॥ Sri Ganesha Manasa Puja Kannada Lyrics ॥
॥ ಶ್ರೀ ಗಣೇಶ ಮಾನಸ ಪೂಜಾ ॥
ಗೃತ್ಸಮದ ಉವಾಚ –
ವಿಘ್ನೇಶವೀರ್ಯಾಣಿ ವಿಚಿತ್ರಕಾಣಿ ವಂದೀಜನೈರ್ಮಾಗಧಕೈಃ ಸ್ಮೃತಾನಿ ।
ಶ್ರುತ್ವಾ ಸಮುತ್ತಿಷ್ಠ ಗಜಾನನ ತ್ವಂ ಬ್ರಾಹ್ಮೇ ಜಗನ್ಮಙ್ಗಲಕಂ ಕುರುಷ್ವ ॥ ೧ ॥
ಏವಂ ಮಯಾ ಪ್ರಾರ್ಥಿತ ವಿಘ್ನರಾಜಶ್ಚಿತ್ತೇನ ಚೋತ್ಥಾಯ ಬಹಿರ್ಗಣೇಶಃ ।
ತಂ ನಿರ್ಗತಂ ವೀಕ್ಷ್ಯ ನಮನ್ತಿ ದೇವಾಃ ಶಮ್ಭ್ವಾದಯೋ ಯೋಗಿಮುಖಾಸ್ತಥಾಽಹಮ್ ॥ ೨ ॥
ಶೌಚಾದಿಕಂ ತೇ ಪರಿಕಲ್ಪಯಾಮಿ ಹೇರಮ್ಬ ವೈ ದನ್ತವಿಶುದ್ಧಿಮೇವಮ್ ।
ವಸ್ತ್ರೇಣ ಸಮ್ಪ್ರೋಕ್ಷ್ಯ ಮುಖಾರವಿನ್ದಂ ದೇವಂ ಸಭಾಯಾಂ ವಿನಿವೇಶಯಾಮಿ ॥ ೩ ॥
ದ್ವಿಜಾದಿಸರ್ವೈರಭಿವನ್ದಿತಂ ಚ ಶುಕಾದಿಭಿರ್ಮೋದಸುಮೋದಕಾದ್ಯೈಃ ।
ಸಮ್ಭಾಷ್ಯ ಚಾಲೋಕ್ಯ ಸಮುತ್ಥಿತಂ ತಂ ಸುಮಣ್ಡಪಂ ಕಲ್ಪ್ಯ ನಿವೇಶಯಾಮಿ ॥ ೪ ॥
ರತ್ನೈಃ ಸುದೀಪ್ತೈಃ ಪ್ರತಿಬಿಮ್ಬಿತಂ ತಂ ಪಶ್ಯಾಮಿ ಚಿತ್ತೇನ ವಿನಾಯಕಂ ಚ ।
ತತ್ರಾಸನಂ ರತ್ನಸುವರ್ಣಯುಕ್ತಂ ಸಂಕಲ್ಪ್ಯ ದೇವಂ ವಿನಿವೇಶಯಾಮಿ ॥ ೫ ॥
ಸಿದ್ಧ್ಯಾ ಚ ಬುದ್ಧ್ಯಾ ಸಹ ವಿಘ್ನರಾಜ ಪಾದ್ಯಂ ಕುರು ಪ್ರೇಮಭರೇಣ ಸರ್ವೈಃ ।
ಸುವಾಸಿತಂ ನೀರಮಥೋ ಗೃಹಾಣ ಚಿತ್ತೇನ ದತ್ತಂ ಚ ಸುಖೋಷ್ಣಭಾವಮ್ ॥ ೬ ॥
ತತಃ ಸುವಸ್ತ್ರೇಣ ಗಣೇಶಮಾದೌ ಸಮ್ಪ್ರೋಕ್ಷ್ಯ ದೂರ್ವಾದಿಭಿರರ್ಚಯಾಮಿ ।
ಚಿತ್ತೇನ ಭಾವಪ್ರಿಯ ದೀನಬನ್ಧೋ ಮನೋ ವಿಲೀನಂ ಕುರು ತೇ ಪದಾಬ್ಜೇ ॥ ೭ ॥
ಕರ್ಪೂರತೈಲಾದಿಸುವಾಸಿತಂ ತು ಸುಕಲ್ಪಿತಂ ತೋಯಮಥೋ ಗೃಹಾಣ ।
ಆಚಮ್ಯ ತೇನೈವ ಗಜಾನನ ತ್ವಂ ಕೃಪಾಕಟಾಕ್ಷೇಣ ವಿಲೋಕಯಾಶು ॥ ೮ ॥
ಪ್ರವಾಲಮುಕ್ತಾಫಲಹಾಟಕಾದ್ಯೈಃ ಸುಸಂಸ್ಕೃತಂ ಹ್ಯನ್ತರಭಾವಕೇನ ।
ಅನರ್ಘ್ಯಮರ್ಘ್ಯಂ ಸಫಲಂ ಕುರುಷ್ವ ಮಯಾ ಪ್ರದತ್ತಂ ಗಣರಾಜ ಢುಣ್ಢೇ ॥ ೯ ॥
ಸೌಗನ್ಧ್ಯಯುಕ್ತಂ ಮಧುಪರ್ಕಮಾದ್ಯಂ ಸಂಕಲ್ಪಿತಂ ಭಾವಯುತಂ ಗೃಹಾಣ ।
ಪುನಸ್ತಥಾಽಽಚಮ್ಯ ವಿನಾಯಕ ತ್ವಂ ಭಕ್ತಾಂಶ್ಚ ಭಕ್ತೇಶ ಸುರಕ್ಷಯಾಶು ॥ ೧೦ ॥
ಸುವಾಸಿತಂ ಚಂಪಕ ಜಾತಿಕಾದ್ಯೈಸ್ತೈಲಂ ಮಯಾ ಕಲ್ಪಿತಮೇವ ಢುಣ್ಢೇ ।
ಗೃಹಾಣ ತೇನ ಪ್ರವಿಮರ್ದಯಾಮಿ ಸರ್ವಾಂಗಮೇವಂ ತವ ಸೇವನಾಯ ॥ ೧೧ ॥
ತತಃ ಸುಖೋಷ್ಣೇನ ಜಲೇನ ಚಾಹಮನೇಕತೀರ್ಥಾಹೃತಕೇನ ಢುಣ್ಢಿಮ್ ।
ಚಿತ್ತೇನ ಶುದ್ಧೇನ ಚ ಸ್ನಾಪಯಾಮಿ ಸ್ನಾನಂ ಮಯಾ ದತ್ತಮಥೋ ಗೃಹಾಣ ॥ ೧೨ ॥
ತತಃ ಪಯಸ್ಸ್ನಾನಮಚಿನ್ತ್ಯಭಾವ ಗೃಹಾಣ ತೋಯಸ್ಯ ತಥಾ ಗಣೇಶ ।
ಪುನರ್ದಧಿಸ್ನಾನಮನಾಮಯಂ ತ್ವಂ ಚಿತ್ತೇನ ದತ್ತಂ ಚ ಜಲಸ್ಯ ಚೈವ ॥ ೧೩ ॥
ತತೋ ಘೃತಸ್ನಾನಮಪಾರವನ್ದ್ಯ ಸುತೀರ್ಥಜಂ ವಿಘ್ನಹರ ಪ್ರಸೀದ ।
ಗೃಹಾಣ ಚಿತ್ತೇನ ಸುಕಲ್ಪಿತಂ ತು ತತೋ ಮಧುಸ್ನಾನಮಥೋ ಜಲಸ್ಯ ॥ ೧೪ ॥
ಸುಶರ್ಕರಾಯುಕ್ತಮಥೋ ಗೃಹಾಣ ಸ್ನಾನಂ ಮಯಾ ಕಲ್ಪಿತಮೇವ ಢುಣ್ಢೇ ।
ತತೋ ಜಲಸ್ನಾನಮಘಾಪಹನ್ತೃ ವಿಘ್ನೇಶ ಮಾಯಾಂ ಮಮ ವಾರಯಾಶು ॥ ೧೫ ॥
ಸುಯಕ್ಷಪಂಕಸ್ಥಮಥೋ ಗೃಹಾಣ ಸ್ನಾನಂ ಪರೇಶಾಧಿಪತೇ ತತಶ್ಚ ।
ಕೌಮಣ್ಡಲೀಸಮ್ಭವಜಂ ಕುರುಷ್ವ ವಿಶುದ್ಧಮೇವಂ ಪರಿಕಲ್ಪಿತಂ ತು ॥ ೧೬ ॥
ತತಸ್ತು ಸೂಕ್ತೈರ್ಮನಸಾ ಗಣೇಶಂ ಸಮ್ಪೂಜ್ಯ ದೂರ್ವಾದಿಭಿರಲ್ಪಭಾವೈಃ ।
ಅಪಾರಕೈರ್ಮಣ್ಡಲಭೂತಬ್ರಹ್ಮಣಸ್ಪತ್ಯಾದಿಕೈಸ್ತಂ ಹ್ಯಭಿಷೇಚಯಾಮಿ ॥ ೧೭ ॥
ತತಃ ಸುವಸ್ತ್ರೇಣ ತು ಪ್ರೋಞ್ಛನಂ ವೈ ಗೃಹಾಣ ಚಿತ್ತೇನ ಮಯಾನುಕಲ್ಪಿತಮ್ ।
ತತೋ ವಿಶುದ್ಧೇನ ಜಲೇನ ಢುಣ್ಢೇ ಹ್ಯಾಚಾನ್ತಮೇವಂ ಕುರು ವಿಘ್ನರಾಜ ॥ ೧೮ ॥
ಅಗ್ನೌ ವಿಶುದ್ಧೇ ತು ಗೃಹಾಣ ವಸ್ತ್ರೇ ಹ್ಯನರ್ಘ್ಯಮೌಲ್ಯೇ ಮನಸಾ ಮಯಾ ತೇ ।
ದತ್ತೇ ಪರಿಚ್ಛಾದ್ಯ ನಿಜಾತ್ಮದೇಹಂ ತಾಭ್ಯಾಂ ಮಯೂರೇಶ ಜನಾಂಶ್ಚ ಪಾಲಯ ॥ ೧೯ ॥
ಆಚಮ್ಯ ವಿಘ್ನೇಶ ಪುನಸ್ತಥೈವ ಚಿತ್ತೇನ ದತ್ತಂ ಮುಖಮುತ್ತರೀಯಮ್ ।
ಗೃಹಾಣ ಭಕ್ತಪ್ರತಿಪಾಲಕ ತ್ವಂ ನಮೋ ಯಥಾ ತಾರಕಸಂಯುತಂ ತು ॥ ೨೦ ॥
ಯಜ್ಞೋಪವೀತಂ ತ್ರಿಗುಣಸ್ವರೂಪಂ ಸೌವರ್ಣಮೇವಂ ಹ್ಯಹಿನಾಥಭೂತಮ್ ।
ಭಾವೇನ ದತ್ತಂ ಗಣನಾಥ ತತ್ತ್ವಂ ಗೃಹಾಣ ಭಕ್ತೋದ್ಧೃತಿಕಾರಣಾಯ ॥ ೨೧ ॥
ಆಚಾನ್ತಮೇವಂ ಮನಸಾ ಪ್ರದತ್ತಂ ಕುರುಷ್ವ ಶುದ್ಧೇನ ಜಲೇನ ಢುಣ್ಢೇ ।
