॥ Bhartrihari’s Vijnanashataka Bengali Lyrics ॥
বিজ্ঞানশতকং ভর্তৃহরিকৃত
বিগলদমলদানশ্রেণিসৌরভ্যলোভো-
পগতমধুপমালাব্যাকুলাকাশদেশঃ ।
অবতু জগদশেষং শশ্বদুগ্রাত্মদর্য্যো ?
বিপুলপরিঘদন্তোদ্দণ্ডশুণ্ডো গণেশঃ ॥ ১ ॥
য়ত্সত্তয়া শুচি বিভাতি য়দাত্মভাসা
প্রদ্যোতিতং জগদশেষমপাস্তদোষম্ ।
তদ্ব্রহ্ম নিষ্কলমসঙ্গমপারসৌখ্যং
প্রত্যগ্ভজে পরমমঙ্গলমদ্বিতীয়ম্ ॥ ২ ॥
মাতা মৃতা জনয়িতাপি জগাম শীঘ্রং
লোকান্তরং তব কলত্রসুতাদয়োঽপি ।
ভ্রাতস্তথাপি ন জহাসি মৃষাভিমানং
দুঃখাত্মকে বপুষি মূত্রকুদর্পকূপে ॥ ৩ ॥
ব্রহ্মামৃতং ভজ সদা সহজপ্রকাশং
সর্বান্তরং নিরবধি প্রথিতপ্রভাবম্ ।
য়দ্যস্তি তে জিগমিষা সহসা ভবাব্ধেঃ
পারে পরে পরমশর্মণি নিষ্কলঙ্কে ॥ ৪ ॥
আরভ্য গর্ভবসতিং মরণাবসানং
য়দ্যস্তি জীবিতুমদৃষ্টমনেককালম্ ।
জন্তোস্তথাপি ন সুখং সুখবিভ্রমোঽয়ং
য়দ্বালয়া রতিরনেকবিভূতিভাজঃ ॥ ৫ ॥
সা রোগিণী য়দি ভবেদথবা বিবর্ণা
বালাপ্রিয়াশশিমুখী রসিকস্য পুংসঃ ।
শল্যায়তে হৃদি তথা মরণং কৃশাঙ্গ্যা-
য়ত্তস্য সা বিগতনিদ্রসরোরুহাক্ষী ॥ ৬ ॥
ত্বত্সাক্ষিকং সকলমেতদবোচমিত্থং
ভ্রাতর্বিচার্য ভবতা করণীয়মিষ্টম্ ।
য়েনেদৃশং ন ভবিতা ভবতোঽপি কষ্টং
শোকাকুলস্য ভবসাগরমগ্নমূর্তেঃ ॥ ৭ ॥
নিষ্কণ্টকেঽপি ন সুখং বসুধাধিপত্যে
কস্যাপি রাজতিলকস্য য়দেষ দেবঃ ।
বিশ্বেশ্বরো ভুজগরাজবিভূতিভূষো
হিত্বা তপস্যতি চিরং সকলা বিভূতীঃ ॥ ৮ ॥
ভূমণ্ডলং লয়মুপৈতি ভবত্যবাধং
লব্ধাত্মকং পুনরপি প্রলয়ং প্রয়াতি ।
আবর্ততে সকলমেতদনন্তবারং
ব্রহ্মাদিভিঃ সমমহো ন সুখং জনানাম্ ॥ ৯ ॥
য়দা দেবাদীনাপি ভবতি জন্মাদি নিয়তং
মহাহর্ম্যস্থানে ললিতললনালোলমনসাম্ ।
তদা কামার্তানাং সুগতিরিহ সংসারজলধৌ
নিমগ্নানামুচ্চৈ রতিবিষয়শোকাদিমকরে ॥১০ ॥
স্বয়ং ভোক্তা দাতা বসু সুবহু সম্পাদ্য ভবিতা
কুটুম্বানাং পোষ্টা গুণনিধিরশেষেপ্সিতনরঃ ।
ইতি প্রত্যাশস্য প্রবলদুরিতানীতবিধুরং
শিরস্যস্যাকস্মাত্পততি নিধনং য়েন ভবতি ॥ ১১ ॥
বিপশ্চিদ্দেহাদৌ ক্বচিদপি মমত্বং ন কুরুতে
পরব্রহ্মধ্যাতা গগননগরাকারসদৃশে ।
নিরস্তাহঙ্কারঃ শ্রুতিজনিতবিশ্বাসমুষিতো
নিরাতঙ্কোঽব্যগ্রঃ প্রকৃতিমধুরালাপচতুরঃ ॥ ১২ ॥
অরে চেতশ্চিত্রং ভ্রমসি য়দপাস্য প্রিয়তমং
মুকুন্দং পার্শ্বস্থং পিতরমপি মান্যং সুমনসাম্ ।
বহিঃ শব্দাদ্যর্থে প্রকৃতিচপলে ক্লেশবহুলে
ন তে সংসারেঽস্মিন্ভবতি সুখদাদ্যাপি বিরতিঃ ॥ ১৩ ॥
ন জানীষে মূর্খ ক্বচিদপি হিতং লোকমহিতং
ভ্রমদ্ভোগাকাঙ্ক্ষাকলুষিততয়া মোহবহুলে ।
জগত্যত্রারণ্যে প্রতিপদমনেকাপদি সদা
হরিধ্যানে ব্যগ্রং ভব সকলতাপৈককদনে ॥ ১৪ ॥
বিয়দ্ভূতং ভূতং য়দবনলভং ? চাখিলমিদং
মহামায়াসঙ্গাদ্ভুজগ ইব রজ্বাং ভ্রমকরম্ ।
তদত্যন্তাল্হাদং বিজরমমরং চিন্তয় মনঃ
পরব্রহ্মাব্যগ্রং হরিহরসুরাদ্যৈরবগতম্ ॥ ১৫ ॥
ন চেত্তে সামর্থ্যং ভবনমরণাতঙ্কহরণে
মনোঽনির্দিষ্টেঽস্মিন্নবগতগুণে জ্ঞাতুমকলে ।
তদা মেঘশ্যামং কমলদলদীর্ঘাক্ষমমলং
ভজস্ব শ্রীরঙ্গং শরদমৃতধামাধিকমুখম্ ॥ ১৬ ॥
ক্বয়াতঃ ক্বায়াতো দ্বিজ কলয়সে রত্নমটবী-
মটন্ব্যাঘ্রাঘ্রাতো মরণমগমদ্বিশ্বমহিতঃ ।
অয়ং বিদ্যারামো মুনিরহহ কেনাপি বিদুষা
ন খল্বাত্মপ্রায়ো ভবতু সুকরো জ্ঞাতুমশিবঃ ॥ ১৭ ॥
অহং শ্রান্তোঽধ্বানং বহুবিষমতিক্রম্য বিষমং
ধনাকাঙ্ক্ষাক্ষিপ্তঃ কুনৃপতিমুখালোকনপরঃ ।
ইদানীং কেনাপি স্থিতিমুদরকূপস্য ভরণে
কদন্নেনারণ্যে ক্বচিদপি সমীহে স্থিরমতিঃ ॥ ১৮ ॥
য়মারাধ্যারাধ্যং ত্রিভুবনগুরোরাপ্তবসতিঃ
ধ্রুবো জ্যোতিশ্চক্রে সুচিরমনবদ্যং শিশুরপি ।
অবাপ প্রল্হাদঃ পরমপদমারাধ্য য়মিতঃ
স কস্যালং ক্লেশো হরতি ন হরিঃ কীর্তিতগুঅণঃ ॥ ১৯ ॥
কদাচিত্কষ্টেন দ্রবিণমধমারাধনবশা-
ন্ময়া লব্ধং স্তোকং নিহিতমবনৌ তস্করভয়াত্ ।
ততো নিত্যে কশ্চিত্ক্বচিদপি তদাখুর্বিলগৃহেঽ-
নয়ল্লব্ধোঽপ্যর্থো ন ভবতি য়দা কর্ম বিষমম্ ॥ ২০ ॥
জগাম ব্যর্থং মে বহুদিনমথার্থার্থিততয়া
কুভূমীপালানাং নিকটগতিদোষাকুলমতেঃ ।
হরিধ্যানব্যগ্রং ভবিতুমধুনা বাঞ্ছতি মনঃ
ক্বচিদ্গঙ্গাতীরে তরুণতুলসীসৌরভভরে ॥ ২১ ॥
কদা ভাগীরথ্যা ভবজলধিসন্তারতরণেঃ
স্খলদ্বীচীমালাচপলতলবিস্তারিতমুদঃ ।
তমস্স্থানে কুঞ্জে ক্বচিদপি নিবিশ্যাহৃতমনা
ভবিষ্যাম্যেকাকী নরকমথনে ধ্যানরসিকঃ ॥ ২২ ॥
কদা গোবিন্দেতি প্রতিদিবসমুল্লাসমিলিতাঃ
সুধাধারাপ্রায়াস্ত্রিদশতটিনীবীচিমুখরে ।
ভবিষ্যন্ত্যেকান্তে ক্বচিদপি নিকুঞ্জে মম গিরো
মরালীচক্রাণাং স্থিতিসুখরবাক্রান্তপুলিনে ॥ ২৩ ॥
য়দধ্যস্তং সর্বং স্রজি ভুজগবদ্ভাতি পুরতো
মহামায়োদ্গীর্ণং গগনপবনাদ্যং তনুভৃতাম্ ।
ভবেত্তস্যা ভ্রান্তের্মুররিপুরধিষ্ঠানমুদয়ে
য়তো নস্যাদ্ভ্রান্তির্নিরধিকরণা ক্বাপি জগতি ॥ ২৪ ॥
চিদেব ধ্যাতব্যা সততমনবদ্যা সুখতনু-
র্নিরাধারা নিত্যা নিরবধিরবিদ্যাদিরহিতা ।
অনাস্থামাস্থায় ভ্রমবপুষি সর্বত্র বিষয়ে
সদা শেষব্যাখ্যানিপুণমতিভিঃ খ্যাতয়তিভিঃ ॥ ২৫ ॥
অহোঽত্যর্থেঽপ্যর্থে শ্রুতিশতগুরুভ্যামবগতে
নিষিদ্ধত্বেনাপি প্রতিদিবসমাধাবতি মনঃ ।
পিশাচস্তত্রৈব স্থিররতিরসারেঽপি চপলং
ন জানে কেনাস্য প্রতিকৃতিরনার্যস্য ভবিতা ॥ ২৬ ॥
নিত্যানিত্যপদার্থতত্ত্ববিষয়ে নিত্যং বিচারঃ সতাং
সংসর্গে মিতভাষিতা হিতমিতাহারোঽনহঙ্কারিতা ।
কারুণ্যং কৃপণে জনে সুখিজনে প্রীতিঃ সদা য়স্য স
প্রায়েণৈব তপঃ করোতি সুকৃতী চেতোমুকুন্দপ্রিয়ঃ ॥ ২৭ ॥
সা গোষ্ঠী সুহৃদাং নিবারিতসুধাস্বাদাধুনা ক্বাগম-
ত্তেধীরা ধরণীধরোপকরণীভূতা য়য়ুঃ ক্বাপরে ।
তে ভূপা ভবভীরবো ভবরতাঃ ক্বাগুর্নিরস্তারয়ো
হা কষ্টং ক্ব চ গম্যতে নহি সুখং ক্বাপ্যস্তি লোকত্রয়ে ॥ ২৮ ॥
ভানুর্ভূবলয়প্রদক্ষিণগতিঃ ক্রীডারতিঃ সর্বদা
চন্দ্রোপ্যেষকলানিধিঃ কবলিতঃ স্বর্ভানুনা দুঃখিতঃ ।
ল্হাসং গচ্ছতি বর্ধতে চ সততং গীর্বাণবিশ্রামভূ-
স্তত্স্থানং খলু য়ত্র নাস্ত্যপহতিঃ ক্লেশস্য সংসারিণাম্ ॥ ২৯ ॥
সংসারেঽপি পরোপকারকরণখ্যাতব্রতা মানবা
