॥ Brihannila Tantra Tara Shatanama Stotra Lyrics Malayalam Lyrics ॥
॥ താരാശതനാമസ്തോത്രം ബൃഹന്നീലതന്ത്രാര്‍ഗതം ॥
ശ്രീദേവ്യുവാച ।
സര്‍വം സംസൂചിതം ദേവ നാംനാം ശതം മഹേശ്വര ।
യത്നൈഃ ശതൈര്‍മഹാദേവ മയി നാത്ര പ്രകാശിതം ॥ 20-1 ॥
പഠിത്വാ പരമേശാന ഹഠാത് സിദ്ധ്യതി സാധകഃ ।
നാംനാം ശതം മഹാദേവ കഥയസ്വ സമാസതഃ ॥ 20-2 ॥
ശ്രീഭൈരവ ഉവാച ।
ശൃണു ദേവി പ്രവക്ഷ്യാമി ഭക്താനാം ഹിതകാരകം ।
യജ്ജ്ഞാത്വാ സാധകാഃ സര്‍വേ ജീവന്‍മുക്തിമുപാഗതാഃ ॥ 20-3 ॥
കൃതാര്‍ഥാസ്തേ ഹി വിസ്തീര്‍ണാ യാന്തി ദേവീപുരേ സ്വയം ।
നാംനാം ശതം പ്രവക്ഷ്യാമി ജപാത് സ(അ)ര്‍വജ്ഞദായകം ॥ 20-4 ॥
നാംനാം സഹസ്രം സംത്യജ്യ നാംനാം ശതം പഠേത് സുധീഃ ।
കലൌ നാസ്തി മഹേശാനി കലൌ നാന്യാ ഗതിര്‍ഭവേത് ॥ 20-5 ॥
ശൃണു സാധ്വി വരാരോഹേ ശതം നാംനാം പുരാതനം ।
സര്‍വസിദ്ധികരം പുംസാം സാധകാനാം സുഖപ്രദം ॥ 20-6 ॥
താരിണീ താരസംയോഗാ മഹാതാരസ്വരൂപിണീ ।
താരകപ്രാണഹര്‍ത്രീ ച താരാനന്ദസ്വരൂപിണീ ॥ 20-7 ॥
മഹാനീലാ മഹേശാനീ മഹാനീലസരസ്വതീ ।
ഉഗ്രതാരാ സതീ സാധ്വീ ഭവാനീ ഭവമോചിനീ ॥ 20-8 ॥
മഹാശങ്ഖരതാ ഭീമാ ശാങ്കരീ ശങ്കരപ്രിയാ ।
മഹാദാനരതാ ചണ്ഡീ ചണ്ഡാസുരവിനാശിനീ ॥ 20-9 ॥
ചന്ദ്രവദ്രൂപവദനാ ചാരുചന്ദ്രമഹോജ്ജ്വലാ ।
ഏകജടാ കുരങ്ഗാക്ഷീ വരദാഭയദായിനീ ॥ 20-10 ॥
മഹാകാലീ മഹാദേവീ ഗുഹ്യകാലീ വരപ്രദാ ।
മഹാകാലരതാ സാധ്വീ മഹൈശ്വര്യപ്രദായിനീ ॥ 20-11 ॥
മുക്തിദാ സ്വര്‍ഗദാ സൌംയാ സൌംയരൂപാ സുരാരിഹാ ।
ശഠവിജ്ഞാ മഹാനാദാ കമലാ ബഗലാമുഖീ ॥ 20-12 ॥
മഹാമുക്തിപ്രദാ കാലീ കാലരാത്രിസ്വരൂപിണീ ।
സരസ്വതീ സരിച്ശ്രേഷ്ഠാ സ്വര്‍ഗങ്ഗാ സ്വര്‍ഗവാസിനീ ॥ 20-13 ॥
ഹിമാലയസുതാ കന്യാ കന്യാരൂപവിലാസിനീ ।
ശവോപരിസമാസീനാ മുണ്ഡമാലാവിഭൂഷിതാ ॥ 20-14 ॥
ദിഗംബരാ പതിരതാ വിപരീതരതാതുരാ ।
രജസ്വലാ രജഃപ്രീതാ സ്വയംഭൂകുസുമപ്രിയാ ॥ 20-15 ॥
സ്വയംഭൂകുസുമപ്രാണാ സ്വയംഭൂകുസുമോത്സുകാ ।
ശിവപ്രാണാ ശിവരതാ ശിവദാത്രീ ശിവാസനാ ॥ 20-16 ॥
അട്ടഹാസാ ഘോരരൂപാ നിത്യാനന്ദസ്വരൂപിണീ ।
മേഘവര്‍ണാ കിശോരീ ച യുവതീസ്തനകുങ്കുമാ ॥ 20-17 ॥
ഖര്‍വാ ഖര്‍വജനപ്രീതാ മണിഭൂഷിതമണ്ഡനാ ।
