॥ Sri Svapnavilasamrita Ashtakam Kannada Lyrics ॥
ಶ್ರೀಸ್ವಪ್ನವಿಲಾಸಾಮೃತಾಷ್ಟಕಮ್
ಪ್ರಿಯೇ ! ಸ್ವಪ್ನೇ ದೃಷ್ಟಾ ಸರಿದಿನಸುತೇವಾತ್ರ ಪುಲಿನಂ
ಯಥಾ ವೃನ್ದಾರಣ್ಯೇ ನಟನಪಟವಸ್ತತ್ರ ಬಹವಃ ।
ಮೃದಂಗಾದ್ಯಂ ವಾದ್ಯಂ ವಿವಿಧಮಿಹ ಕಶ್ಚಿದ್ದ್ವಿಜಮಣಿಃ
ಸ ವಿದ್ಯುದ್ಗೌರಾಂಗಃ ಕ್ಷಿಪತಿ ಜಗತೀಂ ಪ್ರೇಮಜಲಧೌ ॥ 1 ॥
ಕದಾಚಿತ್ಕೃಷ್ಣೇತಿ ಪ್ರಲಪತಿ ರುದನ್ ಕರ್ಹಿಚಿದಸೌ
ಕ್ವ ರಾಧೇ ಹಾ ಹೇತಿ ಶ್ವಸಿತಿ ಪತತಿ ಪ್ರೋಂಝತಿ ಧೃತಿಮ್ ।
ನಟತ್ಯುಲ್ಲಾಸೇನ ಕ್ವಚಿದಪಿ ಗಣೈಃ ಸ್ವೈಃ ಪ್ರಣಯಿಭಿ-
ಸ್ತೃಣಾದಿಬ್ರಹ್ಮಾನ್ತಂ ಜಗದತಿತರಾಂ ರೋದಯತಿ ಸಃ ॥ 2 ॥
ತತೋ ಬುದ್ಧಿರ್ಭ್ರಾನ್ತಾ ಮಮ ಸಮಜನಿ ಪ್ರೇಕ್ಷ್ಯ ಕಿಮಹೋ
ಭವೇತ್ಸೋಽಯಂ ಕಾನ್ತಃ ಕಿಮಯಮಹಮೇವಾಸ್ಮಿ ನ ಪರಃ ।
ಅಹಂ ಚೇತ್ಕ್ವ ಪ್ರೇಯಾನ್ಮಮ ಸ ಕಿಲ ಚೇತ್ಕ್ವಾಹಮಿತಿ ಮೇ
ಭ್ರಮೋ ಭೂಯೋ ಭೂಯಾನಭವದಥ ನಿದ್ರಾಂ ಗತವತೀ ॥ 3 ॥
ಪ್ರಿಯೇ ! ದೃಷ್ಟ್ವಾ ತಾಸ್ತಾಃ ಕುತುಕಿನಿ ಮಯಾ ದರ್ಶಿತಚರೀ
ರಮೇಶಾದ್ಯಾ ಮೂರ್ತೀರ್ನ ಖಲು ಭವತೀ ವಿಸ್ಮಯಮಗಾತ್ ।
ಕಥಂ ವಿಪ್ರೋ ವಿಸ್ಮಾಪಯಿತುಮಶಕತ್ತ್ವಾಂ ತವ ಕಥಂ
ತಥಾ ಭ್ರಾನ್ತಿಂ ಧತ್ತೇ ಸ ಹಿ ಭವತಿ ಕೋ ಹನ್ತ ಕಿಮಿದಮ್ ॥ 4 ॥
ಇತಿ ಪ್ರೋಚ್ಯ ಪ್ರೇಷ್ಠಾಂ ಕ್ಷಣಮಥ ಪರಾಮೃಷ್ಯ ರಮಣೋ
ಹಸನ್ನಾಕೂತಜ್ಞಂ ವ್ಯನುದದಥ ತಂ ಕೌಸ್ತುಭಮಣಿಮ್ ।
ತಥಾ ದೀಪ್ತಂ ತೇನೇ ಸಪದಿ ಸ ಯಥಾ ದೃಷ್ಟಮಿವ ತ-