য়ে সম্পত্তিগৃহা বিচারচতুরা বিশ্বেশ্বরারাধকাঃ ।
তেঽপ্যেনং ভবসাগরং জনিমৃতিগ্রাহাকুলং দুস্তরং
গম্ভীরং সুতরাং তরন্তি বিবিধব্যাধ্যাধিবীচীময়ম্ ॥ ৩০ ॥
রে রে চিত্ত মদান্ধ মোহবধিরা মিথ্যাভিমানোদ্ধতা
ব্যর্থেয়ং ভবতাং ধনাবনরতিঃ সংসারকারাগৃহে ।
বদ্ধানাং নিগডেন গাত্রমমতাসংজ্ঞেন য়ত্কর্হিচি-
দ্দেবব্রাহ্মণভিক্ষুকাদিষু ধনং স্বপ্নেঽপি ন ব্যেতি বঃ ॥ ৩১ ॥
য়াবত্তে য়মকিঙ্করাঃ করতলক্রূরাসিপাশাদয়ো
বুর্দান্তাঃ সৃণিরাজদীর্ঘসুনখা দংষ্ট্রাকরালাননাঃ ।
নাকর্ষন্তি নরান্ধনাদিরহিতান্যত্তাবদিষ্টেচ্ছয়া
য়ুষ্মাভিঃ ক্রিয়তাং ধনস্য কৃপণাস্ত্যাগঃ সুপর্বাদিষু ॥ ৩২ ॥
দেহাদ্যাত্মমতানুসারি ভবতাং য়দ্যস্তি মুগ্ধং মতং
বেদব্যাসবিনিন্দিতং কথমহো পিত্রাদ্যপত্যে তদা ।
দাহাদিঃ ক্রিয়তে বিশুদ্ধফলকো য়ুষ্মাভিরুদ্বেজিতৈঃ
শোকেনার্থপরায়ণৈরপসদৈর্দৃষ্টার্থমাত্রার্থিভিঃ ॥ ৩৩ ॥
অদ্যশ্বো বা মরণমশিবপ্রাণিনাং কালপাশৈ-
রাকৃষ্টানাং জগতি ভবতো নান্যথাত্বং কদাচিত্ ।
য়দ্যপ্যেবং ন খলু কুরুতে হা তথাপ্যর্থলোভং
হিত্বা প্রাণী হিতমবহিতো দেবলোকানুকূলম্ ॥ ৩৪ ॥
দৃষ্টপ্রায়ং বিকলমখিলং কালসর্পেণ বিশ্বং
ক্রূরেণেদং শিব শিব মুনে ব্রূহি রক্ষাপ্রকারম্ ।
অস্যাস্তেকঃ শৃণু মুররিপোর্ধ্যানপীয়ূষপানং
ত্যক্ত্বা নান্যত্কিমপি ভুবনে দৃশ্যতে শাস্ত্রদৃষ্ট্যা ॥ ৩৫ ॥
ধ্যানব্যগ্রং ভবতু তব হৃত্তিষ্ঠতো য়ত্র তত্র
শ্রীমদ্বিষ্ণোস্ত্রিভুবনপতের্নিত্যমানন্দমূর্তেঃ ।
লক্ষ্মীচেতঃকুমুদবিপুলানন্দপীয়ূষধাম্নো
মেঘচ্ছায়াপ্রতিভটতনোঃ ক্লেশসিন্ধুং তিতীর্ষোঃ ॥ ৩৬ ॥
কামব্যাঘ্রে কুমতিফণিনি স্বান্তদুর্বারনীডে
মায়াসিংহীবিহরণমহীলোভভল্লূকভীমে ।
জন্মারণ্যে ন ভবতি রতিঃ সজ্জনানাং কদাচি-
ত্তত্ত্বজ্ঞানাং বিষয়তুষিতাকণ্টকাকীর্ণপার্শ্বে ॥ ৩৭ ॥
য়ামাসাদ্য ত্রিলোকীজনমহিতশিবাবল্লভারামভূমিং
ব্রহ্মাদীনাং সুরাণাং সুখবসতিভুবো মণ্ডলং মণ্ডয়ন্তীম্ ।
নো গর্ভে ব্যালুঠন্তি ক্বচিদপি মনুজা মাতুরুত্ক্রান্তিভাজ-
স্তাং কাশীং নো ভজন্তে কিমিতি সুমতয়ো দুঃখভারং বহন্তে ॥ ৩৮ ॥
কিং কুর্মঃ কিং ভজামঃ কিমিহ সমুদ্রিতং সাধনং কিং বয়স্যাঃ
সংসারোন্মূলনায় প্রতিদিবসমিহানর্থশঙ্কাবতারঃ ।
ভ্রাতর্জ্ঞাতং নিদানং ভবভয়দলনে সঙ্গতং সজ্জ্নাং
তাং কাশীমাশ্রয়ামো নিরুপময়শসঃ স্বঃস্রবন্ত্যা বয়স্যাম্ ॥ ৩৯ ॥
ভুক্তিঃ ক্বাপি ন মুক্তিরস্ত্যভিমতা ক্বাণ্যস্তি মুক্তির্ন সা
কাশ্যামস্তি বিশেষ এব সুতরাং শ্লাঘ্যং য়দেতদ্রূপম্ ।
সর্বৈরুত্তমমধ্যমাধমজনৈরাসাদ্যতেঽনুগ্রহা-
দ্দেবস্য ত্রিপুরদ্বিষঃ সুরধুনীস্নানাবদাতব্যয়ৈঃ ॥ ৪০ ॥
বিদ্যন্তে দ্বারকাদ্যা জগতি কতি ন তা দেবতারাজধান্যো
য়দ্যপ্যন্যাস্তথাপি স্খলদমলজলাবর্তগঙ্গাতরঙ্গা ।
কাশ্যেবারামকূজত্পিকশুকচটকাক্রান্তদিক্কামিনীনাং
ক্রীডাকাসারশালা জয়তি মুনিজনানন্দকন্দৈকভূমিঃ ॥ ৪১ ॥
কাশীয়ং সমলঙ্কৃতা নিরুপমস্বর্গাপগাব্যোমগা-
