॥ Sri Sharada Shatashlokistavah Gujarati Lyrics ॥
શ્રીશારદાશતશ્લોકીસ્તવઃ
કરોતુ પદવિન્યાસાન્કમલાસનકામિની ।
જિહ્વાગ્રે મમ કારુણ્યાજ્જિતચન્દ્રાયુતપ્રભા ॥ ૧ ॥
પાપેઽપિ શારદામ્બ ત્વં કૃત્વા બહુકૃપાં મયિ ।
ગરીયસીં ચાપિ વાઞ્છાં પૂરયાશુ કૃપાનિધે ॥ ૨ ॥
બહુભિસ્ત્વદ્વદનામ્બુજમુલ્લેખૈઃ સ્તોતુમાર્યજનહૃદ્યૈઃ ।
પ્રતિભાં પ્રયચ્છ મહ્યં કરુણાજલધે પયોજભવજાયે ॥ ૩ ॥
ચમ્પકસુમકોરકયુક્ચકિતમૃગીપ્રેક્ષણેન સંયુક્તમ્ ।
શુકકેકિનિનદજુષ્ટં વનમિવ તવ ભાતિ વદનાબ્જમ્ ॥ ૪ ॥
નાસિકાખ્યવરશાખયા યુતં ખઞ્જરીટખગયુગ્મભૂષિતમ્ ।
પક્વબિમ્બફલસંયુતં શિવે ભાતિ ભૂરુહ ઇવાનનં તવ ॥ ૫ ॥
ભક્તકેકિકુલતોષણવ્રતં પદ્મસમ્ભવહૃદમ્બરાશ્રિતમ્ ।
ગદ્યપદ્યમયવારિસન્દદન્મેઘવત્તવ મુખં વિભાતિ મે ॥ ૬ ॥
નેત્રોત્પલાલઙ્કૃતમધ્યભાગં ભ્રૂવલ્લિકાબમ્ભરપઙ્ક્તિરમ્યમ્ ।
પક્ષ્માલિશૈવાલયુતં વિભાતિ તવાસ્યમેતત્સરસીવ વાણિ ॥ ૭ ॥
સુચિલ્લિકાતોરણશોભમાનં વિશાલફાલાઙ્ગણરમ્યરમ્યમ્ ।
ઉત્તુઙ્ગમાણિક્યકિરીટહર્મ્યં વિભાતિ વેશ્મેવ તવામ્બ વક્ત્રમ્ ॥ ૮ ॥
નયનઝષયુતોઽયં દન્તમુક્તાફલાઢ્યો
દશનવસનનામશ્રીપ્રવાલપ્રભાયુક્ ।
પ્રતિપદમભિવૃદ્ધૈઃ કાન્તિપૂરૈઃ સમેતઃ
શરધિરિવ વિભાતિ ત્વન્મુખં વાક્સવિત્રિ ॥ ૯ ॥
કલય કલિવિમોકં કાલકાલાનુજાતે
કલય શુભસમૃદ્ધિં ભૂમિમધ્યેઽખિલેઽસ્મિન્ ।
કલય રુચિસમૃદ્ધિં સ્વસ્વધર્મે જનાનાં
કલય સુખસમૃદ્ધિં સ્વસ્વધર્મે રતાનામ્ ॥ ૧૦ ॥
સ્ફુર હ્રુદયસરોજે શારદે શુભ્રવર્ણે
કલશમમૃતપૂર્ણં માલિકાં બોધમુદ્રામ્ ।
સરસિજનિભહસ્તૈર્બિભ્રતી પુસ્તકં ચ
પ્રણતહૃદયમચ્છં કુર્વતી તૂર્ણમેવ ॥ ૧૧ ॥
પાલય માં કરુણાબ્ધે પરિવારયુતં ત્વિહાપિ શૃઙ્ગાદ્રૌ ।
શારદશશિનિભવદને વરદે લઘુ શારદે સદયે ॥ ૧૨ ॥
ઐન્દ્રીમાશામૈન્દવીં વા કલામિ-
ત્યાદૌ બીજં જાતુ માતસ્ત્વદીયમ્ ।
વ્યાજાદ્વા યો વ્યાહરેત્તસ્ય વક્ત્રા-
દ્દિવ્યા વાચો નિઃસરન્ત્યપ્રયત્નાત્ ॥ ૧૩ ॥
શારદે તવ પદામ્બુજયુગ્મં બોધપુષ્પરસપૂર્ણમજસ્રમ્ ।
મામકં હૃદયસંજ્ઞકમીશે નૈવ મુઞ્ચતુ સરઃ કરુણાબ્ધે ॥ ૧૪ ॥
કથિતાનિ મદીપ્સિતાનિ માતર્મુહુરગ્રે તવ શારદામ્બિકે ત્વમ્ ।
ન હિ પૂરયસે ચિરાયસે કિં મદઘૌઘાત્કિમુ શક્ત્યભાવતો વા ॥ ૧૫ ॥
