॥ Lalitha Stavaraja Stotram Telugu Lyrics ॥
॥ శ్రీ లలితా స్తవరాజః ॥
దేవా ఊచుః ।
జయ దేవి జగన్మాతర్జయ దేవి పరాత్పరే ।
జయ కల్యాణనిలయే జయ కామకలాత్మికే ॥ ౧ ॥
జయకారి చ వామాక్షి జయ కామాక్షి సున్దరి ।
జయాఖిలసురారాధ్యే జయ కామేశి మానదే ॥ ౨ ॥
జయ బ్రహ్మమయే దేవి బ్రహ్మాత్మకరసాత్మికే ।
జయ నారాయణి పరే నన్దితాశేషవిష్టపే ॥ ౩ ॥
జయ శ్రీకణ్ఠదయితే జయ శ్రీలలితేఽంబికే ।
జయ శ్రీవిజయే దేవి విజయ శ్రీసమృద్ధిదే ॥ ౪ ॥
జాతస్య జాయమానస్య ఇష్టాపూర్తస్య హేతవే ।
నమస్తస్యై త్రిజగతాం పాలయిత్ర్యై పరాత్పరే ॥ ౫ ॥
కలాముహూర్తకాష్ఠాహర్మాసర్తుశరదాత్మనే ।
నమః సహస్రశీర్షాయై సహస్రముఖలోచనే ॥ ౬ ॥
నమః సహస్రహస్తాబ్జపాదపఙ్కజశోభితే ।
అణోరణుతరే దేవి మహతోఽపి మహీయసి ॥ ౭ ॥
పరాత్పరతరే మాతస్తేజస్తేజీయసామపి ।
అతలం తు భవేత్పాదౌ వితలం జానునీ తవ ॥ ౮ ॥
రసాతలం కటీదేశః కుక్షిస్తే ధరణీ భవేత్ ।
హృదయం తు భువర్లోకః స్వస్తే ముఖముదాహృతమ్ ॥ ౯ ॥
దృశశ్చన్ద్రార్కదహనా దిశస్తే బాహవోఽంబికే ।
మరుతస్తు తవోచ్ఛ్వాసా వాచస్తే శ్రుతయోఽఖిలాః ॥ ౧౦ ॥
క్రీడా తే లోకరచనా సఖా తే చిన్మయః శివః ।
ఆహారస్తే సదానన్దో వాసస్తే హృదయే సతామ్ ॥ ౧౧ ॥
దృశ్యాదృశ్యస్వరూపాణి రూపాణి భువనాని తే ।
శిరోరుహా ఘనాస్తే తు తారకాః కుసుమాని తే ॥ ౧౨ ॥
ధర్మాద్యా బాహవస్తే స్యురధర్మాద్యాయుధాని తే ।
యమాశ్చ నియమాశ్చైవ కరపాదరుహాస్తథా ॥ ౧౩ ॥
స్తనౌ స్వాహాస్వధాఽఽకరౌ లోకోజ్జీవనకారకౌ ।
ప్రాణాయామస్తు తే నాసా రసనా తే సరస్వతీ ॥ ౧౪ ॥
ప్రత్యాహారస్త్విన్ద్రియాణి ధ్యానం తే ధీస్తు సత్తమా ।
మనస్తే ధారణాశక్తిర్హృదయం తే సమాధికః ॥ ౧౫ ॥
మహీరుహాస్తేఽఙ్గరుహాః ప్రభాతం వసనం తవ ।
భూతం భవ్యం భవిష్యచ్చ నిత్యం చ తవ విగ్రహః ॥ ౧౬ ॥
యజ్ఞరూపా జగద్ధాత్రీ విశ్వరూపా చ పావనీ ।
ఆదౌ యా తు దయాభూతా ససర్జ నిఖిలాః ప్రజాః ॥ ౧౭ ॥
హృదయస్థాపి లోకానామదృశ్యా మోహనాత్మికా ॥ ౧౮ ॥
నామరూపవిభాగం చ యా కరోతి స్వలీలయా ।
తాన్యధిష్ఠాయ తిష్ఠన్తీ తేష్వసక్తార్థకామదా ।
నమస్తస్యై మహాదేవ్యై సర్వశక్త్యై నమోనమః ॥ ౧౯ ॥
యదాజ్ఞయా ప్రవర్తన్తే వహ్నిసూర్యేన్దుమారుతాః ।
పృథివ్యాదీని భూతాని తస్యై దేవ్యై నమోనమః ॥ ౨౦ ॥