স্থূলোত্তারতরঙ্গবিন্দুবিলসন্মুক্তাফলশ্রেণিভিঃ ।
চঞ্চচ্চঞ্চলচঞ্চরীকনিকরারাগাম্বরা রাজতে
কাসারস্থবিনিদ্রপদ্মনয়না বিশ্বেশ্বরপ্রেয়সী ॥ ৪২ ॥
বন্হিপ্রাকারবুদ্ধিং জনয়তি বলভীবাসিনাং নাগরাণাং
গন্ধারণ্যপ্রসূতস্ফুটকুসুমচয়ঃ কিংশুকানাং শুকানাম্ ।
চঞ্চ্বাকারো বসন্তে পরমপদপদং রাজধানী পুরারেঃ
সা কাশ্যারামরম্যা জয়তি মুনিজনানন্দকন্দৈকভূমিঃ ॥ ৪৩ ॥
ভজত বিবুধসিন্ধুং সাধবো লোকবন্ধুং
হরহসিততরঙ্গং শঙ্করাশীর্ষসঙ্গম্ ।
দলিতভবভুজঙ্গং খ্যাতমায়াবিভঙ্গং
নিখিলভুবনবন্দ্যং সর্বতীর্থানবদ্যম্ ॥ ৪৪ ॥
য়দমৃতমমৃতানাং ভঙ্গরঙ্গপ্রসঙ্গ-
প্রকটিতরসবত্তাবৈভবং পীতমুচ্চৈঃ ।
দলয়তি কলিদন্তাংস্তাং সুপর্বস্রবন্তীং
কিমিতি ন ভজতার্তা ব্রহ্মলোকাবতীর্ণাম্ ॥ ৪৫ ॥
স্বাধীনে নিকটস্থিতেঽপি বিমলজ্ঞানামৃতে মানসে
বিখ্যাতে মুনিসেবিতেঽপি কুধিয়ো ন স্নান্তি তীর্থে দ্বিজাঃ ।
য়ত্তত্কষ্টমহো বিবেকরহিতাস্তীর্থার্থিনো দুঃখিতা
য়ত্র ক্বাপ্যটবীমটন্তি জলধৌ মজ্জন্তি দুঃখাকরে ॥ ৪৬ ॥
নাভ্যস্তো ধাতুবাদো ন চ য়ুবতীবশীকারকঃ কোপ্যুপায়ো
নো বা পৌরাণিকত্বং ন চ সরসকবিতা নাপি নীতির্ন গীতিঃ ।
তস্মাদর্থার্থিনাং য়া ন ভবতি ভবতশ্চাতুরী ক্বাপি বিদ্বন্
জ্ঞাত্বেত্থং চক্রপাণেরনুসর চরণাম্ভোজয়ুগ্মং বিভূত্যৈ ॥ ৪৭ ॥
অর্থেভ্যোঽনর্থজাতং ভবতি তনুভৃতাং য়ৌবনাদিষ্ববশ্যং
পিত্রাদ্যৈরর্জিতেভ্যোঽনুপকৃতিমতিভিঃ স্বাত্মনৈবার্জিতেভ্যঃ ।
য়স্মাদ্দুঃখাকরেভ্যস্তমনুসর সদা ভদ্র লক্ষ্মীবিলাসং
গোপালং গোপকান্তাকুচকলশতটীকুঙ্কুমাসঙ্গরঙ্গম্ ॥ ৪৮ ॥
ভ্রাতঃ শান্তং প্রশান্তং ক্বচিদপি নিপতন্মিত্র রে ভূধরাগ্রে
গ্রীষ্মে ধ্যানায় বিষ্ণোঃ স্পৃহয়সি সুতরাং নির্বিশঙ্কে গুহায়াম্ ।
অন্বেষ্যান্তাদৃগত্র ক্ষিতিবলয়তলে স্থানমুন্মূল য়াব-
ত্সংসারানর্থবৃক্ষং প্রথিততমমহামোহমূলং বিশালম্ ॥ ৪৯ ॥
কেদারস্থানমেকং রুচিরতরমুমানাট্যলীলাবনীকং
প্রালেয়াদ্রিপ্রদেশে প্রথিতমতিতরামস্তি গঙ্গানিবেশে ।
খ্যাতং নারায়ণস্য ত্রিজগতি বদরীনাম সিদ্ধাশ্রমস্য
তত্রৈবানাদিমূর্তের্মুনিজনমনসামন্যদানন্দমূর্তেঃ ॥ ৫০ ॥
সন্তন্যে ত্রিদশাপগাদিপতনাদেব প্রয়াগাদয়ঃ
প্রালেয়াচলসম্ভবা বহুফলাঃ সিদ্ধাশ্রমাঃ সিদ্ধয়ঃ ।
য়ত্রাঘৌঘসহা ভবন্তি সুধিয়াং ধ্যানেশ্বরণাং চিরং
মুক্তাশেষভিয়াং বিনিদ্রমনসাং কন্দাম্বুপর্ণাশিনাম্ ॥ ৫১ ॥
কিং স্থানস্য নিরীক্ষণেন মুরজিদ্ধ্যানায় ভূমণ্ডলে
ভ্রাতশ্চেদ্বিরতির্ভবেদ্দৃঢতরা য়স্য স্রগাদৌ সদা ।
তস্যৈষা য়দি নাস্তি হন্ত সুতরাং ব্যর্থং তদান্বেষণং
স্থানস্যানধিকারিণঃ সুরধুনীতীরাদ্রিকুঞ্জাদিষু ॥ ৫২ ॥
স্বান্তব্যোম্নি নিরস্তকল্মষঘনে সদ্বুদ্ধিতারাবলী-
সন্দীপ্তে সমুদেতি চেন্নিরুপমানন্দপ্রভামণ্ডলঃ ।
ব্রহ্মজ্ঞানসুধাকরঃ কবলিতাবিদ্যান্ধকারস্তদা
ক্ব ব্যোম ক্ব সদাগতিঃ ক্ব হুতভুক্ ক্বাম্ভাঃ ক্ব সর্বংসহা ॥ ৫৩ ॥
বিশ্বেশ্বরে ভবতি বিশ্বজনীনজন্ম-