અદ્યૈવ મત્પ્રાર્થિતમમ્બ દદ્યા યદિ ત્વપારાં કરુણાં વિધાય ।
વેલાવિહીનં સુખમાપ્નુયાં હિ નૈવાત્ર સન્દેહલવોઽપિ કશ્ચિત્ ॥ ૧૬ ॥
કમનીયકવિત્વદાં જવાદ્રમણીયામ્બુજતુલ્યપદ્યુતામ્ ।
શમનીયભયાપહારિણીં રમણીં પદ્મભવસ્ય ભાવયે ॥ ૧૭ ॥
કાઙ્ક્ષે કમલજકામિનિ કમનીયૈઃ પદ્યનિકુરુમ્બૈઃ ।
સ્તોતું વાચાં નિકરં સ્વાયત્તં કલય જગદમ્બ ॥ ૧૮ ॥
કામં મમ ફાલતલે લિખતુ લિપિં દુઃખદાં વિધિઃ સતતમ્ ।
નાહં બિભેમિ માતર્લુમ્પામિ ત્વત્પદાબ્જરજસા તામ્ ॥ ૧૯ ॥
કિં કલ્પવૃક્ષમુખ્યૈઃ કિં કરધૃતમેરુણા શિવેનાપિ ।
કિં કમલયા ચ હૃદિ ચેત્કિઙ્કરસર્વેષ્ટદા વાણી ॥ ૨૦ ॥
તુઙ્ગાતટનિકટચરં ભૃઙ્ગાવલિગર્વહરણચણચિકુરમ્ ।
શ્રીશારદાભિધાનં ભાગ્યં મમ જયતિ શૃઙ્ગશૈલાગ્રે ॥ ૨૧ ॥
નિરણાયિ મયા સમસ્તશાસ્ત્રા-
ણ્યપિ વીક્ષ્ય પ્રણતાર્તિહારિ લોકે ।
પ્રવિહાય તવાઙ્ઘ્રિપઙ્કજાતં
ન પરં વસ્ત્વિતિ વાણિ નિશ્ચિતં તત્ ॥ ૨૨ ॥
પદ્માસનાસિ ખલુ ભારતિ વાગધીશે
પદ્માસનપ્રિયતમે કરલગ્નપદ્મે ।
મત્કં મનોઽમ્બુજમહો સ્વયમેવ માતઃ
શ્રીશારદામ્બ વિજહાસિ કિમત્ર વાચ્યમ્ ॥ ૨૩ ॥
આનીય દિવ્યકુસુમાનિ કિરન્તિ લોકા
યે ત્વત્પદાબ્જયુગલં વચસાં સવિત્રિ ।
તાન્પ્રાપ્તરાજપદવીંસ્તરસા કિરન્તિ
પૌરાઙ્ગનાઃ કુસુમલાજચયેન નૂનમ્ ॥ ૨૪ ॥
આજ્ઞાસીદ્ગૌરવી મે તવ ખલુ કરુણાવારિધિઃ શારદામ્બા
સાષ્ટાઙ્ગં યોગમારાદુપદિશતિ ભવાનૌરસઃ સૂનુરસ્યાઃ ।
ઇત્યપ્યદ્યાપિ માતર્ન હિ ખલુ કરુણા જાયતે મય્યનાથે
કિં વા કુર્યાં વદામ્બ પ્રણતભયહરે શારદે ચાપલોઽહમ્ ॥ ૨૫ ॥
નાહં નિગૃહ્ય કરણાનિ સરોજજાત-
જાયે ત્વદીયપદપઙ્કજયોર્હિ સેવામ્ ।
શક્નોમિ કર્તુમલસાજ્ઞશિખામણિર્ય-
ત્તસ્માન્નિસર્ગકરુણાં કુરુ મય્યનાથે ॥ ૨૬ ॥
વાણિ સરસ્વતિ ભારતિ વાગ્વાદિનિ વારિજાતજનિજાયે ।
કાશ્મીરપુરનિવાસિનિ કામિતફલવૃન્દદાયિનિ નમસ્તે ॥ ૨૭ ॥
શરણં ત્વચ્ચરણં મે નાન્યદ્વાગ્દેવિ નિશ્ચિતં ત્વેતત્ ।
તસ્માત્કુરુ કરુણાં મય્યનન્યશરણે દ્રુતં માતઃ ॥ ૨૮ ॥
શરદભ્રસદભ્રવસ્ત્રવીતા કરદૂરીકૃતપઙ્કજાભિમાના ।
ચરણામ્બુજલગ્નનાકિમૌલિર્વરદા સ્યાન્મમ શારદા દયાર્દ્રા ॥ ૨૯ ॥
સ્થાપય નરકેષુ સદાપ્યથ સુખકાષ્ઠાસુ દિવ્યલોકેષુ ।
