॥ Sri Vishakhanandabhidhastotram Telugu Lyrics ॥
శ్రీవిశాఖానన్దాభిధస్తోత్రమ్
భావనామగుణాదీనామైక్యాత్శ్రీరాధికైవ యా ।
కృష్ణేన్దోః ప్రేయసీ సా మే శ్రీవిశాఖా ప్రసీదతు ॥ ౧ ॥
జయతి శ్రీమతీ కాచిద్వృన్దారణ్యవిహారిణీ ।
విధాతుస్తరుణీసృష్టికౌశలశ్రీఋ ఇహోజ్జ్వలా ॥ ౨ ॥
ఛిన్నస్వర్ణసదృక్షాఙ్గీ రక్తవస్త్రావగుణ్ఠినీ ।
నిర్బన్ధబద్ధవేణీకా చారుకాశ్మీరచర్చితా ॥ ౩ ॥
ద్వికాలేన్దులలాటోద్యత్కస్తూరీతిలకోజ్జ్వలా ।
స్ఫుటకోకనదద్వన్ద్వ బన్ధురీకృతకర్ణికా ॥ ౪ ॥
విచిత్రవర్ణవిన్యాస చిత్రితీకృతవిగ్రహా
కృష్ణచోరభయాచ్చోలీ గుమ్ఫీకృతమణిస్తనీ ॥ ౫ ॥
హారమఞ్జీరకేయూర చూడానాసాగ్రమౌక్తికైః ।
ముద్రికాదిభిరన్యైశ్చ భూషితా భూషణోత్తమైః ॥ ౬ ॥
సుదీప్తకజ్జలోద్దీప్త నయనేన్దీవరద్వయ ।
సౌరభోజ్జ్వలతామ్బూల మఞ్జులా శ్రీముఖామ్బుజా ॥ ౭ ॥
స్మితలేశలసత్పక్వ చారుబిమ్బఫలాధరా ।
మధురాలాపపీయూష సఞ్జీవితసఖీకులా ॥ ౮ ॥
వృషభానుకులోత్కీర్తి వర్ధికా భానుసేవికా ।
కీర్తిదాఖణిరత్నశ్రీః శ్రీజితశ్రీః శ్రియోజ్జ్వలా ॥ ౯ ॥
అనఙ్గమఞ్జరీజ్యేష్ఠా శ్రీదామానన్దదానుజా ।
ముఖరాదృష్టిపీయూష వర్తినప్త్రీ తదాశ్రితా ॥ ౧౦ ॥
పౌర్ణమాసీబహిఃఖేలత్ప్రాణపఞ్జరసారికా ।
సుబలప్రణయోల్లాసా తత్ర విన్యస్తభారకా ॥ ౧౧ ॥
వ్రజేశ్యాః కృష్ణవత్ప్రేమ పాత్రీ తత్రాతి భక్తికా ।
అమ్బావాత్సల్యసంసిక్తా రోహిణీఘ్రాతమస్తకా ॥ ౧౨ ॥
వ్రజేన్ద్రచరణామ్భోజే ఽర్పితభక్తిపరమ్పరా ।
తస్యాపి ప్రేమపాత్రీయం పితుర్భానోరివ స్ఫుటమ్ ॥ ౧౩ ॥
గురుబుద్ధ్యా ప్రలమ్బారౌ నతిం దూరే వితన్వతీ ।
వధూబుద్ధ్యైవ తస్యాపి ప్రేమభూమీహ హ్రీయుతా ॥ ౧౪ ॥
లలితాలలితా స్వీయ ప్రాణోరులలితావృతా ।
లలితాప్రాణరక్షైకరక్షితా తద్వశాత్మికా ॥ ౧౫ ॥
వృన్దాప్రసాధితోత్తుఙ్గ కుడుఙ్గానఙ్గవేశ్మని ।
కృష్ణఖణ్డితమానత్వాల్ లలితాభీతికమ్పినీ ॥ ౧౬ ॥
