॥ Shiva jayavaada Stotram in Marathi ॥
॥ शिवजयवाद स्तोत्रम ॥
जय जय गिरिजालङ्कृतविग्रह, जय जय विनताखिलदिक्पाल ।
जय जय सर्वविपत्तिविनाशन, जय जय शङ्कर दीनदयाळ ॥ 1 ॥
जय जय सकलसुरासुरसेवित, जय जय वांछितदानवितन्द्र ।
जय जय लोकालोकधुरन्धर जय जय नागेश्वर धृतचन्द्र ॥ 2 ॥
जय जय हिमाचलनिवासिन जय जय करुणाकल्पितलिङ्ग ।
जय जय संसृतिरचनाशिल्पिन जय जय भक्तहृदंबुजभृङ्ग ॥ 3 ॥
जय जय भोगिफणामणिरञ्जित, जय जय भूतिविभूषितदेह ।
जय जय पितृवनकेलिपरायण, जय जय गौरीविभ्रमगेह ॥ 4 ॥
जय जय गाङ्गतरङ्गलुलितजट, जय जय मङ्गळपूरसमुद्र ।
जय जय बोधविजृंभणकारण, जय जय मानसपूर्तिविनिद्र ॥ 5 ॥
जय जय दयातरङ्गितलोचन, जय जय चित्रचरित्रपवित्र ।
जय जय शब्दब्रह्मविकाशक, जय जय किल्बिषतापधवित्र ॥ 6 ॥
जय जय तन्त्रनिरूपणतत्पर, जय जय योगविकस्वरधाम ।
जय जय मदनमहाभटभञ्जन, जय जय पूरितपूजककाम ॥ 7 ॥
जय जय गङ्गाधर विश्वेश्वर, जय जय पतितपवित्रविधान ।
जय जय बंबंनाद कृपाकर, जय जय शिव शिव सौख्यनिधान ॥ 8 ॥
य इमं शिवजयवादमुदारं पठति सदा शिवधाम्नि ।
तस्य सदाशिवशासनयोगान्माद्यति संपन्नाम्नि ॥ 9 ॥
इति शिवजयवादस्तोत्रं संपूर्णम ॥
– Chant Stotra in Other Languages –
Shivajayavaada Stotram in Marathi – Gujarati । Bengali – Kannada – Malayalam – Telugu