ન હિ તત્ર મે વિચારઃ પરં તુ ચિત્તં તવાઙ્ઘ્રિગતમસ્તુ ॥ ૩૦ ॥
શૃઙ્ગાદ્રિવાસલોલે ભૃઙ્ગાહઙ્કારહારિકચભારે ।
તુઙ્ગાતીરવિહારે ગઙ્ગાધરસોદરિ પ્રસીદ મમ ॥ ૩૧ ॥
ઋષ્યશૃઙ્ગજનિભૂમિવિભૂષે કશ્યપાદિમુનિવન્દિતપાદે ।
પશ્યદઙ્ઘ્રિમુખપાલનલોલે વશ્યપઙ્કજભવેઽવ સદા મામ્ ॥ ૩૨ ॥
કમ્બુડમ્બરનિવર્તકકણ્ઠામમ્બુધિં નિરવધિ કરુણયાઃ ।
અમ્બુદપ્રતિમકેશસમૂહામમ્બુજોદ્ભવસખીં કલયેઽહમ્ ॥ ૩૩ ॥
ભર્મગર્વહરસંહનનાભાં શર્મદાં પદસરોજનતેભ્યઃ ।
કર્મભક્તિમુખપદ્ધતિગમ્યાં કુર્મહે મનસિ પદ્મજજાયામ્ ॥ ૩૪ ॥
શમ્ભુસોદરિ શશાઙ્કનિભાસ્યે મન્દબુદ્ધિવિતતેરપિ શીઘ્રમ્ ।
વાક્પ્રદાયિનિ કૃપામૃતરાશે શૃઙ્ગશૈલવરવાસવિલોલે ॥ ૩૫ ॥
તુષ્ટિમેહિ વચસાં જનનિ ત્વં મત્કૃતેન વિધિનાઽવિધિના વા ।
ઐઞ્જપેન પરિપૂરય વાઞ્છાં મામકીં ચ મહતીમપિ શીઘ્રમ્ ॥ ૩૬ ॥
તવૌરસં સૂનુમહો ત્વદીયભક્તાગ્રગણ્યા મમ દેશિકેન્દ્રાઃ ।
પ્રાહુર્યતોઽતો મયિ શારદામ્બ પાપ્યગ્રગણ્યેઽપિ દયા વિધેયા ॥ ૩૭ ॥
તવૌરસં માં સુતમાહુરાર્યાસ્ત્વત્પાદભક્તાગ્રસરા યતોઽતઃ ।
સોઢ્વા મદીયાન્સકલાપરાધાન્પુરો ભવામ્બાશુ ગિરાં સવિત્રિ ॥ ૩૮ ॥
ભક્તેષ્ટપાથોનિધિપૂર્ણચન્દ્રઃ કવિત્વમાકન્દવસન્તકાલઃ ।
જાડ્યાન્ધકારવ્રજપદ્મબન્ધુરમ્બ પ્રણામસ્તવ પાદપદ્મે ॥ ૩૯ ॥
મુખામ્બુજં ભાતુ જગજ્જનન્યા હૃદમ્બુજે મે જિતચન્દ્રબિમ્બમ્ ।
રદામ્બરાધઃકૃતપક્વબિમ્બં મહાઘવિધ્વંસનચઞ્ચ્વજસ્રમ્ ॥ ૪૦ ॥
યાનેન હંસં વદનેન ચન્દ્રં શ્રોણીભરાચ્છૈલપતિં ચ કામમ્ ।
કાઞ્ચિદ્ધસન્તીં કલયે હૃદબ્જે ચન્દ્રાર્ધરાજદ્વરકેશપાશામ્ ॥ ૪૧ ॥
વિસ્મૃત્ય દેહાદિકમમ્બ સમ્યક્સમુચ્ચરંસ્તાવકમન્ત્રરાજમ્ ।
તુઙ્ગાનદીપુણ્યતટે કદાહં સુસૈકતે સ્વૈરગતિર્ભવામિ ॥ ૪૨ ॥
શ્રીશાદિસંસેવિતપાદપદ્મે શ્રીબોધદાનવ્રતબદ્ધદીક્ષે ।
શ્રીકણ્ઠસોદર્યમિતાનુકમ્પે શ્રીશારદામ્બાશુ કૃપાં કુરુષ્વ ॥ ૪૩ ॥
હૃદ્યાનિ પદ્યાનિ વિનિઃસરન્તિ ત્વદઙ્ઘ્રિસમ્પૂજકવક્ત્રપદ્માત્ ।
વિના પ્રયત્નં તરસા ન ચિત્રં ત્વમમ્બ યસ્માદ્વચસાં સવિત્રી ॥ ૪૪ ॥
ગમાગમવિવર્જિતૈરસુભિરન્તરઙ્ગેઽનિશં
ગજાસ્યગુહનન્દિભિઃ સુરવરૈર્મુદા ચિન્તિતે ।
ગજાજિનધરાનુજે ગલિતતૃષ્ણલોકેક્ષિતે
ગતિં મમ શુભાં મતિં સપદિ દેહિ વાગીશ્વરિ ॥ ૪૫ ॥
