॥ Sri Vishakhanandabhidhastotram Gujarati Lyrics ॥
શ્રીવિશાખાનન્દાભિધસ્તોત્રમ્
ભાવનામગુણાદીનામૈક્યાત્શ્રીરાધિકૈવ યા ।
કૃષ્ણેન્દોઃ પ્રેયસી સા મે શ્રીવિશાખા પ્રસીદતુ ॥ ૧ ॥
જયતિ શ્રીમતી કાચિદ્વૃન્દારણ્યવિહારિણી ।
વિધાતુસ્તરુણીસૃષ્ટિકૌશલશ્રીઋ ઇહોજ્જ્વલા ॥ ૨ ॥
છિન્નસ્વર્ણસદૃક્ષાઙ્ગી રક્તવસ્ત્રાવગુણ્ઠિની ।
નિર્બન્ધબદ્ધવેણીકા ચારુકાશ્મીરચર્ચિતા ॥ ૩ ॥
દ્વિકાલેન્દુલલાટોદ્યત્કસ્તૂરીતિલકોજ્જ્વલા ।
સ્ફુટકોકનદદ્વન્દ્વ બન્ધુરીકૃતકર્ણિકા ॥ ૪ ॥
વિચિત્રવર્ણવિન્યાસ ચિત્રિતીકૃતવિગ્રહા
કૃષ્ણચોરભયાચ્ચોલી ગુમ્ફીકૃતમણિસ્તની ॥ ૫ ॥
હારમઞ્જીરકેયૂર ચૂડાનાસાગ્રમૌક્તિકૈઃ ।
મુદ્રિકાદિભિરન્યૈશ્ચ ભૂષિતા ભૂષણોત્તમૈઃ ॥ ૬ ॥
સુદીપ્તકજ્જલોદ્દીપ્ત નયનેન્દીવરદ્વય ।
સૌરભોજ્જ્વલતામ્બૂલ મઞ્જુલા શ્રીમુખામ્બુજા ॥ ૭ ॥
સ્મિતલેશલસત્પક્વ ચારુબિમ્બફલાધરા ।
મધુરાલાપપીયૂષ સઞ્જીવિતસખીકુલા ॥ ૮ ॥
વૃષભાનુકુલોત્કીર્તિ વર્ધિકા ભાનુસેવિકા ।
કીર્તિદાખણિરત્નશ્રીઃ શ્રીજિતશ્રીઃ શ્રિયોજ્જ્વલા ॥ ૯ ॥
અનઙ્ગમઞ્જરીજ્યેષ્ઠા શ્રીદામાનન્દદાનુજા ।
મુખરાદૃષ્ટિપીયૂષ વર્તિનપ્ત્રી તદાશ્રિતા ॥ ૧૦ ॥
પૌર્ણમાસીબહિઃખેલત્પ્રાણપઞ્જરસારિકા ।
સુબલપ્રણયોલ્લાસા તત્ર વિન્યસ્તભારકા ॥ ૧૧ ॥
વ્રજેશ્યાઃ કૃષ્ણવત્પ્રેમ પાત્રી તત્રાતિ ભક્તિકા ।
અમ્બાવાત્સલ્યસંસિક્તા રોહિણીઘ્રાતમસ્તકા ॥ ૧૨ ॥
વ્રજેન્દ્રચરણામ્ભોજે ઽર્પિતભક્તિપરમ્પરા ।
તસ્યાપિ પ્રેમપાત્રીયં પિતુર્ભાનોરિવ સ્ફુટમ્ ॥ ૧૩ ॥
ગુરુબુદ્ધ્યા પ્રલમ્બારૌ નતિં દૂરે વિતન્વતી ।
વધૂબુદ્ધ્યૈવ તસ્યાપિ પ્રેમભૂમીહ હ્રીયુતા ॥ ૧૪ ॥
લલિતાલલિતા સ્વીય પ્રાણોરુલલિતાવૃતા ।
લલિતાપ્રાણરક્ષૈકરક્ષિતા તદ્વશાત્મિકા ॥ ૧૫ ॥
વૃન્દાપ્રસાધિતોત્તુઙ્ગ કુડુઙ્ગાનઙ્ગવેશ્મનિ ।
કૃષ્ણખણ્ડિતમાનત્વાલ્ લલિતાભીતિકમ્પિની ॥ ૧૬ ॥
