॥ Sri Mukundashtakam Telugu Lyrics ॥
॥ శ్రీముకున్దాష్టకమ్ ॥
శ్రీముకున్దాయ నమః ।
బలభిదుపలకాన్తిద్రోహిణి శ్రీమదఙ్గే
ఘుసృణరసవిలాసైః సుష్ఠు గాన్ధర్వికాయాః ।
స్వమదననృపశోభాం వర్ధయన్ దేహరాజ్యే
ప్రణయతు మమ నేత్రాభీష్టసిద్ధిం ముకున్దః ॥ ౧ ॥
ఉదితవిధుపరార్ధజ్యోతిరుల్లఙ్ఘివక్త్రో
నవతరుణిమరజ్యద్బాల్యశేషాతిరమ్యః ।
పరిషది లలితాలీం దోలయన్ కుణ్డలాభ్యాం
ప్రణయతు మమ నేత్రాభీష్టసిద్ధిం ముకున్దః ॥ ౨ ॥
కనకనివహశోభానన్ది పీతం నితమ్బే
తదుపరి నవరక్తం వస్త్రమిత్థం దధానః ।
ప్రియమివ కిల వర్ణం రాగయుక్తం ప్రియాయాః
ప్రణయతు మమ నేత్రాభీష్టపూర్తిం ముకున్దః ॥ ౩ ॥
సురభికుసుమవృన్ధైర్వాసితామ్భఃసమృద్ధే
ప్రియసరసి నిదాఘే సాయమాలీపరీతామ్ ।
మదనజనకసేకైః ఖేలయన్న్ ఏవ రాధాం
ప్రణయతు మమ నేత్రాభీష్టసిద్ధిం ముకున్దః ॥ ౪ ॥
పరమలమిహ లబ్ధ్వా హన్త గాన్ధర్వికాయాః
పులకితతనురుచ్చైరున్మదస్తత్క్షణేన ।
నిఖిలవిపినదేశాన్ వాసితాన్ ఏవ జిఘ్రన్
ప్రణయతు మమ నేత్రాభీష్టసిద్ధిం ముకున్దః ॥ ౫ ॥
ప్రణిహితభుజదణ్డః స్కన్ధదేశే వరాఙ్గ్యాః
స్మితవికసితగణ్డే కీర్తిదాకన్యకాయాః ।
మనసిజజనిసౌఖ్యం చుమ్బనేనైవ తన్వన్
ప్రణయతు మమ నేత్రాభీష్టసిద్ధిం ముకున్దః ॥ ౬ ॥
ప్రమదదనుజగోష్ఠ్యాః కోఽపి సంవర్తవహ్ని-
ర్వ్రజభువి కిల పిత్రోర్మూర్తిమాన్ స్నేహపుఞ్జః ।
ప్రథమరసమహేన్ద్రః శ్యామలో రాధికాయాః
ప్రణయతు మమ నేత్రాభీష్టసిద్ధిం ముకున్దః ॥ ౭ ॥
స్వకదనకథయాఙ్గీకృత్య మృద్వీం విశాఖాం
కృతచటు లలితాం తు ప్రార్థన్ ప్రౌఢశీలామ్ ।
ప్రణయవిధురరాధామానవిధ్వంసనాయ
ప్రణయతు మమ నేత్రాభీష్టసిద్ధిం ముకున్దః ॥ ౮ ॥
పరిపఠతి ముకున్దస్యాష్టకం కాకుభిర్యః
సకలవిషయసఙ్గాత్ సన్నియమ్యేన్ద్రియాణి ।
వ్రజనవయువరాజో దర్శయన్ స్వం సరాధే
స్వజనగణనమధ్యే తం ప్రియాయాస్తనోతి ॥ ౯ ॥
ఇతి శ్రీరూపగోస్వామివిరచితస్తవమాలాయాం శ్రీముకున్దాష్టకం సమాప్తమ్ ।
– Chant Stotra in Other Languages –
Sri Mukundashtakam Lyrics in Sanskrit » English » Bengali » Gujarati » Kannada » Malayalam » Odia » Tamil