విశాఖనర్మసఖ్యేన సుఖితా తద్గతాత్మికా ।
విశాఖాప్రాణదీపాలి నిర్మఞ్ఛ్యనఖచన్ద్రికా ॥ ౧౭ ॥
సఖీవర్గైకజీవాతుస్మితకైరవకోరకా ।
స్నేహఫుల్లీకృతస్వీయగణా గోవిన్దవల్లభా ॥ ౧౮ ॥
వృన్దారణ్యమహారాజ్యమహాసేకమహోజ్జ్వలా ।
గోష్ఠసర్వజనాజీవ్యవదనా రదనోత్తమా ॥ ౧౯ ॥
జ్ఞాతవృన్దాటవీసర్వలతాతరుమృగద్విజా ।
తదీయసఖ్యసౌరభ్యసురభీకృతమానసా ॥ ౨౦ ॥
సర్వత్ర కుర్వతి స్నేహం స్నిగ్ధప్రకృతిరాభవమ్ ।
నామమాత్రజగాచిత్తద్రావికా దీనపాలికా ॥ ౨౧ ॥
గోకులే కృష్ణచన్ద్రస్య సర్వాపచ్ఛాన్తిపూర్వకమ్ ।
ధీరలాలిత్యవృద్ధ్యర్థం క్రియమాణవ్రతాధికా ॥ ౨౨ ॥
గురుగోవిప్రసత్కారరతా వినయసన్నతా ।
తదాశీఃశతవర్ధిష్ణుసౌభాగ్యాదిగుణాఞ్చితా ॥ ౨౩ ॥
ఆయుర్గోశ్రీయశోదాయిపాకో దుర్వాససో వరాత్ ।
అతః కున్దలతానీయమానా రాజ్ఞ్యాః సమాజ్ఞయా ॥ ౨౪ ॥
గోష్ఠజీవాతుగోవిన్దజీవాతులపితామృతా ।
నిజప్రానార్బుదశ్రేణిరక్ష్యతత్పాదరేణుకా ॥ ౨౫ ॥
కృష్ణపదారవిన్దోద్యన్మకరన్దమయే ముదా ।
అరిష్టమర్ది కాసారే స్నాత్రీ నిర్బన్ధతోఽన్వహమ్ ॥ ౨౬ ॥
నిజకున్దపురస్తీరే రత్నస్థల్యామహర్నిశమ్ ।
ప్రేష్ఠనర్మాలిభిర్భఙ్గ్యా సమం నర్మ వితన్వతీ ॥ ౨౭ ॥
గోవర్ధనగుహాలక్ష్మీర్గోవర్ధనవిహారిణీ ।
ధృతగోవర్ధనప్రేమా ధృతగోవర్ధనప్రియా ॥ ౨౮ ॥
గాన్ధర్వాద్భుతగాన్ధర్వా రాధా బాధాపహారిణీ ।
చన్ద్రకాన్తిశ్చలాపఙ్గీ రాధికా భానురాధికా ॥ ౨౯ ॥
గాన్ధర్వికా స్వగన్ధాతిసుగన్ధీకృతగోకులా ।
ఇతి పఞ్చభిరాహూతా నామభిర్గోకులే జనైః ॥ ౩౦ ॥
హరిణీ హరిణీనేత్రా రఙ్గిణీ రఙ్గిణీప్రియా ।
రఙ్గిణీధ్వనినాగచ్ఛత్సురఙ్గధ్వనిహాసినీ ॥ ౩౧ ॥
బద్ధనన్దీశ్వరోత్కణ్ఠా కాన్తకృష్ణైకకఙ్క్షయా ।
నవానురాగసమ్బన్ధమదిరోన్మత్తమానసా ॥ ౩౨ ॥
మదనోన్మాదిగోవిన్దమకస్మాత్ప్రేక్ష్య హాసినీ ।
లపన్తీ రుదతీ కమ్ప్రా రుష్టా దష్టాధరాతురా ॥ ౩౩ ॥
విలోకయతి గోవిన్దే స్మిత్వా చారుముఖామ్బుజమ్ ।