વિશાખનર્મસખ્યેન સુખિતા તદ્ગતાત્મિકા ।
વિશાખાપ્રાણદીપાલિ નિર્મઞ્છ્યનખચન્દ્રિકા ॥ ૧૭ ॥
સખીવર્ગૈકજીવાતુસ્મિતકૈરવકોરકા ।
સ્નેહફુલ્લીકૃતસ્વીયગણા ગોવિન્દવલ્લભા ॥ ૧૮ ॥
વૃન્દારણ્યમહારાજ્યમહાસેકમહોજ્જ્વલા ।
ગોષ્ઠસર્વજનાજીવ્યવદના રદનોત્તમા ॥ ૧૯ ॥
જ્ઞાતવૃન્દાટવીસર્વલતાતરુમૃગદ્વિજા ।
તદીયસખ્યસૌરભ્યસુરભીકૃતમાનસા ॥ ૨૦ ॥
સર્વત્ર કુર્વતિ સ્નેહં સ્નિગ્ધપ્રકૃતિરાભવમ્ ।
નામમાત્રજગાચિત્તદ્રાવિકા દીનપાલિકા ॥ ૨૧ ॥
ગોકુલે કૃષ્ણચન્દ્રસ્ય સર્વાપચ્છાન્તિપૂર્વકમ્ ।
ધીરલાલિત્યવૃદ્ધ્યર્થં ક્રિયમાણવ્રતાધિકા ॥ ૨૨ ॥
ગુરુગોવિપ્રસત્કારરતા વિનયસન્નતા ।
તદાશીઃશતવર્ધિષ્ણુસૌભાગ્યાદિગુણાઞ્ચિતા ॥ ૨૩ ॥
આયુર્ગોશ્રીયશોદાયિપાકો દુર્વાસસો વરાત્ ।
અતઃ કુન્દલતાનીયમાના રાજ્ઞ્યાઃ સમાજ્ઞયા ॥ ૨૪ ॥
ગોષ્ઠજીવાતુગોવિન્દજીવાતુલપિતામૃતા ।
નિજપ્રાનાર્બુદશ્રેણિરક્ષ્યતત્પાદરેણુકા ॥ ૨૫ ॥
કૃષ્ણપદારવિન્દોદ્યન્મકરન્દમયે મુદા ।
અરિષ્ટમર્દિ કાસારે સ્નાત્રી નિર્બન્ધતોઽન્વહમ્ ॥ ૨૬ ॥
નિજકુન્દપુરસ્તીરે રત્નસ્થલ્યામહર્નિશમ્ ।
પ્રેષ્ઠનર્માલિભિર્ભઙ્ગ્યા સમં નર્મ વિતન્વતી ॥ ૨૭ ॥
ગોવર્ધનગુહાલક્ષ્મીર્ગોવર્ધનવિહારિણી ।
ધૃતગોવર્ધનપ્રેમા ધૃતગોવર્ધનપ્રિયા ॥ ૨૮ ॥
ગાન્ધર્વાદ્ભુતગાન્ધર્વા રાધા બાધાપહારિણી ।
ચન્દ્રકાન્તિશ્ચલાપઙ્ગી રાધિકા ભાનુરાધિકા ॥ ૨૯ ॥
ગાન્ધર્વિકા સ્વગન્ધાતિસુગન્ધીકૃતગોકુલા ।
ઇતિ પઞ્ચભિરાહૂતા નામભિર્ગોકુલે જનૈઃ ॥ ૩૦ ॥
હરિણી હરિણીનેત્રા રઙ્ગિણી રઙ્ગિણીપ્રિયા ।
રઙ્ગિણીધ્વનિનાગચ્છત્સુરઙ્ગધ્વનિહાસિની ॥ ૩૧ ॥
બદ્ધનન્દીશ્વરોત્કણ્ઠા કાન્તકૃષ્ણૈકકઙ્ક્ષયા ।
નવાનુરાગસમ્બન્ધમદિરોન્મત્તમાનસા ॥ ૩૨ ॥
મદનોન્માદિગોવિન્દમકસ્માત્પ્રેક્ષ્ય હાસિની ।
લપન્તી રુદતી કમ્પ્રા રુષ્ટા દષ્ટાધરાતુરા ॥ ૩૩ ॥
વિલોકયતિ ગોવિન્દે સ્મિત્વા ચારુમુખામ્બુજમ્ ।
