॥ Sri Mahadeva Stotram in Sanskrit ॥
॥ श्री महादेव स्तोत्रम् ॥
जय देव परानन्द जय चित्सत्यविग्रह ।
जय संसारलोकघ्न जय पापहर प्रभो ॥ १ ॥
जय पूर्णमहादेव जय देवारिमर्दन ।
जय कल्याण देवेश जय त्रिपुरमर्दन ॥ २ ॥
जयाऽहङ्कारशत्रुघ्न जय मायाविषापहा ।
जय वेदान्तसंवेद्य जय वाचामगोचरा ॥ ३ ॥
जय रागहर श्रेष्ठ जय विद्वेषहराग्रज ।
जय साम्ब सदाचार जय देवसमाहित ॥ ४ ॥
जय ब्रह्मादिभिः पूज्य जय विष्णोः परामृत ।
जय विद्या महेशान जय विद्याप्रदानिशम् ॥ ५ ॥
जय सर्वाङ्ग सम्पूर्ण नागाभरणभूषण ।
जय ब्रह्मविदाम्प्राप्य जय भोगापवर्गदः ॥ ६ ॥
जय कामहर प्राज्ञ जय कारुण्यविग्रह ।
जय भस्ममहादेव जय भस्मावगुण्ठितः ॥ ७ ॥
जय भस्मरतानां तु पाशभङ्गपरायण ।
जय हृत्पङ्कजे नित्यं यतिभिः पूज्यविग्रहः ॥ ८ ॥
श्री सूत उवाच –
इति स्तुत्वा महादेवं प्रणिपत्य बृहस्पतिः ।
कृतार्थः क्लेशनिर्मुक्तो भक्त्या परवशो भवेत् ॥ ९ ॥
य इदं पठते नित्यं सन्ध्ययोरुभयोरपि ।
भक्तिपारङ्गतो भूत्वा परम्ब्रह्माधिगच्छति ॥ १० ॥
गङ्गा प्रवाहवत्तस्य वाग्विभूतिर्विजृम्भते ।
बृहस्पति समो बुद्ध्या गुरुभक्त्यामयासमः ॥ ११ ॥
पुत्रार्थी लभते पुत्रान् कन्यार्थी कन्यकामिमात् ।
ब्रह्मवर्चसकामस्तु तदाप्नोति न सम्शयः ॥ १२ ॥
तस्माद्भवद्भिर्मुनयः सन्ध्ययोरुभयोरपि ।
जप्यं स्तोत्रमिदं पुण्यं देवदेवस्य भक्तितः ॥ १३ ॥
– Chant Stotra in Other Languages –
Sri Mahadeva Stotram in Sanskrit – English – Kannada – Telugu – Tamil