॥ Suratakathamritam Athava Arya Ashatakam Kannada Lyrics ॥
ಸುರತಕಥಾಮೃತಂ ಅಥವಾ ಆರ್ಯಶತಕಮ್
ಮೂಲಗ್ರನ್ಥಸ್ಯ ಕೇನ್ದ್ರೀಯಶ್ಲೋಕಃ-
ಕದಾಹಂ ಸೇವಿಷ್ಯೇ ವ್ರತತಿಚಮರೀಚಾಮರಮರು-
ದ್ವಿನೋದೇನ ಕ್ರೀಡಾ ಕುಸುಮಶಯನೇ ನ್ಯಸ್ತವಪುಷೌ ।
ದರೋನ್ಮೀಲನ್ನೇತ್ರೌ ಶ್ರಮಜಲಕಣಕ್ಲಿದ್ಯದಲಕೌ
ಬ್ರುವಾಣಾವನ್ಯೋನ್ಯಂ ವ್ರಜನವಯುವಾನಾವಿಹ ಯುವಾಮ್ ॥
ಉತ್ಕಲಿಕಾವಲ್ಲರೀ 52
ಶ್ರೀಕೃಷ್ಣ ಉವಾಚ-
ಚಿತ್ರಮಿದಂ ನಹಿ ಯದಹೋ ವಿತರಸ್ಯಧರಸುಧಾಂ ನಿಕಾಮಂ ಮೇ ।
ಅತಿ ಕೃಪಣೋಽಪಿ ಕದಾಚಿದ್ವದಾನ್ಯತಮತಾಂ ಜನಃ ಪ್ರಿಯೇ ಧತ್ತೇ ॥ 1 ॥
ಲಯಮಪಿ ನ ಯಾತಿ ದಾನೇ ಪ್ರತ್ಯುತ ಋದ್ಧಿಂ ರಸಾಧಿಕಾಂ ಲಭತೇ ।
ಅಧರಸುಧೋತ್ತಮವಿದ್ಯಾಂ ವಿಬುಧವರಾಯಾದ್ಯ ಮೇ ದೇಹಿ ॥ 2 ॥
ಸ್ವಾನ್ತೇ ಬಿಭ್ರತಿ ಭವತೀಂ ಸ್ವಾನ್ತೇ ವಾಸಿನ್ಯತಿಸ್ನಿಗ್ಧೇ ।
ಮಯಿ ಕಿಮಪೂರ್ವಾಂ ನಾದಾಸ್ತ್ವಮಿಮಾಂ ಚ ಯಸ್ಮಾದ್ವಿದುಷ್ಯಹೋ ತತ್ರ ॥ 3 ॥
ಶ್ರೀರಾಧಾಹ-
ಕುಲರಮಣೀತತಿಲಜ್ಜಾನಿರ್ಮೂಲನತನ್ತ್ರಕೌಶಲೋದ್ಗಾರೈಃ ।
ಪ್ರಥಯಸಿ ಕಿಮು ನಿಜಗರ್ವಂ ಜ್ಞಾತಂ ಪಾಂಡಿತ್ಯಮಸ್ತಿ ತೇ ತತ್ರ ॥ 4 ॥
ದೈವಾದ್ವಿಪಕ್ಷತಾಮಪಿ ಮಯಿ ಯಾನ್ತ್ಯಾ ಬತ ಮಮೈವ ಸಹಚರ್ಯಾ ।
ನ್ಯಸ್ತಾಹಂ ತವ ಹಸ್ತೇ ಕಥಮತ್ರ ಗರ್ವೋ ಭವೇನ್ ನ ತೇ ॥ 5 ॥
ಅಯಮಪಿ ಪರಮೋ ಧರ್ಮಃ ಶ್ಲಾಘಾ ಮಹತೀ ತವೇಯಮೇವೇಷ್ಟಾ ।
ಯೌವನಫಲಮಪಿ ಚೇದಂ ಕುಲಾಬಲಾಪೀಡನಂ ಯದಹೋ ॥ 6 ॥
ಶ್ರೀಕೃಷ್ಣ ಆಹ-
ಸ್ಮರನರಪತಿವರರಾಜ್ಯೇ ಧರ್ಮಃ ಶರ್ಮಪ್ರದೋಽಯಮಾದಿಷ್ಟಃ ।
ವತ್ಸ್ಯಾಯನಮುನಿನಿರ್ಮಿತಪದ್ಧತ್ಯುಕ್ತಾನುಸಾರೇಣ ಹಿ ॥ 7 ॥
ಅಪಿ ಚ-
ಅತ್ರ ಪ್ರಮಾಣಮಿಷ್ಟಂ ಚೇನ್ಮದುಕ್ತೇಽಪಿ ನ ಮನ್ಯತೇ ಕಿಂಚಿತ್ ।
ಭರತಮುನೇಃ ಕಿಲ ಶಾಸ್ತ್ರಂ ಶಾಸ್ತ್ರಾನ್ತರಮತ್ರ ಕೋ ಗಣಯೇತ್ ॥ 8 ॥
ವಿದ್ಯುತಿ ವಿದ್ಯುತಿದಾಯೀ ಶ್ಲಾಘಾಂ ಮನುತೇ ಪಯೋಧರಃ ಸ್ವೀಯಾಮ್ ।
ವಿದ್ಯುದಪಿ ಸ್ವಾಂ ಸುಷಮಾಂ ಪಯೋಧರೇ ಶ್ಲಾಘಯತ್ಯಧಿಕಾಮ್ ॥ 9 ॥
ಶ್ರೀರಾಧಾಹ-
ಗೋವರ್ಧನಗಿರಿಕನ್ದರವಾಸೀ ಹರಿರಸೀತಿ ಶ್ರುತಂ ಕತಿಧಾ ।
ಕುಲಬಾಲಾಹರಿಣೀತತಿರಥಾಪಿ ಗಚ್ಛತ್ಯತೋ ನ ತೇ ದೋಷಃ ॥ 10 ॥
ಕಿಂ ಕುರ್ಮಃ ಸ್ವಾಚರಿತೋ ಧರ್ಮಸ್ತ್ಯಕ್ತುಂ ಕಥಂ ಪುನಃ ಶಕ್ಯಃ ।
ದಿನಕರಪೂಜನವಿಧಿರಿಹ ಕುಸುಮಾವಚಯೇ ಪ್ರವರ್ತ್ಯತೇ ॥ 11 ॥
ಶ್ರೀಕೃಷ್ಣ ಆಹ-
