॥ Brihannila Tantra Tara Shatanama Stotra Lyrics Telugu Lyrics ॥
॥ తారాశతనామస్తోత్రమ్ బృహన్నీలతన్త్రార్గతమ్ ॥
శ్రీదేవ్యువాచ ।
సర్వం సంసూచితం దేవ నామ్నాం శతం మహేశ్వర ।
యత్నైః శతైర్మహాదేవ మయి నాత్ర ప్రకాశితమ్ ॥ ౨౦-౧ ॥
పఠిత్వా పరమేశాన హఠాత్ సిద్ధ్యతి సాధకః ।
నామ్నాం శతం మహాదేవ కథయస్వ సమాసతః ॥ ౨౦-౨ ॥
శ్రీభైరవ ఉవాచ ।
శృణు దేవి ప్రవక్ష్యామి భక్తానాం హితకారకమ్ ।
యజ్జ్ఞాత్వా సాధకాః సర్వే జీవన్ముక్తిముపాగతాః ॥ ౨౦-౩ ॥
కృతార్థాస్తే హి విస్తీర్ణా యాన్తి దేవీపురే స్వయమ్ ।
నామ్నాం శతం ప్రవక్ష్యామి జపాత్ స(అ)ర్వజ్ఞదాయకమ్ ॥ ౨౦-౪ ॥
నామ్నాం సహస్రం సంత్యజ్య నామ్నాం శతం పఠేత్ సుధీః ।
కలౌ నాస్తి మహేశాని కలౌ నాన్యా గతిర్భవేత్ ॥ ౨౦-౫ ॥
శృణు సాధ్వి వరారోహే శతం నామ్నాం పురాతనమ్ ।
సర్వసిద్ధికరం పుంసాం సాధకానాం సుఖప్రదమ్ ॥ ౨౦-౬ ॥
తారిణీ తారసంయోగా మహాతారస్వరూపిణీ ।
తారకప్రాణహర్త్రీ చ తారానన్దస్వరూపిణీ ॥ ౨౦-౭ ॥
మహానీలా మహేశానీ మహానీలసరస్వతీ ।
ఉగ్రతారా సతీ సాధ్వీ భవానీ భవమోచినీ ॥ ౨౦-౮ ॥
మహాశఙ్ఖరతా భీమా శాఙ్కరీ శఙ్కరప్రియా ।
మహాదానరతా చణ్డీ చణ్డాసురవినాశినీ ॥ ౨౦-౯ ॥
చన్ద్రవద్రూపవదనా చారుచన్ద్రమహోజ్జ్వలా ।
ఏకజటా కురఙ్గాక్షీ వరదాభయదాయినీ ॥ ౨౦-౧౦ ॥
మహాకాలీ మహాదేవీ గుహ్యకాలీ వరప్రదా ।
మహాకాలరతా సాధ్వీ మహైశ్వర్యప్రదాయినీ ॥ ౨౦-౧౧ ॥
ముక్తిదా స్వర్గదా సౌమ్యా సౌమ్యరూపా సురారిహా ।
శఠవిజ్ఞా మహానాదా కమలా బగలాముఖీ ॥ ౨౦-౧౨ ॥
మహాముక్తిప్రదా కాలీ కాలరాత్రిస్వరూపిణీ ।
సరస్వతీ సరిచ్శ్రేష్ఠా స్వర్గఙ్గా స్వర్గవాసినీ ॥ ౨౦-౧౩ ॥
హిమాలయసుతా కన్యా కన్యారూపవిలాసినీ ।
శవోపరిసమాసీనా ముణ్డమాలావిభూషితా ॥ ౨౦-౧౪ ॥
దిగమ్బరా పతిరతా విపరీతరతాతురా ।
రజస్వలా రజఃప్రీతా స్వయమ్భూకుసుమప్రియా ॥ ౨౦-౧౫ ॥
స్వయమ్భూకుసుమప్రాణా స్వయమ్భూకుసుమోత్సుకా ।
శివప్రాణా శివరతా శివదాత్రీ శివాసనా ॥ ౨౦-౧౬ ॥
అట్టహాసా ఘోరరూపా నిత్యానన్దస్వరూపిణీ ।
మేఘవర్ణా కిశోరీ చ యువతీస్తనకుఙ్కుమా ॥ ౨౦-౧౭ ॥
ఖర్వా ఖర్వజనప్రీతా మణిభూషితమణ్డనా ।