ಪುನಶ್ಚ ಕೌಮಣ್ಡಲಕೇನ ಪಾಹಿ ವಿಶ್ವಂ ಪ್ರಭೋ ಖೇಲಕರಂ ಸದಾ ತೇ ॥ ೨೨ ॥
ಉದ್ಯದ್ದಿನೇಶಾಭಮಥೋ ಗೃಹಾಣ ಸಿನ್ದೂರಕಂ ತೇ ಮನಸಾ ಪ್ರದತ್ತಮ್ ।
ಸರ್ವಾಙ್ಗಸಂಲೇಪನಮಾದರಾದ್ವೈ ಕುರುಷ್ವ ಹೇರಂಬ ಚ ತೇನ ಪೂರ್ಣಮ್ ॥ ೨೩ ॥
ಸಹಸ್ರಶೀರ್ಷಂ ಮನಸಾ ಮಯಾ ತ್ವಂ ದತ್ತಂ ಕಿರೀಟಂ ತು ಸುವರ್ಣಜಂ ವೈ ।
ಅನೇಕರತ್ನೈಃ ಖಚಿತಂ ಗೃಹಾಣ ಬ್ರಹ್ಮೇಶ ತೇ ಮಸ್ತಕಶೋಭನಾಯ ॥ ೨೪ ॥
ವಿಚಿತ್ರರತ್ನೈಃ ಕನಕೇನ ಢುಣ್ಢೇ ಯುತಾನಿ ಚಿತ್ತೇನ ಮಯಾ ಪರೇಶ ।
ದತ್ತಾನಿ ನಾನಾಪದಕುಣ್ಡಲಾನಿ ಗೃಹಾಣ ಶೂರ್ಪಶ್ರುತಿಭೂಷಣಾಯ ॥ ೨೫ ॥
ಶುಣ್ಡಾವಿಭೂಷಾರ್ಥಮನನ್ತಖೇಲಿನ್ ಸುವರ್ಣಜಂ ಕಞ್ಚುಕಮಾಗೃಹಾಣ ।
ರತ್ನೈಶ್ಚ ಯುಕ್ತಂ ಮನಸಾ ಮಯಾ ಯದ್ದತ್ತಂ ಪ್ರಭೋ ತತ್ಸಫಲಂ ಕುರುಷ್ವ ॥ ೨೬ ॥
ಸುವರ್ಣರತ್ನೈಶ್ಚ ಯುತಾನಿ ಢುಣ್ಢೇ ಸದೈಕದನ್ತಾಭರಣಾನಿ ಕಲ್ಪ ।
ಗೃಹಾಣ ಚೂಡಾಕೃತಯೇ ಪರೇಶ ದತ್ತಾನಿ ದನ್ತಸ್ಯ ಚ ಶೋಭನಾರ್ಥಮ್ ॥ ೨೭ ॥
ರತ್ನೈಃ ಸುವರ್ಣೇನ ಕೃತಾನಿ ತಾನಿ ಗೃಹಾಣ ಚತ್ವಾರಿ ಮಯಾ ಪ್ರಕಲ್ಪ್ಯ ।
ಸಂಭೂಷಯ ತ್ವಂ ಕಟಕಾನಿ ನಾಥ ಚತುರ್ಭುಜೇಷು ಹ್ಯಜ ವಿಘ್ನಹಾರಿನ್ ॥ ೨೮ ॥
ವಿಚಿತ್ರರತ್ನೈಃ ಖಚಿತಾನಿ ಢುಣ್ಢೇ ಕೇಯೂರಕಾಣಿ ಹ್ಯಥ ಕಲ್ಪಿತಾನಿ ।
ಸುವರ್ಣಜಾನಿ ಪ್ರಮಥಾಧಿನಾಥ ಗೃಹಾಣ ದತ್ತಾನಿ ತು ಬಾಹುಷು ತ್ವಮ್ ॥ ೨೯ ॥
ವಿಚಿತ್ರರತ್ನೈಃ ಖಚಿತಂ ಸುವರ್ಣಸಮ್ಭೂತಕಂ ಗೃಹ್ಯ ಮಯಾ ಪ್ರದತ್ತಮ್ ।
ತಮಾಙ್ಗುಲೀಷ್ವಙ್ಗುಲಿಕಂ ಗಣೇಶ ಚಿತ್ತೇನ ಸಂಶೋಭಯ ತತ್ಪರೇಶ ॥ ೩೦ ॥
ಪ್ರವಾಲಮುಕ್ತಾಫಲರತ್ನಜೈಸ್ತ್ವಂ ಸುವರ್ಣಸೂತ್ರೈಶ್ಚ ಗೃಹಾಣ ಕಣ್ಠೇ ।
ಚಿತ್ತೇನ ದತ್ತಾ ವಿವಿಧಾಶ್ಚ ಮಾಲಾ ಉರೂದರೇ ಶೋಭಯ ವಿಘ್ನರಾಜ ॥ ೩೧ ॥
ಚನ್ದ್ರಂ ಲಲಾಟೇ ಗಣನಾಥ ಪೂರ್ಣಂ ವೃದ್ಧಿಕ್ಷಯಾಭ್ಯಾಂ ತು ವಿಹೀನಮಾದ್ಯಮ್ ।
ಸಂಶೋಭಯ ತ್ವಂ ವರಸಂಯುತಂ ತೇ ಭಕ್ತಿಪ್ರಿಯತ್ವಂ ಪ್ರಕಟೀಕುರುಷ್ವ ॥ ೩೨ ॥
ಚಿನ್ತಾಮಣಿಂ ಚಿನ್ತಿತದಂ ಪರೇಶ ಹೃದ್ದೇಶಗಂ ಜ್ಯೋತಿರ್ಮಯಂ ಕುರುಷ್ವ ।
ಮಣಿಂ ಸದಾನನ್ದಸುಖಪ್ರದಂ ಚ ವಿಘ್ನೇಶ ದೀನಾರ್ಥದ ಪಾಲಯಸ್ವ ॥ ೩೩ ॥
