॥ Sri Varahi Anugraha Stotram Telugu Lyrics ॥
॥ వారాహ్యనుగ్రహాష్టకమ్ ॥
ఈశ్వర ఉవాచ
మాతర్జగద్రచననాటకసూత్రధార-
స్త్వద్రూపమాకలయితుం పరమార్థతోఽయమ్ ।
ఈశోఽప్యమీశ్వరపదం సముపైతి తాదృక్-
కోఽన్యః స్తవం కిమివ తావకమాదధాతు ॥ ౧ ॥
నామాని కిన్తు గృణతస్తవ లోకతుణ్డే
నాడమ్బరం స్పృశతి దణ్డధరస్య దణ్డః ।
యల్లేశలమ్బితభవామ్బునిధిర్యతో యత్-
త్వన్నామసంసృతిరియం నను నః స్తుతిస్తే ॥ ౨ ॥
త్వచ్చిన్తనాదరసముల్లసదప్రమేయా-
ఽఽనన్దోదయాత్సముదితః స్ఫుటరోమహర్షః ।
మాతర్నమామి సుదినాని సదేత్యముం త్వా-
మభ్యర్థయేఽర్థమితి పూరయతాద్దయాలో ॥ ౩ ॥
ఇన్ద్రేన్దుమౌలివిధికేశవమౌలిరత్న-
రోచిశ్చయోజ్జ్వలితపాదసరోజయుగ్మే ।
చేతో మతౌ మమ సదా ప్రతిబిమ్బితా త్వం
భూయా భవాని విదధాతు సదోరుహారే ॥ ౪ ॥
లీలోద్ధృతక్షితితలస్య వరాహమూర్తే-
ర్వారాహమూర్తిరఖిలార్థకరీ త్వమేవ ।
ప్రాలేయరశ్మిసుకలోల్లసితావతంసా
త్వం దేవి వామతనుభాగహరా రహస్య ॥ ౫ ॥
త్వామమ్బ తప్తకనకోజ్జ్వలకాన్తిమన్త-
ర్యే చిన్తయన్తి యువతీతనుమాగలాన్తామ్ ।
చక్రాయుధత్రినయనామ్బరపోతృవక్త్రాం
తేషాం పదామ్బుజయుగం ప్రణమన్తి దేవాః ॥ ౬ ॥
త్వత్సేవనస్ఖలిత పాపచయస్య మాత-
ర్మోక్షోఽపి యత్ర న సతాం గణనాముపైతి ।
దేవాసురోరగనృపాలనమస్య పాద-
స్తత్ర శ్రియః పటుగిరః కియదేవమస్తు ॥ ౭ ॥
కిం దుష్కరం త్వయి మనోవిషయం గతాయాం
కిం దుర్లభం త్వయి విధానవదర్చితాయామ్ ।
కిం దుష్కరం త్వయి సకృత్స్మృతిమాగతాయాం
కిం దుర్జయం త్వయి కృతస్తుతివాదపుంసామ్ ॥ ౮ ॥
॥ ఇతి శ్రీ వారాహ్యనుగ్రహాష్టకం సమ్పూర్ణమ్ ॥
– Chant Stotra in Other Languages –
Varahi Slokam » Sri Varahi Anugraha Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil