യ ച ।
പ്രാപ്നുയാദ്വിപുലാൻഭോഗാന്ദിവ്യാഞ്ഛിവപുരേ നരഃ ॥ 6-230 ॥
പുനര്യഃ കർതരീം ദദ്യാത്കേശക്ലേശാപനുത്തയേ ।
സർവക്ലേശവിനിർമുക്തഃ ശിവലോകേ സുഖീ ഭവേത് ॥ 6-231 ॥
നാസികാശോധനം ദദ്യാത്സന്ദംശം ശിവയോഗിനേ ।
വർഷകോടിം മഹാഭോഗൈഃ ശിവലോകേ മഹീയതേ ॥ 6-232 ॥
നഖച്ഛേദനകം ദത്ത്വാ ശിവലോകേ മഹീയതേ ।
വർഷലക്ഷം മഹാഭോഗൈഃ ശിവലോകേ മഹീയതേ ॥ 6-233 ॥
ദത്ത്വാഞ്ജനശലാകാം വാ ലോഹാദ്യാം ശിവയോഗിനേ ।
ഭോഗാഞ്ഛിവപുരേ പ്രാപ്യ ജ്ഞാനചക്ഷുരവാപ്നുയാത് ॥ 6-234 ॥
കർണശോധനകം ദത്ത്വാ ലോഹാദ്യം ശിവയോഗിനേ ।
വർഷകോടിം മഹാഭോഗൈഃ ശിവലോകേ മഹീയതേ ॥ 6-235 ॥
ദദ്യാദ്യഃ ശിവഭക്തായ സൂചീം കൗപീനശോധനീം ।
വർഷലക്ഷം സ ലക്ഷാർധം ശിവലോകേ മഹീയതേ ॥ 6-236 ॥
നിവേദ്യ ശിവയോഗിഭ്യഃ സൂചികം സൂത്രസംയുതം ।
വർഷലക്ഷം മഹാഭോഗൈഃ ക്രീഡതേ സ ശിവേ പുരേ ॥ 6-237 ॥
ദദ്യാദ്യഃ ശിവയോഗിഭ്യഃ സുകൃതാം പത്രവേധനീം ।
വർഷലക്ഷം മഹാഭോഗൈഃ ശിവലോകേ മഹീയതേ ॥ 6-238 ॥
ദദ്യാദ്യഃ പുസ്തകാദീനാം സർവകാര്യാർഥകർതൃകാം ।
പഞ്ചലക്ഷം മഹാഭോഗൈർമോദതേ സ ശിവേ പുരേ ॥ 6-239 ॥
ശമീന്ധനതൃണാദീനാം ദദ്യാത്തച്ഛേദനം ച യഃ ।
ക്രീഡതേ സ ശിവേ ലോകേ വർഷലക്ഷചതുഷ്ടയം ॥ 6-240 ॥
ശിവാശ്രമോപഭോഗായ ലോഹോപകരണം മഹത് ।
യഃ പ്രദദ്യാഗ്കുഠാരാദ്യം തസ്യ പുണ്യഫലം ശൃണു ॥ 6-241 ॥
യാവത്തത്ഫലസംഖ്യാനം ലോഹോപകരണേ ഭവേത് ।
താവന്തി വർഷലക്ഷാണി ശിവലോകേ മഹീയതേ ॥ 6-242 ॥
ശിവായതനവിത്താനാം രക്ഷാർഥം യഃ പ്രയച്ഛതി ।
ധനുഃഖഡ്ഗായുധാദീനി തസ്യ പുണ്യഫലം ശൃണു ॥ 6-243 ॥
ഏകൈകസ്മിൻപരിജ്ഞേയമായുധേ ചാപി വൈ ഫലം ।
വർഷകോട്യഷ്ടകം ഭോഗൈഃ ശിവലോകേ മഹീയതേ ॥ 6-244 ॥
യഃ സ്വാത്മഭോഗഭൃത്യർഥം കുസുമാനി നിവേദയേത് ।
ശിവായ ഗുരവേ വാപി തസ്യ പുണ്യഫലം ശൃണു ॥ 6-245 ॥
യാവദന്യോഽന്യസംബന്ധാസ്തസ്യാംശാഃ പരികീർതിതാഃ ।
വർഷലക്ഷം സ താവച്ച ശിവലോകേ പ്രമോദതേ ॥ 6-246 ॥
നഷ്ടാപഹൃതമന്വിഷ്യ പുനർവിത്തം നിവേദയേത് ।
ശിവാത്മകം ശിവായൈവ തസ്യ പുണ്യഫലം ശൃണു ॥ 6-247 ॥
യാവച്ഛിവായ തദ്വിത്തം പ്രാങ്നിവേദ്യ ഫലം സ്മൃതം ।
നഷ്ടമാനീയ തദ്ഭൂയഃ പുണ്യം ശതഗുണം ലഭേത് ॥ 6-248 ॥
ദേവദ്രവ്യം ഹൃതം നഷ്ടമന്വേഷ്യമപി യത്നതഃ ।
ന പ്രാപ്നോതി തദാ തസ്യ പ്രാപ്നുയാദ്ദ്വിഗുണം ഫലം ॥ 6-249 ॥
താമ്രകുംഭകടാഹാദ്യം യഃ ശിവായ നിവേദയേത് ।
ശിവാത്മകം ശിവായൈവ തസ്യ പുണ്യഫലം ശൃണു ॥ 6-250 ॥
യാവച്ഛിവായ തദ്വിത്തം പ്രാങ്നിവേദ്യ ഫലം സ്മൃതം ।
നഷ്ടമാനീയ തദ്ഭൂയഃ പുണ്യം ശതഗുണം ലഭേത് ॥ 6-251 ॥
സ്നാനസത്ത്രോപഭോഗായ തസ്യ പുണ്യഫലം ശൃണു ।
യാവത്തത്ഫലസംഖ്യാനം താമ്രോപകരണേ സ്ഥിതം ॥ 6-252 ॥
പലേ പലേ വർഷകോടിം മോദതേ സ ശിവേ പുരേ ।
യഃ പത്ത്രപുഷ്പവസ്തൂനാം ദദ്യാദാധാരഭാജനം ॥ 6-253 ॥
തദ്വസ്തുദാതുര്യത്പുണ്യം തത്പുണ്യം സകലം ഭവേത് ।
ദത്ത്വോപകരണം കിഞ്ചിദപി യോ വിത്തമർഥിനാം ॥ 6-254 ॥
യദ്വസ്തു കുരുതേ തേന തത്പ്രദാനഫലം ലഭേത് ।
യഃ ശൗചപീതവസ്ത്രാണി ക്ഷാരാദ്യൈഃ ശിവയോഗിനാം ॥ 6-255 ॥