ನಾಭೌ ಫಣೀಶಂ ಚ ಸಹಸ್ರಶೀರ್ಷಂ ಸಂವೇಷ್ಟನೇನೈವ ಗಣಾಧಿನಾಥ ।
ಭಕ್ತಂ ಸುಭೂಷಂ ಕುರು ಭೂಷಣೇನ ವರಪ್ರದಾನಂ ಸಫಲಂ ಪರೇಶ ॥ ೩೪ ॥
ಕಟೀತಟೇ ರತ್ನಸುವರ್ಣಯುಕ್ತಾಂ ಕಾಂಚೀಂ ಸುಚಿತ್ತೇನ ಚ ಧಾರಯಾಮಿ ।
ವಿಘ್ನೇಶ ಜ್ಯೋತಿರ್ಗಣದೀಪನೀಂ ತೇ ಪ್ರಸೀದ ಭಕ್ತಂ ಕುರು ಮಾಂ ದಯಾಬ್ಧೇ ॥ ೩೫ ॥
ಹೇರಮ್ಬ ತೇ ರತ್ನಸುವರ್ಣಯುಕ್ತೇ ಸುನೂಪುರೇ ಮಞ್ಜಿರಕೇ ತಥೈವ ।
ಸುಕಿಙ್ಕಿಣೀನಾದಯುತೇ ಸುಬುದ್ಧ್ಯಾ ಸುಪಾದಯೋಃ ಶೋಭಯ ಮೇ ಪ್ರದತ್ತೇ ॥ ೩೬ ॥
ಇತ್ಯಾದಿ ನಾನಾವಿಧಭೂಷಣಾನಿ ತವೇಚ್ಛಯಾ ಮಾನಸಕಲ್ಪಿತಾನಿ ।
ಸಮ್ಭೂಷಯಾಮ್ಯೇವ ತ್ವದಂಗಕೇಷು ವಿಚಿತ್ರಧಾತುಪ್ರಭವಾಣಿ ಢುಣ್ಢೇ ॥ ೩೭ ॥
ಸುಚನ್ದನಂ ರಕ್ತಮಮೋಘವೀರ್ಯಂ ಸುಘರ್ಷಿತಂ ಹ್ಯಷ್ಟಕಗನ್ಧಮುಖ್ಯೈಃ ।
ಯುಕ್ತಂ ಮಯಾ ಕಲ್ಪಿತಮೇಕದನ್ತ ಗೃಹಾಣ ತೇ ತ್ವಙ್ಗವಿಲೇಪನಾರ್ಥಮ್ ॥ ೩೮ ॥
ಲಿಪ್ತೇಷು ವೈಚಿತ್ರ್ಯಮಥಾಷ್ಟಗನ್ಧೈರಂಗೇಷು ತೇಽಹಂ ಪ್ರಕರೋಮಿ ಚಿತ್ರಮ್ ।
ಪ್ರಸೀದ ಚಿತ್ತೇನ ವಿನಾಯಕ ತ್ವಂ ತತಃ ಸುರಕ್ತಂ ರವಿಮೇವ ಫಾಲೇ ॥ ೩೯ ॥
ಘೃತೇನ ವೈ ಕುಙ್ಕುಮಕೇನ ರಕ್ತಾನ್ ಸುತಣ್ಡುಲಾಂಸ್ತೇ ಪರಿಕಲ್ಪಯಾಮಿ ।
ಫಾಲೇ ಗಣಾಧ್ಯಕ್ಷ ಗೃಹಾಣ ಪಾಹಿ ಭಕ್ತಾನ್ಸುಭಕ್ತಿಪ್ರಿಯ ದೀನಬನ್ಧೋ ॥ ೪೦ ॥
ಗೃಹಾಣ ಭೋ ಚಮ್ಪಕಮಾಲತೀನಿ ಜಲಪಙ್ಕಜಾನಿ ಸ್ಥಲಪಙ್ಕಜಾನಿ ।
ಚಿತ್ತೇನ ದತ್ತಾನಿ ಚ ಮಲ್ಲಿಕಾನಿ ಪುಷ್ಪಾಣಿ ನಾನಾವಿಧವೃಕ್ಷಜಾನಿ ॥ ೪೧ ॥
ಪುಷ್ಪೋಪರಿ ತ್ವಂ ಮನಸಾ ಗೃಹಾಣ ಹೇರಮ್ಬ ಮನ್ದಾರಶಮೀದಲಾನಿ ।
ಮಯಾ ಸುಚಿತ್ತೇನ ಚ ಕಲ್ಪಿತಾನಿ ಹ್ಯಪಾರಕಾಣಿ ಪ್ರಣವಾಕೃತೇ ತು ॥ ೪೨ ॥
ದೂರ್ವಾಙ್ಕುರಾನ್ವೈ ಮನಸಾ ಪ್ರದತ್ತಾಂಸ್ತ್ರಿಪಂಚಪತ್ರೈರ್ಯುತಕಾಂಶ್ಚ ಸ್ನಿಗ್ಧಾನ್ ।
ಗೃಹಾಣ ವಿಘ್ನೇಶ್ವರ ಸಂಖ್ಯಯಾ ತ್ವಂ ಹೀನಾಂಶ್ಚ ಸರ್ವೋಪರಿ ವಕ್ರತುಣ್ಡ ॥ ೪೩ ॥
ದಶಾಙ್ಗಭೂತಂ ಮನಸಾ ಮಯಾ ತೇ ಧೂಪಂ ಪ್ರದತ್ತಂ ಗಣರಾಜ ಢುಣ್ಢೇ ।
ಗೃಹಾಣ ಸೌರಭ್ಯಕರಂ ಪರೇಶ ಸಿದ್ಧ್ಯಾ ಚ ಬುದ್ಧ್ಯಾ ಸಹ ಭಕ್ತಪಾಲ ॥ ೪೪ ॥