ವೃನ್ದಾರಣ್ಯಪುರನ್ದರಮಪಿ ಮಾಂ ನ ಗಿರಾಪಿ ಕರ್ಹಿಚಿನ್ಮನುಷೇ ।
ಸೂರ್ಯಾರಾಧನಗರ್ವಸ್ತದಯಂ ರಾಧೇ ನ ತೇ ಭವೇತ್ಖರ್ವಃ ॥ 12 ॥
ಗೋವರ್ಧನಗಿರಿಧಾರಣಕಾರಣಮೋಜೋ ನ ತೇಽಧಿಕಂ ಮನುತೇ ।
ತವ ಸವಯಸ್ತತಿರಪಿ ಸ ತವೈಕಕುಚಶೈಲಗರ್ವೇಣ ॥ 13 ॥
ಶ್ರೀರಾಧಾಹ-
ನ ಕಿಲ ಕುಚೌ ಮಮ ಶೈಲೌ ಪಶ್ಯಾಮ್ಬುಜಕೋರಕೌ ನವೋತ್ಪನ್ನೌ ।
ನ ತಯೋರ್ದಲನಂ ಮರಕತಶಿಲಾನಿಭೇನೋರಸಾಽದ್ಯ ತೇ ಯೋಗ್ಯಮ್ ॥ 14 ॥
ಕೌಸ್ತುಭಮಣಿರತಿತರಲಃ ಸರಲಮತಿಃ ಪುನರಹಂ ಕುಲ ಪ್ರಮದಾ ।
ತದಲಮನೇನ ಧಿನೋತು ತ್ವಾಂ ನಿಜಸದೃಶಂ ಭೃಶಂ ಹೃದಿಸ್ಥಸ್ತೇ ॥ 15 ॥
ಶ್ರೀಕೃಷ್ಣ ಆಹ-
ಸತ್ಯಮಯಂ ಭಯತರಲಃ ಕಂಠತಟಾನ್ತಂ ಮಮ ಪ್ರಿಯೇ ಶ್ರಯತೇ ।
ದಯತೇ ತವ ಕುಚದ್ವಯಮಧಿಕಂ ಸಮ್ಮರ್ದಯತ್ಯಹೋ ಸದ್ಯಃ ॥ 16 ॥
ಶ್ರೀರಾಧಾಹ-
ತವ ಖರನಖರವಿದಾರಣಸಹನಂ ಕುಚಯೋರಿಯಂ ವರಾ ಶಕ್ತಿಃ ।
ಕಿಮತ್ರ ಸಮ್ಭವತಿ ಸ್ಫುಟಮನಯೋಃ ಸ್ವಬಲಪ್ರಕಾಶನಾಟೋಪಃ ॥ 17 ॥
ಶ್ರೀಕೃಷ್ಣ ಆಹ-
ಮಮ ಖರನಖರಮಹಾಂಕುಶಘಾತಾದಪಿ ಶತಗುಣಂ ಬಲಂ ಲಬ್ಧ್ವಾ ।
ಕೋಲಾದಿವ ಕುಚ ಕುಮ್ಭೌ ಮಮಾರ್ದಯತೋ ಭೃಶಂ ಪ್ರಿಯೇ ಪಶ್ಯ ॥ 18 ॥
ಶ್ರೀರಾಧಾಹ-
ಕುಚಪದ್ಮಕುಟ್ಮಲಯುಗಂ ಮರ್ದಯತಿ ತ್ವಾಂ ನಿಜಾತಿದೌರಾತ್ಮ್ಯಾತ್ ।
ವೃನ್ದಾವನವರಸಿನ್ಧುರ ನನು ದಯಸೇ ತ್ವಂ ನಿಸರ್ಗಕಾರುಣ್ಯಾತ್ ॥ 19 ॥
ಶ್ರೀಕೃಷ್ಣ ಆಹ-
ತನ್ವಾತೇ ಮುದಮುಚ್ಚೈಸ್ತಾವಕಕುಚಕೋರಕೌ ಯದಿಮೌ ।
ನಖಚನ್ದ್ರೋದಯಮಧಿ ಕಿಂ ಸ್ವಯೋಗ್ಯಮತುಲಂ ನ ಶೋಭತೇ ಪ್ರಿಯೇ ॥ 20 ॥
ಶ್ರೀರಾಧಾಹ-
ನಖರಾನಾಮತಿಖರತಾರತಾಯ ತೇ ತಾವಕೇನ ಕಿಲ ವಿಧಿನಾ ।
ವ್ರಜವನಿತಾನಾಮರುಚ್ಯ ರುಷೇವ ನಿರಮಾಯಿ ಕಿಂ ನೂನಮ್ ॥ 21 ॥
ಶ್ರೀಕೃಷ್ಣ ಆಹ-
ಕುಸುಮಾದಪಿ ಮೃದುಲಾಂಗ್ಯಾಃ ಕುಚಯೋರೇವಾಸ್ತಿ ಹನ್ತ ಕಾಠಿನ್ಯಮ್ ।
ಇತಿ ತನ್ ನಿಷ್ಕಾಶಯಿತುಂ ಕ್ಷುಣತ್ತಿ ನಖರಾವಲೀ ಚತುರಾ ॥ 22 ॥
ಶ್ರೀರಾಧಾಹ-
ಹನ್ತ ಕೃತಂ ಬತ ಕಿಮಿದಂ ಸುರತರಸೋನ್ಮದಕುಲಸ್ತ್ರಿಯಾಃ ಕದನಮ್ ।
ಹಾರಾಸ್ತ್ರುಟಿತಾಃ ಕಾಂಚೀ ಗಲಿತಾ ಸ್ಖಲಿತಾ ತಥೈವ ಮೇ ವೇಣೀ ॥ 23 ॥
ಶ್ರೀಕೃಷ್ಣ ಆಹ-
ಹಾರಾ ಬಲಾದುರುಭಾರಾಃ ಕೃಶಮಪಿ ಮಧ್ಯಂ ಚ ನಹ್ಯತೇ ಕಾಂಚೀ ।
ಚಿಕುರಕದರ್ಥನಭೂತಾ ವೇಣೀ ತದಿಮಾ ರಕ್ಷಿತುಂ ನ ಯೋಗ್ಯಾಃ ॥ 24 ॥
ಶ್ರೀರಾಧಾಹ-
ಊಧೋ ಯೇನ ಗಿರೀನ್ದ್ರಸ್ತಮಪಿ ನ ವಹತೋ ಮಮೋರಸೋ ಭಾರಃ ।
ಹಾರೈರ್ಭೂಷಣಭೂತೈರಭೂದಿಯಂ ಸ್ನೇಹಮುದ್ರಾ ಕಿಮ್ ॥ 25 ॥
ಕುಚಗಿರಿವಹನಪಟುತ್ವಂ ಕೃಶಮಪಿ ಮಧ್ಯಂ ಯತೋ ಬಲಾದ್ಧತ್ತೇ ।
ಮಣಿಮಯಕಾಂಚೀಬನ್ಧಾದೇವ ತಮೃತೇ ದೃಢತಾಽಸ್ಯ ಕೇನ ಸ್ಯಾತ್ ॥ 26 ॥
ಉತ್ಕರ್ಷಣಾವಾಕರ್ಷಣಪರ್ಯಾಯೋದಿತಪರಸ್ಪರಾಸಕ್ತ್ಯಾ ।
ಪ್ರೀತಿರಿಯಂ ಕಿಲ ವೇಣೀಚಿಕುರಾಣಾಂ ನ ಚ ಕದರ್ಥನಂ ವಾಚ್ಯಮ್ ॥ 27 ॥
ಶ್ರೀಕೃಷ್ಣ ಆಹ-
ಸತ್ಯಮಹಂ ಗಿರಿಧಾರೀ ಕರನಲಿನಾಭ್ಯಾಂ ಗಿರಿದ್ವಯಂ ಧಾಸ್ಯೇ ।
ಮಧ್ಯಸ್ಯಾತ್ರ ಪಟುತ್ವೈರಲಂ ಬಲಂ ಕಿಲ ಮಮೈವಾಸ್ತಾಮ್ ॥ 28 ॥
ಚಿಕುರಾಣಾಮಪಿ ವೇಣ್ಯಾಃ ಪರಸ್ಪರಾಸಕ್ತಿಃ ಸೂಚಿತಾ ।
ಪ್ರೀತ್ಯಾ ಕಿಂ ಫಲಮಿಹ ಯದಿ ಪರಿಚರಣಂ ತೇ ನ ಕುರ್ವನ್ತಿ ॥ 29 ॥
ವೇಣೀಬನ್ಧವಿಮುಕ್ತಶ್ಚಿಕುರ ಕಲಾಪೋಽತ್ರ ವೇಲ್ಲಿತೋ ಮರುತಾ ।
ಚಾಮರತಾಮುಪಯಾತಃ ಸ್ವಿನ್ನಾಂಗೀಂ ವೀಜಯತ್ಯಹೋ ಭವತೀಮ್ ॥ 30 ॥
ಶ್ರೀರಾಧಾಹ-
ಆವಿಸ್ಕೃತ ಪುರು ಶಿಲ್ಪಂ ಸಖ್ಯಾ ಮೇ ಬಹು ವಿಲಮ್ಬತೋ ರಚಿತಮ್ ।
ಚಿತ್ರಕಮಲಿಕತಟೇ ತತ್ಕ್ಷಣೇನ ವಿಧ್ವಂಸಿತಂ ಭವತಾ ॥ 31 ॥
ಶ್ರೀಕೃಷ್ಣ ಆಹ-
ಸ್ಮಿತಮುಖಿ ರುಚಾರ್ಧವಿಧುನಾ ಸುಚಾರುಭಾಲೇನ ಮೇ ಮಿಲನ್ತ್ಯೇಷಾ ।
ತ್ವದಲಿಕವಿಧುರೇಖಾಽಸ್ಮೈ ಪ್ರೇಮ್ನಾಽರ್ಪಯತಿ ಸ್ಮ ಸರ್ವಸ್ವಮ್ ॥ 32 ॥
ಶ್ರೀರಾಧಾಹ-
ಗಂಡತಟೇ ಮಮ ಮಕರೀ ಶ್ಯಾಮಾ ಸರಲಾತಿಚಿತ್ರಿತಾಪ್ಯಬಲಾಮ್ ।
ಮಕರದ್ವಯತಾಟಂಕಶ್ಚಪಲೋ ಧೃಷ್ಟಃ ಕದರ್ಥಯತ್ಯೇನಾಮ್ ॥ 33 ॥
ಶ್ರೀಕೃಷ್ಣ ಆಹ-
ರಮಣಿ ಮಮ ಶ್ರುತಿಯುಗಲಂ ತ್ವದುದಿತಸೌಧದ್ರವೈಃ ಪ್ಲುತಂ ತದಪಿ ।
ದ್ವಿಗುಣಿತತೃಷ್ಣಂ ಜಾತಂ ಲೋಲುಪತಾಯಾಃ ಸ್ವರೂಪಮೇವೈತತ್ ॥ 34 ॥
ಶ್ರೀರಾಧಾಹ-
ಲೋಲುಪಚೂಡಾಮಣಿರಸಿ ತವಾಂಗವೃನ್ದಂ ಚ ಲೋಲುಪಂ ಯದಯಮ್ ।
ಮನ್ನಯನಾಕ್ತಮಸೀಮಪ್ಯಧರೋ ರಾಗೀ ಸ್ವ ಮಂಡನಂ ಕುರುತೇ ॥ 35 ॥
ಶ್ರೀಕೃಷ್ಣ ಆಹ-
ಬನ್ಧೂಕಾನ್ತರವರ್ತಿನಮಲಿನಮಿವಾಯಂ ಮಸೀದ್ರವಂ ಧೃತ್ವಾ ।
ಅಕ್ಷ್ಣೋರೇವ ಮುದಂ ತೇ ತನುತೇ ತದಿಮಂ ಕಿಮಾಕ್ಷಿಪಸಿ ॥ 36 ॥
ಶ್ರೀರಾಧಾಹ-
ವನ್ದೇ ತವ ಪರಿಹಸಿತಂ ಕಂ ದೇವಂ ಪರಿಚರಸ್ಯಹೋ ನಿಭಿಋತಮ್ ।
ಯತ್ಪ್ರಸಾದಾದಧೀತಾ ಸೌರತವಿದ್ಯಾತಿಚಾತುರೀಧಾರಾ ॥ 37 ॥
ಶ್ರೀಕೃಷ್ಣ ಆಹ-
ತವ ಜಘನೋತ್ತಮಸದನಂ ಸರಸಂ ದೇವಂ ಸಮುಪಚರಾಮ್ಯತುಲಮ್ ।
ನಿಭೃತನಿಕುಂಜಗೃಹಸ್ಥಃ ಪ್ರತಿ ದಿನಮುಚಿತಾಧಿಕಾರ ಏವಾಹಮ್ ॥ 38 ॥
ಶ್ರೀರಾಧಾಹ-
ಸತ್ಯಮತಃ ಸ್ವಾರೂಪ್ಯಂ ಲಬ್ಧ್ವಾ ದೃಪ್ತಃ ಕುಲಾಬಲಾನಲಿನೀಃ ।