యా ససర్జాదిధాతారం సర్గాదావాదిభూరిదమ్ ।
దధార స్వయమేవైకా తస్యై దేవ్యై నమోనమః ॥ ౨౧ ॥
యథా ధృతా తు ధరణీ యయాఽఽకాశమమేయయా ।
యస్యాముదేతి సవితా తస్యై దేవ్యై నమోనమః ॥ ౨౨ ॥
యత్రోదేతి జగత్కృత్స్నం యత్ర తిష్ఠతి నిర్భరమ్ ।
యత్రాన్తమేతి కాలే తు తస్యై దేవ్యై నమోనమః ॥ ౨౩ ॥
నమోనమస్తే రజసే భవాయై
నమోనమః సాత్త్వికసంస్థితాయై ।
నమోనమస్తే తమసే హరాయై
నమోనమో నిర్గుణతః శివాయై ॥ ౨౪ ॥
నమోనమస్తే జగదేకమాత్రే
నమోనమస్తే జగదేకపిత్రే ।
నమోనమస్తేఽఖిలరూపతన్త్రే
నమోనమస్తేఽఖిలయన్త్రరూపే ॥ ౨౫ ॥
నమోనమో లోకగురుప్రధానే
నమోనమస్తేఽఖిలవాగ్విభూత్యై ।
నమోఽస్తు లక్ష్మ్యై జగదేకతుష్ట్యై
నమోనమః శాంభవి సర్వశక్త్యై ॥ ౨౬ ॥
అనాదిమధ్యాన్తమపాఞ్చభౌతికం
హ్యవాఙ్మనోగమ్యమతర్క్యవైభవమ్ ।
అరూపమద్వన్ద్వమదృష్టగోచరం
ప్రభావమగ్ర్యం కథమంబ వర్ణయే ॥ ౨౭ ॥
ప్రసీద విశ్వేశ్వరి విశ్వవన్దితే
ప్రసీద విద్యేశ్వరి వేదరూపిణి ।
ప్రసీద మాయామయి మన్త్రావిగ్రహే
ప్రసీద సర్వేశ్వరి సర్వరూపిణి ॥ ౨౮ ॥
ఇతి స్తుత్వా మహాదేవీం దేవాః సర్వే సవాసవాః ।
భూయో భూయో నమస్కృత్య శరణం జగ్మురఞ్జసా ॥ ౨౯ ॥
తతః ప్రసన్నా సా దేవీ ప్రణతం వీక్ష్య వాసవమ్ ।
వరేణ చ్ఛన్దయామాస వరదాఖిలదేహినామ్ ॥ ౩౦ ॥
ఇన్ద్ర ఉవాచ ।
యది తుష్టాసి కల్యాణి వరం దైత్యేన్ద్రపీడితాః ।
దుర్ధరం జీవితం దేహి త్వాం గతాః శరణార్థినః ॥ ౩౧ ॥
శ్రీదేవ్యువాచ ।
అహమేవ వినిర్జిత్య భణ్డం దైత్యకులోద్భవమ్ ।
అచిరాత్తవ దాస్యామి త్రైలోక్యం సచరాచరమ్ ॥ ౩౨ ॥
నిర్భయా ముదితాః సన్తు సర్వే దేవగణాస్తథా ।
యే స్తోష్యన్తి చ మాం భక్త్యా స్తవేనానేన మానవాః ॥ ౩౩ ॥
భాజనం తే భవిష్యన్తి ధర్మశ్రీయశసాం సదా ।
విద్యావినయసమ్పన్నా నీరోగా దీర్ఘజీవినః ॥ ౩౪ ॥
పుత్రమిత్రకలత్రాఢ్యా భవన్తు మదనుగ్రహాత్ ।
ఇతి లబ్ధవరా దేవా దేవేన్ద్రోఽపి మహాబలః ॥ ౩౫ ॥
ఆమోదం పరమం జగ్ముస్తాం విలోక్య ముహుర్ముహుః ॥ ౩౬ ॥
ఇతి శ్రీబ్రహ్మాణ్డమహాపురాణే ఉత్తరభాగే హయగ్రీవాగస్త్యసంవాదే లలితోపాఖ్యానే లలితాస్తవరాజో నామ త్రయోదశోఽధ్యాయః ॥
– Chant Stotra in Other Languages –
Sri Lalitha Stavaraja Stotram Lyrics in Sanskrit » English » Kannada » Tamil