സ പാപമലനിർമുക്തഃ ശിവലോകമവാപ്നുയാത് ।
യഃ പുഷ്പപട്ടസംയുക്തം പടഗർഭം ച കംബലം ॥ 6-256 ॥
പ്രദദ്യാച്ഛിവയോഗിഭ്യസ്തസ്യ പുണ്യഫലം ശൃണു ।
തേഷാം ച വസ്ത്രതന്തൂനാം യാവത്സംഖ്യാ വിധീയതേ ॥ 6-257 ॥
താവദ്വർഷസഹസ്രാണി ഭോഗാൻഭുങ്ക്തേ ശിവേ പുരേ ।
ശ്ലക്ഷ്ണവസ്ത്രാണി ശുക്ലാനി ദദ്യാദ്യഃ ശിവയോഗിനേ ॥ 6-258 ॥
ചിത്രവസ്ത്രാണി തദ്ഭക്ത്യാ തസ്യ പുണ്യഫലം ശൃണു ।
യാവത്തത്സൂക്ഷ്മവസ്ത്രാണാം തന്തുസംഖ്യാ വിധീയതേ ॥ 6-259 ॥
താവദ്യുഗാനി സംഭോഗൈഃ ശിവലോകേ മഹീയതേ ।
ശംഖപാത്രം തു വിസ്തീർണം ഭാണ്ഡം വാപി സുശോഭനം ॥ 6-260 ॥
പ്രദദ്യാച്ഛിവയോഗിഭ്യസ്തസ്യ പുണ്യഫലം ശൃണു ।
ദിവ്യം വിമാനമാരൂഢഃ സർവകാമസമന്വിതം ॥ 6-261 ॥
കൽപകോട്യയുതം സാഗ്രം ശിവലോകേ മഹീയതേ ।
ശുക്ത്യാദീനി ച പാത്രാണി ശോഭനാന്യമലാനി ച ॥ 6-262 ॥
നിവേദ്യ ശിവയോഗിഭ്യഃ ശംഖാർധേന ഫലം ലഭേത് ।
സ്ഫാടികാനാം ച പാത്രാണാം ശംഖതുല്യഫലം സ്മൃതം ॥ 6-263 ॥
ശൈലജാനാം തദർധേന പാത്രാണാം ച തദർധകം ।
താലഖർജൂരപാത്രാണാം വംശജാനാം നിവേദനേ ॥ 6-264 ॥
അന്യേഷാമേവമാദീനാം പുണ്യം വാർക്ഷ്യാർധസംമിതം ।
വംശജാർധസമം പുണ്യം ഫലപാത്രനിവേദനേ ॥ 6-265 ॥
നാനാപർണപുടാണാം ച സാരാണാം വാ ഫലാർധകം ।
യസ്താമ്രകാംസ്യപാത്രാണി ശോവ്ഹനാന്യമലാനി ച ॥ 6-266 ॥
സ്നാനഭോജനപാനാർഥം ദദ്യാദ്യഃ ശിവയോഗിനേ ।
താമ്രാം കാംസീം ത്രിലോഹീം വാ യഃ പ്രദദ്യാത്ത്രിപാദികാം ॥ 6-267 ॥
ഭോജനേ ഭോജനാധാരം ഗുരവേ തത്ഫലം ശൃണു ।
യാവത്തത്പലസംഖ്യാനം ത്രിപാദ്യാ ഭോജനേഷു ച ॥ 6-268 ॥
താവദ്യുഗസഹസ്രാണി ഭോഗാൻഭുങ്ക്തേ ശിവേ പുരേ ।
ലോഹം ത്രിപാദികം ദത്ത്വാ സത്കൃത്വാ ശിവയോഗിനേ ॥ 6-269 ॥
ദശകൽപാന്മഹാഭോഗൈർനരഃ ശിവപുരേ വസേത് ।
യഃ പ്രദദ്യാത്ത്രിവിഷ്ടംഭം ഭിക്ഷാപാത്രസമാശ്രയം ॥ 6-270 ॥
വംശജം ദാരുജം വാപി തസ്യ പുണ്യഫലം ശൃണു ।
ദിവ്യസ്ത്രീഭോഗസമ്പന്നോ വിമാനേ മഹതി സ്ഥിതഃ ॥ 6-271 ॥
ചതുര്യുഗസഹസ്രം തു ഭോഗാൻഭുങ്ക്തേ ശിവേ പുരേ ।
ഭിക്ഷാപാത്രമുഖാച്ഛാദമ്വസ്ത്രപർണാദികൽപിതം ॥ 6-272 ॥
ദത്ത്വാ ശിവപുരേ ഭോഗാൻകൽപമേകം വസേന്നരഃ ।
സംശ്രയം യഃ പ്രദദ്യാച്ച ഭിക്ഷാപാത്രേ കമണ്ഡലൗ ॥ 6-273 ॥
കൽപിതം വസ്ത്രസൂത്രാദ്യൈസ്തസ്യ പുണ്യഫലം ശൃണു ।
തദ്വസ്ത്രപൂതതന്തൂനാം സംഖ്യാ യാവദ്വിധീയതേ ॥ 6-274 ॥
താവദ്വർഷസഹസ്രാണി രുദ്രലോകേ മഹീയതേ ।
സൂത്രവൽകലവാലൈർവാ ശിക്യഭാണ്ഡസമാശ്രയം ॥ 6-275 ॥
യഃ കൃത്വാ ദാമനീയോക്ത്രം പ്രഗ്രഹം രജ്ജുമേവ വാ ।
ഏവമാദീനി ചാന്യാനി വസ്തൂനി വിനിവേദയേത് ॥ 6-276 ॥
ശിവഗോഷ്ഠോപയോഗാർഥം തസ്യ പുണ്യഫലം ശൃണു ।
യാവത്തദ്രജ്ജുസംഖ്യാനം പ്രദദ്യാച്ഛിവഗോകുലേ ॥ 6-277 ॥
താവച്ചതുര്യുഗം ദേഹീ ശിവലോകേ മഹീയതേ ।
യഥാ യഥാ പ്രിയം വസ്ത്രം ശോഭനം ച യഥാ യഥാ ॥ 6-278 ॥
തഥാ തഥാ മഹാപുണ്യം തദ്ദാനാദുത്തരോത്തരം ।
യഃ പന്ഥാനം ദിശേത്പൃഷ്ടം പ്രണഷ്ടം ച ഗവാദികം ॥ 6-279 ॥
സ ഗോദാനസമം പുണ്യം പ്രജ്ഞാസൗഖ്യം ച വിന്ദതി ।
കൃത്വോപകാരമാർതാനാം സ്വർഗം യാതി ന സംശയഃ ॥ 6-280 ॥
അപി കണ്ടകമുദ്ധൃത്യ കിമുതാന്യം മഹാഗുണം(?) ।
അന്നപാനൗഷധീനാം ച യഃ പ്രദാതാരമുദ്ദിശേത് ॥ 6-281 ॥
ആർതാനാം തസ്യ വിജ്ഞേയം ദാതുസ്തത്സദൃശം ഫലം ।
ശിവായ തസ്യ സംരുദ്ധം കർമ തിഷ്ഠതി യദ്വിനാ ॥ 6-282 ॥
തദൽപമപി യജ്ഞാംഗം ദത്ത്വാ യജ്ഞഫലം ലഭേത് ।
അപി കാശകുശം സൂത്രം ഗോമയം സമിദിന്ധനം ॥ 6-283 ॥
ശിവയജ്ഞോപയോഗാർഥം പ്രവക്ഷ്യാമി സമാസതഃ ।
സർവേഷാം ശിവഭക്താനാം ദദ്യാദ്യത്കിഞ്ചിദാദരാത് ।
ദത്ത്വാ യജ്ഞഫലം വിദ്യാത്കിമു തദ്വസ്തുദാനതഃ ॥ 6-284 ॥
॥ ഇതി ശിവോപനിഷദി ഫലോപകരണപ്രദാനാധ്യായഃ ഷഷ്ഠഃ ॥
അഥ സ്വർഗാപവർഗാർഥേ പ്രവക്ഷ്യാമി സമാസതഃ ।
സർവേഷാം ശിവഭക്താനാം ശിവാചാരമനുത്തമം ॥ 7-1 ॥
ശിവഃ ശിവായ ഭൂതാനാം യസ്മാദ്ദാനം പ്രയച്ഛതി ।
ഗുരുമൂർതിഃ സ്ഥിതസ്തസ്മാത്പൂജയേത്സതതം ഗുരും ॥ 7-2 ॥
നാലക്ഷണേ യഥാ ലിംഗേ സാംനിധ്യം കൽപയേച്ഛിവഃ ।
അൽപാഗമേ ഗുരൗ തദ്വത്സാംനിധ്യം ന പ്രകൽപയേത് ॥ 7-3 ॥
ശിവജ്ഞാനാർഥതത്ത്വജ്ഞഃ പ്രസന്നമനസം ഗുരും ।
ശിവഃ ശിവം സമാസ്ഥായ ജ്ഞാനം വക്തി ന ഹീതരഃ ॥ 7-4 ॥
ഗുരും ച ശിവവദ്ഭക്ത്യാ നമസ്കാരേണ പൂജയേത് ।
കൃതാഞ്ജലിസ്ത്രിസന്ധ്യം ച ഭൂമിവിന്യസ്തമസ്തകഃ ॥ 7-5 ॥
ന വിവിക്തമനാചാന്തം(?) ചങ്ക്രമന്തം തഥാകുലം ।
സമാധിസ്ഥം വ്രജന്തം ച നമസ്കുര്യാദ്ഗുരും ബുധഃ ॥ 7-6 ॥
വ്യാഖ്യാനേ തത്സമാപ്തൗ ച സമ്പ്രശ്നേ സ്നാനഭോജനേ ।
ഭുക്ത്വാ ച ശയനേ സ്വപ്നേ നമസ്കുര്യാത്സദാ ഗുരും ॥ 7-7 ॥
ഗ്രാമാന്തരമഭിപ്രേപ്സുർഗുരോഃ കുര്യാത്പ്രദക്ഷിണം ।
സാർവാംഗികപ്രണാമം ച പുനഃ കുര്യാത്തദാഗതഃ ॥ 7-8 ॥
പർവോത്സവേഷു സർവേഷു ദദ്യാദ്ഗന്ധപവിത്രകം ।
ശിവജ്ഞാനസ്യ ചാരംഭേ പ്രവാസഗമനാഗതൗ ॥ 7-9 ॥
ശിവധർമവ്രതാരംഭേ തത്സമാപ്തൗ ച കൽപയേത് ।
പ്രസാദനായ കുപിതോ വിജിത്യ ച രിപും തഥാ ॥ 7-10 ॥
പുണ്യാഹേ ഗ്രഹശാന്തൗ ച ദീക്ഷായാം ച സദക്ഷിണം ।
ആവാര്യ പദസമ്പ്രാപ്തൗ പവിത്രേ ചോപവിഗ്രഹേ ॥ 7-11 ॥
ഉപാനച്ഛത്ത്രശയനം വസ്ത്രമാസനഭൂഷണം ।
പാത്രദണ്ഡാക്ഷസൂത്രം വാ ഗുരുസക്തം ന ധാരയേത് ॥ 7-12 ॥
ഹാസ്യനിഷ്ഠീവനാസ്ഫോടമുച്ചഭാഷ്യവിജൃംഭണം ।
പാദപ്രസാരണം ഗതിം ന കുര്യാദ്ഗുരുസംനിധൗ ॥ 7-13 ॥
ഹീനാന്നപാനവസ്ത്രഃ സ്യാന്നീചശയ്യാസനോ ഗുരോഃ ।
ന യഥേഷ്ടശ്ച സന്തിഷ്ഠേത്കലഹം ച വിവർജയേത് ॥ 7-14 ॥
പ്രതിവാതേ ഽനുവാതേ വാ ന തിഷ്ഠേദ്ഗുരുണാ സഹ ।
അസംശ്രയേ ച സതതം ന കിഞ്ചിത്കീർതയേദ്ഗുരോഃ ॥ 7-15 ॥
അന്യാസക്തോ ന ഭുഞ്ജാനോ ന തിഷ്ഠന്നപരാങ്മുഖഃ ।
ന ശയനോ ന ചാസീനഃ സംഭാസ്യേദ്ഗുരുണാ സഹ ॥ 7-16 ॥
ദൃഷ്ട്വൈവ ഗുരുമായാന്തമുത്തിഷ്ഠേദ്ദൂരതസ്ത്വരം ।
അനുജ്ഞാതശ്ച ഗുരുണാ സംവിശേച്ചാനുപൃഷ്ഠതഃ ॥ 7-17 ॥
ന കണ്ഠം പ്രാവൃതം കുര്യാന്ന ച തത്രാവസക്തികാം ।
ന പാദധാവനസ്നാനം യത്ര പശ്യേദ്ഗുരുഃ സ്ഥിതഃ ॥ 7-18 ॥
ന ദന്തധാവനാഭ്യംഗമായാമോദ്വർതനക്രിയാഃ ।
ഉത്സർഗപരിധാനം ച ഗുരോഃ കുർവീത പശ്യതഃ ॥ 7-19 ॥
ഗുരുര്യദർപയേത്കിഞ്ചിദ്ഗൃഹാസന്നം തദഞ്ജലൗ ।