પુષ્પાકૃષ્ટિમિષાદૂર્ધ્વે ધૃતદોર્મુલચાલના ॥ ૩૪ ॥
સમક્ષમપિ ગોવિન્દમવિલોક્યેવ ભાવતઃ ।
દલે વિલિખ્ય તન્મૂર્તિં પશ્યન્તી તદ્વિલોકિતામ્ ॥ ૩૫ ॥
લીલયા યાચકં કૃષ્ણમવધીર્યેવ ભામિની ।
ગિરીન્દ્રગાહ્વરં ભઙ્ગ્યા પશ્યન્તી વિકસદ્દૃશા ॥ ૩૬ ॥
સુબલસ્કન્ધવિન્યસ્તબાહૌ પશ્યતિ માધવે ।
સ્મેરા સ્મેરારવિન્દેન તમાલં તડયન્ત્યથ ॥ ૩૭ ॥
લીલયા કેલિપાથોજં સ્મિત્વા ચુમ્બિતમાધવે ।
સ્મિત્વા ભાલાત્તકસ્તૂરીરસં ઘૃતવતી ક્વચિત્ ॥ ૩૮ ॥
મહાભાવોજ્જ્વલાચિન્તારત્નોદ્ભવિતવિગ્રહામ્ ।
સખીપ્રણયસદ્ગન્ધવરોદ્વર્તનસુપ્રભામ્ ॥ ૩૯ ॥
કારુણ્યામૃતવીચિભિસ્તારુણ્યામૃતધારયા ।
લાવણ્યામૃતવન્યાભિઃ સ્નપિતાં ગ્લપિતેન્દિરામ્ ॥ ૪૦ ॥
હ્રીપટ્ટવસ્ત્રગુપ્તાઙ્ગીં સૌન્દર્યઘુસૃણાઞ્ચિતામ્ ।
શ્યામલોજ્જ્વલકસ્તૂરીવિચિત્રિતકલેવરામ્ ॥ ૪૧ ॥
કમ્પાશ્રુપુલકસ્તમ્ભસ્વેદગદ્ગદરક્તતા ।
ઉન્મદો જાડ્યમિત્યેતૈ રત્નૈર્નવભિરુત્તમૈઃ ॥ ૪૨ ॥
ક્લ્પ્તાલઙ્કૃતિસંશ્લિષ્ટાં ગુણાલિપુષ્પમાલિનીમ્ ।
ધીરાધિરત્વસદ્વષપટવાસૈઃ પરિષ્કૃતામ્ ॥ ૪૩ ॥
પ્રચ્છન્નમાનધમ્મિલ્લાં સૌભાગ્યતિલકોજ્જ્વલામ્ ।
કૃષ્ણનામયશઃશ્રાવાવતંસોલ્લાસિકર્ણિકામ્ ॥ ૪૪ ॥
રાગતમ્બૂલરક્તોષ્ઠીં પ્રેમકૌટિલ્યકજ્જલામ્ ।
નર્મભાષિતનિઃસ્યન્દસ્મિતકર્પૂરવાસિતામ્ ॥ ૪૫ ॥
સૌરભાન્તઃપુરે ગર્વપર્યઙ્કોપરિ લીલયા ।
નિવિષ્ટાં પ્રેમવૈચિત્ત્યવિચલત્તરલાઞ્ચિતામ્ ॥ ૪૬ ॥
પ્રણયક્રોધસાચોલીબન્ધગુપ્તિકૃતસ્તનામ્ ।
સપત્નીવક્ત્રહૃચ્છોશિયશઃશ્રીકચ્છપીરવામ્ ॥ ૪૭ ॥
મધ્યતાત્મસખીસ્કન્ધલીલાન્યસ્તકરામ્બુજામ્ ।
શ્યામાં શ્યામસ્મરામોદમધુલીપરિવેશિકામ્ ॥ ૪૮ ॥
સુભગવલ્ગુવિઞ્છોલીમૌલીભૂષણમઞ્જરી ।
આવૈકુણ્ઠમજાણ્ડાલિવતંસીકૃતસદ્યશઃ ॥ ૪૯ ॥
વૈદગ્ધ્યૈકસુધાસિન્ધુશ્ચાટુર્યૈકસુધાપુરી ।
માધુર્યૈકસુધાવલ્લી ગુણરત્નૈકપેટિકા ॥ ૫૦ ॥
ગોવિન્દાનઙ્ગરાજીવે ભાનુશ્રીર્વાર્ષભાનવી ।