పుష్పాకృష్టిమిషాదూర్ధ్వే ధృతదోర్ములచాలనా ॥ ౩౪ ॥
సమక్షమపి గోవిన్దమవిలోక్యేవ భావతః ।
దలే విలిఖ్య తన్మూర్తిం పశ్యన్తీ తద్విలోకితామ్ ॥ ౩౫ ॥
లీలయా యాచకం కృష్ణమవధీర్యేవ భామినీ ।
గిరీన్ద్రగాహ్వరం భఙ్గ్యా పశ్యన్తీ వికసద్దృశా ॥ ౩౬ ॥
సుబలస్కన్ధవిన్యస్తబాహౌ పశ్యతి మాధవే ।
స్మేరా స్మేరారవిన్దేన తమాలం తడయన్త్యథ ॥ ౩౭ ॥
లీలయా కేలిపాథోజం స్మిత్వా చుమ్బితమాధవే ।
స్మిత్వా భాలాత్తకస్తూరీరసం ఘృతవతీ క్వచిత్ ॥ ౩౮ ॥
మహాభావోజ్జ్వలాచిన్తారత్నోద్భవితవిగ్రహామ్ ।
సఖీప్రణయసద్గన్ధవరోద్వర్తనసుప్రభామ్ ॥ ౩౯ ॥
కారుణ్యామృతవీచిభిస్తారుణ్యామృతధారయా ।
లావణ్యామృతవన్యాభిః స్నపితాం గ్లపితేన్దిరామ్ ॥ ౪౦ ॥
హ్రీపట్టవస్త్రగుప్తాఙ్గీం సౌన్దర్యఘుసృణాఞ్చితామ్ ।
శ్యామలోజ్జ్వలకస్తూరీవిచిత్రితకలేవరామ్ ॥ ౪౧ ॥
కమ్పాశ్రుపులకస్తమ్భస్వేదగద్గదరక్తతా ।
ఉన్మదో జాడ్యమిత్యేతై రత్నైర్నవభిరుత్తమైః ॥ ౪౨ ॥
క్ల్ప్తాలఙ్కృతిసంశ్లిష్టాం గుణాలిపుష్పమాలినీమ్ ।
ధీరాధిరత్వసద్వషపటవాసైః పరిష్కృతామ్ ॥ ౪౩ ॥
ప్రచ్ఛన్నమానధమ్మిల్లాం సౌభాగ్యతిలకోజ్జ్వలామ్ ।
కృష్ణనామయశఃశ్రావావతంసోల్లాసికర్ణికామ్ ॥ ౪౪ ॥
రాగతమ్బూలరక్తోష్ఠీం ప్రేమకౌటిల్యకజ్జలామ్ ।
నర్మభాషితనిఃస్యన్దస్మితకర్పూరవాసితామ్ ॥ ౪౫ ॥
సౌరభాన్తఃపురే గర్వపర్యఙ్కోపరి లీలయా ।
నివిష్టాం ప్రేమవైచిత్త్యవిచలత్తరలాఞ్చితామ్ ॥ ౪౬ ॥
ప్రణయక్రోధసాచోలీబన్ధగుప్తికృతస్తనామ్ ।
సపత్నీవక్త్రహృచ్ఛోశియశఃశ్రీకచ్ఛపీరవామ్ ॥ ౪౭ ॥
మధ్యతాత్మసఖీస్కన్ధలీలాన్యస్తకరామ్బుజామ్ ।
శ్యామాం శ్యామస్మరామోదమధులీపరివేశికామ్ ॥ ౪౮ ॥
సుభగవల్గువిఞ్ఛోలీమౌలీభూషణమఞ్జరీ ।
ఆవైకుణ్ఠమజాణ్డాలివతంసీకృతసద్యశః ॥ ౪౯ ॥
వైదగ్ధ్యైకసుధాసిన్ధుశ్చాటుర్యైకసుధాపురీ ।
మాధుర్యైకసుధావల్లీ గుణరత్నైకపేటికా ॥ ౫౦ ॥
గోవిన్దానఙ్గరాజీవే భానుశ్రీర్వార్షభానవీ ।