പാത്രേ വാ പുരതഃ ശിഷ്യസ്തദ്വക്ത്രമഭിവീക്ഷയൻ ॥ 7-20 ॥
യദർപയേദ്ഗുരുഃ കിഞ്ചി തന്നമ്രഃ പുരതഃ സ്ഥിതഃ ।
പാണിദ്വയേന ഗൃഹ്ണീയത്സ്ഥാപയേത്തച്ച സുസ്ഥിതം ॥ 7-21 ॥
ന ഗുരോഃ കീർതയേന്നാമ പരോഽക്ഷമപി കേവലം ।
സമാനസഞ്ജ്ഞമന്യം വാ നാഹ്വയീത തദാഖ്യയാ ॥ 7-22 ॥
സ്വഗുരുസ്തദ്ഗുരുശ്ചൈവ യദി സ്യാതാം സമം ക്വചിത് ।
ഗുരോർഗുരുസ്തയോഃ പൂജ്യഃ സ്വഗുരുശ്ച തദാജ്ഞയാ ॥ 7-23 ॥
അനിവേദ്യ ന ഭുഞ്ജീത ഭുക്ത്വാ ചാസ്യ നിവേദയേത് ।
നാവിജ്ഞാപ്യ ഗുരും ഗച്ഛേദ്ബഹിഃ കാര്യേണ കേനചിത് ॥ 7-24 ॥
ഗുർവാജ്ഞയാ കർമ കൃത്വാ തത്സമാപ്തൗ നിവേദയേത് ।
കൃത്വാ ച നൈത്യകം സർവമധീയീതാജ്ഞയാ ഗുരോഃ ॥ 7-25 ॥
മൃദ്ഭസ്മഗോമയജലം പത്ത്രപുഷ്പേന്ധനം സമിത് ।
പര്യാപ്തമഷ്ടകം ഹ്യേതദ്ഗുർവർഥം തു സമാഹരേത് ॥ 7-26 ॥
ഭൈഷജ്യാഹാരപാത്രാണി വസ്ത്രശയ്യാസനം ഗുരോഃ ।
ആനയേത്സർവയത്നേന പ്രാർഥയിത്വാ ധനേശ്വരാൻ ॥ 7-27 ॥
ഗുരോർന ഖണ്ഡയേദാജ്ഞാമപി പ്രാണാൻപരിത്യജേത് ।
കൃത്വാജ്ഞാം പ്രാപ്നുയാന്മുക്തിം ലംഘയന്നരകം വ്രജേത് ॥ 7-28 ॥
പര്യടേത്പൃഥിവീം കൃത്സ്നാം സശൈലവനകാനനാം ।
ഗുരുഭൈഷജ്യസിദ്ധ്യർഥമപി ഗച്ഛേദ്രസാതലം ॥ 7-29 ॥
യദാദിശേദ്ഗുരുഃ കിഞ്ചിത്തത്കുര്യാദവിചാരതഃ ।
അമീമാംസ്യാ ഹി ഗുരവഃ സർവകാര്യേഷു സർവഥാ ॥ 7-30 ॥
നോത്ഥാപയേത്സുഖാസീനം ശയാനം ന പ്രബോധയേത് ।
ആസീനോ ഗുരുമാസീനമഭിഗച്ഛേത്പ്രതിഷ്ഠിതം ॥ 7-31 ॥
പഥി പ്രയാന്തം യാന്തം ച യത്നാദ്വിശ്രമയേദ്ഗുരും ।
ക്ഷിത്പിപാസാതുരം സ്നാതം ജ്ഞാത്വാ ശക്തം ച ഭോജയേത് ॥ 7-32 ॥
അഭ്യംഗോദ്വർതനം സ്നാനം ഭോജനഷ്ഠീവമാർജനം ।
ഗാത്രസംവാഹനം രാത്രൗ പാദാഭ്യംഗം ച യത്നതഃ ॥ 7-33 ॥
പ്രാതഃ പ്രസാധനം ദത്ത്വാ കാര്യം സംമാർജനാഞ്ജനം ।
നാനാപുഷ്പപ്രകരണം ശ്രീമദ്വ്യാഖ്യാനമണ്ഡപേ ॥ 7-34 ॥
സ്ഥാപ്യാസനം ഗുരോഃ പൂജ്യം ശിവജ്ഞാനസ്യ പുസ്തകം ।
തത്ര തിഷ്ഠേത്പ്രതീക്ഷംസ്തദ്ഗുരോരാഗമനം ക്രമാത് ॥ 7-35 ॥
ഗുരോർനിന്ദാപവാദം ച ശ്രുത്വാ കർണൗ പിധാപയേത് ।
അന്യത്ര ചൈവ സർപേത്തു നിഗൃഹ്ണീയാദുപായതഃ ॥ 7-36 ॥
ന ഗുരോരപ്രിയം കുര്യാത്പീഡിതസ്താരിതോ ഽപി വാ ।
നോച്ചാരയേച്ച തദ്വാക്യമുച്ചാര്യ നരകം വ്രജേത് ॥ 7-37 ॥
ഗുരുരേവ പിതാ മാതാ ഗുരുരേവ പരഃ ശിവഃ ।
യസ്യൈവ നിശ്ചിതോ ഭാവസ്തസ്യ മുക്തിർന ദൂരതഃ ॥ 7-38 ॥
ആഹാരാചാരധർമാണാം യത്കുര്യാദ്ഗുരുരീശ്വരഃ ।
തഥൈവ ചാനുകുർവീത നാനുയുഞ്ജീത കാരണം ॥ 7-39 ॥
യജ്ഞസ്തപാംസി നിയമാത്താനി വൈ വിവിധാനി ച ।
ഗുരുവാക്യേ തു സർവാണി സമ്പദ്യന്തേ ന സംശയഃ ॥ 7-40 ॥
അജ്ഞാനപങ്കനിർമഗ്നം യഃ സമുദ്ധരതേ ജനം ।
ശിവജ്ഞാനാത്മഹസ്തേന കസ്തം ന പ്രതിപൂജയേത് ॥ 7-41 ॥
ഇതി യഃ പൂജയേന്നിത്യം ഗുരുമൂർതിസ്ഥമീശ്വരം ।
സർവപാപവിനിർമുക്തഃ പ്രാപ്നോതി പരമം പദം ॥ 7-42 ॥
സ്നാത്വാംഭസാ ഭസ്മനാ വാ ശുക്ലവസ്ത്രോപവീതവാൻ ।
ദൂർവാഗർഭസ്ഥിതം പുഷ്പം ഗുരുഃ ശിരസി ധാരയേത് ॥ 7-43 ॥
രോചനാലഭനം കുര്യാദ്ധൂയയേദാത്മനസ്തനും ।
അംഗുലീയാക്ഷസൂത്രം ച കർണമാത്രേ ച ധാരയേത് ॥ 7-44 ॥
