॥ Sri Vittala Stavaraja Kannada Lyrics ॥
॥ ಶ್ರೀ ವಿಠ್ಠಲ ಸ್ತವರಾಜಃ ॥
ಓಂ ಅಸ್ಯ ಶ್ರೀವಿಠ್ಠಲಸ್ತವರಾಜಸ್ತೋತ್ರಮಹಾಮಂತ್ರಸ್ಯ ಭಗವಾನ್ ವೇದವ್ಯಾಸ ಋಷಿಃ ಅತಿಜಗತೀ ಛಂದಃ ಶ್ರೀವಿಠ್ಠಲಃ ಪರಮಾತ್ಮಾ ದೇವತಾ ತ್ರಿಮೂರ್ತ್ಯಾತ್ಮಕಾ ಇತಿ ಬೀಜಮ್ ಸೃಷ್ಟಿಸಂರಕ್ಷಣಾರ್ಥೇತಿ ಶಕ್ತಿಃ ವರದಾಭಯಹಸ್ತೇತಿ ಕೀಲಕಮ್ ಮಮ ಸರ್ವಾಭೀಷ್ಟಫಲಸಿದ್ಧ್ಯರ್ಥೇ ಜಪೇ ವಿನಿಯೋಗಃ ।
ಅಥ ನ್ಯಾಸಃ-
ಓಂ ನಮೋ ಭಗವತೇ ವಿಠ್ಠಲಾಯ ಅಂಗುಷ್ಠಾಭ್ಯಾಂ ನಮಃ ।
ಓಂ ತತ್ತ್ವಪ್ರಕಾಶಾತ್ಮನೇ ತರ್ಜನೀಭ್ಯಾಂ ನಮಃ ।
ಓಂ ಶಂಖಚಕ್ರಗದಾಧರಾತ್ಮನೇ ಮಧ್ಯಮಾಭ್ಯಾಂ ನಮಃ ।
ಓಂ ಸೃಷ್ಟಿಸಂರಕ್ಷಣಾರ್ಥಾಯ ಅನಾಮಿಕಾಭ್ಯಾಂ ನಮಃ ।
ಓಂ ತ್ರಿಮೂರ್ತ್ಯಾತ್ಮಕಾಯ ಕನಿಷ್ಠಿಕಾಭ್ಯಾಂ ನಮಃ ।
ಓಂ ವರದಾಭಯಹಸ್ತಾಯ ಕರತಲಕರಪೃಷ್ಠಾಭ್ಯಾಂ ನಮಃ ।
ಏವಂ ಹೃದಯಾದಿನ್ಯಾಸಃ – ಭೂರ್ಭುವಸ್ಸುವರೋಮಿತಿ ದಿಗ್ಬಂಧಃ ।
ಧ್ಯಾನಮ್ –
ಶ್ರೀಗುರುಂ ವಿಠ್ಠಲಾನಂದಂ ಪರಾತ್ಪರಜಗತ್ಪ್ರಭುಮ್ ।
ತ್ರೈಲೋಕ್ಯವ್ಯಾಪಕಂ ದೇವಂ ಶುದ್ಧಮತ್ಯಂತನಿರ್ಮಲಮ್ ॥ ೧ ॥
ನಾಸಾಗ್ರೇಽವಸ್ಥಿತಂ ದೇವಮಾಬ್ರಹ್ಮಸ್ತಂಬಸಂಯುತಮ್ ।
ಊರ್ಣತಂತುನಿಭಾಕಾರಂ ಸೂತ್ರಜ್ಞಂ ವಿಠ್ಠಲಂ ಸ್ವಯಮ್ ॥ ೨ ॥
ಗಂಗಾಯಮುನಯೋರ್ಮಧ್ಯೇ ತ್ರಿಕೂಟಂ ರಂಗಮಂದರಮ್ ।
ಜ್ಞಾನಂ ಭೀಮರಥೀತೀರಂ ಸ್ವದೇವಂ ಪಂಡರೀಪುರಮ್ ॥ ೩ ॥
ರುಕ್ಮಣೀಶಕ್ತಿಹಸ್ತೇನ ಕ್ರೀಡಂತಂ ಚಲಲೋಚನಮ್ ।
ಆಜ್ಞಾಬ್ರಹ್ಮ ಬಿಲಾಂತಸ್ಥ ಜ್ಯೋತಿರ್ಮಯಸ್ವರೂಪಕಮ್ ॥ ೪ ॥
ಸಹಸ್ರದಳಪದ್ಮಸ್ಥಂ ಸರ್ವಾಭರಣಭೂಷಿತಮ್ ।
ಸರ್ವದೇವಸಮುತ್ಪನ್ನಂ ಓಮಿತಿಜ್ಯೋತಿರೂಪಕಮ್ ॥ ೫ ॥
ಸಮಪರ್ವತ ಊರ್ಧ್ವಸ್ಥಂ ಶ್ರೋಣಿತ್ರಯಸಹಸ್ರಕಮ್ ।
ಸ್ತಂಭೋ ಮಧ್ಯಂ ಯಥಾ ಸ್ಥಾನಂ ಕಲೌ ವೇಂಕಟನಾಯಕಮ್ ॥ ೬ ॥
ಪೀತವಸ್ತ್ರಪರೀಧಾನಂ ತುಲಸೀವನಮಾಲಿನಮ್ ।
ಶಂಖಚಕ್ರಧರಂ ದೇವಂ ವರದಾಭಯಹಸ್ತಕಮ್ ॥ ೭ ॥
ಊರ್ಧ್ವಪುಂಡ್ರಮಯಂ ದೇವಂ ಚಿತ್ರಾಭರಣಭೂಷಿತಮ್ ।
ರತ್ನಸಿಂಹಾಸನಂ ದೇವಂ ಸುವರ್ಣಮಕುಟೋಜ್ಜ್ವಲಮ್ ॥ ೮ ॥
ರತ್ನಕಿಂಕಿಣಿಕೇಯೂರಂ ರತ್ನಮಂಟಪಶೋಭಿತಮ್ ।
ಪೌಂಡ್ರಂ ಚ ಪಾಲಿನಂ ರಂಗಂ ಯದೂನಾಂ ಕುಲದೀಪಕಮ್ ॥ ೯ ॥
ದೇವಾರಿದೈತ್ಯದರ್ಪಘ್ನಂ ಸರ್ವಲೋಕೈಕನಾಯಕಮ್ ।
ಓಂ ನಮಶ್ಶಾಂತಿರೂಪಾಯ ಸರ್ವಲೋಕೈಕಸಿದ್ಧಯೇ ॥ ೧೦ ॥
ಸರ್ವದೇವಸ್ವರೂಪಾಯ ಸರ್ವಯಂತ್ರಸ್ವರೂಪಿಣೇ ।
ಸರ್ವತಂತ್ರಸ್ವರೂಪಾಯ ವಿಠ್ಠಲಾಯ ನಮೋ ನಮಃ ॥ ೧೧ ॥
ಪರಮಂತ್ರಪ್ರಣಾಶಾಯ ಪರಯಂತ್ರನಿವಾರಿಣೇ ।
ಪರತಂತ್ರವಿನಾಶಾಯ ವಿಠ್ಠಲಾಯ ನಮೋ ನಮಃ ॥ ೧೨ ॥
ಪರಾತ್ಪರಸ್ವರೂಪಾಯ ಪರಮಾತ್ಮಸ್ವರೂಪಿಣೇ ।
ಪರಬ್ರಹ್ಮಸ್ವರೂಪಾಯ ವಿಠ್ಠಲಾಯ ನಮೋ ನಮಃ ॥ ೧೩ ॥
ವಿಶ್ವರೂಪಸ್ವರೂಪಾಯ ವಿಶ್ವವ್ಯಾಪಿಸ್ವರೂಪಿಣೇ ।
ವಿಶ್ವಂಭರಸ್ವಮಿತ್ರಾಯ ವಿಠ್ಠಲಾಯ ನಮೋ ನಮಃ ॥ ೧೪ ॥
ಪರಮಹಂಸಸ್ವರೂಪಾಯ ಸೋಽಹಂ ಹಂಸಸ್ವರೂಪಿಣೇ ।
ಹಂಸಮಂತ್ರಸ್ವರೂಪಾಯ ವಿಠ್ಠಲಾಯ ನಮೋ ನಮಃ ॥ ೧೫ ॥
ಅನಿರ್ವಾಚ್ಯಸ್ವರೂಪಾಯ ಅಖಂಡಬ್ರಹ್ಮರೂಪಿಣೇ ।
ಆತ್ಮತತ್ತ್ವಪ್ರಕಾಶಾಯ ವಿಠ್ಠಲಾಯ ನಮೋ ನಮಃ ॥ ೧೬ ॥
ಕ್ಷರಾಕ್ಷರಸ್ವರೂಪಾಯ ಅಕ್ಷರಾಯಸ್ವರೂಪಿಣೇ ।
ಓಂಕಾರವಾಚ್ಯರೂಪಾಯ ವಿಠ್ಠಲಾಯ ನಮೋ ನಮಃ ॥ ೧೭ ॥
ಬಿಂದುನಾದಕಲಾತೀತ ಭಿನ್ನದೇಹಸಮಪ್ರಭ ।
ಅಭಿನ್ನಾಯೈವ ವಿಶ್ವಾಯ ವಿಠ್ಠಲಾಯ ನಮೋ ನಮಃ ॥ ೧೮ ॥
ಭೀಮಾತೀರನಿವಾಸಾಯ ಪಂಡರೀಪುರವಾಸಿನೇ ।
ಪಾಂಡುರಂಗಪ್ರಕಾಶಾಯ ವಿಠ್ಠಲಾಯ ನಮೋ ನಮಃ ॥ ೧೯ ॥
ಸರ್ವಯೋಗಾರ್ಥತತ್ತ್ವಜ್ಞ ಸರ್ವಭೂತಹಿತೇರತ ।
ಸರ್ವಲೋಕಹಿತಾರ್ಥಾಯ ವಿಠ್ಠಲಾಯ ನಮೋ ನಮಃ ॥ ೨೦ ॥
ಯ ಇದಂ ಪಠತೇ ನಿತ್ಯಂ ತ್ರಿಸಂಧ್ಯಂ ಸ್ತೌತಿ ಮಾಧವಮ್ ।
ಸರ್ವಯೋಗಪ್ರದಂ ನಿತ್ಯಂ ದೀರ್ಘಮಾಯುಷ್ಯವರ್ಧನಮ್ ॥ ೨೧ ॥
ಸರ್ವೇ ಜ್ವರಾ ವಿನಶ್ಯಂತಿ ಮುಚ್ಯತೇ ಸರ್ವಬಂಧನಾತ್ ।
ಆವರ್ತನಸಹಸ್ರಸ್ತು ಲಭತೇ ವಾಂಛಿತಂ ಫಲಮ್ ॥ ೨೨ ॥
ಯ ಇದಂ ಪರಮಂ ಗುಹ್ಯಂ ಸರ್ವತ್ರ ನ ಪ್ರಕಾಶಯೇತ್ ।
ಸ ಬ್ರಹ್ಮಜ್ಞಾನಮಾಪ್ನೋತಿ ಭುಕ್ತಿಂ ಮುಕ್ತಿಂ ಚ ವಿಂದತಿ ॥ ೨೩ ॥
ಸರ್ವಭೂತಪ್ರಶಮನಂ ಸರ್ವದುಃಖನಿವಾರಣಮ್ ।
ಸರ್ವಾಪಮೃತ್ಯುಶಮನಂ ಸರ್ವರಾಜವಶೀಕರಮ್ ॥ ೨೪ ॥
ಅಲಕ್ಷ್ಮೀನಾಶನಂ ಚೈವ ಸುಲಕ್ಷ್ಮೀಸುಖದಾಯಕಮ್ ।
ತ್ರಿಸಂಧ್ಯಂ ಪಠತೇ ಭಕ್ತ್ಯಾ ನಿರ್ಭಯೋ ಭವತಿ ಧ್ರುವಮ್ ॥ ೨೫ ॥
ಸಂಗ್ರಾಮೇ ಸಂಕಟೇ ಚೈವ ವಿವಾದೇ ಶತ್ರುಮಧ್ಯಗೇ ।
ಶೃಂಖಲಾಬಂಧನೇ ಚೈವ ಮುಚ್ಯತೇ ಸರ್ವಕಿಲ್ಬಿಷಾತ್ ॥ ೨೬ ॥
ರಾಜದ್ವಾರೇ ಸಭಾಸ್ಥಾನೇ ಸಿಂಹವ್ಯಾಘ್ರಭಯೇಷು ಚ ।
ಸಾಧಕಃ ಸ್ತಂಭನೇ ಚೈವ ಸರ್ವತ್ರ ವಿಜಯೀ ಭವೇತ್ ॥ ೨೭ ॥
ಇತಿ ಶ್ರೀರುದ್ರಪುರಾಣೇ ವಾಮಕೇಶ್ವರತಂತ್ರೇ ನಾರದವಸಿಷ್ಠಸಂವಾದೇ ಶ್ರೀ ವಿಠ್ಠಲಸ್ತವರಾಜಸ್ತೋತ್ರಮ್ ।