కిఙ్కిణీశబ్దసంయుక్తా నృత్యన్తీ రక్తలోచనా ॥ ౨౦-౧౮ ॥
కృశాఙ్గీ కృసరప్రీతా శరాసనగతోత్సుకా ।
కపాలఖర్పరధరా పఞ్చాశన్ముణ్డమాలికా ॥ ౨౦-౧౯ ॥
హవ్యకవ్యప్రదా తుష్టిః పుష్టిశ్చైవ వరాఙ్గనా ।
శాన్తిః క్షాన్తిర్మనో బుద్ధిః సర్వబీజస్వరూపిణీ ॥ ౨౦-౨౦ ॥
ఉగ్రాపతారిణీ తీర్ణా నిస్తీర్ణగుణవృన్దకా ।
రమేశీ రమణీ రమ్యా రామానన్దస్వరూపిణీ ॥ ౨౦-౨౧ ॥
రజనీకరసమ్పూర్ణా రక్తోత్పలవిలోచనా ।
ఇతి తే కథితం దివ్యం శతం నామ్నాం మహేశ్వరి ॥ ౨౦-౨౨ ॥
ప్రపఠేద్ భక్తిభావేన తారిణ్యాస్తారణక్షమమ్ ।
సర్వాసురమహానాదస్తూయమానమనుత్తమమ్ ॥ ౨౦-౨౩ ॥
షణ్మాసాద్ మహదైశ్వర్యం లభతే పరమేశ్వరి ।
భూమికామేన జప్తవ్యం వత్సరాత్తాం లభేత్ ప్రియే ॥ ౨౦-౨౪ ॥
ధనార్థీ ప్రాప్నుయాదర్థం మోక్షార్థీ మోక్షమాప్నుయాత్ ।
దారార్థీ ప్రాప్నుయాద్ దారాన్ సర్వాగమ(పురో?ప్రచో)దితాన్ ॥ ౨౦-౨౫ ॥
అష్టమ్యాం చ శతావృత్త్యా ప్రపఠేద్ యది మానవః ।
సత్యం సిద్ధ్యతి దేవేశి సంశయో నాస్తి కశ్చన ॥ ౨౦-౨౬ ॥
ఇతి సత్యం పునః సత్యం సత్యం సత్యం మహేశ్వరి ।
అస్మాత్ పరతరం నాస్తి స్తోత్రమధ్యే న సంశయః ॥ ౨౦-౨౭ ॥
నామ్నాం శతం పఠేద్ మన్త్రం సంజప్య భక్తిభావతః ।
ప్రత్యహం ప్రపఠేద్ దేవి యదీచ్ఛేత్ శుభమాత్మనః ॥ ౨౦-౨౮ ॥
ఇదానీం కథయిష్యామి విద్యోత్పత్తిం వరాననే ।
యేన విజ్ఞానమాత్రేణ విజయీ భువి జాయతే ॥ ౨౦-౨౯ ॥
యోనిబీజత్రిరావృత్త్యా మధ్యరాత్రౌ వరాననే ।
అభిమన్త్ర్య జలం స్నిగ్ధం అష్టోత్తరశతేన చ ॥ ౨౦-౩౦ ॥
తజ్జలం తు పిబేద్ దేవి షణ్మాసం జపతే యది ।
సర్వవిద్యామయో భూత్వా మోదతే పృథివీతలే ॥ ౨౦-౩౧ ॥
శక్తిరూపాం మహాదేవీం శృణు హే నగనన్దిని ।
వైష్ణవః శైవమార్గో వా శాక్తో వా గాణపోఽపి వా ॥ ౨౦-౩౨ ॥
తథాపి శక్తేరాధిక్యం శృణు భైరవసున్దరి ।
సచ్చిదానన్దరూపాచ్చ సకలాత్ పరమేశ్వరాత్ ॥ ౨౦-౩౩ ॥
శక్తిరాసీత్ తతో నాదో నాదాద్ బిన్దుస్తతః పరమ్ ।
అథ బిన్ద్వాత్మనః కాలరూపబిన్దుకలాత్మనః ॥ ౨౦-౩౪ ॥
జాయతే చ జగత్సర్వం సస్థావరచరాత్మకమ్ ।
శ్రోతవ్యః స చ మన్తవ్యో నిర్ధ్యాతవ్యః స ఏవ హి ॥ ౨౦-౩౫ ॥
