॥ Gopala Vimsati Telugu Lyrics ॥
॥ శ్రీ గోపాల వింశతి ॥
శ్రీమాన్వేంకటనాథార్యః కవితార్కికకేసరీ ।
వేదాంతాచార్యవర్యో మే సన్నిధత్తాం సదా హృది ॥
వందే బృందావనచరం వల్లవీ జనవల్లభం ।
జయంతీసంభవం ధామ వైజయంతీ విభూషణమ్ ॥ ౧ ॥
వాచం నిజాంకరసికాం ప్రసమీక్షమాణో
వక్త్రారవిందవినివేశితపాంచజన్యః ।
వర్ణత్రికోణరుచిరే వరపుండరీకే
బద్ధాసనో జయతి వల్లవచక్రవర్తీ ॥ ౨ ॥
ఆమ్నాయగంధిరుచిరస్ఫురితాధరోష్ఠం
ఆస్రావిలేక్షణమనుక్షణమందహాసం ।
గోపాలడింభవపుషం కుహనా జనన్యాః
ప్రాణస్తనంధయమవైమి పరం పుమాంసమ్ ॥ ౩ ॥
ఆవిర్భవత్వనిభృతాభరణం పురస్తాత్
ఆకుంచితైకచరణం నిభృతాన్యపాదం ।
దధ్నానిమంథముఖరేణ నిబద్ధతాళం
నాథస్య నందభవనే నవనీతనాట్యమ్ ॥ ౪ ॥
హర్తుం కుంభే వినిహితకరస్స్వాదు హైయంగవీనం
దృష్ట్వా దామగ్రహణచటులాం మాతరం జాతరోషాం ।
పాయాదీషత్ప్రచలితపదో నాపగచ్ఛన్న తిష్ఠన్
మిథ్యాగోపస్సపది నయనే మీలయన్ విశ్వగోప్తా ॥ ౫ ॥
వ్రజయోషిదపాంగ వేదనీయం
మధురాభాగ్యమనన్యభోగ్యమీడే ।
వసుదేవవధూ స్తనంధయం తత్
కిమపి బ్రహ్మ కిశోరభావదృశ్యమ్ ॥ ౬ ॥
పరివర్తితకంధరం భయేన
స్మితఫుల్లాధరపల్లవం స్మరామి ।
విటపిత్వనిరాసకం కయోశ్చిత్
విపులోలూఖలకర్షకం కుమారమ్ ॥ ౭ ॥
నికటేషు నిశామయామి నిత్యం
నిగమాంతైరధునాఽపి మృగ్యమాణం ।
యమళార్జునదృష్టబాలకేళిం
యమునాసాక్షికయౌవనం యువానమ్ ॥ ౮ ॥
పదవీమదవీయసీం విముక్తేః
అటవీ సంపదమంబు వాహయంతీం ।
అరుణాధరసాభిలాషవంశాం
కరుణాం కారణమానుషీం భజామి ॥ ౯ ॥
అనిమేషనిషేవణీయమక్ష్ణోః
అజహద్యౌవనమావిరస్తు చిత్తే ।
కలహాయితకుంతలం కలాపైః
కరుణోన్మాదకవిభ్రమం మహో మే ॥ ౧౦ ॥
అనుయాయిమనోజ్ఞవంశనాళైః
అవతు స్పర్శితవల్లవీవిమోహైః ।
అనఘస్మితశీతలైరసౌ మామ్
అనుకంపాసరిదంబుజైరపాంగైః ॥ ౧౧ ॥
అధరాహితచారువంశనాళాః
మకుటాలంబిమయూరపింఛమాలాః ।
హరినీలశిలావిభంగనీలాః
ప్రతిభాస్సంతు మమాంతిమప్రయాణే ॥ ౧౨ ॥
అఖిలానవలోకయామి కాలాన్
మహిళాధీనభుజాంతరస్యయూనః ।
అభిలాషపదం వ్రజాంగనానామ్
అభిలాపక్రమదూరమాభిరూప్యమ్ ॥ ౧౩ ॥
హృది ముగ్ధశిఖండమండనో
లిఖితః కేన మమైష శిల్పినా ।
మదనాతురపల్లవాంగనా-
వదనాంభోజదివాకరో యువా ॥ ౧౪ ॥
మహసే మహితాయ మౌళినా
వినతేనాంజలిమంజనత్విషే ।
కలయామి విముగ్ధవల్లవీ-
వలయాభాషితమంజువేణవే ॥ ౧౫ ॥
జయతి లలితవృత్తిం శిక్షితో వల్లవీనాం
శిథిలవలయశింజాశీతలైర్హస్తతాళైః ।
అఖిలభువనరక్షాగోపవేషస్య విష్ణోః
అధరమణిసుధాయామంశవాన్వంశనాళః ॥ ౧౬ ॥
చిత్రాకల్ప శ్రవసి కలయన్ లాంగలీకర్ణపూరం
బర్హోత్తంసస్ఫురితచికురో బంధుజీవం దధానః ।
గుంజాబద్ధామురసి లలితాం ధారయన్ హారయష్టిం
గోపస్త్రీణాం జయతి కితవః కోఽపి కౌమారహారీ ॥ ౧౭ ॥
లీలాయష్టిం కరకిసలయే దక్షిణే న్యస్య ధన్యాం
అంసే దేవ్యాః పులకరుచిరే సన్నివిష్టాన్యబాహుః ।
మేఘశ్యామో జయతి లలితో మేఖలాదత్తవేణుః
గుంజాపీడస్ఫురితచికురో గోపకన్యాభుజంగః ॥ ౧౮ ॥
ప్రత్యాలీఢస్థితిమధిగతాం ప్రాప్తగాఢాంగపాళిం
పశ్చాదీషన్మిళితనయనాం ప్రేయసీం ప్రేక్షమాణః ।
భస్త్రాయంత్రప్రణిహితకరో భక్తజీవాతురవ్యాత్
వారిక్రీడానిబిడవసనో వల్లవీవల్లభో నః ॥ ౧౯ ॥
వాసో హృత్వా దినకరసుతాసన్నిధౌ వల్లవీనాం
లీలాస్మేరో జయతి లలితామాస్థితః కుందశాఖాం ।
సవ్రీడాభిస్తదను వసనే తాభిరభ్యర్థ్యమానే
కామీ కశ్చిత్కరకమలయోరంజలిం యాచమానః ॥ ౨౦ ॥
ఇత్యనన్యమనసా వినిర్మితాం
వేంకటేశకవినా స్తుతిం పఠన్ ।
దివ్యవేణురసికం సమీక్షతే
దైవతం కిమపి యౌవతప్రియమ్ ॥ ౨౧ ॥
ఇతి శ్రీవేదాంతాచార్యస్య కృతిషు గోపాలవింశతిః ॥