ದ್ವಿಲಾಸಾನಾಂ ಲಕ್ಷ್ಮಂ ಸ್ಥಿರಚರಗಣೈಃ ಸರ್ವಮಭವತ್ ॥ 5 ॥
ವಿಭಾವ್ಯಾಥ ಪ್ರೋಚೇ ಪ್ರಿಯತಮ ಮಯಾ ಜ್ಞಾತಮಖಿಲಂ
ತವಾಕೂತಂ ಯತ್ತ್ವಂ ಸ್ಮಿತಮತನುಥಾಸ್ತತ್ತ್ವಮಸಿ ಸಃ ।
ಸ್ಫುಟಂ ಯನ್ ನಾವದೀರ್ಯದಭಿಮತಿರತ್ರಾಪ್ಯಹಮಿತಿ
ಸ್ಫುರನ್ತೀ ಮೇ ತಸ್ಮಾದಹಮಪಿ ಸ ಏವೇತ್ಯನುಮಿಮೇ ॥ 6 ॥
ಯದಪ್ಯಸ್ಮಾಕೀನಂ ರತಿಪದಮಿದಂ ಕೌಸ್ತುಭಮಣಿಂ
ಪ್ರದೀಪ್ಯಾತ್ರೈವಾದೀದೃಶದಖಿಲಜೀವಾನಪಿ ಭವಾನ್ ।
ಸ್ವಶಕ್ತ್ಯಾವಿರ್ಭೂಯ ಸ್ವಮಖಿಲವಿಲಾಸಂ ಪ್ರತಿಜನಂ
ನಿಗದ್ಯ ಪ್ರೇಮಾಬ್ಧೌ ಪುನರಪಿ ತದಾಧಾಸ್ಯಸಿ ಜಗತ್ ॥ 7 ॥
ಯದುಕ್ತಂ ಗರ್ಗೇಣ ವ್ರಜಪತಿಸಮಕ್ಷಂ ಶ್ರುತಿವಿದಾ
ಭವೇತ್ಪೀತೋ ವರ್ಣಃ ಕ್ವಚಿದಪಿ ತವೈತನ್ ನ ಹಿ ಮೃಷಾ ।
ಅತಃ ಸ್ವಪ್ನಃ ಸತ್ಯೋ ಮಮ ಚ ನ ತದಾ ಭ್ರಾನ್ತಿರಭವತ್
ತ್ವಮೇವಾಸೌ ಸಾಕ್ಷಾದಿಹ ಯದನುಭೂತೋಽಸಿ ತದೃತಮ್ ॥ 8 ॥
ಪಿಬೇದ್ಯಸ್ಯ ಸ್ವಪ್ನಾಮೃತಮಿದಮಹೋ ಚಿತ್ತಮಧುಪಃ
ಸ ಸನ್ದೇಹಸ್ವಪ್ನಾತ್ತ್ವರಿತಮಿಹ ಜಾಗರ್ತಿ ಸುಮತಿಃ ।
ಅವಾಪ್ತಶ್ಚೈತನ್ಯಂ ಪ್ರಣಯಜಲಧೌ ಖೇಲತಿ ಯತೋ
ಭೃಶಂ ಧತ್ತೇ ತಸ್ಮಿನ್ನತುಲಕರುಣಾಂ ಕುಂಜನೃಪತಿಃ ॥ 9 ॥
ಇತಿ ಶ್ರೀವಿಶ್ವನಾಥಚಕ್ರವರ್ತಿಠಕ್ಕುರವಿರಚಿತಸ್ತವಾಮೃತಲಹರ್ಯಾಂ
ಶ್ರೀಸ್ವಪ್ನವಿಲಾಸಾಮೃತಾಷ್ಟಕಂ ಸಮ್ಪೂರ್ಣಮ್ ।
– Chant Stotra in Other Languages –
Sri Svapnavilasamritashtakam Lyrics in Sanskrit » English » Bengali » Gujarati » Malayalam » Odia » Telugu » Tamil