ದೀಪಂ ಸುವರ್ತ್ಯಾ ಯುತಮಾದರಾತ್ತೇ ದತ್ತಂ ಮಯಾ ಮಾನಸಕಂ ಗಣೇಶ ।
ಗೃಹಾಣ ನಾನಾವಿಧಜಂ ಘೃತಾದಿತೈಲಾದಿಸಂಭೂತಮಮೋಘದೃಷ್ಟೇ ॥ ೪೫ ॥
ಭೋಜ್ಯಂ ಚ ಲೇಹ್ಯಂ ಗಣರಾಜ ಪೇಯಂ ಚೋಷ್ಯಂ ಚ ನಾನಾವಿಧಷಡ್ರಸಾಢ್ಯಮ್ ।
ಗೃಹಾಣ ನೈವೇದ್ಯಮಥೋ ಮಯಾ ತೇ ಸುಕಲ್ಪಿತಂ ಪುಷ್ಟಿಪತೇ ಮಹಾತ್ಮನ್ ॥ ೪೬ ॥
ಸುವಾಸಿತಂ ಭೋಜನಮಧ್ಯಭಾಗೇ ಜಲಂ ಮಯಾ ದತ್ತಮಥೋ ಗೃಹಾಣ ।
ಕಮಣ್ಡಲುಸ್ಥಂ ಮನಸಾ ಗಣೇಶ ಪಿಬಸ್ವ ವಿಶ್ವಾದಿಕತೃಪ್ತಿಕಾರಿ ॥ ೪೭ ॥
ತತಃ ಕರೋದ್ವರ್ತನಕಂ ಗೃಹಾಣ ಸೌಗನ್ಧ್ಯಯುಕ್ತಂ ಮುಖಮಾರ್ಜನಾಯ ।
ಸುವಾಸಿತೇನೈವ ಸುತೀರ್ಥಜೇನ ಸುಕಲ್ಪಿತಂ ನಾಥ ಗೃಹಾಣ ಢುಣ್ಢೇ ॥ ೪೮ ॥
ಪುನಸ್ತಥಾಚಮ್ಯ ಸುವಾಸಿತಂ ಚ ದತ್ತಂ ಮಯಾ ತೀರ್ಥಜಲಂ ಪಿಬಸ್ವ ।
ಪ್ರಕಲ್ಪ್ಯ ವಿಘ್ನೇಶ ತತಃ ಪರಂ ತೇ ಸಮ್ಪ್ರೋಞ್ಛನಂ ಹಸ್ತಮುಖೇಕರೋಮಿ ॥ ೪೯ ॥
ದ್ರಾಕ್ಷಾದಿರಮ್ಭಾಫಲಚೂತಕಾನಿ ಖಾರ್ಜೂರಕಾರ್ಕನ್ಧುಕದಾಡಿಮಾನಿ ।
ಸುಸ್ವಾದಯುಕ್ತಾನಿ ಮಯಾ ಪ್ರಕಲ್ಪ್ಯ ಗೃಹಾಣ ದತ್ತಾನಿ ಫಲಾನಿ ಢುಣ್ಢೇ ॥ ೫೦ ॥
ಪುನರ್ಜಲೇನೈವ ಕರಾದಿಕಂ ತೇ ಸಂಕ್ಷಾಲಯೇಽಹಂ ಮನಸಾ ಗಣೇಶ ।
ಸುವಾಸಿತಂ ತೋಯಮಥೋ ಪಿಬಸ್ವ ಮಯಾ ಪ್ರದತ್ತಂ ಮನಸಾ ಪರೇಶ ॥ ೫೧ ॥
ಅಷ್ಟಾಂಗಯುಕ್ತಂ ಗಣನಾಥ ದತ್ತಂ ತಾಮ್ಬೂಲಕಂ ತೇ ಮನಸಾ ಮಯಾ ವೈ ।
ಗೃಹಾಣ ವಿಘ್ನೇಶ್ವರ ಭಾವಯುಕ್ತಂ ಸದಾಸಕೃತ್ತುಣ್ಡವಿಶೋಧನಾರ್ಥಮ್ ॥ ೫೨ ॥
ತತೋ ಮಯಾ ಕಲ್ಪಿತಕೇ ಗಣೇಶ ಮಹಾಸನೇ ರತ್ನಸುವರ್ಣಯುಕ್ತೇ ।
ಮನ್ದಾರಕೂರ್ಪಾಸಕಯುಕ್ತ-ವಸ್ತ್ರೈರನರ್ಘ್ಯ-ಸಞ್ಛಾದಿತಕೇ ಪ್ರಸೀದ ॥ ೫೩ ॥
ತತಸ್ತ್ವದೀಯಾವರಣಂ ಪರೇಶ ಸಮ್ಪೂಜಯೇಽಹಂ ಮನಸಾ ಯಥಾವತ್ ।
ನಾನೋಪಚಾರೈಃ ಪರಮಪ್ರಿಯೈಸ್ತು ತ್ವತ್ಪ್ರೀತಿಕಾಮಾರ್ಥಮನಾಥಬನ್ಧೋ ॥ ೫೪ ॥
ಗೃಹಾಣ ಲಂಬೋದರ ದಕ್ಷಿಣಾಂ ತೇ ಹ್ಯಸಂಖ್ಯಭೂತಾಂ ಮನಸಾ ಪ್ರದತ್ತಾಮ್ ।
ಸೌವರ್ಣಮುದ್ರಾದಿಕಮುಖ್ಯಭಾವಾಂ ಪಾಹಿ ಪ್ರಭೋ ವಿಶ್ವಮಿದಂ ಗಣೇಶ ॥ ೫೫ ॥
ರಾಜೋಪಚಾರಾನ್ವಿವಿಧಾನ್ಗೃಹಾಣ ಹಸ್ತ್ಯಶ್ವಛತ್ರಾದಿಕಮಾದರಾದ್ವೈ ।
