॥ Sri Dakshinamurthy Stotram 4 Kannada Lyrics ॥
॥ ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಂ – ೪ ॥
ಮಂದಸ್ಮಿತ ಸ್ಫುರಿತ ಮುಗ್ಧಮುಖಾರವಿಂದ
ಕಂದರ್ಪಕೋಟಿ ಶತಸುಂದರದಿವ್ಯಮೂರ್ತಿಮ್ ।
ಆತಾಮ್ರಕೋಮಲ ಜಟಾಘಟಿತೇಂದುಲೇಖ-
ಮಾಲೋಕಯೇ ವಟತಟೀ ನಿಲಯಂ ದಯಳುಮ್ ॥ ೧ ॥
ಕಂದಳಿತ ಬೋಧಮುದ್ರಂ ಕೈವಲ್ಯಾನಂದ ಸಂವಿದುನ್ನಿದ್ರಮ್ ।
ಕಲಯೇ ಕಂಚನರುದ್ರಂ ಕರುಣಾರಸಪೂರಪೂರಿತ ಸಮುದ್ರಮ್ ॥ ೨ ॥
ಓಂ ಜಯ ದೇವ ಮಹಾದೇವ ಜಯ ಕಾರುಣ್ಯವಿಗ್ರಹ ।
ಜಯ ಭೂಮಿರುಹಾವಾಸ ಜಯ ವೀರಾಸನಸ್ಥಿತ ॥ ೩ ॥
ಜಯ ಕುಂದೇಂದು ಪಾಟೀರ ಪಾಂಡುರಾಂಗಾಗಜಪತೇ ।
ಜಯ ವಿಜ್ಞಾನಮುದ್ರಾಽಕ್ಷಮಾಲಾ ವೀಣಾ ಲಸತ್ಕರ ॥ ೪ ॥
ಜಯೇತರ ಕರನ್ಯಸ್ತ ಪುಸ್ತಕಾಸ್ತ ರಜಸ್ತಮಃ ।
ಜಯಾಪಸ್ಮಾರ ನಿಕ್ಷಿಪ್ತ ದಕ್ಷಪಾದ ಸರೋರುಹ ॥ ೫ ॥
ಜಯ ಶಾರ್ದೂಲ ಚರ್ಮೈಕ ಪರಿಧಾನ ಲಸತ್ಕಟೇ ।
ಜಯ ಮಂದಸ್ಮಿತೋದಾರ ಮುಖೇಂದು ಸ್ಫುರಿತಾಕೃತೇ ॥ ೬ ॥
ಜಯಾಂತೇವಾಸಿನಿಕರೈ-ರಾವೃತಾನಂದಮಂದರ ।
ಜಯ ಲೀಲಾಜಿತಾನಂಗ ಜಯ ಮಂಗಳ ವೈಭವ ॥ ೭ ॥
ಜಯ ತುಂಗಪೃಥೂರಸ್ಕ ಜಯ ಸಂಗೀತಲೋಲುಪ ।
ಜಯ ಗಂಗಾಧರಾಸಂಗ ಜಯ ಶೃಂಗಾರಶೇಖರ ॥ ೮ ॥
ಜಯೋತ್ಸಂಗಾನುಷಂಗಾರ್ಯ ಜಯೋತ್ತುಂಗ ನಗಾಲಯ ।
ಜಯಾಪಾಂಗೈಕ ನಿರ್ದಗ್ಧ ತ್ರಿಪುರಾಮರವಲ್ಲಭ ॥ ೯ ॥
ಜಯ ಪಿಂಗ ಜಟಾಜೂಟ ಘಟಿತೇಂದು ಕರಾಮರ ।
ಜಯ ಜಾತು ಪ್ರಪನ್ನಾರ್ತಿ ಪ್ರಪಾಟನ ಪಟೂತ್ತಮ ॥ ೧೦ ॥
ಜಯ ವಿದ್ಯೋತ್ಪಲೋಲ್ಲಾಸಿ ನಿಶಾಕರ ಪರಾವರ ।
ಜಯಾವಿದ್ಯಾಂಧತಮಸ-ಧ್ವಂಸನೋದ್ಭಾಸಿ ಭಾಸ್ಕರ ॥ ೧೧ ॥
ಜಯ ಸಂಸೃತಿ ಕಾಂತಾರ ಕುಠಾರಾಸುರಸೂದನ ।
ಜಯ ಸಂಸಾರ ಸಾವಿತ್ರ ತಾಪತಾಪಿತ ಪಾದಪ ॥ ೧೨ ॥
ಜಯ ದೋಷವಿಷಾಲೀಢ ಮೃತಸಂಜೀವನೌಷಧ ।