ಮಲಿನೀಃ ಕುರುಷೇ ಕಾ ತವ ನಯನೇ ಪತಿತಾ ಸ್ವಕಂ ಪತಿಂ ಭಜತಾಮ್ ॥ 39 ॥
ಶ್ರೀಕೃಷ್ಣ ಆಹ-
ಸಖಿ ತವ ನಿರಾವೃತಾನ್ಯತಿರುಚಿರಾನ್ಯಂಗಾನ್ಯತೀವ ಸಂಕುಚನ್ತಿ ।
ಸಮ್ಪ್ರತಿ ಮನ್ನಯನಾನ್ತರ್ವಿಶನ್ತಿ ಮನ್ದಾಕ್ಷಮಗ್ನಾನಿ ॥ 40 ॥
ಶ್ರೀರಾಧಾಹ-
ಧೃಷ್ಟತಮೇ ತವ ನಯನೇ ಯನ್ಮಿತ್ರಂ ಕೌಸ್ತುಭೋ ದ್ಯುತಿಂ ತನುತೇ ।
ತದಿಹ ಮದಂಗಾನ್ಯಧುನಾ ಶರಣಂ ಯಾನ್ತು ತ್ವದಂಗಾನಾಮ್ ॥ 41 ॥
ಶ್ರೀಕೃಷ್ಣ ಆಹ-
ಹಿತ್ವಾ ಸತೃಷದೃಶೌ ಮಮ ವೈರಾದಿವ ಕೌಸ್ತುಭಂ ಪರಾಭೂಯ ।
ವಿಶತಿ ತವ ಸ್ತನಯುಗಲಂ ಮದ್ಧೃದಯಾನ್ತಃ ಸ್ವವಿಕ್ರಮಂ ಬಿಭ್ರತ್ ॥ 42 ॥
ಶ್ರೀರಾಧಾಹ-
ಕಠಿನತಮಂ ತವ ಹೃದಯಂ ಕುಚಯುಗಮಪಿ ಮೇ ಪ್ರತೀಯತೇ ಕಠಿನಮ್ ।
ತದುಚಿತಮನಯೋರ್ಮಿಲನಂ ಯೋಗ್ಯಂ ಯೋಗ್ಯೇನ ಯುಜ್ಯತೇ ಯಸ್ಮಾತ್ ॥ 43 ॥
ಶ್ರೀಕೃಷ್ಣ ಆಹ-
ಮದುರಃ ಪಕ್ಷಗತಾ ತ್ವಂ ಮಮ ಯದ್ಯಕ್ಷ್ಣೋರ್ವಿಪಕ್ಷತಾಂ ಕುರುಷೇ ।
ತದಪಿ ತಯೋಸ್ತ್ವದ್ವದನಂ ಪ್ರಕಾಮಸುಭಗಂ ಮುದಂ ತನುತೇ ॥ 44 ॥
ಶ್ರೀರಾಧಾಹ-
ಸ್ವಚ್ಛನ್ದಂ ಯದಿ ರಮಸೇ ರಮಸ್ವ ತತ್ರಾಬಲಾಸ್ಮಿ ಕಿಂ ಕುರ್ಯಾಮ್ ।
ಕ್ಷಿಪಸಿ ದೃಶಂ ಯದಲಜ್ಜಂ ಮದಪಘನೇ ತತ್ಕಥಂ ಸಹೇ ಕುಲಜಾ ॥ 45 ॥
ಶ್ರೀಕೃಷ್ಣ ಆಹ-
ಯದಿ ಮಮ ದೃಷ್ತಿಚಕೋರ್ಯಾ ವಿಧುಮುಖಿ ನೈವೋಪಲಭ್ಯಸೇ ದೈವಾತ್ ।
ಹೃದಯಗೃಹೇ ಖೇಲಸ್ಯಪಿ ತಥಾಪಿ ಹಾ ಜ್ವಲಯಸಿ ಪ್ರಸಭಮ್ ॥ 46 ॥
ಶ್ರೀರಾಧಾಹ-
ತವ ಭುಜಯುಗದೃಢಬನ್ಧಂ ವಾಮಾಪೀಹೇಽನ್ಯಥಾ ಭವನ್ನಯನೇ ।
ನಿಸ್ತ್ರಪಶಿರೋಮಣೇ ಮಾಂ ತ್ರಪಾಮ್ಬುಧೌ ಪಾತಯಿಷ್ಯತಃ ಪ್ರಕಟಮ್ ॥ 47 ॥
ಶ್ರೀಕೃಷ್ಣ ಆಹ-
ತ್ವನ್ನಯನೇ ಚ ಮದಕ್ಷ್ಣೋರನ್ತೇವಾಸಿತ್ವಮಿಚ್ಛತಃ ಕಿನ್ತು ।
ಗರ್ವಾದಿವ ನ ಚ ಪಠತಃ ಪ್ರಕಟಂ ಪ್ರೌಢಿಃ ಕಿಯತೋ ಅಹೋ ಯದಿಯಮ್ ॥ 48 ॥
ಶ್ರೀರಾಧಾಹ-
ಚೇತಃ ಸ್ಫುಟತಿ ಸ್ವಯಂ ಚ ತಥಾಪಿ ನಯನೇ ನ ತಾದೃಶೇ ಭವತಃ ।
ಸಾಧ್ವೀನಾಮಿಯಮುಚಿತಾ ಏವ ನಿಸರ್ಗತ್ರಪಾಕುಲತಾ ॥ 49 ॥
ಶ್ರೀಕೃಷ್ಣ ಆಹ-
ಸಮ್ಪ್ರತಿ ಸತ್ಯಂ ಬ್ರೂಷೇ ತ್ರಪಾವತೀನಾಂ ಶಿರೋಮಣಿಸ್ತ್ವಮಸಿ ।
ವತ್ಸ್ಯಾಯನತನ್ತ್ರೋಕ್ತಃ ಸಾಧ್ವೀನಾಮಯಮೇವ ಧರ್ಮಃ ॥ 50 ॥
ಶ್ರೀರಾಧಾಹ-
ಯದ್ಯಪ್ಯರುನ್ಧತೀ ಸಾ ಸಾಧ್ವೀಗಣಗಣ್ಯಗೌರವಾ ಜಗತಿ ।
ಧರ್ಮಮಿಮಂ ಪಾಠಯಿತುಂ ತಾಮಪಿ ಶಕ್ನೋತಿ ತೇ ನಯನಮ್ ॥ 51 ॥
ಶ್ರೀಕೃಷ್ಣ ಆಹ-
ರಾಢೇ ದ್ವಿಗುಣಿತಶೋಭಂ ಮದಾಸ್ಯಪಂಕೇರುಹಂ ಧ್ರುವಂ ಪಿಬತು ।
ಸಮ್ಪ್ರತ್ಯಪಿ ನಿಜಲೋಚನಮಧುಕರಯುಗಂ ಕಿಂ ನ ಸರ್ವಥಾ ದಿಶಸಿ ॥ 52 ॥
ಶ್ರೀರಾಧಾಹ-
ಲಾವಣ್ಯಾದ್ಭುತವನ್ಯಾಮಯಂ ತ್ವದಂಗಂ ನ ಶೀಲಯತ್ಯಧಿಕಮ್ ।
ಲೋಚನಶಫರಯುಗಂ ಮಮ ದೃಗನ್ತಜಾಲಂ ಯದಾ ನು ತತ್ಕ್ಷಿಪಸಿ ॥ 53 ॥
ಶ್ರೀಕೃಷ್ಣ ಆಹ-
ನೂಪುರಮಂಗಲವಾದ್ಯಜ್ಞಾಪಿತಮನಸಿಜನೃಪೋತ್ಸವಾಮೋದಃ ।
ತ್ವರಿತಮುಪಯಾತಿ ಅಲಿವನ್ದೀ ಕೀರ್ತಿಂ ಚ ತವ ಪ್ರಥಯನ್ವಿರಾಜತೇ ॥ 54 ॥
ಶ್ರೀರಾಧಾಹ-
ದಯಿತ ನೃಪೋಽಸ್ಯನುಭೂತಃ ಸತ್ಯಂ ಮನಸಿಜಪರಃಶತಾನಾಂ ತ್ವಮ್ ।
ದಿಶಿ ದಿಶಿ ಸತೀಷು ವಿಕ್ರಮವಿಜಯಂ ಶಂಸತಿ ತವೈವಾಯಮ್ ॥ 55 ॥
ಶ್ರೀಕೃಷ್ಣ ಆಹ-
ಸುರತಮಹಾಮಖಭೇರೀ ತ್ರಿಜಗತಿ ಗರ್ಜಂಸ್ತವೈಷ ನೂಪುರಃ ।
ತರ್ಜತಿ ಗರ್ವವತೀಸ್ತಾಃ ಪ್ರಕಾಮಮಮರಾಂಗನಾ ಅಪಿ ಪ್ರಸಭಮ್ ॥ 56 ॥
ಶ್ರೀರಾಧಾಹ-
ರಮಣಮಹೋದಿತಮದಭರಮತ್ತಾಹಂ ಕಿಂ ಬ್ರವೀಮಿ ತೇ ಚರಿತಮ್ ।
ಸ್ತೌಷಿ ಮುಹುರ್ನೂಪುರಮಪಿ ನೂಪುರಮಾತ್ರಾವಶಿಷ್ಟಭೂಷಾಯಾಃ ॥ 57 ॥
ಶ್ರೀಕೃಷ್ಣ ಆಹ-
ಕಿಂ ಕಥ್ಯಸೇ ಸ್ವಯಂ ಬತ ರಮಣಮಹೇ ತ್ವಂ ಸಮುದ್ಧತಾ ಸತ್ಯಮ್ ।
ಮದಭರಮತ್ತ ಯನ್ ನಿಜಪರಿಹಿತವಾಸೋಽಪಿ ಕುರುಷೇ ಸ್ಮರಸಾತ್ ॥ 58 ॥
ಶ್ರೀರಾಧಾಹ-
ಸ ಕಿಲ ತವೇಷ್ಟಾ ದೇವತಾ ಮದನಃ ಶ್ರದ್ಧಾವತೀರತೋ ಯುವತೀಃ ।
ಉಪದಿಷ್ಯೈತನ್ಮನ್ತ್ರಂ ಶಿಷ್ಯಾಃ ಕುರುಷೇ ವಿತೀರ್ಣಸರ್ವಸ್ವಾಃ ॥ 59 ॥
ಶ್ರೀಕೃಷ್ಣ ಆಹ-
ತ್ವಯಿ ಪುನರಸೌ ರಸಜ್ಞಃ ಸ್ಮರೋಽಪಿ ರೋಪಿತಮುದಾ ವಸತಿ ।
ಯದಿದಂ ಕುಚಹಾಟಕ ಸಮ್ಪುಟಯುಗಮಸ್ಯ ಸರ್ವಸ್ವಮ್ ॥ 60 ॥
ಶ್ರೀರಾಧಾಹ-
ಏವಂ ಚೇತ್ಕಥಮನಯೋಃ ಕಂಚುಕಮಥ ಮೌಕ್ತಿಕಂ ಲಸದ್ಧಾರಮ್ ।
ಮೃಗಮದಚರ್ಚಾಂ ದಲಯಸಿ ಕಲಯಸಿ ಚ ಕಠಿನಕರಾಘಾತಮ್ ॥ 61 ॥
ಶ್ರೀಕೃಷ್ಣ ಆಹ-
ಸ್ವಧನವ್ಯವಹೃತಿಸಮಯೇ ಹಾಟಕಮಯಸಮ್ಪುತಸ್ಯ ಯದ್ದೃಷ್ಟಃ ।
ಮಂಗಲಭೂಷಣವಸನೋದ್ಘಾಟೋ ಮುಖದಾರ್ಢ್ಯತಃ ನಖಾಘಾತಃ ॥ 62 ॥
ಶ್ರೀರಾಧಾಹ-
ತದ್ವ್ಯವಹರ್ತಾ ಪುನರಥ ಕೃತ್ವಾ ದ್ವಿಗುಣಿತಸುಸಮ್ಭಾರಮ್ ।
ಆವೃತ್ಯಾತಿರಹಃಸ್ಥಂ ಕುರುತೇ ಸಮ್ಪುಟಮಿದಂ ಚ ಭೋ ದೃಷ್ಟಮ್ ॥ 63 ॥
ಶ್ರೀಕೃಷ್ಣ ಆಹ-
ಸ್ಮರಮಣಿಸಮ್ಪುಟಕುಚಯುಗಮಧುನಾಪ್ಯುತ್ತಾನಮಸ್ತಿ ತತ್ಕಾನ್ತೇ ।
ಹೃದಯಗೃಹಂ ಮಮ ಪೂರಯ ಕೃತ್ವಾಽಧೋ ಮುಖಮಿದಂ ಮಹಾರತ್ನೈಃ ॥ 64 ॥
ಶ್ರೀರಾಧಾಹ-
ವಿಧಿನಾ ವಿಮೃಶ್ಯ ನಿಹಿತಂ ಯಾಸಾಮಬಲೇತಿ ನಾಮ ಯುಕ್ತಾರ್ಥಮ್ ।