సాక్షాత్కార్యశ్చ దేవేశి ఆగమైర్వివిధైః శివే ।
శ్రోతవ్యః శ్రుతివాక్యేభ్యో మన్తవ్యో మననాదిభిః ॥ ౨౦-౩౬ ॥
ఉపపత్తిభిరేవాయం ధ్యాతవ్యో గురుదేశతః ।
తదా స ఏవ సర్వాత్మా ప్రత్యక్షో భవతి క్షణాత్ ॥ ౨౦-౩౭ ॥
తస్మిన్ దేవేశి ప్రత్యక్షే శృణుష్వ పరమేశ్వరి ।
భావైర్బహువిధైర్దేవి భావస్తత్రాపి నీయతే ॥ ౨౦-౩౮ ॥
భక్తేభ్యో నానాఘాసేభ్యో గవి చైకో యథా రసః ।
సదుగ్ధాఖ్యసంయోగే నానాత్వం లభతే ప్రియే ॥ ౨౦-౩౯ ॥
తృణేన జాయతే దేవి రసస్తస్మాత్ పరో రసః ।
తస్మాత్ దధి తతో హవ్యం తస్మాదపి రసోదయః ॥ ౨౦-౪౦ ॥
స ఏవ కారణం తత్ర తత్కార్యం స చ లక్ష్యతే ।
దృశ్యతే చ మహాదే(వ?వి)న కార్యం న చ కారణమ్ ॥ ౨౦-౪౧ ॥
తథైవాయం స ఏవాత్మా నానావిగ్రహయోనిషు ।
జాయతే చ తతో జాతః కాలభేదో హి భావ్యతే ॥ ౨౦-౪౨ ॥
స జాతః స మృతో బద్ధః స ముక్తః స సుఖీ పుమాన్ ।
స వృద్ధః స చ విద్వాంశ్చ న స్త్రీ పుమాన్ నపుంసకః ॥ ౨౦-౪౩ ॥
నానాధ్యాససమాయోగాదాత్మనా జాయతే శివే ।
ఏక ఏవ స ఏవాత్మా సర్వరూపః సనాతనః ॥ ౨౦-౪౪ ॥
అవ్యక్తశ్చ స చ వ్యక్తః ప్రకృత్యా జ్ఞాయతే ధ్రువమ్ ।
తస్మాత్ ప్రకృతియోగేన వినా న జ్ఞాయతే క్వచిత్ ॥ ౨౦-౪౫ ॥
వినా ఘటత్వయోగేన న ప్రత్యక్షో యథా ఘటః ।
ఇతరాద్ భిద్యమానోఽపి స భేదముపగచ్ఛతి ॥ ౨౦-౪౬ ॥
మాం వినా పురుషే భేదో న చ యాతి కథఞ్చన ।
న ప్రయోగైర్న చ జ్ఞానైర్న శ్రుత్యా న గురుక్రమైః ॥ ౨౦-౪౭ ॥
న స్నానైస్తర్పణైర్వాపి నచ దానైః కదాచన ।
ప్రకృత్యా జ్ఞాయతే హ్యాత్మా ప్రకృత్యా లుప్యతే పుమాన్ ॥ ౨౦-౪౮ ॥
ప్రకృత్యాధిష్ఠితం సర్వం ప్రకృత్యా వఞ్చితం జగత్ ।
ప్రకృత్యా భేదమాప్నోతి ప్రకృత్యాభేదమాప్నుయాత్ ॥ ౨౦-౪౯ ॥
నరస్తు ప్రకృతిర్నైవ న పుమాన్ పరమేశ్వరః ।
ఇతి తే కథితం తత్త్వం సర్వసారమనోరమమ్ ॥ ౨౦-౫౦ ॥
ఇతి శ్రీబృహన్నీలతన్త్రే భైరవభైరవీసంవాదే తారాశతనామ
తత్త్వసారనిరూపణం వింశః పటలః ॥ ౨౦ ॥
– Chant Stotra in Other Languages –
Goddess Durga Slokam » Tara Shatanama Stotram from Brihannila Tantra Lyrics in Sanskrit » English » Bengali » Gujarati » Kannada » Malayalam » Odia » Tamil