ഗുരുരേവംവിധഃ ശ്രീമാന്നിത്യം തിഷ്ഠേത്സമാഹിതഃ ।
യസ്മാജ്ജ്ഞാനോപദേശാർഥം ഗുരുരാസ്തേ സദാശിവഃ ॥ 7-45 ॥
ധാരയേത്പാദുകേ നിത്യം മൃദുവർമപ്രകൽപിതേ ।
പ്രഗൃഹ്യ ദണ്ഡം ഛത്ത്രം വാ പര്യടേദാശ്രമാദ്ബഹിഃ ॥ 7-46 ॥
ന ഭൂമൗ വിന്യസേത്പാദമന്തർധാനം വിനാ ഗുരുഃ ।
കുശപാദകമാക്രമ്യ തർപണാർഥം പ്രകൽപയേത് ॥ 7-47 ॥
പാദസ്ഥാനാനി പത്ത്രാദ്യൈഃ കൃത്വാ ദേവഗൃഹം വിശേത് ।
പാത്രാസ്തരിതപാദശ്ച(?) നിത്യം ഭുഞ്ജീത വാഗ്യതഃ ॥ 7-48 ॥
ന പാദൗ ധാവയേത്കാംസ്യേ ലോഹേ വാ പരികൽപിതേ ।
ശൗചയേത്തൃണഗർഭായാം ദ്വിതീയായാം തഥാചമേത് ॥ 7-49 ॥
ന രക്തമുൽബണം വസ്ത്രം ധാരയേത്കുസുമാനി ച ।
ന ബഹിർഗന്ധമാല്യാനി വാസാംസി മലിനാനി ച ॥ 7-50 ॥
കേശാസ്ഥീനി കപാലാനി കാർപാസാസ്ഥിതുഷാണി ച ।
അമേധ്യാംഗാരഭസ്മാനി നാധിതിഷ്ഠേദ്രജാംസി ച ॥ 7-51 ॥
ന ച ലോഷ്ടം വിമൃദ്നീയാന്ന ച ഛിന്ദ്യാന്നഖൈസ്തൃണം ।
ന പത്ത്രപുഷ്പമൂല്യാനി വംശമംഗലകാഷ്ഠിതാം ॥ 7-52 ॥
ഏവമാദീനി ചാന്യാനി പാണിഭ്യാം ന ച മർദയേത് ।
ന ദന്തഖാദനം കുര്യാദ്രോമാണ്യുത്പാടയേന്ന ച ॥ 7-53 ॥
ന പദ്ഭ്യാമുല്ലിഖേദ്ഭൂമിം ലോഷ്ടകാഷ്ഠൈഃ കരേണ വാ ।
ന നഖാംശ്ച നഖൈർവിദ്യാന്ന കണ്ഡൂയേന്നഖൈസ്തനും ॥ 7-54 ॥
മുഹുർമുഹുഃ ശിരഃ ശ്മശ്രു ന സ്പൃശേത്കരജൈർബുധഃ ।
ന ലിക്ഷാകർഷണം കുര്യാദാത്മനോ വാ പരസ്യ വാ ॥ 7-55 ॥
സൗവർണ്യരൗപ്യതാമ്രൈശ്ച ശൃംഗദന്തശലാകയാ ।
ദേഹകണ്ഡൂയനം കാര്യം വംശകാഷ്ഠീകവീരണൈഃ(?) ॥ 7-56 ॥
ന വിചിത്തം പ്രകുർവീത ദിശശ്ചൈവാവലോകയൻ ।
ന ശോകാർതശ്ച സന്തിഷ്ഠേദ്ധൂത്വാ പാണൗ കപോലകം ॥ 7-57 ॥
ന പാണിപാദവാക്ചക്ഷുഃ- ശ്രോത്രശിശ്നഗുദോദരൈഃ ।
ചാപലാനി ന കുർവീത സ സർവാർഥമവാപ്നുയാത് ॥ 7-58 ॥
ന കുര്യാത്കേനചിദ്വൈരമധ്രുവേ ജീവിതേ സതി ।
ലോകകൗതൂഹലം പാപം സന്ധ്യാം ച പരിവർജയേത് ॥ 7-59 ॥
ന കുദ്വാരേണ വേശ്മാനി നഗരം ഗ്രാമമാവിശേത് ।
ന ദിവാ പ്രാവൃതശിരാ രാത്രൗ പ്രാവൃത്യ പര്യടേത് ॥ 7-60 ॥
നാതിഭ്രമണശീലഃ സ്യാന്ന വിശേച്ച ഗൃഹാദ്ഗൃഹം ।
ന ചാജ്ഞാനമധീയീത ശിവജ്ഞാനം സമഭ്യസേത് ॥ 7-61 ॥
ശിവജ്ഞാനം പരം ബ്രഹ്മ തദാരഭ്യ ന സന്ത്യജേത് ।
ബ്രഹ്മാസാധ്യ ച യോ ഗച്ഛേദ്ബ്രഹ്മഹാ സ പ്രകീർതിതഃ ॥ 7-62 ॥
കൃതാഞ്ജലിഃ സ്ഥിതഃ ശിഷ്യോ ലഘുവസ്ത്രമുദങ്മുഖഃ ।
ശിവമന്ത്രം സമുച്ചാര്യ പ്രാങ്മുഖോ ഽധ്യാപയേദ്ഗുരുഃ ॥ 7-63 ॥
നാഗദന്താദിസംഭൂതം ചതുരശ്രം സുശോഭനം ।
ഹേമരത്നചിതം വാപി ഗുരോരാസനമുത്തമം ॥ 7-64 ॥
ന ശുശ്രൂഷാർഥകാമാശ്ച ന ച ധർമഃ പ്രദൃശ്യതേ ।
ന ഭക്തിർന യശഃ ക്രൗര്യം ന തമധ്യാപയേദ്ഗുരുഃ ॥ 7-65 ॥
ദേവാഗ്നിഗുരുഗോഷ്ഠീഷു വ്യാഖ്യാധ്യയനസംസദി ।
പ്രശ്നേ വാദേ ഽനൃതേ ഽശൗചേ ദക്ഷിണം ബാഹുമുദ്ധരേത് ॥ 7-66 ॥
വശേ സതതനമ്രഃ സ്യാത്സംഹൃത്യാംഗാനി കൂർമവത് ।
തത്സംമുഖം ച നിർഗച്ഛേന്നമസ്കാരപുരസ്സരഃ ॥ 7-67 ॥
ദേവാഗ്നിഗുരുവിപ്രാണാം ന വ്രജേദന്തരേണ തു ।
നാർപയേന്ന ച ഗൃഹ്ണീയാത്കിഞ്ചിദ്വസ്തു തദന്തരാ ॥ 7-68 ॥
ന മുഖേന ധമേദഗ്നിം നാധഃകുര്യാന്ന ലംഘയേത് ।