বিশ্বম্ভরে ভগবতি প্রথিতপ্রভাবে ।
য়ো দত্তচিত্তবিষয়ঃ সুকৃতী কৃতার্থো
য়ত্র ক্বচিত্প্রতিদিনং নিবসন্ গৃহাদৌ ॥ ৫৪ ॥
চিদ্রত্নমত্র পতিতং বপুরন্ধকূপে
পুংসো ভ্রমাদনুপমং সহনীয়তেজঃ ।
উদ্ধৃত্য য়ো জগতি তদ্ভবিতা কৃতার্থো
মন্যে স এব সমুপাসিতবিশ্বনাথঃ ॥ ৫৫ ॥
য়দ্যেতা মদনেষবো মৃগদৃশশ্চেতঃকুরঙ্গারয়ো
ধীরাণামপি নো ভবেয়ুরবলাঃ সংসারমায়াপুরে ।
কো নামামৃতসাগরে ন রমতে ধীরস্তদা নির্মলে
পূর্ণানন্দমহোর্মিরম্যনিকরে রাগাদিনক্রোজ্ঝিতে ॥ ৫৬ ॥
বালেয়ং বালভাবং ত্যজতি ন সুদতি য়ত্কটাক্ষৈর্বিশালৈ-
রস্মান্বিভ্রাময়ন্তী লসদধরদলাক্ষিপ্তচূতপ্রবালা ।
নেতুং বাঞ্ছত্যকামান্ স্বসদনমধুনা ক্রীডিতুং দত্তচিত্তান্
পুষ্যন্নীলোত্পলোত্পলাভে মুরজিতি কমলাবল্লভে গোপলীলে ॥ ৫৭ ॥
শিব শিব মহাভ্রান্তিস্থানং সতাং বিদুষামপি
প্রকৃতিচপলা ধাত্রা সৃষ্টাঃ স্ত্রিয়ো হরিণীদৃশঃ ।
বিজহতি ধনং প্রাণৈঃ সাকং য়তস্তদবাপ্তয়ে
জগতি মনুজা রাগাকৃষ্টাস্তদেকপরায়ণাঃ ॥ ৫৮ ॥
হরতি বপুষঃ কান্তিং পুংসঃ করোতি বলক্ষিতিং
জনয়তি ভৃশং ভ্রান্তিং নারী সুখায় নিষেবিতা ।
বিরতিবিরসা ভুক্তা য়স্মাত্ততো ন বিবেকিভি-
র্বিষয়বিরসৈঃ সেব্যা মায়াসমাশ্রিতবিগ্রহা ॥ ৫৯ ॥
কমলবদনা পীনোত্তুঙ্গং ঘটাকৃতি বিভ্রতী
স্তনয়ুগমিয়ং তন্বী শ্যামা বিশালদৃগঞ্চলা ।
বিশদদশনা মধ্যক্ষামা বৃথেতি জনাঃ শ্রমং
বিদধতি মুধারাগাদুচ্চৈরনীদৃশবর্ণনে ॥ ৬০ ॥
জনয়তি সুতং কঞ্চিন্নারী সতী কুলভূষণং
নিরুপমগুণৈঃ পুণ্যাত্মানং জগত্পরিপালকম্ ।
কথমপি ন সাঽনিন্দ্যা বন্দ্যা ভবেন্মহতাং য়তঃ ।
সুরসরিদিব খ্যাতা লোকে পবিত্রিতভূতলা ॥ ৬১ ॥
ধন্যা এতে পুমাংসো য়দয়মহমিতি ত্যক্তচেতোবিকল্পা
নিশ্শঙ্কং সংচরন্তো বিদধতি মলিনং কর্ম কামপ্রয়ুক্তাঃ ।
জানন্তোঽপ্যর্থহীনং জগদিদমখিলং ভ্রান্তবদ্দ্বৈতজালং
রাগদ্বেষাদিমন্তো বয়ময়মিতি হা ন ত্যজন্তেঽভিমানম্ ॥ ৬২ ॥
প্রজ্ঞাবন্তোঽপি কেচিচ্চিরমুপনিষদাদ্যর্থকারা য়তন্তো
ব্যাকুর্বন্তোঽপি কেচিদ্দলিতপরমতা য়দ্যপি জ্ঞাততত্ত্বাঃ ।
তীর্থে তীর্থং তথাপি ভ্রমণরসিকতাং নো জহত্যধ্বখেদা
য়ত্তত্কষ্টং বিধত্তে মম মনসি সদা পশ্যতস্তত্র কৃত্যম্ ॥ ৬৩ ॥
তীর্থাবস্থানজন্যং ন ভবতি সুকৃতং দুষ্কৃতোন্মূলনং বা
য়স্মাদাভ্যাং বিহীনঃ শ্রুতিসমধিগতঃ প্রত্যগাত্মা জনানাম্ ।
সর্বেষামদ্বিতীয়ো নিরতিশয়সুখং য়দ্যপি স্বপ্রকাশা-
স্তীর্থে বিদ্যাস্তথাপি স্পৃহয়তি তপসে য়ত্তদাশ্চর্যহেতুঃ ॥ ৬৪ ॥
উদাসীনো দেবো মদনমথনঃ সজ্জনকুলে
কলিক্রীডাসক্তঃকৃতপরিজনঃ প্রাকৃতজনঃ ।
ইয়ং ম্লেচ্ছাক্রান্তা ত্রিদশতটিনী চোভয়তটে
কথং ভ্রান্তস্থাতা কথয় সুকৃতী কুত্র বিভয়ঃ ॥ ৬৫ ॥
নিস্সারাবসুধাধুনা সমজনি প্রৌঢপ্রতাপনল-
জ্বালাজ্বালসমাকুলা দ্বিপঘটাসঙ্ঘট্টবিক্ষোভিতা ।
ম্লেচ্ছানাং রথবাজিপত্তিনিবহৈরুন্মীলিতা কীদৃশী-
য়ং বিদ্যা ভবিতেতি হন্ত ন সখে জানীমহে মোহিতাঃ ॥ ৬৬ ॥
বেদো নির্বেদমাগাদিহ নমনভিয়া ব্রাহ্মণানাং বিয়োগা-