ತಾಸಾಂ ಕುಚಸಮ್ಪುಟಯೋರಧೋ ಮುಖೀ ಕೃತಿವಿಧೌ ಕ್ವ ವಾ ಶಕ್ತಿಃ ॥ 65 ॥
ಶ್ರೀಕೃಷ್ಣ ಆಹ-
ಕತಿ ನ ಕರಗ್ರಹವಿಧಿನಾ ಕುಚಸಮ್ಪುಟಕಾನ್ತರಾಹೃತ ರಾಧೇ ।
ಮೋದಮಣೀನಾಂ ತತಯಸ್ತದಪಿ ನ ಮೇ ಪೂರ್ಯತೇ ಹೃದಯಮ್ ॥ 66 ॥
ಶ್ರೀರಾಧಾಹ-
ವ್ರಜವನಿತಾಃ ಶತಕೋಟ್ಯಸ್ತವೈವ ತಾಃ ಪಂಡಿತಾಶ್ಚ ರತಿತನ್ತ್ರೇ ।
ಹೃದಯಂ ತದಪಿ ರತೌ ಬತ ರಂಕತಮತ್ವಂ ನ ತೇ ತ್ಯಜತಿ ॥ 67 ॥
ಶ್ರೀಕೃಷ್ಣ ಆಹ-
ಸ್ಮರಶಿಖಿತಪ್ತೇ ಮಮ ಹೃದಿ ಸುಕುಮಾರ್ಯಸ್ತಾಃ ವಿಶನ್ತು ಕಿಂ ಮುಗ್ಧಾಃ ।
ತ್ವಮತಿಸಮರ್ಥಾ ಪ್ರಸಭಂ ಪ್ರವಿಶ್ಯ ರಾಜಸಿ ಸದೈವೈಕಾ ॥ 68 ॥
ಶ್ರೀರಾಧಾಹ-
ತದಯೇ ಸ್ವರಂಗದಾನೇ ಸ್ವರಂಗನಾಸ್ತಾಃ ಸಮಾನಯ ಕ್ಷಿಪ್ರಮ್ ।
ತತ್ತನ್ನಾಮ ಗೃಹೀತ್ವಾ ಮುರಲೀಗಾನೇ ತವಾತ್ರ ಕೋ ಯತ್ನಃ ॥ 69 ॥
ಶ್ರೀಕೃಷ್ಣ ಆಹ-
ನನ್ದನವನಕುಸುಮಾಂಚಿತಶಿರೋಽಪಿ ಧರ್ತುಂ ನಿಜಾತ್ಯಯೋಗ್ಯತಯಾ ।
ತವ ಪದನಖತಲಸವಿಧೇ ಲಜ್ಜಂ ತೇ ಸುರವರಾಂಗನಾ ಅಪಿ ತಾಃ ॥ 70 ॥
ಶ್ರೀರಾಧಾಹ-
ನಾಭೀವಿವರವರಾನ್ಮೇ ಸಮುದ್ಗತೇಯಂ ನ ಕಾನ್ತರೋಮಾಲೀ ।
ಕಿನ್ತು ಪ್ರಕುಪಿತಭುಜಗೀ ತದುನ್ಮುಖಂ ಕಿಮು ಚಿಕೀರ್ಷಸಿ ಸ್ವಕರಮ್ ॥ 71 ॥
ಶ್ರೀಕೃಷ್ಣ ಆಹ-
ತವ ರೋಮಾಲೀಭುಜಗೀಂ ಖೇಲಯಿತುಂ ಮತ್ಕರಶ್ಚಲತ್ಯಭಿತಃ ।
ಭವದಖಿಲಾಂಗಗತಾನ್ಯಪಿ ರೋಮಾನ್ಯುದ್ಯಾನ್ತಿ ಕಿಂ ರೋದ್ಧುಮ್ ॥ 72 ॥
ಶ್ರೀರಾಧಾಹ-
ಮದಖಿಲಗಾತ್ರಭಟಾ ಅಪಿ ಯತಃ ಪರಾಭವಮವಾಪ್ಯ ಮುಹ್ಯನ್ತಿ ।
ಸ್ಮರರಣಮತ್ತೇ ತ್ವಯಿ ಕಿಂ ಬತ ರೋಮ್ನಾಂ ಯುಜ್ಯತೇ ಯುದ್ಧಮ್ ॥ 73 ॥
ಶ್ರೀಕೃಷ್ಣ ಆಹ-
ವಯಮತಿಕೃಶಾಶ್ಚ ತದಪಿ ಪ್ರಭವಾಮೋದ್ಗಮವಿಧಾವಿತಿ ಪ್ರಕಟಮ್ ।
ಭವತೀಮುದ್ಗಮಚರ್ಯಾಂ ರೋಮಭಟಾಃ ಸ್ಮರಯನ್ತ್ಯಹೋ ಚತುರಾಃ ॥ 74 ॥
ಶ್ರೀರಾಧಾಹ-
ರತಿರಸಪರವಶ ! ಸಹತೇ ತೇಽತಥ್ಯಂ ಕಿಂ ಮೇ ತನೋರನ್ವಯಃ ।
ರಮಯಸ್ವ ಅತಿವಾಮಾಮಪಿ ತಾಂ ನ ಚ ದಯಸೇ ಕಾನ್ತ್ಯಾ ವೇದಯಸೇ ॥ 75 ॥
ಶ್ರೀಕೃಷ್ಣ ಆಹ-
ಸ್ಮರಶರರಾಧೇ ರಾಧೇ ಸಮರೇ ಸಮರೇಖಯಾಂಚಿತೇ ದ್ವಿತಯೇ ।
ಇಹ ಭವದಂಗಮದಂಗೇ ಪ್ರತಿಭಟಮಧುನಾ ಧುನಾನೇಸ್ತಾಮ್ ॥ 76 ॥
ಶ್ರೀರಾಧಾಹ-
ಪ್ರಸ್ವೇದಾಮ್ಬು ವಮನ್ತೀ ಘನರಸಸಿಕ್ತೇವ ಗಾತ್ರವಲ್ಲೀ ಮೇ ।
ದಲಿತೋ ಲಲಿತಾಕಲ್ಪಸ್ತಲ್ಪಶ್ಚ ಖಂಡಿತೋ ನೋ ವಾ ಕತಿಧಾ ॥ 77 ॥
ಶ್ರೀಕೃಷ್ಣ ಆಹ-
ಮದನಘನಾಘನ ಏಷ ಸ್ವೇದಮಿಷಾದ್ವರ್ಷತೀಹ ತನುವಲ್ಲೀಮ್ ।
ಘನರಸಭರೈಃ ಪ್ರತಿಪದಮುದಿತಲಸತ್ಕೋರಕಾಂ ಕಾನ್ತೇ ॥ 78 ॥