જલોદ્ભવજભામિનિ પ્રણતસૌખ્યભૂમપ્રદે
જડત્વવિનિવારણવ્રતનિષક્તચેતોઽમ્બુજે ।
જગત્ત્રયનિવાસિભિઃ સતતસેવ્યપાદામ્બુજે
જગજ્જનનિ શારદે જનય સૌખ્યમત્યદ્ભુતમ્ ॥ ૪૬ ॥
મદેભગમનેઽવને નતતતેરનેકૈઃ સુખૈ-
રનારતમજામિતં પ્રવણહૃત્સરોજેઽમ્બિકે ।
કુતો મયિ કૃપા ન તે પ્રસરતિ પ્રસન્ને વદ
પ્રપઞ્ચજનનપ્રભુપ્રણયિનિ પ્રપદ્યેઽદ્ય કમ્ ॥ ૪૭ ॥
કદા વા શ્રુઙ્ગાદ્રૌ વિમલતરતુઙ્ગાપરિસરે
વસન્માતર્વાચાં શિરસિ નિદધાનોઽઞ્જલિપુટમ્ ।
ગિરાં દેવિ બ્રાહ્મિ પ્રણતવરદે ભારતિ જવા-
ત્પ્રસીદેતિ ક્રોશન્નિમિષમિવ નેષ્યામિ દિવસાન્ ॥ ૪૮ ॥
જગન્નાથં ગઙ્ગા વિવિધવૃજિનોઘૈઃ પરિવૃતં
યથાઽરક્ષત્પૂર્વં સકલમપિ હત્વાઽઽશુ દુરિતમ્ ।
પુનશ્ચાન્તે દત્ત્વા કરસરસિજં પૂર્ણકૃપયા
જનૈઃ સદ્ભિઃ પ્રાપ્યાં પરમપદવીં પ્રાપિતવતી ॥ ૪૯ ॥
તથા શાન્તં પાપં સકલમપિ કૃત્વા મમ જવા-
દ્ધૃદમ્ભોજે લગ્નં કુરુ તવ પદામ્ભોરુહયુગમ્ ।
કરામ્ભોજે પશ્ચાત્પરમકૃપયા દેવિ વચસાં
પ્રદત્ત્વાઽઽલમ્બં માં ગમય પદવીં નિર્મલતરામ્ ॥ ૫૦ ॥
દવીયાંસં ત્વેનં પરમકૃપયા દેશિકમુખા-
ત્સમાનીયામ્બ ત્વં તવ પદપયોજાતનિકટમ્ ।
અવિત્વાઽઽપીયન્તં સમયમધુના દેવિ ભજસે
યદૌદાસ્યં તર્હિ ત્રિજગતિ મમાન્યાં વદ ગતિમ્ ॥ ૫૧ ॥
કામં સન્તુ સુરા નિરન્તરનિજધ્યાનાર્ચનાકારિણો
લોકાન્સ્વેપ્સિતસર્વસૌખ્યસહિતાન્કર્તું જગત્યાં કિલ ।
પૂજાધ્યાનજપાદિગન્ધરહિતાંસ્ત્રાતું પુનસ્ત્વાં વિના
નાન્યદ્દૈવતમસ્તિપદ્મજમનઃપદ્માર્ભકાર્કપ્રભે ॥ ૫૨ ॥
કારુણ્યં મયિ ધેહિ માતરનિશં પદ્મોદ્ભવપ્રેયસિ
પ્રારબ્ધં મમ દુષ્ટમાશુ શમય પ્રજ્ઞાં શુભાં યચ્છ મે ।
કર્તું કાવ્યચયં રસૌઘભરિતં શક્તિં દૃઢાં ભક્તિમ-
પ્યંહઃસઞ્ચયવારિણીં તવ પદામ્ભોજે કૃપામ્ભોનિધે ॥ ૫૩ ॥
કુર્યામદ્ય કિમમ્બ ભક્તિરહિતઃ પૂજાં જપં તર્પણં
કિં વૈરાગ્યવિવેકગન્ધરહિતઃ કુર્યાં વિચારં શ્રુતેઃ ।
કિં યોગં પ્રકરોમિ ચઞ્ચલમનાઃ શૃઙ્ગાદ્રિવાસપ્રિયે
ત્વત્પાદપ્રણતિં વિહાય ન ગતિર્મેઽન્યા ગિરાં દેવતે ॥ ૫૪ ॥
જહ્યાન્નૈવ કદાપિ તાવકપદં માતર્મનો મામકં
માન્દ્યધ્વાન્તનિવારણોદ્યતદિનેશાખર્વગર્વાવલિ ।
ગૌરીનાથરમાધવાબ્જભવનૈઃ સમ્ભાવ્યમાનં મુદા
વાક્ચાતુર્યવિધાનલબ્ધસુયશઃસમ્પૂરિતાશામુખમ્ ॥ ૫૫ ॥
તુઙ્ગાતીરવિહારસક્તહૃદયે શૃઙ્ગારજન્માવને
ગઙ્ગાધારિમુખામરેન્દ્રવિનુતેઽનઙ્ગાહિતાપદ્ધરે ।
સઙ્ગાતીતમનોવિહારરસિકે ગઙ્ગાતરઙ્ગાયિતા
ભૃઙ્ગાહઙ્કૃતિભેદદક્ષચિકુરે તુઙ્ગાગિરો દેહિ મે ॥ ૫૬ ॥
ત્વત્પાદામ્બુજપૂજનાપ્તહૃદયામ્ભોજાતશુદ્ધિર્જનઃ
સ્વર્ગં રૌરવમેવ વેત્તિ કમલાનાથાસ્પદં દુઃખદમ્ ।
કારાગારમવૈતિ ચન્દ્રનગરં વાગ્દેવિ કિં વર્ણનૈ-
ર્દૃશ્યં સર્વમુદીક્ષતે સ હિ પુના રજ્જૂરગાદ્યૈઃ સમમ્ ॥ ૫૭ ॥
ત્વત્પાદામ્બુરુહં વિહાય શરણં નાસ્ત્યેવ મેઽન્યદ્ધ્રુવં
વાચાં દેવિ કૃપાપયોજલનિધે કુત્રાપિ વા સ્થાપય ।
અપ્યૂર્ધ્વં ધ્રુવમણ્ડલાદથ ફણીન્દ્રાદપ્યધસ્તત્ર મે
ત્વન્ન્યસ્તૈહિકપારલૌકિકભરસ્ત્વાસે ન કાપિ વ્યથા ॥ ૫૮ ॥
ત્વત્પાદામ્બુરુહં હૃદાખ્યસરસિસ્યાદ્રૂઢમૂલં યદા
વક્ત્રાબ્જે ત્વમિવામ્બ પદ્મનિલયા તિષ્ઠેદ્ગૃહે નિશ્ચલા ।
કીર્તિર્યાસ્યતિ દિક્તટાનપિ નૃપૈઃ સમ્પૂજ્યતા સ્યાત્તદા
વાદે સર્વનયેષ્વપિ પ્રતિભટાન્દૂરીકરોત્યેવ હિ ॥ ૫૯ ॥
માતસ્ત્વત્પદવૈભવં નિગદિતું પ્રારભ્ય નાગેશ્વરા-
સ્વપ્નાચાર્યકવીન્દુશેખરદિનેશાદ્યાઃ પ્રભગ્ના મુહુઃ ।
ક્વાહં તત્કથને જડેષ્વચરમઃ કારુણ્યપાથોનિધે
વાચાં દેવિ સુતસ્ય સાહસમિદં ક્ષન્તવ્યમેવામ્બયા ॥ ૬૦ ॥
માતઃ શૃઙ્ગપુરીનિવાસરસિકે માતઙ્ગકુમ્ભસ્તનિ
પ્રાણાયામમુખૈર્વિનાપિ મનસઃ સ્થૈર્યં દ્રુતં દેહિ મે ।
યેનાહં સુખમન્યદુર્લભમહોરાત્રં ભજામ્યન્વહં
પ્રાપ્સ્યામ્યાત્મપરૈકબોધમચલં નિઃસંશયં શારદે ॥ ૬૧ ॥
વેદાભ્યાસજડોઽપિ યત્કરસરોજાતગ્રહાત્પદ્મભૂ-
શ્ચિત્રં વિશ્વમિદં તનોતિ વિવિધં વીતક્રિયં સક્રિયમ્ ।
તાં તુઙ્ગાતટવાસસક્તહૃદયાં શ્રીચક્રરાજાલયાં
શ્રીમચ્છઙ્કરદેશિકેન્દ્રવિનુતાં શ્રીશારદામ્બાં ભજે ॥ ૬૨ ॥
વૈરાગ્યં દૃઢમમ્બ દેહિ વિષયેષ્વાદ્યન્તદુઃખપ્રદે-
ષ્વામ્નાયાન્તવિચારણે સ્તિરતરાં ચાસ્થાં કૃપાવારિધે ।
પ્રત્યગ્બ્રહ્મણિ ચિત્તસંસ્થિતિવિધિં સમ્બોધયાશ્વેવ માં
ત્વં બ્રૂષે સકલં મમેતિ ગુરવઃ પ્રાહુર્યતઃ શારદે ॥ ૬૩ ॥
કમલાસનવરકામિનિ કરધૃતચિન્મુદ્રિકે કૃપામ્ભોધે ।
કરકલિતામલકાભં તત્ત્વં માં બોધયતુ જગદમ્બ ॥ ૬૪ ॥
કરવિધૃતકીરડિમ્ભાં શરદભ્રસધર્મવસ્ત્રસંવીતામ્ ।
વરદાનનિરતપાણિં સુરદાં પ્રણમામિ શારદાં સદયામ્ ॥ ૬૫ ॥
કામાક્ષીવિપુલાક્ષીમીનાક્ષીત્યાદિનામભિર્માતઃ ।
કાઞ્ચીકાશીમધુરાપુરેષુ ભાસિ ત્વમેવ વાગ્જનનિ ॥ ૬૬ ॥
ચન્દ્રાર્ધશેખરાપરરૂપશ્રીશઙ્કરાર્યકરપૂજ્યે ।
ચન્દ્રાર્ધકૃતવતંસે ચન્દનદિગ્ધે નમામિ વાણિ પદે ॥ ૬૭ ॥
જય જય ચિન્મુદ્રકરે જય જય શૃઙ્ગાદ્રિવિહરણવ્યગ્રે ।
જય જય પદ્મજજાયે જય જય જગદમ્બ શારદે સદયે ॥ ૬૮ ॥
દુર્વસનદત્તશાપપ્રતિપાલનલક્ષ્યતઃ સમસ્તાનામ્ ।
રક્ષાર્થમવનિમધ્યે કૃતચિરવાસાં નમામિ વાગ્દેવીમ્ ॥ ૬૯ ॥
નવનવકવનસમર્થં પટુતરવાગ્ધૂતવાસવાચાર્યમ્ ।
વનજાસનવરમાનિનિ વરદે કુરુ શીઘ્રમઙ્ઘ્રિનતમ્ ॥ ૭૦ ॥
ભગવત્પદમણ્ડનયોર્વાદમહે સકલલોકચિત્રકરે ।
અઙ્ગીકૃતમાધ્યસ્થ્યાં જગદમ્બાં નૌમિ શારદાં સદયામ્ ॥ ૭૧ ॥
સેવાપૂજાનમનવિધયઃ સન્તુ દૂરે નિતાન્તં
કાદાચિત્કા સ્મૃતિરપિ પદામ્ભોજયુગ્મસ્ય તેઽમ્બ ।
મૂકં રઙ્કં કલયતિ સુરાચાર્યમિન્દ્રં ચ વાચા
લક્ષ્મ્યા લોકો ન ચ કલયતે તાં કલેઃ કિં હિ દૌઃસ્થ્યમ્ ॥ ૭૨ ॥
આશાવસ્ત્રઃ સદાત્મન્યવિરતહૃદયસ્ત્યક્તસર્વાનુરાગઃ
કાયે ચક્ષુર્મુખેષ્વપ્યનુદિતમમતઃ ક્વાપિ કસ્મિંશ્ચ કાલે ।
શૈલાગ્રેઽરણ્યકોણે ક્વચિદપિ પુલિને ક્વાપિ રેવાતટે વા
ગઙ્ગાતીરેઽથ તુઙ્ગાતટભુવિ ચ કદા સ્વૈરચારી ભવેયમ્ ॥ ૭૩ ॥
કલ્પન્તાં કામ્યસિદ્ધ્યૈ કલિમલહતયે ચાક્ષયૈશ્વર્યસિદ્ધ્યૈ
કારુણ્યાપારપૂરાઃ કમલભવમનોમોદદાનવ્રતાઢ્યાઃ
કાત્યાયન્યબ્ધિકન્યામુખસુરરમણીકાઙ્ક્ષ્યમાણાઃ કવિત્વ-
પ્રાગ્ભારામ્ભોધિરાકાહિમકરકિરણાઃ શારદામ્બાકટાક્ષાઃ ॥ ૭૪ ॥
કલ્પાદૌ તન્મહિમ્ના કતિપયદિવસેષ્વેવ લુપ્તેષુ માર્ગે-
ષ્વામ્નાયપ્રોદિતેષુ પ્રવરસુરગણૈઃ પ્રાર્થિતઃ પાર્વતીશઃ ।
આમ્નાયાધ્વપ્રવૃદ્ધ્યૈ યતિવરવપુષાગત્ય યાં શૃઙ્ગશૈલે
સંસ્થાપ્યાર્ચાં પ્રચક્રે નિવસતુ વદને શારદા સાદરં સા ॥ ૭૫ ॥
તિષ્ઠામ્યત્રૈવ માતસ્તવ પદયુગલં વીક્ષમાણઃ પ્રમોદા-
ન્નાહં ત્યક્ત્વા તવાઙ્ઘ્રિં સકલસુખકરં ક્વાપિ ગચ્છામિ નૂનમ્ ।
છાયાં મત્કાં વિધત્સ્વ પ્રવચનનમનધ્યાનપૂજાસુ શક્તાં
શુદ્ધામેકાં ત્રિલોકીજનનપટુવિધિપ્રાણકાન્તે નમસ્તે ॥ ૭૬ ॥
ત્વદ્બીજે વર્તમાને વદનસરસિજે દુર્લભં કિં નરાણાં
ધર્મો વાઽર્થશ્ચ કામોઽપ્યથ ચ સકલસન્ત્યાગસાધ્યશ્ચ મોક્ષઃ ।
