॥ Mookapanchasati Odia Lyrics ॥
॥ ଶ୍ରୀମୂକପଞ୍ଚଶତୀ ॥
ମାତା ମରକତଶ୍ୟାମା ମାତଙ୍ଗୀ ମଦଶାଲିନୀ ।
କୁର୍ୟାତ୍ କଟାକ୍ଷଂ କଲ୍ୟାଣୀ କଦମ୍ବଵନଵାସିନୀ ॥
॥ ଶ୍ରୀଃ ॥
॥ ଶ୍ରୀଚନ୍ଦ୍ରମୌଲୀଶ୍ଵରାୟ ନମଃ ॥
॥ ଶ୍ରୀକାରଣପରଚିଦ୍ରୂପାୟୈ ନମଃ ॥
ଶ୍ରୀମୂକମହାକଵିପ୍ରଣୀତା
॥ ଶ୍ରୀଃ ॥
॥ ଶ୍ରୀମୂକପଞ୍ଚଶତୀ ॥
ଶ୍ରୀକାମାକ୍ଷୀପରଦେଵତାୟାଃ ପାଦାରଵିନ୍ଦୟୋଃ
ଭକ୍ତିଭରେଣ ସମର୍ପିତମ୍ ॥
ଆର୍ୟାମେଵ ଵିଭାଵୟନ୍ମନସି ୟଃ ପାଦାରଵିନ୍ଦଂ ପୁରଃ
ପଶ୍ୟନ୍ନାରଭତେ ସ୍ତୁତିଂ ସ ନିୟତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀଜ୍ୟୋତ୍ସ୍ନାଵୟସ୍ୟାନ୍ଵିତା-
ମାରୋହତ୍ୟପଵର୍ଗସୌଧଵଲଭୀମାନନ୍ଦଵୀଚୀମୟୀମ୍ ॥
[ମନ୍ଦସ୍ମିତ ୧୦୧ ]
ଶ୍ରୀମତ୍ପରମହଂସପରିଵ୍ରାଜକାଚାର୍ୟଵର୍ୟ ଶ୍ରୀକାମକୋଟିପୀଠାଧୀଶ୍ଵର-
ଜଗଦ୍ଗୁରୁ ଶ୍ରୀମତ୍ ଚନ୍ଦ୍ରଶେଖରେନ୍ଦ୍ରସରସ୍ଵତୀ ଶ୍ରୀପାଦାନାଂ
ଶ୍ରୀମୁଖେନ ସମଦ୍ଭାସିତା
॥ ଶ୍ରୀଃ ॥
॥ ଶ୍ରୀଚନ୍ଦ୍ରମୌଲୀଶ୍ଵର ॥
ମୁଦ୍ରା
ସ୍ଵସ୍ତି ଶ୍ରୀମଦଖିଲଭୂମଣ୍ଡଲାଲଂକାର-ତ୍ରୟସ୍ତ୍ରିଂଶତ୍କୋଟି-
ଦେଵତାସେଵିତ ଶ୍ରୀକାମାକ୍ଷୀଦେଵୀସନାଥ-ଶ୍ରୀମଦେକାମ୍ରନାଥ-
ଶ୍ରୀମହାଦେଵୀସନାଥ-ଶ୍ରୀହସ୍ତିନିରିନାଥ-ସାକ୍ଷାତ୍କାରପରମ-
ଅଧିଷ୍ଠାନସତ୍ୟଵ୍ରତନାମାଙ୍କିତ-କାଞ୍ଚୀଦିଵ୍ୟକ୍ଷେତ୍ରେ ଶାରଦା-
ମଠସୁସ୍ଥିତାନାମ୍, ଅତୁଲିତସୁଧାରସମାଧୁର୍ୟକମଲାସନକାମିନୀ-
ଧମ୍ମିଲ୍ଲ ସମ୍ଫୁଲ୍ଲମଲ୍ଲିକାମାଲିକାନିଷ୍ୟନ୍ଦମକରନ୍ଦଝରୀ-
ସୌଵସ୍ତିକଵାଙ୍ନିଗୁମ୍ଭଵିଜୃମ୍ଭଣାନନ୍ଦତୁନ୍ଦିଲିତମଣୀଷି-
ମଣ୍ଡଲାନାମ୍, ଅନଵରତାଦ୍ଵୈତଵିଦ୍ୟାଵିନୋଦରସିକାନାମ୍,
ନିରନ୍ତରାଲଂକୃତୀକୃତଶାନ୍ତିଦାନ୍ତିଭୂମ୍ନାମ୍, ସକଲଭୁଵନ-
ଚକ୍ରପ୍ରତିଷ୍ଠାପକ ଶ୍ରୀଚକ୍ରପ୍ରତିଷ୍ଠାଵିଖ୍ୟାତୟଶୋଽଲଂକୃତାନାମ୍,
ନିଖିଲପାଷଣ୍ଡଷଣ୍ଡକଣ୍ଟକୋଦ୍ଧାଟନେନ ଵିଶଦୀକୃତଵେଦଵେଦାନ୍ତ-
ମାର୍ଗଷଣ୍ମତପ୍ରତିଷ୍ଠାପକାଚାର୍ୟାଣାମ୍, ଶ୍ରୀମତ୍ପରମହଂସପରିଵ୍ରାଜକ-
ଆଚାର୍ୟଵର୍ୟ-ଶ୍ରୀଜଗଦ୍ଗୁରୁ ଶ୍ରୀମଚ୍ଛଂକରଭଗଵତ୍ପାଦାଚାର୍ୟାଣାମ୍
ଅଧିଷ୍ଠାନେ ସିଂହାସନାଭିଷିକ୍ତ ଶ୍ରୀମନ୍ମହାଦେଵେନ୍ଦ୍ରସରସ୍ଵତୀ-
ସଂୟମୀନ୍ଦ୍ରାଣାମ୍, ଅନ୍ତେଵାସିଵର୍ୟ ଶ୍ରୀମଚ୍ଚନ୍ଦ୍ରଶେଖରେନ୍ଦ୍ରସରସ୍ଵତୀ
ଶ୍ରୀପାଦୈଃ ।
କ୍ରିୟତେ ନାରାୟଣସ୍ମୃତିଃ
ତତ୍ରଭଵାନ୍ ମୂକ ଇତି ସୁପ୍ରସିଦ୍ଧଃ ମହାକଵିଶିରୋମଣିଃ
ଶ୍ରୀକାମାକ୍ଷୀଦେଵୀକରୁଣାକଟାକ୍ଷତରଙ୍ଗିତପୁଣ୍ୟକଵିତାରସପୂରଃ
`ମୂକପଞ୍ଚଶତୀ’ ଇତି କର୍ତୁର୍ନାମ୍ନା ପ୍ରସିଦ୍ଧମିମଂ ଲୋକୋତ୍ତରଂ
ଗ୍ରନ୍ଥଂ ପ୍ରଣୀୟ ଭୂମଣ୍ଡଲେଽନୁତ୍ତମଂ ପୁଣ୍ୟୟଶୋଵିଶେଷଂ ଶାଶ୍ଵତୀଂ
ପରାନନ୍ଦାନୁଭୂତିଂ ଚ ଲବ୍ଧଵାନିତି ସୁଵିଦିତମେଵ । ସ୍ତୋତ୍ରରତ୍ନେ
ଚାସ୍ମିନ୍ କାଞ୍ଚୀମଧ୍ୟଗତ କାମକୋଟିପୀଠାଧିଷ୍ଠାତ୍ରୀମ୍
ଇନ୍ଦୁମୌଲେରୈଶ୍ଵର୍ୟରୂପାଂ ଶ୍ରୀକାମାକ୍ଷୀଂ ପରଦେଵତାମ୍,
ଆରୂଢୟୌଵନାଟୋପା, ତରୁଣିମସର୍ଵସ୍ଵଂ, ନିତ୍ୟତରୁଣୀ,
ଲାଵଣ୍ୟାମୃତତରଙ୍ଗମାଲା, ଵିଭ୍ରମସମଵାୟସାରସନ୍ନାହା,
ଶୃଙ୍ଗାରାଦ୍ଵୈତତନ୍ତ୍ରସିଦ୍ଧାନ୍ତଂ, ମୀନଧ୍ଵଜତନ୍ତ୍ରପରମତାତ୍ପର୍ୟଂ\,
କନ୍ଦର୍ପସୂତିକାପାଙ୍ଗୀ, ମନସିଜସାମ୍ରାଜ୍ୟଗର୍ଵବୀଜଂ,
ପୁଷ୍ପାୟୁଧଵୀର୍ୟସରସପରିପାଟୀ, ମଦନାଗମସମୟଦୀକ୍ଷିତ-
କଟାକ୍ଷା, କୁସୁମଶରଗର୍ଵସମ୍ପତ୍କୋଶଗୃହମ୍, ଅନଙ୍ଗବ୍ରହ୍ମତତ୍ତ୍ଵ-
ବୋଧସିରା, ପଞ୍ଚଶରଶାସ୍ତ୍ରବୋଧନପରମାଚାର୍ୟଦୃଷ୍ଟିପାତା
ଇତ୍ୟାଦିରୂପେଣ ଵର୍ଣୟନ୍ ପୁନଃ ଲାଵଣ୍ୟମୃତପରକାଷ୍ଠାଭୂତାଂ
ତାମେଵ ପରଦେଵତାଂ, କାରଣପରଚିଦ୍ରୂପା, କୈଵଲ୍ୟାନନ୍ଦକନ୍ଦଃ,
ଆମ୍ନାୟରହସ୍ୟମ୍, ଉପନିଷଦରଵିନ୍ଦକୁହରମଧୁଧାରା,
ଵାଙ୍ମନୋଽତୀତା, ଆନନ୍ଦାଦ୍ଵୈତକନ୍ଦଲୀ, ମୁକ୍ତିବୀଜମ୍,
ଆଗମସଲ୍ଲାପସାରୟାଥାର୍ଥ୍ୟଂ, ବୋଧାମୃତଵୀଚୀ, ଅଭିଦାକୃତିଃ,
ଐକାତ୍ମ୍ୟପ୍ରକୃତିଃ, ନିଗମଵଚସ୍ସିଦ୍ଧାନ୍ତଃ, ଗୁରୁମୂର୍ତିଃ, ଇତ୍ୟେଵଂ-
ରୂପେଣ ସାକ୍ଷତ୍କୁର୍ଵନ୍ ୟୌଵନଶୃଙ୍ଗାରାଦିଵିଷୟରସାନୁଭଵ-
ସାମଗ୍ରୀଂ ଜ୍ଞାନଵୈରାଗ୍ୟାଦିବ୍ରହ୍ମାନନ୍ଦାନୁଭଵସାମଗ୍ରୀତ୍ଵେନ
ସମ୍ପାଦୟନ୍ –
ଶିଵ ଶିଵ ପଶ୍ୟନ୍ତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ ।
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ୟୁଵତିବିମ୍ବୋଷ୍ଠମ୍ ॥
ଇତି ପରଦେଵତାନୁଗ୍ରହଫଲୀଭୂତାଂ ପରଵୈରାଗ୍ୟକାଷ୍ଠାଂ ପ୍ରକଟୟତି ।
[ଆର୍ୟା ୪୮ ]
ପଦ୍ମପଞ୍ଚଶତକାତ୍ମକେଽତ୍ର ଗ୍ରନ୍ଥେ ଶତକାନାଂ ୟା ଆନୁପୂର୍ଵୀ
ତସ୍ୟାମୟଂ ଵିଶେଷୋ ଦୃଶ୍ୟତେ । ୟଥା କଶ୍ଚନ ଶିଶୁଃ ଚକ୍ଷୁରାଦି
ଇନ୍ଦ୍ରିୟପ୍ରାଗଲ୍ଭ୍ୟାଵିର୍ଭାଵାତ୍ପୂର୍ଵଂ ମନୋଵୃତ୍ତିମାତ୍ରେଣ କଲୟତି
ସ୍ଵେପ୍ସିତମ୍ ; ଏଵମାର୍ୟାଶତକେ ଭକ୍ତଶିଶୋଃ ମନଃ ପ୍ରଵୃତ୍ତିମ୍
ଅମ୍ବିକାୟାଃ ସ୍ଵରୂପାନୁସନ୍ଧାନପଟୀୟସୀଂ ସମ୍ପାଦୟତି
କଵିପୁଙ୍ଗଵଃ ; ଅୟମାଶୟଃ –
ଅନ୍ତରପି ବହିରପି ତ୍ଵଂ ଜନ୍ତୁତତେରନ୍ତକାନ୍ତକୃଦହନ୍ତେ ।
ଚିନ୍ତିତସନ୍ତାନଵତାଂ ସନ୍ତତମପି ତନ୍ତନୀଷି ମହିମାନମ୍ ॥
ଇତି ଶ୍ଲୋକେନ ସୂଚିତଃ ॥ [ଆର୍ୟା ୯୮ ]
ଦ୍ଵିତୀୟଶତକେ ତାଵତ୍ ୟଥା କିଞ୍ଚିତ୍ପ୍ରଵୃଦ୍ଧଗ୍ରହଣଶକ୍ତିଃ
ବାଲକଃ ଖାନ୍ତିକେ ଵିଦ୍ୟମାନସ୍ୟ ଵସ୍ତୁନଃ ଦର୍ଶନ-
ସ୍ପର୍ଶନାଦିଭିଃ ଆହ୍ଲାଦମଧିଗଚ୍ଛତି ତଦ୍ଵତ୍ ଭକ୍ତବାଲକଃ
ଅତ୍ୟନ୍ତମଧୋଭାଗେ ଵିଦ୍ୟମାନସ୍ୟ ସ୍ଵସ୍ୟାନ୍ତିକତ୍ଵେନୈଵ
ଜଗନ୍ମାତୁଃ ନିରନ୍ତରଧ୍ୟାନଫଲୀଭୂତ ପାଦାରଵିନ୍ଦ ଦର୍ଶନ-
ଆନନ୍ଦମନୁଭଵତୀତ୍ୟୟମାଶୟଃ –
ମରାଲୀନାଂ ୟାନାଭ୍ୟସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ୟତିକରସୁରୋଦ୍ୟାନତରଵେ ।
ତମସ୍କାଣ୍ଡପ୍ରୌଢିପ୍ରକଟନତିରସ୍କାରପଟଵେ
ଜନୋଽୟଂ କାମାକ୍ଷ୍ୟାଶ୍ଚରଣନଲିନାୟ ସ୍ପୃହୟତେ ॥
ଇତି ଶ୍ଲୋକେନ ସୂଚିତଃ ॥ [ପାଦାରଵିନ୍ଦ ୩ ]
ୟଥା ମନସଃ ଜ୍ଞାନେନ୍ଦ୍ରିୟାଣାଂ ଚ ସ୍ଫୂର୍ତ୍ୟନନ୍ତରମେଵ
ଵାକ୍ପ୍ରସରତି, ତଥୈଵ ଆର୍ୟାପାଦାରଵିନ୍ଦଶତକୟୋରନନ୍ତରଂ
ସ୍ଵପ୍ରେମାସ୍ପଦଂ ଵସ୍ତୁ ନିରର୍ଗଲଂ ସ୍ତୋତୁମାରଭତେ –
ପାଣ୍ଡିତ୍ୟଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରୟନ୍ତେ ଗିରାଂ
ଵୈରିଞ୍ଚାନ୍ୟପି ଗୁମ୍ଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ୟାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥
ଇତାଦିନା ସ୍ତୁତିଶତକେନ । [ସ୍ତୁତି ୧ ]
ଲୌକିକାଵିଦ୍ୟାଦିଷୁ କୁଶଲଃ କଶ୍ଚନ ୟଥା ଲୌକିକସମ୍ପଦଃ
ପ୍ରାପ୍ତୁର୍ମହୋ ଭଵତି ତଦ୍ଵତ୍ ପୂର୍ଵକୃତସ୍ତୁତିଫଲତ୍ଵେନ ଭକ୍ତଃ
ଅମ୍ବିକାୟାଃ କଟାକ୍ଷଵିଶେଷମଧିଗମ୍ୟ ପରସଂଵିଦନୁଭୂତ୍ୟ-
ଉଚିତତେଜଃପୁଷ୍ଟ୍ୟାଦିପାତ୍ରଂ ଭଵତୀତ୍ୟୟମାଶୟଃ-
ଅସ୍ତଂ କ୍ଷଣାନ୍ନୟତୁ ମେ ପରିତାପସୂର୍ୟ-
ମାନନ୍ଦଚନ୍ଦ୍ରମସମାନୟତାଂ ପ୍ରକାଶମ୍ ।
କାଲାନ୍ଧକାରସୁଷମାଂ କଲୟନ୍ ଦିଗନ୍ତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥
ଇତ୍ୟାଦିଭିର୍ଵର୍ଣନୈଃ କଟାକ୍ଷଶତକେ ସୂଚିତଃ ॥ [କଟାକ୍ଷ ୬ ]
ୟଥା ଲୌକିକସମ୍ପତ୍ସମ୍ପୂର୍ଣଃ କଶ୍ଚନ ସମଗ୍ରୟୌଵନଃ
ଲୌକିକଶୃଙ୍ଗାରସୁଖାନୁଭଵାୟ ପାତ୍ରଂ ଭଵତି, ତଦ୍ଵତ୍
ଦେଵ୍ୟାଃ ପରମାନୁଗ୍ରହପାତ୍ରୀଭୂତଃ ତଦୀୟମନ୍ଦସ୍ମିତ-
ଚନ୍ଦ୍ରିକାସନାଥଃ ଆନନ୍ଦଚନ୍ଦ୍ର ଇଵ ଅଲୌକିକ-
ନିରତିଶୟାନନ୍ଦାନୁଭଵାତ୍ମକଃ ପ୍ରକାଶତ ଇତି
ଅମୂମେଵ ଭାଵପ୍ରଣାଲିକାଂ ମହାକଵିଃ ସ୍ଵୟମେଵ
ପଞ୍ଚଶତୀପୁର୍ତିମ୍ପଦ୍ୟେନ ଆଵିଷ୍ୟକରୋତି । ୟଥା –
ଆର୍ୟାମେଵ ଵିଭାଵୟନ୍ମନସି ୟଃ ପାଦାରଵିନ୍ଦଂ ପୁରଃ
ପଶ୍ୟନ୍ନାରଭତେ ସ୍ତୁତିଂ ସ ନିୟତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀଜ୍ୟୋତ୍ସ୍ନାଵୟସ୍ୟାନ୍ଵିତା-
ମାରୋହତ୍ୟପଵର୍ଗସୌଧଵଲଭୀମାନନ୍ଦଵୀଚୀମୟୀମ୍ ॥
ଇତି । [ମନ୍ଦସ୍ମିତ ୧୦୧ ]
ଅସ୍ୟା ଲୋକୋତ୍ତରାୟାଃ ସ୍ତୁତେଃ ପଠନମାତ୍ରେଣ ତତ୍କ୍ଷଣେ
ମହାକଵିନାଽମୁନା ଅନ୍ତତଃ ପରଦେଵତୟୈଵ ଵା
ଐକାତ୍ମ୍ୟମନୁଭଵତୀଵ ସାଧକଃ ।
ତଦିଦଂ ଗ୍ରନ୍ଥରତ୍ନଂ ଦ୍ରାଵିଡଭାଷାମୟାର୍ଥାନୁଵାଦ-
ସହିତମଚିରାଦେଵ ମହତା ପରିଶ୍ରମେଣ ଭକ୍ତିଭରେଣ
ମୁଦ୍ରାପ୍ୟ ଶ୍ରୀ କାମାକ୍ଷୀ ଦେଵୀ କୁମ୍ଭାଭିଷେକ ଶୁଭ-
ମୁହୂର୍ତ ଏଵ ଉପହାରୀକୃତଵତେ, ମୁଦ୍ରାପଣଦିଵିଷୟେ ପରମଂ
ସାହାୟ୍ୟମାଚରିତଵଦ୍ଭୟଃ, ତଦ୍ଗ୍ରନ୍ଥପଠିତୃଭ୍ୟଶ୍ଚ
ଭକ୍ତପୁଙ୍ଗଵେଭ୍ୟଃ ଶ୍ରୀକାମାକ୍ଷୀକଟାକ୍ଷାଃ ସମୁଲ୍ଲ-
ସନ୍ତ୍ଵିତ୍ୟାଶାସ୍ମହେ ॥
॥ ଇତି ନାରାୟଣସ୍ମୃତିଃ ॥
॥ ଆର୍ୟାଶତକମ୍ ॥
କାରଣପରଚିଦ୍ରୂପା କାଞ୍ଚୀପୁରସୀମ୍ନି କାମପୀଠଗତା ।
କାଚନ ଵିହରତି କରୁଣା କାଶ୍ମୀରସ୍ତବକକୋମଲାଙ୍ଗଲତା ॥ ୧ ॥
କଂଚନ କାଞ୍ଚୀନିଲୟଂ କରଧୃତକୋଦଣ୍ଡବାଣସୃଣିପାଶମ୍ ।
କଠିନସ୍ତନଭରନମ୍ରଂ କୈଵଲ୍ୟାନନ୍ଦକନ୍ଦମଵଲମ୍ବେ ॥ ୨ ॥
ଚିନ୍ତିତଫଲପରିପୋଷଣଚିନ୍ତାମଣିରେଵ କାଞ୍ଚିନିଲୟା ମେ ।
ଚିରତରସୁଚରିତସୁଲଭା ଚିତ୍ତଂ ଶିଶିରୟତୁ ଚିତ୍ସୁଖାଧାରା ॥ ୩ ॥
କୁଟିଲକଚଂ କଠିନକୁଚଂ କୁନ୍ଦସ୍ମିତକାନ୍ତି କୁଙ୍କୁମଚ୍ଛାୟମ୍ ।
କୁରୁତେ ଵିହୃତିଂ କାଞ୍ଚ୍ୟାଂ କୁଲପର୍ଵତସାର୍ଵଭୌମସର୍ଵସ୍ଵମ୍ ॥ ୪ ॥
ପଞ୍ଚଶରଶାସ୍ତ୍ରବୋଧନପରମାଚାର୍ୟେଣ ଦୃଷ୍ଟିପାତେନ ।
କାଞ୍ଚୀସୀମ୍ନି କୁମାରୀ କାଚନ ମୋହୟତି କାମଜେତାରମ୍ ॥ ୫ ॥
ପରୟା କାଞ୍ଚୀପୁରୟା ପର୍ଵତପର୍ୟାୟପୀନକୁଚଭରୟା ।
ପରତନ୍ତ୍ରା ଵୟମନୟା ପଙ୍କଜସବ୍ରହ୍ମଚାରିଲୋଚନୟା ॥ ୬ ॥
ଐଶ୍ଵର୍ୟମିନ୍ଦୁମୌଲେରୈକାତ୍ମ୍ୟପ୍ରକୃତି କାଞ୍ଚିମଧ୍ୟଗତମ୍ ।
ଐନ୍ଦଵକିଶୋରଶେଖରମୈଦମ୍ପର୍ୟଂ ଚକାସ୍ତି ନିଗମାନାମ୍ ॥ ୭ ॥
ଶ୍ରିତକମ୍ପସୀମାନଂ ଶିଥିଲିତପରମଶିଵଧୈର୍ୟମହିମାନମ୍ ।
କଲୟେ ପଟଲିମାନଂ କଂଚନ କଞ୍ଚୁକିତଭୁଵନଭୂମାନମ୍ ॥ ୮ ॥
ଆଦୃତକାଞ୍ଚୀନିଲୟମାଦ୍ୟାମାରୂଢୟୌଵନାଟୋପାମ୍ ।
ଆଗମଵତଂସକଲିକାମାନନ୍ଦାଦ୍ଵୈତକନ୍ଦଲୀଂ ଵନ୍ଦେ ॥ ୯ ॥
ତୁଙ୍ଗାଭିରାମକୁଚଭରଶୃଙ୍ଗାରିତମାଶ୍ରୟାମି କାଞ୍ଚିଗତମ୍ ।
ଗଙ୍ଗାଧରପରତନ୍ତ୍ରଂ ଶୃଙ୍ଗାରାଦ୍ଵୈତତନ୍ତ୍ରସିଦ୍ଧାନ୍ତମ୍ ॥ ୧୦ ॥
କାଞ୍ଚୀରତ୍ନଵିଭୂଷାଂ କାମପି କନ୍ଦର୍ପସୂତିକାପାଙ୍ଗୀମ୍ ।
ପରମାଂ କଲାମୁପାସେ ପରଶିଵଵାମାଙ୍କପୀଠିକାସୀନାମ୍ ॥ ୧୧ ॥
କମ୍ପାତୀଚରାଣାଂ କରୁଣାକୋରକିତଦୃଷ୍ଟିପାତାନାମ୍ ।
କେଲୀଵନଂ ମନୋ ମେ କେଷାଂଚିଦ୍ଭଵତୁ ଚିଦ୍ଵିଲାସାନାମ୍ ॥ ୧୨ ॥
ଆମ୍ରତରୁମୂଲଵସତେରାଦିମପୁରୁଷସ୍ୟ ନୟନପୀୟୂଷମ୍ ।
ଆରବ୍ଧୟୌଵନୋତ୍ସଵମାମ୍ନାୟରହସ୍ୟମନ୍ତରଵଲମ୍ବେ ॥ ୧୩ ॥
ଅଧିକାଞ୍ଚି ପରମୟୋଗିଭିରାଦିମପରପୀଠସୀମ୍ନି ଦୃଶ୍ୟେନ ।
ଅନୁବଦ୍ଧଂ ମମ ମାନସମରୁଣିମସର୍ଵସ୍ଵସମ୍ପ୍ରଦାୟେନ ॥ ୧୪ ॥
ଅଙ୍କିତଶଂକରଦେହାମଙ୍କୁରିତୋରୋଜକଙ୍କଣାଶ୍ଲେଷୈଃ ।
ଅଧିକାଞ୍ଚି ନିତ୍ୟତରୁଣୀମଦ୍ରାକ୍ଷଂ କାଂଚିଦଦ୍ଭୁତାଂ ବାଲାମ୍ ॥ ୧୫ ॥
ମଧୁରଧନୁଷା ମହୀଧରଜନୁଷା ନନ୍ଦାମି ସୁରଭିବାଣଜୁଷା ।
ଚିଦ୍ଵପୁଷା କାଞ୍ଚିପୁରେ କେଲିଜୁଷା ବନ୍ଧୁଜୀଵକାନ୍ତିମୁଷା ॥ ୧୬ ॥
ମଧୁରସ୍ମିତେନ ରମତେ ମାଂସଲକୁଚଭାରମନ୍ଦଗମନେନ ।
ମଧ୍ୟେକାଞ୍ଚି ମନୋ ମେ ମନସିଜସାମ୍ରାଜ୍ୟଗର୍ଵବୀଜେନ ॥ ୧୭ ॥
ଧରଣିମୟୀଂ ତରଣିମୟୀଂ ପଵନମୟୀଂ ଗଗନଦହନହୋତୃମୟୀମ୍ ।
ଅମ୍ବୁମୟୀମିନ୍ଦୁମୟୀମମ୍ବାମନୁକମ୍ପମାଦିମାମୀକ୍ଷେ ॥ ୧୮ ॥
ଲୀନସ୍ଥିତି ମୁନିହୃଦୟେ ଧ୍ୟାନସ୍ତିମିତଂ ତପସ୍ୟଦୁପକମ୍ପମ୍ ।
ପୀନସ୍ତନଭରମୀଡେ ମୀନଧ୍ଵଜତନ୍ତ୍ରପରମତାତ୍ପର୍ୟମ୍ ॥ ୧୯ ॥
ଶ୍ଵେତା ମନ୍ଥରହସିତେ ଶାତା ମଧ୍ୟେ ଚ ଵାଡ୍ଭନୋଽତୀତା ।
ଶୀତା ଲୋଚନପାତେ ସ୍ଫୀତା କୁଚସୀମ୍ନି ଶାଶ୍ଵତୀ ମାତା ॥ ୨୦ ॥
ପୁରତଃ କଦା ନ କରଵୈ ପୁରଵୈରିଵିମର୍ଦପୁଲକିତାଙ୍ଗଲତାମ୍ ।
ପୁନତୀଂ କାଞ୍ଚୀଦେଶଂ ପୁଷ୍ପାୟୁଧଵୀର୍ୟସରସପରିପାଟୀମ୍ ॥ ୨୧ ॥
ପୁଣ୍ୟା କାଽପି ପୁରନ୍ଧ୍ରୀ ପୁଙ୍ଖିତକନ୍ଦର୍ପସମ୍ପଦା ଵପୁଷା ।
ପୁଲିନଚରୀ କମ୍ପାୟାଃ ପୁରମଥନଂ ପୁଲକନିଚୁଲିତଂ କୁରୁତେ ॥ ୨୨ ॥
ତନିମାଦ୍ଵୈତଵଲଗ୍ନଂ ତରୁଣାରୁଣସମ୍ପ୍ରଦାୟତନୁଲେଖମ୍ ।
ତଟସୀମନି କମ୍ପାୟାସ୍ତରୁଣିମସର୍ଵସ୍ଵମାଦ୍ୟମଦ୍ରାକ୍ଷମ୍ ॥ ୨୩ ॥
ପୌଷ୍ଟିକକର୍ମଵିପାକଂ ପୌଷ୍ପଶରଂ ସଵିଧସୀମ୍ନି କମ୍ପାୟାଃ ।
ଅଦ୍ରାକ୍ଷମାତ୍ତୟୌଵନମଭ୍ୟୁଦୟଂ କଂଚିଦର୍ଧଶଶିମୌଲୈଃ ॥ ୨୪ ॥
ସଂଶ୍ରିତକାଞ୍ଚୀଦେଶେ ସରସିଜଦୌର୍ଭାଗ୍ୟଜାଗ୍ରଦୁତ୍ତଂସେ ।
ସଂଵିନ୍ମୟେ ଵିଲୀୟେ ସାରସ୍ଵତପୁରୁଷକାରସାମ୍ରାଜ୍ୟେ ॥ ୨୫ ॥
ମୋଦିତମଧୁକରଵିଶିଖଂ ସ୍ଵାଦିମସମୁଦାୟସାରକୋଦଣ୍ଡମ୍ ।
ଆଦୃତକାଞ୍ଚୀଖେଲନମାଦିମମାରୁଣ୍ୟଭେଦମାକଲୟେ ॥ ୨୬ ॥
ଉରରୀକୃତକାଞ୍ଚିପୁରୀମୁପନିଷଦରଵିନ୍ଦକୁହରମଧୁଧାରାମ୍ ।
ଉନ୍ନମ୍ରସ୍ତନକଲଶୀମୁତ୍ସଵଲହରୀମୁପାସ୍ମହେ ଶମ୍ଭୋଃ ॥ ୨୭ ॥
ଏଣଶିଶୁଦୀର୍ଘଲୋଚନମେନଃପରିପନ୍ଥି ସନ୍ତତଂ ଭଜତାମ୍ ।
ଏକାମ୍ରନାଥଜୀଵିତମେଵମ୍ପଦଦୂରମେକମଵଲମ୍ବେ ॥ ୨୮ ॥
ସ୍ମୟମାନମୁଖଂ କାଞ୍ଚୀଭୟମାନଂ କମପି ଦେଵତାଭେଦମ୍ ।
ଦୟମାନଂ ଵୀକ୍ଷ୍ୟ ମୁହୁର୍ଵୟମାନନ୍ଦାମୃତାମ୍ବୁଧୌ ମଗ୍ନାଃ ॥ ୨୯ ॥
କୁତୁକଜୁଷି କାଞ୍ଚିଦେଶେ କୁମୁଦତପୋରାଶିପାକଶେଖରିତେ ।
କୁରୁତେ ମନୋଵିହାରଂ କୁଲଗିରିପରିବୃଢକୁଲୈକମଣିଦୀପେ ॥ ୩୦ ॥
ଵୀକ୍ଷେମହି କାଞ୍ଚିପୁରେ ଵିପୁଲସ୍ତନକଲଶଗରିମପରଵଶିତମ୍ ।
ଵିଦ୍ରୁମସହଚରଦେହଂ ଵିଭ୍ରମସମଵାୟସାରସନ୍ନାହମ୍ ॥ ୩୧ ॥
କୁରୁଵିନ୍ଦଗୋତ୍ରଗାତ୍ରଂ କୂଲଚରଂ କମପି ନୌମି କମ୍ପାୟାଃ ।
କୂଲଂକଷକୁଚକୁମ୍ଭଂ କୁସୁମାୟୁଧଵୀର୍ୟସାରସଂରମ୍ଭମ୍ ॥ ୩୨ ॥
କୁଡୂମଲିତକୁଚକିଶୋରୈଃ କୁର୍ଵାଣୈଃ କାଞ୍ଚିଦେଶସୌହାର୍ଦମ୍ ।
କୁଙ୍କୁମଶୋଣୈର୍ନିଚିତଂ କୁଶଲପଥଂ ଶମ୍ଭୁସୁକୃତସମ୍ଭାରୈଃ ॥ ୩୩ ॥
ଅଙ୍କିତକଚେନ କେନଚିଦନ୍ଧଂକରଣୌଷଧେନ କମଲାନାମ୍ ।
ଅନ୍ତଃପୁରେଣ ଶମ୍ଭୋରଲଂକ୍ରିୟା କାଽପି କଲ୍ପ୍ୟତେ କାଞ୍ଚ୍ୟାମ୍ ॥ ୩୪ ॥
ଊରୀକରୋମି ସନ୍ତତମୂଷ୍ମଲଫାଲେନ ଲଲିତଂ ପୁଂସା ।
ଉପକମ୍ପମୁଚିତଖେଲନମୁର୍ଵୀଧରଵଂଶସମ୍ପଦୁନ୍ମେଷମ୍ ॥ ୩୫ ॥
ଅଙ୍କୁରିତସ୍ତନକୋରକମଙ୍କାଲଂକାରମେକଚୂତପତେଃ ।
ଆଲୋକେମହି କୋମଲମାଗମସଂଲାପସାରୟାଥାର୍ଥ୍ୟମ୍ ॥ ୩୬ ॥
ପୁଞ୍ଜିତକରୁଣମୁଦଞ୍ଚିତଶିଞ୍ଜିତମଣିକାଞ୍ଚି କିମପି କାଞ୍ଚିପୁରେ ।
ମଞ୍ଜରିତମୃଦୁଲହାସଂ ପିଞ୍ଜରତନୁରୁଚି ପିନାକିମୂଲଧନମ୍ ॥ ୩୭ ॥
ଲୋଲହୃଦୟୋଽସ୍ତି ଶମ୍ଭୋର୍ଲୋଚନୟୁଗଲେନ ଲେହ୍ୟମାନାୟାମ୍ ।
ଲଲିତପରମଶିଵାୟାଂ ଲାଵଣ୍ୟାମୃତତରଙ୍ଗମାଲାୟାମ୍ ॥ ୩୮ ॥
ମଧୁକରସହଚରଚିକୁରୈର୍ମଦନାଗମସମୟଦୀକ୍ଷିତକଟାକ୍ଷୈଃ ।
ମଣ୍ଡିତକମ୍ପାତୀରୈର୍ମଙ୍ଗଲକନ୍ଦୈର୍ମମାସ୍ତୁ ସାରୂପ୍ୟମ୍ ॥ ୩୯ ॥
ଵଦନାରଵିନ୍ଦଵକ୍ଷୋଵାମାଙ୍କତଟୀଵଶଂଵଦୀଭୂତା ।
ପୂରୁଷତ୍ରିତୟେ ତ୍ରେଧା ପୁରନ୍ଧ୍ରିରୂପା ତ୍ଵମେଵ କାମାକ୍ଷି ॥ ୪୦ ॥
ବାଧାକରୀଂ ଭଵାବ୍ଧେରାଧାରାଦ୍ୟମ୍ବୁଜେଷୁ ଵିଚରନ୍ତୀମ୍ ।
ଆଧାରୀକୃତକାଞ୍ଚୀ ବୋଧାମୃତଵୀଚିମେଵ ଵିମୃଶାମଃ ॥ ୪୧ ॥
କଲୟାମ୍ୟନ୍ତଃ ଶଶଧରକଲୟାଽଙ୍କିତମୌଲିମମଲଚିଦ୍ଵଲୟାମ୍ ।
ଅଲୟାମାଗମପୀଠୀନିଲୟାଂ ଵଲୟାଙ୍କସୁନ୍ଦରୀମମ୍ବାମ୍ ॥ ୪୨ ॥
ଶର୍ଵାଦିପରମସାଧକଗୁର୍ଵାନୀତାୟ କାମପୀଠଜୁଷେ ।
ସର୍ଵାକୃତୟେ ଶୋଣିମଗର୍ଵାୟାସ୍ମୈ ସମର୍ପ୍ୟତେ ହୃଦୟମ୍ ॥ ୪୩ ॥
ସମୟା ସାନ୍ଧ୍ୟମୟୂଖୈଃ ସମୟା ବୁଦ୍ଧୟା ସଦୈଵ ଶୀଲିତୟା ।
ଉମୟା କାଞ୍ଚୀରତୟା ନ ମୟା ଲଭ୍ୟତେ କିଂ ନୁ ତାଦାତ୍ମ୍ୟମ୍ ॥ ୪୪ ॥
ଜନ୍ତୋସ୍ତଵ ପଦପୂଜନସନ୍ତୋଷତରଙ୍ଗିତସ୍ୟ କାମାକ୍ଷି ।
ଵନ୍ଧୋ ୟଦି ଭଵତି ପୁନଃ ସିନ୍ଧୋରମ୍ଭସ୍ସୁ ବମ୍ଭ୍ରମୀତି ଶିଲା ॥ ୪୫ ॥
କୁଣ୍ଡଲି କୁମାରି କୁଟିଲେ ଚଣ୍ଡି ଚରାଚରସଵିତ୍ରି ଚାମୁଣ୍ଡେ ।
ଗୁଣିନି ଗୁହାରିଣି ଗୁହ୍ୟେ ଗୁରୁମୂର୍ତେ ତ୍ଵାଂ ନମାମି କାମାକ୍ଷି ॥ ୪୬ ॥
ଅଭିଦାକୃତିର୍ଭିଦାକୃତିରଚିଦାକୃତିରପି ଚିଦାକୃତିର୍ମାତଃ ।
ଅନହନ୍ତା ତ୍ଵମହନ୍ତା ଭ୍ରମୟସି କାମାକ୍ଷି ଶାଶ୍ଵତୀ ଵିଶ୍ଵମ୍ ॥ ୪୭ ॥
ଶିଵ ଶିଵ ପଶ୍ୟନ୍ତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ ।
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ୟୁଵତିବିମ୍ବୋଷ୍ଠମ୍ ॥ ୪୮ ॥
କାମପରିପନ୍ଥିକାମିନି କାମେଶ୍ଵରି କାମପୀଠମଧ୍ୟଗତେ ।
କାମଦୁଘା ଭଵ କମଲେ କାମକଲେ କାମକୋଟି କାମାକ୍ଷି ॥ ୪୯ ॥
ମଧ୍ୟେହୃଦୟଂ ମଧ୍ୟେନିଟିଲଂ ମଧ୍ୟେଶିରୋଽପି ଵାସ୍ତଵ୍ୟାମ୍ ।
ଚଣ୍ଡକରଶକ୍ରକାର୍ମୁକଚନ୍ଦ୍ରସମାଭାଂ ନମାମି କାମାକ୍ଷୀମ୍ ॥ ୫୦ ॥
ଅଧିକାଞ୍ଚି କେଲିଲୋଲୈରଖିଲାଗମୟନ୍ତ୍ରତନ୍ତ୍ରମୟୈଃ ।
ଅତିଶୀତଂ ମମ ମାନସମସମଶରଦ୍ରୋହିଜୀଵନୋପାୟୈଃ ॥ ୫୧ ॥
ନନ୍ଦତି ମମ ହୃଦି କାଚନ ମନ୍ଦିରୟନ୍ତା ନିରନ୍ତରଂ କାଞ୍ଚୀମ୍ ।
ଇନ୍ଦୁରଵିମଣ୍ଡଲକୁଚା ବିନ୍ଦୁଵିୟନ୍ନାଦପରିଣତା ତରୁଣୀ ॥ ୫୨ ॥
ଶମ୍ପାଲତାସଵର୍ଣଂ ସମ୍ପାଦୟିତୁଂ ଭଵଜ୍ଵରଚିକିତ୍ସାମ୍ ।
ଲିମ୍ପାମି ମନସି କିଂଚନ କମ୍ପାତଟରୋହି ସିଦ୍ଧଭୈଷଜ୍ୟମ୍ ॥ ୫୩ ॥
ଅନୁମିତକୁଚକାଠିନ୍ୟାମଧିଵକ୍ଷଃପୀଠମଙ୍ଗଜନ୍ମରିପୋଃ ।
ଆନନ୍ଦଦାଂ ଭଜେ ତାମାନଙ୍ଗବ୍ରହ୍ମତତ୍ଵବୋଧସିରାମ୍ ॥ ୫୪ ॥
ଐକ୍ଷିଷି ପାଶାଙ୍କୁଶଧରହସ୍ତାନ୍ତଂ ଵିସ୍ମୟାର୍ହଵୃତ୍ତାନ୍ତମ୍ ।
ଅଧିକାଞ୍ଚି ନିଗମଵାଚାଂ ସିଦ୍ଧାନ୍ତଂ ଶୂଲପାଣିଶୁଦ୍ଧାନ୍ତମ୍ ॥ ୫୫ ॥
ଆହିତଵିଲାସଭଙ୍ଗୀମାବ୍ରହ୍ମସ୍ତମ୍ବଶିଲ୍ପକଲ୍ପନୟା ।
ଆଶ୍ରିତକାଞ୍ଚୀମତୁଲାମାଦ୍ୟାଂ ଵିସ୍ଫୂର୍ତିମାଦ୍ରିୟେ ଵିଦ୍ୟାମ୍ ॥ ୫୬ ॥
ମୂକୋଽପି ଜଟିଲଦୁର୍ଗତିଶୋକୋଽପି ସ୍ମରତି ୟଃ କ୍ଷଣଂ ଭଵତୀମ୍ ।
ଏକୋ ଭଵତି ସ ଜନ୍ତୁର୍ଲୋକୋତ୍ତରକୀର୍ତିରେଵ କାମାକ୍ଷି ॥ ୫୭ ॥
ପଞ୍ଚଦଶଵର୍ଣରୂପଂ କଂଚନ କାଞ୍ଚୀଵିହାରଧୌରେୟମ୍ ।
ପଞ୍ଚଶରୀୟଂ ଶମ୍ଭୋର୍ଵଞ୍ଚନଵୈଦଗ୍ଧ୍ୟମୂଲମଵଲମ୍ବେ ॥ ୫୮ ॥
ପରିଣତିମତୀଂ ଚତୁର୍ଧା ପଦଵୀଂ ସୁଧିୟାଂ ସମେତ୍ୟ ସୌଷୁମ୍ନୀମ୍ ।
ପଞ୍ଚାଶଦର୍ଣକଲ୍ପିତମଦଶିଲ୍ପାଂ ତ୍ଵାଂ ନମାମି କାମାକ୍ଷି ॥ ୫୯ ॥
ଆଦିକ୍ଷନ୍ମମ ଗୁରୁରାଡାଦିକ୍ଷାନ୍ତାକ୍ଷରାତ୍ମିକାଂ ଵିଦ୍ୟାମ୍ ।
ସ୍ଵାଦିଷ୍ଠଚାପଦଣ୍ଡାଂ ନେଦିଷ୍ଠାମେଵ କାମପୀଠଗତାମ୍ ॥ ୬୦ ॥
ତୁଷ୍ୟାମି ହର୍ଷିତସ୍ମରଶାସନୟା କାଞ୍ଚିପୁରକୃତାସନୟା ।
ସ୍ଵାସନୟା ସକଲଜଗଦ୍ଭାସନୟା କଲିତଶମ୍ବରାସନୟା ॥ ୬୧ ॥
ପ୍ରେମଵତୀ କମ୍ପାୟାଂ ସ୍ଥେମଵତୀ ୟତିମନସ୍ସୁ ଭୂମଵତୀ ।
ସାମଵତୀ ନିତ୍ୟଗିରା ସୋମଵତୀ ଶିରସି ଭାତି ହୈମଵତୀ ॥ ୬୨ ॥
କୌତୁକିନା କମ୍ପାୟାଂ କୌସୁମଚାପେନ କୀଲିତେନାନ୍ତଃ ।
କୁଲଦୈଵତେନ ମହତା କୁଡ୍ମଲମୁଦ୍ରାଂ ଧୁନୋତୁ ନଃପ୍ରତିଭା ॥ ୬୩ ॥
ୟୂନା କେନାପି ମିଲଦ୍ଦେହା ସ୍ଵାହାସହାୟତିଲକେନ ।
ସହକାରମୂଲଦେଶେ ସଂଵିଦ୍ରୂପା କୁଟୁମ୍ବିନୀ ରମତେ ॥ ୬୪ ॥
କୁସୁମଶରଗର୍ଵସମ୍ପତ୍କୋଶଗୃହଂ ଭାତି କାଞ୍ଚିଦେଶଗତମ୍ ।
ସ୍ଥାପିତମସ୍ମିନ୍କଥମପି ଗୋପିତମନ୍ତର୍ମୟା ମନୋରତ୍ନମ୍ ॥ ୬୫ ॥
ଦଗ୍ଧଷଡଧ୍ଵାରଣ୍ୟଂ ଦରଦଲିତକୁସୁମ୍ଭସମ୍ଭୃତାରୁଣ୍ୟମ୍ ।
କଲୟେ ନଵତାରୁଣ୍ୟଂ କମ୍ପାତଟସୀମ୍ନି କିମପି କାରୁଣ୍ୟମ୍ ॥ ୬୬ ॥
ଅଧିକାଞ୍ଚି ଵର୍ଧମାନାମତୁଲାଂ କରଵାଣି ପାରଣାମକ୍ଷ୍ଣୋଃ ।
ଆନନ୍ଦପାକଭେଦାମରୁଣିମପରିଣାମଗର୍ଵପଲ୍ଲଵିତାମ୍ ॥ ୬୭ ॥
ବାଣସୃଣିପାଶକାର୍ମୁକପାଣିମମୁଂ କମପି କାମପୀଠଗତମ୍ ।
ଏଣଧରକୋଣଚୂଡଂ ଶୋଣିମପରିପାକଭେଦମାକଲୟେ ॥ ୬୮ ॥
କିଂ ଵା ଫଲତି ମମାନ୍ୟୌର୍ବିମ୍ବାଧରଚୁମ୍ବିମନ୍ଦହାସମୁଖୀ ।
ସମ୍ବାଧକରୀ ତମସାମମ୍ବା ଜାଗର୍ତି ମନସି କାମାକ୍ଷୀ ॥ ୬୯ ॥
ମଞ୍ଚେ ସଦାଶିଵମୟେ ପରିଶିଵମୟଲଲିତପୌଷ୍ପପର୍ୟଙ୍କେ ।
ଅଧିଚକ୍ରମଧ୍ୟମାସ୍ତେ କାମାକ୍ଷୀ ନାମ କିମପି ମମ ଭାଗ୍ୟମ୍ ॥ ୭୦ ॥
ରକ୍ଷ୍ୟୋଽସ୍ମି କାମପୀଠୀଲାସିକୟା ଘନକୃପାମ୍ବୁରାଶିକୟା ।
ଶ୍ରୁତିୟୁଵତିକୁନ୍ତଲୀମଣିମାଲିକୟା ତୁହିନଶୈଲବାଲିକୟା ॥ ୭୧ ॥
ଲୀୟେ ପୁରହରଜାୟେ ମାୟେ ତଵ ତରୁଣପଲ୍ଲଵଚ୍ଛାୟେ ।
ଚରଣେ ଚନ୍ଦ୍ରାଭରଣେ କାଞ୍ଚୀଶରଣେ ନତାର୍ତିସଂହରଣେ ॥ ୭୨ ॥
ମୂର୍ତିମତି ମୁକ୍ତିବୀଜେ ମୂର୍ଧ୍ନି ସ୍ତବକିତଚକୋରସାମ୍ରାଜ୍ୟେ ।
ମୋଦିତକମ୍ପାକୂଲେ ମୁହୁର୍ମୁହୁର୍ମନସି ମୁମୁଦିଷାଽସ୍ମାକମ୍ ॥ ୭୩ ॥
ଵେଦମୟୀଂ ନାଦମୟୀଂ ବିନ୍ଦୁମୟୀଂ ପରପଦୋଦ୍ୟଦିନ୍ଦୁମୟୀମ୍ ।
ମନ୍ତ୍ରମୟୀଂ ତନ୍ତ୍ରମୟୀଂ ପ୍ରକୃତିମୟୀଂ ନୌମି ଵିଶ୍ଵଵିକୃତିମୟୀମ୍ ॥ ୭୪ ॥
ପୁରମଥନପୁଣ୍ୟକୋଟୀ ପୁଞ୍ଜିତକଵିଲୋକସୂକ୍ତିରସଧାଟୀ ।
ମନସି ମମ କାମକୋଟୀ ଵିହରତୁ କରୁଣାଵିପାକପରିପାଟୀ ॥ ୭୫ ॥
କୁଟିଲଂ ଚଟୁଲଂ ପୃଥୁଲଂ ମୃଦୁଲଂ କଚନୟନଜଘନଚରଣେଷୁ ।
ଅଵଲୋକିତମଵଲମ୍ବିତମଧିକମ୍ପାତଟମମେୟମସ୍ମାଭିଃ ॥ ୭୬ ॥
ପ୍ରତ୍ୟଙ୍ମୁଖ୍ୟା ଦୃଷ୍ଟୟା ପ୍ରସାଦଦୀପାଙ୍କୁରେଣ କାମାକ୍ଷ୍ୟାଃ ।
ପଶ୍ୟାମି ନିସ୍ତୁଲମହୋ ପଚେଲିମଂ କମପି ପରଶିଵୋଲ୍ଲାସମ୍ ॥ ୭୭ ॥
ଵିଦ୍ୟେ ଵିଧାତୃଵିଷୟେ କାତ୍ୟାୟନି କାଲି କାମକୋଟିକଲେ ।
ଭାରତି ଭୈରଵି ଭଦ୍ରେ ଶାକିନି ଶାମ୍ଭଵି ଶିଵେ ସ୍ତୁଵେ ଭଵତୀମ୍ ॥ ୭୮ ॥
ମାଲିନି ମହେଶଚାଲିନି କାଞ୍ଚୀଖେଲିନି ଵିପକ୍ଷକାଲିନି ତେ ।
ଶୂଲିନି ଵିଦ୍ରୁମଶାଲିନି ସୁରଜନପାଲିନି କପାଲିନି ନମୋଽସ୍ତୁ ॥ ୭୯ ॥
ଦେଶିକ ଇତି କିଂ ଶଂକେ ତତ୍ତାଦୃକ୍ତଵ ନୁ ତରୁଣିମୋନ୍ମେଷଃ ।
କାମାକ୍ଷି ଶୂଲପାଣେଃ କାମାଗମସମୟଦୀକ୍ଷାୟାମ୍ ॥ ୮୦ ॥
ଵେତଣ୍ଡକୁମ୍ଭଡମ୍ବରଵୈତଣ୍ଡିକକୁଚଭରାର୍ତମଧ୍ୟାୟ ।
କୁଙ୍କୁମରୁଚେ ନମସ୍ୟାଂ ଶଂକରନୟନାମୃତାୟ ରଚୟାମଃ ॥ ୮୧ ॥
ଅଧିକାଞ୍ଚିତମଣିକାଞ୍ଚନକାଞ୍ଚୀମଧିକାଞ୍ଚି କାଂଚିଦଦ୍ରାକ୍ଷମ୍ ।
ଅଵନତଜନାନୁକମ୍ପାମନୁକମ୍ପାକୂଲମସ୍ମଦନୁକୂଲାମ୍ ॥ ୮୨ ॥
ପରିଚିତକମ୍ପାତୀରଂ ପର୍ଵତରାଜନ୍ୟସୁକୃତସନ୍ନାହମ୍ ।
ପରଗୁରୁକୃପୟା ଵୀକ୍ଷେ ପରମଶିଵୋତ୍ସଙ୍ଗମଙ୍ଗଲାଭରଣମ୍ ॥ ୮୩ ॥
ଦଗ୍ଧମଦନସ୍ୟ ଶମ୍ଭୋଃ ପ୍ରଥୀୟସୀଂ ବ୍ରହ୍ମଚର୍ୟଵୈଦଗ୍ଧୀମ୍ ।
ତଵ ଦେଵି ତରୁଣିମଶ୍ରୀଚତୁରିମପାକୋ ନ ଚକ୍ଷମେ ମାତଃ ॥ ୮୪ ॥
ମଦଜଲତମାଲପତ୍ରା ଵସନିତପତ୍ରା କରାଦୃତଖାନିତ୍ରା ।
ଵିହରତି ପୁଲିନ୍ଦୟୋଷା ଗୁଞ୍ଜାଭୂଷା ଫଣୀନ୍ଦ୍ରକୃତଵେଷା ॥ ୮୫ ॥
ଅଙ୍କେ ଶୁକିନୀ ଗୀତେ କୌତୁକିନୀ ପରିସରେ ଚ ଗାୟକିନୀ ।
ଜୟସି ସଵିଧେଽମ୍ବ ଭୈରଵମଣ୍ଡଲିନୀ ଶ୍ରଵସି ଶଙ୍ଖକୁଣ୍ଡଲିନୀ ॥ ୮୬ ॥
ପ୍ରଣତଜନତାପଵର୍ଗା କୃତବହୁସର୍ଗା ସସିଂହସଂସର୍ଗା ।
କାମାକ୍ଷି ମୁଦିତଭର୍ଗା ହତରିପୁଵର୍ଗା ତ୍ଵମେଵ ସା ଦୁର୍ଗା ॥ ୮୭ ॥
ଶ୍ରଵଣଚଲଦ୍ଵେତଣ୍ଡା ସମରୋଦ୍ଦଣ୍ଡା ଧୁତାସୁରଶିଖଣ୍ଡା ।
ଦେଵି କଲିତାନ୍ତ୍ରଷଣ୍ଡା ଧୃତନରମୁଣ୍ଡା ତ୍ଵମେଵ ଚାମୁଣ୍ଡା ॥ ୮୮ ॥
ଉର୍ଵୀଧରେନ୍ଦ୍ରକନ୍ୟେ ଦର୍ଵୀଭରିତେନ ଭକ୍ତପୂରେଣ ।
ଗୁର୍ଵୀମକିଂଚନାର୍ତି ଖର୍ଵୀକୁରୁଷେ ତ୍ଵମେଵ କାମାକ୍ଷି ॥ ୮୯ ॥
ତାଡିତରିପୁପରିପୀଡନଭୟହରଣ ନିପୁଣହଲମୁସଲା ।
କ୍ରୋଡପତିଭୀଷଣମୁଖୀ କ୍ରୀଡସି ଜଗତି ତ୍ଵମେଵ କାମାକ୍ଷି ॥ ୯୦ ॥
ସ୍ମରମଥନଵରଣଲୋଲା ମନ୍ମଥହେଲାଵିଲାସମଣିଶାଲା ।
କନକରୁଚିଚୌର୍ୟଶୀଲା ତ୍ଵମମ୍ବ ବାଲା କରାବ୍ଜଧୃତମାଲା ॥ ୯୧ ॥
ଵିମଲପଟୀ କମଲକୁଟୀ ପୁସ୍ତକରୁଦ୍ରାକ୍ଷଶସ୍ତହସ୍ତପୁଟୀ ।
କାମାକ୍ଷି ପକ୍ଷ୍ମଲାକ୍ଷୀ କଲିତଵିପଞ୍ଚୀ ଵିଭାସି ଵୈରିଞ୍ଚୀ ॥ ୯୨ ॥
କୁଙ୍କୁମରୁଚିପିଙ୍ଗମସୃକ୍ପଙ୍କିଲମୁଣ୍ଡାଲିମଣ୍ଡିତଂ ମାତଃ ।
ଶ୍ରୀକାମାକ୍ଷି ତଦୀୟସଙ୍ଗମକଲାମନ୍ଦୀଭଵତ୍କୌତୁକଃ
ଜୟତି ତଵ ରୂପଧେୟଂ ଜପପଟପୁସ୍ତକଵରାଭୟକରାବ୍ଜମ୍ ॥ ୯୩ ॥
କନକମଣିକଲିତଭୂଷାଂ କାଲାୟସକଲହଶୀଲକାନ୍ତିକଲାମ୍ ।
କାମାକ୍ଷି ଶୀଲୟେ ତ୍ଵାଂ କପାଲଶୂଲାଭିରାମକରକମଲାମ୍ ॥ ୯୪ ॥
ଲୋହିତିମପୁଞ୍ଜମଧ୍ୟେ ମୋହିତଭୁଵନେ ମୁଦା ନିରୀକ୍ଷନ୍ତେ ।
ଵଦନଂ ତଵ କୁଵୟୁଗଲଂ କାଞ୍ଚୀସୀମାଂ ଚ କେଽପି କାମାକ୍ଷି ॥ ୯୫ ॥
ଜଲଧିଦ୍ଵିଗୁଣିତହୁତବହଦିଶାଦିନେଶ୍ଵରକଲାଶ୍ଵିନେୟଦଲୈଃ ।
ନଲିନୈର୍ମହେଶି ଗଚ୍ଛସି ସର୍ଵୋତ୍ତରକରକମଲଦଲମମଲମ୍ ॥ ୯୬ ॥
ସତ୍କୃତଦେଶିକଚରଣାଃ ସବୀଜନିର୍ବୀଜୟୋଗନିଶ୍ରେଣ୍ୟା ।
ଅପଵର୍ଗସୌଧଵଲଭୀମାରୋହନ୍ତ୍ୟମ୍ବ କେଽପି ତଵ କୃପୟା ॥ ୯୭ ॥
ଅନ୍ତରପି ବହିରପି ତ୍ଵଂ ଜନ୍ତୁତତେରନ୍ତକାନ୍ତକୃଦହନ୍ତେ ।
ଚିନ୍ତିତସନ୍ତାନଵତାଂ ସନ୍ତତମପି ତନ୍ତନୀଷି ମହିମାନମ୍ ॥ ୯୮ ॥
କଲମଞ୍ଜୁଲଵାଗନୁମିତଗଲପଞ୍ଜରଗତଶୁକଗ୍ରହୌତ୍କଣ୍ଠ୍ୟାତ୍ ।
ଅମ୍ବ ରଦନାମ୍ବରଂ ତେ ବିମ୍ବଫଲଂ ଶମ୍ବରାରିଣା ନ୍ୟସ୍ତମ୍ ॥ ୯୯ ॥
ଜୟ ଜୟ ଜଗଦମ୍ବ ଶିଵେ ଜୟ ଜୟ କାମାକ୍ଷି ଜୟ ଜୟାଦ୍ରିସୁତେ ।
ଜୟ ଜୟ ମହେଶଦୟିତେ ଜୟ ଜୟ ଚିଦ୍ଗଗନକୌମୁଦୀଧାରେ ॥ ୧୦୦ ॥
ଆର୍ୟାଶତକଂ ଭକ୍ତ୍ୟା ପଠତାମାର୍ୟାକଟାକ୍ଷେଣ ।
ନିସ୍ସରତି ଵଦନକମଲାଦ୍ଵାଣୀ ପୀୟୂଷଧୋରଣୀ ଦିଵ୍ୟା ॥ ୧୦୧ ॥
ଆର୍ୟାଶତକଂ ସମ୍ପୂର୍ଣମ୍ ॥
॥ ପାଦାରଵିନ୍ଦଶତକମ୍ ॥
ମହିମ୍ନଃ ପନ୍ଥାନଂ ମଦନପରିପନ୍ଥିପ୍ରଣୟିନି
ପ୍ରଭୁର୍ନିର୍ଣେତୁଂ ତେ ଭଵତି ୟତମାନୋଽପି କତମଃ ।
ତଥାପି ଶ୍ରୀକାଞ୍ଚୀଵିହୃତିରସିକେ କୋଽପି ମନସୋ
ଵିପାକସ୍ତ୍ଵତ୍ପାଦସ୍ତୁତିଵିଧିଷୁ ଜଲ୍ପାକୟତି ମାମ୍ ॥ ୧ ॥
ଗଲଗ୍ରାହୀ ପୌରନ୍ଦରପୁରଵନୀପଲ୍ଲଵରୁଚାଂ
ଧୃତପାଥମ୍ୟାନାମରୁଣମହସାମାଦିମଗୁରୁଃ ।
ସମିନ୍ଧେ ବନ୍ଧୂକସ୍ତବକସହୟୁଧ୍ଵା ଦିଶି ଦିଶି
ପ୍ରସର୍ପନ୍କାମାକ୍ଷ୍ୟାଶ୍ଚରଣକିରଣାନାମରୁଣିମା ॥ ୨ ॥
ମରାଲୀନାଂ ୟାନାଭ୍ୟସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ୟତିକରସୁରୋଦ୍ୟାନତରଵେ ।
ତମସ୍କାଣ୍ଡପ୍ରୌଢିପ୍ରକଟନତିରସ୍କାରପଟଵେ
ଜନୋଽୟଂ କାମାକ୍ଷ୍ୟାଶ୍ଚରଣନଲିନାୟ ସ୍ପୃହୟତେ ॥ ୩ ॥
ଵହନ୍ତୀ ସୈନ୍ଦୂରୀଂ ସରଣିମଵନମ୍ରାମରପୁऱୀ-
ପୁରନ୍ଧ୍ରୀସୀମନ୍ତେ କଵିକମଲବାଲାର୍କସୁଷମା ।
ତ୍ରୟୀସୀମନ୍ତିନ୍ୟାଃ ସ୍ତନତଟନିଚୋଲାରୁଣପଟୀ
ଵିଭାନ୍ତୀ କାମାକ୍ଷ୍ୟାଃ ପଦନଲିନକାନ୍ତିର୍ଵିଜୟତେ ॥ ୪ ॥
ପ୍ରଣମ୍ରୀଭୂତସ୍ୟ ପ୍ରଣୟକଲହତ୍ରସ୍ତମନସଃ
ସ୍ମରାରାତେଶ୍ଚୂଡାଵିୟତି ଗୃହମେଧୀ ହିମକରଃ ।
ୟୟୋଃ ସାନ୍ଧ୍ୟାଂ କାନ୍ତିଂ ଵହତି ସୁଷମାଭିଶ୍ଚରଣୟୋଃ
ତୟୋର୍ମେ କାମାକ୍ଷ୍ୟା ହୃଦୟମପତନ୍ଦ୍ରଂ ଵିହରତାମ୍ ॥ ୫ ॥
ୟୟୋଃ ପୀଠାୟନ୍ତେ ଵିବୁଧମୁକୁଟୀନାଂ ପଟଲିକା
ୟୟୋଃ ସୌଧାୟନ୍ତେ ସ୍ଵୟମୁଦୟଭାଜୋ ଭଣିତୟଃ ।
ୟୟୋଃ ଦାସାୟନ୍ତେ ସରସିଜଭଵାଦ୍ୟାଶ୍ଚରଣୟୋଃ
ତୟୋର୍ମେ କାମାକ୍ଷ୍ୟା ଦିନମନୁ ଵରୀଵର୍ତୁ ହୃଦୟମ୍ ॥ ୬ ॥
ନୟନ୍ତୀ ସଂକୋଚଂ ସରସିଜରୁଚଂ ଦିକ୍ପରିସରେ
ସୃଜନ୍ତୀ ଲୌହିତ୍ୟଂ ନଖକିରଣଚନ୍ଦ୍ରାର୍ଧଖଚିତା ।
କଵୀନ୍ଦ୍ରାଣାଂ ହୃତ୍କୈରଵଵିକସନୋଦ୍ୟୋଗଜନନୀ
ସ୍ଫୁରନ୍ତୀ କାମାକ୍ଷ୍ୟାଃ ଚରଣରୁଚିସନ୍ଧ୍ୟା ଵିଜୟତେ ॥ ୭ ॥
ଵିରାଵୈର୍ମାଞ୍ଜୀରୈଃ କିମପି କଥୟନ୍ତୀଵ ମଧୁରଂ
ପୁରସ୍ତାଦାନମ୍ରେ ପୁରଵିଜୟିନି ସ୍ମେରଵଦନେ ।
ଵୟସ୍ୟେଵ ପ୍ରୌଢା ଶିଥିଲୟତି ୟା ପ୍ରେମକଲହ-
ପ୍ରରୋହଂ କାମାକ୍ଷ୍ୟାଃ ଚରଣୟୁଗଲୀ ସା ଵିଜୟତେ ॥ ୮ ॥
ସୁପର୍ଵସ୍ତ୍ରୀଲୋଲାଲକପରିଚିତଂ ଷଟ୍ପଦକୁଲୈଃ
ସ୍ଫୁରଲ୍ଲାକ୍ଷାରାଗଂ ତରୁଣତରଣିଜ୍ୟୋତିରରୁଣୈଃ ।
ଭୃତଂ କାନ୍ତ୍ୟମ୍ଭୋଭିଃ ଵିସୃମରମରନ୍ଦୈଃ ସରସିଜୈଃ
ଵିଧତ୍ତେ କାମାକ୍ଷ୍ୟାଃ ଚରଣୟୁଗଲଂ ବନ୍ଧୁପଦଵୀମ୍ ॥ ୯ ॥
ରଜଃସଂସର୍ଗେଽପି ସ୍ଥିତମରଜସାମେଵ ହୃଦୟେ
ପରଂ ରକ୍ତତ୍ଵେନ ସ୍ଥିତମପି ଵିରକ୍ତୈକଶରଣମ୍ ।
ଅଲଭ୍ୟଂ ମନ୍ଦାନାଂ ଦଧଦପି ସଦା ମନ୍ଦଗତିତାଂ
ଵିଧତ୍ତେ କାମାକ୍ଷ୍ୟାଃ ଚରଣୟୁଗମାଶ୍ଚର୍ୟଲହରୀମ୍ ॥ ୧୦ ॥
ଜଟାଲା ମଞ୍ଜୀରସ୍ଫୁରଦରୁଣରତ୍ନାଂଶୁନିକରୈଃ
ନିଷିଦନ୍ତୀ ମଧ୍ୟେ ନଖରୁଚିଝରୀଗାଙ୍ଗପୟସାମ୍ ।
ଜଗତ୍ତ୍ରାଣଂ କର୍ତୁଂ ଜନନି ମମ କାମାକ୍ଷି ନିୟତଂ
ତପଶ୍ଚର୍ୟାଂ ଧତ୍ତେ ତଵ ଚରଣପାଥୋଜୟୁଗଲୀ ॥ ୧୧ ॥
ତୁଲାକୋଟିଦ୍ଵନ୍ଦ୍ଵକ୍କଣିତଭଣିତାଭୀତିଵଚସୋଃ
ଵିନମ୍ରଂ କାମାକ୍ଷୀ ଵିସୃମରମହଃପାଟଲିତୟୋଃ ।
କ୍ଷଣଂ ଵିନ୍ୟାସେନ କ୍ଷପିତତମସୋର୍ମେ ଲଲିତୟୋଃ
ପୁନୀୟାନ୍ମୂର୍ଧାନଂ ପୁରହରପୁରନ୍ଧ୍ରୀ ଚରଣୟୋଃ ॥ ୧୨ ॥
ଭଵାନି ଦ୍ରୁହ୍ୟେତାଂ ଭଵନିବିଡିତେଭ୍ୟୋ ମମ ମୁହୁ-
ସ୍ତମୋଵ୍ୟାମୋହେଭ୍ୟସ୍ତଵ ଜନନି କାମାକ୍ଷି ଚରଣୌ ।
ୟୟୋର୍ଲାକ୍ଷାବିନ୍ଦୁସ୍ଫୁରଣଧରଣାଦ୍ଧ୍ଵର୍ଜଟିଜଟା-
କୁଟୀରା ଶୋଣାଙ୍କଂ ଵହତି ଵପୁରେଣାଙ୍କକଲିକା ॥ ୧୩ ॥
ପଵିତ୍ରୀକୁର୍ୟୁର୍ନୁଃ ପଦତଲଭୁଵଃ ପାଟଲରୁଚଃ
ପରାଗାସ୍ତେ ପାପପ୍ରଶମନଧୁରୀଣାଃ ପରଶିଵେ ।
କଣଂ ଲବ୍ଧୁଂ ୟେଷାଂ ନିଜଶିରସି କାମାକ୍ଷି ଵିଵଶା
ଵଲନ୍ତୋ ଵ୍ୟାତନ୍ଵନ୍ତ୍ୟହମହମିକାଂ ମାଧଵମୁଖାଃ ॥ ୧୪ ॥
ବଲାକାମାଲାଭିର୍ନଖରୁଚିମୟୀଭିଃ ପରିଵୃତେ
ଵିନମ୍ରସ୍ଵର୍ନାରୀଵିକଚକଚକାଲାମ୍ବୁଦକୁଲେ ।
ସ୍ଫୁରନ୍ତଃ କାମାକ୍ଷି ସ୍ଫୁଟଦଲିତବନ୍ଧୂକସୁହୃଦ-
ସ୍ତଟିଲ୍ଲେଖାୟନ୍ତେ ତଵ ଚରଣପାଥୋଜକିରଣାଃ ॥ ୧୫ ॥
ସରାଗଃ ସଦ୍ଵେଷଃ ପ୍ରସୃମରସରୋଜେ ପ୍ରତିଦିନଂ
ନିସର୍ଗାଦାକ୍ରାମନ୍ଵିବୁଧଜନମୂର୍ଧାନମଧିକମ୍ ।
କଥଂକାରଂ ମାତଃ କଥୟ ପଦପଦ୍ମସ୍ତଵ ସତାଂ
ନତାନାଂ କାମାକ୍ଷି ପ୍ରକଟୟତି କୈଵଲ୍ୟସରଣିମ୍ ॥ ୧୬ ॥
ଜପାଲକ୍ଷ୍ମୀଶୋଣୋ ଜନିତପରମଜ୍ଞାନନଲିନୀ-
ଵିକାସଵ୍ୟାସଙ୍ଗୋ ଵିଫଲିତଜଗଜ୍ଜାଡ୍ୟଗରିମା ।
ମନଃପୂର୍ଵାଦ୍ରିଂ ମେ ତିଲକୟତୁ କାମାକ୍ଷି ତରସା
ତମସ୍କାଣ୍ଡଦ୍ରୋହୀ ତଵ ଚରଣପାଥୋଜରମଣଃ ॥ ୧୭ ॥
ନମସ୍କୁର୍ମଃ ପ୍ରେଙ୍ଖନ୍ମଣିକଟକନୀଲୋତ୍ପଲମହଃ-
ପୟୋଧୌ ରିଙ୍ଖଦ୍ଭିର୍ନଖକିରଣଫେନୈର୍ଧଵଲିତେ ।
ସ୍ଫୁଟଂ କୁର୍ଵାଣାୟ ପ୍ରବଲଚଲଦୌର୍ଵାନଲଶିଖା-
ଵିତର୍କଂ କାମାକ୍ଷ୍ୟାଃ ସତତମରୁଣିମ୍ନେ ଚରଣୟୋଃ ॥ ୧୮ ॥
ଶିଵେ ପାଶାୟେତାମଲଘୁନି ତମଃକୂପକୁହରେ
ଦିନାଧୀଶାୟେତାଂ ମମ ହୃଦୟପାଥୋଜଵିପିନେ ।
ନଭୋମାସାୟେତାଂ ସରସକଵିତାରୀତିସରିତି
ତ୍ଵଦୀୟୌ କାମାକ୍ଷି ପ୍ରସୃତକିରଣୌ ଦେଵି ଚରଣୌ ॥ ୧୯ ॥
ନିଷକ୍ତଂ ଶ୍ରୁତ୍ୟନ୍ତେ ନୟନମିଵ ସଦ୍ଵୃତ୍ତରୁଚିରୈଃ
ସମୈର୍ଜୁଷ୍ଟଂ ଶୁଦ୍ଧୈରଧରମିଵ ରମ୍ୟୈର୍ଦ୍ଵିଜଗଣୈଃ ।
ଶିଵେ ଵକ୍ଷୋଜନ୍ମଦ୍ଵିତୟମିଵ ମୁକ୍ତାଶ୍ରିତମୁମେ
ତ୍ଵଦୀୟଂ କାମାକ୍ଷି ପ୍ରଣତଶରଣଂ ନୌମି ଚରଣମ୍ ॥ ୨୦ ॥
ନମସ୍ୟାସଂସଜ୍ଜନ୍ନମୁଚିପରିପନ୍ଥିପ୍ରଣୟିନୀ-
ନିସର୍ଗପ୍ରେଙ୍ଖୋଲତ୍କୁରଲକୁଲକାଲାହିଶବଲେ ।
ନଖଚ୍ଛାୟାଦୁଗ୍ଧୋଦଧିପୟସି ତେ ଵୈଦ୍ରୁମରୁଚାଂ
ପ୍ରଚାରଂ କାମାକ୍ଷି ପ୍ରଚୁରୟତି ପାଦାବ୍ଜସୁଷମା ॥ ୨୧ ॥
କଦା ଦୂରୀକର୍ତୁଂ କଟୁଦୁରିତକାକୋଲଜନିତଂ
ମହାନ୍ତଂ ସନ୍ତାପଂ ମଦନପରିପନ୍ଥିପ୍ରିୟତମେ ।
କ୍ଷଣାତ୍ତେ କାମାକ୍ଷି ତ୍ରିଭୁଵନପରୀତାପହରଣେ
ପଟୀୟାଂସଂ ଲପ୍ସ୍ୟେ ପଦକମଲସେଵାମୃତରସମ୍ ॥ ୨୨ ॥
ୟୟୋଃ ସାନ୍ଧ୍ୟଂ ରୋଚିଃ ସତତମରୁଣିମ୍ନେ ସ୍ପୃହୟତେ
ୟୟୋଶ୍ଚାନ୍ଦ୍ରୀ କାନ୍ତିଃ ପରିପତତି ଦୃଷ୍ଟ୍ଵା ନଖରୁଚିମ୍ ।
ୟୟୋଃ ପାକୋଦ୍ରେକଂ ପିପଠିଷତି ଭକ୍ତ୍ୟା କିସଲୟଂ
ମ୍ରଦିମ୍ନଃ କାମାକ୍ଷ୍ୟା ମନସି ଚରଣୌ ତୌ ତନୁମହେ ॥ ୨୩ ॥
ଜଗନ୍ନେଦଂ ନେଦଂ ପରମିତି ପରିତ୍ୟଜ୍ୟ ୟତିଭିଃ
କୁଶାଗ୍ରୀୟସ୍ଵାନ୍ତୈଃ କୁଶଲଧିଷଣୈଃ ଶାସ୍ତ୍ରସରଣୌ ।
ଗଵେଷ୍ୟଂ କାମାକ୍ଷି ଧ୍ରୁଵମକୃତକାନାଂ ଗିରିସୁତେ
ଗିରାମୈଦମ୍ପର୍ୟଂ ତଵ ଚରଣପଦ୍ମଂ ଵିଜୟତେ ॥ ୨୪ ॥
କୃତସ୍ନାନଂ ଶାସ୍ତ୍ରାମୃତସରସି କାମାକ୍ଷି ନିତରାଂ
ଦଧାନଂ ଵୈଶଦ୍ୟଂ କଲିତରସମାନନ୍ଦସୁଧୟା ।
ଅଲଂକାରଂ ଭୂମେର୍ମୁନିଜନମନଶ୍ଚିନ୍ମୟମହା-
ପୟୋଧେରନ୍ତସ୍ସ୍ଥଂ ତଵ ଚରଣରତ୍ନଂ ମୃଗୟତେ ॥ ୨୫ ॥
ମନୋଗେହେ ମୋହୋଦ୍ଭଵତିମିରପୂର୍ଣେ ମମ ମୁହୁଃ
ଦରିଦ୍ରାଣୀକୁର୍ଵନ୍ଦିନକରସହସ୍ରାଣି କିରଣୈଃ ।
ଵିଧତ୍ତାଂ କାମାକ୍ଷି ପ୍ରସୃମରତମୋଵଞ୍ଚନଚଣଃ
କ୍ଷଣାର୍ଧଂ ସାନ୍ନିଧ୍ୟଂ ଚରଣମଣିଦୀପୋ ଜନନି ତେ ॥ ୨୬ ॥
କଵୀନାଂ ଚେତୋଵନ୍ନଖରରୁଚିସମ୍ପର୍କି ଵିବୁଧ-
ସ୍ରଵନ୍ତୀସ୍ରୋତୋଵତ୍ପଟୁମୁଖରିତଂ ହଂସକରଵୈଃ ।
ଦିନାରମ୍ଭଶ୍ରୀଵନ୍ନିୟତମରୁଣଚ୍ଛାୟସୁଭଗଂ
ମଦନ୍ତଃ କାମାକ୍ଷ୍ୟାଃ ସ୍ଫୁରତୁ ପଦପଙ୍କେରୁହୟୁଗମ୍ ॥ ୨୭ ॥
ସଦା କିଂ ସମ୍ପର୍କାତ୍ପ୍ରକୃତିକଠିନୈର୍ନାକିମୁକୁଟୈଃ
ତଟୈର୍ନୀହାରାଦ୍ରେରଧିକମଣୁନା ୟୋଗିମନସା ।
ଵିଭିନ୍ତେ ସଂମୋହଂ ଶିଶିରୟତି ଭକ୍ତାନପି ଦୃଶାମ୍
ଅଦୃଶ୍ୟଂ କାମାକ୍ଷି ପ୍ରକଟୟତି ତେ ପାଦୟୁଗଲମ୍ ॥ ୨୮ ॥
ପଵିତ୍ରାଭ୍ୟାମମ୍ବ ପ୍ରକୃତିମୃଦୁଲାଭ୍ୟାଂ ତଵ ଶିଵେ
ପଦାଭ୍ୟାଂ କାମାକ୍ଷି ପ୍ରସଭମଭିଭୂତୈଃ ସଚକିତୈଃ ।
ପ୍ରଵାଲୈରମ୍ଭୋଜୈରପି ଚ ଵନଵାସଵ୍ରତଦଶାଃ
ସଦୈଵାରଭ୍ୟନ୍ତେ ପରିଚରିତନାନାଦ୍ଵିଜଗଣୈଃ ॥ ୨୯ ॥
ଚିରାଦ୍ଦୃଶ୍ୟା ହଂସୈଃ କଥମପି ସଦା ହଂସସୁଲଭଂ
ନିରସ୍ୟନ୍ତୀ ଜାଡ୍ୟଂ ନିୟତଜଡମଧ୍ୟୈକଶରଣମ୍ ।
ଅଦୋଷଵ୍ୟାସଙ୍ଗା ସତତମପି ଦୋଷାପ୍ତିମଲିନଂ
ପୟୋଜଂ କାମାକ୍ଷ୍ୟାଃ ପରିହସତି ପାଦାବ୍ଜୟୁଗଲୀ ॥ ୩୦ ॥
ସୁରାଣାମାନନ୍ଦପ୍ରବଲନତୟା ମଣ୍ଡନତୟା
ନଖେନ୍ଦୁଜ୍ୟୋତ୍ସ୍ନାଭିର୍ଵିସୃମରତମଃଖଣ୍ଡନତୟା ।
ପୟୋଜଶ୍ରୀଦ୍ଵେଷଵ୍ରତରତତୟା ତ୍ଵଚ୍ଚରଣୟୋଃ
ଵିଲାସଃ କାମାକ୍ଷି ପ୍ରକଟୟତି ନୈଶାକରଦଶାମ୍ ॥ ୩୧ ॥
ସିତିମ୍ନା କାନ୍ତୀନାଂ ନଖରଜନୁଷାଂ ପାଦନଲିନ-
ଚ୍ଛଵୀନାଂ ଶୋଣିମ୍ନା ତଵ ଜନନି କାମାକ୍ଷି ନମନେ ।
ଲଭନ୍ତେ ମନ୍ଦାରଗ୍ରଥିତନଵବନ୍ଧୂକକୁସୁମ-
ସ୍ରଜାଂ ସାମୀଚୀନ୍ୟଂ ସୁରପୁରପୁରନ୍ଧ୍ରୀକଚଭରାଃ ॥ ୩୨ ॥
ସ୍ଫୁରନ୍ମଧ୍ୟେ ଶୁଦ୍ଧେ ନଖକିରଣଦୁଗ୍ଧାବ୍ଧିପୟସାଂ
ଵହନ୍ନବ୍ଜଂ ଚକ୍ରଂ ଦରମପି ଚ ଲେଖାତ୍ମକତୟା ।
ଶ୍ରିତୋ ମାତ୍ସ୍ୟଂ ରୂପଂ ଶ୍ରିୟମପି ଦଧାନୋ ନିରୁପମାଂ
ତ୍ରିଧାମା କାମାକ୍ଷ୍ୟାଃ ପଦନଲିନନାମା ଵିଜୟତେ ॥ ୩୩ ॥
ନଖଶ୍ରୀସନ୍ନଦ୍ଧସ୍ତବକନିଚିତଃ ସ୍ଵୈଶ୍ଚ କିରଣୈଃ
ପିଶଙ୍ଗୈଃ କାମାକ୍ଷି ପ୍ରକଟିତଲସତ୍ପଲ୍ଲଵରୁଚିଃ ।
ସତାଂ ଗମ୍ୟଃ ଶଙ୍କେ ସକଲଫଲଦାତା ସୁରତରୁଃ
ତ୍ଵଦୀୟଃ ପାଦୋଽୟଂ ତୁହିନଗିରିରାଜନ୍ୟତନୟେ ॥ ୩୪ ॥
ଵଷଟ୍କୁର୍ଵନ୍ମାଞ୍ଜୀରକଲକଲୈଃ କର୍ମଲହରୀ-
ହଵୀଂଷି ପ୍ରୌଦ୍ଦଣ୍ଡଂ ଜ୍ଵଲତି ପରମଜ୍ଞାନଦହନେ ।
ମହୀୟାନ୍କାମାକ୍ଷି ସ୍ଫୁଟମହସି ଜୋହୋତି ସୁଧିୟାଂ
ମନୋଵେଦ୍ୟାଂ ମାତସ୍ତଵ ଚରଣୟଜ୍ଵା ଗିରିସୁତେ ॥ ୩୫ ॥
ମହାମନ୍ତ୍ରଂ କିଂଚିନ୍ମଣିକଟକନାଦୈର୍ମୃଦୁ ଜପନ୍
କ୍ଷିପନ୍ଦିକ୍ଷୁ ସ୍ଵଚ୍ଛଂ ନଖରୁଚିମୟଂ ଭାସ୍ମନରଜଃ ।
ନତାନାଂ କାମାକ୍ଷି ପ୍ରକୃତିପଟୁରଚ୍ଚାଟ୍ୟ ମମତା-
ପିଶାଚୀଂ ପାଦୋଽୟଂ ପ୍ରକଟୟତି ତେ ମାନ୍ତ୍ରିକଦଶାମ୍ ॥ ୩୬ ॥
ଉଦୀତେ ବୋଧେନ୍ଦୌ ତମସି ନିତରାଂ ଜଗ୍ମୁଷି ଦଶାଂ
ଦରିଦ୍ରାଂ କାମାକ୍ଷି ପ୍ରକଟମନୁରାଗଂ ଵିଦଧତୀ ।
ସିତେନାଚ୍ଛାଦ୍ୟାଙ୍ଗଂ ନଖରୁଚିପଟେନାଙ୍ଘ୍ରିୟୁଗଲୀ-
ପୁରନ୍ଧ୍ରୀ ତେ ମାତଃ ସ୍ଵୟମଭିସରତ୍ୟେଵ ହୃଦୟମ୍ ॥ ୩୭ ॥
ଦିନାରମ୍ଭଃ ସମ୍ପନ୍ନଲିନଵିପିନାନାମଭିନଵୋ
ଵିକାସୋ ଵାସନ୍ତଃ ସୁକଵିପିକଲୋକସ୍ୟ ନିୟତଃ ।
ପ୍ରଦୋଷଃ କାମାକ୍ଷି ପ୍ରକଟପରମଜ୍ଞାନଶଶିନ-
ଶ୍ଚକାସ୍ତି ତ୍ଵତ୍ପାଦସ୍ମରଣମହିମା ଶୈଲତନୟେ ॥ ୩୮ ॥
ଧୃତଚ୍ଛାୟଂ ନିତ୍ୟଂ ସରସିରୁହମୈତ୍ରୀପରିଚିତଂ
ନିଧାନଂ ଦୀପ୍ତୀନାଂ ନିଖିଲଜଗତାଂ ବୋଧଜନକମ୍ ।
ମୁମୁକ୍ଷୂଣାଂ ମାର୍ଗପ୍ରଥନପଟୁ କାମାକ୍ଷି ପଦଵୀଂ
ପଦଂ ତେ ପାତଙ୍ଗୀଂ ପରିକଲୟତେ ପର୍ଵତସୁତେ ॥ ୩୯ ॥
ଶନୈସ୍ତୀର୍ତ୍ଵା ମୋହାମ୍ବୁଧିମଥ ସମାରୋଢୁମନସଃ
କ୍ରମାତ୍କୈଵଲ୍ୟାଖ୍ୟାଂ ସୁକୃତିସୁଲଭାଂ ସୌଧଵଲଭୀମ୍ ।
ଲଭନ୍ତେ ନିଃଶ୍ରେଣୀମିଵ ଝଟିତି କାମାକ୍ଷି ଚରଣଂ
ପୁରଶ୍ଚର୍ୟାଭିସ୍ତେ ପୁରମଥନସୀମନ୍ତିନି ଜନାଃ ॥ ୪୦ ॥
ପ୍ରଚଣ୍ଡାର୍ତିକ୍ଷୋଭପ୍ରମଥନକୃତେ ପ୍ରାତିଭସରି-
ତ୍ପ୍ରଵାହପ୍ରୋଦ୍ଦଣ୍ଡୀକରଣଜଲଦାୟ ପ୍ରଣମତାମ୍ ।
ପ୍ରଦୀପାୟ ପ୍ରୌଢେ ଭଵତମସି କାମାକ୍ଷି ଚରଣ-
ପ୍ରସାଦୌନ୍ମୁଖ୍ୟାୟ ସ୍ପୃହୟତି ଜନୋଽୟଂ ଜନନି ତେ ॥ ୪୧ ॥
ମରୁଦ୍ଭିଃ ସଂସେଵ୍ୟା ସତତମପି ଚାଞ୍ଚଲ୍ୟରହିତା
ସଦାରୁଣ୍ୟଂ ୟାନ୍ତୀ ପରିଣତିଦରିଦ୍ରାଣସୁଷମା ।
ଗୁଣୋତ୍କର୍ଷାନ୍ମାଞ୍ଜୀରକକଲକଲୈସ୍ତର୍ଜନପଟୁଃ
ପ୍ରଵାଲଂ କାମାକ୍ଷ୍ୟାଃ ପରିହସତି ପାଦାବ୍ଜୟୁଗଲୀ ॥ ୪୨ ॥
ଜଗଦ୍ରକ୍ଷାଦକ୍ଷା ଜଲଜରୁଚିଶିକ୍ଷାପଟୁତରା
ସମୈର୍ନମ୍ୟା ରମ୍ୟା ସତତମଭିଗମ୍ୟା ବୁଧଜନୈଃ ।
ଦ୍ଵୟୀ ଲୀଲାଲୋଲା ଶ୍ରୁତିଷୁ ସୁରପାଲାଦିମୁକୁଟୀ-
ତଟୀସୀମାଧାମା ତଵ ଜନନି କାମାକ୍ଷି ପଦୟୋଃ ॥ ୪୩ ॥
ଗିରାଂ ଦୂରୌ ଚୋରୌ ଜଡିମତିମିରାଣାଂ କୃତଜଗ-
ତ୍ପରିତ୍ରାଣୌ ଶୋଣୌ ମୁନିହୃଦୟଲୀଲୈକନିପୁଣୌ ।
ନଖୈଃ ସ୍ମେରୌ ସାରୌ ନିଗମଵଚସାଂ ଖଣ୍ଡିତଭଵ-
ଗ୍ରହୋନ୍ମାଦୌ ପାଦୌ ତଵ ଜନନି କାମାକ୍ଷି କଲୟେ ॥ ୪୪ ॥
ଅଵିଶ୍ରାନ୍ତଂ ପଙ୍କଂ ୟଦପି କଲୟନ୍ୟାଵକମୟଂ
ନିରସ୍ୟନ୍କାମାକ୍ଷି ପ୍ରଣମନଜୁଷାଂ ପଙ୍କମଖିଲମ୍ ।
ତୁଲାକୋଟିଦ୍ଵନ୍ଦଂ ଦଧଦପି ଚ ଗଚ୍ଛନ୍ନତୁଲତାଂ
ଗିରାଂ ମାର୍ଗଂ ପାଦୋ ଗିରିଵରସୁତେ ଲଙ୍ଘୟତି ତେ ॥ ୪୫ ॥
ପ୍ରଵାଲଂ ସଵ୍ରୀଲଂ ଵିପିନଵିଵରେ ଵେପୟତି ୟା
ସ୍ଫୁରଲ୍ଲୀଲଂ ବାଲାତପମଧିକବାଲଂ ଵଦତି ୟା ।
ରୁଚିଂ ସାନ୍ଧ୍ୟାଂ ଵନ୍ଧ୍ୟାଂ ଵିରଚୟତି ୟା ଵର୍ଧୟତୁ ସା
ଶିଵଂ ମେ କାମାକ୍ଷ୍ୟାଃ ପଦନଲିନପାଟଲ୍ୟଲହରୀ ॥ ୪୬ ॥
କିରଞ୍ଜ୍ୟୋତ୍ସ୍ନାରୀତିଂ ନଖମୁଖରୁଚା ହଂସମନସାଂ
ଵିତନ୍ଵାନଃ ପ୍ରୀତିଂ ଵିକଚତରୁଣାମ୍ଭୋରୁହରୁଚିଃ ।
ପ୍ରକାଶଃ ଶ୍ରୀପାଦସ୍ତଵ ଜନନି କାମାକ୍ଷି ତନୁତେ
ଶରତ୍କାଲପ୍ରୌଢିଂ ଶଶିଶକଲଚୂଡପ୍ରିୟତମେ ॥ ୪୭ ॥
ନଖାଙ୍କୂରସ୍ମେରଦ୍ୟୁତିଵିମଲଗଙ୍ଗାମ୍ଭସି ସୁଖଂ
କୃତସ୍ନାନଂ ଜ୍ଞାନାମୃତମମଲମାସ୍ଵାଦ୍ୟ ନିୟତମ୍ ।
ଉଦଞ୍ଚନ୍ମଞ୍ଜୀରସ୍ଫୁରଣମଣିଦୀପେ ମମ ମନୋ
ମନୋଜ୍ଞେ କାମାକ୍ଷ୍ୟାଶ୍ଚରଣମଣିହର୍ମ୍ୟେ ଵିହରତାମ୍ ॥ ୪୮ ॥
ଭଵାମ୍ଭୋଧୌ ନୌକାଂ ଜଡିମଵିପିନେ ପାଵକଶିଖା-
ମମର୍ତ୍ୟେନ୍ଦ୍ରାଦୀନାମଧିମୁକୁଟମୁତ୍ତଂସକଲିକାମ୍ ।
ଜଗତ୍ତାପେ ଜ୍ୟୋତ୍ସ୍ନାମକୃତକଵଚଃପଞ୍ଜରପୁଟେ
ଶୁକସ୍ତ୍ରୀଂ କାମାକ୍ଷ୍ୟା ମନସି କଲୟେ ପାଦୟୁଗଲୀମ୍ ॥ ୪୯ ॥
ପରତ୍ମପ୍ରାକାଶ୍ୟପ୍ରତିଫଲନଚୁଞ୍ଚୁଃ ପ୍ରଣମତାଂ
ମନୋଜ୍ଞସ୍ତ୍ଵତ୍ପାଦୋ ମଣିମୁକୁରମୁଦ୍ରାଂ କଲୟତେ ।
ୟଦୀୟାଂ କାମାକ୍ଷି ପ୍ରକୃତିମସୃଣାଃ ଶୋଧକଦଶାଂ
ଵିଧାତୁଂ ଚେଷ୍ଠନ୍ତେ ବଲରିପୁଵଧୂଟୀକଚଭରାଃ ॥ ୫୦ ॥
ଅଵିଶ୍ରାନ୍ତଂ ତିଷ୍ଠନ୍ନକୃତକଵଚଃକନ୍ଦରପୁଟୀ-
କୁଟୀରାନ୍ତଃ ପ୍ରୌଢଂ ନଖରୁଚିସଟାଲୀଂ ପ୍ରକଟୟନ୍ ।
ପ୍ରଚଣ୍ଡଂ ଖଣ୍ଡତ୍ଵଂ ନୟତୁ ମମ କାମାକ୍ଷି ତରସା
ତମୋଵେତଣ୍ଡେନ୍ଦ୍ରଂ ତଵ ଚରଣକଣ୍ଠୀରଵପତିଃ ॥ ୫୧ ॥
ପୁରସ୍ତାତ୍କାମାକ୍ଷି ପ୍ରଚୁରରସମାଖଣ୍ଡଲପୁରୀ-
ପୁରନ୍ଧ୍ରୀଣାଂ ଲାସ୍ୟଂ ତଵ ଲଲିତମାଲୋକ୍ୟ ଶନକୈଃ ।
ନଖଶ୍ରୀଭିଃ ସ୍ମେରା ବହୁ ଵିତନୁତେ ନୂପୁରରଵୈ-
ଶ୍ଚମତ୍କୃତ୍ୟା ଶଙ୍କେ ଚରଣୟୁଗଲୀ ଚାଟୁରଚନାଃ ॥ ୫୨ ॥
ସରୋଜଂ ନିନ୍ଦନ୍ତୀ ନଖକିରଣକର୍ପୂରଶିଶିରା
ନିଷିକ୍ତା ମାରାରେର୍ମୁକୁଟଶଶିରେଖାହିମଜଲୈଃ ।
ସ୍ଫୁରନ୍ତୀ କାମାକ୍ଷି ସ୍ଫୁଟରୁଚିମୟେ ପଲ୍ଲଵଚୟେ
ତଵାଧତ୍ତେ ମୈତ୍ରୀଂ ପଥିକସୁଦୃଶା ପାଦୟୁଗଲୀ ॥ ୫୩ ॥
ନତାନାଂ ସମ୍ପତ୍ତେରନଵରତମାକର୍ଷଣଜପଃ
ପ୍ରରୋହତ୍ସଂସାରପ୍ରସରଗରିମସ୍ତମ୍ଭନଜପଃ ।
ତ୍ଵଦୀୟଃ କାମାକ୍ଷି ସ୍ମରହରମନୋମୋହନଜପଃ
ପଟୀୟାନ୍ନଃ ପାୟାତ୍ପଦନଲିନମଞ୍ଜୀରନିନଦଃ ॥ ୫୪ ॥
ଵିତନ୍ଵୀଥା ନାଥେ ମମ ଶିରସି କାମାକ୍ଷି କୃପୟା
ପଦାମ୍ଭୋଜନ୍ୟାସଂ ପଶୁପରିବୃଢପ୍ରାଣଦୟିତେ ।
ପିବନ୍ତୋ ୟନ୍ମୁଦ୍ରାଂ ପ୍ରକଟମୁପକମ୍ପାପରିସରଂ
ଦୃଶା ନାନନ୍ଦ୍ୟନ୍ତେ ନଲିନଭଵନାରାୟଣମୁଖାଃ ॥ ୫୫ ॥
ପ୍ରଣାମୋଦ୍ୟଦ୍ବୃନ୍ଦାରମୁକୁଟମନ୍ଦାରକଲିକା-
ଵିଲୋଲଲ୍ଲୋଲମ୍ବପ୍ରକରମୟଧୂମପ୍ରଚୁରିମା ।
ପ୍ରଦୀପ୍ତଃ ପାଦାବ୍ଜଦ୍ୟୁତିଵିତତିପାଟଲ୍ୟଲହରୀ-
କୃଶାନୁଃ କାମାକ୍ଷ୍ୟା ମମ ଦହତୁ ସଂସାରଵିପିନମ୍ ॥ ୫୬ ॥
ଵଲକ୍ଷଶ୍ରୀରୃକ୍ଷାଧିପଶିଶୁସଦୃକ୍ଷୈସ୍ତଵ ନଖୈଃ
ଜିଘୃକ୍ଷୁର୍ଦକ୍ଷତ୍ଵଂ ସରସିରୁହଭିକ୍ଷୁତ୍ଵକରଣେ ।
କ୍ଷଣାନ୍ମେ କାମାକ୍ଷି କ୍ଷପିତଭଵସଂକ୍ଷୋଭଗରିମା
ଵଚୋଵୈଚକ୍ଷନ୍ୟଂ ଚରଣୟୁଗଲୀ ପକ୍ଷ୍ମଲୟତାତ୍ ॥ ୫୭ ॥
ସମନ୍ତାତ୍କାମାକ୍ଷି କ୍ଷତତିମିରସନ୍ତାନସୁଭଗାନ୍
ଅନନ୍ତାଭିର୍ଭାଭିର୍ଦିନମନୁ ଦିଗନ୍ତାନ୍ଵିରଚୟନ୍ ।
ଅହନ୍ତାୟା ହନ୍ତା ମମ ଜଡିମଦନ୍ତାଵଲହରିଃ
ଵିଭିନ୍ତାଂ ସନ୍ତାପଂ ତଵ ଚରଣଚିନ୍ତାମଣିରସୌ ॥ ୫୮ ॥
ଦଧାନୋ ଭାସ୍ଵତ୍ତାମମୃତନିଲୟୋ ଲୋହିତଵପୁଃ
ଵିନମ୍ରାଣାଂ ସୌମ୍ୟୋ ଗୁରୁରପି କଵିତ୍ଵଂ ଚ କଲୟନ୍ ।
ଗତୌ ମନ୍ଦୋ ଗଙ୍ଗାଧରମହିଷି କାମାକ୍ଷି ଭଜତାଂ
ତମଃକେତୁର୍ମାତସ୍ତଵ ଚରଣପଦ୍ମୋ ଵିଜୟତେ ॥ ୫୯ ॥
ନୟନ୍ତୀଂ ଦାସତ୍ଵଂ ନଲିନଭଵମୁଖ୍ୟାନସୁଲଭ-
ପ୍ରଦାନାଦ୍ଦୀନାନାମମରତରୁଦୌର୍ଭାଗ୍ୟଜନନୀମ୍ ।
ଜଗଜ୍ଜନ୍ମକ୍ଷେମକ୍ଷୟଵିଧିଷୁ କାମାକ୍ଷି ପଦୟୋ-
ର୍ଧୁରୀଣାମୀଷ୍ଟେ କରସ୍ତଵ ଭଣିତୁମାହୋପୁରୁଷିକାମ୍ ॥ ୬୦ ॥
ଜନୋଽୟଂ ସନ୍ତପ୍ତୋ ଜନନି ଭଵଚଣ୍ଡାଂଶୁକିରଣୈଃ
ଅଲବ୍ଧଵୈକଂ ଶୀତଂ କଣମପି ପରଜ୍ଞାନପୟସଃ ।
ତମୋମାର୍ଗେ ପାନ୍ଥସ୍ତଵ ଝଟିତି କାମାକ୍ଷି ଶିଶିରାଂ
ପଦାମ୍ଭୋଜଚ୍ଛାୟାଂ ପରମଶିଵଜାୟେ ମୃଗୟତେ ॥ ୬୧ ॥
ଜୟତ୍ୟମ୍ବ ଶ୍ରୀମନ୍ନଖକିରଣଚୀନାଂଶୁକମୟଂ
ଵିତାନଂ ବିଭ୍ରାଣେ ସୁରମୁକୁଟସଂଘଟ୍ଟମସୃଣେ ।
ନିଜାରୁଣ୍ୟକ୍ଷୌମାସ୍ତରଣଵତି କାମାକ୍ଷି ସୁଲଭା
ବୁଧୈଃ ସଂଵିନ୍ନାରୀ ତଵ ଚରଣମାଣିକ୍ୟଭଵନେ ॥ ୬୨ ॥
ପ୍ରତୀମଃ କାମାକ୍ଷି ସ୍ଫୁରିତତରୁଣାଦିତ୍ୟକିରଣ-
ଶ୍ରିୟୋ ମୂଲଦ୍ରଵ୍ୟଂ ତଵ ଚରଣମଦ୍ରୀନ୍ଦ୍ରତନୟେ ।
ସୁରେନ୍ଦ୍ରାଶାମାପୂରୟତି ୟଦସୌ ଧ୍ଵାନ୍ତମଖିଲଂ
ଧୁନୀତେ ଦିଗ୍ଭାଗାନପି ଚ ମହସା ପାଟଲୟତେ ॥ ୬୩ ॥
ମହାଭାଷ୍ୟଵ୍ୟାଖ୍ୟାପଟୁଶୟନମାରୋପୟତି ଵା
ସ୍ମରଵ୍ୟାପାରେର୍ଷ୍ୟାପିଶୁନନିଟିଲଂ କାରୟତି ଵା ।
ଦ୍ଵିରେଫାଣାମଧ୍ୟାସୟତି ସତତଂ ଵାଧିଵସତିଂ
ପ୍ରଣମ୍ରାନ୍କାମାକ୍ଷ୍ୟାଃ ପଦନଲିନମାହାତ୍ମ୍ୟଗରିମା ॥ ୬୪ ॥
ଵିଵେକାମ୍ଭସ୍ସ୍ରୋତସ୍ସ୍ନପନପରିପାଟୀଶିଶିରିତେ
ସମୀଭୂତେ ଶାସ୍ତ୍ରସ୍ମରଣହଲସଂକର୍ଷଣଵଶାତ୍ ।
ସତାଂ ଚେତଃକ୍ଷେତ୍ରେ ଵପତି ତଵ କାମାକ୍ଷି ଚରଣୋ
ମହାସଂଵିତ୍ସସ୍ୟପ୍ରକରଵରବୀଜଂ ଗିରିସୁତେ ॥ ୬୫ ॥
ଦଧାନୋ ମନ୍ଦାରସ୍ତବକପରିପାଟୀଂ ନଖରୁଚା
ଵହନ୍ଦୀପ୍ତାଂ ଶୋଣାଙ୍ଗୁଲିପଟଲଚାମ୍ପେୟକଲିକାମ୍ ।
ଅଶୋକୋଲ୍ଲାସଂ ନଃ ପ୍ରଚୁରୟତୁ କାମାକ୍ଷି ଚରଣୋ
ଵିକାସୀ ଵାସନ୍ତଃ ସମୟ ଇଵ ତେ ଶର୍ଵଦୟିତେ ॥ ୬୬ ॥
ନଖାଂଶୁପ୍ରାଚୁର୍ୟପ୍ରସୃମରମରାଲାଲିଧଵଲଃ
ସ୍ଫୁରନ୍ମଞ୍ଜୀରୋଦ୍ୟନ୍ମରକତମହଶ୍ଶୈଵଲୟୁତଃ ।
ଭଵତ୍ୟାଃ କାମାକ୍ଷି ସ୍ଫୁଟଚରଣପାଟଲ୍ୟକପଟୋ
ନଦଃ ଶୋଣାଭିଖ୍ୟୋ ନଗପତିତନୂଜେ ଵିଜୟତେ ॥ ୬୭ ॥
ଧୁନାନଂ ପଙ୍କୌଘଂ ପରମସୁଲଭଂ କଣ୍ଟକକୁଲୈଃ
ଵିକାସଵ୍ୟାସଙ୍ଗଂ ଵିଦଧଦପରାଧୀନମନିଶମ୍ ।
ନଖେନ୍ଦୁଜ୍ୟୋତ୍ସ୍ନାଭିର୍ଵିଶଦରୁଚି କାମାକ୍ଷି ନିତରାମ୍
ଅସାମାନ୍ୟଂ ମନ୍ୟେ ସରସିଜମିଦଂ ତେ ପଦୟୁଗମ୍ ॥ ୬୮ ॥
କରୀନ୍ଦ୍ରାୟ ଦ୍ରୁହ୍ୟତ୍ୟଲସଗତିଲୀଲାସୁ ଵିମଲୈଃ
ପୟୋଜୈର୍ମାତ୍ସର୍ୟଂ ପ୍ରକଟୟତି କାମଂ କଲୟତେ ।
ପଦାମ୍ଭୋଜଦ୍ଵନ୍ଦ୍ଵଂ ତଵ ତଦପି କାମାକ୍ଷି ହୃଦୟଂ
ମୁନୀନାଂ ଶାନ୍ତାନାଂ କଥମନିଶମସ୍ମୈ ସ୍ପୃହୟତେ ॥ ୬୯ ॥
ନିରସ୍ତା ଶୋଣିମ୍ନା ଚରଣକିରଣାନାଂ ତଵ ଶିଵେ
ସମିନ୍ଧାନା ସନ୍ଧ୍ୟାରୁଚିରଚଲରାଜନ୍ୟତନୟେ ।
ଅସାମର୍ଥ୍ୟାଦେନଂ ପରିଭଵିତୁମେତତ୍ସମରୁଚାଂ
ସରୋଜାନାଂ ଜାନେ ମୁକୁଲୟତି ଶୋଭାଂ ପ୍ରତିଦିନମ୍ ॥ ୭୦ ॥
ଉପାଦିକ୍ଷଦ୍ଦାକ୍ଷ୍ୟଂ ତଵ ଚରଣନାମା ଗୁରୁରସୌ
ମରାଲାନାଂ ଶଙ୍କେ ମସୃଣଗତିଲାଲିତ୍ୟସରଣୌ ।
ଅତସ୍ତେ ନିସ୍ତନ୍ଦ୍ରଂ ନିୟତମମୁନା ସଖ୍ୟପଦଵୀଂ
ପ୍ରପନ୍ନଂ ପାଥୋଜଂ ପ୍ରତି ଦଧତି କାମାକ୍ଷି କୁତୁକମ୍ ॥ ୭୧ ॥
ଦଧାନୈଃ ସଂସର୍ଗଂ ପ୍ରକୃତିମଲିନୈଃ ଷଟ୍ପଦକୁଲୈଃ
ଦ୍ଵିଜାଧୀଶଶ୍ଲାଘାଵିଧିଷୁ ଵିଦଧଦ୍ଭିର୍ମୁକୁଲତାମ୍ ।
ରଜୋମିଶ୍ରୈଃ ପଦ୍ମୈର୍ନିୟତମପି କାମାକ୍ଷି ପଦୟୋଃ
ଵିରୋଧସ୍ତେ ୟୁକ୍ତୋ ଵିଷମଶରଵୈରିପ୍ରିୟତମେ ॥ ୭୨ ॥
କଵିତ୍ଵଶ୍ରୀମିଶ୍ରୀକରଣନିପୁଣୌ ରକ୍ଷଣଚଣୌ
ଵିପନ୍ନାନାଂ ଶ୍ରୀମନ୍ନଲିନମସୃଣୌ ଶୋଣକିରଣୌ ।
ମୁନୀନ୍ଦ୍ରାଣାମନ୍ତଃକରଣଶରଣୌ ମନ୍ଦସରଣୌ
ମନୋଜ୍ଞୌ କାମାକ୍ଷ୍ୟା ଦୁରିତହରଣୌ ନୌମି ଚରଣୌ ॥ ୭୩ ॥
ପରସ୍ମାତ୍ସର୍ଵସ୍ମାଦପି ଚ ପରୟୋର୍ମୁକ୍ତିକରୟୋଃ
ନଖଶ୍ରୀଭିର୍ଜ୍ୟୋତ୍ସ୍ନାକଲିତତୁଲୟୋସ୍ତାମ୍ରତଲୟୋଃ ।
ନିଲୀୟେ କାମାକ୍ଷ୍ୟା ନିଗମନୁତୟୋର୍ନାକିନତୟୋଃ
ନିରସ୍ତପ୍ରୋନ୍ମୀଲନ୍ନଲିନମଦୟୋରେଵ ପଦୟୋଃ ॥ ୭୪ ॥
ସ୍ଵଭାଵାଦନ୍ୟୋନ୍ୟଂ କିସଲୟମପୀଦଂ ତଵ ପଦଂ
ମ୍ରଦିମ୍ନା ଶୋଣିମ୍ନା ଭଗଵତି ଦଧାତେ ସଦୃଶତାମ୍ ।
ଵନେ ପୂର୍ଵସ୍ୟେଚ୍ଛା ସତତମଵନେ କିଂ ତୁ ଜଗତାଂ
ପରସ୍ୟେତ୍ଥଂ ଭେଦଃ ସ୍ଫୁରତି ହୃଦି କାମାକ୍ଷି ସୁଧିୟାମ୍ ॥ ୭୫ ॥
କଥଂ ଵାଚାଲୋଽପି ପ୍ରକଟମଣିମଞ୍ଜୀରନିନଦୈଃ
ସଦୈଵାନନ୍ଦାର୍ଦ୍ରାନ୍ଵିରଚୟତି ଵାଚଂୟମଜନାନ୍ ।
ପ୍ରକୃତ୍ୟା ତେ ଶୋଣଚ୍ଛଵିରପି ଚ କାମାକ୍ଷି ଚରଣୋ
ମନୀଷାନୈର୍ମଲ୍ୟଂ କଥମିଵ ନୃଣାଂ ମାଂସଲୟତେ ॥ ୭୬ ॥
ଚଲତ୍ତୃଷ୍ଣାଵୀଚୀପରିଚଲନପର୍ୟାକୁଲତୟା
ମୁହୁର୍ଭ୍ରାନ୍ତସ୍ତାନ୍ତଃ ପରମଶିଵଵାମାକ୍ଷି ପରଵାନ୍ ।
ତିତୀର୍ଷୁଃ କାମାକ୍ଷି ପ୍ରଚୁରତରକର୍ମାମ୍ବୁଧିମମୁଂ
କଦାହଂ ଲପ୍ସ୍ୟେ ତେ ଚରଣମଣିସେତୁଂ ଗିରିସୁତେ ॥ ୭୭ ॥
ଵିଶୁଷ୍ୟନ୍ତ୍ୟାଂ ପ୍ରଜ୍ଞାସରିତି ଦୁରିତଗ୍ରୀଷ୍ମସମୟ-
ପ୍ରଭାଵେଣ କ୍ଷୀଣେ ସତି ମମ ମନଃକେକିନି ଶୁଚା ।
ତ୍ଵଦୀୟଃ କାମାକ୍ଷି ସ୍ଫୁରିତଚରଣାମ୍ଭୋଦମହିମା
ନଭୋମାସାଟୋପଂ ନଗପତିସୁତେ କିଂ ନ କୁରୁତେ ॥ ୭୮ ॥
ଵିନମ୍ରାଣାଂ ଚେତୋଭଵନଵଲଭୀସୀମ୍ନି ଚରଣ-
ପ୍ରଦୀପେ ପ୍ରାକାଶ୍ୟଂ ଦଧତି ତଵ ନିର୍ଧୂତତମସି ।
ଅସୀମା କାମାକ୍ଷି ସ୍ଵୟମଲଘୁଦୁଷ୍କର୍ମଲହରୀ
ଵିଘୂର୍ଣନ୍ତୀ ଶାନ୍ତିଂ ଶଲଭପରିପାଟୀଵ ଭଜତେ ॥ ୭୯ ॥
ଵିରାଜନ୍ତୀ ଶୁକ୍ତିର୍ନଖକିରଣମୁକ୍ତାମଣିତତେଃ
ଵିପତ୍ପାଥୋରାଶୌ ତରିରପି ନରାଣାଂ ପ୍ରଣମତାମ୍ ।
ତ୍ଵଦୀୟଃ କାମାକ୍ଷି ଧ୍ରୁଵମଲଘୁଵହ୍ନିର୍ଭଵଵନେ
ମୁନୀନାଂ ଜ୍ଞାନାଗ୍ନେରରଣିରୟମଙ୍ଘିର୍ଵିଜୟତେ ॥ ୮୦ ॥
ସମସ୍ତୈଃ ସଂସେଵ୍ୟଃ ସତତମପି କାମାକ୍ଷି ଵିବୁଧୈଃ
ସ୍ତୁତୋ ଗନ୍ଧର୍ଵସ୍ତ୍ରୀସୁଲଲିତଵିପଞ୍ଚୀକଲରଵୈଃ ।
ଭଵତ୍ୟା ଭିନ୍ଦାନୋ ଭଵଗିରିକୁଲଂ ଜୃମ୍ଭିତତମୋ-
ବଲଦ୍ରୋହୀ ମାତଶ୍ଚରଣପୁରୁହୂତୋ ଵିଜୟତେ ॥ ୮୧ ॥
ଵସନ୍ତଂ ଭକ୍ତାନାମପି ମନସି ନିତ୍ୟଂ ପରିଲସଦ୍-
ଘନଚ୍ଛାୟାପୂର୍ଣଂ ଶୁଚିମପି ନୃଣାଂ ତାପଶମନମ୍ ।
ନଖେନ୍ଦୁଜ୍ୟୋତ୍ସ୍ନାଭିଃ ଶିଶିରମପି ପଦ୍ମୋଦୟକରଂ
ନମାମଃ କାମାକ୍ଷ୍ୟାଶ୍ଚରଣମଧିକାଶ୍ଚର୍ୟକରଣମ୍ ॥ ୮୨ ॥
କଵୀନ୍ଦ୍ରାଣାଂ ନାନାଭଣିତିଗୁଣଚିତ୍ରୀକୃତଵଚଃ-
ପ୍ରପଞ୍ଚଵ୍ୟାପାରପ୍ରକଟନକଲାକୌଶଲନିଧିଃ ।
ଅଧଃକୁର୍ଵନ୍ନବ୍ଜଂ ସନକଭୃଗୁମୁଖ୍ୟୈର୍ମୁନିଜନୈଃ
ନମସ୍ୟଃ କାମାକ୍ଷ୍ୟାଶ୍ଚରଣପରମେଷ୍ଠୀ ଵିଜୟତେ ॥ ୮୩ ॥
ଭଵତ୍ୟାଃ କାମାକ୍ଷି ସ୍ଫୁରିତପଦପଙ୍କେରୁହଭୁଵାଂ
ପରାଗାଣାଂ ପୂରୈଃ ପରିହୃତକଲଙ୍କଵ୍ୟତିକରୈଃ ।
ନତାନାମାମୃଷ୍ଟେ ହୃଦୟମୁକୁରେ ନିର୍ମଲରୁଚି
ପ୍ରସନ୍ନେ ନିଶ୍ଶେଷଂ ପ୍ରତିଫଲତି ଵିଶ୍ଵଂ ଗିରିସୁତେ ॥ ୮୪ ॥
ତଵ ତ୍ରସ୍ତଂ ପାଦାତ୍କିସଲୟମରଣ୍ୟାନ୍ତରମଗାତ୍
ପରଂ ରେଖାରୂପଂ କମଲମମୁମେଵାଶ୍ରିତମଭୂତ୍ ।
ଜିତାନାଂ କାମାକ୍ଷି ଦ୍ଵିତୟମପି ୟୁକ୍ତଂ ପରିଭଵେ
ଵିଦେଶେ ଵାସୋ ଵା ଶରଣଗମନଂ ଵା ନିଜରିପୋଃ ॥ ୮୫ ॥
ଗୃହୀତ୍ଵା ୟାଥାର୍ଥ୍ୟଂ ନିଗମଵଚସାଂ ଦେଶିକକୃପା-
କଟାକ୍ଷର୍କଜ୍ୟୋତିଶ୍ଶମିତମମତାବନ୍ଧତମସଃ ।
ୟତନ୍ତେ କାମାକ୍ଷି ପ୍ରତିଦିଵସମନ୍ତର୍ଦ୍ରଢୟିତୁଂ
ତ୍ଵଦୀୟଂ ପାଦାବ୍ଜଂ ସୁକୃତପରିପାକେନ ସୁଜନାଃ ॥ ୮୬ ॥
ଜଡାନାମପ୍ୟମ୍ବ ସ୍ମରଣସମୟେ ତଵଚ୍ଚରଣୟୋଃ
ଭ୍ରମନ୍ମନ୍ଥକ୍ଷ୍ମାଭୃଦ୍ଧୁମୁଘୁମିତସିନ୍ଧୁପ୍ରତିଭଟାଃ ।
ପ୍ରସନ୍ନାଃ କାମାକ୍ଷି ପ୍ରସଭମଧରସ୍ପନ୍ଦନକରା
ଭଵନ୍ତି ସ୍ଵଚ୍ଛନ୍ଦଂ ପ୍ରକୃତିପରିପକ୍କା ଭଣିତୟଃ ॥ ୮୭ ॥
ଵହନ୍ନପ୍ୟଶ୍ରାନ୍ତଂ ମଧୁରନିନଦଂ ହଂସକମସୌ
ତମେଵାଧଃ କର୍ତୁଂ କିମିଵ ୟତତେ କେଲିଗମନେ ।
ଭଵସ୍ୟୈଵାନନ୍ଦଂ ଵିଦଧଦପି କାମାକ୍ଷି ଚରଣୋ
ଭଵତ୍ୟାସ୍ତଦ୍ଦ୍ରୋହଂ ଭଗଵତି କିମେଵଂ ଵିତନୁତେ ॥ ୮୮ ॥
ୟଦତ୍ୟନ୍ତଂ ତାମ୍ୟତ୍ୟଲସଗତିଵାର୍ତାସ୍ଵପି ଶିଵେ
ତଦେତତ୍କାମାକ୍ଷି ପ୍ରକୃତିମୃଦୁଲଂ ତେ ପଦୟୁଗମ୍ ।
କିରୀଟୈଃ ସଂଘଟ୍ଟଂ କଥମିଵ ସୁରୌଘସ୍ୟ ସହତେ
ମୁନୀନ୍ଦ୍ରାଣାମାସ୍ତେ ମନସି ଚ କଥଂ ସୂଚିନିଶିତେ ॥ ୮୯ ॥
ମନୋରଙ୍ଗେ ମତ୍କେ ଵିବୁଧଜନସଂମୋଦଜନନୀ
ସରାଗଵ୍ୟାସଙ୍ଗଂ ସରସମୃଦୁସଂଚାରସୁଭଗା ।
ମନୋଜ୍ଞା କାମାକ୍ଷି ପ୍ରକଟୟତୁ ଲାସ୍ୟପ୍ରକରଣଂ
ରଣନ୍ମଞ୍ଜୀରା ତେ ଚରଣୟୁଗଲୀନର୍ତକଵଧୂଃ ॥ ୯୦ ॥
ପରିଷ୍କୁର୍ଵନ୍ମାତଃ ପଶୁପତିକପର୍ଦଂ ଚରଣରାଟ୍
ପରାଚାଂ ହୃତ୍ପଦ୍ମଂ ପରମଭଣିତୀନାଂ ଚ ମକୁଟମ୍ ।
ଭଵାଖ୍ୟେ ପାଥୋଧୌ ପରିହରତୁ କାମାକ୍ଷି ମମତା-
ପରାଧୀନତ୍ଵଂ ମେ ପରିମୁଷିତପାଥୋଜମହିମା ॥ ୯୧ ॥
ପ୍ରସୂନୈଃ ସମ୍ପର୍କାଦମରତରୁଣୀକୁନ୍ତଲଭଵୈଃ
ଅଭୀଷ୍ଟାନାଂ ଦାନାଦନିଶମପି କାମାକ୍ଷି ନମତାମ୍ ।
ସ୍ଵସଙ୍ଗାତ୍କଙ୍କେଲିପ୍ରସଵଜନକତ୍ଵେନ ଚ ଶିଵେ
ତ୍ରିଧା ଧତ୍ତେ ଵାର୍ତାଂ ସୁରଭିରିତି ପାଦୋ ଗିରିସୁତେ ॥ ୯୨ ॥
ମହାମୋହସ୍ତେନଵ୍ୟତିକରଭୟାତ୍ପାଲୟତି ୟୋ
ଵିନିକ୍ଷିପ୍ତଂ ସ୍ଵସ୍ମିନ୍ନିଜଜନମନୋରତ୍ନମନିଶମ୍ ।
ସ ରାଗସ୍ୟୋଦ୍ରେକାତ୍ସତତମପି କାମାକ୍ଷି ତରସା
କିମେଵଂ ପାଦୋଽସୌ କିସଲୟରୁଚିଂ ଚୋରୟତି ତେ ॥ ୯୩ ॥
ସଦା ସ୍ଵାଦୁଂକାରଂ ଵିଷୟଲହରୀଶାଲିକଣିକାଂ
ସମାସ୍ଵାଦ୍ୟ ଶ୍ରାନ୍ତଂ ହୃଦୟଶୁକପୋତଂ ଜନନି ମେ ।
କୃପାଜାଲେ ଫାଲେକ୍ଷଣମହିଷି କାମାକ୍ଷି ରଭସାତ୍
ଗୃହୀତ୍ଵା ରୁନ୍ଧୀଥାରସ୍ତଵ ପଦୟୁଗୀପଞ୍ଜରପୁଟେ ॥ ୯୪ ॥
ଧୁନାନଂ କାମାକ୍ଷି ସ୍ମରଣଲଵମାତ୍ରେଣ ଜଡିମ-
ଜ୍ଵରପ୍ରୌଢିଂ ଗୂଢସ୍ଥିତି ନିଗମନୈକୁଞ୍ଜକୁହରେ ।
ଅଲଭ୍ୟଂ ସର୍ଵେଷାଂ କତିଚନ ଲଭନ୍ତେ ସୁକୃତିନଃ
ଚିରାଦନ୍ଵିଷ୍ୟନ୍ତସ୍ତଵ ଚରଣସିଦ୍ଧୌଷଧମିଦମ୍ ॥ ୯୫ ॥
ରଣନ୍ମଞ୍ଜୀରାଭ୍ୟାଂ ଲଲିତଗମନାଭ୍ୟାଂ ସୁକୃତିନାଂ
ମନୋଵାସ୍ତଵ୍ୟାଭ୍ୟାଂ ମଥିତତିମିରାଭ୍ୟାଂ ନଖରୁଚା ।
ନିଧେୟାଭ୍ୟାଂ ପତ୍ୟା ନିଜଶିରସି କାମାକ୍ଷି ସତତଂ
ନମସ୍ତେ ପାଦାଭ୍ୟାଂ ନଲିନମୃଦୁଲାଭ୍ୟାଂ ଗିରିସୁତେ ॥ ୯୬ ॥
ସୁରାଗେ ରାକେନ୍ଦୁପ୍ରତିନିଧିମୁଖେ ପର୍ଵତସୁତେ
ଚିରାଲ୍ଲଭ୍ୟେ ଭକ୍ତ୍ୟା ଶମଧନଜନାନାଂ ପରିଷଦା ।
ମନୋଭୃଙ୍ଗୋ ମତ୍କଃ ପଦକମଲୟୁଗ୍ମେ ଜନନି ତେ
ପ୍ରକାମଂ କାମାକ୍ଷି ତ୍ରିପୁରହରଵାମାକ୍ଷି ରମତାମ୍ ॥ ୯୭ ॥
ଶିଵେ ସଂଵିଦ୍ରୂପେ ଶଶିଶକଲଚୂଡପ୍ରିୟତମେ
ଶନୈର୍ଗତ୍ୟାଗତ୍ୟା ଜିତସୁରଵରେଭେ ଗିରିସୁତେ ।
ୟତନ୍ତେ ସନ୍ତସ୍ତେ ଚରଣନଲିନାଲାନୟୁଗଲେ
ସଦା ବଦ୍ଧଂ ଚିତ୍ତପ୍ରମଦକରିୟୂଥଂ ଦୃଢତରମ୍ ॥ ୯୮ ॥
ୟଶଃ ସୂତେ ମାତର୍ମଧୁରକଵିତାଂ ପକ୍ଷ୍ମଲୟତେ
ଶ୍ରିୟଂ ଦତ୍ତେ ଚିତ୍ତେ କମପି ପରିପାକଂ ପ୍ରଥୟତେ ।
ସତାଂ ପାଶଗ୍ରନ୍ଥିଂ ଶିଥିଲୟତି କିଂ କିଂ ନ କୁରୁତେ
ପ୍ରପନ୍ନେ କାମାକ୍ଷ୍ୟାଃ ପ୍ରଣତିପରିପାଟୀ ଚରଣୟୋଃ ॥ ୯୯ ॥
ମନୀଷାଂ ମାହେନ୍ଦ୍ରୀଂ କକୁଭମିଵ ତେ କାମପି ଦଶାଂ
ପ୍ରଧତ୍ତେ କାମାକ୍ଷ୍ୟାଶ୍ଚରଣତରୁଣାଦିତ୍ୟକିରଣଃ ।
ୟଦୀୟେ ସମ୍ପର୍କେ ଧୃତରସମରନ୍ଦା କଵୟତାଂ
ପରୀପାକଂ ଧତ୍ତେ ପରିମଲଵତୀ ସୂକ୍ତିନଲିନୀ ॥ ୧୦୦ ॥
ପୁରା ମାରାରାତିଃ ପୁରମଜୟଦମ୍ବ ସ୍ତଵଶତୈଃ
ପ୍ରସନ୍ନାୟାଂ ସତ୍ୟାଂ ତ୍ଵୟି ତୁହିନଶୈଲେନ୍ଦ୍ରତନୟେ ।
ଅତସ୍ତେ କାମାକ୍ଷି ସ୍ଫୁରତୁ ତରସା କାଲସମୟେ
ସମାୟାତେ ମାତର୍ମମ ମନସି ପାଦାବ୍ଜୟୁଗଲମ୍ ॥ ୧୦୧ ॥
ପଦଦ୍ଵନ୍ଦ୍ଵଂ ମନ୍ଦଂ ଗତିଷୁ ନିଵସନ୍ତଂ ହୃଦି ସତାଂ
ଗିରାମନ୍ତେ ଭ୍ରାନ୍ତଂ କୃତକରହିତାନାଂ ପରିବୃଢେ ।
ଜନାନାମାନନ୍ଦଂ ଜନନି ଜନୟନ୍ତଂ ପ୍ରଣମତାଂ
ତ୍ଵଦୀୟଂ କାମାକ୍ଷି ପ୍ରତିଦିନମହଂ ନୌମି ଵିମଲମ୍ ॥ ୧୦୨ ॥
ଇଦଂ ୟଃ କାମାକ୍ଷ୍ୟାଶ୍ଚରଣନଲିନସ୍ତୋତ୍ରଶତକଂ
ଜପେନ୍ନିତ୍ୟଂ ଭକ୍ତ୍ୟା ନିଖିଲଜଗଦାହ୍ଲାଦଜନକମ୍ ।
ସ ଵିଶ୍ଵେଷାଂ ଵନ୍ଦ୍ୟଃ ସକଲକଵିଲୋକୈକତିଲକଃ
ଚିରଂ ଭୁକ୍ତ୍ଵା ଭୋଗାନ୍ପରିଣମତି ଚିଦ୍ରୂପକଲୟା ॥ ୧୦୩ ॥
ପାଦାରଵିନ୍ଦଶତକଂ ସମ୍ପୂର୍ଣମ୍ ॥
॥ ସ୍ତୁତିଶତକମ୍ ॥
ପାଣ୍ଡିତ୍ୟଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରୟନ୍ତେ ଗିରାଂ
ଵୈରିଞ୍ଚାନ୍ୟପି ଗୁମ୍ଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ୟାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥ ୧ ॥
ତାପିଞ୍ଛସ୍ତବକତ୍ଵିଷେ ତନୁଭୃତାଂ ଦାରିଦ୍ର୍ୟମୁଦ୍ରାଦ୍ଵିଷେ
ସଂସାରାଖ୍ୟତମୋମୁଷେ ପୁରରିପୋର୍ଵାମାଙ୍କସୀମାଜୁଷେ ।
କମ୍ପାତୀରମୁପେୟୁଷେ କଵୟତାଂ ଜିହ୍ଵାକୁଟୀଂ ଜଗ୍ମୁଷେ
ଵିଶ୍ଵତ୍ରାଣପୁଷେ ନମୋଽସ୍ତୁ ସତତଂ ତସ୍ମୈ ପରଂଜ୍ୟୋତିଷେ ॥ ୨ ॥
ୟେ ସନ୍ଧ୍ୟାରୁଣୟନ୍ତି ଶଂକରଜଟାକାନ୍ତାରଚନ୍ରାର୍ଭକଂ
ସିନ୍ଦୂରନ୍ତି ଚ ୟେ ପୁରନ୍ଦରଵଧୂସୀମନ୍ତସୀମାନ୍ତରେ ।
ପୁଣ୍ୟଂ ୟେ ପରିପକ୍କୟନ୍ତି ଭଜତାଂ କାଞ୍ଚୀପୁରେ ମାମମୀ
ପାୟାସୁଃ ପରମେଶ୍ଵରପ୍ରଣୟିନୀପାଦୋଦ୍ଭଵାଃ ପାଂସଵଃ ॥ ୩ ॥
କାମାଡମ୍ବରପୂରୟା ଶଶିରୁଚା କମ୍ରସ୍ମିତାନାଂ ତ୍ଵିଷା
କାମାରେରନୁରାଗସିନ୍ଧୁମଧିକଂ କଲ୍ଲୋଲିତଂ ତନ୍ଵତୀ ।
କାମାକ୍ଷୀତି ସମସ୍ତସଜ୍ଜନନୁତା କଲ୍ୟାଣଦାତ୍ରୀ ନୃଣାଂ
କାରୁଣ୍ୟାକୁଲମାନସା ଭଗଵତୀ କମ୍ପାତଟେ ଜୃମ୍ଭତେ ॥ ୪ ॥
କାମାକ୍ଷୀଣପରାକ୍ରମପ୍ରକଟନଂ ସମ୍ଭାଵୟନ୍ତୀ ଦୃଶା
ଶ୍ୟାମା କ୍ଷୀରସହୋଦରସ୍ମିତରୁଚିପ୍ରକ୍ଷାଲିତାଶାନ୍ତରା ।
କାମାକ୍ଷୀଜନମୌଲିଭୂଷଣମଣିର୍ଵାଚାଂ ପରା ଦେଵତା
କାମାକ୍ଷୀତି ଵିଭାତି କାପି କରୁଣା କମ୍ପାତଟିନ୍ୟାସ୍ତଟେ ॥ ୫ ॥
ଶ୍ୟାମା କାଚନ ଚନ୍ଦ୍ରିକା ତ୍ରିଭୁଵନେ ପୁଣ୍ୟାତ୍ମନାମାନନେ
ସୀମାଶୂନ୍ୟକଵିତ୍ଵଵର୍ଷଜନନୀ ୟା କାପି କାଦମ୍ବିନୀ ।
ମାରାରାତିମନୋଵିମୋହନଵିଧୌ କାଚିତତ୍ତମଃକନ୍ଦଲୀ
କାମାକ୍ଷ୍ୟାଃ କରୁଣାକଟାକ୍ଷଲହରୀ କାମାୟ ମେ କଲ୍ପତାମ୍ ॥ ୬ ॥
ପ୍ରୌଢଧ୍ଵାନ୍ତକଦମ୍ବକେ କୁମୁଦିନୀପୁଣ୍ୟାଂକୁରଂ ଦର୍ଶୟନ୍
ଜ୍ୟୋତ୍ସ୍ନାସଂଗମନେଽପି କୋକମିଥୁନଂ ମିଶ୍ରଂ ସମୁଦ୍ଭାଵୟନ୍ ।
କାଲିନ୍ଦୀଲହରୀଦଶାଂ ପ୍ରକଟୟନ୍କମ୍ରାଂ ନଭସ୍ୟଦ୍ଭୁତାଂ
କଶ୍ଚିନ୍ନେତ୍ରମହୋତ୍ସଵୋ ଵିଜୟତେ କାଞ୍ଚୀପୁରେ ଶୂଲିନଃ ॥ ୭ ॥
ତନ୍ଦ୍ରାହୀନତମାଲନୀଲସୁଷମୈସ୍ତାରୁଣ୍ୟଲୀଲାଗୃହୈଃ
ତାରାନାଥକିଶୋରଲାଞ୍ଛିତକଚୈସ୍ତାମ୍ରାରଵିନ୍ଦେକ୍ଷଣୈଃ ।
ମାତଃ ସଂଶ୍ରୟତାଂ ମନୋ ମନସିଜପ୍ରାଗଲ୍ଭ୍ୟନାଡିନ୍ଧମୈଃ
କମ୍ପାତୀରଚରୈର୍ଘନସ୍ତନଭରୈଃ ପୁଣ୍ୟାଙ୍କରୈଃ ଶାଂକରୈଃ ॥ ୮ ॥
ନିତ୍ୟଂ ନିଶ୍ଚଲତାମୁପେତ୍ୟ ମରୁତାଂ ରକ୍ଷାଵିଧିଂ ପୁଷ୍ଣତୀ
ତେଜସ୍ସଂଚୟପାଟଵେନ କିରଣାନୁଷ୍ଣଦ୍ୟୁତେର୍ମୁଷ୍ଣତୀ ।
କାଞ୍ଚୀମଧ୍ୟଗତାପି ଦୀପ୍ତିଜନନୀ ଵିଶ୍ଵାନ୍ତରେ ଜୃମ୍ଭତେ
କାଚିଚ୍ଚିତ୍ରମହୋ ସ୍ମୃତାପି ତମସାଂ ନିର୍ଵାପିକା ଦୀପିକା ॥ ୯ ॥
କାନ୍ତୈଃ କେଶରୁଚାଂ ଚୟୈର୍ଭ୍ରମରିତଂ ମନ୍ଦସ୍ମିତୈଃ ପୁଷ୍ପିତଂ
କାନ୍ତ୍ୟା ପଲ୍ଲଵିତଂ ପଦାମ୍ବୁରୁହୟୋର୍ନେତ୍ରତ୍ଵିଷା ପତ୍ରିତମ୍ ।
କମ୍ପାତୀରଵନାନ୍ତରଂ ଵିଦଧତୀ କଲ୍ୟାଣଜନ୍ମସ୍ଥଲୀ
କାଞ୍ଚୀମଧ୍ୟମହାମଣିର୍ଵିଜୟତେ କାଚିତ୍କୃପାକନ୍ଦଲୀ ॥ ୧୦ ॥
ରାକାଚନ୍ଦ୍ରସମାନକାନ୍ତିଵଦନା ନାକାଧିରାଜସ୍ତୁତା
ମୂକାନାମପି କୁର୍ଵତୀ ସୁରଧୁନୀନୀକାଶଵାଗ୍ଵୈଭଵମ୍ ।
ଶ୍ରୀକାଞ୍ଚୀନଗରୀଵିହାରରସିକା ଶୋକାପହନ୍ତ୍ରୀ ସତାମ୍
ଏକା ପୁଣ୍ୟପରମ୍ପରା ପଶୁପତେରାକାରିଣୀ ରାଜତେ ॥ ୧୧ ॥
ଜାତା ଶୀତଲଶୈଲତଃ ସୁକୃତିନାଂ ଦୃଶ୍ୟା ପରଂ ଦେହିନାଂ
ଲୋକାନାଂ କ୍ଷଣମାତ୍ରସଂସ୍ମରଣତଃ ସନ୍ତାପଵିଚ୍ଛେଦିନୀ ।
ଆଶ୍ଚର୍ୟଂ ବହୁ ଖେଲନଂ ଵିତନୁତେ ନୈଶ୍ଚଲ୍ୟମାବିଭ୍ରତୀ
କମ୍ପାୟାସ୍ତଟସୀମ୍ନି କାପି ତଟିନୀ କାରୁଣ୍ୟପାଥୋମୟୀ ॥ ୧୨ ॥
ଐକ୍ୟଂ ୟେନ ଵିରଚ୍ୟତେ ହରତନୌ ଦମ୍ଭାଵପୁମ୍ଭାଵୁକେ
ରେଖା ୟତ୍କଚସୀମ୍ନି ଶେଖରଦଶାଂ ନୈଶାକରୀ ଗାହତେ ।
ଔନ୍ନତ୍ୟଂ ମୁହୁରେତି ୟେନ ସ ମହାନ୍ମେନାସଖଃ ସାନୁମାନ୍
କମ୍ପାତୀରଵିହାରିଣା ସଶରଣାସ୍ତେନୈଵ ଧାମ୍ନା ଵୟମ୍ ॥ ୧୩ ॥
ଅକ୍ଷ୍ଣୋଶ୍ଚ ସ୍ତନୟୋଃ ଶ୍ରିୟା ଶ୍ରଵଣୟୋର୍ବାହ୍ଵୋଶ୍ଚ ମୂଲଂ ସ୍ପୃଶନ୍
ଉତ୍ତଂସେନ ମୁଖେନ ଚ ପ୍ରତିଦିନଂ ଦ୍ରୁହ୍ୟନ୍ପୟୋଜନ୍ମନେ ।
ମାଧୁର୍ୟେଣ ଗିରାଂ ଗତେନ ମୃଦୁନା ହଂସାଙ୍ଗନାଂ ହ୍ରେପୟନ୍
କାଞ୍ଚୀସୀମ୍ନି ଚକାସ୍ତି କୋଽପି କଵିତାସନ୍ତାନବୀଜାଙ୍କୁରଃ ॥ ୧୪ ॥
ଖଣ୍ଡଂ ଚାନ୍ଦ୍ରମସଂ ଵତଂସମନିଶଂ କାଞ୍ଚୀପୁରେ ଖେଲନଂ
କାଲାୟଶ୍ଛଵିତସ୍କରୀଂ ତନୁରୁଚିଂ କର୍ଣଜପେ ଲୋଚନେ ।
ତାରୁଣ୍ୟୋଷ୍ମନଖମ୍ପଚଂ ସ୍ତନଭରଂ ଜଙ୍ଘାସ୍ପୃଶଂ କୁନ୍ତଲଂ
ଭାଗ୍ୟଂ ଦେଶିକସଂଚିତଂ ମମ କଦା ସମ୍ପାଦୟେଦମ୍ବିକେ ॥ ୧୫ ॥
ତନ୍ଵାନଂ ନିଜକେଲିସୌଧସରଣିଂ ନୈସର୍ଗିକୀଣାଂ ଗିରାଂ
କେଦାରଂ କଵିମଲ୍ଲସୂକ୍ତିଲହରୀସସ୍ୟଶ୍ରିୟାଂ ଶାଶ୍ଵତମ୍ ।
ଅଂହୋଵଞ୍ଚନଚୁଞ୍ଚୁ କିଂଚନ ଭଜେ କାଞ୍ଚୀପୁରୀମଣ୍ଡନଂ
ପର୍ୟାୟଚ୍ଛଵି ପାକଶାସନମଣେଃ ପୌଷ୍ପେଷଵଂ ପୌରୁଷମ୍ ॥ ୧୬ ॥
ଆଲୋକେ ମୁଖପଙ୍କଜେ ଚ ଦଧତୀ ସୌଧାକରୀଂ ଚାତୁରୀଂ
ଚୂଡାଲଂକ୍ରିୟମାଣପଙ୍କଜଵନୀଵୈରାଗମପ୍ରକ୍ରିୟା ।
ମୁଗ୍ଧସ୍ମେରମୁଖୀ ଘନ୍ସତନତଟୀମୂର୍ଚ୍ଛାଲମଧ୍ୟାଞ୍ଚିତା
କାଞ୍ଚୀସୀମନି କାମିନୀ ଵିଜୟତେ କାଚିଜ୍ଜଗନ୍ମୋହିନୀ ॥ ୧୭ ॥
ୟସ୍ମିନ୍ନମ୍ବ ଭଵତ୍କଟାକ୍ଷରଜନୀ ମନ୍ଦେଽପି ମନ୍ଦସ୍ମିତ-
ଜ୍ୟୋତ୍ସ୍ନାସଂସ୍ନପିତା ଭଵତ୍ୟଭିମୁଖୀ ତଂ ପ୍ରତ୍ୟହୋ ଦେହିନମ୍ ।
ଦ୍ରକ୍ଷାମାକ୍ଷିକମାଧୁରୀମଦଭରଵ୍ରୀଡାକରୀ ଵୈଖରୀ
କାମାକ୍ଷି ସ୍ଵୟମାତନୋତ୍ୟଭିସୃତିଂ ଵାମେକ୍ଷଣେଵ କ୍ଷଣମ୍ ॥ ୧୮ ॥
କାଲିନ୍ଦୀଜଲକାନ୍ତୟଃ ସ୍ମିତରୁଚିସ୍ଵର୍ଵାହିନୀପାଥସି
ପ୍ରୌଢଧ୍ଵାନ୍ତରୁଚଃ ସ୍ଫୁଟାଧରମହୋଲୌହିତ୍ୟସନ୍ଧ୍ୟୋଦୟେ ।
ମଣିକ୍ୟୋପଲକୁଣ୍ଡଲାଂଶୁଶିଖିନି ଵ୍ୟାମିଶ୍ରଧୂମଶ୍ରିୟଃ
କଲ୍ୟାଣୈକଭୁଵଃ କଟାକ୍ଷସୁଷମାଃ କାମାକ୍ଷି ରାଜନ୍ତି ତେ ॥ ୧୯ ॥
କଲକଲରଣତ୍କାଞ୍ଚୀ କାଞ୍ଚୀଵିଭୂଷଣମାଲିକା
କଚଭରଲସଚ୍ଚନ୍ଦ୍ରା ଚନ୍ଦ୍ରାଵତଂସସଧର୍ମିଣୀ ।
କଵିକୁଲଗିର୍ଃ ଶ୍ରାଵଂଶ୍ରାଵଂ ମିଲତ୍ପୁଲକାଂକୁରା
ଵିରଚିତଶିରଃକମ୍ପା କମ୍ପାତଟେ ପରିଶୋଭତେ ॥ ୨୦ ॥
ସରସଵଚସାଂ ଵୀଚୀ ନୀଚୀଭଵନ୍ମଧୁମାଧୁରୀ
ଭରିତଭୁଵନା କୀର୍ତିର୍ମୂର୍ତିର୍ମନୋଭଵଜିତ୍ଵରୀ ।
ଜନନି ମନସୋ ୟୋଗ୍ୟଂ ଭୋଗ୍ୟଂ ନୃଣାଂ ତଵ ଜାୟତେ
କଥମିଵ ଵିନା କାଞ୍ଚୀଭୂଷେ କଟାକ୍ଷତରଙ୍ଗିତମ୍ ॥ ୨୧ ॥
ଭ୍ରମରିତସରିତ୍କୂଲୋ ନୀଲୋତ୍ପଲପ୍ରଭୟାଽଽଭୟା
ନତଜନତମଃଖଣ୍ଡୀ ତୁଣ୍ଡୀରସୀମ୍ନି ଵିଜୃମ୍ଭତେ ।
ଅଚଲତପସାମେକଃ ପାକଃ ପ୍ରସୂନଶରାସନ-
ପ୍ରତିଭଟମନୋହାରୀ ନାରୀକୁଲୈକଶିଖାମଣିଃ ॥ ୨୨ ॥
ମଧୁରଵଚସୋ ମନ୍ଦସ୍ମେରା ମତଙ୍ଗଜଗାମିନଃ
ତରୁଣିମଜୁଷସ୍ତାପିଚ୍ଛାଭାସ୍ତମଃପରିପନ୍ଥିନଃ ।
କୁଚଭରନତାଃ କୁର୍ୟୁର୍ଭଦ୍ରଂ କୁରଙ୍ଗଵିଲୋଚନାଃ
କଲିତକରୁଣାଃ କାଞ୍ଚୀଭାଜଃ କପାଲିମହୋତ୍ସଵାଃ ॥ ୨୩ ॥
କମଲସୁଷମାକ୍ଷ୍ୟାରୋହେ ଵିଚକ୍ଷଣଵୀକ୍ଷଣାଃ
କୁମୁଦସୁକୃତକ୍ରୀଡାଚୂଡାଲକୁନ୍ତଲବନ୍ଧୁରାଃ ।
ରୁଚିରରୁଚିଭିସ୍ତାପିଚ୍ଛଶ୍ରୀପ୍ରପଞ୍ଚନଚୁଞ୍ଚଵଃ
ପୁରଵିଜୟିନଃ କମ୍ପାତୀରେ ସ୍ଫୁରନ୍ତି ମନୋରଥାଃ ॥ ୨୪ ॥
କଲିତରତୟଃ କାଞ୍ଚୀଲୀଲାଵିଧୌ କଵିମଣ୍ଡଲୀ-
ଵଚନଲହରୀଵାସନ୍ତୀନାଂ ଵସନ୍ତଵିଭୂତୟଃ ।
କୁଶଲଵିଧୟେ ଭୂୟାସୁର୍ମେ କୁରଙ୍ଗଵିଲୋଚନାଃ
କୁସୁମଵିଶିଖାରାତେରକ୍ଷ୍ଣାଂ କୁତୂହଲଵିଭ୍ରମାଃ ॥ ୨୫ ॥
କବଲିତତମସ୍କାଣ୍ଡାସ୍ତୁଣ୍ଡୀରମଣ୍ଡଲମଣ୍ଡନାଃ
ସରସିଜଵନୀସନ୍ତାନାନାମରୁନ୍ତୁଦଶେଖରାଃ ।
ନୟନସରଣେର୍ନେଦୀୟଂସଃ କଦା ନୁ ଭଵନ୍ତି ମେ
ତରୁଣଜଲଦଶ୍ୟାମାଃ ଶମ୍ଭୋସ୍ତପଃଫଲଵିଭ୍ରମାଃ ॥ ୨୬ ॥
ଅଚରମମିଷୁଂ ଦୀନଂ ମୀନଧ୍ଵଜସ୍ୟ ମୁଖଶ୍ରିୟା
ସରସିଜଭୁଵୋ ୟାନଂ ମ୍ଲାନଂ ଗତେନ ଚ ମଞ୍ଜୁନା ।
ତ୍ରିଦଶସଦସାମନ୍ନଂ ଖିନ୍ନଂ ଗିରା ଚ ଵିତନ୍ଵତୀ
ତିଲକୟତି ସା କମ୍ପାତୀରଂ ତ୍ରିଲୋଚନସୁନ୍ଦରୀ ॥ ୨୭ ॥
ଜନନି ଭୁଵନେ ଚଙ୍କ୍ରମ୍ୟେଽହଂ କିୟନ୍ତମନେହସଂ
କୁପୁରୁଷକରଭ୍ରଷ୍ଟୈର୍ଦୁଷ୍ଟୈର୍ଧନୈରୁଦରମ୍ଭରିଃ ।
ତରୁଣକରୁଣେ ତନ୍ଦ୍ରାଶୂନ୍ୟେ ତରଙ୍ଗୟ ଲୋଚନେ
ନମତି ମୟି ତେ କିଂଚିତ୍କାଞ୍ଚୀପୁରୀମଣିଦୀପିକେ ॥ ୨୮ ॥
ମୁନିଜନମନଃପେଟୀରତ୍ନଂ ସ୍ଫୁରତ୍କରୁଣାନଟୀ-
ଵିହରଣକଲାଗେହଂ କାଞ୍ଚୀପୁରୀମଣିଭୂଷଣମ୍ ।
ଜଗତି ମହତୋ ମୋହଵ୍ୟାଧେର୍ନୃଣାଂ ପରମୌଷଧଂ
ପୁରହରଦୃଶାଂ ସାଫଲ୍ୟଂ ମେ ପୁରଃ ପରିଜୃମ୍ଭତାମ୍ ॥ ୨୯ ॥
ମୁନିଜନମୋଧାମ୍ନେ ଧାମ୍ନେ ଵଚୋମୟଜାହ୍ନଵୀ-
ହିମଗିରିତଟପ୍ରାଗ୍ଭାରାୟାକ୍ଷରାୟ ପରାତ୍ମନେ ।
ଵିହରଣଜୁଷେ କାଞ୍ଚୀଦେଶେ ମହେଶ୍ଵରଲୋଚନ-
ତ୍ରିତୟସରସକ୍ରୀଡାସୌଧାଙ୍ଗଣାୟ ନମୋ ନମଃ ॥ ୩୦ ॥
ମରକତରୁଚାଂ ପ୍ରତ୍ୟାଦେଶଂ ମହେଶ୍ଵରଚକ୍ଷୁଷାମ୍
ଅମୃତଲହରୀପୂରଂ ପାରଂ ଭଵାଖ୍ୟପୟୋନିଧେଃ ।
ସୁଚରିତଫଲଂ କାଞ୍ଚୀଭାଜୋ ଜନସ୍ୟ ପଚେଲିମଂ
ହିମଶିଖରିଣୋ ଵଂଶସ୍ୟୈକଂ ଵତଂସମୁପାସ୍ମହେ ॥ ୩୧ ॥
ପ୍ରଣମନଦିନାରମ୍ଭେ କମ୍ପାନଦୀସଖି ତାଵକେ
ସରସକଵିତୋନ୍ମେଷଃ ପୂଷା ସତାଂ ସମୁଦଞ୍ଚିତଃ ।
ପ୍ରତିଭଟମହାପ୍ରୌଢପ୍ରୋଦ୍ୟତ୍କଵିତ୍ଵକୁମୁଦ୍ଵତୀଂ
ନୟତି ତରସା ନିଦ୍ରାମୁଦ୍ରାଂ ନଗେଶ୍ଵରକନ୍ୟକେ ॥ ୩୨ ॥
ଶମିତଜଡିମାରମ୍ଭା କମ୍ପାତଟୀନିକଟେଚରୀ
ନିହତଦୁରିତସ୍ତୋମା ସୋମାର୍ଧମୁଦ୍ରିତକୁନ୍ତଲା ।
ଫଲିତସୁମନୋଵାଞ୍ଛା ପାଞ୍ଚାୟୁଧୀ ପରଦେଵତା
ସଫଲୟତୁ ମେ ନେତ୍ରେ ଗୋତ୍ରେଶ୍ଵରପ୍ରିୟନନ୍ଦିନୀ ॥ ୩୩ ॥
ମମ ତୁ ଧିଷଣା ପୀଡ୍ୟା ଜାଡ୍ୟାତିରେକ କଥଂ ତ୍ଵୟା
କୁମୁଦସୁଷମାମୈତ୍ରୀପାତ୍ରୀଵତଂସିତକୁନ୍ତଲାମ୍ ।
ଜଗତି ଶମିତସ୍ତମ୍ଭାଂ କମ୍ପାନଦୀନିଲୟାମସୌ
ଶ୍ରିୟତି ହି ଗଲତ୍ତନ୍ଦ୍ରା ଚନ୍ଦ୍ରାଵତଂସସଧର୍ମିଣୀମ୍ ॥ ୩୪ ॥
ପରିମଲପରୀପାକୋଦ୍ରେକଂ ପୟୋମୁଚି କାଞ୍ଚନେ
ଶିଖରିଣି ପୁନର୍ଦ୍ବୈଧୀଭାଵଂ ଶଶିନ୍ୟରୁଣାତପମ୍ ।
ଅପି ଚ ଜନୟନ୍କମ୍ବୋର୍ଲକ୍ଷ୍ମୀମନମ୍ବୁନି କୋଽପ୍ୟସୌ
କୁସୁମଧନୁଷଃ କାଞ୍ଚୀଦେଶେ ଚକାସ୍ତି ପରାକ୍ରମଃ ॥ ୩୫ ॥
ପୁରଦମୟିତୁର୍ଵାମୋତ୍ସଙ୍ଗସ୍ଥଲେନ ରସଜ୍ଞୟା
ସରସକଵିତାଭାଜା କାଞ୍ଚୀପୁରୋଦରସୀମୟା ।
ତଟପରିସରୈର୍ନୀହାରାଦ୍ରେର୍ଵଚୋଭିରକୃତ୍ରିମୈଃ
କିମିଵ ନ ତୁଲାମସ୍ମଚ୍ଚେତୋ ମହେଶ୍ଵରି ଗାହତେ ॥ ୩୬ ॥
ନୟନୟୁଗଲୀମାସ୍ମାକୀନାଂ କଦା ନୁ ଫଲେଗ୍ରହୀଂ
ଵିଦଧତି ଗତୌ ଵ୍ୟାକୁର୍ଵାଣା ଗଜେନ୍ଦ୍ରଚମତ୍କ୍ରିୟାମ୍ ।
ମରତକରୁଚୋ ମାହେଶାନା ଘନସ୍ତନନମ୍ରିତାଃ
ସୁକୃତଵିଭଵାଃ ପ୍ରାଞ୍ଚଃ କାଞ୍ଚୀଵତଂସଧୁରନ୍ଧରାଃ ॥ ୩୭ ॥
ମନସିଜୟଶଃପାରମ୍ପର୍ୟଂ ମରନ୍ଦଝରୀସୁଵାଂ
କଵିକୁଲଗିରାଂ କନ୍ଦଂ କମ୍ପାନଦୀତଟମଣ୍ଡନମ୍ ।
ମଧୁରଲଲିତଂ ମତ୍କଂ ଚକ୍ଷୁର୍ମନୀଷିମନୋହରଂ
ପୁରଵିଜୟିନଃ ସର୍ଵସ୍ଵଂ ତତ୍ପୁରସ୍କୁରୁତେ କଦା ॥ ୩୮ ॥
ଶିଥିଲିତତମୋଲୀଲାଂ ନୀଲାରଵିନ୍ଦଵିଲୋଚନାଂ
ଦହନଵିଲସତ୍ଫାଲାଂ ଶ୍ରୀକାମକୋଟିମୁପାସ୍ମହେ ।
କରଧୃତସଚ୍ଛୂଲାଂ କାଲାରିଚିତ୍ତହରାଂ ପରାଂ
ମନସିଜକୃପାଲୀଲାଂ ଲୋଲାଲକାମଲିକେକ୍ଷଣାମ୍ ॥ ୩୯ ॥
କଲାଲୀଲାଶାଲା କଵିକୁଲଵଚଃକୈରଵଵନୀ-
ଶରଜ୍ଜ୍ୟୋତ୍ସ୍ନାଧାରା ଶଶଧରଶିଶୁଶ୍ଲାଘ୍ୟମୁକୁଟୀ ।
ପୁନୀତେ ନଃ କମ୍ପାପୁଲିନତଟସୌହାର୍ଦତରଲା
କଦା ଚକ୍ଷୁର୍ମାର୍ଗଂ କନକଗିରିଧାନୁଷ୍କମହିଷୀ ॥ ୪୦ ॥
ନମଃ ସ୍ତାନ୍ନମ୍ରେଭ୍ୟଃ ସ୍ତନଗରିମଗର୍ଵେଣ ଗୁରୁଣା
ଦଧାନେଭ୍ୟଶ୍ଚୂଡାଭରଣମମୃତସ୍ୟନ୍ଦି ଶିଶିରମ୍ ।
ସଦା ଵାସ୍ତଵେଭ୍ୟଃ ସୁଵିଧଭୁଵି କମ୍ପାଖ୍ୟସରିତେ
ୟଶୋଵ୍ୟାପାରେଭ୍ୟଃ ସୁକୃତଵିଭଵେଭ୍ୟୋ ରତିପତେଃ ॥ ୪୧ ॥
ଅସୂୟନ୍ତୀ କାଚିନ୍ମରକତରୁଚୋ ନାକିମୁକୁଟୀ-
କଦମ୍ବଂ ଚୁମ୍ବନ୍ତୀ ଚରଣନଖଚନ୍ଦ୍ରାଂଶୁପଟଲୈଃ ।
ତମୋମୁଦ୍ରାଂ ଵିଦ୍ରାଵୟତୁ ମମ କାଞ୍ଚୀର୍ନିଲୟନା
ହରୋତ୍ସଙ୍ଗଶ୍ରୀମନ୍ମଣିଗୃହମହାଦୀପକଲିକା ॥ ୪୨ ॥
ଅନାଦ୍ୟନ୍ତା କାଚିତ୍ସୁଜନନୟନାନନ୍ଦଜନନୀ
ନିରୁନ୍ଧାନା କାନ୍ତିଂ ନିଜରୁଚିଵିଲାସୈର୍ଜଲମୁଚାମ୍ ।
ସ୍ମରାରେସ୍ତାରଲ୍ୟଂ ମନସି ଜନୟନ୍ତୀ ସ୍ଵୟମହୋ
ଗଲତ୍କମ୍ପା ଶମ୍ପା ପରିଲସତି କମ୍ପାପରିସରେ ॥ ୪୩ ॥
ସୁଧାଡିଣ୍ଡୀରଶ୍ରୀଃ ସ୍ମିତରୁଚିଷୁ ତୁଣ୍ଡୀରଵିଷୟଂ
ପରିଷ୍କୁର୍ଵାଣାସୌ ପରିହସିତନୀଲୋତ୍ପଲରୁଚିଃ ।
ସ୍ତନାଭ୍ୟାମାନମ୍ରା ସ୍ତବକୟତୁ ମେ କାଙ୍କ୍ଷିତତରୁଂ
ଦୃଶାମୈଶାନୀନାଂ ସୁକୃତଫଲପାଣ୍ଡିତ୍ୟଗରିମା ॥ ୪୪ ॥
କୃପାଧାରାଦ୍ରୋଣୀ କୃପଣଧିଷଣାନାଂ ପ୍ରଣମତାଂ
ନିହନ୍ତ୍ରୀ ସନ୍ତାପଂ ନିଗମମୁକୁଟୋତ୍ତଂସକଲିକା ।
ପରା କାଞ୍ଚୀଲୀଲାପରିଚୟଵତୀ ପର୍ଵତସୁତା
ଗିରାଂ ନୀଵୀ ଦେଵୀ ଗିରିଶପରତନ୍ତ୍ରା ଵିଜୟତେ ॥ ୪୫ ॥
କଵିତ୍ଵଶ୍ରୀକନ୍ଦଃ ସୁକୃତପରିପାଟୀ ହିମଗିରେଃ
ଵିଧାତ୍ରୀ ଵିଶ୍ଵେଷାଂ ଵିଷମଶରଵୀରଧ୍ଵଜପଟୀ ।
ସଖୀ କମ୍ପାନଦ୍ୟାଃ ପଦହସିତପାଥୋଜୟୁଗଲୀ
ପୁରାଣୋ ପାୟାନ୍ନଃ ପୁରମଥନସାମ୍ରାଜ୍ୟପଦଵୀ ॥ ୪୬ ॥
ଦରିଦ୍ରାଣା ମଧ୍ୟେ ଦରଦଲିତତାପିଚ୍ଛସୁଷମାଃ
ସ୍ତନାଭୋଗକ୍କାନ୍ତାସ୍ତରୁଣହରିଣାଙ୍କାଙ୍କିତକଚାଃ ।
ହରାଧୀନା ନାନାଵିବୁଧମୁକୁଟୀଚୁମ୍ବିତପଦାଃ
କଦା କମ୍ପାତୀରେ କଥୟ ଵିହରାମୋ ଗିରିସୁତେ ॥ ୪୭ ॥
ଵରୀଵର୍ତୁ ସ୍ଥେମା ତ୍ଵୟି ମମ ଗିରାଂ ଦେଵି ମନସୋ
ନରୀନର୍ତୁ ପ୍ରୌଢା ଵଦନକମଲେ ଵାକ୍ୟଲହରୀ ।
ଚରୀଚର୍ତୁ ପ୍ରଜ୍ଞାଜନନି ଜଡିମାନଃ ପରଜନେ
ସରୀସର୍ତୁ ସ୍ଵୈରଂ ଜନନି ମୟି କାମାକ୍ଷି କରୁଣା ॥ ୪୮ ॥
କ୍ଷଣାତ୍ତେ କାମାକ୍ଷି ଭ୍ରମରସୁଷମାଶିକ୍ଷଣଗୁରୁଃ
କଟାକ୍ଷଵ୍ୟାକ୍ଷେପୋ ମମ ଭଵତୁ ମୋକ୍ଷାୟ ଵିପଦାମ୍ ।
ନରୀନର୍ତୁ ସ୍ଵୈରଂ ଵଚନଲହରୀ ନିର୍ଜରପୁରୀ-
ସରିଦ୍ଵୀଚୀନୀଚୀକରଣପଟୁରାସ୍ୟେ ମମ ସଦା ॥ ୪୯ ॥
ପୁରସ୍ତାନ୍ମେ ଭୂୟଃପ୍ରଶମନପରଃ ସ୍ତାନ୍ମମ ରୁଜାଂ
ପ୍ରଚାରସ୍ତେ କମ୍ପାତଟଵିହୃତିସମ୍ପାଦିନି ଦୃଶୋଃ ।
ଇମାଂ ୟାଚ୍ଞାମୂରୀକୁରୁ ସପଦି ଦୂରୀକୁରୁ ତମଃ-
ପରୀପାକଂ ମତ୍କଂ ସପଦି ବୁଧଲୋକଂ ଚ ନୟ ମାମ୍ ॥ ୫୦ ॥
ଉଦଞ୍ଚନ୍ତୀ କାଞ୍ଚୀନଗରନିଲୟେ ତ୍ଵତ୍କରୁଣୟା
ସମୃଦ୍ଧା ଵାଗ୍ଧାଟୀ ପରିହସିତମାଧ୍ଵୀ କଵୟତାମ୍ ।
ଉପାଦତ୍ତେ ମାରପ୍ରତିଭଟଜଟାଜୂଟମୁକୁଟୀ-
କୁଟୀରୋଲ୍ଲାସିନ୍ୟାଃ ଶତମଖତଟିନ୍ୟା ଜୟପଟୀମ୍ ॥ ୫୧ ॥
ଶ୍ରିୟଂ ଵିଦ୍ୟାଂ ଦଦ୍ୟାଜ୍ଜନନି ନମତାଂ କୀର୍ତିମମିତାଂ
ସୁପୁତ୍ରାନ୍ ପ୍ରାଦତ୍ତେ ତଵ ଝଟିତି କାମାକ୍ଷି କରୁଣା ।
ତ୍ରିଲୋକ୍ୟାମାଧିକ୍ୟଂ ତ୍ରିପୁରପରିପନ୍ଥିପ୍ରଣୟିନି
ପ୍ରଣାମସ୍ତ୍ଵତ୍ପାଦେ ଶମିତଦୁରିତେ କିଂ ନ କୁରୁତେ ॥ ୫୨ ॥
ମନଃସ୍ତମ୍ଭଂ ସ୍ତମ୍ଭଂ ଗମୟଦୁପକମ୍ପଂ ପ୍ରଣମତାଂ
ସଦା ଲୋଲଂ ନୀଲଂ ଚିକୁରଜିତଲୋଲମ୍ବନିକରମ୍ ।
ଗିରାଂ ଦୂରଂ ସ୍ମେରଂ ଧୃତଶଶିକିଶୋରଂ ପଶୁପତେଃ
ଦୃଶାଂ ୟୋଗ୍ୟଂ ଭୋଗ୍ୟଂ ତୁହିନଗିରିଭାଗ୍ୟଂ ଵିଜୟତେ ॥ ୫୩ ॥
ଘନଶ୍ୟାମାନ୍କାମାନ୍ତକମହିଷି କାମାକ୍ଷି ମଧୁରାନ୍
ଦୃଶାଂ ପାତାନେତାନମୃତଜଲଶୀତାନନୁପମାନ୍ ।
ଭଵୋତ୍ପାତେ ଭୀତେ ମୟି ଵିତର ନାଥେ ଦୃଢଭଵ-
ନ୍ମନଶ୍ଶୋକେ ମୂକେ ହିମଗିରିପତାକେ କରୁଣୟା ॥ ୫୪ ॥
ନତାନାଂ ମନ୍ଦାନାଂ ଭଵନିଗଲବନ୍ଧାକୁଲଧିୟାଂ
ମହାନ୍ଧ୍ୟାଂ ରୁନ୍ଧାନାମଭିଲଷିତସନ୍ତାନଲତିକାମ୍ ।
ଚରନ୍ତୀଂ କମ୍ପାୟାସ୍ତଟଭୁଵି ସଵିତ୍ରୀଂ ତ୍ରିଜଗତାଂ
ସ୍ମରାମସ୍ତାଂ ନିତ୍ୟଂ ସ୍ମରମଥନଜୀଵାତୁକଲିକାମ୍ ॥ ୫୫ ॥
ପରା ଵିଦ୍ୟା ହୃଦ୍ୟାଶ୍ରିତମଦନଵିଦ୍ୟା ମରକତ-
ପ୍ରଭାନୀଲା ଲୀଲାପରଵଶିତଶୂଲାୟୁଧମନାଃ ।
ତମଃପୂରଂ ଦୂରଂ ଚରଣନତପୌରନ୍ଦରପୁରୀ-
ମୃଗାକ୍ଷୀ କାମାକ୍ଷୀ କମଲତରଲାକ୍ଷୀ ନୟତୁ ମେ ॥ ୫୬ ॥
ଅହନ୍ତାଖ୍ୟା ମତ୍କଂ କବଲୟତି ହା ହନ୍ତ ହରିଣୀ
ହଠାତ୍ସଂଵିଦ୍ରୂପଂ ହରମହିଷି ସସ୍ୟାଙ୍କୁରମସୌ ।
କଟାକ୍ଷଵ୍ୟାକ୍ଷେପପ୍ରକଟହରିପାଷାଣପଟଲୈଃ
ଇମାମୁଚ୍ଚୈରୁଚ୍ଚାଟୟ ଝଟିତି କାମାକ୍ଷି କୃପୟା ॥ ୫୭ ॥
ବୁଧେ ଵା ମୂକେ ଵା ତଵ ପତତି ୟସ୍ମିନ୍କ୍ଷଣମସୌ
କଟାକ୍ଷଃ କାମାକ୍ଷି ପ୍ରକଟଜଡିମକ୍ଷୋଦପଟିମା ।
କଥଂକାରଂ ନାସ୍ମୈ କରମୁକୁଲଚୂଡାଲମୁକୁଟା
ନମୋଵାକଂ ବ୍ରୂୟୁର୍ନମୁଚିପରିପନ୍ଥିପ୍ରଭୃତୟଃ ॥ ୫୮ ॥
ପ୍ରତୀଚୀଂ ପଶ୍ୟାମଃ ପ୍ରକଟରୁଚିନୀଵାରକମଣି-
ପ୍ରଭାସଧ୍ରୀଚୀନାଂ ପ୍ରଦଲିତଷଡାଧାରକମଲାମ୍ ।
ଚରନ୍ତୀଂ ସୌଷୁମ୍ନେ ପଥି ପରପଦେନ୍ଦୁପ୍ରଵିଗଲ-
ତ୍ସୁଧାର୍ଦ୍ରାଂ କାମାକ୍ଷୀଂ ପରିଣତପରଂଜ୍ୟୋତିରୁଦୟାମ୍ ॥ ୫୯ ॥
ଜମ୍ଭାରାତିପ୍ରଭୃତିମୁକୁଟୀଃ ପାଦୟୋଃ ପୀଠୟନ୍ତୀ
ଗୁମ୍ଫାନ୍ଵାଚାଂ କଵିଜନକୃତାନ୍ସ୍ଵୈରମାରାମୟନ୍ତୀ ।
ଶମ୍ପାଲକ୍ଷ୍ମୀଂ ମଣିଗଣରୁଚାପାଟଲୈଃ ପ୍ରାପୟନ୍ତୀ
କମ୍ପାତୀରେ କଵିପରିଷଦାଂ ଜୃମ୍ଭତେ ଭାଗ୍ୟସୀମା ॥ ୬୦ ॥
ଚନ୍ଦ୍ରାପୀଡାଂ ଚତୁରଵଦନାଂ ଚଞ୍ଚଲାପାଙ୍ଗଲୀଲାଂ
କୁନ୍ଦସ୍ମେରାଂ କୁଚଭରନତାଂ କୁନ୍ତଲୋଦ୍ଧୂତଭୃଙ୍ଗାମ୍ ।
ମାରାରାତେର୍ମଦନଶିଖିନଂ ମାଂସଲଂ ଦୀପୟନ୍ତୀଂ
କାମାକ୍ଷୀଂ ତାଂ କଵିକୁଲଗିରାଂ କଲ୍ପଵଲ୍ଲୀମୁପାସେ ॥ ୬୧ ॥
କାଲାମ୍ଭୋଦପ୍ରକରସୁଷମାଂ କାନ୍ତିଭିସ୍ତିର୍ଜୟନ୍ତୀ
କଲ୍ୟାଣାନାମୁଦୟସରଣିଃ କଲ୍ପଵଲ୍ଲୀ କଵୀନାମ୍ ।
କନ୍ଦର୍ପାରେଃ ପ୍ରିୟସହଚରୀ କଲ୍ମଷାଣାଂ ନିହନ୍ତ୍ରୀ
କାଞ୍ଚୀଦେଶଂ ତିଲକୟତି ସା କାପି କାରୁଣ୍ୟସୀମା ॥ ୬୨ ॥
ଊରୀକୁର୍ଵନ୍ନୁରସିଜତଟେ ଚାତୁରୀଂ ଭୂଧରାଣାଂ
ପାଥୋଜାନାଂ ନୟନୟୁଗଲେ ପରିପନ୍ଥ୍ୟଂ ଵିତନ୍ଵନ୍ ।
କମ୍ପାତୀରେ ଵିହରତି ରୁଚା ମୋଘୟନ୍ମେଘଶୈଲୀଂ
କୋକଦ୍ଵେଷଂ ଶିରସି କଲୟନ୍କୋଽପି ଵିଦ୍ୟାଵିଶେଷଃ ॥ ୬୩ ॥
କାଞ୍ଚୀଲୀଲାପରିଚୟଵତୀ କାପି ତାପିଚ୍ଛଲକ୍ଷ୍ମୀଃ
ଜାଡ୍ୟାରଣ୍ୟେ ହୁତଵହଶିଖା ଜନ୍ମଭୂମିଃ କୃପାୟାଃ ।
ମାକନ୍ଦଶ୍ରୀର୍ମଧୁରକଵିତାଚାତୁରୀ କୋକିଲାନାଂ
ମାର୍ଗେ ଭୂୟାନ୍ମମ ନୟନୟୋର୍ମାନ୍ମଥୀ କାପି ଵିଦ୍ୟା ॥ ୬୪ ॥
ସେତୁର୍ମାତର୍ମରତକମୟୋ ଭକ୍ତିଭାଜାଂ ଭଵାବ୍ଧୌ
ଲୀଲାଲୋଲା କୁଵଲୟମୟୀ ମାନ୍ମଥୀ ଵୈଜୟନ୍ତୀ ।
କାଞ୍ଚୀଭୂଷା ପଶୁପତିଦୃଶାଂ କାପି କାଲାଞ୍ଜନାଲୀ
ମତ୍କଂ ଦୁଃଖଂ ଶିଥିଲୟତୁ ତେ ମଞ୍ଜୁଲାପାଙ୍ଗମାଲା ॥ ୬୫ ॥
ଵ୍ୟାଵୃଣ୍ଵାନାଃ କୁଵଲୟଦଲପ୍ରକ୍ରିୟାଵୈରମୁଦ୍ରାଂ
ଵ୍ୟାକୁର୍ଵାଣା ମନସିଜମହାରାଜସାମ୍ରାଜ୍ୟଲକ୍ଷ୍ମୀମ୍ ।
କାଞ୍ଚୀଲୀଲାଵିହୃତିରସିକେ କାଙ୍କ୍ଷିତଂ ନଃ କ୍ରିୟାସୁଃ
ବନ୍ଧଚ୍ଛେଦେ ତଵ ନିୟମିନାଂ ବଦ୍ଧଦୀକ୍ଷାଃ କଟାକ୍ଷାଃ ॥ ୬୬ ॥
କାଲାମ୍ଭୋଦେ ଶଶିରୁଚି ଦଲଂ କୈତକଂ ଦର୍ଶୟନ୍ତୀ
ମଧ୍ୟେସୌଦାମିନି ମଧୁଲିହାଂ ମାଲିକାଂ ରାଜୟନ୍ତୀ ।
ହଂସାରାଵଂ ଵିକଚକମଲେ ମଞ୍ଜୁମୁଲ୍ଲାସୟନ୍ତୀ
କମ୍ପାତୀରେ ଵିଲସତି ନଵା କାପି କାରୁଣ୍ୟଲକ୍ଷ୍ମୀଃ ॥ ୬୭ ॥
ଚିତ୍ରଂ ଚିତ୍ରଂ ନିଜମୃଦୁତୟା ଭର୍ତ୍ସୟନ୍ପଲ୍ଲଵାଲୀଂ
ପୁଂସାଂ କାମାନ୍ଭୁଵି ଚ ନିୟତଂ ପୂରୟନ୍ପୁଣ୍ୟଭାଜାମ୍ ।
ଜାତଃ ଶୈଲାନ୍ନ ତୁ ଜଲନିଧେଃ ସ୍ଵୈରସଂଚାରଶୀଲଃ
କାଞ୍ଚୀଭୂଷା କଲୟତୁ ଶିଵଂ କୋଽପି ଚିନ୍ତାମଣିର୍ମେ ॥ ୬୮ ॥
ତାମ୍ରାମ୍ଭୋଜଂ ଜଲଦନିକଟେ ତତ୍ର ବନ୍ଧୂକପୁଷ୍ପଂ
ତସ୍ମିନ୍ମଲ୍ଲୀକୁସୁମସୁଷମାଂ ତତ୍ର ଵୀଣାନିନାଦମ୍ ।
ଵ୍ୟାଵୃନ୍ଵାନା ସୁକୃତଲହରୀ କାପି କାଞ୍ଚିନଗର୍ୟାମ୍
ଐଶାନୀ ସା କଲୟତିତରାମୈନ୍ଦ୍ରଜାଲଂ ଵିଲାସମ୍ ॥ ୬୯ ॥
ଆହାରାଂଶଂ ତ୍ରିଦଶସଦସାମାଶ୍ରୟେ ଚାତକାନାମ୍
ଆକାଶୋପର୍ୟପି ଚ କଲୟନ୍ନାଲୟଂ ତୁଙ୍ଗମେଷାମ୍ ।
କମ୍ପାତୀରେ ଵିହରତିତରାଂ କାମଧେନୁଃ କଵୀନାଂ
ମନ୍ଦସ୍ମେରୋ ମଦନନିଗମପ୍ରକ୍ରିୟାସମ୍ପ୍ରଦାୟଃ ॥ ୭୦ ॥
ଆର୍ଦ୍ରୀଭୂତୈରଵିରଲକୃପୈରାତ୍ତଲୀଲାଵିଲାସୈଃ
ଆସ୍ଥାପୂର୍ଣୈରଧିକଚପଲୈରଞ୍ଚିତାମ୍ଭୋଜଶିଲ୍ପୈଃ ।
କାନ୍ତୈର୍ଲକ୍ଷ୍ମୀଲଲିତଭଵନୈଃ କାନ୍ତିକୈଵଲ୍ୟସାରୈଃ
କାଶ୍ମଲ୍ୟଂ ନଃ କବଲୟତୁ ସା କାମକୋଟୀ କଟାକ୍ଷୈଃ ॥ ୭୧ ॥
ଆଧୂନ୍ଵନ୍ତ୍ୟୈ ତରଲନୟନୈରାଙ୍ଗଜୀଂ ଵୈଜୟନ୍ତୀମ୍
ଆନନ୍ଦିନ୍ୟୈ ନିଜପଦଜୁଷାମାତ୍ତକାଞ୍ଚୀପୁରାୟୈ ।
ଆସ୍ମାକୀନଂ ହୃଦୟମଖିଲୈରାଗମାନାଂ ପ୍ରପଞ୍ଚୈଃ
ଆରାଧ୍ୟାୟୈ ସ୍ପୃହୟତିତରାମଦିମାୟୈ ଜନନ୍ୟୈ ॥ ୭୨ ॥
ଦୂରଂ ଵାଚାଂ ତ୍ରିଦଶସଦସାଂ ଦୁଃଖସିନ୍ଧୋସ୍ତରିତ୍ରଂ
ମୋହକ୍ଷ୍ଵେଲକ୍ଷିତିରୁହଵନେ କ୍ରୂରଧାରଂ କୁଠାରମ୍ ।
କମ୍ପାତୀରପ୍ରଣୟି କଵିଭିର୍ଵର୍ଣିତୋଦ୍ୟଚ୍ଚରିତ୍ରଂ
ଶାନ୍ତ୍ୟୈ ସେଵେ ସକଲଵିପଦାଂ ଶାଂକରଂ ତତ୍କଲତ୍ରମ୍ ॥ ୭୩ ॥
ଖଣ୍ଡୀକୃତ୍ୟ ପ୍ରକୃତିକୁଟିଲଂ କଲ୍ମଷଂ ପ୍ରାତିଭଶ୍ରୀ-
ଶୁଣ୍ଡୀରତ୍ଵଂ ନିଜପଦଜୁଷାଂ ଶୂନ୍ୟତନ୍ଦ୍ରଂ ଦିଶନ୍ତୀ ।
ତୁଣ୍ଡୀରାଖ୍ୟୈ ମହତି ଵିଷୟେ ସ୍ଵର୍ଣଵୃଷ୍ଟିପ୍ରଦାତ୍ରୀ
ଚଣ୍ଡୀ ଦେଵୀ କଲୟତି ରତିଂ ଚନ୍ଦ୍ରଚୂଡାଲଚୂଡେ ॥ ୭୪ ॥
ୟେନ ଖ୍ୟାତୋ ଭଵତି ସ ଗୃହୀ ପୂରୁଷୋ ମେରୁଧନ୍ଵା
ୟଦ୍ଦୃକ୍କୋଣେ ମଦନନିଗମପ୍ରାଭଵଂ ବୋଭଵୀତି ।
ୟତ୍ପ୍ରୀତ୍ୟୈଵ ତ୍ରିଜଗଦଧିପୋ ଜୃମ୍ଭତେ କିମ୍ପଚାନଃ
କମ୍ପାତୀରେ ସ ଜୟତି ମହାନ୍କଶ୍ଚିଦୋଜୋଵିଶେଷଃ ॥ ୭୫ ॥
ଧନ୍ୟା ଧନ୍ୟା ଗତିରିହ ଗିରାଂ ଦେଵି କାମାକ୍ଷି ୟନ୍ମେ
ନିନ୍ଦ୍ୟାଂ ଭିନ୍ଦ୍ୟାତ୍ସପଦି ଜଡତାଂ କଲ୍ମଷାଦୁନ୍ମିଷନ୍ତୀମ୍ ।
ସାଧ୍ଵୀ ମାଧ୍ଵୀରସମଧୁରତାଭଞ୍ଜିନୀ ମଞ୍ଜୁରୀତିଃ
ଵାଣୀଵେଣୀ ଝଟିତି ଵୃଣୁତାତ୍ସ୍ଵର୍ଧୁନୀସ୍ପର୍ଧିନୀ ମାମ୍ ॥ ୭୬ ॥
ୟସ୍ୟା ଵାଟୀ ହୃଦୟକମଲଂ କୌସୁମୀ ୟୋଗଭାଜାଂ
ୟସ୍ୟାଃ ପୀଠୀ ସତତଶିଶିରା ଶୀକରୈର୍ମାକରନ୍ଦୈଃ ।
ୟସ୍ୟାଃ ପେଟୀ ଶ୍ରୁତିପରିଚଲନ୍ମୌଲିରତ୍ନସ୍ୟ କାଞ୍ଚୀ
ସା ମେ ସୋମାଭରଣମହିଷୀ ସାଧୟେତ୍କାଙ୍କ୍ଷିତାନି ॥ ୭୭ ॥
ଏକା ମାତା ସକଲଜଗତାମୀୟୁଷୀ ଧ୍ୟାନମୁଦ୍ରାମ୍
ଏକାମ୍ରାଧୀଶ୍ଵରଚରଣୟୋରେକତାନାଂ ସମିନ୍ଧେ ।
ତାଟଙ୍କୋଦ୍ୟନ୍ମଣିଗଣରୁଚା ତାମ୍ରକର୍ଣପ୍ରଦେଶା
ତାରୁଣ୍ୟଶ୍ରୀସ୍ତବକିତତନୁସ୍ତାପସୀ କାପି ବାଲା ॥ ୭୮ ॥
ଦନ୍ତାଦନ୍ତିପ୍ରକଟନକରୀ ଦନ୍ତିଭିର୍ମନ୍ଦୟାନୈଃ
ମନ୍ଦାରାଣାଂ ମଦପରିଣତିଂ ମଥ୍ନତୀ ମନ୍ଦହାସୈଃ ।
ଅଙ୍କୂରାଭ୍ୟାଂ ମନସିଜତରୋରଙ୍କିତୋରାଃ କୁଚାଭ୍ୟା-
ମନ୍ତଃକାଞ୍ଚି ସ୍ଫୁରତି ଜଗତାମାଦିମା କାପି ମାତା ॥ ୭୯ ॥
ତ୍ରିୟମ୍ବକକୁଟୁମ୍ବିନୀଂ ତ୍ରିପୁରସୁନ୍ଦରୀମିନ୍ଦିରାଂ
ପୁଲିନ୍ଦପତିସୁନ୍ଦରୀଂ ତ୍ରିପୁରଭୈରଵୀଂ ଭାରତୀମ୍ ।
ମତଙ୍ଗକୁଲନାୟିକାଂ ମହିଷମର୍ଦନୀଂ ମାତୃକାଂ
ଭଣନ୍ତି ଵିବୁଧୋତ୍ତମା ଵିହୃତିମେଵ କାମାକ୍ଷି ତେ ॥ ୮୦ ॥
ମହାମୁନିମନୋନଟୀ ମହିତରମ୍ୟକମ୍ପାତଟୀ-
କୁଟୀରକଵିହାରିଣୀ କୁଟିଲବୋଧସଂହାରିଣୀ ।
ସଦା ଭଵତୁ କାମିନୀ ସକଲଦେହିନାଂ ସ୍ଵାମିନୀ
କୃପାତିଶୟକିଂକରୀ ମମ ଵିଭୂତୟେ ଶାଂକରୀ ॥ ୮୧ ॥
ଜଡାଃ ପ୍ରକୃତିନିର୍ଧନା ଜନଵିଲୋଚନାରୁନ୍ତୁଦା
ନରା ଜନନି ଵୀକ୍ଷଣଂ କ୍ଷଣମଵାପ୍ୟ କାମାକ୍ଷି ତେ ।
ଵଚସ୍ସୁ ମଧୁମାଧୁରୀଂ ପ୍ରକଟୟନ୍ତି ପୌରନ୍ଦରୀ-
ଵିଭୂତିଷୁ ଵିଡମ୍ବନାଂ ଵପୁଷି ମାନ୍ମଥୀଂ ପ୍ରକ୍ରିୟାମ୍ ॥ ୮୨ ॥
ଘନ୍ସତନତଟସ୍ଫୁଟସ୍ଫୁରିତକଞ୍ଚୁଲୀଚଞ୍ଚଲୀ-
କୃତତ୍ରିପୁରଶାସନା ସୁଜନଶୀଲିତୋପାସନା ।
ଦୃଶୋଃ ସରଣିମଶ୍ନୁତେ ମମ କଦା ନୁ କାଞ୍ଚୀପୁରେ
ପରା ପରମୟୋଗିନାଂ ମନସି ଚିତ୍କୁଲା ପୁଷ୍କଲା ॥ ୮୩ ॥
କଵୀନ୍ଦ୍ରହୃଦୟେଚରୀ ପରିଗୃହୀତକାଞ୍ଚୀପୁରୀ
ନିରୂଢକରୁଣାଝରୀ ନିଖିଲଲୋକରକ୍ଷାକରୀ ।
ମନଃପଥଦଵୀୟସୀ ମଦନଶାସନପ୍ରେୟସୀ
ମହାଗୁଣଗରୀୟସୀ ମମ ଦୃଶୋଽସ୍ତୁ ନେଦୀୟସୀ ॥ ୮୪ ॥
ଧନେନ ନ ରମାମହେ ଖଲଜନାନ୍ନ ସେଵାମହେ
ନ ଚାପଲମୟାମହେ ଭଵଭୟାନ୍ନ ଦୂୟାମହେ ।
ସ୍ଥିରାଂ ତନୁମହେତରାଂ ମନସି କିଂ ଚ କାଞ୍ଚୀରତ-
ସ୍ମରାନ୍ତକକୁଟୁମ୍ବିନୀଚରଣପଲ୍ଲଵୋପାସନାମ୍ ॥ ୮୫ ॥
ସୁରାଃ ପରିଜନା ଵପୁର୍ମନସିଜାୟ ଵୈରାୟତେ
ତ୍ରିଵିଷ୍ଟପନିତମ୍ବିନୀକୁଚତଟୀ ଚ କେଲୀଗିରିଃ ।
ଗିରଃ ସୁରଭୟୋ ଵୟସ୍ତରୁଣିମା ଦରିଦ୍ରସ୍ୟ ଵା
କଟାକ୍ଷସରଣୌ କ୍ଷଣଂ ନିପତିତସ୍ୟ କାମାକ୍ଷି ତେ ॥ ୮୬ ॥
ପଵିତ୍ରୟ ଜଗତ୍ତ୍ରୟୀଵିବୁଧବୋଧଜୀଵାତୁଭିଃ
ପୁରତ୍ରୟଵିମର୍ଦିନଃ ପୁଲକକଞ୍ଚୁଲୀଦାୟିଭିଃ ।
ଭଵକ୍ଷୟଵିଚକ୍ଷଣୈର୍ଵ୍ୟସନମୋକ୍ଷଣୈର୍ଵୀକ୍ଷଣୈଃ
ନିରକ୍ଷରଶିରୋମଣିଂ କରୁଣୟୈଵ କାମାକ୍ଷି ମାମ୍ ॥ ୮୭ ॥
କଦା କଲିତଖେଲନାଃ କରୁଣୟୈଵ କାଞ୍ଚୀପୁରେ
କଲାୟମୁକୁଲତ୍ଵିଷଃ ଶୁଭକଦମ୍ବପୂର୍ଣାଙ୍କୁରାଃ ।
ପୟୋଧରଭରାଲସାଃ କଵିଜନେଷୁ ତେ ବନ୍ଧୁରାଃ
ପଚେଲିମକୃପାରସା ପରିପତନ୍ତି ମାର୍ଗେ ଦୃଶୋଃ ॥ ୮୮ ॥
ଅଶୋଧ୍ୟମଚଲୋଦ୍ଭଵଂ ହୃଦୟନନ୍ଦନଂ ଦେହିନାମ୍
ଅନର୍ଘମଧିକାଞ୍ଚି ତତ୍କିମପି ରତ୍ନମୁଦ୍ଦ୍ୟୋତତେ ।
ଅନେନ ସମଲଂକୃତା ଜୟତି ଶଙ୍କରାଙ୍କସ୍ଥଲୀ
କଦାସ୍ୟ ମମ ମାନସଂ ଵ୍ରଜତି ପେଟିକାଵିଭ୍ରମମ୍ ॥ ୮୯ ॥
ପରାମୃତଝରୀପ୍ଲୁତା ଜୟତି ନିତ୍ୟମନ୍ତଶ୍ଚରୀ
ଭୁଵାମପି ବହିଶ୍ଚରୀ ପରମସଂଵିଦେକାତ୍ମିକା ।
ମହଦ୍ଭିରପରୋକ୍ଷିତା ସତତମେଵ କାଞ୍ଚୀପୁରେ
ମମାନ୍ଵହମହଂମତିର୍ମନସି ଭାତୁ ମାହେଶ୍ଵରୀ ॥ ୯୦ ॥
ତମୋଵିପିନଧାଵିନଂ ସତତମେଵ କାଞ୍ଚୀପୁରେ
ଵିହାରରସିକା ପରା ପରମସଂଵିଦୁର୍ଵୀରୁହେ ।
କଟାକ୍ଷନିଗଲୈର୍ଦୃଢଂ ହୃଦୟଦୁଷ୍ଟଦନ୍ତାଵଲଂ
ଚିରଂ ନୟତୁ ମାମକଂ ତ୍ରିପୁରଵୈରିସୀମନ୍ତିନୀ ॥ ୯୧ ॥
ତ୍ଵମେଵ ସତି ଚଣ୍ଡିକା ତ୍ଵମସି ଦେଵି ଚାମୁଣ୍ଡିକା
ତ୍ଵମେଵ ପରମାତୃକା ତ୍ଵମପି ୟୋଗିନୀରୂପିଣୀ ।
ତ୍ଵମେଵ କିଲ ଶାମ୍ଭଵୀ ତ୍ଵମସି କାମକୋଟୀ ଜୟା
ତ୍ଵମେଵ ଵିଜୟା ତ୍ଵୟି ତ୍ରିଜଗଦମ୍ବ କିଂ ବ୍ରୂମହେ ॥ ୯୨ ॥
ପରେ ଜନନି ପାର୍ଵତି ପ୍ରଣତପାଲିନି ପ୍ରାତିଭ-
ପ୍ରଦାତ୍ରି ପରମେଶ୍ଵରି ତ୍ରିଜଗଦାଶ୍ରିତେ ଶାଶ୍ଵତେ ।
ତ୍ରିୟମ୍ବକକୁଟୁମ୍ବିନି ତ୍ରିପଦସଙ୍ଗିନି ତ୍ରୀକ୍ଷଣେ
ତ୍ରିଶକ୍ତିମୟି ଵୀକ୍ଷଣଂ ମୟି ନିଧେହି କାମାକ୍ଷି ତେ ॥ ୯୩ ॥
ମନୋମଧୁକରୋତ୍ସଵଂ ଵିଦଧତୀ ମନୀଷାଜୁଷାଂ
ସ୍ଵୟମ୍ପ୍ରଭଵଵୈଖରୀଵିପିନଵୀଥିକାଲମ୍ବିନୀ ।
ଅହୋ ଶିଶିରିତା କୃପାମଧୁରସେନ କମ୍ପାତଟେ
ଚରାଚରଵିଧାୟିନୀ ଚଲତି କାପି ଚିନ୍ମଞ୍ଜରୀ ॥ ୯୪ ॥
କଲାଵତି କଲାଭୃତୋ ମୁକୁଟସୀମ୍ନି ଲୀଲାଵତି
ସ୍ପୃହାଵତି ମହେଶ୍ଵରେ ଭୁଵନମୋହନେ ଭାସ୍ଵତି ।
ପ୍ରଭାଵତି ରମେ ସଦା ମହିତରୂପଶୋଭାଵତି
ତ୍ଵରାଵତି ପରେ ସତାଂ ଗୁରୁକୃପାମ୍ବୁଧାରାଵତି ॥ ୯୫ ॥
ତ୍ଵୟୈଵ ଜଗଦମ୍ବୟା ଭୁଵନମଣ୍ଡଲଂ ସୂୟତେ
ତ୍ଵୟୈଵ କରୁଣାର୍ଦ୍ରୟା ତଦପି ରକ୍ଷଣଂ ନୀୟତେ ।
ତ୍ଵୟୈଵ ଖରକୋପୟା ନୟନପାଵକେ ହୂୟତେ
ତ୍ଵୟୈଵ କିଲ ନିତ୍ୟୟା ଜଗତି ସନ୍ତତଂ ସ୍ଥୀୟତେ ॥ ୯୬ ॥
ଚରାଚରଜଗନ୍ମୟୀଂ ସକଲହୃନ୍ମୟୀଂ ଚିନ୍ମୟୀଂ
ଗୁଣତ୍ରୟମୟୀଂ ଜଗତ୍ତ୍ରୟମୟୀଂ ତ୍ରିଧାମାମୟୀମ୍ ।
ପରାପରମୟୀଂ ସଦା ଦଶଦିଶାଂ ନିଶାହର୍ମୟୀଂ
ପରାଂ ସତତସନ୍ମୟୀଂ ମନସି ଚିନ୍ମୟୀଂ ଶୀଲୟେ ॥ ୯୭ ॥
ଜୟ ଜଗଦମ୍ବିକେ ହରକୁଟୁମ୍ବିନି ଵକ୍ତ୍ରରୁଚା
ଜିତଶରଦମ୍ବୁଜେ ଘନଵିଡମ୍ବିନି କେଶରୁଚା ।
ପରମଵଲମ୍ବନଂ କୁରୁ ସଦା ପରରୂପଧରେ
ମମ ଗତସଂଵିଦୋ ଜଡିମଡମ୍ବରତାଣ୍ଡଵିନଃ ॥ ୯୮ ॥
ଭୁଵନଜନନି ଭୂଷାଭୂତଚନ୍ଦ୍ରେ ନମସ୍ତେ
କଲୁଷଶମନି କମ୍ପାତୀରଗେହେ ନମସ୍ତେ ।
ନିଖିଲନିଗମଵେଦ୍ୟେ ନିତ୍ୟରୂପେ ନମସ୍ତେ
ପରଶିଵମୟି ପାଶଚ୍ଛେଦହସ୍ତେ ନମସ୍ତେ ॥ ୯୯ ॥
କ୍ଵଣତ୍କାଞ୍ଚୀ କାଞ୍ଚୀପୁରମଣିଵିପଞ୍ଚୀଲୟଝରୀ-
ଶିରଃକମ୍ପା କମ୍ପାଵସତିରନୁକମ୍ପାଜଲନିଧିଃ ।
ଘନଶ୍ୟାମା ଶ୍ୟାମା କଠିନକୁଚସୀମା ମନସି ମେ
ମୃଗାକ୍ଷୀ କାମାକ୍ଷୀ ହରନଟନସାକ୍ଷୀ ଵିହରତାତ୍ ॥ ୧୦୦ ॥
ସମରଵିଜୟକୋଟୀ ସାଧକାନନ୍ଦଧାଟୀ
ମୃଦୁଗୁଣପରିପେଟୀ ମୁଖ୍ୟକାଦମ୍ବଵାଟୀ ।
ମୁନିନୁତପରିପାଟୀ ମୋହିତାଜାଣ୍ଡକୋଟୀ
ପରମଶିଵଵଧୂଟୀ ପାତୁ ମାଂ କାମକୋଟୀ ॥ ୧୦୧ ॥
ଇମଂ ପରଵରପ୍ରଦଂ ପ୍ରକୃତିପେଶଲଂ ପାଵନଂ
ପରାପରଚିଦାକୃତିପ୍ରକଟନପ୍ରଦୀପାୟିତମ୍ ।
ସ୍ତଵଂ ପଠତି ନିତ୍ୟଦା ମନସି ଭାଵୟନ୍ନମ୍ବିକାଂ
ଜପୈରଲମଲଂ ମଖୈରଧିକଦେହସଂଶୋଷଣୈଃ ॥ ୧୦୨ ॥
ସ୍ତୁତିଶତକଂ ସମ୍ପୂର୍ଣମ୍ ॥
॥ କଟାକ୍ଷଶତକମ୍ ॥
ମୋହାନ୍ଧକାରନିଵହଂ ଵିନିହନ୍ତୁମୀଡେ
ମୂକାତ୍ମନାମପି ମହାକଵିତାଵଦାନ୍ୟାନ୍ ।
ଶ୍ରୀକାଞ୍ଚିଦେଶଶିଶିରୀକୃତିଜାଗରୂକାନ୍
ଏକାମ୍ରନାଥତରୁଣୀକରୁଣାଵଲୋକାନ୍ ॥ ୧ ॥
ମାତର୍ଜୟନ୍ତି ମମତାଗ୍ରହମୋକ୍ଷଣାନି
ମାହେନ୍ଦ୍ରନୀଲରୁଚିଶିକ୍ଷଣଦକ୍ଷିଣାନି ।
କାମାକ୍ଷି କଲ୍ପିତଜଗତ୍ତ୍ରୟରକ୍ଷଣାନି
ତ୍ଵଦ୍ଵୀକ୍ଷଣାନି ଵରଦାନଵିଚକ୍ଷଣାନି ॥ ୨ ॥
ଆନଙ୍ଗତନ୍ତ୍ରଵିଧିଦର୍ଶିତକୌଶଲାନାମ୍
ଆନନ୍ଦମନ୍ଦପରିଘୂର୍ଣିତମନ୍ଥରାଣାମ୍ ।
ତାରଲ୍ୟମମ୍ବ ତଵ ତାଡିତକର୍ଣସୀମ୍ନାଂ
କାମାକ୍ଷି ଖେଲତି କଟାକ୍ଷନିରୀକ୍ଷଣାନାମ୍ ॥ ୩ ॥
କଲ୍ଲୋଲିତେନ କରୁଣାରସଵେଲ୍ଲିତେନ
କଲ୍ମାଷିତେନ କମନୀୟମୃଦୁସ୍ମିତେନ ।
ମାମଞ୍ଚିତେନ ତଵ କିଂଚନ କୁଞ୍ଚିତେନ
କାମାକ୍ଷି ତେନ ଶିଶିରୀକୁରୁ ଵୀକ୍ଷିତେନ ॥ ୪ ॥
ସାହାୟ୍ୟକଂ ଗତଵତୀ ମୁହୁରର୍ଜନସ୍ୟ
ମନ୍ଦସ୍ମିତସ୍ୟ ପରିତୋଷିତଭୀମଚେତାଃ ।
କାମାକ୍ଷି ପାଣ୍ଡଵଚମୂରିଵ ତାଵକୀନା
କର୍ଣାନ୍ତିକଂ ଚଲତି ହନ୍ତ କଟାକ୍ଷଲକ୍ଷ୍ମୀଃ ॥ ୫ ॥
ଅସ୍ତଂ କ୍ଷଣାନ୍ନୟତୁ ମେ ପରିତାପସୂର୍ୟମ୍
ଆନନ୍ଦଚନ୍ଦ୍ରମସମାନୟତାଂ ପ୍ରକାଶମ୍ ।
କାଲାନ୍ଧକାରସୁଷୁମାଂ କଲୟନ୍ଦିଗନ୍ତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥ ୬ ॥
ତାଟାଙ୍କମୌକ୍ତିକରୁଚାଙ୍କୁରଦନ୍ତକାନ୍ତିଃ
କାରୁଣ୍ୟହସ୍ତିପଶିଖାମଣିନାଧିରୂଢଃ ।
ଉନ୍ମୂଲୟତ୍ଵଶୁଭପାଦପମସ୍ମଦୀୟଂ
କାମାକ୍ଷି ତାଵକକଟାକ୍ଷମତଙ୍ଗଜେତନ୍ଦ୍ରଃ ॥ ୭ ॥
ଛାୟାଭରଣେ ଜଗତାଂ ପରିତାପହାରୀ
ତାଟଙ୍କରତ୍ନମଣିତଲ୍ଲଜପଲ୍ଲଵଶ୍ରୀଃ ।
କାରୁଣ୍ୟନାମ ଵିକିରନ୍ମକରନ୍ଦଜାଲଂ
କାମାକ୍ଷି ରାଜତି କଟାକ୍ଷସୁରଦ୍ରୁମସ୍ତେ ॥ ୮ ॥
ସୂର୍ୟାଶ୍ରୟପ୍ରଣୟିନୀ ମଣିକୁଣ୍ଡଲାଂଶୁ-
ଲୌହିତ୍ୟକୋକନଦକାନନମାନନୀୟା ।
ୟାନ୍ତୀ ତଵ ସ୍ମରହରାନନକାନ୍ତିସିନ୍ଧୁଂ
କାମାକ୍ଷି ରାଜତି କଟାକ୍ଷକଲିନ୍ଦକନ୍ୟା ॥ ୯ ॥
ପ୍ରାପ୍ନୋତି ୟଂ ସୁକୃତିନଂ ତଵ ପକ୍ଷପାତାତ୍
କାମାକ୍ଷି ଵୀକ୍ଷଣଵିଲାସକଲାପୁରନ୍ଧ୍ରୀ ।
ସଦ୍ୟସ୍ତମେଵ କିଲ ମୁକ୍ତିଵଧୂର୍ଵୃଣୀତେ
ତସ୍ମାନ୍ନିତାନ୍ତମନୟୋରିଦମୈକମତ୍ୟମ୍ ॥ ୧୦ ॥
ୟାନ୍ତୀ ସଦୈଵ ମରୁତାମନୁକୂଲଭାଵଂ
ଭ୍ରୂଵଲ୍ଲିଶକ୍ରଧନୁରୁଲ୍ଲସିତା ରସାର୍ଦ୍ରା ।
କାମାକ୍ଷି କୌତୁକତରଙ୍ଗିତନୀଲକଣ୍ଠା
କାଦମ୍ବିନୀଵ ତଵ ଭାତି କଟାକ୍ଷମାଲା ॥ ୧୧ ॥
ଗଙ୍ଗାମ୍ଭସି ସ୍ମିତମୟେ ତପନାତ୍ମଜେଵ
ଗଙ୍ଗାଧରୋରସି ନଵୋତ୍ପଲମାଲିକେଵ ।
ଵକ୍ତ୍ରପ୍ରଭାସରସି ଶୈଵଲମଣ୍ଡଲୀଵ
କାମାକ୍ଷି ରାଜତି କଟାକ୍ଷରୁଚିଚ୍ଛଟା ତେ ॥ ୧୨ ॥
ସଂସ୍କାରତଃ କିମପି କନ୍ଦଲିତାନ୍ ରସଜ୍ଞ-
କେଦାରସୀମ୍ନି ସୁଧିୟାମୁପଭୋଗୟୋଗ୍ୟାନ୍ ।
କଲ୍ୟାଣସୂକ୍ତିଲହରୀକଲମାଂକୁରାନ୍ନଃ
କାମାକ୍ଷି ପକ୍ଷ୍ମଲୟତୁ ତ୍ଵଦପାଙ୍ଗମେଘଃ ॥ ୧୩ ॥
ଚାଞ୍ଚଲ୍ୟମେଵ ନିୟତଂ କଲୟନ୍ପ୍ରକୃତ୍ୟା
ମାଲିନ୍ୟଭୂଃ ଶ୍ରତିପଥାକ୍ରମଜାଗରୂକଃ ।
କୈଵଲ୍ୟମେଵ କିମୁ କଲ୍ପୟତେ ନତାନାଂ
କାମାକ୍ଷି ଚିତ୍ରମପି ତେ କରୁଣାକଟାକ୍ଷଃ ॥ ୧୪ ॥
ସଂଜୀଵନେ ଜନନି ଚୂତଶିଲୀମୁଖସ୍ୟ
ସଂମୋହନେ ଶଶିକିଶୋରକଶେଖରସ୍ୟ ।
ସଂସ୍ତମ୍ଭନେ ଚ ମମତାଗ୍ରହଚେଷ୍ଟିତସ୍ୟ
କାମାକ୍ଷି ଵୀକ୍ଷଣକଲା ପରମୌଷଧଂ ତେ ॥ ୧୫ ॥
ନୀଲୋଽପି ରାଗମଧିକଂ ଜନୟନ୍ପୁରାରେଃ
ଲୋଲୋଽପି ଭକ୍ତିମଧିକାଂ ଦୃଢୟନ୍ନରାଣାମ୍ ।
ଵକ୍ରୋଽପି ଦେଵି ନମତାଂ ସମତାଂ ଵିତନ୍ଵନ୍
କାମାକ୍ଷି ନୃତ୍ୟତୁ ମୟି ତ୍ଵଦପାଙ୍ଗପାତଃ ॥ ୧୬ ॥
କାମଦ୍ରୁହୋ ହୃଦୟୟନ୍ତ୍ରଣଜାଗରୂକା
କାମାକ୍ଷି ଚଞ୍ଚଲଦୃଗଞ୍ଚଲମେଖଲା ତେ ।
ଆଶ୍ଚର୍ୟମମ୍ବ ଭଜତାଂ ଝଟିତି ସ୍ଵକୀୟ-
ସମ୍ପର୍କ ଏଵ ଵିଧୁନୋତି ସମସ୍ତବନ୍ଧାନ୍ ॥ ୧୭ ॥
କୁଣ୍ଠୀକରୋତୁ ଵିପଦଂ ମମ କୁଞ୍ଚିତଭ୍ରୂ-