కృష్ణహృత్కుముదోల్లాసే సుధాకారకరస్థితిః ॥ ౫౧ ॥
కృష్ణమానసహంసస్య మానసీ సరసీ వరా ।
కృష్ణచాతకజీవాతునవామ్భోదపయఃశ్రుతిః ॥ ౫౨ ॥
సిద్ధాఞ్జనసుధావార్తిః కృష్ణలోచనయోర్ద్వయోః ।
విలాసశ్రాన్తకృష్ణాఙ్గే వాతలీ మాధవీ మతా ॥ ౫౩ ॥
ముకున్దమత్తమాతఙ్గవిహారాపరదీర్ఘికా ।
కృష్ణప్రాణమహామీనఖేలనానన్దవారిధిః ॥ ౫౪ ॥
గిరీన్ద్రధారిరోలమ్బరసాలనవమఞ్జరీ ।
కృష్ణకోకిలసమ్మోదిమన్దరోద్యానవిస్తృతిః ॥ ౫౫ ॥
కృష్ణకేలివరారామవిహారాద్భుతకోకిలా ।
నాదాకృష్టబకద్వేషివీరధీరమనోమృగా ॥ ౫౬ ॥
ప్రణయోద్రేకసిద్ధ్యేకవశికృతధృతాచలా ।
మాధవాతివశా లోకే మాధవీ మాధవప్రియా ॥ ౫౭ ॥
కృష్ణమఞ్జులతాపిఞ్ఛే విలసత్స్వర్ణయూథికా ।
గోవిన్దనవ్యపాథోదే స్థిరవిద్యుల్లతాద్భుతా ॥ ౫౮ ॥
గ్రీష్మే గోవిన్దసర్వాఙ్గే చన్ద్రచన్దనచన్ద్రికా ।
శీతే శ్యామశుభాఙ్గేషు పీతపట్టలసత్పటీ ॥ ౫౯ ॥
మధౌ కృష్ణతరూల్లాసే మధుశ్రీర్మధురాకృతిః ।
మఞ్జుమల్లారరాగశ్రీః ప్రావృషీ శ్యామహర్షిణీ ॥ ౬౦ ॥
ఋతౌ శరది రాసైకరసికేన్ద్రమిహ స్ఫుటమ్ ।
వరితుం హన్త రాసశ్రీర్విహరన్తీ సఖీశ్రితా ॥ ౬౧ ॥
హేమాన్తే స్మరయుద్ధార్థమటన్తం రాజనన్దనమ్ ।
పౌరుషేణ పరాజేతుం జయశ్రీర్మూర్తిధారిణీ ॥ ౬౨ ॥
సర్వతః సకలస్తవ్యవస్తుతో యత్నతశ్చిరాత్ ।
సారణాకృష్య తైర్యుక్త్యా నిర్మాయాద్భుతశోభయా ॥ ౬౩ ॥
స్వశ్లాఘం కుర్వతా ఫుల్లవిధినా శ్లాఘితా ముహుః ।
గౌరీశ్రీమృగ్యసౌన్దర్యవన్దితశ్రీనఖప్రభా ॥ ౬౪ ॥
శరత్సరోజశుభ్రాంశుమణిదర్పనమాలయా ।
నిర్మఞ్ఛితముఖామ్భోజవిలసత్సుషమకణా ॥ ౬౫ ॥
స్థాయీసఞ్చారిసూద్దీప్తసత్త్వికైరనుభావకైః ।
విభావాద్యైర్విభావోఽపి స్వయం శ్రీరసతాం గతా ॥ ౬౬ ॥
సౌభాగ్యదున్దుభిప్రోద్యద్ధ్వనికోలాహలైః సదా ।
విత్రస్తీకృతగర్విష్ఠవిపక్షాఖిలగోపికా ॥ ౬౭ ॥
విపక్షలక్షాహృత్కమ్పాసమ్పాదకముఖశ్రియా ।
వశీకృతబకారాతిమానసా మదనాలసా ॥ ౬౮ ॥
కన్దర్పకోటిరమ్యశ్రీజయిశ్రీగిరిధారిణా ।
చఞ్చలాపఙ్గభఙ్గేన విస్మారితసతీవ్రతా ॥ ౬౯ ॥
కృష్ణేతివర్ణయుగ్మోరుమోహమన్త్రేణ మోహితా ।
కృష్ణదేహవరామోదహృద్యమాదనమాదితా ॥ ౭౦ ॥
కుటిలభ్రూచలాచణ్డకన్దర్పోద్దణ్డకర్ముకా ।
న్యస్తాపఙ్గశరక్షేపైర్విహ్వలీకృతమాధవా ॥ ౭౧ ॥
నిజాఙ్గసౌరభోద్గారమదకౌషధివాత్యయా ।
ఉన్మదీకృతసర్వైకమదకప్రవరాచ్యుతా ॥ ౭౨ ॥
దైవాచ్ఛ్రుతిపథాయాతనామనీహారవాయునా ।
ప్రోద్యద్రోమాఞ్చశీత్కారకమ్పికృష్ణమనోహరా ॥ ౭౩ ॥
కృష్ణనేత్రలసఞ్జిహ్వాలేహ్యవక్త్రప్రభామృతా ।
కృష్ణాన్యతృష్ణాసంహారీ సుధాసారైకఝర్ఝరీ ॥ ౭౪ ॥
రాసలాస్యరసోల్లాసవశీకృతబలానుజా ।
గానఫుల్లీకృతోపేన్ద్రా పికోరుమధురస్వరా ॥ ౭౫ ॥
కృష్ణకేలిసుధాసిన్ధుమకరీ మకరధ్వజమ్ ।
వర్ధయన్తీ స్ఫుటం తస్య నర్మాస్ఫలనఖేలయా ॥ ౭౬ ॥
గతిర్మత్తగజః కుమ్భౌ కుచౌ గన్ధమదోద్ధురౌ ।
మధ్యముద్దామసింహోఽయం త్రిబల్యో దుర్గభిత్తయః ॥ ౭౭ ॥
రోమాలీ నాగపాశశ్రీర్నితమ్బో రథ ఉల్బనః ।
దాన్తా దుర్దన్తసామాన్తాః పాదాఙ్గుల్యః పదాతయః ॥ ౭౮ ॥
పాదౌ పదతికాధ్యక్షౌ పులకః పృథుకఙ్కతః ।
ఊరూ జయమణిస్తమ్భౌ బాహూ పాశవరౌ దృఢౌ ॥ ౭౯ ॥
భ్రూద్వన్ద్వం కర్ముకం క్రూరం కటాక్షాః శనితాః శరాః ।
భాలమర్ధేన్దుదివ్యాస్త్రమఙ్కుశాణి నఖాఙ్కురాః ॥ ౮౦ ॥
స్వర్ణేన్దుఫలకం వక్త్రం కృపణీ కరయోర్ద్యుతిః ।
భల్లభారః కరాఙ్గుల్యో గణ్డౌ కనకదర్పనౌ ॥ ౮౧ ॥
కేశపాశః కటుక్రోధః కర్ణౌ మౌర్వగుణోత్తమౌ ।
బన్ధుకాధరరాగోఽతిప్రతాపః కరకమ్పకః ॥ ౮౨ ॥
దున్దుభ్యాదిరవశ్చూడాకిఙ్కినీనూపురస్వనః ।
చిబుకం స్వస్తికం శాస్తం కణ్ఠః శఙ్ఖో జయప్రదః ॥ ౮౩ ॥
పరిష్వఙ్గో హి విద్ధ్యస్త్రం సౌరభం మదకౌషదమ్ ।
వాణీ మోహనమన్త్రశ్రీర్దేహబుద్ధివిమోహినీ ॥ ౮౪ ॥
నాభీ రత్నాదిభాణ్డారం నాసాశ్రీః సకలోన్నతా ।
స్మితలేశోఽప్యచిన్త్యాది వశీకరణతన్త్రకః ॥ ౮౫ ॥
అలకానాం కులం భీష్మం భృఙ్గాస్త్రం భఙ్గదాయకమ్ ।
మూర్తిః కన్దర్పయుద్ధశ్రీర్వేణీ సఞ్జయినీ ధ్వజా ॥ ౮౬ ॥
ఇతి తే కామసఙ్గ్రామసామగ్యో దుర్ఘటాః పరైః ।
ఈదృశ్యో లలితాదీనాం సేనానీనాం చ రాధికే ॥ ౮౭ ॥
అతో దర్పమదాద్యూతం దానీన్ద్రమవధీర్య మామ్ ।
మహామారమహారాజనియుక్తం ప్రథితం వ్రజే ॥ ౮౮ ॥
సుష్ఠు సీమాన్తసిన్దూర తిలకానాం వరత్విషామ్ ।
హారాఙ్గదాదిచోలీనాం నాసామౌక్తికవాససామ్ ॥ ౮౯ ॥
కేయూరముద్రికాదీనాం కజ్జలోద్యద్వతంసయోః ।
ఏతావద్యుద్ధవస్తూనాం పరార్ధ్యానాం పరర్ధ్యతః ॥ ౯౦ ॥
తథా దధ్యాదిగవ్యానఆమమూల్యానానాం వ్రజోద్భవాత్ ।
అదత్త్వా మే కరం న్యాయ్యం ఖేలన్త్యో భ్రమతేహ యత్ ॥ ౯౧ ॥
తతో మయా సమం యుద్ధం కర్తుమిచ్ఛత బుధ్యతే ।
కిం చైకోఽహం శతం యూయం కురుధ్వం క్రమశస్తతః ॥ ౯౨ ॥
ప్రథమం లలితోచ్చణ్డా చరతాచ్చణ్డసఙ్గరమ్ ।
తతస్త్వం తదను ప్రేష్ఠసఙ్గరాః సకలాః క్రమాత్ ॥ ౯౩ ॥
అథ చేన్మిలితాః కర్తుం కామయధ్వే రణం మదాత్ ।
అగ్రే సరత తద్దోర్భ్యాం పినష్మి సకలాః క్షణాత్ ॥ ౯౪ ॥
ఇతి కృష్ణవచః శ్రుత్వా సాటోపం నర్మనిర్మితమ్ ।
సానన్దం మదనాక్రాన్తమానసాలికులాన్వితా ॥ ౯౫ ॥
స్మిత్వా నేత్రాన్తబాణైస్తం స్తబ్ధీకృత్య మదోద్ధతమ్ ।
గచ్ఛన్తీ హంసవద్భఙ్గ్యా స్మిత్వా తేన ధృతాఞ్చలా ॥ ౯౬ ॥
లీలయాఞ్చలమాకృష్య చలన్తీ చారుహేలయా ।
పురో రుద్ధపథం తం తు పశ్యన్తీ రుష్టయా దృశా ॥ ౯౭ ॥
మానసస్వర్ధునీం తూర్ణముత్తరీతుం తరీం శ్రితా ।
కమ్పితాయాం తరౌ భీత్యా స్తువన్తీ కృష్ణనావికమ్ ॥ ౯౮ ॥
నిజకుణ్డపయఃకేలిలీలానిర్జితమచ్యుతమ్ ।
హసితుం యుఞ్జతీ భఙ్గ్యా స్మేరా స్మేరముఖీః సఖీః ॥ ౯౯ ॥
మకన్దమకులస్యన్దిమరన్దస్యన్దిమన్దిరే ।
కేలితల్పే ముకున్దేన కున్దవృన్దేన మణ్డితా ॥ ౧౦౦ ॥
నానాపుష్పమణివ్రాతపిఞ్ఛాగుఞ్జాఫలాదిభిః ।
కృష్ణగుమ్ఫితధమ్మిల్లోత్ఫుల్లరోమస్మరఙ్కురా ॥ ౧౦౧ ॥
మఞ్జుకుఞ్జే ముకున్దస్య కుచౌ చిత్రయతః కరమ్ ।
క్షపయన్తీ కుచక్షేపైః సుసఖ్యమధునోన్మదా ॥ ౧౦౨ ॥
విలాసే యత్నతః కృష్ణదత్తం తామ్బూలచర్వితమ్ ।
స్మిత్వా వామ్యాదగృహ్ణానా తత్రారోపితదూషణమ్ ॥ ౧౦౩ ॥
ద్యూతే పాణికృతాం వంశీం జిత్వా కృష్ణసుగోపితామ్ ।
హసిత్వాచ్ఛిద్య గృహ్ణానా స్తుతా స్మేరాలిసఞ్చయైః ॥ ౧౦౪ ॥
విశాఖాగూఢనర్మోక్తిజితకృష్ణార్పితస్మితా ।
నర్మాధ్యాయవరాచార్యా భారతీజయవాగ్మితా ॥ ౧౦౫ ॥
విశాఖాగ్రే రహఃకేలికథోద్ఘాటకమాధవమ్ ।
తాడయన్తీ ద్విరబ్జేన సభ్రూభఙ్గేన లీలయా ॥ ౧౦౬ ॥
లలితాదిపురః సాక్షాత్కృష్ణసమ్భోగలఞ్ఛనే ।
సూచ్యమానే దృశా దూత్యా స్మిత్వా హుఙ్కుర్వతీ రుషా ॥ ౧౦౭ ॥
క్వచిత్ప్రణయమానేన స్మితమావృత్య మౌనినీ ।
భీత్యా స్మరశరైర్భఙ్గ్యలిఙ్గన్తీ సస్మితం హరిమ్ ॥ ౧౦౮ ॥
కుపితం కౌతుకైః క్ర్ష్ణం విహారే బాఢమౌనినమ్ ।
కతరా పరిరభ్యాశు మానయన్తీ స్మితాననమ్ ॥ ౧౦౯ ॥
మిథః ప్రణయమానేన మౌనినీ మౌనినం హరిమ్ ।
నిర్మౌనా స్మరమిత్రేణ నిర్మౌనం వీక్ష్య సస్మితా ॥ ౧౧౦ ॥
క్వచిత్పథి మిలాచన్ద్రావలీసమ్భోగదూషణమ్ ।
శ్రుత్వా క్రూరసఖీవక్త్రాన్ముకున్దే మానినీ రుషా ॥ ౧౧౧ ॥
పాదలక్షారసోల్లాసిశిరస్కం కంసవిద్విషమ్ ।
కృతకాకుశతం సాస్రా పశ్యన్తీషాచలద్దృశా ॥ ౧౧౨ ॥
క్వచిత్కలిన్దజాతీరే పుష్పత్రోటనఖేలయా ।
విహరన్తీ ముకున్దేన సార్ధమాలీకులావృతా ॥ ౧౧౩ ॥
తత్ర పుష్పకృతే కోపాద్వ్రజన్తీ ప్రేమకారితాత్ ।
వ్యాఘోతితా ముకున్దేన స్మిత్వా ధృత్వా పటాఞ్చలమ్ ॥ ౧౧౪ ॥
విహారశ్రాన్తితః కాన్తం లలితాన్యస్తమస్తకమ్ ।
వీజయన్తీ స్వయం ప్రేమ్ణా కృష్ణం రక్తపటాఞ్చలైః ॥ ౧౧౫ ॥
పుష్పకల్పితదోలాయాం కలగానకుతూహలైః ।
ప్రేమ్ణా ప్రేష్ఠసఖీవర్గైర్దోలితా హరిభూషితా ॥ ౧౧౬ ॥
కుణ్డకుఞ్జాఙ్గనే వల్గు గాయదాలీగణాన్వితా ।
వీణానన్దితగోవిన్దదత్తచుమ్బేన లజ్జితా ॥ ౧౧౭ ॥
గోవిన్దవదనామ్భోజే స్మిత్వా తామ్బూలవీటికామ్ ।
యుఞ్జతీహ మిథో నర్మకేలికర్పూరవాసితామ్ ॥ ౧౧౮ ॥