ಚಿತ್ತೇನ ದತ್ತಾನ್ಗಣನಾಥ ಢುಣ್ಢೇ ಹ್ಯಪಾರಸಖ್ಯಾನ್ ಸ್ಥಿರಜಙ್ಗಮಾಂಸ್ತೇ ॥ ೫೬ ॥
ದಾನಾಯ ನಾನಾವಿಧರೂಪಕಾಂಸ್ತೇ ಗೃಹಾಣ ದತ್ತಾನ್ಮನಸಾ ಮಯಾ ವೈ ।
ಪದಾರ್ಥಭೂತಾನ್ ಸ್ಥಿರಜಙ್ಗಮಾಂಶ್ಚ ಹೇರಮ್ಬ ಮಾಂ ತಾರಯ ಮೋಹಭಾವಾತ್ ॥ ೫೭ ॥
ಮನ್ದಾರಪುಷ್ಪಾಣಿ ಶಮೀದಲಾನಿ ದೂರ್ವಾಙ್ಕುರಾಂಸ್ತೇ ಮನಸಾ ದದಾಮಿ ।
ಹೇರಮ್ಬ ಲಮ್ಬೋದರ ದೀನಪಾಲ ಗೃಹಾಣ ಭಕ್ತಂ ಕುರು ಮಾಂ ಪದೇ ತೇ ॥ ೫೮ ॥
ತತೋ ಹರಿದ್ರಾಮಬಿರಂ ಗುಲಾಲಂ ಸಿನ್ದೂರಕಂ ತೇ ಪರಿಕಲ್ಪಯಾಮಿ ।
ಸುವಾಸಿತಂ ವಸ್ತುಸುವಾಸಭೂತೈರ್ಗೃಹಾಣ ಬ್ರಹ್ಮೇಶ್ವರಶೋಭನಾರ್ಥಮ್ ॥ ೫೯ ॥
ತತಃ ಶುಕಾದ್ಯಾಃ ಶಿವವಿಷ್ಣುಮುಖ್ಯಾ ಇನ್ದ್ರಾದಯಃ ಶೇಷಮುಖಾಸ್ತಥಾಽನ್ಯೇ ।
ಮುನೀನ್ದ್ರಕಾಃ ಸೇವಕಭಾವಯುಕ್ತಾಃ ಸಭಾಸನಸ್ಥಂ ಪ್ರಣಮನ್ತಿ ಢುಣ್ಢಮ್ ॥ ೬೦ ॥
ವಾಮಾಂಗಕೇ ಶಕ್ತಿಯುತಾ ಗಣೇಶಂ ಸಿದ್ಧಿಸ್ತು ನಾನಾವಿಧಸಿದ್ಧಿ ಭಿಸ್ತಮ್ ।
ಅತ್ಯನ್ತಭಾವೇನ ಸುಸೇವತೇ ತು ಮಾಯಾಸ್ವರೂಪಾ ಪರಮಾರ್ಥಭೂತಾ ॥ ೬೧ ॥
ಗಣೇಶ್ವರಂ ದಕ್ಷಿಣಭಾಗಸಂಸ್ಥಾ ಬುದ್ಧಿಃ ಕಲಾಭಿಶ್ಚ ಸುಬೋಧಿಕಾಭಿಃ ।
ವಿದ್ಯಾಭಿರೇವಂ ಭಜತೇ ಪರೇಶ ಮಾಯಾಸು ಸಾಙ್ಖ್ಯಪ್ರದಚಿತ್ತರೂಪಾಃ ॥ ೬೨ ॥
ಪ್ರಮೋದಮೋದಾದಯ ಏವ ಪೃಷ್ಠೇ ಗಣೇಶ್ವರಂ ಭಾವಯುತಾ ಭಜನ್ತೇ ।
ಭಕ್ತೇಶ್ವರಾ ಮುದ್ಗಲಶಮ್ಭುಮುಖ್ಯಾಃ ಶುಕಾದಯಸ್ತಂ ಸ್ಮ ಪುರೋ ಭಜನ್ತೇ ॥ ೬೩ ॥
ಗನ್ಧರ್ವಮುಖ್ಯಾ ಮಧುರಂ ಜಗುಶ್ಚ ಗಣೇಶಗೀತಂ ವಿವಿಧಸ್ವರೂಪಮ್ ।
ನೃತ್ಯಂಕಲಾಯುಕ್ತಮಥೋ ಪುರಸ್ತಾಚ್ಚಕ್ರುಸ್ತಥಾ ಹ್ಯಪ್ಸರಸೋ ವಿಚಿತ್ರಮ್ ॥ ೬೪ ॥
ಇತ್ಯಾದಿನಾನಾವಿಧಭಾವಯುಕ್ತೈಃ ಸಂಸೇವಿತಂ ವಿಘ್ನಪತಿಂ ಭಜಾಮಿ ।
ಚಿತ್ತೇನ ಬುಧ್ವಾ ತು ನಿರಂಜನಂ ವೈ ಕರೋಮಿ ನಾನಾವಿಧದೀಪಯುಕ್ತಮ್ ॥ ೬೫ ॥
ಚತುರ್ಭುಜಂ ಪಾಶಧರಂ ಗಣೇಶಂ ತಥಾಙ್ಕುಶಂ ದನ್ತಯುತಂ ತಮೇವಮ್ ।
ತ್ರಿನೇತ್ರಯುಕ್ತಂ ಸ್ವಭಯಂಕರಂ ತಂ ಮಹೋದರಂ ಚೈಕರದಂ ಗಜಾಸ್ಯಮ್ ॥ ೬೬ ॥
ಸರ್ಪೋಪವೀತಂ ಗಜಕರ್ಣಧಾರಂ ವಿಭೂತಿಭಿಃ ಸೇವಿತಪಾದಪದ್ಮಮ್ ।