കിങ്കിണീശബ്ദസംയുക്താ നൃത്യന്തീ രക്തലോചനാ ॥ 20-18 ॥
കൃശാങ്ഗീ കൃസരപ്രീതാ ശരാസനഗതോത്സുകാ ।
കപാലഖര്‍പരധരാ പഞ്ചാശന്‍മുണ്ഡമാലികാ ॥ 20-19 ॥
ഹവ്യകവ്യപ്രദാ തുഷ്ടിഃ പുഷ്ടിശ്ചൈവ വരാങ്ഗനാ ।
ശാന്തിഃ ക്ഷാന്തിര്‍മനോ ബുദ്ധിഃ സര്‍വബീജസ്വരൂപിണീ ॥ 20-20 ॥
ഉഗ്രാപതാരിണീ തീര്‍ണാ നിസ്തീര്‍ണഗുണവൃന്ദകാ ।
രമേശീ രമണീ രംയാ രാമാനന്ദസ്വരൂപിണീ ॥ 20-21 ॥
രജനീകരസമ്പൂര്‍ണാ രക്തോത്പലവിലോചനാ ।
ഇതി തേ കഥിതം ദിവ്യം ശതം നാംനാം മഹേശ്വരി ॥ 20-22 ॥
പ്രപഠേദ് ഭക്തിഭാവേന താരിണ്യാസ്താരണക്ഷമം ।
സര്‍വാസുരമഹാനാദസ്തൂയമാനമനുത്തമം ॥ 20-23 ॥
ഷണ്‍മാസാദ് മഹദൈശ്വര്യം ലഭതേ പരമേശ്വരി ।
ഭൂമികാമേന ജപ്തവ്യം വത്സരാത്താം ലഭേത് പ്രിയേ ॥ 20-24 ॥
ധനാര്‍ഥീ പ്രാപ്നുയാദര്‍ഥം മോക്ഷാര്‍ഥീ മോക്ഷമാപ്നുയാത് ।
ദാരാര്‍ഥീ പ്രാപ്നുയാദ് ദാരാന്‍ സര്‍വാഗമ(പുരോ?പ്രചോ)ദിതാന്‍ ॥ 20-25 ॥
അഷ്ടംയാം ച ശതാവൃത്ത്യാ പ്രപഠേദ് യദി മാനവഃ ।
സത്യം സിദ്ധ്യതി ദേവേശി സംശയോ നാസ്തി കശ്ചന ॥ 20-26 ॥
ഇതി സത്യം പുനഃ സത്യം സത്യം സത്യം മഹേശ്വരി ।
അസ്മാത് പരതരം നാസ്തി സ്തോത്രമധ്യേ ന സംശയഃ ॥ 20-27 ॥
നാംനാം ശതം പഠേദ് മന്ത്രം സംജപ്യ ഭക്തിഭാവതഃ ।
പ്രത്യഹം പ്രപഠേദ് ദേവി യദീച്ഛേത് ശുഭമാത്മനഃ ॥ 20-28 ॥
ഇദാനീം കഥയിഷ്യാമി വിദ്യോത്പത്തിം വരാനനേ ।
യേന വിജ്ഞാനമാത്രേണ വിജയീ ഭുവി ജായതേ ॥ 20-29 ॥
യോനിബീജത്രിരാവൃത്ത്യാ മധ്യരാത്രൌ വരാനനേ ।
അഭിമന്ത്ര്യ ജലം സ്നിഗ്ധം അഷ്ടോത്തരശതേന ച ॥ 20-30 ॥
തജ്ജലം തു പിബേദ് ദേവി ഷണ്‍മാസം ജപതേ യദി ।
സര്‍വവിദ്യാമയോ ഭൂത്വാ മോദതേ പൃഥിവീതലേ ॥ 20-31 ॥
ശക്തിരൂപാം മഹാദേവീം ശൃണു ഹേ നഗനന്ദിനി ।
വൈഷ്ണവഃ ശൈവമാര്‍ഗോ വാ ശാക്തോ വാ ഗാണപോഽപി വാ ॥ 20-32 ॥
തഥാപി ശക്തേരാധിക്യം ശൃണു ഭൈരവസുന്ദരി ।
സച്ചിദാനന്ദരൂപാച്ച സകലാത് പരമേശ്വരാത് ॥ 20-33 ॥
ശക്തിരാസീത് തതോ നാദോ നാദാദ് ബിന്ദുസ്തതഃ പരം ।
അഥ ബിന്ദ്വാത്മനഃ കാലരൂപബിന്ദുകലാത്മനഃ ॥ 20-34 ॥
ജായതേ ച ജഗത്സര്‍വം സസ്ഥാവരചരാത്മകം ।
ശ്രോതവ്യഃ സ ച മന്തവ്യോ നിര്‍ധ്യാതവ്യഃ സ ഏവ ഹി ॥ 20-35 ॥
സാക്ഷാത്കാര്യശ്ച ദേവേശി ആഗമൈര്‍വിവിധൈഃ ശിവേ ।
ശ്രോതവ്യഃ ശ്രുതിവാക്യേഭ്യോ മന്തവ്യോ മനനാദിഭിഃ ॥ 20-36 ॥
ഉപപത്തിഭിരേവായം ധ്യാതവ്യോ ഗുരുദേശതഃ ।
തദാ സ ഏവ സര്‍വാത്മാ പ്രത്യക്ഷോ ഭവതി ക്ഷണാത് ॥ 20-37 ॥
തസ്മിന്‍ ദേവേശി പ്രത്യക്ഷേ ശൃണുഷ്വ പരമേശ്വരി ।
ഭാവൈര്‍ബഹുവിധൈര്‍ദേവി ഭാവസ്തത്രാപി നീയതേ ॥ 20-38 ॥
ഭക്തേഭ്യോ നാനാഘാസേഭ്യോ ഗവി ചൈകോ യഥാ രസഃ ।
സദുഗ്ധാഖ്യസംയോഗേ നാനാത്വം ലഭതേ പ്രിയേ ॥ 20-39 ॥
തൃണേന ജായതേ ദേവി രസസ്തസ്മാത് പരോ രസഃ ।
തസ്മാത് ദധി തതോ ഹവ്യം തസ്മാദപി രസോദയഃ ॥ 20-40 ॥
സ ഏവ കാരണം തത്ര തത്കാര്യം സ ച ലക്ഷ്യതേ ।
ദൃശ്യതേ ച മഹാദേ(വ?വി)ന കാര്യം ന ച കാരണം ॥ 20-41 ॥
തഥൈവായം സ ഏവാത്മാ നാനാവിഗ്രഹയോനിഷു ।
ജായതേ ച തതോ ജാതഃ കാലഭേദോ ഹി ഭാവ്യതേ ॥ 20-42 ॥
സ ജാതഃ സ മൃതോ ബദ്ധഃ സ മുക്തഃ സ സുഖീ പുമാന്‍ ।
സ വൃദ്ധഃ സ ച വിദ്വാംശ്ച ന സ്ത്രീ പുമാന്‍ നപുംസകഃ ॥ 20-43 ॥
നാനാധ്യാസസമായോഗാദാത്മനാ ജായതേ ശിവേ ।
ഏക ഏവ സ ഏവാത്മാ സര്‍വരൂപഃ സനാതനഃ ॥ 20-44 ॥
അവ്യക്തശ്ച സ ച വ്യക്തഃ പ്രകൃത്യാ ജ്ഞായതേ ധ്രുവം ।
തസ്മാത് പ്രകൃതിയോഗേന വിനാ ന ജ്ഞായതേ ക്വചിത് ॥ 20-45 ॥
വിനാ ഘടത്വയോഗേന ന പ്രത്യക്ഷോ യഥാ ഘടഃ ।
ഇതരാദ് ഭിദ്യമാനോഽപി സ ഭേദമുപഗച്ഛതി ॥ 20-46 ॥
മാം വിനാ പുരുഷേ ഭേദോ ന ച യാതി കഥഞ്ചന ।
ന പ്രയോഗൈര്‍ന ച ജ്ഞാനൈര്‍ന ശ്രുത്യാ ന ഗുരുക്രമൈഃ ॥ 20-47 ॥
ന സ്നാനൈസ്തര്‍പണൈര്‍വാപി നച ദാനൈഃ കദാചന ।
പ്രകൃത്യാ ജ്ഞായതേ ഹ്യാത്മാ പ്രകൃത്യാ ലുപ്യതേ പുമാന്‍ ॥ 20-48 ॥
പ്രകൃത്യാധിഷ്ഠിതം സര്‍വം പ്രകൃത്യാ വഞ്ചിതം ജഗത് ।
പ്രകൃത്യാ ഭേദമാപ്നോതി പ്രകൃത്യാഭേദമാപ്നുയാത് ॥ 20-49 ॥
നരസ്തു പ്രകൃതിര്‍നൈവ ന പുമാന്‍ പരമേശ്വരഃ ।
ഇതി തേ കഥിതം തത്ത്വം സര്‍വസാരമനോരമം ॥ 20-50 ॥
ഇതി ശ്രീബൃഹന്നീലതന്ത്രേ ഭൈരവഭൈരവീസംവാദേ താരാശതനാമ
തത്ത്വസാരനിരൂപണം വിംശഃ പടലഃ ॥ 20 ॥
– Chant Stotra in Other Languages –
Goddess Durga Slokam » Tara Shatanama Stotram from Brihannila Tantra Lyrics in Sanskrit » English » Bengali » Gujarati » Kannada » Odia » Telugu » Tamil