॥ Sri Param Guru Prabhu Vara Telugu Lyrics ॥
॥ శ్రీపరమగురుప్రభువరాష్టకమ్ ॥
ప్రపన్నజననీవృతి జ్వలతి సంసృతిర్జ్వాలయా
యదీయనయనోదితాతులకృపాతివృష్టిర్ద్రుతమ్ ।
విధూయ దవథుం కరోత్యమలభక్తివాప్యౌచితీం
స కృష్ణచరణః ప్రభుః ప్రదిశతు స్వపాదామృతమ్ ॥ ౧ ॥
యదాస్యకమలోదితా వ్రజభువో మహిమ్నాం తతిః
శ్రుతా బత విసర్జయేత్పతికలత్రపుత్రాలయాన్ ।
కలిన్దతనయాతటీ వనకుటీరవాసం నయేత్
స కృష్ణచరణః ప్రభుః ప్రదిశతు స్వపాదామృతమ్ ॥ ౨ ॥
వ్రజామ్బుజదృశాం కథం భవతి భావభూమా కథం
భవేదనుగతిః కథం కిమిహ సాధనం కోఽధికృత్ ।
ఇతి స్ఫుటమవైతి కో యదుపదేశభాగ్యం వినా
స కృష్ణచరణః ప్రభుః ప్రదిశతు స్వపాదామృతమ్ ॥ ౩ ॥
తపస్వియతికర్మిణాం సదసి తార్కికానాం తథా
ప్రతిస్వమతవైదుషీప్రకటనోఢగర్వశ్రియామ్ ।
విరాజతి రవిర్యథా తమసి యః స్వభక్త్యోజసా
స కృష్ణచరణః ప్రభుః ప్రదిశతు స్వపాదామృతమ్ ॥ ౪ ॥
కిమద్య పరిధాస్యతే కిమథ భోజ్యతే రాధయా
సమం మదనమోహనో మదనకోటినిమజ్జితః ।
ఇతీష్టవరివస్యయా నయతి యోఽష్టయామాన్ సదా
స కృష్ణచరణః ప్రభుః ప్రదిశతు స్వపాదామృతమ్ ॥ ౫ ॥
మృదఙ్గకరతాలికామధురకీర్తనే నర్తయన్
జనాన్ సుకృతినో నటన్ స్వయమపి ప్రమోదామ్బుధౌ ।
నిమజ్జతి దృగమ్బుభిఃపులకసఙ్కులఃస్నాతి యః
స కృష్ణచరణః ప్రభుః ప్రదిశతు స్వపాదామృతమ్ ॥ ౬ ॥
సమం భగవతో జనైః ప్రవరభక్తిశాస్త్రోదితం
రసం సురసయన్ముహుః పరిజనాంశ్చ యః స్వాదయన్ ।
స్వశిష్యశతవేష్టితో జయతి చక్రవర్త్యాఖ్యయా
స కృష్ణచరణః ప్రభుః ప్రదిశతు స్వపాదామృతమ్ ॥ ౭ ॥
స్థితిః సురసరిత్తటే మదనమోహనో జీవనం
స్పృహా రసికసఙ్గమే చతురిమా జనోద్ధారణే ।
ఘృణా విషయిషు క్షమా ఝటితి యస్య చానువ్రజే
స కృష్ణచరణః ప్రభుః ప్రదిశతు స్వపాదామృతమ్ ॥ ౮ ॥
ఇదం ప్రభువరాష్టకం పఠతి యస్తదీయో జన-
స్తదఙ్ఘ్రికమలేష్టధీః స ఖలు రఙ్గవత్ప్రేమభాక్ ।
విలాసభృతమఞ్జుల్యాల్యతికృపైకపాత్రీభవన్
నికుఞ్జనిలయాధిపావచిరమేవ తౌ సేవతే ॥ ౯ ॥
ఇతి శ్రీమద్విశ్వనాథచక్రవర్తివిరచితం
శ్రీశ్రీపరమగురుప్రభువరాష్టకం సమ్పూర్ణమ్ ।
– Chant Stotra in Other Languages –
Sri Param Guru Prabhu Vara Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil