Narayaniyam Pancasattamadasakam in Telugu:

॥ ನಾರಾಯಣೀಯಂ ಪಞ್ಚಾಶತ್ತಮದಶಕಮ್ ॥

ನಾರಾಯಣೀಯಂ ಪಞ್ಚಾಶತ್ತಮದಶಕಮ್ (೫೦)- ವತ್ಸಾಸುರ-ಬಕಾಸುರಯೋಃ ವಧಮ್ ।

ತರಲಮಧುಕೃದ್ವೃನ್ದೇ ವೃನ್ದಾವನೇಽಥ ಮನೋಹರೇ
ಪಶುಪಶಿಶುಭಿಸ್ಸಾಕಂ ವತ್ಸಾನುಪಾಲನಲೋಲುಪಃ ।
ಹಲಧರಸಖೋ ದೇವ ಶ್ರೀಮನ್ ವಿಚೇರಿಥ ಧಾರಯನ್
ಗವಲಮುರಲೀವೇತ್ರಂ ನೇತ್ರಾಭಿರಾಮತನುದ್ಯುತಿಃ ॥ ೫೦-೧ ॥

ವಿಹಿತಜಗತೀರಕ್ಷಂ ಲಕ್ಷ್ಮೀಕರಾಂಬುಜಲಾಲಿತಂ
ದದತಿ ಚರಣದ್ವನ್ದ್ವಂ ವೃನ್ದಾವನೇ ತ್ವಯಿ ಪಾವನೇ ।
ಕಿಮಿವ ನ ಬಭೌ ಸಮ್ಪತ್ಸಂಪೂರಿತಂ ತರುವಲ್ಲರೀ-
ಸಲಿಲಧರಣೀಗೋತ್ರಕ್ಷೇತ್ರಾದಿಕಂ ಕಮಲಾಪತೇ ॥ ೫೦-೨ ॥

ವಿಲಸದುಲಪೇ ಕಾನ್ತಾರಾನ್ತೇ ಸಮೀರಣಶೀತಲೇ
ವಿಪುಲಯಮುನಾತೀರೇ ಗೋವರ್ಧನಾಚಲಮೂರ್ಧಸು ।
ಲಲಿತಮುರಲೀನಾದಸ್ಸಞ್ಚಾರಯನ್ಖಲು ವಾತ್ಸಕಂ
ಕ್ವಚನ ದಿವಸೇ ದೈತ್ಯಂ ವತ್ಸಾಕೃತಿಂ ತ್ವಮುದೈಕ್ಷಥಾಃ ॥ ೫೦-೩ ॥

ರಭಸವಿಲಸತ್ಪುಚ್ಛಂ ವಿಚ್ಛಾಯತೋಽಸ್ಯ ವಿಲೋಕಯನ್
ಕಿಮಪಿ ವಲಿತಸ್ಕನ್ಧಂ ರನ್ಧ್ರಪ್ರತೀಕ್ಷಮುದೀಕ್ಷಿತಮ್ ।
ತಮಥ ಚರಣೇ ಬಿಭ್ರದ್ವಿಭ್ರಾಮಯನ್ಮುಹುರುಚ್ಚಕೈಃ
ಕುಹಚನ ಮಹಾವೃಕ್ಷೇ ಚಿಕ್ಷೇಪಿಥ ಕ್ಷತಜೀವಿತಮ್ ॥ ೫೦-೪ ॥

ನಿಪತತಿ ಮಹಾದೈತ್ಯೇ ಜಾತ್ಯಾ ದುರಾತ್ಮನಿ ತತ್ಕ್ಷಣಂ
ನಿಪತನಜವಕ್ಷುಣ್ಣಕ್ಷೋಣೀರುಹಕ್ಷತಕಾನನೇ ।
ದಿವಿ ಪರಮಿಲದ್ವೃನ್ದಾ ವೃನ್ದಾರಕಾಃ ಕುಸುಮೋತ್ಕರೈಃ
ಶಿರಸಿ ಭವತೋ ಹರ್ಷಾದ್ವರ್ಷನ್ತಿ ನಾಮ ತದಾ ಹರೇ ॥ ೫೦-೫ ॥