ଚାପାଞ୍ଚିତଃ ଶ୍ରିତଵିଦେହଭଵାନୁରାଗଃ ।
ରକ୍ଷୋପକାରମନିଶଂ ଜନୟଞ୍ଜଗତ୍ୟାଂ
କାମାକ୍ଷି ରାମ ଇଵ ତେ କରୁଣାକଟାକ୍ଷଃ ॥ ୧୮ ॥
ଶ୍ରୀକାମକୋଟି ଶିଵଲୋଚନଶୋଷିତସ୍ୟ
ଶୃଙ୍ଗାରବୀଜଵିଭଵସ୍ୟ ପୁନଃପ୍ରରୋହେ ।
ପ୍ରେମାମ୍ଭସାର୍ଦ୍ରମଚିରାତ୍ପ୍ରଚୁରେଣ ଶଙ୍କେ
କେଦାରମମ୍ବ ତଵ କେଵଲଦୃଷ୍ଟିପାତମ୍ ॥ ୧୯ ॥
ମାହାତ୍ମ୍ୟଶେଵଧିରସୌ ତଵ ଦୁର୍ଵିଲଙ୍ଘ୍ୟ-
ସଂସାରଵିନ୍ଧ୍ୟଗିରିକୁଣ୍ଠନକେଲିଚୁଞ୍ଚୁଃ ।
ଧୈର୍ୟାମ୍ବୁଧିଂ ପଶୁପତେଶ୍ଚୁଲକୀକରୋତି
କାମାକ୍ଷି ଵୀକ୍ଷଣଵିଜୃମ୍ଭଣକୁମ୍ଭଜନ୍ମା ॥ ୨୦ ॥
ପୀୟୂଷଵର୍ଷଵଶିଶିରା ସ୍ଫୁଟଦୁତ୍ପଲଶ୍ରୀ-
ମୈତ୍ରୀ ନିସର୍ଗମଧୁରା କୃତତାରକାପ୍ତିଃ ।
କାମାକ୍ଷି ସଂଶ୍ରିତଵତୀ ଵପୁରଷ୍ଟମୂର୍ତେଃ
ଜ୍ୟୋତ୍ସ୍ନାୟତେ ଭଗଵତି ତ୍ଵଦପାଙ୍ଗମାଲା ॥ ୨୧ ॥
ଅମ୍ବ ସ୍ମରପ୍ରତିଭଟସ୍ୟ ଵପୁର୍ମନୋଜ୍ଞମ୍
ଅମ୍ଭୋଜକାନନମିଵାଞ୍ଚିତକଣ୍ଟକାଭମ୍ ।
ଭୃଙ୍ଗୀଵ ଚୁମ୍ବତି ସଦୈଵ ସପକ୍ଷପାତା
କାମାକ୍ଷି କୋମଲରୁଚିସ୍ତ୍ଵଦପାଙ୍ଗମାଲା ॥ ୨୨ ॥
କେଶପ୍ରଭାପଟଲନୀଲଵିତାନଜାଲେ
କାମାକ୍ଷି କୁଣ୍ଡଲମଣିଚ୍ଛଵିଦୀପଶୋଭେ ।
ଶଙ୍କେ କଟାକ୍ଷରୁଚିରଙ୍ଗତଲେ କୃପାଖ୍ୟା
ଶୈଲୂଷିକା ନଟତି ଶଂକରଵଲ୍ଲଭେ ତେ ॥ ୨୩ ॥
ଅତ୍ୟନ୍ତଶୀତଲମତନ୍ଦ୍ରୟତୁ କ୍ଷଣାର୍ଧମ୍
ଅସ୍ତୋକଵିଭ୍ରମମନଙ୍ଗଵିଲାସକନ୍ଦମ୍ ।
ଅଲ୍ପସ୍ମିତାଦୃତମପାରକୃପାପ୍ରଵାହମ୍
ଅକ୍ଷିପ୍ରରୋହମଚିରାନ୍ମୟି କାମକୋଟି ॥ ୨୪ ॥
ମନ୍ଦାକ୍ଷରାଗତରଲୀକୃତିପାରତନ୍ତ୍ର୍ୟାତ୍
କାମାକ୍ଷି ମନ୍ଥରତରାଂ ତ୍ଵଦପାଙ୍ଗଡୋଲାମ୍ ।
ଆରୁହ୍ୟ ମନ୍ଦମତିକୌତୁକଶାଲି ଚକ୍ଷୁଃ
ଆନନ୍ଦମେତି ମୁହୁରର୍ଧଶଶାଙ୍କମୌଲେଃ ॥ ୨୫ ॥
ତ୍ରୈୟମ୍ବକଂ ତ୍ରିପୁରସୁନ୍ଦରି ହର୍ମ୍ୟଭୂମି-
ରଙ୍ଗଂ ଵିହାରସରସୀ କରୁଣାପ୍ରଵାହଃ ।
ଦାସାଶ୍ଚ ଵାସଵମୁଖାଃ ପରିପାଲନୀୟଂ
କାମାକ୍ଷି ଵିଶ୍ଵମପି ଵୀକ୍ଷଣଭୂଭୃତସ୍ତେ ॥ ୨୬ ॥
ଵାଗୀଶ୍ଵରୀ ସହଚରୀ ନିୟମେନ ଲକ୍ଷ୍ମୀଃ
ଭ୍ରୂଵଲ୍ଲରୀଵଶକରୀ ଭୁଵନାନି ଗେହମ୍ ।
ରୂପଂ ତ୍ରିଲୋକନୟନାମୃତମମ୍ବ ତେଷାଂ
କାମାକ୍ଷି ୟେଷୁ ତଵ ଵୀକ୍ଷଣପାରତନ୍ତ୍ରୀ ॥ ୨୭ ॥
ମାହେଶ୍ଵରଂ ଝଟିତି ମାନସମୀନମମ୍ବ
କାମାକ୍ଷି ଧୈର୍ୟଜଲଧୌ ନିତରାଂ ନିମଗ୍ନମ୍ ।
ଜାଲେନ ଶୃଙ୍ଖଲୟତି ତ୍ଵଦପାଙ୍ଗନାମ୍ନା
ଵିସ୍ତାରିତେନ ଵିଷମାୟୁଧଦାଶକୋଽସୌ ॥ ୨୮ ॥
ଉନ୍ମଥ୍ୟ ବୋଧକମଲାକାରମମ୍ବ ଜାଡ୍ୟ-
ସ୍ତମ୍ବେରମଂ ମମ ମନୋଵିପିନେ ଭ୍ରମନ୍ତମ୍ ।
କୁଣ୍ଠୀକୁରୁଷ୍ଵ ତରସା କୁଟିଲାଗ୍ରସୀମ୍ନା
କାମାକ୍ଷି ତାଵକକଟାକ୍ଷମହାଙ୍କୁଶେନ ॥ ୨୯ ॥
ଉଦ୍ଵେଲ୍ଲିତସ୍ତବକିତୈର୍ଲଲିତୈର୍ଵିଲାସୈଃ
ଉତ୍ଥାୟ ଦେଵି ତଵ ଗାଢକଟାକ୍ଷକୁଞ୍ଜାତ୍ ।
ଦୂରଂ ପଲାୟୟତୁ ମୋହମୃଗୀକୁଲଂ ମେ
କାମାକ୍ଷି ସ୍ତଵରମନୁଗ୍ରହକେସରୀନ୍ଦ୍ରଃ ॥ ୩୦ ॥
ସ୍ନେହାଦୃତାଂ ଵିଦଲିତୋତ୍ପଲକନ୍ତିଚୋରାଂ
ଜେତାରମେଵ ଜଗଦୀଶ୍ଵରି ଜେତୁକାମଃ ।
ମାନୋଦ୍ଧତୋ ମକରକେତୁରସୌ ଧୁନୀତେ
କାମାକ୍ଷି ତାଵକକଟାକ୍ଷକୃପାଣଵଲ୍ଲୀମ୍ ॥ ୩୧ ॥
ଶ୍ରୌତୀଂ ଵ୍ରଜନ୍ନପି ସଦା ସରଣିଂ ମୁନୀନାଂ
କାମାକ୍ଷି ସନ୍ତତମପି ସ୍ମୃତିମାର୍ଗଗାମୀ ।
କୌଟିଲ୍ୟମମ୍ବ କଥମସ୍ଥିରତାଂ ଚ ଧତ୍ତେ
ଚୌର୍ୟଂ ଚ ପଙ୍କଜରୁଚାଂ ତ୍ଵଦପାଙ୍ଗପାତଃ ॥ ୩୨ ॥
ନିତ୍ୟଂ ଶ୍ରେତୁଃ ପରିଚିତୌ ୟତମାନମେଵ
ନୀଲୋତ୍ପଲଂ ନିଜସମୀପନିଵାସଲୋଲମ୍ ।
ପ୍ରୀତ୍ୟୈଵ ପାଠୟତି ଵୀକ୍ଷଣଦେଶିକେନ୍ଦ୍ରଃ
କାମାକ୍ଷୀ କିନ୍ତୁ ତଵ କାଲିମସମ୍ପ୍ରଦାୟମ୍ ॥ ୩୩ ॥
ଭ୍ରାନ୍ତ୍ଵା ମୁହୁଃ ସ୍ତବକିତସ୍ମିତଫେନରାଶୌ
କାମାକ୍ଷି ଵକ୍ତ୍ରରୁଚିସଂଚୟଵାରିରାଶୌ ।
ଆନନ୍ଦତି ତ୍ରିପୁରମର୍ଦନନେତ୍ରଲକ୍ଷ୍ମୀଃ
ଆଲମ୍ବ୍ୟ ଦେଵି ତଵ ମନ୍ଦମପାଙ୍ଗସେତୁମ୍ ॥ ୩୪ ॥
ଶ୍ୟାମା ତଵ ତ୍ରିପୁରସୁନ୍ଦରି ଲୋଚନଶ୍ରୀଃ
କାମାକ୍ଷି କନ୍ଦଲିତମେଦୁରତାରକାନ୍ତିଃ ।
ଜ୍ୟୋତ୍ସ୍ନାଵତୀ ସ୍ମିତରୁଚାପି କଥଂ ତନୋତି
ସ୍ପର୍ଧାମହୋ କୁଵଲୟୈଶ୍ଚ ତଥା ଚକୋରୈଃ ॥ ୩୫ ॥
କାଲାଞ୍ଜନଂ ଚ ତଵ ଦେଵି ନିରୀକ୍ଷଣଂ ଚ
କାମାକ୍ଷି ସାମ୍ୟସରଣିଂ ସମୁପୈତି କାନ୍ତ୍ୟା ।
ନିଶ୍ଶେଷନେତ୍ରସୁଲଭଂ ଜଗତୀଷୁ ପୂର୍ଵ-
ମନ୍ୟତ୍ତ୍ରିନେତ୍ରସୁଲଭଂ ତୁହିନାଦ୍ରିକନ୍ୟେ ॥ ୩୬ ॥
ଧୂମାଙ୍କୁରୋ ମକରକେତନପାଵକସ୍ୟ
କାମାକ୍ଷି ନେତ୍ରରୁଚିନୀଲିମଚାତୁରୀ ତେ ।
ଅତ୍ୟନ୍ତମଦ୍ଭୁତମିଦଂ ନୟନତ୍ରୟସ୍ୟ
ହର୍ଷୋଦୟଂ ଜନୟତେ ହରୁଣାଙ୍କମୌଲେଃ ॥୩୭ ॥
ଆରଭ୍ଭଲେଶସମୟେ ତଵ ଵୀକ୍ଷଣସ୍ସ
କାମାକ୍ଷି ମୂକମପି ଵୀକ୍ଷଣମାତ୍ରନମ୍ରମ୍ ।
ସର୍ଵଜ୍ଞତା ସକଲଲୋକସମକ୍ଷମେଵ
କୀର୍ତିସ୍ଵୟଂଵରଣମାଲ୍ୟଵତୀ ଵୃଣୀତେ ॥ ୩୮ ॥
କାଲାମ୍ବୁଵାହ ଉଵ ତେ ପରିତାପହାରୀ
କାମାକ୍ଷି ପୁଷ୍କରମଧଃକୁରୁତେ କଟାଖ़୍ଷଃ ।
ପୂର୍ଵଃ ପରଂ କ୍ଷଣରୁଚା ସମୁପୈତି ମୈତ୍ରୀ-
ମନ୍ୟସ୍ତୁ ସ।ତତରୁଚିଂ ପ୍ରକଟୀକରୋତି ॥ ୩୯ ॥
ସୂକ୍ଷ୍ମେଽପି ଦୁର୍ଗମତରେଽପି ଗୁରୁପ୍ରସାଦ-
ସାହାୟ୍ୟକେନ ଵିଚରନ୍ନପଵର୍ଗମାର୍ଗେ ।
ସଂସାରପଙ୍କନିଚୟେ ନ ପତତ୍ୟମୂଂ ତେ
କାମାକ୍ଷି ଗାଢମଵଲମ୍ବ୍ୟ କଟାକ୍ଷୟଷ୍ଟିମ୍ ॥ ୪୦ ॥
କାମାକ୍ଷି ସନ୍ତତମସୌ ହରିନୀଲରତ୍ନ-
ସ୍ତମ୍ଭେ କଟାକ୍ଷରୁଚିପୁଞ୍ଜମୟେ ଭଵତ୍ୟାଃ ।
ବଦ୍ଧୋଽପି ଭକ୍ତିନିଗଲୈର୍ମମ ଚିତ୍ତହସ୍ତୀ
ସ୍ତମ୍ଭଂ ଚ ବନ୍ଧମପି ମୁଞ୍ଚତି ହନ୍ତ ଚିତ୍ରମ୍ ॥ ୪୧ ॥
କାମାକ୍ଷି କାଷ୍ଣର୍ୟମପି ସନ୍ତତମଞ୍ଜନଂ ଚ
ବିଭ୍ରନ୍ନିସର୍ଗତରଲୋଽପି ଭଵତ୍କଟାକ୍ଷଃ ।
ଵୈମଲ୍ୟମନ୍ଵହମନଞ୍ଜନତା ଚ ଭୂୟଃ
ସ୍ଥୈର୍ୟଂ ଚ ଭକ୍ତହୃଦୟାୟ କଥଂ ଦଦାତି ॥ ୪୨ ॥
ମନ୍ଦସ୍ମିତସ୍ତବକିତଂ ମଣିକୁଣ୍ଡଲାଂଶୁ-
ସ୍ତୋମପ୍ରଵାଲରୁଚିରଂ ଶିଶିରୀକୃତାଶମ୍ ।
କାମାକ୍ଷି ରାଜତି କଟାକ୍ଷରୁଚେଃ କଦମ୍ବମ୍
ଉଦ୍ୟାନମମ୍ବ କରୁଣାହରିଣେକ୍ଷଣାୟାଃ ॥ ୪୩ ॥
କାମାକ୍ଷି ତାଵକକଟାକ୍ଷମହେନ୍ଦ୍ରନୀଲ-
ସିଂହାସନଂ ଶ୍ରିତଵତୋ ମକରଧ୍ଵଜସ୍ୟ ।
ସାମ୍ରାଜ୍ୟମଙ୍ଗଲଵିଧୌ ମୁଣିକୁଣ୍ଡଲଶ୍ରୀଃ
ନୀରାଜନୋତ୍ସଵତରଙ୍ଗିତଦୀପମାଲା ॥ ୪୪ ॥
ମାତଃ କ୍ଷଣଂ ସ୍ନପୟ ମାଂ ତଵ ଵୀକ୍ଷିତେନ
ମନ୍ଦାକ୍ଷିତେନ ସୁଜନୈରପରୋକ୍ଷିତେନ ।
କାମାକ୍ଷି କର୍ମତିମିରୋତ୍କରଭାସ୍କରେଣ
ଶ୍ରେୟସ୍କରେଣ ମଧୁପଦ୍ୟୁତିତସ୍କରେଣ ॥ ୪୫ ॥
ପ୍ରେମାପଗାପୟସି ମଜ୍ଜନମାରଚୟ୍ୟ
ୟୁକ୍ତଃ ସ୍ମିତାଂଶୁକୃତଭସ୍ମଵିଲେପନେନ ।
କାମାକ୍ଷି କୁଣ୍ଡଲମଣିଦ୍ୟୁତିଭିର୍ଜଟାଲଃ
ଶ୍ରୀକଣ୍ଠମେଵ ଭଜତେ ତଵ ଦୃଷ୍ଟିପାତଃ ॥ ୪୬ ॥
କୈଵଲ୍ୟଦାୟ କରୁଣାରସକିଂକରାୟ
କାମାକ୍ଷି କନ୍ଦଲିତଵିଭ୍ରମଶଂକରାୟ ।
ଆଲୋକନାୟ ତଵ ଭକ୍ତଶିଵଂକରାୟ
ମାତର୍ନମୋଽସ୍ତୁ ପରତନ୍ତ୍ରିତଶଂକରାୟ ॥ ୪୭ ॥
ସାମ୍ରାଜ୍ୟମଙ୍ଗଲଵିଧୌ ମକରଧ୍ଵଜସ୍ୟ
ଲୋଲାଲକାଲିକୃତତୋରଣମାଲ୍ୟଶୋଭେ ।
କାମେଶ୍ଵରି ପ୍ରଚଲଦୁତ୍ପଲଵୈଜୟନ୍ତୀ-
ଚାତୁର୍ୟମେତି ତଵ ଚଞ୍ଚଲଦୃଷ୍ଟିପାତଃ ॥ ୪୮ ॥
ମାର୍ଗେଣ ମଞ୍ଜୁକଚକାନ୍ତିତମୋଵୃତେନ
ମନ୍ଦାୟମାନଗମନା ମଦନାତୁରାସୌ ।
କାମାକ୍ଷି ଦୃଷ୍ଟିରୟତେ ତଵ ଶଂକରାୟ
ସଂକେତଭୂମିମଚିରାଦଭିସାରିକେଵ ॥ ୪୯ ॥
ଵ୍ରୀଡନୁଵୃତ୍ତିରମଣୀକୃତସାହଚର୍ୟା
ଶୈଵାଲିତାଂ ଗଲରୁଚା ଶଶିଶେଖରସ୍ୟ ।
କାମାକ୍ଷି କାନ୍ତିସରସୀଂ ତ୍ଵଦପାଙ୍ଗଲକ୍ଷ୍ମୀଃ
ମନ୍ଦଂ ସମାଶ୍ରୟତି ମଜ୍ଜନଖେଲନାୟ ॥ ୫୦ ॥
କାଷାୟମଂଶୁକମିଵ ପ୍ରକଟଂ ଦଧାନୋ
ମାଣିକ୍ୟକୁଣ୍ଡଲରୁଚିଂ ମମତାଵିରୋଧୀ ।
ଶ୍ରୁତ୍ୟନ୍ତସୀମନି ରତଃ ସୁତରାଂ ଚକାସ୍ତି
କାମାକ୍ଷି ତାଵକକଟାକ୍ଷୟତୀଶ୍ଵରୋଽସୌ ॥ ୫୧ ॥
ପାଷାଣ ଏଵ ହରିନୀଲମଣିର୍ଦିନେଷୁ
ପ୍ରମ୍ଲନତାଂ କୁଵଲୟଂ ପ୍ରକଟୀକରୋତି ।
ନୌମିତ୍ତିକୋ ଜଲଦମେଚକିମା ତତସ୍ତେ
କାମାକ୍ଷି ଶୂନ୍ୟମୁପମନମପାଙ୍ଗଲକ୍ଷ୍ମ୍ୟାଃ ॥ ୫୨ ॥
ଶୃଙ୍ଗାରଵିଭ୍ରମଵତୀ ସୁତରାଂ ସଲଜ୍ଜା
ନାସାଗ୍ରମୌକ୍ତିକରୁଚା କୃତମନ୍ଦହାସା ।
ଶ୍ୟାମା କଟାକ୍ଷସୁଷମା ତଵ ୟୁକ୍ତମେତତ୍
କାମାକ୍ଷି ଚୁମ୍ବତି ଦିଗମ୍ବରଵକ୍ତ୍ରବିମ୍ବମ୍ ॥ ୫୩ ॥
ନୀଲୋତ୍ପଲେନ ମଧୁପେନ ଚ ଦୃଷ୍ଟିପାତଃ
କାମାକ୍ଷି ତୁଲ୍ୟ ଇତି ତେ କଥମାମନନ୍ତି ।
ଶୈତ୍ୟେନ ନିନ୍ଦୟତି ୟଦନ୍ଵହମିନ୍ଦୁପାଦାନ୍
ପାଥୋରୁହେଣ ୟଦସୌ କଲହାୟତେ ଚ ॥ ୫୪ ॥
ଓଷ୍ଠପ୍ରଭାପଟଲଵିଦ୍ରୁମମୁଦ୍ରିତେ ତେ
ଭ୍ରୂଵଲ୍ଲିଵୀଚିସୁଭଗେ ମୁଖକାନ୍ତିସିନ୍ଧୌ ।
କାମାକ୍ଷି ଵାରିଭରପୂରଣଲମ୍ବମାନ-
କାଲାମ୍ବୁଵାହସରଣିଂ ଲଭତେ କଟାକ୍ଷଃ ॥ ୫୫ ॥
ମନ୍ଦସ୍ମିତୈର୍ଧଵଲିତା ମଣିକୁଣ୍ଡଲାଂଶୁ-
ସମ୍ପର୍କଲୋହିତରୁଚିସ୍ତ୍ଵଦପାଙ୍ଗଧାରା ।
କାମାକ୍ଷି ମଲ୍ଲିକୁସୁମୈର୍ନଵପଲ୍ଲଵୈଶ୍ଚ
ନୀଲୋତ୍ପଲୈଶ୍ଚ ରଚିତେଵ ଵିଭାତି ମାଲା ॥ ୫୬ ॥
କାମାକ୍ଷି ଶୀତଲକୃପାରସନିର୍ଝରାମ୍ଭଃ-
ସମ୍ପର୍କପକ୍ଷ୍ମଲରୁଚିସ୍ତ୍ଵଦପାଙ୍ଗମାଲା ।
ଗୋଭିଃ ସଦା ପୁରରିପୋରଭିଲଷ୍ୟମାଣା
ଦୂର୍ଵାକଦମ୍ବକଵିଡମ୍ବନମାତନୋତି ॥ ୫୭ ॥
ହୃତ୍ପଙ୍କଜଂ ମମ ଵିକାସୟତୁ ପ୍ରମୁଷ୍ଣ-
ନ୍ନୁଲ୍ଲାସମୁତ୍ପଲରୁଚେସ୍ତମସାଂ ନିରୋଦ୍ଧା ।
ଦୋଷାନୁଷଙ୍ଗଜଡତାଂ ଜଗତାଂ ଧୁନାନଃ
କାମାକ୍ଷି ଵୀକ୍ଷଣଵିଲାସଦିନୋଦୟସ୍ତେ ॥ ୫୮ ॥
ଚକ୍ଷୁର୍ଵିମୋହୟତି ଚନ୍ଦ୍ରଵିଭୂଷଣସ୍ୟ
କାମାକ୍ଷି ତାଵକକଟାକ୍ଷତମଃପ୍ରରୋହଃ ।
ପ୍ରତ୍ୟଙ୍ମୁଖଂ ତୁ ନୟନଂ ସ୍ତିମିତଂ ମୁନୀନାଂ
ପ୍ରାକାଶ୍ୟମେଵ ନୟତୀତି ପରଂ ଵିଚିତ୍ରମ୍ ॥ ୫୯ ॥
କାମାକ୍ଷି ଵୀକ୍ଷଣରୁଚା ୟୁଧି ନିର୍ଜିତଂ ତେ
ନୀଲୋତ୍ପଲଂ ନିରଵଶେଷଗତାଭିମାନମ୍ ।
ଆଗତ୍ୟ ତତ୍ପରିସରଂ ଶ୍ରଵଣଵତଂସ-
ଵ୍ୟୋଜେନ ନୂନମଭୟାର୍ଥନମାତନୋତି ॥ ୬୦ ॥
ଆଶ୍ଚର୍ୟମମ୍ବ ମଦାନାଭ୍ୟୁଦୟାଵଲମ୍ବଃ
କାମାକ୍ଷି ଚଞ୍ଚଲନିରୀକ୍ଷଣଵିଭ୍ରମସ୍ତେ ।
ଧୈର୍ୟଂ ଵିଧୂୟ ତନୁତେ ହୃଦି ରାଗବନ୍ଧଂ
ଶମ୍ଭୋସ୍ତଦେଵ ଵିପରୀତତୟା ମୁନୀନାମ୍ ॥ ୬୧ ॥
ଜନ୍ତୋଃ ସକୃତ୍ପ୍ରଣମତୋ ଜଗଦୀଡ୍ୟତାଂ ଚ
ତେଜାସ୍ଵିତାଂ ଚ ନିଶିତାଂ ଚ ମତିଂ ସଭାୟାମ୍ ।
କାମାକ୍ଷି ମାକ୍ଷିକଝରୀମିଵ ଵୈଖରୀଂ ଚ
ଲକ୍ଷ୍ମୀଂ ଚ ପକ୍ଷ୍ମଲୟତି କ୍ଷଣଵୀକ୍ଷଣଂ ତେ ॥ ୬୨ ॥
କାଦମ୍ବିନୀ କିମୟତେ ନ ଜଲାନୁଷଙ୍ଗଂ
ଭୃଙ୍ଗାଵଲୀ କିମୁରରୀକୁରୁତେ ନ ପଦ୍ମମ୍ ।
କିଂ ଵା କଲିନ୍ଦତନୟା ସହତେ ନ ଭଙ୍ଗଂ
କାମାକ୍ଷି ନିଶ୍ଚୟପଦଂ ନ ତଵାକ୍ଷିଲକ୍ଷ୍ମୀଃ ॥ ୬୩ ॥
କାକୋଲପାଵକତୃଣୀକରଣେଽପି ଦକ୍ଷଃ
କାମାକ୍ଷି ବାଲକସୁଧାକରଶେଖରସ୍ୟ ।
ଅତ୍ୟନ୍ତଶୀତଲତମୋଽପ୍ୟନୁପାରତଂ ତେ
ଚିତ୍ତଂ ଵିମୋହୟତି ଚିତ୍ରମୟଂ କଟାକ୍ଷଃ ॥ ୬୪ ॥
କାର୍ପଣ୍ୟପୂରପରିଵର୍ଧିତମମ୍ବ ମୋହ-
କନ୍ଦୋଦ୍ଗତଂ ଭଵମୟଂ ଵିଷପାଦପଂ ମେ ।
ତୁଙ୍ଗଂ ଛିନତ୍ତୁ ତୁହିନାଦ୍ରିସୁତେ ଭଵତ୍ୟାଃ
କାଞ୍ଚୀପୁରେଶ୍ଵରି କଟାକ୍ଷକୁଠାରଧାରା ॥ ୬୫ ॥
କାମାକ୍ଷି ଘୋରଭଵରୋଗଚିକିତ୍ସନାର୍ଥ-
ମଭ୍ୟର୍ଥ୍ୟ ଦେଶିକକଟାକ୍ଷଭିଷକ୍ପ୍ରସାଦାତ୍ ।
ତତ୍ରାପି ଦେଵି ଲଭତେ ସୁକୃତୀ କଦାଚି-
ଦନ୍ୟସ୍ୟ ଦୁର୍ଲଭମପାଙ୍ଗମହୌଷଧଂ ତେ ॥ ୬୬ ॥
କାମାକ୍ଷି ଦେଶିକକୃପାଂକୁରମାଶ୍ରୟନ୍ତୋ
ନାନାତପୋନିୟମନାଶିତପାଶବନ୍ଧାଃ ।
ଵାସାଲୟଂ ତଵ କଟାକ୍ଷମମୁଂ ମହାନ୍ତୋ
ଲବ୍ଧ୍ଵା ସୁଖଂ ସମାଧିୟୋ ଵିଚରନ୍ତି ଲୋକେ ॥ ୬୭ ॥
ସାକୂତସଂଲପିତସମ୍ଭୃତମୁଗ୍ଧହାସଂ
ଵ୍ରୀଡାନୁରାଗସହଚାରି ଵିଲୋକନଂ ତେ ।
କାମାକ୍ଷି କାମପରିପନ୍ଥିନି ମାରଵୀର-
ସାମ୍ରାଜ୍ୟଵିଭ୍ରମଦଶାଂ ସଫଲୀକରୋତି ॥ ୬୮ ॥
କାମାକ୍ଷି ଵିଭ୍ରମବଲୈକନିଧିର୍ଵିଧାୟ
ଭ୍ରୂଵଲ୍ଲିଚାପକୁଟିଲୀକୃତିମେଵ ଚିତ୍ରମ୍ ।
ସ୍ଵାଧୀନତାଂ ତଵ ନିନାୟ ଶଶାଙ୍କମୌଲେ-
ରଙ୍ଗାର୍ଧରାଜ୍ୟସୁଖଲାଭମପାଙ୍ଗଵୀରଃ ॥ ୬୯ ॥
କାମାଂକୁରୈକନିଲୟସ୍ତଵ ଦୃଷ୍ଟିପାତଃ
କାମାକ୍ଷି ଭକ୍ତମନସାଂ ପ୍ରଦଦାତୁ କାମାନ୍ ।
ରାଗାନ୍ଵିତଃ ସ୍ଵୟମପି ପ୍ରକଟୀକରୋତି
ଵୈରାଗ୍ୟମେଵ କଥମେଷ ମହାମୁନୀନାମ୍ ॥ ୭୦ ॥
କାଲାମ୍ବୁଵାହନିଵହୈଃ କଲହାୟତେ ତେ
କାମାକ୍ଷି କାଲିମମଦେନ ସଦା କଟାକ୍ଷଃ ।
ଚିତ୍ରଂ ତଥାପି ନିତରାମମୁମେଵ ଦୃଷ୍ଟ୍ଵା
ସୋତ୍କଣ୍ଠ ଏଵ ରମତେ କିଲ ନୀଲକଣ୍ଠଃ ॥ ୭୧ ॥
କାମାକ୍ଷି ମନ୍ମଥରିପୁଂ ପ୍ରତି ମାରତାପ-
ମୋହାନ୍ଧକାରଜଲଦାଗମନେନ ନୃତ୍ୟନ୍ ।
ଦୁଷ୍କର୍ମକଞ୍ଚୁକିକୁଲଂ କବଲୀକରୋତୁ
ଵ୍ୟାମିଶ୍ରମେଚକରୁଚିସ୍ତ୍ଵଦପାଙ୍ଗକେକୀ ॥ ୭୨ ॥
କାମାକ୍ଷି ମନ୍ମଥରିପୋରଵଲୋକନେଷୁ
କାନ୍ତଂ ପୟୋଜମିଵ ତାଵକମକ୍ଷିପାତମ୍ ।
ପ୍ରେମାଗମୋ ଦିଵସଵଦ୍ଵିକଚୀକରୋତି
ଲଜ୍ଜାଭରୋ ରଜନିଵନ୍ମୁକୁଲୀକରୋତି ॥ ୭୩ ॥
ମୂକୋ ଵିରିଞ୍ଚତି ପରଂ ପୁରୁଷଃ କୁରୂପଃ
କନ୍ଦର୍ପତି ତ୍ରିଦଶରାଜତି କିମ୍ପଚାନଃ ।
କାମାକ୍ଷି କେଵଲମୁପକ୍ରମକାଲ ଏଵ
ଲୀଲାତରଙ୍ଗିତକଟାକ୍ଷରୁଚଃ କ୍ଷଣଂ ତେ ॥ ୭୪ ॥
ନୀଲାଲକା ମଧୁକରନ୍ତି ମନୋଜ୍ଞନାସା-
ମୁକ୍ତାରୁଚଃ ପ୍ରକଟକନ୍ଦବିସାଙ୍କୁରନ୍ତି ।
କାରୁଣ୍ୟମମ୍ବ ମକରନ୍ଦତି କାମକୋଟି
ମନ୍ୟେ ତତଃ କମଲମେଵ ଵିଲୋଚନଂ ତେ ॥ ୭୫ ॥
ଆକାଂକ୍ଷ୍ୟମାଣଫଲଦାନଵିଚକ୍ଷଣାୟାଃ ।
କାମାକ୍ଷି ତାଵକକଟାକ୍ଷକକାମଧେନୋଃ ।
ସମ୍ପର୍କ ଏଵ କଥମମ୍ବ ଵିମୁକ୍ତପାଶ-
ବନ୍ଧାଃ ସ୍ଫୁଟଂ ତନୁଭୃତଃ ପଶୁତାଂ ତ୍ୟଜନ୍ତି ॥ ୭୬ ॥
ସଂସାରଘର୍ମପରିତାପଜୁଷାଂ ନରାଣାଂ
କାମାକ୍ଷି ଶୀତଲତରାଣି ତଵେକ୍ଷିତାନି ।
ଚନ୍ଦ୍ରାତପନ୍ତି ଘନଚନ୍ଦନକର୍ଦମନ୍ତି
ମୁକ୍ତାଗୁଣନ୍ତି ହିମଵାରିନିଷେଚନନ୍ତି ॥ ୭୭ ॥
ପ୍ରେମାମ୍ବୁରାଶିସତତସ୍ନପିତାନି ଚିତ୍ରଂ
କାମାକ୍ଷି ତାଵକକଟାକ୍ଷନିରୀକ୍ଷଣାନି ।
ସନ୍ଧୁକ୍ଷୟନ୍ତି ମୁହୁରିନ୍ଧନରାଶିରୀତ୍ୟା
ମାରଦ୍ରୁହୋ ମନସି ମନ୍ମଥଚିତ୍ରଭାନୁମ୍ ॥ ୭୮ ॥
କାଲାଞ୍ଜନପ୍ରତିଭଟଂ କମନୀୟକାନ୍ତ୍ୟା
କନ୍ଦର୍ପତନ୍ତ୍ରକଲୟା କଲିତାନୁଭାଵମ୍ ।
କାଞ୍ଚୀଵିହାରରସିକେ କଲୁଷାର୍ତିଚୋରଂ
କଲ୍ଲୋଲୟସ୍ଵ ମୟି ତେ କରୁଣାକଟାକ୍ଷମ୍ ॥ ୭୯ ॥
କ୍ରାନ୍ତେନ ମନ୍ମଥଦେନ ଵିମୋହ୍ୟମାନ-
ସ୍ଵାନ୍ତେନ ଚୂତତରୁମୂଲଗତସ୍ୟ ପୁଂସଃ ।
କାନ୍ତେନ କିଂଚିଦଵଲୋକୟ ଲୋଚନସ୍ୟ
ପ୍ରାନ୍ତେନ ମାଂ ଜନନି କାଞ୍ଚିପୁରୀଵିଭୂଷେ ॥ ୮୦ ॥
କାମାକ୍ଷି କୋଽପି ସୁଜନାସ୍ତ୍ଵଦପାଙ୍ଗସଂଗେ
କଣ୍ଠେନ କନ୍ଦଲିତକାଲିମସମ୍ପ୍ରଦାୟାଃ ।
ଉତ୍ତଂସକଲ୍ପିତଚକୋରକୁଟୁମ୍ବପୋଷା
ନକ୍ତନ୍ଦିଵସପ୍ରସଵଭୂନୟନା ଭଵନ୍ତି ॥ ୮୧ ॥
ନୀଲୋତ୍ପଲପ୍ରସଵକାନ୍ତିନିର୍ଦଶନେନ
କାରୁଣ୍ୟଵିଭ୍ରମଜୁଷା ତଵ ଵୀକ୍ଷଣେନ ।
କାମାକ୍ଷି କର୍ମଜଲଧେଃ କଲଶୀସୁତେନ
ପାଶତ୍ରୟାଦ୍ଵୟମମୀ ପରିମୋଚନୀୟାଃ ॥ ୮୨ ॥
ଅତ୍ୟନ୍ତଚଞ୍ଚଲମକୃତ୍ରିମମଞ୍ଜନଂ କିଂ
ଝଂକାରଭଙ୍ଗିରହିତା କିମୁ ଭୃଙ୍ଗମାଲା ।
ଧୂମାଙ୍କୁରଃ କିମୁ ହୁତାଶନସଂଗହୀନଃ
କାମାକ୍ଷି ନେତ୍ରରୁଚିନୀଲିମକନ୍ଦଲୀ ତେ ॥ ୮୩ ॥
କାମାକ୍ଷି ନିତ୍ୟମୟମଞ୍ଜଲିରସ୍ତୁ ମୁକ୍ତି-
ବୀଜାୟ ଵିଭ୍ରମମଦୋଦୟଘୂର୍ଣିତାୟ ।
କନ୍ଦର୍ପଦର୍ପପୁନରୁଦ୍ଭଵସିଦ୍ଧିଦାୟ
କଲ୍ୟାଣଦାୟ ତଵ ଦେଵି ଦୃଗଞ୍ଚଲାୟ ॥ ୮୪ ॥
ଦର୍ପାଙ୍କୁରୋ ମକରକେତନଵିଭ୍ରମାଣାଂ
ନିନ୍ଦାଙ୍କୁରୋ ଵିଦଲିତୋତ୍ପଲଚାତୁରୀଣାମ୍ ।
ଦୀପାଙ୍କୁରୋ ଭଵତମିସ୍ରକଦମ୍ବକାନାଂ
କାମାକ୍ଷି ପାଲୟତୁ ମାଂ ତ୍ଵଦପାଙ୍ଗପାତଃ ॥ ୮୫ ॥
କୈଵଲ୍ୟଦିଵ୍ୟମଣିରୋହଣପର୍ଵତେଭ୍ୟଃ
କାରୁଣ୍ୟନିର୍ଝରପୟଃକୃତମଞ୍ଜନେଭ୍ୟଃ ।
କାମାକ୍ଷି କିଂକରିତଶଙ୍କରମାନସେଭ୍ୟ-
ସ୍ତେଭ୍ୟୋ ନମୋଽସ୍ତୁ ତଵ ଵୀକ୍ଷଣଵିଭ୍ରମେଭ୍ୟଃ ॥ ୮୬ ॥
ଅଲ୍ପୀୟ ଏଵ ନଵମୁତ୍ପଲମମ୍ବ ହୀନା
ମୀନସ୍ୟ ଵା ସରଣିରମ୍ବୁରୁହାଂ ଚ କିଂ ଵା ।
ଦୂରେ ମୃଗୀଦୃଗସମଞ୍ଜସମଞ୍ଜନଂ ଚ
କାମାକ୍ଷି ଵୀକ୍ଷଣରୁଚୌ ତଵ ତର୍କୟାମଃ ॥ ୮୭ ॥
ମିଶ୍ରୀଭଵଦ୍ଗରଲପଙ୍କିଲଶଙ୍କରୋରସ୍-
ସୀମାଙ୍ଗଣେ କିମପି ରିଙ୍ଖଣମାଦଧାନଃ ।
ହେଲାଵଧୂତଲଲିତଶ୍ରଵଣୋତ୍ପଲୋଽସୌ
କାମାକ୍ଷି ବାଲ ଇଵ ରାଜତି ତେ କଟାକ୍ଷଃ ॥ ୮୮ ॥
ପ୍ରୌଢିକରୋତି ଵିଦୁଷାଂ ନଵସୂକ୍ତିଧାଟୀ-
ଚୂତାଟଵୀଷୁ ବୁଧକୋକିଲଲାଲ୍ୟମାନମ୍ ।
ମାଧ୍ଵୀରସଂ ପରିମଲଂ ଚ ନିରର୍ଗଲଂ ତେ
କାମାକ୍ଷି ଵୀକ୍ଷଣଵିଲାସଵସନ୍ତଲକ୍ଷ୍ମୀଃ ॥ ୮୯ ॥
କୂଲଂକଷଂ ଵିତନୁତେ କରୁଣାମ୍ବୁଵର୍ଷୀ
ସାରସ୍ଵତଂ ସୁକୃତିନଃ ସୁଲଭଂ ପ୍ରଵାହମ୍ ।
ତୁଚ୍ଛୀକରୋତି ୟମୁନାମ୍ବୁତରଙ୍ଗଭଙ୍ଗୀଂ
କାମାକ୍ଷି କିଂ ତଵ କଟାକ୍ଷମହାମ୍ବୁଵାହଃ ॥ ୯୦ ॥
ଜଗର୍ତି ଦେଵି କରୁଣାଶୁକସୁନ୍ଦରୀ ତେ
ତାଟଙ୍କରତ୍ନରୁଚିଦାଡିମଖଣ୍ଡଶୋଣେ ।
କାମାକ୍ଷି ନିର୍ଭରକଟାକ୍ଷମରୀଚିପୁଞ୍ଜ-
ମାହେନ୍ଦ୍ରନୀଲମଣିପଞ୍ଜରମଧ୍ୟଭାଗେ ॥ ୯୧ ॥
କାମାକ୍ଷି ସତ୍କୁଵଲୟସ୍ୟ ସଗୋତ୍ରଭାଵା-
ଦାକ୍ରାମତି ଶ୍ରୁତିମସୌ ତଵ ଦୃଷ୍ଟିପାତଃ ।
କିଂଚ ସ୍ଫୁଟଂ କୁଟିଲତାଂ ପ୍ରକଟୀକରୋତି
ଭ୍ରୂଵଲ୍ଲରୀପରିଚିତସ୍ୟ ଫଲଂ କିମେତତ୍ ॥ ୯୨ ॥
ଏଷା ତଵାକ୍ଷିସୁଷମା ଵିଷମାୟୁଧସ୍ୟ
ନାରାଚଵର୍ଷଲହରୀ ନଗରାଜକନ୍ୟେ ।
ଶଂକେ କରୋତି ଶତଧା ହୃଦି ଧୈର୍ୟମୁଦ୍ରାଂ
ଶ୍ରୀକାମକୋଟି ୟଦସୌ ଶିଶିରାଂଶୁମୌଲେଃ ॥ ୯୩ ॥