দ্বৈয়াসিক্যো গিরোঽপি ক্বচিদপি বিরলাঃ সম্মতং সন্তি দেশে ।
ইত্থং ধর্মে বিলীনে য়বনকুলপতৌ শাসতি ক্ষোণিবিম্বং
নিত্যং গঙ্গাবগাহাদ্ভবতি গতিরিতঃ সংসৃতেরর্থসিদ্ধৌ ॥ ৬৭ ॥
গঙ্গা গঙ্গেতি য়স্যাঃ শ্রুতমপি পঠিতং কেনচিন্নামমাত্রং
দুরস্থস্যাপি পুংসো দলয়তি দুরিতং প্রৌঢমিত্যাহুরেকে ।
স গঙ্গা কস্য সেব্যা ন ভবতি ভুবনে সজ্জনস্যাতিভব্যা
ব্রহ্মাণ্ডং প্লাবয়ন্তী ত্রিপুরহরজটামণ্ডলং মণ্ডয়ন্তীম্ ॥ ৬৮ ॥
য়ত্তীরে বসতাং সতামপি জলৈর্মূলৈঃ ফলৈর্জীবতাং
মুক্তাহংমমভাবশুদ্ধমনসামাচারবিদ্যাবতাম্ ।
কৈবল্যং করবিল্বতুল্যমমলং সম্পদ্যতে হেলয়া ।
স গঙ্গা হ্যতুলামলোর্মিমপটলা সদ্ভিঃ কুতো নেক্ষ্যতে ৬৯ ॥
তীর্থানামবলোকনে সুমনসামুত্কণ্ঠতে মানসং
তাবদ্ভূবলয়ে সতাং পুররিপুধ্যানামৃতাস্বাদিনাম্।
পাবত্তে ন বিলোকয়ন্তি সরিতাং রোচিষ্ণুমুক্তাবলীম্ ।
শ্রীমন্নাকতরঙ্গিণীং হরজটাজূটাটবীবিভ্রমাম্ ॥ ৭০ ॥
সংসারো বিবিধাধিবাধবধিরঃ সারায়তে মানসে
নিঃসারোঽপি বপুষ্মতাং কলিবৃকগ্রাসীকৃতানাং চিরম্ ।
দৃষ্টায়াং ঘনসারপাথসি মহাপুণ্যেন য়স্যাং সতাং
সা সেব্যা ন কুতো ভবেত্সুরধুনীস্বর্গাপবর্গোদয়া ॥ ৭১ ॥
য়স্যাঃ সঙ্গতিরুন্নতিং বিতনুতে বারামমীষাং জনৈ-
রুদ্গীতা কবিভির্মহেশ্বরমনোভীষ্টা মহীমণ্ডলে ।
সা সন্তঃ শরদিন্দুসোদরপয়ঃ পূরাভিরামা নদ-
ত্কোকশ্রেণিমনোজপুণ্যপুলিনা ভাগীরথী সেব্যতাম্ ॥ ৭২ ॥
ক্বচিদ্ধংসশ্রেণী সুখয়তি রিরংসুঃ শ্রুতিসুখং
নদন্তী চেতো নো বিপুলপুলিনে মন্থরগতিঃ ।
তদেতস্যা য়োঽর্থী সুরতরুলতা নাকতটিনীঈ
সদা সদ্ভিঃ সেব্যা সকলপুরুষার্থায় কৃতিভিঃ ॥ ৭৩ ॥
কলৌ গঙ্গা কাশ্যাং ত্রিপুরহরপুর্যাং ভগবতী
প্রশস্তাদেবানামপি ভবতি সেব্যানুদিবসম্ ।
ইতি ব্যাসো ব্রূতে মুনিজনধুরীণো হরিকথা-
সুধাপানস্বস্থো গলিতভববন্ধোঽতুলমতিঃ ॥ ৭৪ ॥
য়াবজ্জাগর্তি চিত্তে দুরিতকলুষিতে প্রাণিনো বিত্তপুত্র-
ক্ষেত্রাদ্যর্থেষু চিন্তা তদতিপরতয়া ভ্রাম্যমানস্য নিত্যম্ ।
তাবন্নার্থস্য সিদ্ধির্ভবতি কথমপি প্রাথিতস্যার্তিভাজা
কৈবল্যাখ্যস্য লোকে রমণসুখভুবো মুক্তদোষানুষক্তেঃ ॥ ৭৫ ॥
সন্ত্যর্থা মম সঞ্চিতা বহুধাঃ পিত্রাদিভিঃ সাম্প্রতং
বাণিজ্যৈঃ কৃষিভিঃ কলাভিরপি তান্বিস্তারয়িষ্যামি বঃ ।
হে পুত্রা ইতি ভাবন্ননুদিনং সংসারপাশাবলীং
ছেত্তায়ং তু কথং মনোরথময়ীং জীবো নিরালম্বনঃ ॥ ৭৬ ॥
জানন্নেব করোতি কর্ম বহুলং দুঃখাত্মকং প্রেরিতঃ
কেনাপ্যপ্রতিবাচ্যশক্তিমহিনা দেবেন মুক্তাত্মনা ।
সর্বজ্ঞেন হৃদিস্থিতেন তনুমত্সংসাররঙ্গাঙ্গণে
মাদ্যদ্বুদ্ধিনটীবিনোদনিপুণো নৃত্যন্নঙ্গপ্রিয়ঃ ॥ ৭৭ ॥
কো দেবো ভুবনোদয়াবনকরো বিশ্বেশ্বরো বিদ্যতে
য়স্যাজ্ঞাবশবর্তিনো জলধিয়ো নাপ্লাবয়ন্তি ক্ষিতিম্ ।
ইত্যাম্নাতমপীশ্বরং সুরশিরোরত্নং জগত্সাক্ষিণং
সর্বজ্ঞং ধনয়ৌবনোদ্ঘতমনা নো মন্যতে বালিশঃ ॥ ৭৮ ॥
কস্যেমৌ পিতরৌ মনোভববতা তাপেন সংয়োজিতা-