ಶ್ರೀರಾಧಾಹ-
ಪ್ರಿಯ ತವ ತರುಣಿಮಜಲಧೇರವಧೇರನ್ವೇಷಣಂ ಕಥಂ ಕುರುತಾಮ್ ।
ಮಹಿಲಾಮತಿಮಕರೀ ತದ್ವಿರಮ್ಯತಾಂ ರಮ್ಯತಾಂ ರತಂ ಯಾತು ॥ 79 ॥
ಶ್ರೀಕೃಷ್ಣ ಆಹ-
ಅತಿನಿಃಶ್ವಸಿತಸಮೀರಣವೇಗಾದ್ದ್ವಿಗುಣೀಭವನ್ಮಹಾವೀಚಿಮ್ ।
ಕೇಲಿಸುಧಾಸರಿತಂ ನೌ ಮಾನಸಕರಿಣೌ ಮುಹುರ್ಮುಹುರ್ಭಜತಾಮ್ ॥ 80 ॥
ಶ್ರೀರಾಧಾಹ-
ಖೇಲತಿ ಮನಃಕರೀ ತೇ ಸತ್ಯಂ ಪ್ರಕಟಂ ಸ ಲಕ್ಷ್ಯತೇ ಕಿನ್ತು ।
ತತ್ರೈಕ್ಯಂ ಮಮ ಮನಸೋ ಬ್ರೂಷೇ ಕೋಽತ್ರಾಭಿಪ್ರಾಯಸ್ತೇ ॥ 81 ॥
ಶ್ರೀಕೃಷ್ಣ ಆಹ-
ಶ್ರೀಮನ್ಮದನಸುರೋತ್ತಮಸೇವಾ ಸಮ್ಸಿದ್ಧಯೇ ತು ನೌ ಮನಸೀ ।
ಐಕ್ಯಮವಾಪ್ಯ ತ್ವರಯಾ ತತ್ರ ಚ ಸಾಯುಜ್ಯಮೀಹೇತೇ ॥ 82 ॥
ಶ್ರೀರಾಧಾಹ-
ಸ್ವಸ್ಮಿನ್ನೇವ ತನೋರ್ಮಮ ಮನಸಶ್ಚಾಪ್ಯೇಕದೈವ ಸಾಯುಜ್ಯಮ್ ।
ಪ್ರಸಭಂ ಕುರುಷೇ ದೇವ ತ್ವಮೇವ ಸಾಕ್ಷಾನ್ಮಹಾಮದನಃ ॥ 83 ॥
ಶ್ರೀಕೃಷ್ಣ ಆಹ-
ಸರ್ವಸ್ವಾತ್ಮಸಮರ್ಪಣಕಾರಿಣ್ಯೈ ತೇ ಮುದಾ ಮಾರಃ ।
ಸ್ವೀಯಾಂ ಮೌಕ್ತಿಕಮಾಲಾಮಲಿಕೇ ಸ್ವೇದಕಣವ್ಯಾಜಾದ್ದತ್ತೇ ॥ 84 ॥
ಶ್ರೀರಾಧಾಹ-
ತ್ವದಲಕನಿಕರಸ್ತಾಮಪಿ ನೀತ್ವಾ ಸ್ತಿಮ್ಯತಿ ಹಠಾದಯಂ ಚಪಲಃ ।
ಮದನಪ್ರಸಾದ ಇತ್ಯತಿಭಾಗ್ಯಂ ಸಂಶ್ಲಾಘತೇ ಸ್ವೀಯಮ್ ॥ 85 ॥
ಶ್ರೀಕೃಷ್ಣ ಆಹ-
ತಾಮ್ಬೂಲಾಮೃತರಸಲವಲಾಭೇನೈವಾತ್ರ ಗರ್ವಿತೇ ಭವನ್ನಯನೇ ।
ಅನ್ತರ್ಬಹಿರಪಿ ತದ್ರಸಮುದಿತೇ ಗಂಡೇ ಕಥಂ ನು ಮೇ ಹಸತಃ ॥ 86 ॥
ಶ್ರೀರಾಧಾಹ-
ಯತ್ಸೂಚಯಸಿ ರಸಪ್ರಿಯ ತದಿದಂ ಸ್ವೇನೈವ ಪಾಠಿತಂ ತನ್ತ್ರಮ್ ।
ಸ್ವಯಮೇವ ವ್ಯಾಚಷ್ಟೇ ಸ ಭವಾನಿತಿ ಕಿಲ ನಮಸ್ತುಭ್ಯಮ್ ॥ 87 ॥
ಶ್ರೀಕೃಷ್ಣ ಆಹ-
ಮನ್ಮುಖಪಂಕೇರುಹಮಪಿ ಚಿತ್ರಮಿದಂ ಯದ್ವಿಕಾಶಯಸ್ಯಧಿಕಮ್ ।
ಗುಣವತ್ಯತಿಸುರಭಿತೇನ ಸ್ವವದನಸುಧಾಕರಸುಧಾದ್ರವೇಣ ಹಿ ॥ 88 ॥
ಶ್ರೀರಾಧಾಹ-
ನೀಲನಿಧೇರ್ಬತ ಪೋತೋ ಬಿನ್ದುವ್ಯಾಜೇನ ರಕ್ಷಿತಶ್ಚಿಬುಕೇ ।
ತಮಪಿ ಚ ಭವದಧರೋಽಯಂ ಹೃತವಾನಿತಿ ಕತಿ ಮೃಷಾಮ್ಯನಯಮ್ ॥ 89 ॥
ಶ್ರೀಕೃಷ್ಣ ಆಹ-
ಅನುರಾಗಿಣಮಪಿ ಸಾಗಸಮಧರಂ ಮೇ ದಂಡಯಸ್ಯತಃ ಕೋಪಾತ್ ।
ರದನಾಸ್ತ್ರೇಣ ತದಪ್ಯಭಿಮನುತೇ ಲಬ್ಧಪ್ರಸಾದಮೇವಾಯಮ್ ॥ 90 ॥
ಶ್ರೀರಾಧಾಹ-
ಅಧಿ ರದನಚ್ಛನ್ದನಂ ಮೇ ಸ್ವರದನಕೀರ್ತಿಂ ನ ಕಿಂ ವಿಚಾರಯಸಿ ।
ಯುವತೀಸಭಾಸು ಚಿತ್ರಂ ತ್ರಪಾಕುಲತಮತೇಯಂ ನು ಮಯಿ ಸೃಷ್ಟಾ ॥ 91 ॥
ಶ್ರೀಕೃಷ್ಣ ಆಹ-