કૃષ્ણહૃત્કુમુદોલ્લાસે સુધાકારકરસ્થિતિઃ ॥ ૫૧ ॥
કૃષ્ણમાનસહંસસ્ય માનસી સરસી વરા ।
કૃષ્ણચાતકજીવાતુનવામ્ભોદપયઃશ્રુતિઃ ॥ ૫૨ ॥
સિદ્ધાઞ્જનસુધાવાર્તિઃ કૃષ્ણલોચનયોર્દ્વયોઃ ।
વિલાસશ્રાન્તકૃષ્ણાઙ્ગે વાતલી માધવી મતા ॥ ૫૩ ॥
મુકુન્દમત્તમાતઙ્ગવિહારાપરદીર્ઘિકા ।
કૃષ્ણપ્રાણમહામીનખેલનાનન્દવારિધિઃ ॥ ૫૪ ॥
ગિરીન્દ્રધારિરોલમ્બરસાલનવમઞ્જરી ।
કૃષ્ણકોકિલસમ્મોદિમન્દરોદ્યાનવિસ્તૃતિઃ ॥ ૫૫ ॥
કૃષ્ણકેલિવરારામવિહારાદ્ભુતકોકિલા ।
નાદાકૃષ્ટબકદ્વેષિવીરધીરમનોમૃગા ॥ ૫૬ ॥
પ્રણયોદ્રેકસિદ્ધ્યેકવશિકૃતધૃતાચલા ।
માધવાતિવશા લોકે માધવી માધવપ્રિયા ॥ ૫૭ ॥
કૃષ્ણમઞ્જુલતાપિઞ્છે વિલસત્સ્વર્ણયૂથિકા ।
ગોવિન્દનવ્યપાથોદે સ્થિરવિદ્યુલ્લતાદ્ભુતા ॥ ૫૮ ॥
ગ્રીષ્મે ગોવિન્દસર્વાઙ્ગે ચન્દ્રચન્દનચન્દ્રિકા ।
શીતે શ્યામશુભાઙ્ગેષુ પીતપટ્ટલસત્પટી ॥ ૫૯ ॥
મધૌ કૃષ્ણતરૂલ્લાસે મધુશ્રીર્મધુરાકૃતિઃ ।
મઞ્જુમલ્લારરાગશ્રીઃ પ્રાવૃષી શ્યામહર્ષિણી ॥ ૬૦ ॥
ઋતૌ શરદિ રાસૈકરસિકેન્દ્રમિહ સ્ફુટમ્ ।
વરિતું હન્ત રાસશ્રીર્વિહરન્તી સખીશ્રિતા ॥ ૬૧ ॥
હેમાન્તે સ્મરયુદ્ધાર્થમટન્તં રાજનન્દનમ્ ।
પૌરુષેણ પરાજેતું જયશ્રીર્મૂર્તિધારિણી ॥ ૬૨ ॥
સર્વતઃ સકલસ્તવ્યવસ્તુતો યત્નતશ્ચિરાત્ ।
સારણાકૃષ્ય તૈર્યુક્ત્યા નિર્માયાદ્ભુતશોભયા ॥ ૬૩ ॥
સ્વશ્લાઘં કુર્વતા ફુલ્લવિધિના શ્લાઘિતા મુહુઃ ।
ગૌરીશ્રીમૃગ્યસૌન્દર્યવન્દિતશ્રીનખપ્રભા ॥ ૬૪ ॥
શરત્સરોજશુભ્રાંશુમણિદર્પનમાલયા ।
નિર્મઞ્છિતમુખામ્ભોજવિલસત્સુષમકણા ॥ ૬૫ ॥
સ્થાયીસઞ્ચારિસૂદ્દીપ્તસત્ત્વિકૈરનુભાવકૈઃ ।
વિભાવાદ્યૈર્વિભાવોઽપિ સ્વયં શ્રીરસતાં ગતા ॥ ૬૬ ॥
સૌભાગ્યદુન્દુભિપ્રોદ્યદ્ધ્વનિકોલાહલૈઃ સદા ।
વિત્રસ્તીકૃતગર્વિષ્ઠવિપક્ષાખિલગોપિકા ॥ ૬૭ ॥
વિપક્ષલક્ષાહૃત્કમ્પાસમ્પાદકમુખશ્રિયા ।
વશીકૃતબકારાતિમાનસા મદનાલસા ॥ ૬૮ ॥
કન્દર્પકોટિરમ્યશ્રીજયિશ્રીગિરિધારિણા ।