ಜಯ ಕರ್ತವ್ಯ ದಾವಾಗ್ನಿ ದಗ್ಧಾಂತರ ಸುಧಾಂಬುಧೇ ॥ ೧೩ ॥
ಜಯಾಸೂಯಾರ್ಣವಾಮಗ್ನ ಜನತಾರಣ ನಾವಿಕ ।
ಜಯಾಹಂತಾಕ್ಷಿ ರೋಗಾಣಾಮತಿಲೋಕ ಸುಖಾಂಜನ ॥ ೧೪ ॥
ಜಯಾಶಾವಿಷವಲ್ಲೀನಾಂ-ಮೂಲಮಾಲಾನಿಕೃಂತನ ।
ಜಯಾಘ ತೃಣಕೂಟಾನಾಮಮಂದ ಜ್ವಲಿತಾನಲ ॥ ೧೫ ॥
ಜಯ ಮಾಯಾಮದೇಭಶ್ರೀ ವಿದಾರಣ ಮೃಗೋತ್ತಮ ।
ಜಯ ಭಕ್ತ ಜನಸ್ವಾಂತ ಚಂದ್ರಕಾಂತೈಕ ಚಂದ್ರಮಾಃ ॥ ೧೬ ॥
ಜಯ ಸಂತ್ಯಕ್ತಸರ್ವಾಶ ಮುನಿಕೋಕ ದಿವಾಕರ ।
ಜಯಾಚಲಸುತಾ-ಚಾರುಮುಖಚಂದ್ರ-ಚಕೋರಕ ॥ ೧೭ ॥
ಜಯಾದ್ರಿಕನ್ಯಕೋತ್ತುಂಗ ಕುಚಾಚಲ ವಿಹಂಗಮ ।
ಜಯ ಹೈಮವತೀ ಮಂಜು ಮುಖಪಂಕಜ ಬಂಭರ ॥ ೧೮ ॥
ಜಯ ಕಾತ್ಯಾಯನೀ ಸ್ನಿಗ್ಧ ಚಿತ್ತೋತ್ಪಲ ಸುಧಾಕರ ।
ಜಯಾಖಿಲ ಹೃದಾಕಾಶ ಲಸದ್ದ್ಯುಮಣಿಮಂಡಲ ॥ ೧೯ ॥
ಜಯಾಸಂಗ ಸುಖೋತ್ತುಂಗ ಸೌಧಕ್ರೀಡನ ಭೂಮಿಪ ।
ಜಯ ಸಂವಿತ್ಸಭಾಸೀಮ ನಟನೋತ್ಸುಕ ನರ್ತಕ ॥ ೨೦ ॥
ಜಯಾನವಧಿ ಬೋಧಾಬ್ಧಿ ಕೇಳಿಕೌತುಕ ಭೂಪತೇ ।
ಜಯ ನಿರ್ಮಲ ಚಿದ್ವ್ಯೋಮ್ನಿ ಚಾರುದ್ಯೋತಿತ ನೀರದ ॥ ೨೧ ॥
ಜಯಾನಂದ ಸದುದ್ಯಾನ ಲೀಲಾಲೋಲುಪ ಕೋಕಿಲ ।
ಜಯಾಗಮ ಶಿರೋರಣ್ಯವಿಹಾರ ವರಕುಂಜರ ॥ ೨೨ ॥
ಜಯ ಪ್ರಣವ ಮಾಣಿಕ್ಯ ಪಂಜರಾಂತಶ್ಶುಕಾಗ್ರಣೀಃ ।
ಜಯ ಸರ್ವಕಲಾವಾರ್ಧಿ ತುಷಾರ ಕರಮಂಡಲ ॥ ೨೩ ॥
ಜಯಾಣಿಮಾದಿಭೂತೀನಾಂ ಶರಣ್ಯಾಖಿಲ ಪುಣ್ಯಭೂಃ ।
ಜಯ ಸ್ವಭಾವ ಭಾಸೈವ ವಿಭಾಸಿತ ಜಗತ್ತ್ರಯ ॥ ೨೪ ॥
ಜಯ ಖಾದಿ ಧರಿತ್ರ್ಯಂತ ಜಗಜ್ಜನ್ಮಾದಿಕಾರಣ ।
ಜಯಾಶೇಷ ಜಗಜ್ಜಾಲ ಕಲಾಕಲನವರ್ಜಿತ ॥ ೨೫ ॥
ಜಯ ಮುಕ್ತಜನಪ್ರಾಪ್ಯ ಸತ್ಯಜ್ಞಾನ ಸುಖಾಕೃತೇ ।
ಜಯ ದಕ್ಷಾಧ್ವರಧ್ವಂಸಿನ್ ಜಯ ಮೋಕ್ಷಫಲಪ್ರದ ॥ ೨೬ ॥
ಜಯ ಸೂಕ್ಷ್ಮ ಜಗದ್ವ್ಯಾಪಿನ್ ಜಯ ಸಾಕ್ಷಿನ್ ಚಿದಾತ್ಮಕ ।
ಜಯ ಸರ್ಪಕುಲಾಕಲ್ಪ ಜಯಾನಲ್ಪ ಗುಣಾರ್ಣವ ॥ ೨೭ ॥
ಜಯ ಕಂದರ್ಪಲಾವಣ್ಯ ದರ್ಪನಿರ್ಭೇದನ ಪ್ರಭೋ ।
ಜಯ ಕರ್ಪೂರಗೌರಾಂಗ ಜಯ ಕರ್ಮಫಲಾಶ್ರಯ ॥ ೨೮ ॥
ಜಯ ಕಂಜದಳೋತ್ಸೇಕ-ಭಂಜನೋದ್ಯತಲೋಚನ ।
ಜಯ ಪೂರ್ಣೇಂದುಸೌಂದರ್ಯ ಗರ್ವನಿರ್ವಾಪಣಾನನ ॥ ೨೯ ॥
ಜಯ ಹಾಸ ಶ್ರಿಯೋದಸ್ತ ಶರಚ್ಚಂದ್ರ ಮಹಾಪ್ರಭ ।
ಜಯಾಧರ ವಿನಿರ್ಭಿನ್ನ ಬಿಂಬಾರುಣಿಮ ವಿಭ್ರಮ ॥ ೩೦ ॥
ಜಯ ಕಂಬು ವಿಲಾಸಶ್ರೀ ಧಿಕ್ಕಾರಿ ವರಕಂಧರ ।
ಜಯ ಮಂಜುಲಮಂಜೀರರಂಜಿತ ಶ್ರೀಪದಾಂಬುಜ ॥ ೩೧ ॥
ಜಯ ವೈಕುಂಠಸಂಪೂಜ್ಯ ಜಯಾಕುಂಠಮತೇ ಹರ ।
ಜಯ ಶ್ರೀಕಂಠ ಸರ್ವಜ್ಞ ಜಯ ಸರ್ವಕಳಾನಿಧೇ ॥ ೩೨ ॥
ಜಯ ಕೋಶಾತಿದೂರಸ್ಥ ಜಯಾಕಾಶಶಿರೋರುಹ ।
ಜಯ ಪಾಶುಪತಧ್ಯೇಯ ಜಯ ಪಾಶವಿಮೋಚಕ ॥ ೩೩ ॥
ಜಯ ದೇಶಿಕ ದೇವೇಶ ಜಯ ಶಂಭೋ ಜಗನ್ಮಯ ।
ಜಯ ಶರ್ವ ಶಿವೇಶಾನ ಜಯ ಶಂಕರ ಶಾಶ್ವತ ॥ ೩೪ ॥
ಜಯೋಂಕಾರೈಕಸಂಸಿದ್ಧ ಜಯ ಕಿಂಕರವತ್ಸಲ ।
ಜಯ ಪಂಕಜ ಜನ್ಮಾದಿ ಭಾವಿತಾಂಘ್ರಿಯುಗಾಂಬುಜ ॥ ೩೫ ॥
ಜಯ ಭರ್ಗ ಭವ ಸ್ಥಾಣೋ ಜಯ ಭಸ್ಮಾವಕುಂಠನ ।
ಜಯ ಸ್ತಿಮಿತ ಗಂಭೀರ ಜಯ ನಿಸ್ತುಲವಿಕ್ರಮ ॥ ೩೬ ॥
ಜಯಾಸ್ತಮಿತಸರ್ವಾಶ ಜಯೋದಸ್ತಾರಿಮಂಡಲ ।
ಜಯ ಮಾರ್ತಾಂಡಸೋಮಾಗ್ನಿ-ಲೋಚನತ್ರಯ ಮಂಡಿತ ॥ ೩೭ ॥
ಜಯ ಗಂಡಸ್ಥಲಾದರ್ಶ ಬಿಂಬಿತೋದ್ಭಾಸಿಕುಂಡಲ ।
ಜಯ ಪಾಷಂಡಜನತಾ ದಂಡನೈಕಪರಾಯಣ ॥ ೩೮ ॥
ಜಯಾಖಂಡಿತಸೌಭಾಗ್ಯ ಜಯ ಚಂಡೀಶಭಾವಿತ ।
ಜಯಾನಂತಾಂತ ಕಾಂತೈಕ ಜಯ ಶಾಂತಜನೇಡಿತ ॥ ೩೯ ॥
ಜಯ ತ್ರಯ್ಯಂತ ಸಂವೇದ್ಯ ಜಯಾಂಗ ತ್ರಿತಯಾತಿಗ ।
ಜಯ ನಿರ್ಭೇದಬೋಧಾತ್ಮನ್ ಜಯ ನಿರ್ಭಾವಭಾವಿತ ॥ ೪೦ ॥
ಜಯ ನಿರ್ದ್ವಂದ್ವ ನಿರ್ದೋಷ ಜಯಾದ್ವೈತಸುಖಾಂಬುಧೇ ।
ಜಯ ನಿತ್ಯನಿರಾಧಾರ ಜಯ ನಿಷ್ಕಳ ನಿರ್ಗುಣ ॥ ೪೧ ॥