ന ക്ഷിപേദശുചിം വഹ്നൗ ന ച പാദൗ പ്രതാപയേത് ॥ 7-69 ॥
തൃണകാഷ്ഠാദിഗഹനേ ജന്തുഭിശ്ച സമാകുലേ ।
സ്ഥാനേ ന ദീപയേദഗ്നിം ദീപ്തം ചാപി തതഃ ക്ഷിപേത് ॥ 7-70 ॥
അഗ്നിം യുഗപദാനീയ ധാരയേത പ്രയത്നതഃ ।
ജ്വലന്തം ന പ്രദീപം ച സ്വയം നിർവാപയേദ്ബുധഃ ॥ 7-71 ॥
ശിവവ്രതധരം ദൃഷ്ട്വാ സമുത്ഥായ സദാ ദ്രുതം ।
ശിവോ ഽയമിതി സങ്കൽപ്യ ഹർഷിതഃ പ്രണമേത്തതഃ ॥ 7-72 ॥
ഭോഗാന്ദദാതി വിപുലാൻലിംഗേ സമ്പൂജിതഃ ശിവഃ ।
അഗ്നൗ ച വിവിധാം സിദ്ധിം ഗുരൗ മുക്തിം പ്രയച്ഛതി ॥ 7-73 ॥
മോക്ഷാർഥം പൂജയേത്തസ്മാദ്ഗുരുമൂർതിസ്ഥമീശ്വരം ।
ഗുരുഭക്ത്യാ ലഭേജ്ജ്ഞാനം ജ്ഞാനാന്മുക്തിമവാപ്നുയാത് ॥ 7-74 ॥
സർവപർവസു യത്നേന ഹ്യേഷു സമ്പൂജയേച്ഛിവം ।
കുര്യാദായതനേ ശോഭാം ഗുരുസ്ഥാനേഷു സർവതഃ ॥ 7-75 ॥
നരദ്വയോച്ഛ്രിതേ പീഠേ സർവശോഭാസമന്വിതേ ।
സംസ്ഥാപ്യ മണിജം ലിംഗം സ്ഥാനേ കുര്യാജ്ജഗദ്ധിതം ॥ 7-76 ॥
അന്നപാനവിശേഷൈശ്ച നൈവേദ്യമുപകൽപയേത് ।
ഭോജയേദ്വ്രതിനശ്ചാത്ര സ്വഗുരും ച വിശേഷതഃ ॥ 7-77 ॥
പൂജയേച്ച ശിവജ്ഞാനം വാചയീത ച പർവസു ।
ദർശയേച്ഛിവഭക്തേഭ്യഃ സത്പൂജാം പരികൽപിതാം ॥ 7-78 ॥
പ്രിയം ബ്രൂയാത്സദാ തേഭ്യഃ പ്രദേയം ചാപി ശക്തിതഃ ।
ഏവം കൃതേ വിശേഷേണ പ്രസീദതി മഹേശ്വരഃ ॥ 7-79 ॥
ഛിന്നം ഭിന്നം മൃതം നഷ്ടം വർധതേ നാസ്തി കേവലം ।
ഇത്യാദ്യാന്ന വദേച്ഛബ്ദാൻസാക്ഷാദ്ബ്രൂയാത്തു മംഗലം ॥ 7-80 ॥
അധേനും ധേനുമിത്യേവ ബ്രൂയാദ്ഭദ്രമഭദ്രകം ।
കപാലം ച ഭഗാലം സ്യാത്പരമം മംഗലം വദേത് ॥ 7-81 ॥
ഐന്ദ്രം ധനുർമണിധനുർദാഹകാഷ്ഠാദി ചന്ദനം ।
സ്വര്യാതം ച മൃതം ബ്രൂയാച്ഛിവീഭൂതം ച യോഗിനം ॥ 7-82 ॥
ദ്വിധാഭൂതം വദേച്ഛിന്നം ഭിന്നം ച ബഹുധാ സ്ഥിതം ।
നഷ്ടമന്വേഷണീയം ച രിക്തം പൂർണാഭിവർധിതം ॥ 7-83 ॥
നാസ്തീതി ശോഭനം സർവമാദ്യമംഗാഭിവർധനം ।
സിദ്ധിമദ്ബ്രൂഹി ഗച്ഛന്തം സുപ്തം ബ്രൂയാത്പ്രവർധിതം ॥ 7-84 ॥
ന മ്ലേച്ഛമൂർഖപതിതൈഃ ക്രൂരൈഃ സന്താപവേദിഭിഃ ।
ദുർജനൈരവലിപ്തൈശ്ച ക്ഷുദ്രൈഃ സഹ ന സംവദേത് ॥ 7-85 ॥
നാധാർമികനൃപാക്രാന്തേ ന ദംശമശകാവൃതേ ।
നാതിശീതജലാകീർണേ ദേശേ രോഗപ്രദേ വസേത് ॥ 7-86 ॥
നാസനം ശയനം പാനം നമസ്കാരാഭിവാദനം ।
സോപാനത്കഃ പ്രകുർവീത ശിവപുസ്തകവാചനം ॥ 7-87 ॥
ആചാര്യം ദൈവതം തീർഥമുദ്ധൂതോദം മൃദം ദധി ।
വടമശ്വത്ഥകപിലാം ദീക്ഷിതോദധിസംഗമം ॥ 7-88 ॥
യാനി ചൈഷാം പ്രകാരാണി മംഗലാനീഹ കാനിചിത് ।
ശിവായേതി നമസ്കൃത്വാ പ്രോക്തമേതത്പ്രദക്ഷിണം ॥ 7-89 ॥
ഉപാനച്ഛത്ത്രവസ്ത്രാണി പവിത്രം കരകം സ്രജം ।
ആസനം ശയനം പാനം ധൃതമന്യൈർന ധാരയേത് ॥ 7-90 ॥
പാലാശമാസനം ശയ്യാം പാദുകേ ദന്തധാവനം ।
വർജയേച്ചാപി നിര്യാസം രക്തം ന തു സമുദ്ഭവം ॥ 7-91 ॥
സന്ധ്യാമുപാസ്യ കുർവീത നിത്യം ദേഹപ്രസാധനം ।
സ്പൃശേദ്വന്ദേച്ച കപിലാം പ്രദദ്യാച്ച ഗവാം ഹിതം ॥ 7-92 ॥
യഃ പ്രദദ്യാദ്ഗവാം സമ്യക്ഫലാനി ച വിശേഷതഃ ।
ക്ഷേത്രമുദ്ദാമയേച്ചാപി തസ്യ പുണ്യഫലം ശൃണു ॥ 7-93 ॥