గిరీన్ద్రగాహ్వరే తల్పే గోవిన్దోరసి సాలసమ్ ।
శయనా లలితావీజ్యమానా స్వీయపటాఞ్చలైః ॥ ౧౧౯ ॥
అపూర్వబన్ధగాన్ధర్వాకలయోన్మద్య మాధవమ్ ।
స్మిత్వా హరితతద్వేణుహారా స్మేరవిశాఖయా ॥ ౧౨౦ ॥
వీణాధ్వనిధుతోపేన్ద్రహస్తాచ్చ్యోతితవంశికా ।
చూడాస్వనహృతశ్యామదేహగేహపథస్మృతిః ॥ ౧౨౧ ॥
మురలీగిలితోత్తుఙ్గగృహధర్మకులస్థితిః ।
శృఙ్గతో దత్తతత్సర్వసతిలాపోఽఞ్జలిత్రయా ॥ ౧౨౨ ॥
కృష్ణపుష్టికరామోదిసుధాసారాధికాధరా ।
స్వమధురిత్వసమ్పాదికృష్ణపాదామ్బుజామృతా ॥ ౧౨౩ ॥
రాధేతి నిజనామ్నైవ జగత్ఖ్యాపితమాధవా ।
మాధవస్యైవ రాధేతి జ్ఞాపితాత్మా జగత్త్రయే ॥ ౧౨౪ ॥
మృగనాభేః సుగన్ధశ్రీరివేన్దోరివ చన్ద్రికా ।
తరోః సుమఞ్జరీవేహ కృష్ణస్యాభిన్నతాం గతా ॥ ౧౨౫ ॥
రఙ్గినా సఙ్గరఙ్గేన సానఙ్గరఙినీకృతా ।
సానఙ్గరఙ్గభఙ్గేన సురఙ్గీకృతరఙ్గదా ॥ ౧౨౬ ॥
ఇత్యేతన్నామలీలాక్తపద్యైః పీయూషవర్షకైః ।
తద్రసాస్వాదనిష్ణాతవసనావాసితాన్తరైః ॥ ౧౨౭ ॥
గీయమానం జనైర్ధన్యైః స్నేహవిక్లిన్నమానసైః ।
నత్వా తాం కృపయావిష్టాం దుష్టోఽపి నిష్ఠురః శఠః ॥ ౧౨౮ ॥
జనోఽయం యాచతే దుఃఖీ రుదన్నుచ్చైరిదం ముహుః ।
తత్పదామ్భోజయుగ్మైకగతిః కాతరతాం గతః ॥ ౧౨౯ ॥
కృత్వా నిజగణస్యాన్తః కారుణ్యాన్నిజసేవనే ।
నియిజయతు మాం సాక్షాత్సేయం వృన్దావనేశ్వరీ ॥ ౧౩౦ ॥
భజామి రాధామరవిన్దనేత్రాం
స్మరామి రాధాం మధురస్మితాస్యామ్ ।
వదామి రాధాం కరుణభరార్ద్రాం
తతో మమాన్యాస్తి గతిర్న కాపి ॥ ౧౩౧ ॥
లీలానామాఙ్కితస్తోత్రం విశాఖానన్దదాభిధమ్ ।
యః పఠేన్నియతం గోష్ఠే వసేన్నిర్భరదీనధీః ॥ ౧౩౨ ॥
ఆత్మాలఙ్కృతిరాధాయాం ప్రీతిముత్పద్య మోదభాక్
నియోజయతి తాం కృష్ణః సాక్షాత్తత్ప్రియసేవనే ॥ ౧౩౩ ॥
శ్రీమద్రూపపదామ్భోజధూలీమాత్రైకసేవినా
కేనచిద్గ్రథితా పద్యైర్మాలాఘ్రేయా తదాశ్రయైః ॥ ౧౩౪ ॥
ఇతి శ్రీరఘునాథదాసగోస్వామివిరచితస్తవావల్యాం
శ్రీవిశాఖానన్దాభిధస్తోత్రం సమ్పూర్ణమ్ ।