বন্যোন্যং তনয়াদিকং জনয়তো ভূম্যাদিভূতাত্মভিঃ ।
ইত্থং দুঃস্থমতির্মনোভবরতির্যো মন্যতে নাস্তিকঃ
শান্তিস্তস্য কথং ভবেদ্ঘনবতো দুষ্কর্মধর্মশ্রমাত্ ॥ ৭৯ ॥
হিক্কাকাস ভগন্দরোদরমহামেদজ্বরৈরাকুলঃ
শ্লেষ্মাদ্যৈরপি নিদ্রয়া বিরহিতো মন্দানলোল্পাশনঃ ।
তারুণ্যেঽপি বিলোক্যতে বহুবিধো জীবো দরিদ্রেশ্বরো
হা কষ্টং কথমীদৃশং ভগবতঃ সংসারদুঃসাগরে ॥ ৮০ ॥
মাদ্যত্তার্কিকতান্ত্রিকদ্বিপঘটাসঙ্ঘট্টপঞ্চানন-
স্তদ্বদৃপ্তকদন্তবৈদ্যককলাকল্পোঽপি নিষ্কিঞ্চনঃ ।
য়ত্র ক্বাপি বিনাশয়া কৃশতনুর্ভূপালসেবাপরো
জীবন্নেব মৃতায়তে কিমপরং সংসারদুঃসাগরে ॥ ৮১ ॥
আঢ্যঃ কশ্চিদপণ্ডিতোঽপি বিদুষাং সেব্যঃ সদা ধার্মিকো
বিশ্বেষামুপজারকো মৃগদৃশামানন্দকন্দাকরঃ ।
কর্পূরদ্যুতিকীর্তিভূষিতহরিদ্ভূমণ্ডলে গীয়তে
শশ্বদ্দ্বন্দিজনৈর্মহীতনুভৃতঃ পুণ্যৈর্ন কস্যোদয়ঃ ॥ ৮২ ॥
কর্তব্যং ন করোতি বন্ধুভিরপি স্নেহাত্মভির্বোদিতঃ
কামিত্বাদভিমন্যতে হিতমতং ধীরোপ্যভীষ্টং নরঃ ।
নিষ্কামস্য ন বিক্রিয়া তনুভৃতো লোকে ক্বচিদ্দৃশ্যতে
য়ত্তস্মাদয়মেব মূলমখিলানর্থস্য নির্ধারিতম্ ॥ ৮৩ ॥
নিষ্কামা মুনয়ঃ পরাবরদৃশো নির্ধূতপাপ্মোদয়া
নিঃসঙ্গা নিরহঙ্কৃতা নিরুপমানন্দং পরং লেভিরে ।
য়দ্গত্বা ন লুঠন্তি মাতৃজঠরে দুঃখাকরে মানবা
দুর্গন্ধে পুনরেত্যকামমকরে সংসারপাথোনিধৌ ॥ ৮৪ ॥
কামস্যাপি নিদানমাহুরপরে মায়াং মহাশাসনা
নিশ্চিত্কাং সকলপ্রপঞ্চরচনাচাতুর্যলীলাবতীম্ ।
য়ত্সঙ্গাদ্ভগবানপি প্রভবতি প্রত্যঙ্মহামোহহা
শ্রীরঙ্গো ভুবনোদয়াবনলয়ব্যাপারচক্রেক্রিয়াঃ ॥ ৮৫ ॥
তুল্যার্থেন ত্বমৈক্যং ত্রিভুবনজনকস্তত্পদার্থঃপ্রপদ্য
প্রত্যক্ষং মোহজন্ম ত্যজতি ভগবতি ত্বংপদার্থোঽপি জীবঃ ।
শ্রুত্যাচার্যপ্রসাদান্নিরুপমবিলসদ্ব্রহ্মবিদ্যৈস্তদৈক্যং
প্রাপ্যানন্দপ্রতিষ্ঠো ভবতি বিগলিতানাদ্যবিদ্যোপরীহঃ ॥ ৮৬ ॥
সংন্যাসো বিহিতস্য কেশবপদদ্বন্দ্বে ব্যধায়ি শ্রুতা
বেদান্তা নিরবদ্যনিষ্কলপরানন্দাঃ সুনিষ্ঠাশ্চিরম্ ।
সংসারে বধবন্ধদুঃখবহুলে মায়াবিলাসেঽব্যয়ং
ব্রহ্মাস্মীতি বিহায় নান্যদধুনা কর্তব্যমাস্তে ক্বচিত্ ॥ ৮৭ ॥
হিত্বা বিশ্বাদ্যবস্থাঃ প্রকৃতিবিলসিতা জাগ্রদাদ্যৈর্বিশেষৈঃ
সার্ধং চৈতন্যধাতৌ প্রকৃতিমপি সমং কার্যজাতৈরশেষৈঃ ।
জ্ঞানানন্দং তুরীয়ং বিগলিতগুণকং দেশকালাদ্যতীতং
স্বাত্মানং বীতনিদ্রঃ সততমধিকৃতশ্চিন্তয়েদদ্বিতীয়ম্ ॥ ৮৮ ॥
অগ্রেপশ্চাদধস্তাদুপরি চ পরিতো দিক্ষু ধান্যাস্বনাদিঃ
কূটস্থা সংবিদেকা সকলতনুভৃতামন্তরাত্মানিয়ন্ত্রী ।
য়স্যানন্দস্বভাবা স্ফুরতি শুভধিয়ঃ প্রত্যহং নিষ্প্রপঞ্চা
জীবন্মুক্তঃ স লোকে জয়তি গতমহামোহবিশ্বপ্রপঞ্চঃ ॥ ৯০ ॥
ক্বাহং ব্রহ্মেতি বিদ্যা নিরতিশয়সুখং দর্শয়ন্তী বিশুদ্ধং
কূটস্থং স্বপ্রকাশং প্রকৃতি সুচরিতা খণ্ডয়ন্তী চ মায়াম্ ।
ক্বাবিদ্যাহং মমেতি স্থগিতপরসুখা চিত্তভিত্তৌ লিখন্তী
সর্বানর্থাননর্থান্ বিষয়গিরিভুবা বাসনাগৈরিকেণ ॥ ৯১ ॥