ಜಯ ನಿಷ್ಕ್ರಿಯ ನಿರ್ಮಾಯ ಜಯ ನಿರ್ಮಲ ನಿರ್ಭಯ ।
ಜಯ ನಿಶ್ಶಬ್ದ ನಿಸ್ಸ್ಪರ್ಶ ಜಯ ನೀರೂಪ ನಿರ್ಮಲ ॥ ೪೨ ॥
ಜಯ ನೀರಸ ನಿರ್ಗಂಧ ಜಯ ನಿಸ್ಪೃಹ ನಿಶ್ಚಲ ।
ಜಯ ನಿಸ್ಸೀಮ ಭೂಮಾತ್ಮನ್ ಜಯ ನಿಷ್ಪಂದ ನೀರಧೇ ॥ ೪೩ ॥
ಜಯಾಚ್ಯುತ ಜಯಾತರ್ಕ್ಯ ಜಯಾನನ್ಯ ಜಯಾವ್ಯಯ ।
ಜಯಾಮೂರ್ತ ಜಯಾಚಿಂತ್ಯ ಜಯಾಗ್ರಾಹ್ಯ ಜಯಾದ್ಭುತ ॥ ೪೪ ॥
ಇತಿ ಶ್ರೀ ದೇಶಿಕೇಂದ್ರಸ್ಯ ಸ್ತೋತ್ರಂ ಪರಮಪಾವನಮ್ ।
ಪುತ್ರಪೌತ್ತ್ರಾಯುರಾರೋಗ್ಯ-ಸರ್ವಸೌಭಾಗ್ಯವರ್ಧನಮ್ ॥ ೪೫ ॥
ಸರ್ವವಿದ್ಯಾಪ್ರದಂ ಸಮ್ಯಗಪವರ್ಗವಿಧಾಯಕಮ್ ।
ಯಃ ಪಠೇತ್ಪ್ರಯತೋ ಭೂತ್ವಾ ಸಸರ್ವಫಲಮಶ್ನುತೇ ॥ ೪೬ ॥
ದಾಕ್ಷಾಯಣೀಪತಿ ದಯಾರ್ದ್ರ ನಿರೀಕ್ಷಣೇನ
ಸಾಕ್ಷಾದವೈತಿ ಪರತತ್ವಮಿಹೈವಧೀರಃ ।
ನ ಸ್ನಾನ ದಾನ ಜಪ ಹೋಮ ಸುರಾರ್ಚನಾದಿ-
ಧರ್ಮೈರಶೇಷನಿಗಮಾನ್ತ ನಿರೂಪಣೈರ್ವಾ ॥ ೪೭ ॥
ಅವಚನಚಿನ್ಮುದ್ರಾಭ್ಯಾಮದ್ವೈತಂ ಬೋಧಮಾತ್ರಮಾತ್ಮಾನಮ್ ।
ಬ್ರೂತೇ ತತ್ರ ಚ ಮಾನಂ ಪುಸ್ತಕ ಭುಜಗಾಗ್ನಿಭಿರ್ಮಹಾದೇವಃ ॥ ೪೮ ॥
ಕಟಿಘಟಿತ ಕರಟಿಕೃತ್ತಿಃ ಕಾಮಪಿ ಮುದ್ರಾಂ ಪ್ರದರ್ಶಯನ್ ಜಟಿಲಃ ।
ಸ್ವಾಲೋಕಿನಃ ಕಪಾಲೀ ಹಂತಮನೋವಿಲಯಮಾತನೋತ್ಯೇಕಃ ॥ ೪೯ ॥
ಶ್ರುತಿಮುಖಚಂದ್ರಚಕೋರಂ ನತಜನದೌರಾತ್ಮ್ಯದುರ್ಗಮಕುಠಾರಮ್ ।
ಮುನಿಮಾನಸಸಂಚಾರಂ ಮನಸಾ ಪ್ರಣತೋಽಸ್ಮಿ ದೇಶಿಕಮುದಾರಮ್ ॥ ೫೦ ॥
ಇತಿ ಶ್ರೀಪರಮಹಂಸ ಪರಿವ್ರಾಜಕಾಚಾರ್ಯವರ್ಯ ಶ್ರೀಸದಾಶಿವ ಬ್ರಹ್ಮೇಂದ್ರವಿರಚಿತಂ ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಮ್ ।
– Chant Stotra in Other Languages –
Sri Dakshinamurthy Stotram 4 in Sanskrit – English – Kannada – Telugu – Tamil