ಧ್ಯಾಯೇದ್ಗಣೇಶಂ ವಿವಿಧಪ್ರಕಾರೈಃ ಸುಪೂಜಿತಂ ಶಕ್ತಿಯುತಂ ಪರೇಶಮ್ ॥ ೬೭ ॥
ತತೋ ಜಪಂ ವೈ ಮನಸಾ ಕರೋಮಿ ಸ್ವಮೂಲಮನ್ತ್ರಸ್ಯ ವಿಧಾನಯುಕ್ತಮ್ ।
ಅಸಂಖ್ಯಭೂತಂ ಗಣರಾಜಹಸ್ತೇ ಸಮರ್ಪಯಾಮ್ಯೇವ ಗೃಹಾಣ ಢುಣ್ಢೇ ॥ ೬೮ ॥
ಆರಾತ್ರಿಕಾಂ ಕರ್ಪುರಕಾದಿಭೂತಾಮಪಾರದೀಪಾಂ ಪ್ರಕರೋಮಿ ಪೂರ್ಣಾಮ್ ।
ಚಿತ್ತೇನ ಲಂಬೋದರ ತಾಂ ಗೃಹಾಣ ಹ್ಯಜ್ಞಾನಧ್ವಾನ್ತಾಘಹರಾಂ ನಿಜಾನಾಮ್ ॥ ೬೯ ॥
ವೇದೇಷು ವಿಘ್ನೇಶ್ವರಕೈಃ ಸುಮನ್ತ್ರೈಃ ಸುಮನ್ತ್ರಿತಂ ಪುಷ್ಪದಲಂ ಪ್ರಭೂತಮ್ ।
ಗೃಹಾಣ ಚಿತ್ತೇನ ಮಯಾ ಪ್ರದತ್ತಮಪಾರವೃತ್ತ್ಯಾ ತ್ವಥ ಮನ್ತ್ರಪುಷ್ಪಮ್ ॥ ೭೦ ॥
ಅಪಾರವೃತ್ಯಾ ಸ್ತುತಿಮೇಕದನ್ತಂ ಗೃಹಾಣ ಚಿತ್ತೇನ ಕೃತಾಂ ಗಣೇಶ ।
ಯುಕ್ತಾಂ ಶ್ರುತಿಸ್ಮಾರ್ತಭವೈಃ ಪುರಾಣೈಃ ಸರ್ವೈಃ ಪರೇಶಾಧಿಪತೇ ಮಯಾ ತೇ ॥ ೭೧ ॥
ಪ್ರದಕ್ಷಿಣಾ ಮಾನಸಕಲ್ಪಿತಾಸ್ತಾ ಗೃಹಾಣ ಲಮ್ಬೋದರ ಭಾವಯುಕ್ತಾಃ ।
ಸಙ್ಖ್ಯಾವಿಹೀನಾ ವಿವಿಧಸ್ವರೂಪಾ ಭಕ್ತಾನ್ಸದಾ ರಕ್ಷ ಭವಾರ್ಣವಾದ್ವೈ ॥ ೭೨ ॥
ನತಿಂ ತತೋ ವಿಘ್ನಪತೇ ಗೃಹಾಣ ಸಾಷ್ಟಾಂಗಕಾದ್ಯಾಂ ವಿವಿಧಸ್ವರೂಪಾಮ್ ।
ಸಂಖ್ಯಾವಿಹೀನಾಂ ಮನಸಾ ಕೃತಾಂ ತೇ ಸಿದ್ಧ್ಯಾ ಚ ಬುದ್ಧ್ಯಾ ಪರಿಪಾಲಯಾಶು ॥ ೭೩ ॥
ನ್ಯೂನಾತಿರಿಕ್ತಂ ತು ಮಯಾ ಕೃತಂ ಚೇತ್ತದರ್ಥಮನ್ತೇ ಮನಸಾ ಗೃಹಾಣ ।
ದೂರ್ವಾಙ್ಕುರಾನ್ವಿಘ್ನಪತೇ ಪ್ರದತ್ತಾನ್ ಸಮ್ಪೂರ್ಣಮೇವಂ ಕುರು ಪೂಜನಂ ಮೇ ॥ ೭೪ ॥
ಕ್ಷಮಸ್ವ ವಿಘ್ನಾಧಿಪತೇ ಮದೀಯಾನ್ ಸದಾಪರಾಧಾನ್ ವಿವಿಧಸ್ವರೂಪಾನ್ ।
ಭಕ್ತಿಂ ಮದೀಯಾಂ ಸಫಲಾಂ ಕುರುಷ್ವ ಸಮ್ಪ್ರಾರ್ಥಯೇಽಹಂ ಮನಸಾ ಗಣೇಶ ॥ ೭೫ ॥
ತತಃ ಪ್ರಸನ್ನೇನ ಗಜಾನನೇನ ದತ್ತಂ ಪ್ರಸಾದಂ ಶಿರಸಾಽಭಿವನ್ದ್ಯ ।
ಸ್ವಮಸ್ತಕೇ ತಂ ಪರಿಧಾರಯಾಮಿ ಚಿತ್ತೇನ ವಿಘ್ನೇಶ್ವರ ಮಾನತೋಽಸ್ಮಿ ॥ ೭೬ ॥
ಉತ್ಥಾಯ ವಿಘ್ನೇಶ್ವರ ಏವ ತಸ್ಮಾದ್ಗತಸ್ತತಸ್ತ್ವನ್ತರಧಾನಶಕ್ತ್ಯಾ ।
ಶಿವಾದಯಸ್ತಂ ಪ್ರಣಿಪತ್ಯ ಸರ್ವೇ ಗತಾಃ ಸುಚಿತ್ತೇನ ಚ ಚಿನ್ತಯಾಮಿ ॥ ೭೭ ॥
ಸರ್ವಾನ್ನಮಸ್ಕೃತ್ಯ ತತೋಽಹಮೇವ ಭಜಾಮಿ ಚಿತ್ತೇನ ಗಣಾಧಿಪಂ ತಮ್ ।
ಸ್ವಸ್ಥಾನಮಾಗತ್ಯ ಮಹಾನುಭಾವೈಃ ಭಕ್ತೈರ್ಗಣೇಶಸ್ಯ ಚ ಖೇಲಯಾಮಿ ॥ ೭೮ ॥
ಏವಂ ತ್ರಿಕಾಲೇಷು ಗಣಾಧಿಪಂ ತಂ ಚಿತ್ತೇನ ನಿತ್ಯಂ ಪರಿಪೂಜಯಾಮಿ ।
ತೇನೈವ ತುಷ್ಟಃ ಪ್ರದದಾತು ಭಾವಂ ವಿಶ್ವೇಶ್ವರೋ ಭಕ್ತಿಮಯಂ ತು ಮಹ್ಯಮ್ ॥ ೭೯ ॥
ಗಣೇಶಪಾದೋದಕಪಾನಕಂ ಚ ಉಚ್ಛಿಷ್ಟಗನ್ಧಸ್ಯ ಸುಲೇಪನಂ ತು ।
ನಿರ್ಮಾಲ್ಯಸನ್ಧಾರಣಕಂ ಸುಭೋಜ್ಯಂ ಲಂಬೋದರಸ್ಯಾಸ್ತು ಹಿ ಭುಕ್ತಶೇಷಮ್ ॥ ೮೦ ॥
ಯಂ ಯಂ ಕರೋಮ್ಯೇವ ತದೇವ ದೀಕ್ಷಾ ಗಣೇಶ್ವರಸ್ಯಾಸ್ತು ಸದಾ ಗಣೇಶ ।
ಪ್ರಸೀದ ನಿತ್ಯಂ ತವಪಾದಭಕ್ತಂ ಕುರುಷ್ವ ಮಾಂ ಬ್ರಹ್ಮಪತೇ ದಯಾಲೋ ॥ ೮೧ ॥
ತತಸ್ತು ಶಯ್ಯಾಂ ಪರಿಕಲ್ಪಯಾಮಿ ಮನ್ದಾರಕೂರ್ಪಾಸಕವಸ್ತ್ರಯುಕ್ತಾಮ್ ।
ಸುವಾಸಪುಷ್ಪಾದಿಭಿರರ್ಚಿತಾಂ ತೇ ಗೃಹಾಣ ನಿದ್ರಾಂ ಕುರು ವಿಘ್ನರಾಜ ॥ ೮೨ ॥
ಸಿದ್ಧ್ಯಾ ಚ ಬುದ್ಧ್ಯಾ ಸಹಿತಂ ಗಣೇಶ ಸುನಿದ್ರಿತಂ ವೀಕ್ಷ್ಯ ತಥಾಽಹಮೇವ ।
ಗತ್ವಾ ಸ್ವವಾಸಂ ಚ ಕರೋಮಿ ನಿದ್ರಾಂ ಧ್ಯಾತ್ವಾ ಹೃದಿ ಬ್ರಹ್ಮಪತಿಂ ತದೀಯಃ ॥ ೮೩ ॥
ಏತಾದೃಶಂ ಸೌಖ್ಯಮಮೋಘಶಕ್ತೇ ದೇಹಿ ಪ್ರಭೋ ಮಾನಸಜಂ ಗಣೇಶ ।
ಮಹ್ಯಂ ಚ ತೇನೈವ ಕೃತಾರ್ಥರೂಪೋ ಭವಾಮಿ ಭಕ್ತಿರಸಲಾಲಸೋಽಹಮ್ ॥ ೮೪ ॥
ಗಾರ್ಗ್ಯ ಉವಾಚ –
ಏವಂ ನಿತ್ಯಂ ಮಹಾರಾಜ ಗೃತ್ಸಮಾದೋ ಮಹಾಯಶಾಃ ।
ಚಕಾರ ಮಾನಸೀಂ ಪೂಜಾಂ ಯೋಗೀನ್ದ್ರಾಣಾಂ ಗುರುಸ್ಸ್ವಯಮ್ ॥ ೮೫ ॥
ಯ ಏತಾಂ ಮಾನಸೀಂ ಪೂಜಾಂ ಕರಿಷ್ಯತಿ ನರೋತ್ತಮಃ ।
ಪಠಿಷ್ಯತಿ ಸದಾ ಸೋಽಪಿ ಗಾಣಪತ್ಯೋ ಭವಿಷ್ಯತಿ ॥ ೮೬ ॥
ಶ್ರಾವಯಿಷ್ಯತಿ ಯೋ ಮರ್ತ್ಯಃ ಶ್ರೋಷ್ಯತೇ ಭಾವಸಂಯುತಃ ।
ಸ ಕ್ರಮೇಣ ಮಹೀಪಾಲ ಬ್ರಹ್ಮಭೂತೋ ಭವಿಷ್ಯತಿ ॥ ೮೭ ॥
ಯದ್ಯದಿಚ್ಛತಿ ತತ್ತದ್ವೈ ಸಫಲಂ ತಸ್ಯ ಜಾಯತೇ ।
ಅನ್ತೇ ಸ್ವಾನನ್ದಗಃ ಸೋಽಪಿ ಯೋಗಿವನ್ದ್ಯೋ ಭವಿಷ್ಯತಿ ॥ ೮೮ ॥
ಇತಿ ಶ್ರೀಮದಾನ್ತ್ಯೇ ಮೌದ್ಗಲ್ಯೇ ಗಣೇಶಮಾನಸಪೂಜಾ ।
– Chant Stotra in Other Languages –
Sri Ganesha Manasa Puja in English – Sanskrit – Kannada – Telugu – Tamil