অহং ব্রহ্মাস্মীতি স্ফুরদমলবোধো য়দি ভবে-
ত্পুমান্পুণ্যোদ্রেকাদুপচিতপরানর্থবিরতিঃ ।
তদানীং ক্বাবিদ্যা ভৃশমসহমানৌপনিষদং
বিচারং সংসারঃ ক্ব চ বিবিধদুঃখৈকবসতিঃ ॥ ৯২ ॥
কশ্চিত্ক্রন্দতি কালকর্কশকরাকৃষ্টং বিনষ্টং হঠা-
দুত্কৃষ্টং তনয়ং বিলোক্য পুরতঃ পুত্রেতি হা হা ক্বচিত্ ।
কশ্চিন্নর্তকনর্তকীপরিবৃতো নৃত্যত্যহো কুত্রচি-
চ্চিত্রং সংসৃতিপদ্ধতিঃ প্রথয়তি প্রীতিঞ্চ কষ্টঞ্চ নঃ ॥ ৯৩ ॥
নান্নং জীর্যতি কিঞ্চিদৌষধবলং নালং স্বকার্যোদয়ে
শক্তিশ্চংক্রমণে ন হন্ত জরয়া জীর্ণীকৃতায়াং তনৌ ।
অস্মাকং ত্বধুনা ন লোচনবলং পুত্রেতি চিন্তাকুলো
গ্লায়ত্যর্থপরায়ণোঽতিকৃপণো মিথ্যাভিমানো গৃহী ॥ ৯৪ ॥
অন্নাশায় সদা রটন্তি পৃথুকাঃক্ষুত্ক্ষামকণ্ঠাস্ত্রিয়ো
বাসোভী রহিতা বহির্ব্যবহৃতৌ নির্যান্তি নো লজ্জয়া ।
গেহাদঙ্গণমার্জনেঽপি গৃহিণো য়স্যেতি দুর্জীবিতং
য়দ্যপ্যস্তি তথাপি তস্য বিরতির্নোদেতি চিত্রং গৃহে ॥ ৯৫ ॥
সদ্দ্বংশো গুণবানহং সুচরিতঃ শ্লাঘ্যাং করোত্যাত্মনো
নীচানাং বিদধাতি চ প্রতিদিনং সেবাং জনানাং দ্বিজঃ ।
য়োষিত্তস্য জিঘৃক্ষয়া স চ কুতো নো লজ্জতে সজ্জনা-
ল্লোভান্ধস্য নরস্য নো খলু সতাং দৃষ্টং হি লজ্জাভয়ম্ ॥ ৯৬ ॥
কামাদিত্রিকমেব মূলমখিলক্লেশস্য মায়োদ্ভবং
মর্ত্যানামিতি দেবমৌলিবিলসদ্ভাজিষ্ণুচূডামণিঃ ।
শ্রীকৃষ্ণো ভগবানবোচদখিলপ্রাণিপ্রিয়ো মত্প্রভু-
র্যস্মাত্তত্ত্রিকমুদ্যতেন মনসা হেয়ং পুমর্থার্থিনা ॥ ৯৭ ॥
য়ত্প্রীত্যর্থমনেকধামনি ময়া কষ্টেন বস্তু প্রিয়ং
স্বস্যাশাকবলীকৃতেন বিকলীভাবং দধানেন মে ।
তত্সর্বং বিলয়ং নিনায় ভগবান্ য়ো লীলয়া নির্জরো
মাং হিত্বা জরয়াকুলীকৃততনুং কালায় তস্মৈ নমঃ ॥ ৯৮ ॥
আয়ুর্বেদবিদাং রসাশনবতাং পথ্যাশিনাং য়ত্নতো
বৈদ্যানামপি রোগজন্ম বপুষো হ্যন্তর্যতো দৃশ্যতে ।
দুশ্চক্ষোত্কবলীকৃতত্রিভুবনো লীলাবিহারস্থিতঃ
সর্বোপায়বিনাশনৈকচতুরঃ কালায় তস্মৈ নমঃ ॥ ৯৯ ॥
তে ধন্যা ভুবনে সুশিক্ষিতপরব্রহ্মাত্মবিদ্যাজনা
লোকানামনুরঞ্জকা হরিকথাপীয়ূষপানপ্রিয়াঃ ।
য়েষাং নাকতরঙ্গিণীতটশিলাবদ্ধাসনানাং সতাং
প্রাণা য়ন্তি লয়ং সুখেন মনসা শ্রীরঙ্গচিন্তাভৃতাম্ ॥ ১০০ ॥
হে পুত্রাঃ ব্রজতাভয়ং য়ত ইতো গেহং জনন্যা সমং
রাগদ্বেষমদাদয়ো ভবতু বঃ পন্থাঃ শিবোঽমায়য়া ।
কাশীং সাম্প্রতমাগতোঽহমহহ ক্লেশেন হাতুং বপুঃ
সর্বানর্থগৃহং সুপর্বতটিনীবীচিশ্রিয়ামণ্ডিতাম্ ॥ ১০১ ॥
য়ত্সাক্ষাদভিধাতুমক্ষমতয়া শব্দাদ্যনালিঙ্গিতং
কূটস্থং প্রতিপাদয়ন্তি বিলয়দ্বারা প্রপঞ্চস্রজঃ ।
মোক্ষায় শ্রুতয়ো নিরস্তবিধয়ো ধ্যানস্য চোচ্ছিত্তয়ে
তত্রাদ্বৈতবনে সদা বিচরতাচ্চেতঃ কুরঙ্গঃ সতাম্ ॥ ১০২ ॥
বুধানাং বৈরাগ্যং সুঘটয়তু বৈরাগ্যশতকং
গৃহস্থানামেকং হরিপদসরোজপ্রণয়িনাম্ ।
জনানামানন্দং বিতরতু নিতান্তং সুবিশদ-
ত্রয়ং শেষব্যাখ্যাগলিততমসাং শুদ্ধমনসাম্ ॥ ১০৩ ॥
ইতি শ্রীভর্তৃহরিবিরচিতং বিজ্ঞানশতকং চতুর্থম্ ।