യാവത്തത്പത്ത്രകുസുമ- കന്ദമൂലഫലാനി ച ।
താവദ്വർഷസഹസ്രാണി ശിവലോകേ മഹീയതേ ॥ 7-94 ॥
കൃശരോഗാർതവൃദ്ധാനാം ത്യക്താനാം നിർജനേ വനേ ।
ക്ഷുത്പിപാസാതുരാണാം ച ഗവാം വിഹ്വലചേതസാം ॥ 7-95 ॥
നീത്വാ യസ്തൃണതോയാനി വനേ യത്നാത്പ്രയച്ഛതി ।
കരോതി ച പരിത്രാണം തസ്യ പുണ്യഫലം ശൃണു ॥ 7-96 ॥
കുലൈകവിംശകോപേതഃ പത്നീപുത്രാദിസംയുതഃ ।
മിത്രഭൃത്യൈരുപേതശ്ച ശ്രീമച്ഛിവപുരം വ്രജേത് ॥ 7-97 ॥
തത്ര ഭുക്ത്വാ മഹാഭോഗാന്വിമാനൈഃ സാർവകാമികൈഃ ।
സ മഹാപ്രലയം യാവത്തദന്തേ മുക്തിമാപ്നുയാത് ॥ 7-98 ॥
ഗോബ്രാഹ്മണപരിത്രാണം സകൃത്കൃത്വാ പ്രയത്നതഃ ।
മുച്യതേ പഞ്ചഭിർഘോരൈർമഹദ്ഭിഃ പാതകൈർദ്രുതം ॥ 7-99 ॥
അഹിംസാ സത്യമസ്തേയം ബ്രഹ്മചര്യമകൽകതാ ।
അക്രോധോ ഗുരുശുശ്രൂഷാ ശൗചം സന്തോഷമാർജവം ॥ 7-100 ॥
അഹിംസാദ്യാ യമാഃ പഞ്ച യതീനാം പരികീർതിതാഃ ।
അക്രോധാദ്യാശ്ച നിയമാഃ സിദ്ധിവൃദ്ധികരാഃ സ്മൃതാഃ ॥ 7-101 ॥
ദശലാക്ഷണികോ ധർമഃ ശിവാചാരഃ പ്രകീർതിതഃ ।
യോഗീന്ദ്രാണാം വിശേഷേണ ശിവയോഗപ്രസിദ്ധയേ ॥ 7-102 ॥
ന വിന്ദതി നരോ യോഗം പുത്രദാരാദിസംഗതഃ ।
നിബദ്ധഃ സ്നേഹപാശേന മോഹസ്തംഭബലീയസാ ॥ 7-103 ॥
മോഹാത്കുടുംബസംസക്തസ്തൃഷ്ണയാ ശൃംഖലീകൃതഃ ।
ബാലൈർബദ്ധസ്തു ലോകോ ഽയം മുസലേനാഭിഹന്യതേ ॥ 7-104 ॥
ഇമേ ബാലാഃ കഥം ത്യാജ്യാ ജീവിഷ്യന്തി മയാ വിനാ ।
മോഹാദ്ധി ചിന്തയത്യേവം പരമാർഥൗ ന പശ്യതി ॥ 7-105 ॥
സമ്പർകാദുദരേ ന്യസ്തഃ ശുക്രബിന്ദുരചേതനഃ ।
സ പിത്രാ കേന യത്നേന ഗർഭസ്ഥഃ പരിപാലിതഃ ॥ 7-106 ॥
കർകശാഃ കഠിനാ ഭക്ഷാ ജീര്യന്തേ യത്ര ഭക്ഷിതാഃ ।
തസ്മിന്നേവോദരേ ശുക്രം കിം ന ജീര്യതി ഭക്ഷ്യവത് ॥ 7-107 ॥
യേനൈതദ്യോജിതം ഗർഭേ യേന ചൈവ വിവർധിതം ।
തേനൈവ നിർഗത്ം ഭൂയഃ കർമണാ സ്വേന പാല്യതേ ॥ 7-108 ॥
ന കശ്ചിത്കസ്യചിത്പുത്രഃ പിതാ മാതാ ന കസ്യചിത് ।
യത്സ്വയം പ്രാക്തനം കർമ പിതാ മാതേതി തത്സ്മൃതം ॥ 7-109 ॥
യേന യത്ര കൃതം കർമ സ തത്രൈവ പ്രജായതേ ।
പിതരൗ ചാസ്യ ദാസത്വം കുരുതസ്തത്പ്രചോദിതൗ ॥ 7-110 ॥
ന കശ്ചിത്കസ്യചിച്ഛക്തഃ കർതും ദുഃഖം സുഖാനി ച ।
കരോതി പ്രാക്തനം കർമ മോഹാല്ലോകസ്യ കേവലം ॥ 7-111 ॥
കർമദായാദസംബന്ധാദുപകാരഃ പരസ്പരം ।
ദൃശ്യതേ നാപകാരശ്ച മോഹേനാത്മനി മന്യതേ ॥ 7-112 ॥
ഈശ്വരാധിഷ്ഠിതം കർമ ഫലതീഹ ശുഭാശുഭം ।
ഗ്രാമസ്വാമിപ്രസാദേന സുകൃതം കർഷണം യഥാ ॥ 7-113 ॥
ദ്വയം ദേവത്വമോക്ഷായ മമേതി ന മമേതി ച ।
മമേതി ബധ്യതേ ജന്തുർന മമേതി വിമുച്യതേ ॥ 7-114 ॥
ദ്വ്യക്ഷരം ച ഭവേന്മൃത്യുസ്ത്ര്യക്ഷരം ബ്രഹ്മ ശാശ്വതം ।
മമേതി ദ്വ്യക്ഷരം മൃത്യുസ്ത്ര്യക്ഷരം ന മമേതി ച ॥ 7-115 ॥
തസ്മാദാത്മന്യഹങ്കാരമുത്സൃജ്യ പ്രവിചാരതഃ ।
വിധൂയാശേഷസംഗാംശ്ച മോക്ഷോപായം വിചിന്തയേത് ॥ 7-116 ॥
ജ്ഞാനാദ്യോഗപരിക്ലേശം കുപ്രാവരണഭോജനം ।
കുചര്യാം കുനിവാസം ച മോക്ഷാർഥീ ന വിചിന്തയേത് ॥ 7-117 ॥
ന ദുഃഖേന വിനാ സൗഖ്യം ദൃശ്യതേ സർവദേഹിനാം ।
ദുഃഖം തന്മാത്രകം ജ്ഞേയം സുഖമാനന്ത്യമുത്തമം ॥ 7-118 ॥