કામ્યં વા સાર્વભૌમ્યં કમલજદયિતેઽહેતુકારુણ્યપૂર્ણે
શૃઙ્ગાદ્ર્યાવાસલોલે ભવતિ સુરવરારાધ્યપાદારવિન્દે ॥ ૭૭ ॥
દૃષ્ટ્વા ત્વત્પાદપઙ્કેરુહનમનવિધાવુદ્યતાન્ભક્તલોકા-
ન્દૂરં ગચ્છન્તિ રોગા હરિમિવ હરિણા વીક્ષ્ય યદ્વત્સુદૂરમ્ ।
કાલઃ કુત્રાપિ લીનો ભવતિ દિનકરે પ્રોદ્યમાને તમોવ-
ત્સૌખ્યં ચાયુર્યથાબ્જં વિકસતિ વચસાં દેવિ શૃઙ્ગાદ્રિવાસે ॥ ૭૮ ॥
નાહં ત્વત્પાદપૂજામિહ ગુરુચરણારાધનં ચાપ્યકાર્ષં
નાશ્રૌષં તત્ત્વશાસ્ત્રં ન ચ ખલુ મનસઃ સ્થૈર્યલેશોઽપિ કશ્ચિત્ ।
નો વૈરાગ્યં વિવેકો ન ચ મમ સુદૃઢા મોક્ષકાઙ્ક્ષાઽપિ નૂનં
માતઃ કાવા ગતિર્મે સરસિજભવનપ્રાણકાન્તે ન જાને ॥ ૭૯ ॥
નૌમિ ત્વાં શૈવવર્યાઃ શિવ ઇતિ ગણનાથાર્ચકા વિઘ્નહર્તે-
ત્યાર્યેત્યમ્બાઙ્ઘ્રિસક્તા હરિભજનરતા વિષ્ણુરિત્યામનન્તિ ।
યાં તાં સર્વસ્વરૂપાં સકલમુનિમનઃપદ્મસઞ્ચારશીલાં
શૃઙ્ગાદ્ર્યાવાસલોલાં કમલજમહિષીં શારદાં પારદાભામ્ ॥ ૮૦ ॥
યઃ કશ્ચિદ્બુદ્ધિહીનોઽપ્યવિદિતનમનધ્યાનપૂજાવિધાનઃ
કુર્યાદ્યદ્યમ્બ સેવાં તવ પદસરસીજાતસેવારતસ્ય ।
ચિત્રં તસ્યાસ્યમધ્યાત્પ્રસરતિ કવિતા વાહિનીવામરાણાં
સાલઙ્કારા સુવર્ણા સરસપદયુતા યત્નલેશં વિનૈવ ॥ ૮૧ ॥
યાચન્તે નમ્રલોકા વિવિધગુરુરુજાક્રાન્તદેહાઃ પિશાચૈ-
રાવિષ્ટાઙ્ગાશ્ચ તત્તજ્જનિતબહુતરક્લેશનાશાય શીઘ્રમ્ ।
કિં કુર્યાં મન્ત્રયન્ત્રપ્રમુખવિધિપરિજ્ઞાનશૂન્યશ્ચિકિત્સાં
કર્તું ન ત્વત્પદાબ્જસ્મરણલવમૃતે વાણિ જાનેઽત્ર કિઞ્ચિત્ ॥ ૮૨ ॥
રાગદ્વેષાદિદોષૈઃ સતતવિરહિતૈઃ શાન્તિદાન્ત્યાદિયુક્તૈ-
રાચાર્યાઙ્ઘ્ર્યબ્જસેવાકરણપટુતરૈર્લભ્યપાદારવિન્દા ।
મુદ્રાસ્રક્કુમ્ભવિદ્યાઃ કરસલિલરુહૈઃ સન્દધાના પુરસ્તા-
દાસ્તાં વાગ્દેવતા નઃ કલિકૃતવિવિધાપત્તિવિધ્વંસનાય ॥ ૮૩ ॥
વારય પાપકદમ્બં તારય સંસારસાગરં તરસા ।
શોધય ચિત્તસરોજં બોધય પરતત્ત્વમાશુ મામમ્બ ॥ ૮૪ ॥
સચ્ચિદ્રૂપાત્મનિષ્ઠઃ પ્રગલિતસકલાક્ષાદિવૃત્તિઃ શયાનો
ભુઞ્જાનઃ સત્યસૌખ્યં તદિતરસુખતઃ પ્રાપ્તનીરાગભાવઃ ।
પાષાણે વાથ તલ્પે વનભુવિ સદને પાર્થિવસ્યાઽશ્મહેમ્નો-
ર્નાર્યાં મૃત્યૌ ચ તુલ્યઃ સતતસુખિમનાઃ સ્યાં કદા શારદામ્બ ॥ ૮૫ ॥
કિં પાઠયેયં લઘુચન્દ્રિકાં વા કિં વા ત્યજેયં સકલપ્રપઞ્ચમ્ ।