ವಿಷಮಾಶುಗರಣರಂಗೇ ಸ್ವಾಂಗೇನಾತುಲ ಪರಾಕ್ರಮಾ ಕ್ರಮಸೇ ।
ದರ್ಶಯ ಭುಜಬಲಮಯಿ ಭೋ ಮಯಿ ತೇ ದಯಿತೇ ಗುಣಾವಲೀ ಫಲತು ॥ 92 ॥
ಶ್ರೀರಾಧಾಹ-
ತನ್ವೀಮಪಿ ತನುಮೇತಾಂ ಮುಹುರತಿದಾರ್ಢ್ಯೇನ ವೇಷ್ಟಯತೇ ।
ತ್ವದ್ಭುಜಭುಜಾಂಗಪಾಶಃ ಶ್ವಾಸೋ ಮೇ ಕೇವಲಂ ವಲತೇ ॥ 93 ॥
ಶ್ರೀಕೃಷ್ಣ ಆಹ-
ಸಮ್ಪ್ರತಿ ಸಾಕ್ಷಾತ್ಕಾರೋ ಮದನಸ್ಯ ಸ್ಯಾದಿತೀವ ಜಾನೀಮಃ ।
ಯನ್ ನಶ್ಚೇತಸ್ತ್ವರತೇ ನಿರುಪಮಮತ್ರೈಕಭಾವಾಯ ॥ 94 ॥
ಶ್ರೀರಾಧಾಹ-
ತಾಂಡವಪಂಡಿತ ನಿತರಾಮಲಮಧ್ಯಾಪನಶ್ರಮೇಣ ತೇ ।
ಮದಪಘನಾಃ ಸ್ವಯಮೇತೇ ಚಾರಣಚರ್ಯಾಸು ಯಾನ್ತಿ ನೈಪುಣ್ಯಮ್ ॥ 95 ॥
ಶ್ರೀಕೃಷ್ಣ ಆಹ-
ಮದನಮಹಾಘನಘೂರ್ಣಾಘ್ರಾತಾನ್ಯಂಗಾನಿ ನೌ ಪ್ರಿಯೇ ಯುಗಪತ್ ।
ಶ್ವಾಸೋದಿತಜಯಚತುರಿಮಭರಮನ್ಯೋನ್ಯಂ ದಿಶನ್ತಿ ಸೋನ್ಮಾದಮ್ ॥ 96 ॥
(ಶ್ರೀ ಗ್ರನ್ಥಕರ್ತಾಹ- )
ಲೋಚನಮೀನಚತುಷ್ಟಯಮಧುನಾ ನಿಷ್ಪನ್ದತಾಮುರೀಕುರುತೇ ।
ರಸಭರವಿಸ್ಮಯಮತ್ತೇ ನೈಸರ್ಗಿಕಚೇಷ್ಟಿತಸ್ಮೃತಿಃ ಕಿಂ ಸ್ಯಾತ್ ॥ 97 ॥
ಚನ್ದನನಲದಸುಧಾಂಶುದ್ರವಮಯಜಲಯನ್ತ್ರವೇಶ್ಮಮಧ್ಯಸ್ಥೇ ।
ಸ್ಥಲಜಲರುಹದಲಕಲ್ಪಿತತಲ್ಪೇಽಸುಪ್ತಾಂ ರತಶ್ರಾನ್ತೌ ॥ 98 ॥
ಕ್ರಮವಲಿತೈರ್ನಿಃಶ್ವಸಿತೈಃ ಸುರಭಯತೋಃ ಸ್ವಾಮಿನೋರಥಾನ್ಯೋನ್ಯಮ್ ।
ನಿದ್ರಾವೃದ್ಧಿಮವೇತ್ಯ ಪ್ರಮೋದಸಿನ್ಧಾವಯಂ ಜನಃ ಪ್ಲವತಾಮ್ ॥ 99 ॥
ಸುರತಕಥಾಮೃತಮಾರ್ಯಶತಕಂ ನತಕನ್ಧರೋ ಜನೋ ಜುಷತಾಮ್ ।
ರತಸುಖಧಾಮಗವಾಕ್ಷಶ್ರಿತನಯನಃ ಸ್ವಾಮಿನೋರಹೋ ಕೃಪಯಾ ॥ 100 ॥
ಪ್ರವಿಶತು ಶನೈಃ ಶನೈರಥ ಮೂಕಿತನೂಪುರಂ ಜನಸ್ತತ್ರ ।
ಗಾತ್ರೇ ನಿಭಾಲ್ಯ ಯೂನೋಃ ಸ್ವವಲಯರಾಜೀಂ ಪಿಧಾಯ ಬಧ್ನಾತು ॥ 101 ॥
ಕಮ್ಪನಚಕಿತೈರಲಿಭಿಸ್ತ್ಯಕ್ತುಮಶಕ್ಯೇನ ತಾಲವೃನ್ತೇನ ।
ವೀಜಯತು ಶ್ರಮಸಲಿಲಂ ಪ್ರತ್ಯಂಗಂ ಶೋಷಿತಂ ನಿರೂಪಯತು ॥ 102 ॥
ರಾಧಾಕುಂಡತಟವಾಸಮಹಾಸಮ್ಪದಂ ಮದಃ ಸೋಽಯಮ್ ।
ಕಿಮು ವಾಂಛಿತಮತಿದುರ್ಲಭವಸ್ತುನಿ ತಮೃತೇ ಮಮಾಸ್ತು ಸಮ್ಭಾವ್ಯಮ್ ॥ 103 ॥
ಅಷ್ಟಮಕ್ ಅಧಿಕರಹಸ್ಯವ್ಯಂಜಕಂ ಮಥ್ನನ್ ನಿಬಧ್ಯತೇಽತ್ರ ಶತಕೇ ।
ತಾದೃಶಭಾವವಿಭಾವಿತಹೃದಯೇನೈವಾಸ್ತು ತತ್ಸೇವ್ಯಮ್ ॥ 104 ॥
ಖವಿಯದೃತುಕ್ಷಮಾಗಣಿತೇ ಶಾಕೇ ವೃಷಸಂಸ್ಥಿತೇ ದಿವಾಧೀಶೇ ।
ಸುರತಕಥಾಮೃತಮುದಗದುದಯತಾಂ ಚ ಭಕ್ತಹೃನ್ನಭಸಿ ॥ 105 ॥
ಇತಿ ಮಹಾಮಹೋಪಾಧ್ಯಾಯಶ್ರೀವಿಶ್ವನಾಥಚಕ್ರವರ್ತಿವಿರಚಿತಂ
ಸುರತಕಥಾಮೃತಂ ಸಮಾಪ್ತಮ್ ॥