ବାଣେନ ପୁଷ୍ପଧନୁଷଃ ପରିକଲ୍ପ୍ୟମାନ-
ତ୍ରାଣେନ ଭକ୍ତମନସାଂ କରୁଣାକରେଣ ।
କୋଣେନ କୋମଲଦୃଶସ୍ତଵ କାମକୋଟି
ଶୋଣେନ ଶୋଷୟ ଶିଵେ ମମ ଶୋକସିନ୍ଧୁମ୍ ॥ ୯୪ ॥
ମାରଦ୍ରୁହା ମୁକୁଟସୀମନି ଲାଲ୍ୟମାନେ
ମନ୍ଦାକିନୀପୟସି ତେ କୁଟିଲଂ ଚରିଷ୍ଣୁଃ ।
କାମାକ୍ଷି କୋପରଭସାଦ୍ଵଲମାନମୀନ-
ସନ୍ଦେହମଙ୍କୁରୟତି କ୍ଷଣମକ୍ଷିପାତଃ ॥ ୯୫ ॥
କାମାକ୍ଷି ସଂଵଲିତମୌକ୍ତିକକୁଣ୍ଡଲାଂଶୁ-
ଚଞ୍ଚତ୍ସିତଶ୍ରଵଣଚାମରଚାତୁରୀକଃ ।
ସ୍ତମ୍ଭେ ନିରନ୍ତରମପାଙ୍ଗମୟେ ଭଵତ୍ୟା
ବଦ୍ଧଶ୍ଚକାସ୍ତି ମକରଧ୍ଵଜମତ୍ତହସ୍ତୀ ॥ ୯୬ ॥
ୟାଵତ୍କଟାକ୍ଷରଜନୀସମୟାଗମସ୍ତେ
କାମାକ୍ଷି ତାଵଦଚିରାନ୍ନମତାଂ ନରାଣାମ୍ ।
ଆଵିର୍ଭଵତ୍ୟମୃତଦୀଧିତିବିମ୍ବମମ୍ବ
ସଂଵିନ୍ମୟଂ ହୃଦୟପୂର୍ଵଗିରୀନ୍ଦ୍ରଶୃଙ୍ଗେ ॥ ୯୭ ॥
କାମାକ୍ଷି କଲ୍ପଵିଟପୀଵ ଭଵତ୍କଟାକ୍ଷୋ
ଦିତ୍ସୁଃ ସମସ୍ତଵିଭଵଂ ନମତାଂ ନରାଣାମ୍ ।
ଭୃଙ୍ଗସ୍ୟ ନୀଲନଲିନସ୍ୟ ଚ କାନ୍ତିସମ୍ପ-
ତ୍ସର୍ଵସ୍ଵମେଵ ହରତୀତି ପରଂ ଵିଚିତ୍ରମ୍ ॥ ୯୮ ॥
ଅତ୍ୟନ୍ତଶୀତଲମନର୍ଗଲକର୍ମପାକ-
କାକୋଲହାରି ସୁଲଭଂ ସୁମନୋଭିରେତତ୍ ।
ପୀୟୂଷମେଵ ତଵ ଵୀକ୍ଷଣମମ୍ବ କିନ୍ତୁ
କାମାକ୍ଷି ନୀଲମିଦମିତ୍ୟୟମେଵ ଭେଦଃ ॥ ୯୯ ॥
ଅଜ୍ଞାତଭକ୍ତିରସମପ୍ରସରଦ୍ଵିଵେକ-
ମତ୍ୟନ୍ତଗର୍ଵମନଧୀତସମସ୍ତଶାସ୍ତ୍ରମ୍ ।
ଅପ୍ରାପ୍ତସତ୍ୟମସମୀପଗତଂ ଚ ମୁକ୍ତେଃ
କାମାକ୍ଷି ନୈଵ ତଵ ସ୍ପୃହୟତି ଦୃଷ୍ଟିପାତଃ ॥ ୧୦୦ ॥
(କାମାକ୍ଷି ମାମଵତୁ ତେ କରୁଣାକଟାକ୍ଷଃ)
ପାତେନ ଲୋଚନରୁଚେସ୍ତଵ କାମକୋଟି
ପୋତେନ ପତକପୟୋଧିଭୟାତୁରାଣାମ୍ ।
ପୂତେନ ତେନ ନଵକାଞ୍ଚନକୁଣ୍ଡଲାଂଶୁ-
ଵୀତେନ ଶୀତଲୟ ଭୂଧରକନ୍ୟକେ ମାମ୍ ॥ ୧୦୧ ॥
କଟାକ୍ଷଶତକଂ ସମ୍ପୂର୍ଣମ୍ ॥
॥ ମନ୍ଦସ୍ମିତଶତକମ୍ ॥
ବଧ୍ନୀମୋ ଵୟମଞ୍ଜଲିଂ ପ୍ରତିଦିନଂ ବନ୍ଧଚ୍ଛିଦେ ଦେହିନାଂ
କନ୍ଦର୍ପାଗମତନ୍ତ୍ରମୂଲଗୁରଵେ କଲ୍ୟାଣକେଲୀଭୁଵେ ।
କାମାକ୍ଷ୍ୟା ଘନସାରପୁଞ୍ଜରଜସେ କାମଦ୍ରୁହଶ୍ଚକ୍ଷୁଷାଂ
ମନ୍ଦାରସ୍ତବକପ୍ରଭାମଦମୁଷେ ମନ୍ଦସ୍ମିତଜ୍ୟୋତିଷେ ॥ ୧ ॥
ସଧ୍ରୀଚେ ନଵମଲ୍ଲିକାସୁମନସାଂ ନାସାଗ୍ରମୁକ୍ତାମଣେ-
ରାଚାର୍ୟାୟ ମୃଣାଲକାଣ୍ଡମହସାଂ ନୈସର୍ଗିକାୟ ଦ୍ଵିଷେ ।
ସ୍ଵର୍ଧୁନ୍ୟା ସହ ୟୁଧ୍ଵେନ ହିମରୁଚେରର୍ଧାସନାଧ୍ୟାସିନେ
କାମାକ୍ଷ୍ୟାଃ ସ୍ମିତମଞ୍ଜରୀଧଵଲିମାଦ୍ଵୈତାୟ ତସ୍ମୈ ନମଃ ॥ ୨ ॥
କର୍ପୂରଦ୍ୟୁତିଚାତୁରୀମତିତରାମଲ୍ପୀୟସୀଂ କୁର୍ଵତୀ
ଦୌର୍ଭାଗ୍ୟୋଦୟମେଵ ସଂଵିଦଧତୀ ଦୌଷାକରୀଣାଂ ତ୍ଵିଷାମ୍ ।
କ୍ଷୁଲ୍ଲାନେଵ ମନୋଜ୍ଞମଲ୍ଲିନିକରାନ୍ଫୁଲ୍ଲାନପି ଵ୍ୟଞ୍ଜତୀ
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀ କାମପ୍ରସୂରସ୍ତୁ ମେ ॥ ୩ ॥
ୟା ପୀନସ୍ତନମଣ୍ଡଲୋପରି ଲସତ୍କର୍ପୂରଲେପାୟତେ
ୟା ନୀଲେକ୍ଷଣରାତ୍ରିକାନ୍ତିତତିଷୁ ଜ୍ୟୋତ୍ସ୍ନାପ୍ରରୋହାୟତେ ।
ୟା ସୌନ୍ଦର୍ୟଧୁନୀତରଙ୍ଗତତିଷୁ ଵ୍ୟାଲୋଲହଂସାୟତେ
କାମାକ୍ଷ୍ୟାଃ ଶିଶିରୀକରୋତୁ ହୃଦୟଂ ସା ମେ ସ୍ମିତପ୍ରାଚୁରୀ ॥ ୪ ॥
ୟେଷାଂ ଗଚ୍ଛତି ପୂର୍ଵପକ୍ଷସରଣିଂ କୌମୁଦ୍ଵତଃ ଶ୍ଵେତିମା
ୟେଷାଂ ସନ୍ତତମାରୁରୁକ୍ଷତି ତୁଲାକକ୍ଷ୍ୟାଂ ଶରଚ୍ଚନ୍ଦ୍ରମାଃ ।
ୟେଷାମିଚ୍ଛତି କମ୍ବୁରପ୍ୟସୁଲଭାମନ୍ତେଵସତ୍ପ୍ରକ୍ରିୟାଂ
କାମାକ୍ଷ୍ୟା ମମତାଂ ହରନ୍ତୁ ମମ ତେ ହାସତ୍ଵିଷାମଙ୍କୁରାଃ ॥ ୫ ॥
ଆଶାସୀମସୁ ସନ୍ତତଂ ଵିଦଧତୀ ନୈଶାକରୀଂ ଵ୍ୟାକ୍ରିୟାଂ
କାଶାନାମଭିମାନଭଙ୍ଗକଲନାକୌଶଲ୍ୟମାବିଭ୍ରତୀ ।
ଈଶାନେନ ଵିଲୋକିତା ସକୁତୁକଂ କାମାକ୍ଷି ତେ କଲ୍ମଷ-
କ୍ଲେଶାପାୟକରୀ ଚକାସ୍ତି ଲହରୀ ମନ୍ଦସ୍ମିତଜ୍ୟୋତିଷାମ୍ ॥ ୬ ॥
ଆରୂଢସ୍ୟ ସମୁନ୍ନତସ୍ତନତଟୀସାମ୍ରାଜ୍ୟସିଂହାସନଂ
କନ୍ଦର୍ପସ୍ୟ ଵିଭୋର୍ଜଗତ୍ତ୍ରୟପ୍ରାକଟ୍ୟମୁଦ୍ରାନିଧେଃ ।
ୟସ୍ୟାଶ୍ଚାମରଚାତୁରୀଂ କଲୟତେ ରଶ୍ମିଚ୍ଛଟା ଚଞ୍ଚଲା
ସା ମନ୍ଦସ୍ମିତମଞ୍ଜରୀ ଭଵତୁ ନଃ କାମାୟ କାମାକ୍ଷି ତେ ॥ ୭ ॥
ଶମ୍ଭୋର୍ୟା ପରିରମ୍ଭସମ୍ଭ୍ରମଵିଧୌ ନୈର୍ମଲ୍ୟସୀମାନିଧିଃ
ଗୈର୍ଵାଣୀଵ ତରଙ୍ଗିଣୀ କୃତମୃଦୁସ୍ୟନ୍ଦାଂ କଲିନ୍ଦାତ୍ମଜାମ୍ ।
କଲ୍ମାଷୀକୁରୁତେ କଲଙ୍କସୁଷମାଂ କଣ୍ଠସ୍ଥଲୀଚୁମ୍ବିନୀଂ
କାମାକ୍ଷ୍ୟାଃ ସ୍ମିତକନ୍ଦଲୀ ଭଵତୁ ନଃ କଲ୍ୟାଣସନ୍ଦୋହିନୀ ॥ ୮ ॥
ଜେତୁଂ ହାରଲତାମିଵ ସ୍ତନତଟୀଂ ସଂଜଗ୍ମୁଷୀ ସନ୍ତତଂ
ଗନ୍ତୁଂ ନିର୍ମଲତାମିଵ ଦ୍ଵିଗୁଣିତାଂ ମଗ୍ନା କୃପାସ୍ତ୍ରୋତସି ।
ଲବ୍ଧୁଂ ଵିସ୍ମୟନୀୟତାମିଵ ହରଂ ରାଗାକୁଲଂ କୁର୍ଵତୀ
ମଞ୍ଜୁସ୍ତେ ସ୍ମିତମଞ୍ଜରୀ ଭଵଭୟଂ ମଥ୍ନାତୁ କାମାକ୍ଷି ମେ ॥ ୯ ॥
ଶ୍ଵେତାପି ପ୍ରକଟଂ ନିଶାକରରୁଚାଂ ମାଲିନ୍ୟମାତନ୍ଵତୀ
ଶୀତାପି ସ୍ମରପାଵକଂ ପଶୁପତେଃ ସନ୍ଧୁକ୍ଷୟନ୍ତୀ ସଦା ।
ସ୍ଵାଭାଵ୍ୟାଦଧରାଶ୍ରିତାପି ନମତାମୁଚ୍ଚୈର୍ଦିଶନ୍ତୀ ଗତିଂ
କାମାକ୍ଷି ସ୍ଫୁଟମନ୍ତରା ସ୍ଫୁରତୁ ନସ୍ତ୍ଵନ୍ମନ୍ଦହାସପ୍ରଭା ॥ ୧୦ ॥
ଵକ୍ତ୍ରଶ୍ରୀସରସୀଜଲେ ତରଲିତଭ୍ରୂଵଲ୍ଲିକଲ୍ଲୋଲିତେ
କାଲିମ୍ନା ଦଧତୀ କଟାକ୍ଷଜନୁଷା ମାଧୁଵ୍ରତୀଂ ଵ୍ୟାପୃତିମ୍ ।
ନିର୍ନିଦ୍ରାମଲପୁଣ୍ଡରୀକକୁହନାପାଣ୍ଡିତ୍ୟମାବିଭ୍ରତୀ
କାମାକ୍ଷ୍ୟାଃ ସ୍ମିତଚାତୁରୀ ମମ ମନଃ କାତର୍ୟମୁନ୍ମୂଲୟେତ୍ ॥ ୧୧ ॥
ନିତ୍ୟଂ ବାଧିତବନ୍ଧୁଜୀଵମଧରଂ ମୈତ୍ରୀଜୁଷଂ ପଲ୍ଲଵୈଃ
ଶୁଦ୍ଧସ୍ୟ ଦ୍ଵିଜମଣ୍ଡଲସ୍ୟ ଚ ତିରସ୍କର୍ତାରମପ୍ୟାଶ୍ରିତା ।
ୟା ଵୈମଲ୍ୟଵତୀ ସଦୈଵ ନମତାଂ ଚେତଃ ପୁନୀତେତରାଂ
କାମାକ୍ଷ୍ୟା ହୃଦୟଂ ପ୍ରସାଦୟତୁ ମେ ସା ମନ୍ଦହାସପ୍ରଭା ॥ ୧୨ ॥
ଦ୍ରୁହ୍ୟନ୍ତୀ ତମସେ ମୁହୁଃ କୁମୁଦିନୀସାହାୟ୍ୟମାବିଭ୍ରତୀ
ୟାନ୍ତୀ ଚନ୍ଦ୍ରକିଶୋରଶେଖରଵପୁଃସୌଧାଙ୍ଗଣେ ପ୍ରେଙ୍ଖଣମ୍ ।
ଜ୍ଞାନାମ୍ଭୋନିଧିଵୀଚିକାଂ ସୁମନସାଂ କୂଲଂକଷାଂ କୁର୍ଵତୀ
କାମାକ୍ଷ୍ୟାଃ ସ୍ମିତକୌମୁଦୀ ହରତୁ ମେ ସଂସାରତାପୋଦୟମ୍ ॥ ୧୩ ॥
କାଶ୍ମୀରଦ୍ରଵଧାତୁକର୍ଦମରୁଚା କଲ୍ମାଷତାଂ ବିଭ୍ରତୀ
ହଂସୌଧୈରିଵ କୁର୍ଵତୀ ପରିଚିତିଂ ହାରୀକୃତୈର୍ମୌକ୍ତିକୈଃ ।
ଵକ୍ଷୋଜନ୍ମତୁଷାରଶୈଲକଟକେ ସଂଚାରମାତନ୍ଵତୀ
କାମାକ୍ଷ୍ୟା ମୃଦୁଲସ୍ମିତଦ୍ୟୁତିମୟୀ ଭାଗୀରଥୀ ଭାସତେ ॥ ୧୪ ॥
କମ୍ବୋର୍ଵଂଶପରମ୍ପରା ଇଵ କୃପାସନ୍ତାନଵଲ୍ଲୀଭୁଵଃ
ସମ୍ଫୁଲ୍ଲସ୍ତବକା ଇଵ ପ୍ରସୃମରା ମୂର୍ତାଃ ପ୍ରସାଦା ଇଵ ।
ଵାକ୍ପୀୟୂଷକଣା ଇଵ ତ୍ରିପଥଗାପର୍ୟାୟଭେଦା ଇଵ
ଭ୍ରାଜନ୍ତେ ତଵ ମନ୍ଦହାସକିରଣାଃ କାଞ୍ଚୀପୁରୀନାୟିକେ ॥ ୧୫ ॥
ଵକ୍ଷୋଜେ ଘନସାରପତ୍ରରଚନାଭଙ୍ଗୀସପତ୍ନାୟିତା
କଣ୍ଠେ ମୌକ୍ତିକହାରୟଷ୍ଟିକିରଣଵ୍ୟାପାରମୁଦ୍ରାୟିତା ।
ଓଷ୍ଠଶ୍ରୀନିକୁରୁମ୍ବପଲ୍ଲଵପୁଟେ ପ୍ରେଙ୍ଖତ୍ପ୍ରସୂନାୟିତା
କାମାକ୍ଷି ସ୍ଫୁରତାଂ ମଦୀୟହୃଦୟେ ତ୍ଵନ୍ମନ୍ଦହାସପ୍ରଭା ॥ ୧୬ ॥
ୟେଷାଂ ବିନ୍ଦୁରିଵୋପରି ପ୍ରଚଲିତୋ ନାସାଗ୍ରମୁକ୍ତାମଣିଃ
ୟେଷାଂ ଦୀନ ଇଵାଧିକଣ୍ଠମୟତେ ହାରଃ କରାଲମ୍ବନମ୍ ।
ୟେଷାଂ ବନ୍ଧୁରିଵୋଷ୍ଠୟୋରରୁଣିମା ଧତ୍ତେ ସ୍ଵୟଂ ରଞ୍ଜନଂ
କାମାକ୍ଷ୍ୟାଃ ପ୍ରଭଵନ୍ତୁ ତେ ମମ ଶିଵୋଲ୍ଲାସାୟ ହାସାଙ୍କୁରାଃ ॥ ୧୭ ॥
ୟା ଜାଡ୍ୟାମ୍ବୁନିଧିଂ କ୍ଷିଣୋତି ଭଜତାଂ ଵୈରାୟତେ କୈରଵୈଃ
ନିତ୍ୟଂ ୟାଂ ନିୟମେନ ୟା ଚ ୟତତେ କର୍ତୁଂ ତ୍ରିଣେତ୍ରୋତ୍ସଵମ୍ ।
ବିମ୍ବଂ ଚାନ୍ଦ୍ରମସଂ ଚ ଵଞ୍ଚୟତି ୟା ଗର୍ଵେଣ ସା ତାଦୃଶୀ
କାମାକ୍ଷି ସ୍ମିତମଞ୍ଜରୀ ତଵ କଥଂ ଜ୍ୟୋତ୍ସ୍ନେତ୍ୟସୌ କୀର୍ତ୍ୟତେ ॥ ୧୮ ॥
ଆରୁଢା ରଭସାତ୍ପୁରଃ ପୁରରିପୋରାଶ୍ଲେଷଣୋପକ୍ରମେ
ୟା ତେ ମାତରୁପୈତି ଦିଵ୍ୟତଟିନୀଶଙ୍କାକରୀ ତତ୍କ୍ଷଣମ୍ ।
ଓଷ୍ଠୌ ଵେପୟତି ଭ୍ରୁଵୌ କୁଟିଲୟତ୍ୟାନମ୍ରୟତ୍ୟାନନଂ
ତାଂ ଵନ୍ଦେ ମୃଦୁହାସପୂରସୁଷମାମେକାମ୍ରନାଥପ୍ରିୟେ ॥ ୧୯ ॥
ଵକ୍ତ୍ରେନ୍ଦୋସ୍ତଵ ଚନ୍ଦ୍ରିକା ସ୍ମିତତତିର୍ଵଲ୍ଗୁ ସ୍ଫୁରନ୍ତୀ ସତାଂ
ସ୍ୟାଚ୍ଚେଦ୍ୟୁକ୍ତିମିଦଂ ଚକୋରମନସାଂ କାମାକ୍ଷି କୌତୂହଲମ୍ ।
ଏତଚ୍ଚିତ୍ରମହର୍ନିଶଂ ୟଦଧିକାମେଷା ରୁଚିଂ ଗାହତେ
ବିମ୍ବୋଷ୍ଠଦ୍ୟୁମଣିପ୍ରଭାସ୍ଵପି ଚ ୟଦ୍ବିବ୍ବୋକମାଲମ୍ବତେ ॥ ୨୦ ॥
ସାଦୃଶ୍ୟଂ କଲଶାମ୍ବୁଧେର୍ଵହତି ୟତ୍କାମାକ୍ଷି ମନ୍ଦସ୍ମିତଂ
ଶୋଭାମୋଷ୍ଠରୁଚାମ୍ବ ଵିଦ୍ରୁମଭଵାମେତାଦ୍ଭିଦାଂ ବ୍ରୂମହେ ।
ଏକସ୍ମାଦୁଦିତଂ ପୁରା କିଲ ପପୌ ଶର୍ଵଃ ପୁରାଣଃ ପୁମାନ୍
ଏତନ୍ମଧ୍ୟସମୁଦ୍ଭଵଂ ରସୟତେ ମାଧୁର୍ୟରୂପଂ ରସମ୍ ॥ ୨୧ ॥
ଉତ୍ତୁଙ୍ଗସ୍ତନକୁମ୍ଭଶୈଲକଟକେ ଵିସ୍ତାରିକସ୍ତୂରିକା-
ପତ୍ରଶ୍ରୀଜୁଷି ଚଞ୍ଚଲାଃ ସ୍ମିତରୁଚଃ କାମାକ୍ଷି ତେ କୋମଲାଃ ।
ସନ୍ଧ୍ୟାଦୀଧିତିରଞ୍ଜିତା ଇଵ ମୁହୁଃ ସାନ୍ଦ୍ରାଧରଜ୍ୟୋତିଷା
ଵ୍ୟାଲୋଲାମଲଶାରଦାଭ୍ରଶକଲଵ୍ୟାପାରମାତନ୍ଵତେ ॥ ୨୨ ॥
କ୍ଷୀରଂ ଦୂରତ ଏଵ ତିଷ୍ଠତୁ କଥଂ ଵୈମଲ୍ୟମାତ୍ରାଦିଦଂ
ମାତସ୍ତେ ସହପାଠଵୀଥିମୟତାଂ ମନ୍ଦସ୍ମିତୈର୍ମଞ୍ଜୁଲୈଃ ।
କିଂ ଚେୟଂ ତୁ ଭିଦାସ୍ତି ଦୋହନଵଶାଦେକଂ ତୁ ସଂଜାୟତେ
କାମାକ୍ଷି ସ୍ଵୟମର୍ଥିତଂ ପ୍ରଣମତାମନ୍ୟତ୍ତୁ ଦୋଦୁହ୍ୟତେ ॥ ୨୩ ॥
କର୍ପୂରୈରମୃତୈର୍ଜଗଜ୍ଜନନି ତେ କାମାକ୍ଷି ଚନ୍ଦ୍ରାତପୈଃ
ମୁକ୍ତାହାରଗୁଣୈର୍ମୃଣାଲଵଲୟୈର୍ମୁଗ୍ଧସ୍ମିତଶ୍ରୀରିୟମ୍ ।
ଶ୍ରୀକାଞ୍ଚୀପୁରନାୟିକେ ସମତୟା ସଂସ୍ତୂୟତେ ସଜ୍ଜନୈଃ
ତତ୍ତାଦୃଙ୍ମମ ତାପଶାନ୍ତିଵିଧୟେ କିଂ ଦେଵି ମନ୍ଦାୟତେ ॥ ୨୪ ॥
ମଧ୍ୟେଗର୍ଭିତମଞ୍ଜୁଵାକ୍ୟଲହରୀମାଧ୍ଵୀଝରୀଶୀତଲା
ମନ୍ଦାରସ୍ତବକାୟତେ ଜନନି ତେ ମନ୍ଦସ୍ମିତାଂଶୁଚ୍ଛଟା ।
ୟସ୍ୟା ଵର୍ଧୟିତୁଂ ମୁହୁର୍ଵିକସନଂ କାମାକ୍ଷି କାମଦ୍ରୁହୋ
ଵଲ୍ଗୁର୍ଵୀକ୍ଷଣଵିଭ୍ରମଵ୍ୟତିକରୋ ଵାସନ୍ତମାସାୟତେ ॥ ୨୫ ॥
ବିମ୍ବୋଷ୍ଠଦ୍ୟୁତିପୁଞ୍ଜରଞ୍ଜିତରୁଚିସ୍ତ୍ଵନ୍ମନ୍ଦହାସଚ୍ଛଟା ।
କଲ୍ୟାଣଂ ଗିରିସାର୍ଵଭୌମତନୟେ କଲ୍ଲୋଲୟତ୍ଵାଶୁ ମେ ।
ଫୁଲ୍ଲନ୍ମଲ୍ଲିପିନଦ୍ଧହଲ୍ଲକମୟୀ ମାଲେଵ ୟା ପେଶଲା
ଶ୍ରୀକାଞ୍ଚୀଶ୍ଵରି ମାରମର୍ଦିତୁରୁରୋମଧ୍ୟେ ମୁହୁର୍ଲମ୍ବତେ ॥ ୨୬ ॥
ବିଭ୍ରାଣା ଶରଦଭ୍ରଵିଭ୍ରମଦଶାଂ ଵିଦ୍ୟୋତମାନାପ୍ୟସୋ
କାମାକ୍ଷି ସ୍ମିତମଞ୍ଜରୀ କିରତି ତେ କାରୁଣ୍ୟଧାରାରସମ୍ ।
ଆଶ୍ଚର୍ୟଂ ଶିଶିରୀକରୋତି ଜଗତୀଶ୍ଚାଲୋକ୍ୟ ଚୈନାମହୋ
କାମଂ ଖେଲତି ନୀଲକଣ୍ଠହୃଦୟଂ କୌତୂହଲାନ୍ଦୋଲିତମ୍ ॥ ୨୭ ॥
ପ୍ରେଙ୍ଖତ୍ପ୍ରୌଢକଟାକ୍ଷକୁଞ୍ଜକୁହରେଷ୍ଵତ୍ୟଚ୍ଛଗୁଚ୍ଛାୟିତଂ
ଵକ୍ତ୍ରେନ୍ଦୁଚ୍ଛଵିସିନ୍ଧୁଵୀଚିନିଚୟେ ଫେନପ୍ରତାନାୟିତମ୍ ।
ନୈରନ୍ତର୍ୟଵିଜୃମ୍ଭିତସ୍ତନତଟେ ନୈଚୋଲପଟ୍ଟାୟିତଂ
କାଲୁଷ୍ୟଂ କବଲୀକରୋତୁ ମମ ତେ କାମାକ୍ଷି ମନ୍ଦସ୍ମିତମ୍ ॥ ୨୮ ॥
ପୀୟୂଷଂ ତଵ ମନ୍ଥରସ୍ମିତମିତି ଵ୍ୟର୍ଥୈଵ ସାପପ୍ରଥା
କାମାକ୍ଷି ଧ୍ରୁଵମୀଦୃଶଂ ୟଦି ଭଵେଦେତତ୍କଥଂ ଵା ଶିଵେ ।
ମନ୍ଦାରସ୍ୟ କଥାଲଵଂ ନ ସହତେ ମଥ୍ନାତି ମନ୍ଦାକିନୀ-
ମିନ୍ଦୁଂ ନିନ୍ଦତି କୀର୍ତିତେଽପି କଲଶୀପାଥୋଧିମୀର୍ଷ୍ୟାୟତେ ॥ ୨୯ ॥
ଵିଶ୍ଵେଷାଂ ନୟନୋତ୍ସଵଂ ଵିତନୁତାଂ ଵିଦ୍ୟୋତତାଂ ଚନ୍ଦ୍ରମା
ଵିଖ୍ୟାତୋ ମଦନାନ୍ତକେନ ମୁକୁଟୀମଧ୍ୟେ ଚ ସଂମାନ୍ୟତାମ୍ ।
ଆଃ କିଂ ଜାତମନେନ ହାସସୁଷମାମାଲୋକ୍ୟ କାମାକ୍ଷି ତେ
କାଲଙ୍କୀମଵଲମ୍ବତେ ଖଲୁ ଦଶାଂ କଲ୍ମାଷହୀନୋଽପ୍ୟସୌ ॥ ୩୦ ॥
ଚେତଃ ଶୀତଲୟନ୍ତୁ ନଃ ପଶୁପତେରାନନ୍ଦଜୀଵାତଵୋ
ନମ୍ରାଣାଂ ନୟନାଧ୍ଵସୀମସୁ ଶରଚ୍ଚନ୍ଦ୍ରାତପୋପକ୍ରମାଃ ।
ସଂସାରାଖ୍ୟସରୋରୁହାକରଖଲୀକାରେ ତୁଷାରୋତ୍କରାଃ
କାମାକ୍ଷି ସ୍ମରକୀର୍ତିବୀଜନିକରାସ୍ତ୍ଵନ୍ମନ୍ଦହାସାଙ୍କୁରାଃ ॥ ୩୧ ॥
କର୍ମୌଘାଖ୍ୟତମଃକଚାକଚିକରାନ୍କାମାକ୍ଷି ସଂଚିନ୍ତୟେ
ତ୍ଵନ୍ମନ୍ଦସ୍ମିତରୋଚିଷାଂ ତ୍ରିଭୁଵନକ୍ଷେମଂକରାନଙ୍କୁରାନ୍ ।
ୟେ ଵକ୍ତ୍ରଂ ଶିଶିରଶ୍ରିୟୋ ଵିକସିତଂ ଚନ୍ଦ୍ରାତପାମ୍ଭୋରୁହ-
ଦ୍ଵେଷୋଦ୍ଧେଷୋଣଚାତୁରୀମିଵ ତିରସ୍କର୍ତୁଂ ପରିଷ୍କୁର୍ଵତେ ॥ ୩୨ ॥
କୁର୍ୟୁର୍ନଃ କୁଲଶୈଲରାଜତନୟେ କୂଲଂକଷଂ ମଙ୍ଗଲଂ
କୁନ୍ଦସ୍ପର୍ଧନଚୁଞ୍ଚଵସ୍ତଵ ଶିଵେ ମନ୍ଦସ୍ମିତପ୍ରକ୍ରମାଃ ।
ୟେ କାମାକ୍ଷି ସମସ୍ତସାକ୍ଷିନୟନଂ ସନ୍ତୋଷୟନ୍ତୀଶ୍ଵରଂ
କର୍ପୂରପ୍ରକରା ଇଵ ପ୍ରସୃମରାଃ ପୁଂସାମସାଧାରଣାଃ ॥ ୩୩ ॥
କମ୍ରେଣ ସ୍ନପୟସ୍ଵ କର୍ମକୁହନାଚୋରେଣ ମାରାଗମ-
ଵ୍ୟାଖ୍ୟାଶିକ୍ଷଣଦୀକ୍ଷିତେନ ଵିଦୁଷାମକ୍ଷୀଣଲକ୍ଷ୍ମୀପୁଷା ।
କାମାକ୍ଷି ସ୍ମିତକନ୍ଦଲେନ କଲୁଷସ୍ଫୋଟକ୍ରିୟାଚୁଞ୍ଚୁନା
କାରୁଣ୍ୟାମୃତଵୀଚିକାଵିହରଣପ୍ରାଚୁର୍ୟଧୁର୍ୟେଣ ମାମ୍ ॥ ୩୪ ॥
ତ୍ଵନ୍ମନ୍ଦସ୍ମିତକନ୍ଦଲସ୍ୟ ନିୟତଂ କାମାକ୍ଷି ଶଙ୍କାମହେ
ବିମ୍ବଃ କଶ୍ଚନ ନୂତନଃ ପ୍ରଚଲିତୋ ନୈଶାକରଃ ଶୀକରଃ ।
କିଂଚ କ୍ଷୀରପୟୋନିଧିଃ ପ୍ରତିନିଧିଃ ସ୍ଵର୍ଵାହିନୀଵୀଚିକା-
ବିବ୍ଵୋକୋଽପି ଵିଡମ୍ବ ଏଵ କୁହନା ମଲ୍ଲୀମତଲ୍ଲୀରୁଚଃ ॥ ୩୫ ॥
ଦୁଷ୍କର୍ମାର୍କନିସର୍ଗକର୍କଶମହସ୍ସମ୍ପର୍କତପତଂ ମିଲ-
ତ୍ପଙ୍କଂ ଶଙ୍କରଵଲ୍ଲଭେ ମମ ମନଃ କାଞ୍ଚୀପୁରାଲଂକ୍ରିୟେ ।
ଅମ୍ବ ତ୍ଵନ୍ମୃଦୁଲସ୍ମିତାମୃତରସେ ମଙ୍କ୍ତ୍ଵା ଵିଧୂୟ ଵ୍ୟଥା-
ମାନନ୍ଦୋଦୟସୌଧଶୃଙ୍ଗପଦଵୀମାରୋଢୁମାକାଙ୍କ୍ଷତି ॥ ୩୬ ॥
ନମ୍ରାଣାଂ ନଗରାଜଶେଖରସୁତେ ନାକାଲୟାନାଂ ପୁରଃ
କାମାକ୍ଷି ତ୍ଵରୟା ଵିପତ୍ପ୍ରଶମେନ କାରୁଣ୍ୟଧାରାଃ କିରନ୍ ।
ଆଗଚ୍ଛନ୍ତମନୁଗ୍ରହଂ ପ୍ରକଟୟନ୍ନାନନ୍ଦବୀଜାନି ତେ
ନାସୀରେ ମୃଦୁହାସ ଏଵ ତନୁତେ ନାଥେ ସୁଧାଶୀତଲଃ ॥ ୩୭ ॥
କାମାକ୍ଷି ପ୍ରଥମାନଵିଭ୍ରମନିଧିଃ କନ୍ଦର୍ପଦର୍ପପ୍ରସୂଃ
ମୁଗ୍ଧସ୍ତେ ମୃଦୁହାସ ଏଵ ଗିରିଜେ ମୁଷ୍ଣାତୁ ମେ କିଲ୍ବିଷମ୍ ।
ୟଂ ଦ୍ରଷ୍ଟୁଂ ଵିହିତେ କରଗ୍ରହ ଉମେ ଶମ୍ଭୁସ୍ତ୍ରପାମୀଲିତଂ
ସ୍ଵୈରଂ କାରୟତି ସ୍ମ ତାଣ୍ଡଵଵିନୋଦାନନ୍ଦିନା ତଣ୍ଡୁନା ॥ ୩୮ ॥
କ୍ଷୁଣ୍ଣଂ କେନଚିଦେଵ ଧୀରମନସା କୁତ୍ରାପି ନାନାଜନୈଃ
କର୍ମଗ୍ରନ୍ଥିନିୟନ୍ତ୍ରିତୈରସୁଗମଂ କାମାକ୍ଷି ସାମାନ୍ୟତଃ ।
ମୁଗ୍ଧୈର୍ଦ୍ରୁଷ୍ଟୁମଶକ୍ୟମେଵ ମନସା ମୂଢସୟ ମେ ମୌକ୍ତିକଂ
ମାର୍ଗଂ ଦର୍ଶୟତୁ ପ୍ରଦୀପ ଇଵ ତେ ମନ୍ଦସ୍ମିତଶ୍ରୀରିୟମ୍ ॥ ୩୯ ॥
ଜ୍ୟୋତ୍ସ୍ନାକାନ୍ତିଭିରେଵ ନିର୍ମଲତରଂ ନୈଶାକରଂ ମଣ୍ଡଲଂ
ହଂସୈରେଵ ଶରଦ୍ଵିଲାସସମୟେ ଵ୍ୟାକୋଚମମ୍ଭୋରୁହମ୍ ।
ସ୍ଵଚ୍ଛୈରେଵ ଵିକସ୍ଵରୈରୁଡୁଗୁଣୈଃ କାମାକ୍ଷି ବିମ୍ବଂ ଦିଵଃ
ପୁଣ୍ୟୈରେଵ ମୃଦୁସ୍ମିତୈସ୍ତଵ ମୁଖଂ ପୁଷ୍ଣାତି ଶୋଭାଭରମ୍ ॥ ୪୦ ॥
ମାନଗ୍ରନ୍ଥିଵିଧୁନ୍ତୁଦେନ ରଭସାଦାସ୍ଵାଦ୍ୟମାନେ ନଵ-
ପ୍ରେମାଡମ୍ବରପୂର୍ଣିମାହିମକରେ କାମାକ୍ଷି ତେ ତତ୍କ୍ଷଣମ୍ ।
ଆଲୋକ୍ୟ ସ୍ମିତଚନ୍ଦ୍ରିକାଂ ପୁନରିମାମୁନ୍ମୀଲନଂ ଜଗ୍ମୁଷୀଂ
ଚେତଃ ଶୀଲୟତେ ଚକୋରଚରିତଂ ଚନ୍ଦ୍ରାର୍ଧଚୂଡାମଣେଃ ॥ ୪୧ ॥
କାମାକ୍ଷି ସ୍ମିତମଞ୍ଜରୀଂ ତଵ ଭଜେ ୟସ୍ୟାସ୍ତ୍ଵିଷାମଙ୍କୁରା-
ନାପୀନସ୍ତନପାନଲାଲସତୟା ନିଶ୍ଶଙ୍କମଙ୍କେଶୟଃ ।
ଊର୍ଧ୍ଵଂ ଵୀକ୍ଷ୍ୟ ଵିକର୍ଷତି ପ୍ରସୃମରାନୁଦ୍ଦାମୟା ଶୁଣ୍ଡୟା
ସୂନୁସୁତେ ବିସଶଙ୍କୟାଶୁ କୁହନାଦନ୍ତାଵଲଗ୍ରାମଣୀଃ ॥ ୪୨ ॥
ଗାଢାଶ୍ଲେଷଵିମର୍ଦସମ୍ଭ୍ରମଵଶାଦୁଦ୍ଦାମମୁକ୍ତାଗୁଣ-
ପ୍ରାଲମ୍ବେ କୁଚକୁମ୍ଭୟୋର୍ଵିଗଲିତେ ଦକ୍ଷଦ୍ଵିଷୋ ଵକ୍ଷସି ।
ୟା ସଖ୍ୟେନ ପିନହ୍ୟତି ପ୍ରଚୁରୟା ଭାସା ତଦୀୟାଂ ଦଶାଂ
ସା ମେ ଖେଲତୁ କାମକୋଟି ହୃଦୟେ ସାନ୍ଦ୍ରସ୍ମିତାଂଶୁଚ୍ଛଟା ॥ ୪୩ ॥
ମନ୍ଦାରେ ତଵ ମନ୍ଥରସ୍ମିତରୁଚାଂ ମାତ୍ସର୍ୟମାଲୋକ୍ୟତେ
କାମାକ୍ଷି ସ୍ମରଶାସନେ ଚ ନିୟତୋ ରାଗୋଦୟୋ ଲକ୍ଷ୍ୟତେ ।
ଚାନ୍ଦ୍ରୀଷୁ ଦ୍ୟୁତିମଞ୍ଜରୀଷୁ ଚ ମହାନ୍ଦ୍ଵେଷାଙ୍କୁରୋ ଦୃଶ୍ୟତେ
ଶୁଦ୍ଧାନାଂ କଥମୀଦୃଶୀ ଗିରିସୁତେଽତିଶୁଦ୍ଧା ଦଶା କଥ୍ୟତାମ୍ ॥ ୪୪ ॥
ପୀୟୂଷଂ ଖଲୁ ପୀୟତେ ସୁରଜନୈର୍ଦୁଗ୍ଧାମ୍ବୁଧିର୍ମଥ୍ୟତେ
ମାହେଶୈଶ୍ଚ ଜଟାକଲାପନିଗଡୈର୍ମନ୍ଦାକିନୀ ନହ୍ୟତେ ।
ଶୀତାଂଶୁଃ ପରିଭୂୟତେ ଚ ତମସା ତସ୍ମାଦନେତାଦୃଶୀ
କାମାକ୍ଷି ସ୍ମିତମଞ୍ଜରୀ ତଵ ଵଚୋଵୈଦଗ୍ଧ୍ୟମୁଲ୍ଲଙ୍ଘତେ ॥ ୪୫ ॥
ଆଶଙ୍କେ ତଵ ମନ୍ଦହାସଲହରୀମନ୍ୟାଦୃଶୀଂ ଚନ୍ଦ୍ରିକା-
ମେକାମ୍ରେଶକୁଟୁମ୍ବିନି ପ୍ରତିପଦଂ ୟସ୍ୟାଃ ପ୍ରଭାସଂଗମେ ।
ଵକ୍ଷୋଜାମ୍ବୁରୁହେ ନ ତେ ରଚୟତଃ କାଂଚିଦ୍ଦଶାଂ କୌଙ୍ମଲୀ-
ମାସ୍ୟାମ୍ଭୋରୁହମମ୍ବ କିଂଚ ଶନକୈରାଲମ୍ବତେ ଫୁଲ୍ଲତାମ୍ ॥ ୪୬ ॥
ଆସ୍ତୀର୍ଣାଧରକାନ୍ତିପଲ୍ଲଵଚୟେ ପାତଂ ମୁହୁର୍ଜଗ୍ମୁଷୀ
ମାରଦ୍ରୋହିଣି କନ୍ଦଲତ୍ସ୍ମରଶରଜ୍ଵାଲାଵଲୀର୍ଵ୍ୟଞ୍ଜତୀ ।
ନିନ୍ଦନ୍ତୀ ଘନସାରହାରଵଲୟଜ୍ୟୋତ୍ସ୍ନାମୃଣାଲାନି ତେ
କାମାକ୍ଷି ସ୍ମିତଚାତୁରୀ ଵିରହିଣୀରୀତିଂ ଜଗାହେତରାମ୍ ॥ ୪୭ ॥
ସୂର୍ୟାଲୋକଵିଧୌ ଵିକାସମଧିକଂ ୟାନ୍ତୀ ହରନ୍ତୀ ତମ-
ସ୍ସନ୍ଦୋହଂ ନମତାଂ ନିଜସ୍ମରଣତୋ ଦୋଷାକରଦ୍ଵେଷିଣୀ ।
ନିର୍ୟାନ୍ତୀ ଵଦନାରଵିନ୍ଦକୁହରାନ୍ନିର୍ଧୂତଜାଡ୍ୟା ନୃଣାଂ