સ્વપ્નેઽદ્ય મે બ્રૂહિ કિમત્ર કાર્યં ડોલાયિતં મામકમમ્બ ચેતઃ ॥ ૮૬ ॥
ત્યાગે વાઽધ્યાપને વા મમ ખલુ ન ગિરાં દેવિ કાપ્યસ્તિ શક્તિ-
સ્ત્વં વૈ સર્વત્ર હેતુર્યદસિ નિરવધિર્વારિરાશિઃ કૃપાયાઃ ।
તસ્માત્સ્વપ્નેઽદ્ય કાર્યં મમ ખલુ નિખિલં બોધયૈવં કુરુષ્વે-
ત્યજ્ઞાનાં બોધનાર્થં ત્વમિહ બહુવિધા અમ્બ મૂર્તીર્બિભર્ષિ ॥ ૮૭ ॥
વિતર વિધિપ્રેયસિ મે વિમલધિયં વાઞ્છિતં ચ તરસૈવ ।
વિષ્ણુમુખામરવન્દ્યે વિધુબિમ્બસમાનવદનકઞ્જાતે ॥ ૮૮ ॥
શારદનીરદસન્નિભવસને વનજાસનાન્તરઙ્ગચરે ।
વરટાવલ્લભયાને વરદે વાગ્દેવિ શારદે પાહિ ॥ ૮૯ ॥
સપ્તદશઘસ્રમવિરતમીશેન સમસ્તવિદ્યાનામ્ ।
વિરચિતવાદાં કુતુકાત્સામોદં નૌમિ વાગ્જનનીમ્ ॥ ૯૦ ॥
સુરવરનિષેવ્યપાદે સુખલવાધૂતકેકિકુલનિનદે
સુરવનવિહારબલદે સુરવરદે પાહિ શારદે સુરદે ॥ ૯૧ ॥
કુન્દરદનેઽમ્બ વાણિ મુકુન્દરવીન્દ્વાદિદેવવર્યેડ્યે ।
કુન્દરકૃપાવશાન્મુકુન્દવરાદ્યાંશ્ચ મે નિધીન્દેહિ ॥ ૯૨ ॥
સ્ફુરશરદિન્દુપ્રતિભટવદને વાગ્દેવિ મામકે મનસિ ।
વરદાનનિરતપાણે સરસિજનયને સરોજજાતસખિ ॥ ૯૩ ॥
અસ્થિરભક્તેર્મમ દેવિ ગિરાં શીઘ્રં દત્ત્વા કાઞ્ચિત્સિદ્ધિમ્ ।
કુરુ સુદૃઢાં મમ તવ પાદાબ્જે ભક્તિં શૃઙ્ગગિરીન્દ્રનિવાસે ॥ ૯૪ ॥
સહમાનસોદરિ સહ પ્રણ્તકૃતા માનહીનમન્તુતતીઃ ।
સહમાનસોદરીત્વં ત્યજ વા યુક્તં યદત્ર કુરુ વાણિ ॥ ૯૫ ॥
વલભિન્મુખનિર્જરવરસેવ્યે કલવચનન્યક્કૃતપિકરાવે ।
જલજપ્રતિભટપદયુગરમ્યે કલય પ્રવરં કૃતિનામેનમ્ ॥ ૯૬ ॥
કરવિલસદ્વરપુસ્તકમાલે શરદબ્જાહઙ્કૃતિહરચેલે ।
અરણીસુમનિભકુઙ્કુમફાલે શરણં મમ ભવ ધૃતશુકબાલે ॥ ૯૭ ॥ var અરણીસુતનિભ
કલયાસક્તિં કમલજદયિતે તુલનાશૂન્યામીમ્મનુવર્યે ।
વલયાઞ્ચિતકરસરસીજાતે લલનાભિઃ સુરવિતતેઃ પૂજ્યે ॥ ૯૮ ॥
શૃઙ્ગક્ષ્માભૃત્કૂટવિહારે તુઙ્ગાતટભૂકૃતસઞ્ચારે ।
વાચાં દેવિ પ્રાર્થિતમર્થં શીઘ્રં દેહિ પ્રણતાયાસ્મૈ ॥ ૯૯ ॥
નાહં સોઢું કાલવિલમ્બં શક્નોમ્યમ્બ પ્રણતપ્રવણે ।
ઈપ્સિતમર્થં દેહિ તદાશુ દ્રુહિણસ્વાન્તામ્બુજબાલઘૃણે ॥ ૧૦૦ ॥
ઇતિ શૃઙ્ગેરિ શ્રીજગદ્ગુરુ શ્રીસચ્ચિદાનન્દશિવાભિનવનૃસિંહ-
ભારતીસ્વામિભિઃ વિરચિતઃ શ્રીશારદાશતશ્લોકીસ્તવઃ સમ્પૂર્ણઃ ।