സേവായാം പാശുപാല്യേ ച വാനിജ്യേ കൃഷികർമണി ।
തുല്യേ സതി പരിക്ലേശേ വരം ക്ലേശോ വിമുക്തയേ ॥ 7-119 ॥
സ്വർഗാപവർഗയോരേകം യഃ ശീഘ്രം ന പ്രസാധയേത് ।
യാതി തേനൈവ ദേഹേന സ മൃതസ്തപ്യതേ ചിരം ॥ 7-120 ॥
യദവശ്യം പരാധീനൈസ്ത്യജനീയം ശരീരകം ।
കസ്മാത്തേന വിമൂഢാത്മാ ന സാധയതി ശാശ്വതം ॥ 7-121 ॥
യൗവനസ്ഥാ ഗൃഹസ്ഥാശ്ച പ്രാസാദസ്ഥാശ്ച യേ നൃപാഃ ।
സർവ ഏവ വിശീര്യന്തേ ശുഷ്കസ്നിഗ്ധാന്നഭോജനാഃ ॥ 7-122 ॥
അനേകദോഷദുഷ്ടസ്യ ദേഹസ്യൈകോ മഹാൻഗുണഹ് ।
യാം യാമവസ്ഥാമാപ്നോതി താം താമേവാനുവർതതേ ॥ 7-123 ॥
മന്ദം പരിഹരൻകർമ സ്വദേഹമനുപാലയേത് ।
വർഷാസു ജീർണകടവത്തിഷ്ഠന്നപ്യവസീദതി ॥ 7-124 ॥
ന തേ ഽത്ര ദേഹിനഃ സന്തി യേ തിഷ്ഠന്തി സുനിശ്ചലാഃ ।
സർവേ കുർവന്തി കർമാണി വികൃശാഃ പൂർവകർമഭിഃ ॥ 7-125 ॥
തുല്യേ സത്യപി കർതവ്യേ വരം കർമ കൃതം പരം ।
യഃ കൃത്വാ ന പുനഃ കുര്യാന്നാനാകർമ ശുഭാശുഭം ॥ 7-126 ॥
തസ്മാദന്തർബഹിശ്ചിന്താമനേകാകാരസംസ്ഥിതാം ।
സന്ത്യജ്യാത്മഹിതാർഥായ സ്വാധ്യായധ്യാനമഭ്യസേത് ॥ 7-127 ॥
വിവിക്തേ വിജനേ രമ്യേ പുഷ്പാശ്രമവിഭൂഷിതേ ।
സ്ഥാനം കൃത്വാ ശിവസ്ഥാനേ ധ്യായേച്ഛാന്തം പരം ശിവം ॥ 7-128 ॥
യേ ഽതിരമ്യാണ്യരണ്യാനി സുജലാനി ശിവാനി തു ।
വിഹായാഭിരതാ ഗ്രാമേ പ്രായസ്തേ ദൈവമോഹിതാഃ ॥ 7-129 ॥
വിവേകിനഃ പ്രശാന്തസ്യ യത്സുഖം ധ്യായതഃ ശിവം ।
ന തത്സുഖം മഹേന്ദ്രസ്യ ബ്രഹ്മണഃ കേശവസ്യ വാ ॥ 7-130 ॥
ഇതി നാമാമൃതം ദിവ്യം മഹാകാലാദവാപ്തവാൻ ।
വിസ്തരേണാനുപൂർവാച്ച ഋഷ്യാത്രേയഃ(?) സുനിശ്ചിതം ॥ 7-131 ॥
പ്രജ്ഞാമഥാ വിനിർമഥ്യ(?) ശിവജ്ഞാനമഹോദധിം ।
ഋഷ്യാത്രേയഃ സമുദ്ധൃത്യ പ്രാഹേദമണുമാത്രകം ॥ 7-132 ॥
ശിവധർമേ മഹാശാസ്ത്രേ ശിവധർമസ്യ ചോത്തരേ ।
യദനുക്തം ഭവേത്കിഞ്ചിത്തദത്ര പരികീർതിതം ॥ 7-133 ॥
ത്രിദൈവത്യമിദം ശാസ്ത്രം മുനീന്ദ്രാത്രേയഭാഷിതം ।
തിര്യങ്മനുജദേവാനാം സർവേഷാം ച വിമുക്തിദം ॥ 7-134 ॥
നന്ദിസ്കന്ദമഹാകാലാസ്ത്രയോ ദേവാഃ പ്രകീർതിതാഃ ।
ചന്ദ്രാത്രേയസ്തഥാത്രിശ്ച ഋഷ്യാത്രേയോ മുനിത്രയം ॥ 7-135 ॥
ഏതൈർമഹാത്മബിഃ പ്രോക്താഃ ശിവധർമാഃ സമാസതഃ ।
സർവലോകോപകാരാർഥം നമസ്തേഭ്യഃ സദാ നമഃ ॥ 7-136 ॥
തേഷാം ശിഷ്യപ്രശിഷ്യൈശ്ച ശിവധർമപ്രവക്തൃഭിഃ ।
വ്യാപ്തം ജ്ഞാനസരഃ ശാർവം വികചൈരിവ പങ്കജൈഃ ॥ 7-137 ॥
യേ ശ്രാവയന്തി സതതം ശിവധർമം ശിവാർഥിനാം ।
തേ രുദ്രാസ്തേ മുനീന്ദ്രാശ്ച തേ നമസ്യാഃ സ്വഭക്തിതഃ ॥ 7-138 ॥
യേ സമുത്ഥായ ശൃണ്വന്തി ശിവധർമം ദിനേ ദിനേ ।
തേ രുദ്രാ രുദ്രലോകേശാ ന തേ പ്രകൃതിമാനുഷാഃ ॥ 7-139 ॥
ശിവോപനിഷദം ഹ്യേതദധ്യായൈഃ സപ്തഭിഃ സ്മൃതം ।
ഋഷ്യാത്രേയസഗോത്രേണ മുനിനാ ഹിതകാമ്യയാ ॥ 7-140 ॥
॥ ഇതി ശിവോപനിഷദി ശിവാചാരാധ്യായഃ സപ്തമഃ ॥
॥ ഇതി ശിവോപനിഷത്സമാപ്താ ॥
– Chant Stotra in Other Languages –
Shiva Upanishad in Sanskrit – English – Marathi – Bengali – Gujarati – Kannada – Malayalam – Odia – Telugu – Tamil