ચઞ્ચલાપઙ્ગભઙ્ગેન વિસ્મારિતસતીવ્રતા ॥ ૬૯ ॥
કૃષ્ણેતિવર્ણયુગ્મોરુમોહમન્ત્રેણ મોહિતા ।
કૃષ્ણદેહવરામોદહૃદ્યમાદનમાદિતા ॥ ૭૦ ॥
કુટિલભ્રૂચલાચણ્ડકન્દર્પોદ્દણ્ડકર્મુકા ।
ન્યસ્તાપઙ્ગશરક્ષેપૈર્વિહ્વલીકૃતમાધવા ॥ ૭૧ ॥
નિજાઙ્ગસૌરભોદ્ગારમદકૌષધિવાત્યયા ।
ઉન્મદીકૃતસર્વૈકમદકપ્રવરાચ્યુતા ॥ ૭૨ ॥
દૈવાચ્છ્રુતિપથાયાતનામનીહારવાયુના ।
પ્રોદ્યદ્રોમાઞ્ચશીત્કારકમ્પિકૃષ્ણમનોહરા ॥ ૭૩ ॥
કૃષ્ણનેત્રલસઞ્જિહ્વાલેહ્યવક્ત્રપ્રભામૃતા ।
કૃષ્ણાન્યતૃષ્ણાસંહારી સુધાસારૈકઝર્ઝરી ॥ ૭૪ ॥
રાસલાસ્યરસોલ્લાસવશીકૃતબલાનુજા ।
ગાનફુલ્લીકૃતોપેન્દ્રા પિકોરુમધુરસ્વરા ॥ ૭૫ ॥
કૃષ્ણકેલિસુધાસિન્ધુમકરી મકરધ્વજમ્ ।
વર્ધયન્તી સ્ફુટં તસ્ય નર્માસ્ફલનખેલયા ॥ ૭૬ ॥
ગતિર્મત્તગજઃ કુમ્ભૌ કુચૌ ગન્ધમદોદ્ધુરૌ ।
મધ્યમુદ્દામસિંહોઽયં ત્રિબલ્યો દુર્ગભિત્તયઃ ॥ ૭૭ ॥
રોમાલી નાગપાશશ્રીર્નિતમ્બો રથ ઉલ્બનઃ ।
દાન્તા દુર્દન્તસામાન્તાઃ પાદાઙ્ગુલ્યઃ પદાતયઃ ॥ ૭૮ ॥
પાદૌ પદતિકાધ્યક્ષૌ પુલકઃ પૃથુકઙ્કતઃ ।
ઊરૂ જયમણિસ્તમ્ભૌ બાહૂ પાશવરૌ દૃઢૌ ॥ ૭૯ ॥
ભ્રૂદ્વન્દ્વં કર્મુકં ક્રૂરં કટાક્ષાઃ શનિતાઃ શરાઃ ।
ભાલમર્ધેન્દુદિવ્યાસ્ત્રમઙ્કુશાણિ નખાઙ્કુરાઃ ॥ ૮૦ ॥
સ્વર્ણેન્દુફલકં વક્ત્રં કૃપણી કરયોર્દ્યુતિઃ ।
ભલ્લભારઃ કરાઙ્ગુલ્યો ગણ્ડૌ કનકદર્પનૌ ॥ ૮૧ ॥
કેશપાશઃ કટુક્રોધઃ કર્ણૌ મૌર્વગુણોત્તમૌ ।
બન્ધુકાધરરાગોઽતિપ્રતાપઃ કરકમ્પકઃ ॥ ૮૨ ॥
દુન્દુભ્યાદિરવશ્ચૂડાકિઙ્કિનીનૂપુરસ્વનઃ ।
ચિબુકં સ્વસ્તિકં શાસ્તં કણ્ઠઃ શઙ્ખો જયપ્રદઃ ॥ ૮૩ ॥
પરિષ્વઙ્ગો હિ વિદ્ધ્યસ્ત્રં સૌરભં મદકૌષદમ્ ।
વાણી મોહનમન્ત્રશ્રીર્દેહબુદ્ધિવિમોહિની ॥ ૮૪ ॥
નાભી રત્નાદિભાણ્ડારં નાસાશ્રીઃ સકલોન્નતા ।
સ્મિતલેશોઽપ્યચિન્ત્યાદિ વશીકરણતન્ત્રકઃ ॥ ૮૫ ॥
અલકાનાં કુલં ભીષ્મં ભૃઙ્ગાસ્ત્રં ભઙ્ગદાયકમ્ ।