ଶ୍ରୀକାମାକ୍ଷି ତଵ ସ୍ମିତଦ୍ୟୁତିମୟୀ ଚିତ୍ରୀୟତେ ଚନ୍ଦ୍ରିକା ॥ ୪୮ ॥
କୁଣ୍ଠୀକୁର୍ୟୁରମୀ କୁବୋଧଘଟନାମସ୍ମନ୍ମନୋମାଥିନୀଂ
ଶ୍ରୀକାମାକ୍ଷି ଶିଵଂକରାସ୍ତଵ ଶିଵେ ଶ୍ରୀମନ୍ଦହାସାଙ୍କୁରାଃ ।
ୟେ ତନ୍ଵନ୍ତି ନିରନ୍ତରଂ ତରୁଣିମସ୍ତମ୍ବେରମଗ୍ରାମଣୀ-
କୁମ୍ଭଦ୍ଵନ୍ଦ୍ଵଵିଡମ୍ବିନି ସ୍ତନତଟେ ମୁକ୍ତାକୁଥାଡମ୍ବରମ୍ ॥ ୪୯ ॥
ପ୍ରେଙ୍ଖନ୍ତଃ ଶରଦମ୍ବୁଦା ଇଵ ଶନୈଃ ପ୍ରେମାନିଲୈଃ ପ୍ରେରିତା
ମଜ୍ଜନ୍ତୋ ମନ୍ଦନାରିକଣ୍ଠସୁଷମାସିନ୍ଧୌ ମୁହୁର୍ମନ୍ଥରମ୍ ।
ଶ୍ରୀକାମାକ୍ଷି ତଵ ସ୍ମିତାଂଶୁନିକରାଃ ଶ୍ୟାମାୟମାନଶ୍ରିୟୋ
ନୀଲାମ୍ଭୋଧରନୈପୁଣୀଂ ତତ ଇତୋ ନିର୍ନିଦ୍ରୟନ୍ତ୍ୟଞ୍ଜସା ॥ ୫୦ ॥
ଵ୍ୟାପାରଂ ଚତୁରାନନୈକଵିହୃତୌ ଵ୍ୟାକୁର୍ଵତୀ କୁର୍ଵତୀ
ରୁଦ୍ରାକ୍ଷଗ୍ରହଣଂ ମହେଶି ସତତଂ ଵାଗୂର୍ମିକଲ୍ଲୋଲିତା ।
ଉତ୍ଫୁଲ୍ଲଂ ଧଵଲାରଵିନ୍ଦମଧରୀକୃତ୍ୟ ସ୍ଫୁରନ୍ତୀ ସଦା
ଶ୍ରୀକାମାକ୍ଷି ସରସ୍ଵତୀ ଵିଜୟତେ ତ୍ଵନ୍ମନ୍ଦହାସପ୍ରଭା ॥ ୫୧ ॥
କର୍ପୂରଦ୍ୟୁତିତସ୍କରେଣ ମହସା କଲ୍ମାଷୟତ୍ୟାନନଂ
ଶ୍ରୀକାଞ୍ଚୀପୁରନାୟିକେ ପତିରିଵ ଶ୍ରୀମନ୍ଦହାସୋଽପି ତେ ।
ଆଲିଙ୍ଗତ୍ୟତିପୀଵରାଂ ସ୍ତନତଟୀଂ ବିମ୍ବାଧରଂ ଚୁମ୍ବତି
ପ୍ରୌଢଂ ରାଗଭରଂ ଵ୍ୟନକ୍ତି ମନସୋ ଧୈର୍ୟଂ ଧୁନୀତେତରାମ୍ ॥ ୫୨ ॥
ଵୈଶଦ୍ୟେନ ଚ ଵିଶ୍ଵତାପହରଣକ୍ରୀଡାପଟୀୟସ୍ତୟା
ପାଣ୍ଡିତ୍ୟେନ ପଚେଲିମେନ ଜଗତାଂ ନେତ୍ରୋତ୍ସଵୋତ୍ପାଦେନ ।
କାମାକ୍ଷି ସ୍ମିତକନ୍ଦଲୈସ୍ତଵ ତୁଲାମାରୋଢୁମୁଦ୍ୟୋଗିନୀ
ଜ୍ୟୋତ୍ସ୍ନାସୌ ଜଲରାଶିପୋଷଣତୟା ଦୂଷ୍ୟାଂ ପ୍ରପନ୍ନା ଦଶାମ୍ ॥ ୫୩ ॥
ଲାଵଣ୍ୟାମ୍ବୁଜିନୀମୃଣାଲଵଲୟୈଃ ଶୃଙ୍ଗାରଗନ୍ଧଦ୍ଵିପ-
ଗ୍ରାମଣ୍ୟଃ ଶ୍ରୁତିଚାମରୈସ୍ତରୁଣିମସ୍ଵାରାଜ୍ୟତେଜୋଙ୍କୁରୈଃ ।
ଆନନ୍ଦାମୃତସିନ୍ଧୁଵୀଚିପୃଷତୈରାସ୍ୟାବ୍ଜହଂସୈସ୍ତଵ
ଶ୍ରୀକାମାକ୍ଷି ମଥାନ ମନ୍ଦହସିତୈର୍ମତ୍କଂ ମନଃକଲ୍ମଷମ୍ ॥ ୫୪ ॥
ଉତ୍ତୁଙ୍ଗସ୍ତନମଣ୍ଡଲୀପରିଚଲନ୍ମାଣିକ୍ୟହାରଚ୍ଛଟା-
ଚଞ୍ଚଚ୍ଛୋଣିମପୁଞ୍ଜମଧ୍ୟସରଣିଂ ମାତଃ ପରିଷ୍କୁର୍ଵତୀ ।
ୟା ଵୈଦଗ୍ଧ୍ୟମୁପୈତି ଶଂକରଜଟାକାନ୍ତାରଵାଟୀପତ-
ତ୍ସ୍ଵର୍ଵାପୀପୟସଃ ସ୍ମିତଦ୍ୟୁତିରସୌ କାମାକ୍ଷି ତେ ମଞ୍ଜୁଲା ॥ ୫୫ ॥
ସନ୍ନାମୈକଜୁଷା ଜନେନ ସୁଲଭଂ ସଂସୂଚୟନ୍ତୀ ଶନୈ-
ରୁତ୍ତୁଙ୍ଗସ୍ୟ ଚିରାଦନୁଗ୍ରହତରୋରୁତ୍ପତ୍ସ୍ୟମାନଂ ଫଲମ୍ ।
ପ୍ରାଥମ୍ୟେନ ଵିକସ୍ଵରା କୁସୁମଵତ୍ପ୍ରାଗଲ୍ଭ୍ୟମଭ୍ୟେୟୁଷୀ
କାମାକ୍ଷି ସ୍ମିତଚାତୁରୀ ତଵ ମମ କ୍ଷେମଂକରୀ କଲ୍ପତାମ୍ ॥ ୫୬ ॥
ଧାନୁଷ୍କାଗ୍ରସରସ୍ୟ ଲୋଲକୁଟିଲଭ୍ରୂଲେଖୟା ବିଭ୍ରତୋ
ଲୀଲାଲୋକଶିଲୀମୁଖଂ ନଵଵୟସ୍ସାମ୍ରାଜ୍ୟଲକ୍ଷ୍ମୀପୁଷଃ ।
ଜେତୁଂ ମନ୍ମଥମର୍ଦିନଂ ଜନନି ତେ କାମାକ୍ଷି ହାସଃ ସ୍ଵୟଂ
ଵଲ୍ଗୁର୍ଵିଭ୍ରମଭୂଭୃତୋ ଵିତନୁତେ ସେନାପତିପ୍ରକ୍ରିୟାମ୍ ॥ ୫୭ ॥
ୟନ୍ନାକମ୍ପତ କାଲକୂଟକବଲୀକାରେ ଚୁଚୁମ୍ବେ ନ ୟଦ୍-
ଗ୍ଲାନ୍ୟା ଚକ୍ଷୁଷି ରୂଷିତାନଲଶିଖେ ରୁଦ୍ରସ୍ୟ ତତ୍ତାଦୃଶମ୍ ।
ଚେତୋ ୟତ୍ପ୍ରସଭଂ ସ୍ମରଜ୍ଵରଶିଖିଜ୍ଵାଲେନ ଲେଲିହ୍ୟତେ
ତତ୍କାମାକ୍ଷି ତଵ ସ୍ମିତାଂଶୁକଲିକାହେଲାଭଵଂ ପ୍ରାଭଵମ୍ ॥ ୫୮ ॥
ସମ୍ଭିନ୍ନେଵ ସୁପର୍ଵଲୋକତଟିନୀ ଵୀଚୀଚୟୈର୍ୟାମୁନୈଃ
ସଂମିଶ୍ରେଵ ଶଶାଙ୍କଦୀପ୍ତିଲହରୀ ନୀଲୈର୍ମହାନୀରଦୈଃ ।
କାମାକ୍ଷି ସ୍ଫୁରିତା ତଵ ସ୍ମିତରୁଚିଃ କାଲାଞ୍ଜନସ୍ପର୍ଧିନା
କାଲିମ୍ନା କଚରୋଚିଷାଂ ଵ୍ୟତିକରେ କାଂଚିଦ୍ଦଶାମଶ୍ନୁତେ ॥ ୫୯ ॥
ଜାନୀମୋ ଜଗଦୀଶ୍ଵରପ୍ରଣୟିନି ତ୍ଵନ୍ମନ୍ଦହାସପ୍ରଭାଂ
ଶ୍ରୀକାମାକ୍ଷି ସରୋଜିନୀମଭିନଵାମେଷା ୟତଃ ସର୍ଵଦା ।
ଆସ୍ୟେନ୍ଦୋରଵଲୋକେନ ପଶୁପତେରଭ୍ୟେତି ସମ୍ଫୁଲ୍ଲତାଂ
ତନ୍ଦ୍ରାଲୁସ୍ତଦଭାଵ ଏଵ ତନୁତେ ତଦ୍ଵୈପରୀତ୍ୟକ୍ରମମ୍ ॥ ୬୦ ॥
ୟାନ୍ତୀ ଲୋହିତିମାନମଭ୍ରତଟିନୀ ଧାତୁଚ୍ଛଟାକର୍ଦମୈଃ
ଭାନ୍ତୀ ବାଲଗଭସ୍ତିମାଲିକିରଣୈର୍ମେଘାଵଲୀ ଶାରଦୀ ।
ବିମ୍ବୋଷ୍ଠଦ୍ୟୁତିପୁଞ୍ଜଚୁମ୍ବନକଲାଶୋଣାୟମାନେନ ତେ
କାମାକ୍ଷି ସ୍ମିତରୋଚିଷା ସମଦଶାମାରୋଢୁମାକାଙ୍କ୍ଷତେ ॥ ୬୧ ॥
ଶ୍ରୀକାମାକ୍ଷି ମୁଖେନ୍ଦୁଭୂଷଣମିଦଂ ମନ୍ଦସ୍ମିତଂ ତାଵକଂ
ନେତ୍ରାନନ୍ଦକରଂ ତଥା ହିମକରୋ ଗଚ୍ଛେଦ୍ୟଥା ତିଗ୍ମତାମ୍ ।
ଶୀତଂ ଦେଵି ତଥା ୟଥା ହିମଜଲଂ ସନ୍ତାପମୁଦ୍ରାସ୍ପଦଂ
ଶ୍ଵେତଂ କିଂଚ ତଥା ୟଥା ମଲିନତାଂ ଧତ୍ତେ ଚ ମୁକ୍ତାମଣିଃ ॥ ୬୨ ॥
ତ୍ଵନ୍ମନ୍ଦସ୍ମିତମଞ୍ଜରୀଂ ପ୍ରସୃମରାଂ କାମାକ୍ଷି ଚନ୍ଦ୍ରାତପଂ
ସନ୍ତଃ ସନ୍ତତମାମନନ୍ତ୍ୟମଲତା ତଲ୍ଲକ୍ଷଣଂ ଲକ୍ଷ୍ୟତେ ।
ଅସ୍ମାକଂ ନ ଧୁନୋତି ତାପକମଧିକଂ ଧୂନୋତି ନାଭ୍ୟନ୍ତରଂ
ଧ୍ଵାନ୍ତଂ ତତ୍ଖଲୁ ଦୁଃଖିନୋ ଵୟମିଦଂ କେନୋତି ନୋ ଵିଦ୍ମହେ ॥ ୬୩ ॥
ନମ୍ରସ୍ୟ ପ୍ରଣୟପ୍ରରୂଢକଲହଚ୍ଛେଦାୟ ପାଦାବ୍ଜୟୋଃ
ମନ୍ଦଂ ଚନ୍ଦ୍ରକିଶୋରଶେଖରମଣେଃ କାମାକ୍ଷି ରାଗେଣ ତେ ।
ବନ୍ଧୂକପ୍ରସଵଶ୍ରିୟଂ ଜିତଵତୋ ବଂହୀୟସୀଂ ତାଦୃଶୀଂ
ବିମ୍ବୋଷ୍ଠସ୍ୟ ରୁଚିଂ ନିରସ୍ୟ ହସିତଜ୍ୟୋତ୍ସ୍ନା ଵୟସ୍ୟାୟତେ ॥ ୬୪ ॥
ମୁକ୍ତାନାଂ ପରିମୋଚନଂ ଵିଦଧତସ୍ତତ୍ପ୍ରୀତିନିଷ୍ପାଦିନୀ
ଭୂୟୋ ଦୂରତ ଏଵ ଧୂତମରୁତସ୍ତତ୍ପାଲନଂ ତନ୍ଵତୀ ।
ଉଦ୍ଭୂତସ୍ୟ ଜଲାନ୍ତରାଦଵିରତଂ ତଦ୍ଦୂରତାଂ ଜଗ୍ମୁଷୀ
କାମାକ୍ଷି ସ୍ମିତମଞ୍ଜରୀ ତଵ କଥଂ କମ୍ବୋସ୍ତୁଲାମଶ୍ନୁତେ ॥ ୬୫ ॥
ଶ୍ରୀକାମାକ୍ଷି ତଵ ସ୍ମିତଦ୍ୟୁତିଝରୀଵୈଦଗ୍ଧ୍ୟଲୀଲାୟିତଂ
ପଶ୍ୟନ୍ତୋଽପି ନିରନ୍ତରଂ ସୁଵିମଲଂମନ୍ୟା ଜଗନ୍ମଣ୍ଡଲେ ।
ଲୋକଂ ହାସୟିତୁଂ କିମର୍ଥମନିଶଂ ପ୍ରାକାଶ୍ୟମାତନ୍ଵତେ
ମନ୍ଦାକ୍ଷଂ ଵିରହୟ୍ୟ ମଙ୍ଗଲତରଂ ମନ୍ଦାରଚନ୍ଦ୍ରାଦୟଃ ॥ ୬୬ ॥
କ୍ଷୀରାବ୍ଧେରପି ଶୈଲରାଜତନୟେ ତ୍ଵନ୍ମନ୍ଦହାସସ୍ୟ ଚ
ଶ୍ରୀକାମାକ୍ଷି ଵଲକ୍ଷିମୋଦୟନିଧେଃ କିଂଚିଦ୍ଭିଦାଂ ବ୍ରୂମହେ ।
ଏକସ୍ମୈ ପୁରୁଷାୟ ଦେଵି ସ ଦଦୌ ଲକ୍ଷ୍ମୀଂ କଦାଚିତ୍ପୁରା
ସର୍ଵେଭ୍ୟୋଽପି ଦଦାତ୍ୟସୌ ତୁ ସତତଂ ଲକ୍ଷ୍ମୀଂ ଚ ଵାଗୀଶ୍ଵରୀମ୍ ॥ ୬୭ ॥
ଶ୍ରୀକାଞ୍ଚୀପୁରରତ୍ନଦୀପକଲିକେ ତାନ୍ୟେଵ ମେନାତ୍ମଜେ
ଚାକୋରାଣି କୁଲାନି ଦେଵି ସୁତରାଂ ଧନ୍ୟାନି ମନ୍ୟାମହେ ।
କମ୍ପାତୀରକୁଟୁମ୍ବଚଂକ୍ରମକଲାଚୁଞ୍ଚୂନି ଚଞ୍ଚୂପୁଟୈଃ
ନିତ୍ୟଂ ୟାନି ତଵ ସ୍ମିତେନ୍ଦୁମହସାମାସ୍ଵାଦମାତନ୍ଵତେ ॥ ୬୮ ॥
ଶୈତ୍ୟପ୍ରକ୍ରମମାଶ୍ରିତୋଽପି ନମତାଂ ଜାଡ୍ୟପ୍ରଥାଂ ଧୂନୟନ୍
ନୈର୍ମଲ୍ୟଂ ପରମଂ ଗତୋଽପି ଗିରିଶଂ ରାଗାକୁଲଂ ଚାରୟନ୍ ।
ଲୀଲାଲାପପୁରସ୍ସରୋଽପି ସତତଂ ଵାଚଂୟମାନ୍ପ୍ରୀଣୟନ୍
କାମାକ୍ଷି ସ୍ମିତରୋଚିଷାଂ ତଵ ସମୁଲ୍ଲାସଃ କଥଂ ଵର୍ଣ୍ୟତେ ॥ ୬୯ ॥
ଶ୍ରୋଣୀଚଞ୍ଚଲମେଖଲାମୁଖରିତଂ ଲୀଲାଗତଂ ମନ୍ଥରଂ
ଭ୍ରୂଵଲ୍ଲୀଚଲନଂ କଟାକ୍ଷଵଲନଂ ମନ୍ଦାକ୍ଷଵୀକ୍ଷାଚଣମ୍ ।
ୟଦ୍ଵୈଦଗ୍ଧ୍ୟମୁଖେନ ମନ୍ମଥରିପୁଂ ସଂମୋହୟନ୍ତ୍ୟଞ୍ଜସା
ଶ୍ରୀକାମାକ୍ଷି ତଵ ସ୍ମିତାୟ ସତତଂ ତସ୍ମୈ ନମ୍ସକୁର୍ମହେ ॥ ୭୦ ॥
ଶ୍ରୀକାମାକ୍ଷି ମନୋଜ୍ଞମନ୍ଦହସିତଜ୍ୟୋତିଷ୍ପ୍ରରୋହେ ତଵ
ସ୍ଫୀତଶ୍ଵେତିମସାର୍ଵଭୌମସରଣିପ୍ରାଗଲ୍ଭ୍ୟମଭ୍ୟେୟୁଷି ।
ଚନ୍ଦ୍ରୋଽୟଂ ୟୁଵରାଜତାଂ କଲୟତେ ଚେଟୀଧୁରଂ ଚନ୍ଦ୍ରିକା
ଶୁଦ୍ଧା ସା ଚ ସୁଧାଝରୀ ସହଚରୀସାଧର୍ମ୍ୟମାଲମ୍ବତେ ॥ ୭୧ ॥
ଜ୍ୟୋତ୍ସ୍ନା କିଂ ତନୁତେ ଫଲଂ ତନୁମତାମୌଷ୍ଣ୍ୟପ୍ରଶାନ୍ତିଂ ଵିନା
ତ୍ଵନ୍ମନ୍ଦସ୍ମିତରୋଚିଷା ତନୁମତାଂ କାମାକ୍ଷି ରୋଚିଷ୍ଣୁନା ।
ସନ୍ତାପୋ ଵିନିଵାର୍ୟତେ ନଵଵୟଃପ୍ରାଚୁର୍ୟମଙ୍କୂର୍ୟତେ
ସୌନ୍ଦର୍ୟଂ ପରିପୂର୍ୟତେ ଜଗତି ସା କୀର୍ତିଶ୍ଚ ସଂଚାର୍ୟତେ ॥ ୭୨ ॥
ଵୈମଲ୍ୟଂ କୁମୁଦଶ୍ରିୟାଂ ହିମରୁଚଃ କାନ୍ତ୍ୟୈଵ ସନ୍ଧୁକ୍ଷ୍ୟତେ
ଜ୍ୟୋତ୍ସ୍ନାରୋଚିରପି ପ୍ରଦୋଷସମୟଂ ପ୍ରାପ୍ୟୈଵ ସମ୍ପଦ୍ୟତେ ।
ସ୍ଵଚ୍ଛତ୍ଵଂ ନଵମୌକ୍ତିକସ୍ୟ ପରମଂ ସଂସ୍କାରତୋ ଦୃଶ୍ୟତେ
କାମାକ୍ଷ୍ୟାଃ ସ୍ମିତଦୀଧିତେର୍ଵିଶଦିମା ନୈସର୍ଗିକୋ ଭାସତେ ॥ ୭୩ ॥
ପ୍ରାକାଶ୍ୟଂ ପରମେଶ୍ଵରପ୍ରଣୟିନି ତ୍ଵନ୍ମନ୍ଦହାସଶ୍ରିୟଃ
ଶ୍ରୀକାମାକ୍ଷି ମମ କ୍ଷିଣୋତୁ ମମତାଵୈଚକ୍ଷଣୀମକ୍ଷୟାମ୍ ।
ୟଦ୍ଭୀତ୍ୟେଵ ନିଲୀୟତେ ହିମକରୋ ମେଘୋଦରେ ଶୁକ୍ତିକା-
ଗର୍ଭେ ମୌକ୍ତିକମଣ୍ଡଲୀ ଚ ସରସୀମଧ୍ୟେ ମୃଣାଲୀ ଚ ସା ॥ ୭୪ ॥
ହେରମ୍ବେ ଚ ଗୁହେ ହର୍ଷଭରିତଂ ଵାତ୍ସଲ୍ୟମଙ୍କୂରୟତ୍
ମାରଦ୍ରୋହିଣି ପୂରୁଷେ ସହଭୁଵଂ ପ୍ରେମାଙ୍କୁରଂ ଵ୍ୟଞ୍ଜୟତ୍ ।
ଆନମ୍ରେଷୁ ଜନେଷୁ ପୂର୍ଣକରୁଣାଵୈଦଗ୍ଧ୍ୟମୁତ୍ତାଲୟତ୍
କାମାକ୍ଷି ସ୍ମିତମଞ୍ଜସା ତଵ କଥଂକାରଂ ମୟା କଥ୍ୟତେ ॥ ୭୫ ॥
ସଂକ୍ରୁଦ୍ଧଦ୍ଵିଜରାଜକୋଽପ୍ୟଵିରତଂ କୁର୍ଵନ୍ଦ୍ଵିଜୈଃ ସଂଗମଂ
ଵାଣୀପଦ୍ଧତିଦୂରଗୋଽପି ସତତଂ ତତ୍ସାହଚର୍ୟଂ ଵହନ୍ ।
ଅଶ୍ରାନ୍ତଂ ପଶୁଦୁର୍ଲଭୋଽପି କଲୟନ୍ପତ୍ୟୌ ପଶୂନାଂ ରତିଂ
ଶ୍ରୀକାମାକ୍ଷି ତଵ ସ୍ମିତାମୃତରସସ୍ୟନ୍ଦୋ ମୟି ସ୍ପନ୍ଦତାମ୍ ॥ ୭୬ ॥
ଶ୍ରୀକାମାକ୍ଷି ମହେଶ୍ଵରେ ନିରୁପମପ୍ରେମାଙ୍କୁରପ୍ରକ୍ରମମ୍ଂ
ନିତ୍ୟଂ ୟଃ ପ୍ରକଟୀକରୋତି ସହଜାମୁନ୍ନିଦ୍ରୟନ୍ମାଧୁରୀମ୍ ।
ତତ୍ତାଦୃକ୍ତଵ ମନ୍ଦହାସମହିମା ମାତଃ କଥଂ ମାନିତାଂ
ତନ୍ମୂର୍ଧ୍ନା ସୁରନିମ୍ନଗାଂ ଚ କଲିକାମିନ୍ଦୋଶ୍ଚ ତାଂ ନିନ୍ଦତି ॥ ୭୭ ॥
ୟେ ମାଧୁର୍ୟଵିହାରମଣ୍ଟପଭୁଵୋ ୟେ ଶୈତ୍ୟମୁଦ୍ରାକରା
ୟେ ଵୈଶଦ୍ୟଦଶାଵିଶେଷସୁଭଗାସ୍ତେ ମନ୍ଦହାସାଙ୍କୁରାଃ ।
କାମାକ୍ଷ୍ୟାଃ ସହଜଂ ଗୁଣତ୍ରୟମିଦଂ ପର୍ୟାୟତଃ କୁର୍ଵତାଂ
ଵାଣୀଗୁମ୍ଫନଡମ୍ବରେ ଚ ହୃଦୟେ କୀର୍ତିପ୍ରରୋହେ ଚ ମେ ॥ ୭୮ ॥
କାମାକ୍ଷ୍ୟା ମୃଦୁଲସ୍ମିତାଂଶୁନିକରା ଦକ୍ଷାନ୍ତକେ ଵୀକ୍ଷଣେ
ମନ୍ଦାକ୍ଷଗ୍ରହିଲା ହିମଦ୍ୟୁତିମୟୂଖାକ୍ଷେପଦୀକ୍ଷାଙ୍କୁରାଃ ।
ଦାକ୍ଷ୍ୟଂ ପକ୍ଷ୍ମଲୟନ୍ତୁ ମାକ୍ଷିକଗୁଡଦ୍ରାକ୍ଷାଭଵଂ ଵାକ୍ଷୁ ମେ
ସୂକ୍ଷ୍ମଂ ମୋକ୍ଷପଥଂ ନିରୀକ୍ଷିତୁମପି ପ୍ରକ୍ଷାଲୟେୟୁର୍ମନଃ ॥ ୭୯ ॥
ଜାତ୍ୟା ଶୀତଶୀତଲାନି ମଧୁରାଣ୍ୟେତାନି ପୂତାନି ତେ
ଗାଙ୍ଗାନୀଵ ପୟାଂସି ଦେଵି ପଟଲାନ୍ୟଲ୍ପସ୍ମିତଜ୍ୟୋତିଷାମ୍ ।
ଏନଃପଙ୍କପରମ୍ପରାମଲିନିତାମେକାମ୍ରନାଥପ୍ରିୟେ
ପ୍ରଜ୍ଞାନାତ୍ସୁତରାଂ ମଦୀୟଧିଷଣାଂ ପ୍ରକ୍ଷାଲୟନ୍ତୁ କ୍ଷଣାତ୍ ॥ ୮୦ ॥
ଅଶ୍ରାନ୍ତଂ ପରତନ୍ତ୍ରିତଃ ପଶୁପତିସ୍ତ୍ଵନ୍ମନ୍ଦହାସାଙ୍କୁରୈଃ
ଶ୍ରୀକାମାକ୍ଷି ତଦୀୟଵର୍ଣସମତାସଙ୍ଗେନ ଶଙ୍କାମହେ ।
ଇନ୍ଦୁଂ ନାକଧୁନୀଂ ଚ ଶେଖରୟତେ ମାଲାଂ ଚ ଧତ୍ତେ ନଵୈଃ
ଵୈକୁଣ୍ଠୈରଵକୁଣ୍ଠନଂ ଚ କୁରୁତେ ଧୂଲୀଚୟୈର୍ଭାସ୍ମନୈଃ ॥ ୮୧ ॥
ଶ୍ରୀକାଞ୍ଚୀପୁରଦେଵତେ ମୃଦୁଵଚସ୍ସୌରଭ୍ୟମୁଦ୍ରାସ୍ପଦଂ
ପ୍ରୌଢପ୍ରେମଲତାନଵୀନକୁସୁମଂ ମନ୍ଦସ୍ମିତଂ ତାଵକମ୍ ।
ମନ୍ଦଂ କନ୍ଦଲତି ପ୍ରିୟସ୍ୟ ଵଦନାଲୋକେ ସମାଭାଷଣେ
ଶ୍ଲକ୍ଷ୍ଣେ କୁଙ୍ମଲତି ପ୍ରରୂଢପୁଲକେ ଚାଶ୍ଲୋଷଣେ ଫୁଲ୍ଲତି ॥ ୮୨ ॥
କିଂ ତ୍ରୈସ୍ରୋତସମମ୍ବିକେ ପରିଣତଂ ସ୍ରୋତଶ୍ଚତୁର୍ଥଂ ନଵଂ
ପୀୟୂଷସ୍ୟ ସମସ୍ତତାପହରଣଂ କିଂଵା ଦ୍ଵିତୀୟଂ ଵପୁଃ ।
କିଂସ୍ଵିତ୍ତ୍ଵନ୍ନିକଟଂ ଗତଂ ମଧୁରିମାଭ୍ୟାସାୟ ଗଵ୍ୟଂ ପୟଃ
ଶ୍ରୀକାଞ୍ଚୀପୁରନାୟକପ୍ରିୟତମେ ମନ୍ଦସ୍ମିତଂ ତାଵକମ୍ ॥ ୮୩ ॥
ଭୂଷା ଵକ୍ତ୍ରସରୋରୁହସ୍ୟ ସହଜା ଵାଚାଂ ସଖୀ ଶାଶ୍ଵତୀ
ନୀଵୀ ଵିଭ୍ରମସନ୍ତତେଃ ପଶୁପତେଃ ସୌଧୀ ଦୃଶାଂ ପାରଣା ।
ଜୀଵାତୁର୍ମଦନଶ୍ରିୟଃ ଶଶିରୁଚେରୁଚ୍ଚାଟନୀ ଦେଵତା
ଶ୍ରୀକାମାକ୍ଷି ଗିରାମଭୂମିମୟତେ ହାସପ୍ରଭାମଞ୍ଜରୀ ॥ ୮୪ ॥
ସୂତିଃ ଶ୍ଵେତିମକନ୍ଦଲସ୍ୟ ଵସତିଃ ଶୃଙ୍ଗାରସାରଶ୍ରିୟଃ
ପୂର୍ତିଃ ସୂକ୍ତିଝରୀରସସ୍ୟ ଲହରୀ କାରୁଣ୍ୟପାଥୋନିଧେଃ ।
ଵାଟୀ କାଚନ କୌସୁମୀ ମଧୁରିମସ୍ଵାରାଜ୍ୟଲକ୍ଷ୍ମ୍ୟାସ୍ତଵ
ଶ୍ରୀକାମାକ୍ଷି ମମାସ୍ତୁ ମଙ୍ଗଲକରୀ ହାସପ୍ରଭାଚାତୁରୀ ॥ ୮୫ ॥
ଜନ୍ତୂନାଂ ଜନିଦୁଃଖମୃତ୍ୟୁଲହରୀସନ୍ତାପନଂ କୃନ୍ତତଃ
ପ୍ରୌଢାନୁଗ୍ରହପୂର୍ଣଶୀତଲରୁଚୋ ନିତ୍ୟୋଦୟଂ ବିଭ୍ରତଃ ।
ଶ୍ରୀକାମାକ୍ଷି ଵିସୃତ୍ଵରା ଇଵ କରା ହାସାଙ୍କୁରାସ୍ତେ ହଠା-
ଦାଲୋକେନ ନିହନ୍ୟୁରନ୍ଧତମସସ୍ତୋମସ୍ୟ ମେ ସନ୍ତତିମ୍ ॥ ୮୬ ॥
ଉତ୍ତୁଙ୍ଗସ୍ତନମଣ୍ଡଲସ୍ୟ ଵିଲସଲ୍ଲାଵଣ୍ୟଲୀଲାନଟୀ-
ରଙ୍ଗସ୍ୟ ସ୍ଫୁଟମୂର୍ଧ୍ଵସୀମନି ମୁହୁଃ ପ୍ରାକାଶ୍ୟମଭ୍ୟେୟୁଷୀ ।
ଶ୍ରୀକାମାକ୍ଷି ତଵ ସ୍ମିତଦ୍ୟୁତିତତିର୍ବିମ୍ବୋଷ୍ଠକାନ୍ତ୍ୟଙ୍କୁରୈଃ
ଚିତ୍ରାଂ ଵିଦ୍ରୁମମୁଦ୍ରିତାଂ ଵିତନୁତେ ମୌକ୍ତୀଂ ଵିତାନଶ୍ରିୟମ୍ ॥ ୮୭ ॥
ସ୍ଵାଭାଵ୍ୟାତ୍ତଵ ଵକ୍ତ୍ରମେଵ ଲଲିତଂ ସନ୍ତୋଷସମ୍ପାଦନଂ
ଶମ୍ଭୋଃ କିଂ ପୁନରଞ୍ଚିତସ୍ମିତରୁଚଃ ପାଣ୍ଡିତ୍ୟପାତ୍ରୀକୃତମ୍ ।
ଅମ୍ଭୋଜଂ ସ୍ଵତ ଏଵ ସର୍ଵଜଗତାଂ ଚକ୍ଷୁଃପ୍ରିୟମ୍ଭାଵୁକଂ
କାମାକ୍ଷି ସ୍ଫୁରିତେ ଶରଦ୍ଵିକସିତେ କୀଦୃଗ୍ଵିଧଂ ଭ୍ରାଜତେ ॥ ୮୮ ॥
ପୁମ୍ଭିର୍ନିର୍ମଲମାନସୌର୍ଵିଦଧତେ ମୈତ୍ରୀଂ ଦୃଢଂ ନିର୍ମଲାଂ
ଲବ୍ଧ୍ଵା କର୍ମଲୟଂ ଚ ନିର୍ମଲତରାଂ କୀର୍ତିଂ ଲଭନ୍ତେତରାମ୍ ।
ସୂକ୍ତିଂ ପକ୍ଷ୍ମଲୟନ୍ତି ନିର୍ମଲତମାଂ ୟତ୍ତାଵକାଃ ସେଵକାଃ
ତତ୍କାମାକ୍ଷି ତଵ ସ୍ମିତସ୍ୟ କଲୟା ନୈର୍ମଲ୍ୟସୀମାନିଧେଃ ॥ ୮୯ ॥
ଆକର୍ଷନ୍ନୟନାନି ନାକିସଦସାଂ ଶୈତ୍ୟେନ ସଂସ୍ତମ୍ଭୟ-
ନ୍ନିନ୍ଦୁଂ କିଂଚ ଵିମୋହୟନ୍ପଶୁପତିଂ ଵିଶ୍ଵାର୍ତିମୁଚ୍ଚାଟୟନ୍ ।
ହିଂସତ୍ସଂସୃତିଡମ୍ବରଂ ତଵ ଶିଵେ ହାସାହ୍ଵୟୋ ମାନ୍ତ୍ରିକଃ
ଶ୍ରୀକାମାକ୍ଷି ମଦୀୟମାନସତମୋଵିଦ୍ଵେଷଣେ ଚେଷ୍ଟତାମ୍ ॥ ୯୦ ॥
କ୍ଷେପୀୟଃ କ୍ଷପୟନ୍ତୁ କଲ୍ମଷଭୟାନ୍ୟସ୍ମାକମଲ୍ପସ୍ମିତ-
ଜ୍ୟୋତିର୍ମଣ୍ଡଲଚଂକ୍ରମାସ୍ତଵ ଶିଵେ କାମାକ୍ଷି ରୋଚିଷ୍ଣଵଃ ।
ପୀଡାକର୍ମଠକର୍ମଘର୍ମସମୟଵ୍ୟାପାରତାପାନଲ-
ଶ୍ରୀପାତା ନଵହର୍ଷଵର୍ଷଣସୁଧାସ୍ରୋତସ୍ଵିନୀଶୀକରାଃ ॥ ୯୧ ॥
ଶ୍ରୀକାମାକ୍ଷି ତଵ ସ୍ମିତୈନ୍ଦଵମହଃପୂରେ ପରିମ୍ଫୂର୍ଜତି
ପ୍ରୌଢାଂ ଵାରିଧିଚାତୁରୀଂ କଲୟତେ ଭକ୍ତାତ୍ମନାଂ ପ୍ରାତିଭମ୍ ।
ଦୌର୍ଗତ୍ୟପ୍ରସରାସ୍ତମଃପଟଲିକାସାଧର୍ମ୍ୟମାବିଭ୍ରତେ
ସର୍ଵଂ କୈରଵସାହଚର୍ୟପଦଵୀରୀତିଂ ଵିଧତ୍ତେ ପରମ୍ ॥ ୯୨ ॥
ମନ୍ଦାରାଦିଷୁ ମନ୍ମଥାରିମହିଷି ପ୍ରାକାଶ୍ୟରୀତିଂ ନିଜାଂ
କାଦାଚିତ୍କତୟା ଵିଶଙ୍କ୍ୟ ବହୁଶୋ ଵୈଶଦ୍ୟମୁଦ୍ରାଗୁଣଃ ।
ସାତତ୍ୟେନ ତଵ ସ୍ମିତେ ଵିତନୁତେ ସ୍ଵୈରାସନାଵାସନାମ୍ ॥ ୯୩ ॥
ଇନ୍ଧାନେ ଭଵଵୀତିହୋତ୍ରନିଵହେ କର୍ମୌଘଚଣ୍ଡାନିଲ-
ପ୍ରୌଢିମ୍ନା ବହୁଲୀକୃତେ ନିପତିତଂ ସନ୍ତାପଚିନ୍ତାକୁଲମ୍ ।
ମାତର୍ମାଂ ପରିଷିଞ୍ଚ କିଂଚିଦମଲୈଃ ପୀୟୂଷଵର୍ଷୈରିଵ
ଶ୍ରୀକାମାକ୍ଷି ତଵ ସ୍ମିତଦ୍ୟୁତିକଣୈଃ ଶୈଶିର୍ୟଲୀଲାକରୈଃ ॥ ୯୪ ॥
ଭାଷାୟା ରସନାଗ୍ରଖେଲନଜୁଷଃ ଶୃଙ୍ଗାରମୁଦ୍ରାସଖୀ-
ଲୀଲାଜାତରତେଃ ସୁଖେନ ନିୟମସ୍ନାନାୟ ମେନାତ୍ମଜେ ।
ଶ୍ରୀକାମାକ୍ଷି ସୁଧାମୟୀଵ ଶିଶିରା ସ୍ରୋତସ୍ଵିନୀ ତାଵକୀ
ଗାଢାନନ୍ଦତରଙ୍ଗିତା ଵିଜୟତେ ହାସପ୍ରଭାଚାତୁରୀ ॥ ୯୫ ॥
ସନ୍ତାପଂ ଵିରଲୀକରୋତୁ ସକଲଂ କାମାକ୍ଷି ମଚ୍ଚେତନା
ମଜ୍ଜନ୍ତୀ ମଧୁରସ୍ମିତାମରଧୁନୀକଲ୍ଲୋଲଜାଲେଷୁ ତେ ।
ନୈରନ୍ତର୍ୟମୁପେତ୍ୟ ମନ୍ମଥମରୁଲ୍ଲୋଲେଷୁ ୟେଷୁ ସ୍ଫୁଟଂ
ପ୍ରେମେନ୍ଦୁଃ ପ୍ରତିବିମ୍ବିତୋ ଵିତନୁତେ କୌତୂହଲଂ ଧୂର୍ଜଟେଃ ॥ ୯୬ ॥
ଚେତଃକ୍ଷୀରପୟୋଧିମନ୍ଥରଚଲଦ୍ରାଗାଖ୍ୟମନ୍ଥାଚଲ-
କ୍ଷୋଭଵ୍ୟାପୃତିସମ୍ଭଵାଂ ଜନନି ତେ ମନ୍ଦସ୍ମିତଶ୍ରୀସୁଧାମ୍ ।
ସ୍ଵାଦଂସ୍ଵାଦମୁଦୀତକୌତୁକରସା ନେତ୍ରତ୍ରୟୀ ଶାଂକରୀ
ଶ୍ରୀକାମାକ୍ଷି ନିରନ୍ତରଂ ପରିଣମତ୍ୟାନନ୍ଦଵୀଚୀମୟୀ ॥ ୯୭ ॥
ଆଲୋକେ ତଵ ପଞ୍ଚସାୟକରିପୋରୁଦ୍ଦାମକୌତୂହଲ-
ପ୍ରେଙ୍ଖନ୍ମାରୁତଘଟ୍ଟନପ୍ରଚଲିତାଦାନନ୍ଦଦୁଗ୍ଧାମ୍ବୁଧେଃ ।
କାଚିଦ୍ଵୀଚିରୁଦଞ୍ଚତି ପ୍ରତିନଵା ସଂଵିତ୍ପ୍ରରୋହାତ୍ମିକା
ତାଂ କାମାକ୍ଷି କଵୀଶ୍ଵରାଃ ସ୍ମିତମିତି ଵ୍ୟାକୁର୍ଵତେ ସର୍ଵଦା ॥ ୯୮ ॥
ସୂକ୍ତିଃ ଶୀଲୟତେ କିମଦ୍ରିତନୟେ ମନ୍ଦସ୍ମିତାତ୍ତେ ମୁହୁଃ
ମାଧୁର୍ୟାଗମସମ୍ପ୍ରଦାୟମଥଵା ସୂକ୍ତେର୍ନୁ ମନ୍ଦସ୍ମିତମ୍ ।
ଇତ୍ଥଂ କାମପି ଗାହତେ ମମ ମନଃ ସନ୍ଦେହମାର୍ଗଭ୍ରମିଂ
ଶ୍ରୀକାମାକ୍ଷି ନ ପାରମାର୍ଥ୍ୟସରଣିସ୍ଫୂର୍ତୌ ନିଧତ୍ତେ ପଦମ୍ ॥ ୯୯ ॥
କ୍ରୀଡାଲୋଲକୃପାସରୋରୁହମୁଖୀସୌଧାଙ୍ଗଣେଭ୍ୟଃ କଵି-
ଶ୍ରେଣୀଵାକ୍ପରିପାଟିକାମୃତଝରୀସୂତୀଗୃହେଭ୍ୟଃ ଶିଵେ ।
ନିର୍ଵାଣାଙ୍କୁରସାର୍ଵଭୌମପଦଵୀସିଂହାସନେଭ୍ୟସ୍ତଵ
ଶ୍ରୀକାମାକ୍ଷି ମନୋଜ୍ଞମନ୍ଦହସିତଜ୍ୟୋତିଷ୍କଣେଭ୍ୟୋ ନମଃ ॥ ୧୦୦ ॥
ଆର୍ୟାମେଵ ଵିଭାଵୟନ୍ମନସି ୟଃ ପାଦାରଵିନ୍ଦଂ ପୁରଃ
ପଶ୍ୟନ୍ନାରଭତେ ସ୍ତୁତିଂ ସ ନିୟତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀଜ୍ୟୋତ୍ସ୍ନାଵୟସ୍ୟାନ୍ଵିତାମ୍
ଆରୋହତ୍ୟପଵର୍ଗସୌଧଵଲଭୀମାନନ୍ଦଵୀଚୀମୟୀମ୍ ॥ ୧୦୧ ॥
ମନ୍ଦସ୍ମିତଶତକଂ ସମ୍ପୂର୍ଣମ୍ ॥
ଶ୍ରୀ ମୂକପଞ୍ଚଶତୀ ସମ୍ପୂର୍ଣା ॥
॥ ଓଂ ତତ୍ ସତ୍ ॥