ಸುರಭಿಲತಮಾ ಮೂರ್ಧನ್ಯೂರ್ಧ್ವಂ ಕುತಃ ಕುಸುಮಾವಲೀ
ನಿಪತತಿ ತವೇತ್ಯುಕ್ತೋ ಬಾಲೈಃ ಸಹೇಲಮುದೈರಯಃ ।
ಝಟಿತಿ ದನುಜಕ್ಷೇಪೇಣೋರ್ಧ್ವಂ ಗತಸ್ತರುಮಣ್ಡಲಾತ್
ಕುಸುಮನಿಕರಸ್ಸೋಽಯಂ ನೂನಂ ಸಮೇತಿ ಶನೈರಿತಿ ॥ ೫೦-೬ ॥

ಕ್ವಚನ ದಿವಸೇ ಭೂಯೋ ಭೂಯಸ್ತರೇ ಪರುಷಾತಪೇ
ತಪನತನಯಾಪಾಥಃ ಪಾತುಂ ಗತಾ ಭವದಾದಯಃ ।
ಚಲಿತಗರುತಂ ಪ್ರೇಕ್ಷಾಮಾಸುರ್ಬಕಂ ಖಲು ವಿಸ್ಮೃತಂ
ಕ್ಷಿತಿಧರಗರುಚ್ಛೇದೇ ಕೈಲಾಸಶೈಲಮಿವಾಪರಮ್ ॥ ೫೦-೭ ॥

ಪಿಬತಿ ಸಲಿಲಂ ಗೋಪವ್ರಾತೇ ಭವನ್ತಮಭಿದ್ರುತಃ
ಸ ಕಿಲ ನಿಗಿಲನ್ನಗ್ನಿಪ್ರಖ್ಯಂ ಪುನರ್ದ್ರುತಮುದ್ವಮನ್ ।
ದಲಯಿತುಮಗಾತ್ತ್ರೋಟ್ಯಾಃ ಕೋಟ್ಯಾ ತದಾ ತು ಭವಾನ್ವಿಭೋ
ಖಲಜನಭಿದಾ ಚುಞ್ಚುಶ್ಚಞ್ಚೂ ಪ್ರಗೃಹ್ಯ ದದಾರ ತಮ್ ॥ ೫೦-೮ ॥

ಸಪದಿ ಸಹಜಾಂ ಸನ್ದ್ರಷ್ಟುಂ ವಾ ಮೃತಾಂ ಖಲು ಪೂತನಾ-
ಮನುಜಮಘಮಪ್ಯಗ್ರೇ ಗತ್ವಾ ಪ್ರತೀಕ್ಷಿತುಮೇವ ವಾ ।
ಶಮನನಿಲಯಂ ಯಾತೇ ತಸ್ಮಿನ್ಬಕೇ ಸುಮನೋಗಣೇ
ಕಿರತಿ ಸುಮನೋವೃನ್ದಂ ವೃನ್ದಾವನಾದ್ಗೃಹಮೈಯಥಾಃ ॥ ೫೦-೯ ॥

ಲಲಿತಮುರಲೀನಾದಂ ದೂರಾನ್ನಿಶಮ್ಯ ವಧೂಜನೈ-
ಸ್ತ್ವರಿತಮುಪಗಮ್ಯಾರಾದಾರೂಢಮೋದಮುದೀಕ್ಷಿತಃ ।
ಜನಿತಜನನೀನನ್ದಾನನ್ದಸ್ಸಮೀರಣಮನ್ದಿರ-
ಪ್ರಥಿತವಸತೇ ಶೌರೇ ದೂರೀಕುರುಷ್ವ ಮಮಾಮಯಾನ್ ॥ ೫೦-೧೦ ॥

ಇತಿ ಪಞ್ಚಾಶತ್ತಮಶಕಂ ಸಮಾಪ್ತಂ

– Chant Stotras in other Languages –

Narayaniyam Pancasattamadasakam in English – Kannada – Telugu – Tamil