મૂર્તિઃ કન્દર્પયુદ્ધશ્રીર્વેણી સઞ્જયિની ધ્વજા ॥ ૮૬ ॥
ઇતિ તે કામસઙ્ગ્રામસામગ્યો દુર્ઘટાઃ પરૈઃ ।
ઈદૃશ્યો લલિતાદીનાં સેનાનીનાં ચ રાધિકે ॥ ૮૭ ॥
અતો દર્પમદાદ્યૂતં દાનીન્દ્રમવધીર્ય મામ્ ।
મહામારમહારાજનિયુક્તં પ્રથિતં વ્રજે ॥ ૮૮ ॥
સુષ્ઠુ સીમાન્તસિન્દૂર તિલકાનાં વરત્વિષામ્ ।
હારાઙ્ગદાદિચોલીનાં નાસામૌક્તિકવાસસામ્ ॥ ૮૯ ॥
કેયૂરમુદ્રિકાદીનાં કજ્જલોદ્યદ્વતંસયોઃ ।
એતાવદ્યુદ્ધવસ્તૂનાં પરાર્ધ્યાનાં પરર્ધ્યતઃ ॥ ૯૦ ॥
તથા દધ્યાદિગવ્યાનઆમમૂલ્યાનાનાં વ્રજોદ્ભવાત્ ।
અદત્ત્વા મે કરં ન્યાય્યં ખેલન્ત્યો ભ્રમતેહ યત્ ॥ ૯૧ ॥
તતો મયા સમં યુદ્ધં કર્તુમિચ્છત બુધ્યતે ।
કિં ચૈકોઽહં શતં યૂયં કુરુધ્વં ક્રમશસ્તતઃ ॥ ૯૨ ॥
પ્રથમં લલિતોચ્ચણ્ડા ચરતાચ્ચણ્ડસઙ્ગરમ્ ।
તતસ્ત્વં તદનુ પ્રેષ્ઠસઙ્ગરાઃ સકલાઃ ક્રમાત્ ॥ ૯૩ ॥
અથ ચેન્મિલિતાઃ કર્તું કામયધ્વે રણં મદાત્ ।
અગ્રે સરત તદ્દોર્ભ્યાં પિનષ્મિ સકલાઃ ક્ષણાત્ ॥ ૯૪ ॥
ઇતિ કૃષ્ણવચઃ શ્રુત્વા સાટોપં નર્મનિર્મિતમ્ ।
સાનન્દં મદનાક્રાન્તમાનસાલિકુલાન્વિતા ॥ ૯૫ ॥
સ્મિત્વા નેત્રાન્તબાણૈસ્તં સ્તબ્ધીકૃત્ય મદોદ્ધતમ્ ।
ગચ્છન્તી હંસવદ્ભઙ્ગ્યા સ્મિત્વા તેન ધૃતાઞ્ચલા ॥ ૯૬ ॥
લીલયાઞ્ચલમાકૃષ્ય ચલન્તી ચારુહેલયા ।
પુરો રુદ્ધપથં તં તુ પશ્યન્તી રુષ્ટયા દૃશા ॥ ૯૭ ॥
માનસસ્વર્ધુનીં તૂર્ણમુત્તરીતું તરીં શ્રિતા ।
કમ્પિતાયાં તરૌ ભીત્યા સ્તુવન્તી કૃષ્ણનાવિકમ્ ॥ ૯૮ ॥
નિજકુણ્ડપયઃકેલિલીલાનિર્જિતમચ્યુતમ્ ।
હસિતું યુઞ્જતી ભઙ્ગ્યા સ્મેરા સ્મેરમુખીઃ સખીઃ ॥ ૯૯ ॥
મકન્દમકુલસ્યન્દિમરન્દસ્યન્દિમન્દિરે ।
કેલિતલ્પે મુકુન્દેન કુન્દવૃન્દેન મણ્ડિતા ॥ ૧૦૦ ॥
નાનાપુષ્પમણિવ્રાતપિઞ્છાગુઞ્જાફલાદિભિઃ ।
કૃષ્ણગુમ્ફિતધમ્મિલ્લોત્ફુલ્લરોમસ્મરઙ્કુરા ॥ ૧૦૧ ॥
મઞ્જુકુઞ્જે મુકુન્દસ્ય કુચૌ ચિત્રયતઃ કરમ્ ।
ક્ષપયન્તી કુચક્ષેપૈઃ સુસખ્યમધુનોન્મદા ॥ ૧૦૨ ॥
વિલાસે યત્નતઃ કૃષ્ણદત્તં તામ્બૂલચર્વિતમ્ ।
સ્મિત્વા વામ્યાદગૃહ્ણાના તત્રારોપિતદૂષણમ્ ॥ ૧૦૩ ॥
દ્યૂતે પાણિકૃતાં વંશીં જિત્વા કૃષ્ણસુગોપિતામ્ ।
હસિત્વાચ્છિદ્ય ગૃહ્ણાના સ્તુતા સ્મેરાલિસઞ્ચયૈઃ ॥ ૧૦૪ ॥
વિશાખાગૂઢનર્મોક્તિજિતકૃષ્ણાર્પિતસ્મિતા ।
નર્માધ્યાયવરાચાર્યા ભારતીજયવાગ્મિતા ॥ ૧૦૫ ॥
વિશાખાગ્રે રહઃકેલિકથોદ્ઘાટકમાધવમ્ ।
તાડયન્તી દ્વિરબ્જેન સભ્રૂભઙ્ગેન લીલયા ॥ ૧૦૬ ॥
લલિતાદિપુરઃ સાક્ષાત્કૃષ્ણસમ્ભોગલઞ્છને ।
સૂચ્યમાને દૃશા દૂત્યા સ્મિત્વા હુઙ્કુર્વતી રુષા ॥ ૧૦૭ ॥
ક્વચિત્પ્રણયમાનેન સ્મિતમાવૃત્ય મૌનિની ।
ભીત્યા સ્મરશરૈર્ભઙ્ગ્યલિઙ્ગન્તી સસ્મિતં હરિમ્ ॥ ૧૦૮ ॥
કુપિતં કૌતુકૈઃ ક્ર્ષ્ણં વિહારે બાઢમૌનિનમ્ ।
કતરા પરિરભ્યાશુ માનયન્તી સ્મિતાનનમ્ ॥ ૧૦૯ ॥
મિથઃ પ્રણયમાનેન મૌનિની મૌનિનં હરિમ્ ।
નિર્મૌના સ્મરમિત્રેણ નિર્મૌનં વીક્ષ્ય સસ્મિતા ॥ ૧૧૦ ॥
ક્વચિત્પથિ મિલાચન્દ્રાવલીસમ્ભોગદૂષણમ્ ।
શ્રુત્વા ક્રૂરસખીવક્ત્રાન્મુકુન્દે માનિની રુષા ॥ ૧૧૧ ॥
પાદલક્ષારસોલ્લાસિશિરસ્કં કંસવિદ્વિષમ્ ।
કૃતકાકુશતં સાસ્રા પશ્યન્તીષાચલદ્દૃશા ॥ ૧૧૨ ॥
ક્વચિત્કલિન્દજાતીરે પુષ્પત્રોટનખેલયા ।
વિહરન્તી મુકુન્દેન સાર્ધમાલીકુલાવૃતા ॥ ૧૧૩ ॥
તત્ર પુષ્પકૃતે કોપાદ્વ્રજન્તી પ્રેમકારિતાત્ ।
વ્યાઘોતિતા મુકુન્દેન સ્મિત્વા ધૃત્વા પટાઞ્ચલમ્ ॥ ૧૧૪ ॥
વિહારશ્રાન્તિતઃ કાન્તં લલિતાન્યસ્તમસ્તકમ્ ।
વીજયન્તી સ્વયં પ્રેમ્ણા કૃષ્ણં રક્તપટાઞ્ચલૈઃ ॥ ૧૧૫ ॥
પુષ્પકલ્પિતદોલાયાં કલગાનકુતૂહલૈઃ ।
પ્રેમ્ણા પ્રેષ્ઠસખીવર્ગૈર્દોલિતા હરિભૂષિતા ॥ ૧૧૬ ॥
કુણ્ડકુઞ્જાઙ્ગને વલ્ગુ ગાયદાલીગણાન્વિતા ।
વીણાનન્દિતગોવિન્દદત્તચુમ્બેન લજ્જિતા ॥ ૧૧૭ ॥
ગોવિન્દવદનામ્ભોજે સ્મિત્વા તામ્બૂલવીટિકામ્ ।
યુઞ્જતીહ મિથો નર્મકેલિકર્પૂરવાસિતામ્ ॥ ૧૧૮ ॥
ગિરીન્દ્રગાહ્વરે તલ્પે ગોવિન્દોરસિ સાલસમ્ ।
શયના લલિતાવીજ્યમાના સ્વીયપટાઞ્ચલૈઃ ॥ ૧૧૯ ॥
અપૂર્વબન્ધગાન્ધર્વાકલયોન્મદ્ય માધવમ્ ।
સ્મિત્વા હરિતતદ્વેણુહારા સ્મેરવિશાખયા ॥ ૧૨૦ ॥
વીણાધ્વનિધુતોપેન્દ્રહસ્તાચ્ચ્યોતિતવંશિકા ।
ચૂડાસ્વનહૃતશ્યામદેહગેહપથસ્મૃતિઃ ॥ ૧૨૧ ॥
મુરલીગિલિતોત્તુઙ્ગગૃહધર્મકુલસ્થિતિઃ ।
શૃઙ્ગતો દત્તતત્સર્વસતિલાપોઽઞ્જલિત્રયા ॥ ૧૨૨ ॥
કૃષ્ણપુષ્ટિકરામોદિસુધાસારાધિકાધરા ।
સ્વમધુરિત્વસમ્પાદિકૃષ્ણપાદામ્બુજામૃતા ॥ ૧૨૩ ॥
રાધેતિ નિજનામ્નૈવ જગત્ખ્યાપિતમાધવા ।
માધવસ્યૈવ રાધેતિ જ્ઞાપિતાત્મા જગત્ત્રયે ॥ ૧૨૪ ॥
મૃગનાભેઃ સુગન્ધશ્રીરિવેન્દોરિવ ચન્દ્રિકા ।
તરોઃ સુમઞ્જરીવેહ કૃષ્ણસ્યાભિન્નતાં ગતા ॥ ૧૨૫ ॥
રઙ્ગિના સઙ્ગરઙ્ગેન સાનઙ્ગરઙિનીકૃતા ।
સાનઙ્ગરઙ્ગભઙ્ગેન સુરઙ્ગીકૃતરઙ્ગદા ॥ ૧૨૬ ॥
ઇત્યેતન્નામલીલાક્તપદ્યૈઃ પીયૂષવર્ષકૈઃ ।
તદ્રસાસ્વાદનિષ્ણાતવસનાવાસિતાન્તરૈઃ ॥ ૧૨૭ ॥
ગીયમાનં જનૈર્ધન્યૈઃ સ્નેહવિક્લિન્નમાનસૈઃ ।
નત્વા તાં કૃપયાવિષ્ટાં દુષ્ટોઽપિ નિષ્ઠુરઃ શઠઃ ॥ ૧૨૮ ॥
જનોઽયં યાચતે દુઃખી રુદન્નુચ્ચૈરિદં મુહુઃ ।
તત્પદામ્ભોજયુગ્મૈકગતિઃ કાતરતાં ગતઃ ॥ ૧૨૯ ॥
કૃત્વા નિજગણસ્યાન્તઃ કારુણ્યાન્નિજસેવને ।
નિયિજયતુ માં સાક્ષાત્સેયં વૃન્દાવનેશ્વરી ॥ ૧૩૦ ॥
ભજામિ રાધામરવિન્દનેત્રાં
સ્મરામિ રાધાં મધુરસ્મિતાસ્યામ્ ।
વદામિ રાધાં કરુણભરાર્દ્રાં
તતો મમાન્યાસ્તિ ગતિર્ન કાપિ ॥ ૧૩૧ ॥
લીલાનામાઙ્કિતસ્તોત્રં વિશાખાનન્દદાભિધમ્ ।
યઃ પઠેન્નિયતં ગોષ્ઠે વસેન્નિર્ભરદીનધીઃ ॥ ૧૩૨ ॥
આત્માલઙ્કૃતિરાધાયાં પ્રીતિમુત્પદ્ય મોદભાક્
નિયોજયતિ તાં કૃષ્ણઃ સાક્ષાત્તત્પ્રિયસેવને ॥ ૧૩૩ ॥
શ્રીમદ્રૂપપદામ્ભોજધૂલીમાત્રૈકસેવિના
કેનચિદ્ગ્રથિતા પદ્યૈર્માલાઘ્રેયા તદાશ્રયૈઃ ॥ ૧૩૪ ॥
ઇતિ શ્રીરઘુનાથદાસગોસ્વામિવિરચિતસ્તવાવલ્યાં
શ્રીવિશાખાનન્દાભિધસ્તોત્રં સમ્પૂર્ણમ્ ।