॥ Sri Kalika Ashtakam Gujarati Lyrics ॥
॥ શ્રીકાલિકાષ્ટકમ્ ॥
ધ્યાનમ્ ।
ગલદ્રક્તમુણ્ડાવલીકણ્ઠમાલા
મહોઘોરરાવા સુદંષ્ટ્રા કરાલા ।
વિવસ્ત્રા શ્મશાનાલયા મુક્તકેશી
મહાકાલકામાકુલા કાલિકેયમ્ ॥ ૧ ॥
ભુજેવામયુગ્મે શિરોઽસિં દધાના
વરં દક્ષયુગ્મેઽભયં વૈ તથૈવ ।
સુમધ્યાઽપિ તુઙ્ગસ્તના ભારનમ્રા
લસદ્રક્તસૃક્કદ્વયા સુસ્મિતાસ્યા ॥ ૨ ॥
શવદ્વન્દ્વકર્ણાવતંસા સુકેશી
લસત્પ્રેતપાણિં પ્રયુક્તૈકકાઞ્ચી ।
શવાકારમઞ્ચાધિરૂઢા શિવાભિશ્-
ચતુર્દિક્ષુશબ્દાયમાનાઽભિરેજે ॥ ૩ ॥
॥ અથ સ્તુતિઃ ॥
વિરઞ્ચ્યાદિદેવાસ્ત્રયસ્તે ગુણાસ્ત્રીન્
સમારાધ્ય કાલીં પ્રધાના બભૂબુઃ ।
અનાદિં સુરાદિં મખાદિં ભવાદિં
સ્વરૂપં ત્વદીયં ન વિન્દન્તિ દેવાઃ ॥ ૧ ॥
જગન્મોહિનીયં તુ વાગ્વાદિનીયં
સુહૃત્પોષિણીશત્રુસંહારણીયમ્ ।
વચસ્તમ્ભનીયં કિમુચ્ચાટનીયં
સ્વરૂપં ત્વદીયં ન વિન્દન્તિ દેવાઃ ॥ ૨ ॥
ઇયં સ્વર્ગદાત્રી પુનઃ કલ્પવલ્લી
મનોજાસ્તુ કામાન્ યથાર્થં પ્રકુર્યાત્ ।
તથા તે કૃતાર્થા ભવન્તીતિ નિત્યં
સ્વરૂપં ત્વદીયં ન વિન્દન્તિ દેવાઃ ॥ ૩ ॥
સુરાપાનમત્તા સુભક્તાનુરક્તા
લસત્પૂતચિત્તે સદાવિર્ભવત્તે ।
જપધ્યાનપૂજાસુધાધૌતપઙ્કા
સ્વરૂપં ત્વદીયં ન વિન્દન્તિ દેવાઃ ॥ ૪ ॥
ચિદાનન્દકન્દં હસન્ મન્દમન્દં
શરચ્ચન્દ્રકોટિપ્રભાપુઞ્જબિમ્બમ્ ।
મુનીનાં કવીનાં હૃદિ દ્યોતયન્તં
સ્વરૂપં ત્વદીયં ન વિન્દન્તિ દેવાઃ ॥ ૫ ॥
મહામેઘકાલી સુરક્તાપિ શુભ્રા
કદાચિદ્ વિચિત્રાકૃતિર્યોગમાયા ।
ન બાલા ન વૃદ્ધા ન કામાતુરાપિ
સ્વરૂપં ત્વદીયં ન વિન્દન્તિ દેવાઃ ॥ ૬ ॥
ક્ષમસ્વાપરાધં મહાગુપ્તભાવં
મયા લોકમધ્યે પ્રકાશિકૃતં યત્ ।
તવ ધ્યાનપૂતેન ચાપલ્યભાવાત્
સ્વરૂપં ત્વદીયં ન વિન્દન્તિ દેવાઃ ॥ ૭ ॥
યદિ ધ્યાનયુક્તં પઠેદ્ યો મનુષ્યસ્-
તદા સર્વલોકે વિશાલો ભવેચ્ચ ।
ગૃહે ચાષ્ટસિદ્ધિર્મૃતે ચાપિ મુક્તિઃ
સ્વરૂપં ત્વદીયં ન વિન્દન્તિ દેવાઃ ॥ ૮ ॥
॥ ઇતિ શ્રીમચ્છઙ્કરાચાર્યવિરચિતં શ્રીકાલિકાષ્ટકં સમ્પૂર્ણમ્ ॥
– Chant Stotra in Other Languages –
Goddess Durga Slokam » Sri Kalika Ashtakam Lyrics in Sanskrit » English » Bengali » Kannada » Malayalam » Odia » Telugu » Tamil